#خنجر_لغضنفر
#البارت_التاسع_عشر_١٩
#حنين_حاتم
تقربت وبكل خطوة اخطيها جان حيلي يطيح مني وصلة وصلة
لمكان اضلم ولفانوس لبيدي ميضوي غير مسافة قليلة داير مدايري وصلت قريب للجثة عاينت للهيئة وتقربت ايدية ترتجف خليت لفانوس بيد صميدع وصعدت لشجرة بيدي رفعت شماغة لجان واكع على وجهة ومامبين منة شي بسبب لشماغ لملفوف جسمة بي علشجرة
رفعت راسة بيدي جان شبه منفصل عن جسمة وماباقي يربطة بلجسم غير لعضام
صفنت بملامح وجهة لباهتة وشفافة لمزرقة
ايدي على كلبة واهمس عبود كتلك غضنفر معناها انت خاين حالك من حال ابوك
صميدع من جوة يهمسلي
_خل ننزلة وندفنة خوما يضل هنا
_مانسوي كلشي بدون علم غضنفر هوة يتصرف بيهم انة ماسوي كلشي
_ياخوي ماترهم يضل لميت الة حرمة
_ هذا هوة لقصاص ولحكَ حكَ مالك غرض خل نعرف غضنفر وين وهوة ليتصرف بلجثة
_خاف يطلع لفجر قبل مانلكا
_فال بليس فالك شمالك ولك
وهوة يحاجيني سمعنة صوت ورانا
ندارينا مجفولين
مانشوف غير شخص يطلع من لكَبر لحفرت نصة ويركض بكل قوتة ولتراب يتطاير من جسمة ويكح مختنك يكوم ويوكع اول ركضتة وراها سيطر على نفسة وكام يركض طبيعي
شمرت لفانوس بلكاع وحيل طفرت من فوك ولحكتة
معناها جان مطموم وهوة عدل
انة شلون عفت غضنفر شلووون
ركضت ورا طلع من لمكبرة يطافر بين لكبور مااكدر اصوبة روح بزون كَضة سلاحي وماصوبتة
عبر لمقبرة وللشارع طلع
لصوب لثاني بيوت منطقة زراعية بس مسكونة كلها
دخل بين لبيوت وضيعتة
ولد عمي جليل كلهم نفس لكصة ويتشابهون صعب اميز بينهم
دنية ليل وجان بعيد عني ماكدرت اميزة منهم
رجعت ركبت لسيارة ومشينة بيها انة وصميدع
طلعنة للشارع فرينة لمنطقة لداير لمكبرة كلها وعبرنا علصوب لثاني
ماكو اثر لأي واحد بيهم
ضلينة نهبد وتالي ردينا للبيت
من برة تلكننا جانن واكفات كلهن برة يعاينن ويناطرن
ركضت علينة عمتي امريكا ووراها زوري هية وبطنها وبسعاد لفرخ جوة رجليها نجبح
سللامة وابنها
وحدة تدفع لثانية تقربن علسيارة ويسألن شصار
وصوات نسوان ولد عمي جليل من جوة يصيحن
عمتي امريكا حابستهن بلغرفة كلهن من لشباك يعاينن ويبجن ويسألن على رجولتهن
صميدع:- عمة شمالهن ذني
امريكا:- حبستهن هنة وفروخهن ونطبلك عليهن انة وتهاني زوهرتهن لعافية لصلفات عايشات بينة مثل حية من جوة تبن
تهاني ماخلت وحدة سالمة بيهن تولتهن بعوجية جدك وزوري هية وبطنها تكعدلك على حدهن فطستها
اااااخ مجان كشمشة خالي بهاي لمواقف يصير حيلها من حيل لزلم
هسة عوفك منهن هذن انة ليوم ناوية عليهن لو اعرف اضل للصبح اخذلي استراحة وارد عليهن اذا ماخليتهن يقرن بلأول ولتالي مااطلع امريكا
وحكَ الله لبلة كلة من جوة روس لنسوان وهاي عجوز لبين نعناعة هلخنست بغرفتها وحكَ الله لو مااخاطر ابوي جا سويتها مزة لفدعم وي اللبن
فدعم :- ياااع غدي شمالني اتمزمز بيها اجرة سادة ولا هلنعناع لمعفن
رحنة للمكبرة مالكينا غير عبود معلك علشجرة وركبتة محزوزة ومابي نفس
افييييش ربي افيييش لموت مابي شماتة بس هذول لجلاب حلال لشماتة بيهم
عمة انتي شمفتهمة ليش تتشمتين بيهم وشدعواج هيج كارهتهم همة ونسوانهم احنة لسة مافهمنة كلشي من غضنفر مع ذلك مطاوعي عبن نعرفة خالي كلب ومايضر بنيادم إلة اذا مأذي
إسكت يفدعم إسكت خليني طبك مسدود
فهمينا شكو
انة مااحجي شي ترد امي وهية تحجيلكم كلشي
هي إتعرف كلشي بس جانت تضم عنة تخاف على غضنفر وقيصر وتخاف من بزر جليل وإسماعيل عبن شرانيين
يعني اكو شي احنة منعرفة غير عن كتلة غضنفر لأمة ضلم وإرتكابهم عليها وتهموهة بلزنا
يايمة هاي نكَطة ببحر لمضموم عنة يهجم بيوت يبعد عمتك الله ليسترنا
نداريت على صميدع بغضب
هسة شلون احنة نضل هنا يم لنسوان
جا وين نروح نهبد
نهبد احسن من لكعدة حالنا حال لنسوان
طلعت من لبيت رحت على بيت عمي إسماعيل دخلت لبيت جان خالي كسرت لباب لجوة وطبيت
دكيت على ربعنة طلبت ٣ من امن لمركز
رغم ادري جدي مايرضة ومنبهنا اي امور عشائرية تصير مندخل اي عنصر امن بيها ولا تنحل غير عشائريا وعمرة ماإستخدم وضيفتة حتة يحل اي نزاع يصير طول عمرة عندة لأعراف لعشائرية شي مقدس يحترمة وابد ميتاوزة ويلتزم بقرارات رؤساء لعشائر ولكبارية ودومة حجايتة حكمكم على راسنة ومانكول غير تم
رغم يكدر بتلفون واحد كلشي يسوي لدنيا زاهيتلنا ولمثلنة يمشي لوادم على مرامة
بس هوة على نهج اهلة واجدادة جان عايش وعلمنة نفصل بين لشغل ولحياة لشخصية وعلمنة مهنتنا مانستخدمها لمصالحنة لشخصية لومهما نكون بحاجة هلشي
ومن لمركز دزولي لولد الي عدهم خفارة
ولزمنا ديارنا من لهور للهور مشطاناها كلها
توزعنا على مجموعتين واتفقنة ليلكة شي يروح لصوب لبزل لخايس منطقة مهجورة وبيها خرايب جنت اضم بيها بطالتي وبليل علبراد اروح اجيبهن من ينام جدي
مرت ساعة انة وصميدع ندور وماكو
رحنة لصوب لبزل
من بعيد جان واحد من لولد لازم بيدة شي ويلوح بي النة من داخل لخرابة
ركضت كل حيلي من لاحلي شماغ بيدة
وصلت يمة الهث
لزمت لشماغ بيدي شميتة
هاي ريحة غضنفر اعرفنها لشماغ بي دم غضنفر جان متحزم بشماغة
_وين لكيتة
_والله سيدي ماادري وين لكيتة تيهت انة صارلي ساعة افتر كوة لكيت لبزل اتبع لريحة جنت واهبد مثل لأعمة
بس مااعرف حتة منين اجيت ديرتكم شكبرها ودنية ليل
ضربت على رجلية وعاينتلة اصفك ايد بايد
_بلله عليك هسة شني لفايدة من لكوتك للشماغ
_خدامك لزغير سيدي
_ماتتذكر شي من لمكان بيت ساجية كَنطرة
_اي سيدي اذكر عبرت على شط شوية جبير وعلى لصوبين اكو بساتين ريحتهن كلش حلوة ماميزت لزرع عبن ليل
_خاف بساتين لباجلة
_اضن سيدي
_انت منين ولك
_سيدي انة من لرميثة
_وشجابك لهنا
_ها مو اكو ضابط جان شاد وياي ونقلوني
_ولك لاتسويلك درب تعبان كول مسوي مكسورة ونقلوك
دنك راسة ويهمس
_خدامك لزغير سيدي
_شوف ولك اذا شغلت عقلك وتذكرت لدرب لاجيت منة منين إلك علية اتوسطلك يم معارفي واردك تداوم بديرتك
_تامر امر سيدي
ركض كدامي يتلوفت وكلسا يصيح بحماس
منا سيدي منا
امشي ورا الى ان دخلنة ببساتين لباجلة
اشر وصاح هناك سيدي يم ذيج لنخلة لطايحة
ركضنة تلاثتنة
تقربت اعاين علمكان اكو نخلة مجفية بلكاع تقربت الها جان اكو دم بلكاع قليل
تقربت واخذت لفانوس من صميدع اضوي علكاع
فرينة لمكان كلة كلشي مالكينا
رجعنة للبيت وية طلعة لفجر
كلها نايمة بس عمتي امريكا تلكتني تسأل
كلشي ماكو
جدتي وجدي ماكو منهم خبر
خايب غير ولد عمك إسماعيل ردو توهم كالو عمك جليل وولدة بلمستشفى تلاثتهم بس عبود كالو غضنفر كاتلة ومعلكة
وغضنفر ويييين
مارضو يحجولي يكلولي مابي شي
وينهم هسة
راحو لبيتهم
ركضت للبيت
ضربت لباب ودخلت جانو متمددين بفراشاتهم ونايمين جن كلشي ماكو
دفرت حسنين حييل
نز من فراشة وكام على حيلة مفزوع يريد بتضارب
لزمتة من فالينتة
غضنفر وووووووين
انة عفتة ومأمن عبن انتو يمة رديت
الكاها لسماء ولطارق كلشي ماكو
كول يا الله فدعم شني قصدك
غضنفر ووووووين
اكعد هسة نحجي
مااكعد احجي غضنفر وين
شبيك داش علينة حامي
تقربت الة وحييل على زردومة بثنين ادية ضغطت
حسنين اشم بثيابكم ريحة غدر تحجي غضنفر وووين لو ادفنك بلكبور لحفرها الهم
شني انت علمامش جاي تتهمنا عيب عليك احنة ولد عمك
وولد جليل هم ولد عمنة مافرقت شي
حسن كام وتقرب الي لزمني من ضهري يفرك بعيونة وهمس
خوية اكعد وستهدي برحمانك.واحنة هسة نحجيلك لصار
ستغفرت وكعدت
واحد يعاين علثاني
فضووووهة
حسنين:- خوية انتو من رحتو غضنفر لزم عبود وتولا ضرب خلا يكوم ويطيح كسر رجلي ثنينهن
بهلأثناء احنة جنة شامرين سلاحنة ونحاول نفرع عبود من ادي
وليش تفرغونة من ادي انتو شلكم غررررض
ماترهم خوية احنة ولد عم يصير بينة دم صعبة بعد شيحلها كلنة تنحل بكعدة عشاير ولعشيرة تنفيهم وتحرم عليهم دخلة ديارنا وينحرمون من حكَهم بلحلال
حاولنة نخلصة من ادي لزم سلاحة وكال ليتدنالة احفرلة كبر سادس
خذا على صفحة سحلة مادري شحجة ويا
شفنة غضنغر ضرب راسة حييل بلشجرة اكثر من مرة
وراها طلع خنجرة ومانشوف غير دم عبود ترس هدوم غضنغر
من كال هيج حسيت ماي بارد ونذب على كلبي
معناها لدم لبشماغ غضنفر مو إلة
إسمع يخوي جايك بلحجي
احنة ركضنة عليهم
مانسمع غير رمي ورانة
ندارينة ونشوف صيهود وفرهود كاضين سلاحنة ويرمون ليفوك شردو عمي جليل راح ركض وهمة بقو يحمون ضهرة
غضنفر سحل عبود ونزعة شماغة ربطة على ركبتة وصعد علشجرة عللكة بي
احنة نصيح علي نكلة عوف جثة عبود وخلنلحك عليهم قبل ميشردون
ببرود يكللنة
وين يشردون لاسمة ولا كَاع ليوم تخلصهم مني
والله لأعلك جثثهم كل واحد ببستان من لبساتين لضيعوني وضيعو اهلي علمودها
علما كمل ربط لجثة همة شاردين مسافة بس عمي جليل عبر لمكَبرة
لحكَهم غضنفر
جلب بحمود لجان اخر واحد رمة هواي على غضنفر بس مالاحة ماجان يوجه سلاحة علي ادري بي يخاف من جدي هددهم لو صار لغضنغر شي ميرحمهم
من كضة سلاحة سحل جابة غضنفر
وبلكبر شمرة وكام يشيل تراب ويذب علي الى ان طمة وهوة عدل
ولحك عمي جليل وصيهود وفرهود
احنة لحكنا
طلعنة علشارع جانو داخلين بلبيوت دخل هوة من صفحة واحنة رحنة من لصفحة لثانية ندور
عبرنة لمنطقة كلها وهوة ماكو
نسمع صوت مصايح بس بعيد
يم شطيط لسعداويين من بعيد شفناهم
جانو يتضاربون عمي جليل مصوب وبلكاع
نتقرب الهم وجان غضنفر يتضارب وية صيهود مانشوف غير فرهود شال من لكاع طابوكة ومن ورا براس غضنفر ضربها
غدرة بيها
طاح بلكاع
علما عبرنا لشطيط من صوب لكَنطرة مالكينا غضنفر
تقربنا نسأل بيهم وينا
كالو شرد
شلون شرد شلووون مو وكع كدامنا جثة هامدة
ماندري ميييل ابونة دمة بطولة
واحنة شحالنة
شالو عمي جليل وركضو بي واحنة دخلنة بلزرع ندور علي
دورنا لحد ماطحنة على صفحة وهوة ماكو
ضلينة بشك من حجيهم لأن شفنا جان خربان وطايح مومال يكوم ويشرد
لحكناهم للمستشفى
لاكَلك ولا تكَلي ترسنا لمستشفى تلاثتهم بلعمليات
صيهود اول واحد صحة
رحتلة للردها لخالي بيها
سألتة على غضنفر كال شرد من عدنة
صيهود احجي لصدك ترة لو عرفت غير شي محد يرحمك منييي
واحنة نضرب بي تدهرب وطاح بلشط
من كال هيج عرفتهم همة شامري بس مااكدر اسوي شي وانة بلمستشفى
طلعنة انة وحسن واجينة للشط دورنا ردنا كلشي ماكو ضلمة مانشوف
كلنة ننام علما يطلع لفجر ونرد ندور علضوة بلجن نلكَا
يعني غضنفر بلشططططط ؟؟
انة غلام ابووووي
ولكم غضنفر بلشط من اليل وانتم نايمييييين
امي لاجابتنيييي
طلعت اركض وطلعو وراي
ركبنة لسيارة ورحنة للشط ..........
بلقيس ..
للكاع راسة مدنكة وعيونة تحدق بلأرض وتتوسع
صوت ماما يرد علي
ابو بلقيس بعد لكالتة ام زياد لو اموت مااقبل تكون بلقيس تحت رحمتها إلا اذا ناوي تنطيها بدون رضاي
عيوني علي
رفع راسة عاين لأمي وجر نفس
ندار علية وكال
_عمري ماجبرتكم على شي
نولدتن وبحلوكجن خاشوكة ذهب وكضيت عمري امشي بصف لحايط جافي خيري شري اريد اكبرجن وأئمن عليجن وارتاح
تالي ضاعت اختج بسبب طيش ابن عمج وانتي ضعتي بسبب تسرعج وتصرفج بدون لرجوع النة
اخر واحد جنت ناوي انطي هوة زياد
لبخل مرض لايطاق ولعيش وية زياد اشبه بلموت علبطيء
واني اعرف بناتي بزر دلال مامتعلمات علحرمان
بس عملتج خلتني مااعرف شلون اصلح لموقف
سوايتج وية ابن عمج وإستغفالج الة خلنني مجتف وخجلان ردت بس اسكتة واسد لسالفة
ولان ادري بعد محد يتقدملج من كَرابتنا ولجوارين شلت
كلت اغرب روحي ونهزمت بيكم وبروحي من حجي اهلي ولملامة ولعارات
شنو لبيدي
عبالج هينة اضلمج بهيج قسمة بس ماخليتيلي حل
اببد
بابا اترجاك اذبحني بيدك
زوجني لأي شخص إلة زياد
اني مااتحمل لعيشة ويا وامة حادة سنونها علية ومن هسة تتهمني بشرفي باجر عكبة تذب علية بلاوي
دنك وجر حسرات متتالية
رفع راسة وهمس
_احجي وية عمامج واشرحلهم واشوف شلون تنحل
زياد صعبة عشرتة صعبة بس اااااخ من لضرف لجبرني ارضة واني لممنون
عدن ايام لاخبر من بابا بشان زياد
ولاخبر من قيصر
من لدوام اترخص واتصل بيهم ميتحصلون ابد
يوم خميس بابا لبس عصرية وطلع
امي لبست حجابها وعلسجادة كعدت تصلي
لزمت كلبي
لحد مااجة اني لتفكير ماكلني
دخل من لباب مهموم
تقرب الي وهمس
والله زياد درررة ليش يابابا هيج خجلتينا ويا ليييش
شنو شصار
ندار على امي وكاللها
كعدنة ليوم اني وخواني وعمامنة وولدهم
شرحت الهم لمسألة وكلتلهم بنتي رافضة لزواج وتحججت بمرض وتعب نفسيتج
بعدهم يحجون ويتشاورون بينهم
زياد اخذني على صفحة وكال
_عمي انت رافض تنطيني بلقيس احجيها
_والله يا زياد انت زلمة ولنعم منك واح
_لتكمل عمي بنتك حرة من ليوم اني ماجنت ادري بيك رافضني ولا اعرف هي متريدني
سنين اوهم بروحي واكول تريدني مثل مااني اريدها
اتاري حجي امي صدك
_نزلت راسي وهمست الله يقسملة بنت لحلال الي تكدر تتحمل طبعة لصعب
_بين لفراحنة وبين لمكسورة
فرحانة لأن خلصت من زياد
حتة وإن ماجان قيصر متقدم الي زياد مااكدر انجمع ويا ببيت واحد
لعيشة ويا دمار اعصاب وتعب نفسي لا يمكن يكدر انسان يتحملة ويشاركة هيج حياة
مكسورة لأن صاحب لشأن الي علمودة سويت كل هذا وخليت اهلي بهيج موقف وكسرت ابن عمي ختفا
اذكر حلفانة من كالي
ورب محمد مااطلع من ديالى إلة وايدج بيدي
بقيت اتقصا اريد اعرف شنو لصار ويا
واني راجعة من لدوام مريت بأبو صالح جارنا الي وكفلة وبيتة يمة
ستفسرت منة وسألتة علي
والله يابويا ماندري بي ختفة هلخفية حتة ماسلم علينا
شرحت الة لصار ويا وكتلة مسلحين اخذو واني اتصل على اهلة من يوم لصار ميتحصلون
تفاجئ لرجال وكال
وسفة زلمة ضيفنا وغريب ينخطف من نص قريتنا
نطيني عنوان اهلة
نطيتة لعنوان واسم جدهم لكامل لأن معروف هناك من رحنة الهم اني وخالي بس كلنالهم على اسمة كبل جابونا لبيتهم
وعدني لرجال يروح لأهلة ويتواصل ويعرف اخبارة ويجي يكلي
بقيت انتضر على نار
عدن ٣ ايام اني ماشوف لرجال عرفتة راح
عصرية دك بابنة
بابا طالع وامي بغرفتها
ركضت افتح لباب
صاحت امي من جوة
بلقيس منو
محد ذولة جهال
فتحتلة لباب سلم علية وكال
بوية انة رحت لديرتهم تلاكيت وي جدهم وحجيتلة شلون ضيفنا ابنهم ورحنة ويا نخطب
لرجال من عرف بية مضيف ولدهم اصر ابات وذبح وطبخو وماقصرو
بس كالولي قيصر..............
انعام ...
نزلت من لسيارة اوراقي بيدي واتلفت ادور على جدو ابو خليل اخاف من اسألة لضباط وهوة كالي نتضريني لتختمين اوراقج تلكيني كدامج
اوراقي اصولية بس لخوف من اسألة لضباط الي ميفوتهم شي وحتة عدد افراد عائلتي ومسكننة وشغلي يعرفو
جانت دنية ضهر
تقربت للتلفون اتصل بأمي اطمنها
امي الي طلعت بدون ماانطيها خبر
لطلعني صوت صرخة بيبي شكرية بلتلفون
ولج نعيمة انة رايحة للشط انعا بلكي يطلع غضنفر من يسمع صوتي
ام ماعدة انة امة
كلبي يدك خايفة اوصل ويكلولي ميت
وخايفة من امي
دكيت حولوني على تلفون اهلي
صوتها يصرخ بية
سويتيها انعااااام
الله يرضالج لتسوينة بية
مسويتها خري مرررري علمود لأفندي وهوة براسة مرة وطفل سائل عنج يعرف شبيج مابيج
ماما دخيلج دخيييلج اني موزغيررة والله موزغيرة لبعمري جهالهن بطولهن
كافي ضيعتيني وضيعتي انغام
اني مسؤلة عن نفسي وعن تصرفاتي
واني شنو بلبيت رجل قنففففة
وهية تصرخ بذاني شفتة من بعيد جان صميدع لازمة ومتجيلة وهوة مدنك
تقرب الي عيوني على صميدع شاك لدشداشة من منطقة صدرة
تقرب الي بست راسة وسلمت
ايدة تطبطب على جتفي ويهمس
هلة بريحتة ورويحتة
سحب اوراقي مني
تقرب للشباك واني ورا
بس سلمهن ختموهن
مشو كدامي واني وراهم
لطريق جان طويل
كضة لطريق بحسرات ودموع ودعاوي
يارب اوصل الكاهم لاكينة ومابي شي ياارب
اخر تلفون تلقيتة منهم جان بداية اليل همة عدهم صبح
جان عبارة عن صراخ بيبي شكرية وهية تكلي
راح غضنفر ينعيمة راااح
انة رايحة للشط انعا بلجن يطلع
ماعرف شنو لصار بية
كل الي اذكرة اني ركبت لطيارة واجيت
همست الة بعد طول صمت
جدو مالكو
لايبوج لكَو بيت لسعداويين مطلعينة ولدهم
طلعو فلحهم شايفين ويلاد جليل من طاكَي بس يخافون يتدخلون تعرفين لحاجوز دمة مهدور
متانيهم رايحين ومن لصوب لثاني مطلعينة
صميدع يهمس الة
جدي جا شلون ويلاد عمي إسماعيل يكولون خمينة لشط كلة ومالكينا ؟
انة ادري يابوك يصحا هوة وافهم منة كلشي انة مااخذ بحجي احد
همست بخوف هسة غضنفر وين
بلمستشفى بوية من نزلنة قريب لحدود اتصلنة كالو توة طببو عملية
ندعيلة بوية
دموعي نزلت واهمس
شوكت يرتاح وشوكت تخلص مصايبكم عفية عائلة متمر عليهم سنة بدون مصايب
شنو هلحياة وشلون عايشيها
بعد اكثر من ساعتين نزل بمحطة بانزين واتصل بيهم
رجع مستبشر وكال ناجحة عمليتة ومطلعينة بس لساعة ماصاحي
عمليتة مال شنو
نزيف صاير عدة وفطر
وصلنة للبيت جان لبيت عبارة عن ناس يغص ويبلع بلبشر نسوان وزلم
تلكوني لبنات تهاني وزوري وبسعاد
دخلنني جوة بلغرفة بعد ماطلعت جنت تعبانة كالولي رتاحي
لا اريد اشوفة
صوت فدعم برة يصيح وينها انعام
فتحت لباب وطلعت
امشي يابا امشي
صحا ؟
اي صحة
تقرب الي وبصوت عالي يكول
خبلنا يهذي بأسمج لحد مافكة لبنج
ومن سمع بيج هنا كال جيبوها الي مامصدك عبالة اجذب
عيوني على سللامة الي بودها تاكلني
وخجلانة من لكل
كلها تدري بية مخطوبة لمحمد
لصالة جانن بيها نسوان وعجايز كبار ماشايفتهن قبل
لبنات كلهن بلمطبخ وشي برة يطبخن وناس تخبز
صوت عمتة امريكا تقربت تهمس الة
ويلاد إسماعيل من سمعو غضنفر لكو وهمة ماكو فص ملح وذاب
هسة خل يصير زين وافهم منة كلشي
وحكَ الله لسوي عاليها واطيها علية وعلى عدواني
طلعت ويا ركبنة لسيارة وويانة عمتهم امريكا
لمستشفى بعيدة عنهم مسافة
قريتهم كلها مابيها غير مستوصفين
وصلنة
كلبي يدك خوف وفرح وامتنان لرب لعالمين
كضا عمرة يركض،على منيتة بس الله ماكاتبلة لموت
الله كاتبلة يعيش ويقتص للي ماتو ضلم ويكشف ضلم عمامة وولدهم للعلن
شكم مرة يوصل لحلك لموت والله ينجي منها بلمعجزة
وصلنة للردها مالتة
سريرة جان اخر واحد
تقربنة فتح فدعم لبردة اني بقيت وراها واكفة
صوت فدعم يهمس الة
تجذبني مووو
ولك سرسري ابو بطل كف عني شرك
وخر لبردة عني وهمسلة
ها شوووف ولك انة ماجذب
نايم وصدت عينة علية
صوتة يهمس
هلة يبعد ديرتي وعربها
تقربت
شنو بجي شنو نوح شنو وكعت بلكاع شنو من صراخي لتمو لمضمدين عبالهم لمريض بي شي
لحالة لجنت بيها مااعرف افسرها
للحضة تخيلت راح يموت بدون مااشوفة
للحضة تخيلت راح يروح من ادية واني لساني ندمانة لأن مانطقتها
لأن ماكتلة احبك لليوم
صوتة يهمس الي وايدة يم راسي ميكدر يرفع جسمة من الم جرحة وراسة ملفلف
بسج يسباح كلبي
ولج انة عمر ماستحسفيتة بس ستحسفيتج
غضنفر هم تفرط بحبنة هلمرة
هم تضيع نفسك بعد
اني هلمرة جاييتك وعمتك وابن عمك يشهدون هاي اخر محاولة راح اسعا بيها وهاي اخر خطوة راح اتقدمها تجاهك اذا رفضت تنسا بعد تشوفني
ايد عمتة على متوني
لا ان شاء الله مايرفض
حجايات جدة ببالي من كلي انتي املي لوحيد
جليل وولدة افنيهم من لديرة كلها واي واحد الة يد بموتة خليل ومرتة
بس ماريد غضنفر يروح من ادية
اريدج تقنعينا ينساهم ويعوف ثارة وانة اخذ حكَة مربع بس موبلدم
انة انفيهم وانفي كل ذكر الهم
صوتي لباكي يهمس الة
تتزوجني غضنفر
خلصني من لمخنث وخل نتزوج
اني بلياك مالي حياة والله
عشت وشفت وسافرت وتوضفت
بس لليوم احس روحي هنا عفتها
لليوم خنجرك طوقني ومالي خلاص من هلطوق
شماابتعد يسحبني وشما انسا تصد عيني علمراية واتذكر
جاوبني غضنفر نتزوج واعيش هنا بينكم
بس تنسا لثار وتعوف جليل وولدة وكل الي ساعدهم وجدك راح يطلعهم من لمحافضة كلها ويحرم عليهم دخولها
عيونة تترقب شفافة لعاضهة وايدة تضرب خفيف علسدية
صدت عينة علية وهمس ....يتبع
تفاعلو حبايب اذا بقت لقصة هابطة هيج انزل بارت ٢٠ واختمها واكملها بجزء ثاني غير وقت لأن مداانطيها حقها ماكو واهس
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!