#خنجر_لغضنفر
#البارت_العشرون_٢٠
#حنين_حاتم
انعام
وكأني بألف عامٍ من الذكريات
ذكريات رحلةً بخيلة كللت بفقد الأحبة وضياع الشغف بكل ماهوة حولي حتى الجمادات
ايقنت أن الأرض لم تكن يوما مواطن لنا
بل لأشخاص هم مواطننا
مواطننا التي تحنو اليها روحنا مهما هامت في ابدية الضياع
مواطننا التي تسحبنا اليها جذورنا على الدوام
انها رحلةٌ تهاوى فيها كل مابداخلي ولم اخرج منها سوى بقلبٍ حزين كان لذكراكم جل الفضلُ في بقائه حيا
يحتضن اضلعي وتتهاوى صرخاتي فيه معلنتاً سقوطي في سقيم عشقٍ قاومته بكل يايمكن للمرء أن يقاوم وساوس نفسه
فيالها من رحلةٍ قاسية
افقدتني لذة الحياة
حتى عدتُ هنا
لم اراك انسانًا بل رأيتك عالمًا
عالمًا خرجتُ منه بأقل قدرٍ من الأمتعة
فياعالمي ويامحطات استراحتي إني والله طفت اصقاع العالم ولم اجد نفسي
وعند عتبتكم وجدتني بكل بديهيتي وسجانية خَلقي
جئتك كلي كتفاً
فخذني كتفاً وإعطني حزنك
.
.
.
غضنفر ...
ولكني لم اطلب كتفاً لأبكي عليه
اوعيناً لتناضرني حزنا على ما آلت اليه روحي
ولا اذناً لأقص عليها مايجول بخاطري ليلاً
اردتُ فقط ان يلتهمني ذلك الحزن دفعةً واحدة
فلقد عشت بين فكيه يمضغني سنيناً طوال
فبأي حياةً سأقاسمك
وكيف لي أن استند عليكِ وقد اذاب الحزن اضلعي
فياصغيرتي ويابدري ياشمسي التي اسقطت ليلي العتيم
جئتكِ متعباً كمن يركض منذ ولادته ولم يصل إلا الساعة
جئتكِ بباقةٍ من الحزن والكثير الكثير من القصائد الفتية
وتنهيدةً بججم الكون
بلكاد تحول شفاهي دون خروجها .....حنين حاتم
صوتة يهمس وعينة تندار على عمتة
ها عمة جبتوها حتة تكسرون مجاذيفي بيها
بدموع رديت
وروح بابا لمااحلف بيها جذب محد جابني اني اجيتك برجلية ويامصعبها جيتي
بس هانت كل لصعب
اني روحي هانت يمك استصعب لجية ؟
موسهلة علية اعوف اهلي ووضيفتي وإستقراري
ولاسهلة علية اجازف وانزل على ضرة
ولاسهلة اعيش بوسط ناس مااشبهم بكلشي
واني ادري عيشتك صعببة
بس اني بايعة لراحة ومشترية لتعب وياك
اني جاية اغوص بأعماق حزنك وأوصل لكلبك
بعد لسويتة اريد اشوف بشنو تجازيني
جيتك ولو رديتني هلمرة ثق متشوف وجهي للموت ولايجمعنة بعد مكان واحد
انة أخبر روحي غركَان
بس مادريتج حمل لو كَشاية
بلله عليج شنسة وانة كلما اعاين على روحي من دون كل لبشر لا اهل لا ربع
ضيعتهم مدري انة لضعت
شنسة كليلي شوغة كلبي كسرة خاطري من لزغر
لو انسة لشماتة
انة ماجنت ادري لأحلام حلوة غير من طبيتينا
وحكَ غربة قيصر انة لليوم ماادري اكو فرق بين لحلم ولكابوس
انة مااعرف لأحلام شني
انة هذا لكدامج تخاف مني لفروخ ولزلم تشيلي حساب
اخاف من جية اليل
اليل اليجيبلي وجه ابوي وشيبتة لدامية
وصرخة امي لحزيت ركبتها بيدي وحزيت وياها راحتي ومن لعرج حشيتها
اني مااستاهل بعد كل مجازفتي وكل لسويتة مااستاهل تنسة لخاطري
يعني اروح لمحمد
احش رجليج
بتسامة عمتة وصوتها ليهمس
جا ارضة بيها جايتك من اخر لدنية وتردها
انة خايف عليها وروح ابوي خايق عليها
من شنو
مني
بس اني مااخاف منك ادري بمعزتي عندك
انة مااضمن روحي ولاضرفي ولا اضمن لجايني شني وانتي بزر نستلة مابيج على عيشتنا
جريت جنطتني وكمت الملم كرامتي لبعثرتها بحضرتة بدل لمرة الف
ايدة حييل سحبتني ويهمس
تطشرنا بدربكم رماد بجعب دلة ومن يلمنا
وعلى عشك لحضيرية يهلوادم من يلومنا
اعشكنكم مثل عشك ابونة لزين لأمنة
وبلكب حفرن تراسيمك يماي لعين ويانفس لبصدري صاعد نازل تلوعني طرواك .....حنين حاتم
صوت فدعم يصيح الله
وعمتة تهمس يمممة شحلو مناطيكك يغضنفر
يهنيالها نعيمة على هلعشكَ
لخجل يرسم على محياي اجمل الوحات
وصوتة يهمس
لمخنث عرس
خوش رجال صاير
خل اكوم على حيلي وانة اعرس علي ان شاء الله
صوت عمتة بفرح تهمس
غضنفر يعني تعوف جليل وولدة وتعيش،وتنسا
لا انة ماكلت هيج
هية شرطت علي وانة هم عدي شرط
هي خيرتني لو اقبل لو ماتشوف وجهي للأبد
وانة اخيرها لو تقبل لو تقبل
وشني شرطك
شرطي جليل وولدة اعوفهم عبن انة صوبت ثنين منهم وكتلت واحد
بس ولد سماعيل انة كتالهم لوبعد ميت سنة
ولو يطيرون لآخر لكون وين مااضفر بيهم اكتلهم
انعام ..ليش ولد إسماعيل شعليهم
غضنفر.. ويلاد إسماعيل غدروني وجانو ناوين على كتلي بس ارادة الله اقوة منهم
تقرب الة فدعم مصدوم يضرب ايد بايد
غضنفر احجي شلون غدروك
حجولنة غير شي
وانة اعلك بجثة عبود غدروني ووجهو سلاحهم علية وشردو جليل وولدة لباقين
وترة لاجليل ولا ولدة بلمستشفى هنا
مطلعيهم لمستشفى برة لمحافضة كلها
لحكتهم انة ما عدي سلاح وهمة سلاحهم فارغ
تضاربت وية حسنين وخذاني حسن غدر من ورة ضهري وضربني يم شطيط لسعداويين ولفلح كالولي همة لشامريني بلشط
فدعم:- لاياولد لحرررررام
وطلعو روحهم انبياء وكالولنا ولد جليل همة لرامين عليك وهمة لضاربيك وشامريك بلشط
غضنفر:- جان ضنهم اموت بس ياموت ليخلصهم مني
وعبود قبل مااطلع بروحة من لخوف حجالي كلشي
من كتل ابوي على ايد عمي جليل
لحد من شوفوني امي بغرفة ياس
بعيونة ندار علية
انة ماوعدج اعوفهم بس اوعدج مااعرض نفسي لخطر ماطولج على ذمتي واوعدج ماارملج ولا يتم جهالنا ولاعيشهم لآنة عشتة
راسي للأرض وشفافي تنطق بلموافقة ولخجل ينساب من بين كلماتي لذابت من مجرد شوفتة
بقينة ساعة يمة ورجعنة اني وعمة امريكا وبقة يمة فدعم
لبيت جان هوسة
نسوان ولد جليل بغرفة محبوسات ممنوعات من لخروج وجدهم خالهن طعم عسا يرجعون جليل وولدة علمودهن ويضفر بيهم
محد يعرف شنو ناويلهم
بس بيبي شكرية اكدتلي انو كل ليكولة جدو ابو خليل مجرد كلام ميكدر يضرهم كلبة مينطي
ونعناعة ايضا الها تأثيرها
صوتي يهمس الها
بيبي يعني ماراح نخلص منهم
لا يجدة جدج محروك كلبة ومصدوم من الي عرفة
محروك على خليل لجان رويحتة من لدنية
وندمان عبن تسرع وعبن بلحضة غضب وهوة يثأر لروح ابنة لمغدور دفع غضنفر وخلا يكتل امة
بس ماسوة هلشي غير من ضغط نعناعة وجليل
تقربت الي وتهمس
جليل الله لايوفقة مدري شسوة للمرحومة وخلاها تتسودن من ديارنا وتشرد كل مدة لبيت عمتها ويردها جدج
وجانو يضغطون على جدج واضكر مرة من لمرات
رد للبيت جان كللش مختاض
سألتة شمالك
كال شفت شوفة ماتسر ولو شافتها لودام تتصخم وجوهنا
سعلتة شنهي لشوفة مارضة يحجيلي بس كال مرت لمرحوم لازم نشوفلها صرفة
عبن رويحتها خضرة وماجاي تركد راح تخزينة
مادري بوكتها ششاف بس انة مااخون مرت لمرحوم عبن عاشت بيننا وماشفنة منها كلشي
بت اصول ومتربية واحسن من كل جنايننة
جانت دنية مغرب صبو لعشة للزلم بلديوان برة لأن اكو اقاربهم من بعيد كلش
ولنسوان بلصالة
بقيت اني بلغرفة جنت ابدل
دخلت علية زوري بطنها جبيرة
تقربت وتلهث
يلله خية تعاي تعشي
استحي
ياااع تستحين خايبة انتي وحدة منة
تعاي
اخذتني من ايدي
دشداشة ماعندي جنت لابسة كوستم
تنورة وسترة لونهن مشمشي مشطب بأسود وشادة لربطة وبداخل ياخة لقميص لأبيض مدخلتها
اكلهم لمعتاد بلعزائم ثريد لحم وتمن وعلي لحم ولبن وخضرة
فاكهة مشفتهم يحطوها علسفرة ابد
عدا لركي ولبطيخ ولرطب
جانن حجيات تلاثة كبالي من زوري عرفتهن اخوات لحجي ابو خليل هاي جانت اول مرة اشوفهن بيها
وحدة منهن توجهتلي بسؤال
ماكلتيلنة يحلوة هلج منين
وشتكَربيلنة انة ماشايفتج كبل
صوتي بتلعثم يبحبح واني ابتلع اللكمة الي حشرت بزردومي وقبل مااتفوه وارد عليها
صوت سلامة لتحتضن ضهر ابنها وتزق بي اكل بغل وحقد ردت عليها بصوت عالي
ماتكَرب النا شي يدة جاية ضيفة إتحمد لسلامة لغضنفر وترد لأهلها
جريت كلاص لماي ابتلع اللكمة
مقهورة على نفسي الي رخصها لحب وحلاني اقبل اكون ثانية واخوض حرب وية انسانة مااكو اي وسيلة للتعايش وياها وتقبلها
خصوصا هي لليوم ممتقبلة كون غضنفر ميريدها والي ضهرلي من ردة فعلها
هي لليوم تودة وتحاول توصل الة
ومتانية اشوف صدة الها بعيني عسا اطمأن انو اني ماتسببت بهجمان بيت وخراب حياة وتشتت استقرارهم
كملو غدة وراحن يغسلن مواعين
عيني على نعناعة الي لمت من لفضالة وسوت صينية ونطتهن اكل من لباب
رحت يم عمتهم امريكا لجانت تشرب جاي هية ولعجايز
وتهاني كاعدة يمهن
كعدت بصفها وهمست الها عن لايسمعن لباقيات
عمة موخطية ذني حابسيهن هنة ولأطفال شنو ذنبهن
خطية لوجعة وسبع وجعات كون
نسيتي من قشمرنج تشردين حتة يضل غضنغر حايط كونكريت لرجولتهن
حتة يضل معتزل لزواج عبن درن يحبج ورايدج حلالة ولأول مرة بحياتة كلبة دك لانسانة
تردين اطلعهن هسة اخليهن يفترسنج
خاب شمالج شمام صيف
تهاني تقربت الي وتهمس
لاتضلين كلبج رجيج لغضنفر رايدلة كلب حتة تعيشين ويا
ليش تخوفيني
موش اخوفج خية غضنفرنة دنياتة صعبة قوي كلبج
وصيريلة عون
تقرب الي حمزة ابن غضنفر
يشبه امة حيل حتة قصير مثلها
بيدة كلاص شربت وحلكة متلون احمر لحد خشمة
تقرب الي سحبتة ردت ابوسة
مااحس غير كلاص لشربت نصب بصدري ونزل على رجلية
ماعرف اذا جان متعمد لو شيطنة اطفال
زوري صاحت علي
لا عوفي هوة موقصدة
رحت للغرفة اطلع ملابس متربعة بلكاع وانفش بجنطتي
حسيت لباب نفتحت
قبل مااندار حسيت شي نكع ضهري كلة
نداريت واشوفة ينهزم بكل سرعتة ولكلاص بيدة
زوري عاطت علي
بلمطبخ على وجهة وكع وتطشر لكلاص
صوتها تصيح اسم الله يمة
حصواية بعين لماصلة علنبي
وحدة من لحجيات لكاعدات عاطت بيها
حصواية بذاك لمجان كون ولج شني غصدج
شني ماشايفين فروخ احنة
بتلعثم ردت تبرر
لايدة انة ماقصدنج
اقصد وحدة عينها نكسة حشاكم عبن عجزت ولساها لاعرس ولاخلفة
عمة امريكا بشماتة ترد عليها
هاي لتحجين عليها اضنها راح تعجزج عن قريب
شنهي قصدج
ماكو شي شيلي لفرخ ولمي لكَزاز وهاي سوالفج بطليها وحكَ الله لوما لخطار
ااااخ حيل تعض اصبعها وتأشر الها تطب لغرفتها
عدن ايام اني يمهم مااتصلت بأمي اخاف من ملامتها وعصبيتها
طلعو وبقة بغرفتة لولد يدارون بي
خلال هلأيام جدهم جان كلش تعبان
صحتة بلنازل ويشتكي من كلبة
بيبي شكرية تكول حكَة ويلادة واحد كتل لثاني ولاحفاد دخل لثار بينهم لحد يلومة
هوة بين نارين
نار خليل ومرتة لماتو ضلم وغضنفر لضاع بسبب افعالهم
ونار جليل واحفادة الي مايكدر يأذيهم
صعبة علي وصعبة على كل أب ينحط بهيج موقف
وخصوصا هوة مشارك بكتل ام غضنفر
جان محروك على ابنة لمات مغدور وشاف مرتة بعينة تخونة واضن مواي شوفة اضن جليل مشوفهيا بوضعية صعبة
عدن اسبوعين غضنفر بدة يتحسن وجدهم بدة يستوعب لصار
غضنفر شد عضمة وكام على حيلة
طول هلمدة عمتهم امريكا يمنة ولهلسبب سللامة تخاف تندك بية
واول ماتحسن غضنفر كالي نطيني رقم تلفون اهل محمد
نطيتة الة ثاني يوم لصبح دكت لباب علية بيبي شكرية
فتحتها افرك بعيوني لوحدي بلغرفة انام مومثل قبل
همست الي
يمة لبسي وطلعي غضنفر يريدج
لابسة حجابي وملابسي مستورة
لاجدة موش علحجاب لبسي مال طلعة يكول
وين يريد بية
ماكالي بس كال خل تلبس ونطلعلي انة وفدعم بلسيارة ننطرها
رحت غسلت ولبست
طلعت برة تمشيت الهم
فتحت لباب ركبت صبحت عليهم وسالت
وين مغبشين بينة
نروح نعرس على لمختث
شنو يعني
خاب ماتكليلي وين لكيتي هذا
شبي
كال اطلكها بس تدفع فلوس لشيخ هية
انة ماشايف هيج بشر
بلله عليج بيا زبالة لكيتي
بمزبلة حضي
بعد ساعات تعب وصلنة لبغداد
ويم لشيخ فسخنة
وطلعت من لمكتب فرحانة
ومنا بتديت اول محطات حياتي
حياة ليست كأي حياة
انها كمن يسبح عكس التيار
كمن يجاري لعاصفة
وكمن يقف مكتوف لأيدي منتضرا لزلزال من داخل منزله
رجعنة للبيت جانت دنية ليل ولكل نايمين
نزلنة وفدعم بقة بلسيارة
صعد علي غصنفر يحجي ويا
ها ماتنزل شمتاني
دربكم غير عن دربي
انة اتوكل للحبيب
مو اكعدلك جدي تدري بي شيسوي
لا ماتسويها اعرفنك
لاتطوخ لاتروح تسيس بلبزل وتخيس
انة اخوك يغضنفر
وهمة يحجون دخلت
بوجهي للغرفة وغضنغر بلأستقبال دخل
شوية ونفتحت لباب مال غرفة سللامة
فتحتة على كيف وعاينت
جانت تتخنس ووياها حمزة راحت للأستقبال
احس جزء من كلبي تبعها
ماعرف شوكت لحكتها وبباب لأستقبال وكفت اتسنط
ماسمعت صوت
تانيتها دخلت لغرفتها وفتحت لباب وطبيت من باب لمطبخ اريد اروح للغرفة
باب لاستقبال مفتوحة
جان متمدد وحمزة بحضنة
ندار على صوت خطواتي
قبل مااطب للغرفة ادي سحبتني
وشفافة تهمس
وين جنتي
برة شعليك بية
صوتة يردد يم اذاني
يااااع شلون شعلية
شنو جاي تحاسبني وانت لمسعدة جانت يمك الها اكثر من ربع ساعة
اويللاااااه شني هلعصبية
بوية علكيفج راح يطكَلج عرج
يهمس ويبتسم وعيونة مسهبة ويتعمد يحط عينة بعيني
وخر عني اريد انام
ماراح يجي لعينج نوم تعرفيني بيج
بس خل اكلج شي
وحكَ هاي لمسية مالمتنة غرفة سوة من يوم طلعتج
عدا الليلة لصار بيها حمزة
الله كاتبلة يصير
وشعدها جاية يمك
حمزاوي يريدني ويردها ملعب
يجي يمي يريدها
يروح يمها يريدني
ضلت يمة علما نام لولتلة وراحت
ولج انة عيني مافتحتها من دشت لديوانية لحد ماطلعت انة ايدي على عيوني ومغمض
انة عمر ماشتهيت شوفة وجها
اشتهيها هسة
وانتي حذاي
انة لو اريدها من زمان هية كبالي حلالي ومحد يمنعني عنها
بس انة هذا لمانعني
ايدة سحبت ايدي وعلى يسار صدرة خلاها
سحبتها بخفة وهمست
خل اروح انام قبل مايطلع احد
بصوت عالي ضحك
شتعلت صفحة لحب واهلة خاب نامي
نامي نوم لعافية يعافية كلبي لمعلعل
غير لابتسامة وسرحان عيوني ورجفة ادية مايبدر مني شي
دخلت وسديت لباب
وورة لباب بلكاع كمبصت
كأن جسدي نفتح ودخلتلة روحي ستوها
بهاي لغرفة ندفنت روحي وهسة رجعتلي
سبحان الي خلق لحب وجمع كلوب لايمكن يجمعها اي سبب ثاني
وسبحان الي خلا لذة لحياة ومتاعها
نمت ليلتها نومة امااان
ماااذكر نمت مثلها غير بعهد بابا
فزيت على صوت هوستهم
وفتحة لباب ودخلة زوري وتهاني وبسعاد علية
بسعاد وليدها يشبهها اسمراني ودمة يلعب
وزوري بطنها كلش جبيرة
تهاني شكلها ميشبههم ابد
خدود كأن تفاحتين مطبوعات بيهن ووجه دائري مشايفة مثل تركيبتة وكل ملامحها زغار عيونها بيهن جرة مثل ليابانين ضحكتها وفطاريتها احلى مابيها
لساها تحضن لقريب ولبعيد
ومن تسلم تشم بقوتها ولبوسة كأن ناوية تشلع خدي بيها
احس كل لمحنة بملكاهم وسوالفهم
احس حبهم فطري ومابي دغش
ماعدهن غيرة ولا احقاد ولاعدهن حب لأنا
تقربت الي تهاني تضحك وتكركر بية
خاب سمنيلج شوية شني غضنفر يفطسج ترة
ولج عيب ستحي
دخلت بيبي شكرية وبساع دخلت علخط
اي شني جدة تردين ولدنة ينام على عضام منا وغاد تكعدين يمي وكت لاكل وانة ازقج
بقيت اضحك وخجلانة من كلامهن كلما اكول عيب يزيدن تالي سكتت
صوت جدورة تتركع
انعام:- هاي شنو
زوري:- هاي سللامة تطلع حركتها بلمواعين مالاكية واحد تطلع حركتها بي
صوتي بهمس ودمعتي نزلت
انعام:- بيبي وزوري وبسعاد وتهاني اني ليوم اريد احلفكم لأن اعرف لجاي صعب وامانة الله تحجون لصدك
غضنفر متخذ سللامة زوجة لو لاء
ضحكن اربعتهن
بيبي شكرية:- وحك شارة جدج اشهر يومية تدش علي للدوانية تتخنس بأتك شكل ويطردها
وانة بهاي عيوني لتاكلهن لدود اشوفنها ترد لحجرتها تبجي
وحجايتة الها
لمرة لتتجرأ تطلب يبدلون رجلها بولد عمة علمود متاع ليل تحرم علي ليوم لدين
ضلت هيج الى ان جزعت
بيبي اني هم اخاف من لحوبة
هذا لشي هم بي حرام علي
وانتي شلج غرض لحرام علي موعليج
هوة مايريدها
ومالة نفس بيها موبس لأن يحبج
بس لأن هية سوايتها صلفة
طلعت تتصل بأهلها بليل بدون علمنة وتكل لامها لسا مااخذني
ورداها غضنفر بلحضة لطلعتي بلا وعي خذاها وكاللهم ردولنا كشمش ونحلها بفلوس
جدج وزلام لعشيرة تسودنو كلولة لاصايرة ولادايرة
واهلها هدو علينا يكلولنا خل يطلكها وواحد من ويلاد عمامة ياخذها
وشهرتة بين لزلم كلها تصيح غضنفر ماماخذ مرتة
ولشامت يصيح مايكدر
وحدهن صيحتة تكللهم مايعرف
عاد بيوم لردوها زلام لعشيرة كتلها كتل ماصاير وبيومها خذاها
واحنة نحجي لباب ندكت
فتحتها بسعاد
سللامة صبحت ودخلت
وبمياعة تهمس لبيبي شكرية
جدة انة ليوم دايخة واذب من راسي كلسا
اضن حامل
بيبي شكرية :- ياااع ولج شني شفتينا سود لدالج هنود
لوما غضنفر بيوم لطلعتي حامل كطعج ويصيح هذا لفرخ منين
ولوما لدختورة كرابة ام فدعم كالتلة مرتك تحبل علريحة جا كتلج حلال
جدة هاي لأمور بيني وبين رجلي شلج بهلسوالف
انة اعرف بروحي من حبلة
طبكت لباب وطلعت
وبيبي شكرية تعوج حلكها وتهمس
مجذبة لجذبة ومصدكتها
بدة لخوف يتسلل لكلبي
عيوني على تهاني لكامت على حيلها
وطلعت شوية وسمعت صياح غضنفر
غضنفر:- ولج انة من يوم لجبتي حمزة حالف براسة لغالي ماامد ايدي عليج ماريد أبني يتعقد
لاتخليني اصوبج جري عدل وبطلي افلامج شبيج من شفتيها تسودنتي
اي موتريد تركبها براسي ضرة من ورة علمي اني حاسة عليك
من ورة علمج ؟
لا بوية غلطانة بعلمج وحضورج هم ولسويلها زفة لماصارت مثلها
ولخلي ديار بني سعد كلها تسولف بيها
ويلاه بوية ورد لباجلة هاي تحطين راسج براسها
هاي لمابدلتني وضيعت حفنة من سنينها على مودي
وانتي على ذمتي وترحين لأهلج تردين غيري
عيني للأرض اتختل من مواجهة نضراتهن
وهنة وحدة تكرص وحدة تكركر
وزوري تلزمني من خواصري وتهمس
ومنين يكضني غضنفر
منا منا
منين يكضني غضنفر
منا منا
وكلسا تكرص مكان بجسمي واني اكمز واتشرد منها بلغرفة وساعة اصرخ ساعة اضحك
بيومها جدهم كال لخميس لجاي نعرسكم
اني ختفيت بلغرفة استحي اطلع
اجة لخميس
لأربعاء بدت لناس تحتل لبيت شي اعرفهم وشي مشايفتهم اصلا
لبنات ماشفتهن طبخ غسل تنضيف وسللامة هم وياهن
غضنفر محرص على انو تشاطرهن بكل لشغل وابد متنعزل
ماعرف اذا يريد يحرك كلبها لو يعاقبها على شي
بليل لاربعاء سوو حنة لغضنفر برة
جابو مطرب برة
وجوة سوولي كعدة بسيطة
وثاني يوم بزفة تتكون من ٤٢ سيارة شي كبار وشي زغار فرونة ديارهم ولديار لكدامها ولوراها
رجعونة للبيت
نزلوني وبوحدة من لغرف لفوك زفونا
دخلنة ونسد علينة باب غرفة وحدة
جانت غرفة حلوة وفخمة رغم تواجدي يمهم بس ابد ماطبيتلها ولاشفتها
نسد علينة باب غرفة وحدة
جنت كاعدة علجرباية تقرب وذب شماغة ولعكال
تدنالي وايدة رفعت لبركع من على وجهي
وعلى جبيني طبع بوسة وراسة نرفع ويهمس
اويلاااه ربي لونة حلم انة ماريد اصحة منة
ولونة علم انة اريدك تمدني بعمرين اعيشهن وياها
وبكلبين احبنها بيهن
وبروحين يصيرن الها مسكن
غضنفر...
واما عن روحي الهائمة بعالمٍ منعزل منذ الأزل
فها قد وجدت ملاذها
بروحٍ وجسدً على مقاسي امتطيته مخموراً متلذذا
اتلو على منحنياته الغرام
وألونه بشفاهي عابثاً حتى الجنون
وبين احضانها سقطت شهيداً
كتب لي الموت عند شفتيها وبنفس المسار اتجهت اسفلاً متيما ضائعا
وعند كل منحنى يسقط مني شيئا
واما عن كبريائي فبين لمساتها قد انتهى وزال وتلاشى
انعام..
لم اكن بين يديه بل كنت بين جنبيه
وبراسي تجول فكرةً
كيف لقلبٍ ان يحتضن جسد على هذا النحو
كيف لقلبٍ ان يحتضن جسداً بأكمله
وبعد رحلتي لطويلة وجدت مكان يلائمني
وكيف لانثى ان تحضا بما حضيته ليلتها ....حنين حاتم
صبحية فزيت جان ماموجود بفراشة
لبست كلابية لونها فيروزي من ضمن لنيشان شتريتها اني ولبنات
ولبست ربطتي وخليت كحل وشوية حمرة بخدودي وشفافي وطلعت
جان لبيت يروش
هوة كبالي كاعد ويمة بيبي شكرية واخوات جدو ابو خليل
صدت عينة علية بتسم
تقربت صبحت وكعدت
صوت بيبي شكرية تصيح
جيبيو لريوك للعرسان
واخت جدو خليل تهمس الي
هنيالج خايبة غير مارضة يتريك إلة تكعدين انتي
اكلنا ودخلو لولد
لاحضتهم من عرس صميدع لصبح يشدون حرابتهم وية لعريس ويتحارشون بي
لتمو علي تلاثتهم بس هيهات كدرولة
كاعد كبالي علقنفة عيونة تصد علية نضراتة تتلامع يبتسم خفية
ايدة تتلمس لحيتة نضراتة تصد عليهم
صوت فدعم بصوت عالي يتعمد يسمع سللامة
كوم يمها خوية شمالك تايه وتسولف بعيونك
يضحك ويهمسلة
جنك مطوخ لبارحة احشم ولك
لامامطوخ بس انة احسكم ضايعين
بليل عدنة محفل علبراد يم لبزل ماتجي
يغمزلة ويضحك
على جتفة يطبطب ويعاينلي
اعاين علي وببالي حجاياتة من يهمس يم اذاني
احب نضرات لغيرة بعيونج رجفة ايدج ورتلة حجاياتج ولكلام ليكوم يتطافر منج بغضب انة بهاي لتفاصيل اشوفن كَدري
عيونة اتسعن وحواجبة يقتربن واحد علثاني شفافة لتمت واسنانة تعض على شفافة لسفلى
ونضراتة تأشر على شي بية
دنكت اتفحص جانت رجلي طالعة من دشداشتي
نزلت لثوب وعدلت كعدتي
رجعت لأبتسامة لوجهة إبتسامة اغرب من لخيال
حتة لمعة عينة جنت احس تبتسم
ندار على فدعم ويهمسلة
عوف هلسوالف تقرب لربك موتريد نعرسك صلي عاد
ماصلي
ليش
ياخوي مابيها مستقبل
طيح الله حضك
هوة طايح من لسمة للكاع
صميدع علدرج ويصيح على فدعم
ها خوية شني لبارحة يكولون لبطالة داير مدايرك وتطك صبعتين يم لبزل لخايس ولفروخ ملتمة عليك
اي ولد لحرام واحدهم تكول ملج موفرخ
لباك محفضتي ولباك لمزة وخلوني اكوم واطيح مابية اكتلهم
صدك جذب عمي حكه ابو تهاني مايرضة يطيها الك
اسكت انت لاتجيبلي هلطاري
عدن يومين ناس تجي وتروح لبيت هوسة مافرغ
تعبت من لصبح لليل مبدلة واستقبل ناسهم واجامل
عمة امريكا وزوري وتهاني يمنا من يوم لصار نسوان ولد جليل منبوذات ولشغل هواي عمة امريكا مسؤلة علطبخ وتوجه لبنات
سللامة خانسة ومالها شغل بية بس نضرات مسمومة وتصيح على حمزة
قسمة بت إسماعيل بس مابيها اذية
ايدها وية لبنات مالها صوت
وعمو إسماعيل متخبل من سواية ولدة وكال لجدو ليأمرون بي لكبارية انة راضي بي وولدي غضبان عليهم ليوم لدين على وكفتهم وي ولد جليل
مامعروف اذا فعلا الي يكولة لو مجرد موقف اتخذة حتة يحسن صورتة
بس لحد لآن محد لزم علي لزمة حتة يدينو أو يوجهولة اصابع لأتهام
صبحية كعدت على صوت لولد
جانو يذبحون
طلعت برة بضحك اهمس لزوري
ادري ماخلص لحلال يومية ذابحين
صلي علنبي خية لنعجات ولادات عليش يخلص
ويعلفوهن احس علف ودختور كل مدة يجي يشوفهن
شوية واجت بسعاد كالت جدي ولولد وعمو رحيل وإسماعيل بلأستقبال مجتمعين مدري شعدهم طردو لفروخ وسدو لبيبان ثنينهن
يااا ولج بسعاد تكولين لفروح شو
اي خية نسيت حجيي كمت احجي مثلهم
موشوية لعشتة هنا
بقو اكثر من ساعة جوة وكلسا نسمع صوت غضنفر يعلة
راحت زوري تتسنط عليهم ورة شوية اجت كالت
ليوم عمي جليل وولدة وعمامنة وولدهم وعشيرة لسعداويين وثنين من عشاير لجبور من بغداد راح يلتمون ويحلوها الله يستر
للضهر طببو لجهال جوة وسدو بيبان لأستقبال ولمطبخ علينا
من لشباك بقينة نباوع
نعناعة بغرفتها خانسة كلسا يفتحون لباب احفادها طابين طالعين يمها وجناينها خاتلات بلغرف
كلما تنفتح لباب اعاينلها على سجادتها تصلي
بدت لسيارات تطبك وينزلون منها
اخر سيارة اجت نزلو منها جليل وولدة
برة لولد يصبون وياخذون لأكل ورة لديوان خالين لجدورة وبصواني كبار صبو
عصرية زوري طلعت اخو تهاني لزغير من شباك لاستقبال ودزتة يتسنط وووصتة ميخلي احد يشوفا
اجانة يركض كال غضنفر متلازم وية عمو جليل ومصايح ومايرضة يهدة
طلع ورجعلنة ورة شوية
يركض ودشداشتة عاضها بحلكة
قبل ميوصل النة صاح
غضنفر حاط خنجرة على زردوم جدي جليل ....يتبع
مساء لورد كافي نومة بنات ليش تخربون واهسي وتخلوني اختمها وأجل لجزء لثاني
لواهس نستمدة من تفاعلكم وتشجيعكم
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!