#خنجر_لغضنفر
#البارت_الواحد_والعشرون_٢١
#حنين_حاتم
وية صرخة لطفل صرخة من جوة اجتي وهرولة
ماشفت نعناعة لعجيز
شفت بنية شابة وتركض بكل حيلها
ويم رجلية وكعت بلكاع وبثوبي ملزمة وتصرخ
ولج نعيمة دخيلة عدج انة
راح يموت ابني راح يكتتتتلة
انتي موشرطتي علي يعوفة ووافق
شحدا مابداااااا
ماعرف شمدريني اني حالي من حالجن
دطلعيلة فدوة اغديلج
طلعي وذكري بلوعد وكليلة اذا اخلفت وعدك انة اعوفنك
يوكتل جليل ويلادة ميعوفون ثار ابوهم احفادي واعرفنهم
وينكتل غضنفر تردين تترملين وانتي توج عروس
روحيلة فدوة اغديلج هوة يو شافج هسة برة راح يعوفة موبس إعلى مود لوعد يعوفة خجل من لزلام لبرة عن لايشوفونج
مااكدر بيبي صعبة اخاف اتدخل بهيج امور
وماترهم طلعتي انتن بنات شيوخ مو اني الي اعلمجن شكد صعبة دخلة مرة للديوان
ماعرف شنو تبعاتها على غضنفر واخاف يروح يضربني لو يعاقبني
تقربت الية بيبي شكرية ايدها على متوني وهمست
روحي يمة مالج غرض بغضنفر انة اعرفنة مايضرج
بسب بيبي
بلية بس يمة يو كتل جليل لطلابة ماتفض ولدة مايسكتون وجدج ابو خليل يروح بيها ماعاولنة صحة صارلة جم يوم
تحججت بلباب مقفولة
مالج غرض انة افتحها
ثنينهن نجمعن على لباب وحييل يدفعن بيها
شفت بعيونهن خوف خلاهن رغم عدائهن لشديد يجتمعن على رأي واحد وفعل واحد وهوة كسر لباب واخراجي
نعناعة خايفة على جليل
وبيبي شكرية خايفة على غضنفر وجدو ابو خليل
جابو لجهال جاكوج لنعناعة وبضربتين كسرتة
وصوت نعناعة ليتوسل الية بدموع
طلعت وبيبي شكرية وياي
بخطوات سريعة ضطرتني ارفع دشداشتي حاولت اوصل للديوان قبل متصير كارثة
وصلت كبش فداء ومثل ماسبق وكالها غضنر
نقطة ضعف وذراع ينلوي منها
جانو اكو ولد شباب طالعين برة لديوان
من شافوني دنكو كلهم والي دار وجهة والي تكتر على صفحة
وصوت لجهال ليصرخ بفرح ويصفكون
عروس عمو غضنفر اجت
عروس عمو غضنفر اجت
مديت راسي علديوان وكلبي يشيلني ويهبدني بلكاع بدكاتة
شفت لمة زلم وبوسطهم غضنفر وجليل جوة رجلة مثل لدجاجة وخنجرة على ركبتة وحيل يصرخ بكل قوتة
هذا لتردوني اعتققققة وانسا سوايتة
ولكم بكل صلافة يكلي انة جنت اتحارش بأمك
ولكم انة بيا عين اطب ديوان بعد بيا عيييييين
عيوني على جليل جان يرافس جوة رجلي مثل لدجاحة من تنذبح ودم نزل بياخة دشداشتة
صرخت واني اضرب على خدودي
غضنفر تريد ترملني واني عروس هذا وعددددددك
عيونة صدت علية ونفتحن بكل حيلهن
مثل لذبو بوجهة مي مثلج
ايدة رتخت ومن على جليل كام وتقرب الي
حيييل من زندي سحبني
حسيت اصابعة زرفن ادية وطلعن من لجهة لثانية
صديت على لركضة لصارت ورانة
شفت جليل وولدة يركضون للسيارة
مالتفت ولا عاين الهم
لحد ماوصلني للبيت
بيبي شكرية ورانة كوة تريد توصل الة خوفها علية
للغرفة صعد بية لدرج اكثر من مرة عثرت ماعارني اهتمام جان يسحب بية الى ان وصلني للغرفة
دفع لباب وحيل شمرني علجرباية
وحيل نبت ادي بلباب بقبضة ايدة ضرب علباب ٣ مرات
حيل سحب دشداشتة ونزعها بلكاع شمرها
حسيتة يريد يطلع من هدومة
ايد بأيد يصفك وتقرب الية ويصيح
_ تعرفين شني معناها دخلت مرة علينة للديوان لو لاااااااااااء
تعرفين شكد زغرتيني بهاي شينتتتتتتج
اسألج بلله انة ليش مكتوب علية تزغرني نسواني بكل وكت
ايدي على وجهي وحاضنة جسمي لصدري متقوقعة ومستعدة لأي شي يبدر منة
ايدة حييل سحبت ايدي من وجهي وصاح
جاوبيني انة احاجي روحييييييي
دموعي تنزل ولخوف اخرسني تماما
صوت بيبي شكرية تضرب علباب وتهمسلة بخوف
يمة هي مالها غرض والله انة دزيتها
وهي عقل ماكو براسهاااااا
انة ليمتة ارتاح من عمايل لنسوان ليمتةةةة
ضرب لباب وطلع
وصوتة يهمس لبيبي ممنوع تنزل ليجوة اذا شفتها جوة مايصير خير
صوت لقفل
يم لباب وكفت اتسنط على كلام بيبي الي تتوسلة وتشرحلة شلون هية ونعناعة اجبرني على لطلعة
_جدة جاشلون تضل هنا لبت بلكي رادت تتكرم تسبح خاف جوعانة
مالج غرض جدة طلعي منها
نزل هوة وبقت هية ورة لباب تحاجيني
جدة لاتزعلين منة هوة حنين بس شوفة عينج لتمن علي مشتتات لبال وجليل لهلاخ يطلع من طورة وينسة وعدة
بيبي مومهم اني بس عفية شوفي وين راح
اخاف يلحكهم
لاجدة طلعو كلهم ولعشاير مشت وكالو النة كعدة ثانية بس جليل وولدة مايحضروها تحضر،وادم كفيلة عنهم
بقت يمي تهدأ بية ووراها نزلت وكالتلي شوية واجيج
ورة شوية اجت زوري هي وتهاني،
زوري:- هاخية اذا نحصرتي تدرري بغوطية موتسويها على روحج
_ ولج اني بياحال
_جا هي هاي اذا إجتج بعد تنسين كل احوالج
_كليلي غضنفر وين راح شراح يسوي
_ ماندري خية بلديوان لوادم مشت بس ويلادنا وعمامنة وكرابتنا لساعهم موجودين
_انتي شصعدج موبطنج متخافين على روحج
تهاني:- جاهية ببيتنا حجرتها طابق ثاني وكلسا صاعدة نازلة امي تحجي تريد ولا يفيد وياها
زوري:- سكتي انتي هوة فرخ لو لازك لزكة جونسون غير ينزل
ابشرج خية نعيمة جدي كال لنسوان ويلاد جليل ومرت عمي جليل يلمن جوالاتهن راح يطلعن من لبيت
وهية تحجي صوت مصايح صار جوة
نزلن ثنينهن وبقيت بخوف انتضر احد يجي يطمني
راسي علباب واسمع صياح نعناعة وجدو
صوتها بصياح تكلة
نعناعة:- اذا طلعن لبنات واحفادي انة مالي ضلة هنا
ابو خليل:- نعناعة كسري لشر،ولاتزيديها علينة ضلتهن هنا مالها كل داعي رجالهن طلعو وممنوعة دخلتهم لديارنا هذا موحجيي انة كبارية وعشاير دخلت بيها
_جاانة هم اطلع وياهن
_نعناعة إن طلعتي مالج ردة لديارنا
_تطردني عكَاااب
_محد يطردج هذا بيتج بس اذا طلعتي ماترجعين بعد ومعناها انتي راضية على عملة ابنج بأخو لمرحوم ومرتة
_وانة مالي عيشة بدون جليل وولدة
_وانة شني هنا مالي شان عدج
_انت ابو بيتي وشانك جبير
_جا شلون تردين تطلعين دشي لحجرتج وكسري لشر وإن شاء الله محلولة
نصة صوتهم
وصوت باب غرفتها نفتح ودخلتلة
من لشباك عاينت
مرت جليل وحدهن ولعيبية ومرت عبود طلعن ووياهن لجهال
حدهن لحد لباب لخارجية تندار مدري شتهذي وتاشر بديها وتمشي وترجع تندار بحركة كلب وتأشر وتحجي
وكلسا تضرب واحد من جهالها تجبحة على وجهة
صوت رجلين علدرج بسعاد تقربت للباب
_هاخية جبتلج لكمة
من جوة لباب طببتلي ماعون تمن وعلي فخذ دجاجة وخبزة
_اكليج لكمة لاتوكعين
ماشتهي لعسل
انعام اكلي لتعاندين
اريد اروح للحمام
خل اجيب لمفتاح منة واجيج
راحت وتاخرت اكثر من ربع ساعة يلله اجت
فتحت لباب وياها ابنها
_يلله خية روحي للحمام اني متانيتج حتة ارجع اسدة عليج غضنفر كالي ينتضرني اجيبلة لمفتاح
طبيت وبقيت بلحمام تعمدت اتاخر بلكي يصعد واكدر احجي ويا
بس ماسمعتلة صوت
ايست وطلعت زوري ماكو بلصالة
طبيت للغرفة شفتة جان واكف بلكنتور ومنطيني ضهرة
بلصروال ولفالينة لداخلية
تقربت ادية على متنة ردتة يندار واحضنة ماندار
وستمر يطلع ملابسة
خلاهن على ايدة وندار يريد يمشي صرت بوجها
ميلي بوية انة بعَجل
غضنفر عاينلي ليش تدور عينك عني
بخزرة عاينلي وصدرة توسع بحسرة طويلة
شتردين
غضنفر حاجيني شراح تسوي
من يمتة همج امري
شلون ميهمني امرك ليش تكول هيج
جا شلون اجة من كلبج تسوين هيج بية
انة اركَع صفحة تفتكَولي صفحة
غضنفر انت وعدتني وجان لازم اذكرك بلوعد ولوما دخلتي عليك جان كتلتة لجليل
انعام بوية ميلي من دربي خليني امش ماعندي طاقة اخذ وانطي وياج
ماوخر اذا ماتكلي على شنو ناوي
وين وعدك من كتلي بليلة زواجنة
هلروح مايجول بخاطرها شي إلة وانتي اول من يعلم
وهلجسد مايضرة شي إلة واديج لترفة تداوي
انعام اسألج بلله ميلي عن دربي ماريد اضرج
ميلي يبوية مابيج على مضرتي وانة هلمرة موش انة
يعني راح تخلف لوعد غضنفرر
دفعني بخفة وسحب دشداشتة لبسها خلة عطر ووكف يلبس شماغة واني الوب ورا
حتة اصير بطولة صعدت على طرف لجرباية حاولت احتوي احضنة التمس جرحة واطيبة مانطاني ولوفرصة
نضرة عينة وجزعة افصحنلي عن الي بداخلة
طلع واني ورا اتوسلة مايخلف وعدة واهدد بأنو اذا اخلف لوعد راح يخسرني لحد ماقفل لباب علية
وتاكدت غايتة من حبسي موعقاب وإنما حتة مااكدر امنعة من اي فعل يقدم علي
ويمنع اي احد من داخل لبيت انو يستخدمني كنقطة ضعف ويوجه غضنفر بية لمصالحة لشخصية
.......
فدعم...
كاعدين بلديوان و٤ عشاير مجتمعة
رغم مابعادتنا ندخل عشاير بلأمور الي تصير بين ويلاد لعمام
بس جدي اصر على هلشي ادري بي بحيرة من امرة
مايكدر يحكم باي شي على جليل وولدة
أب وموقفة صعب
لهلسبب وكل هلمهمة لكبارية عشاير لجبور وعشيرة من نسل محمد (ص)
ولازم كلبة من طبتهم عيني على عيونة لدامعة وراسة لمدنك كأن يطلب لرأفة لعمي جليل وولدة ولحكم يكون لين
لعشاير لحاضرة طلبو يسمعون من غضنفر وطلبو يلحق كلامة بدلائل وشواهد إن امكن
غضنفر شرح بأيجاز وذكرلهم اعتراف عبود وهوة يموت بين ادي بكتل عمي خليل على ادين عمي جليل حتة يستحوذ على مكانتة عد جدي
ويكون هوة لآمر لناهي بلبيت لو مات جدي ولشيخة الة
سألو جليل عن صحة هلشي انكر وكال موصحيح
صوت جدي ينتر بي جلييل خليك زلمة عيب لجذب ولإنكار ميفيدك بعد
ولدة بدو يتهامسون بينهم اني جنت كاعد قريب عليهم سمعت اطراف من حديثهم من كالولة
احنة مو اتفقنة تعترف بكتلك لعمي جليل ونتداين من خوالنة ونطلع من ديارنا ونسد لساالفة بفصل احسن ماتنفتح سوالف ثانية
بقة مصر وينكر
وراها كال
_انة اريد غضنفر بكلمتين وحدنة
تكترو بلديوان ثنينهم على صفحة
شفت غضنفر كوة لازم روحة عن جليل
واجزم لوما إحترامة لحجاية جدي ولناس لجايبهم جان اجرم بي
منعرف شدار بينهم
فجئة شفنة جليل جوة غضنفر ويرافس جوا
لتمينة علي لكبارية صاحو بينة لشباب كلها تطلع برررة
وكفنة برة كلنا
بقو بس همة جوة
كلسا امد راسي اطل عليهم
وراها اجت انعام واخذها غضنفر وراح
بهلأثناء شردو عمي جليل وولدة بقة جدي خجلان من لناس
اتفقو على كعدة بغير وكت علما تبرد لسالفة
لحكت غضنفر ردت احاجي خفت لاياذي مرتة
لكيتة بلصالة وكالولي حابسهة ومامأذيها
رحت على صفحة احاجي
_خوية لاتطي على ماية هوة حجة هيج راد يستفزك حتة تضربة كدام لكبارية ويسود وجهك وكلها تكول عليك مااحترمنة ولا احترم جدة وديوانة
_شسوي فدعم حاجيني انة ماضل براسي عقل
امي ياناس امي
يامصعبها علزلمة تنجاب امة بلشينة بديوان
انة مارفعت راسي غير من عرفت امي مضلومة وجليل مرتكب عليها
_ميخالف يخوي كض روحك خاطر لايضيع حكَك
احنة نكدر نملص روسهم موصعبة بس لاتنسة انت بذمتك ثنين نسوان وعدك ولد
يعني يو كتلتهم راح تورث لثار لويلادك
لزلمة منة امان وحماية لعايلتة وانت تريد تورثهم ثار وخوف وسلبان راحة
_اااااخ ياخوي اجذب اذا اكلك انة ما متردد
وماجنت ناوي اكتلة بس ردت اعلم علي
ردت يبقالي بي اثر ياهو ليشوفة يعرف بهلعار كتل اخو وهلأثر وصمة تثبت ادانتة وجرمة
تهون ان شاء الله تهون
جدي طلع مرت عمي جليل ونسوان ولد جليل لبسن خاطر يروحن لخوالهم
بعد ضلتهن بينة صعبة رجالهن منبوذين ولحكم يشملهن هنة وفروخهن
جدتي نعناعة جلبت وياهن
شفت كسرة بعيون جدي بعمري ماشايفها
وحاول بقدر إستطاعتة ان يمنعها
نسد عليهم باب غرفة وحدة وعلة صوت نعناعة بلبجي ولعتب
طلعنة للديوان يم صميدع جانو اخوة جدي وويلادهم واحفادهم موجودين
غضنفر طلع ماقبل يدخل للديوان
وياخوفي من طلعتة
ردت اروح ويا رفض
تاخر وعيني علشارع اناطر جيتة وياخوفي يكون لحكهم أو حاول يتقصى اثرهم
رجع ورة اكثر من ٣ ساعات
كرابتنا راحو كلهم
دخلنة جوة بعد ماكترنا لديوان وسدينة لباب
بلزرع جنت ضام لحبيّب
طلعتة جان بعلاكة جنفاص دخلت صارت بوجهي عمتي امريكا وتهاني وزوري يردن يمشن للبيت
تهاني:- ايي الله جابك حتة توصلنة
هاج لسويج طلعن واني هسة الحكجن
اخذتة من ايدي واصابعي تلمسن اصابيعها لترفات
عاينت الها بتسمت بخجل ومشت
تانيتهن مشن هي وراهن تمشي على كيفها وتدندن
من بين لزرع تختلت وحييل جريتها لصدري
ايدي على حلكها وصدرها يرتطم بصدري ونفسها لعالي
همست الي من بين اصابعي
شفافها تتحرك على اصابعي حسيت كل كياني بحضرتها ذاب
وكل ذرة بية جانت ترجف
جانت تهمس الي خايفا من عمتي الي لتفتت تدور عليها
اسعفتنا زوري
زوري:- عمة تلكيها ردت ناسية شي
امشي خل نروح للسيارة وهسة هي تلحكنا
مشن يلله جرت نفس
وخرت ادية من شفايفها
وبعيوني نضرات لعطش تشرح لبية
صوتها بخوف يهمس الي
فدعم شماالك هم شارب هدني لايجي احد
انة يمتة انروي كليلي عطشان سنين صارلي حني علي من نعلعلة شرف ابن عمج لواكفلي سلايا بزردومي
وانة شبيدي ابوي شاد حرابتة وياك من ورة سوالفك بطل شرب عاد
انة ماضار احد ضار روحي محد الة غرض بية اشرب انهب
جا اانة مالي خاطر
ولج انتي لخاطر ولمزاج
انة اشرب خاطر اشوفن وجهج بلشط
هيج ينرسم الي بلشط واضل مثل لمسودن اشمر روحي بلشط وادورج
يعني لوصرت يمك تعوف لشرب
اعوف حتة اهلي
لشرب مايرويني شفايفج لتروي
هديت روحي منة وبغضب همست الة
لعد هم روحك انة يو خذاني ابن عمي اسوي بروحي شي
يحط راسة براسي إلة مارايد روحة
خل تفض سالفة جليل وولدة واريد اشوف ابوج شلون ماينطيني إلة اكسر هذا لبطل براسة واشوف يازلمة يطلع ورا
فدعععععم
خايبة اتغشمر ويا شمالج
يلله هدني هلوصلن امي وزوري للسيارة ولسويج عدي
ماهدج إلة اضوك
شتضووووك
_يأشر على شفافي
فدعم عيب احشم شني ماتستحي ماتخاف من الله
مالج غرض انة والله من نعرس عود اتوب
فدعم هدني لا وحك الله اعيط
بت ابوج سويها خاطر اسويها صدك واخليج تعيطين من سبب
خاب هدني شجلبت
فدوة اغديلك والله من ننخطب بيك خير وتدلل
نزلت من عيونها دمعة خلتني اكره روحي وحسيت نفسي حيوان
مسحتة بطرف دشداشتي وعلى صدري خليت راسها
شتعلو اهلة لينزل دموعج
بت لمسموط ليش تبجين كدامي
عدلت حجابها بيدي وكلتلها روحي
مشت وردت ندارت علية تبتسم وبشفافها ترسملي بوسات
روحي بت لفطير انة كوة كاض روحي لاتخليني اسويلكم فضيحة بهليل
تانيتها وصلت قريب الهن وطلعت
ركبنة لسيارة بيتهم مسافة عنة
نزلتهن ورحت للشط
طلعت بطلي جان نوعية فاخرة وغالية واول مرة اجربة
شربت لحد ماكمت اكومن واطيح
مااذكر شصار نمت مدري نغما علية
بس اذكر فلح لسعداويين ش
الوتي وبباب بيت اهلي ذبوني ومشو
كمت على حيلي اضحككك امشي خطوة وارجع خطوتين ليورة
دخلت للبيت ملابسي كلها طين وخيس
لاكيت امي وجدتي شكرية بلمطبخ
تقربت اضحك واحضن بيهن احس روحي مشتاكَلهن جن سنين ماشايفهن
امي سحبتني تريد تاخذني للغرفة
حضنتها واركص وياها واضحك احس بنشوة سعادة غريبة كان تسري بشرايني
دفعتني وتهمس الي
خايب صوتك لايسمع جدك بعدة مانايم
صعدت عدي لسباعية وحسيت روحي فاندام
دفعتها واصيح
واذا يطلع شني اذا زلمة خل يجي يواجهني
وحك الله املص راسة واسوي باجة
ايد جدتي على حلكي تسكت بية وامي تسحل بية وانة مصوخل ومصر اكللهن
طلعنة يلله طلعنة خل يجي نفتح ساحة
طلع جدي من غرفتة متفاجأ
ماتقرب الي ولااحجة بوجهة للتلفون مادري بيمن اتصل
غضنفر طلع من لأستقبال مانايم بغرفتة
حاول يمنعة ماكدرلة
بقيت اني بلصالة ابيع بطولات واتعارك وية ذبان وجهي واضحك بهستيرية
صوت سيارة برة دكت هورن
جدي صاح طبن جوة كلجن
دخلن وبقو بس صميدع وغضنفر
طلع جدي فتح لباب وطبو ويا ثنين
سحلوني
غضنفر وصميدع جوة حاولو يهدئون جدي ويسحبوني منهم
بصياح نتر بيهم
مالكم غرضضضض انة ارد اربييي
رحيل ماعرف يربي
اخذوني بلسيارة جانو لابسين مدني
بمكان شبه مهجور نزلوني
وكل واحد طلعلة توثية من لجنطة
لسايق بقة مانزل جان ولد زغير قريب ل١٦ سنة
لزموني ثنينهم يضربون بية واني اضححك مااحس بأي الم كأن يدغدغوني
لشرب براسي ومو اي شرب يسطر حتة لمطي
لدم مااعرف حتة منين يجري
يضربوني وارجع اكوملهم ميت من لضحك
الى ان ضربني واحد منهم على بطني حيل معدتي كلبت تقيئت كل لبيها
وراها كمت احس بضربهم
كل ضربة جنت احس تكسر شي بية
طول عمري احاذر من جدي وليوم طحت بيها
حاولت اتصدا لضربات لان مال اتضارب وياهم مستحيلة ذرة طاقة مابية وراسي ماشوف بعيوني كلشي
ضليت اصيح واهدد بيهم طلعت هويتي شمرتها عليهم بلكي يخافون
كلشي مافاد
ماشوف غير لولد لسايق نزل من لسيارة وسحبني خلاني ورة ضهرة
وبيدة سلاح وجها عليهم وصرخ بيهم
كافي ولد لكلللب راح يموت ابن لعالم بدينة
وحك الله ليتدنالة اصوبة ولكم تضربون زلمة مو بوعية جان ستحيتو على شواربكم
غير جدة كال احنة شني عدنة عداوة ويا
كال ضربو مو تموتو حلال
اخذني بلسيارة لبيتهم طببني للحمام غسللي ونطاني ملابس من عدة وجابلي كوب كهوة
ضلينة نسولف
اسمة طالب زغير اهلة بس زلمة معدل
والي ضربوني ولد عمة شرطة ثنينهم
من يومها صار طالب صاحبي وبيت سري
رجعت ثاني يوم اعرج من رجلي ماطبيت للبيت خجلان كلش من جدي
رحت لبيت عمتي امريكا
تلكتني من لباب
_ولك وين جنت يمصخم
_شكو عمة شصاير
_جليل لنذل متصل بليل ومحاجي غضنفر وكايلة
خاف عبالك انة بس كتلت ابوك
انة امك لعبت بيها فلك وياس الشردت ويا وواريتها الك بغرفة نومة جان عاقد عليها ومتزوجها بس هي تخاف تحجي وتستحي عبن ابوك بعد مادايرة سنتة
وكايلة موبس هيج
حتة نعيمة احنة شردناها
ولصوبك ليلتها بضهرك موش لوادم لكلنالكم عليهم
لصوبك عبود
وكتال حنون واخوتة مالهم غرض احنة تهمناهم حتة تهد عليهم ويموتوك
واحنة هسة بديرة لواقواق لوتكلب لدنية ماتلكانة وفصل ماالك عدنة
شتريد تسوي سوي
امك شبعت بيها انة
وبجالك ويلادي لعبو لعب وانت جنت تشيل عنهم
لوتسوي لمايتسوة ماتبرد نارك خليك هيج احترك بنارك واحنة تعافينا وكلشي مابينا
ونسواننا وفروخنا يمنا
ونعيش احسن عيشة
-انة غلام ابوووي
وغضنفر وين هسة
_انة ادري يعمة خابرو علينا اهل مرت جليل كالو غضنفر رايحلهم للبيت وداكهم هوة وصميدع وابني هم رايح وياهم وتلاثة من ويلاد عمنة همة وولدهم
وكايللهم الكم يومين اذا مادليتوني بمكان جليل وولدة احرك دياركم عليكم
وهسة مترصد الهم من اليل كاعد هوة ولولد كبال بيتهم ومناطر يدلو بمجان جليل وولدة
طلعت من لبيت مثل لمخبل
نار بية تسعررر
غضنفر مو اخوي
روحي ونفسي لبصدري
من لزغر جان لسند ولضهر الي لو ملنة انة وصميدع هوة اول من يسندنا
بجالة جنت امشي مرفوع راس واتحاما بي
دخلت للبيت جدي بلصالة شافني صاح علية يريد يفهمني
لاتحجي كلشي ادري
عاشت ايدك من صوبتني هسة شلون افزع انة لغضنفر بلله ماتكلي
ماحجة شي كاعد علقنفة راسة للسقف وايدة على كلبة
تقربت الة
لزمت ايدة
جدي لاتغث روحك احنة كادرين نحلها
لاتخاف لو اعرف اموت ولا اخلي غضنفر يفجعك بجليل
احنة بشر ونحس بيك لاتضن ناخذ ثارنة على حساب تعبك وسلبان راحتك وصحتك
فدعم انة اعتمد عليك تهدي يبعد جدك
لاتضحكون لوادم علينة ولاتخلي يلطخ ادي بدمة
اعفو يبوك ليعفة اجرة عد الله جبير ويم الله لقصاص ولحكَ ميضيع
انة لو ادري توكف عد كتلة جليل اكللكم كتلو
بس والله يبوك تضل لأحفاد احفادكم ناس تكتل ناس
ويامصعبها لو دخل لثار بين ولد لعم
ان شاء الله جدي
لاتخاف وعلى كيفك وي روحك انت عدنا بلدنيا
ومابيها
ولجل عينك الف عين تكرم
خذيت سلاحي وطلعت من لبيت
بعدني بلسيارة توني حركت وكفت سيارة رجل عمتي امريكا ونزلن هية وزوري وتهاني
عضيت ايدي من شفتها جاية بطرك لدشداشة رغم جم مرة انبهها
تانيتهن تقربن علية
وحييل من حجابها جريتها وبراسي ضربتها كلة
ولج بت لمسموط انة موكايل لبسي عباتج
جا انة انشدهت وحك الله ماندليت دربي منين
ايدها على لاسها تفرك بي وتهمسلي
ليش هيج عنجر راسي شمالك وياي
انة لشمالي لو انتي ولج شوكت تكبرين شوككت
مشيت بلسيارة لبيت اهل مرة جليل
جانو غضنفر ولولد كاعدين كبال بيتهم بين لزرع بلكاع
تقربت كعدت يمة
كوة ثنيت رجلي وكعدت يمة
وبصوت ناصي همستلة
انة وياك موبس علموت حتة على جهنم
بس ياخوية صعبة وحك الله صععبة
انة موكتلك هوة يريد يستفزك ويخليك تغلي
ليش تنولة مرادة
هوة يريد يشوفك هيج
اعفي عنة وإتركة لربة وربك مايطك بعصا يمهل ولا يهمل
انة ماريد اكتلة حلال بس اصوبة
موصوبتة مرتين ياخوية
لمرتين وحدة مال كتلة ابوي ولثانية حجية على امي واتهامة الها بشرفها باطل
بقت مال صوابي بليلة لشردو نعيمة
واذا صوبتة ترة كلشي مايصيرلة هم يطيب ويكوم على حيلة
انة ياخوي مالومك
الله يلوم الي يلومك
بس حاول تعفي عنهم
خل يرحون بحال سبيلهم وخلينة نعيش
كافي صايحة علينة لصيحة من سنين انة اريد اعرس ماتريد تفرح بية
بقيت هواي احجي ويا
كسر ضهري منضرة عيونة حمر مانايم من الليل
تعبان ومكسور
انة لوبمكانة اجذب اذا اكول اعفي عنهم
بس يمكن هوة الله منطي عقل وصبر وارادة مرتين عفة عنهم وهمة مصرين يدفعو يكتلهم
الله لايحط بنادم بوضعة
من بين صفناتة صوتة يهمس بحسرة
اااانة بعازتك ياخيي
وينك ياقيصر انة مهدود حيل
بعازة وكفاتك الي
بعازتك تصيح بكل حسك اليمس غضنفر احرك ديار بني سعد علي مثل كبل
_وسسفة جا انة شني هنا
انة مو اخوك
صوتة يهمسلي بحسرة
لا ولنعم عضيدي وشيال لهموم
بس انة مشتاكَلة وداعة مصابي
والي يجيبلك اخبارة بس توعدني ماتحجي لجدي
_خوية جليل مانخلص منة انة كتالة واسكت ولدة بفصل مالكم غرض
_يعني مالك نية تعفي
_عفيت هواي بس همة يدكَون على موتهم
بقيت يمة
صبحية تقرب النة واحد بشماغة لأبيض يلوح بيدة
شمر سلاحة غضنفر وراحلة لحكتة
كال برتباك انة ادليكم بمجانهم بس ماتجيبون طاري لأحد من اهلي
غضنفر كالة تامر
دلا بمكانهم
اشرلنة يلله نرد للبيت
رجعنة جان طبيعي كلش ووصانة مانجيب طاري كدام جدي
نمنة ليلتها انة ولولد بلأستقبال وهوة يمنة
عيني علي لضوة طافي اليل كلة مانام سلاحة جوة راسة ويتكلب
مااجة لعيني نوم خايف علي من روحة
فجرية كام للحمام
بساع طلعت رحت على جدتي وكلتلها تصعدلي لانعام عسا تكدر تأثر علي
من جيب دشداشتة لمعلكة طلعت جدتي لمفتاح وصعدنة اني وياها
فتحنا لباب جانت لبنية نايمة
كعدتها جدتي
كعدت مفزوعة
انعام:- ها بيبي ها شبي غضنفر شسوة كتل جليل كتلللللللة
_جدة سمي برحمانج علكيفج يمة فدعم يريد يحجي وياج
لبست لبنية ولفت روحها بلبطانية
طبيت يمها
_خوية نعيمة غضنفر ندل مكان جليل وناوي على كتلة حجيت ويا ردت مافاد
حييل صرخت يريد يرملني غضنفررررر
_ترة هسة كام واضن راح يصلي ويطلع يروحلهم
انعام:- شمرت لغطا وركضت بكل قوتي
جان بلمطبخ بيدة ستكان جاي وواكف
بآخر بايتين عثرت ووكعت
تقرب الي
حيييل صرخت بي
وخر عني وخررررر اني راجعة منين مااجيت
تريد تكتل جليل وولدة يهدون عليك المن تزوجتني حتة تورث اطفالي لثار
انت موكد لوعد ليش توعدني ليييش
وسفة انة موكد لوعد ؟
لعد عوفة عووووفة
يجرالج بس كافي لاتصارخين
جذااب جذاااب
ايدة حوطتني حييل
سللامة طلعت هية وحمزة يعاينون علينة جدتي شكرية علدرج
دفعتة وبغضبي عطت
عوفني اني مابقة ماطول براسك هيج نوايا
حييل شالني من ادية وسحبني لغرفة سللامة دخلني وسد لباب تقرب الي دفعتة
وخر اريد اطلع عدنة غرفة وندخل بيها ليش تحرك كلب لبنية
تقرب الية ويهمس
اكو مرة تكل لرجلها جذاب
لأن خدعتني وكلتلي انسا واسامح
وانة ماحذبت جنت ناوي اسامح بس ستجدت هواي امور
ورغم هذا انتي بعيني وخايف عليج اكثر،من خوفي على وليدي
خلص عوفني خليني اروح لأهلي وكمل الي بديتة
له له يورد لباجلة
الي تطب حياتي برضاتها ماتطلع منها إلة برضاتي
جنت لازمة يدة لباب اريد اطلع
ايدة عصرت على ايدي وجسمة لتسق بجسمي ضهري صاير علي
راسة بشعري ويهمس
انسا عمايل جليل
وانسا لدنيا بكبرها بس لاتجيبين طاري لفراك
_اكييد
_واكيدين
وخر لعد خليني اطلع اني تعبانة
افففة تعبانة
اي
خوش براحتج
صعدت فوك
ورا دقايق نفتحت باب لغرفة ودخل
تقرب الي كعد علجرباية صوتة يهمس،
تردين تمشين جا وكلبي لمناطر الة سنين
كلبك اخلف وعدة
ماجنت ناوي اكتلة ردت اصوبة بس
ردت اطفي ناري
وهسة
هسة راح اطفيها بيج
غضنفففر
شتعلت صفحة غضنفر
انة ماشبعت هنة ليلتين وجليل طلعلي من طلعو بروحة كون
دقيقة بس اشوف جدك لمسكين ضغطة صاعد من وراك
جا ولمسكين لكبالج ماتحنين علي
لاتتهربين اشكيج عد جدتي ترة
ههههههه صدك والله
انة مااشكي انة اخذ حكي بيدي
يحجي وياي وطفة لضوة وتقرب
ايدة للفراش سحبتني تمدد بضهري
صوتة يهمس يم اذاني برقة وايدة تتجول بلمساتها على جسدي
انة هايم بشفافك وخصرك ليشبه لجرة
وبين لنهد ولصرة صحت احااه جم مرة
ويلااااااااااااااااااااه والف ويلا وياحسرة
سكران ضايع منتشي ماجني ذاك ليشبه لصخرة
حيران دايخ مستحي اصفن بلرصعات بلشامة لو بعيونك لشكَرة .....حنين حاتم
بين احضانة اتكلب واسال بروحي
شلون يكدر انسان يكون كتلة من لغضب وبنفس لوقت يكون بهلرقة
رجعت من لحمام جان
متمدد بفراشة ومتغطي بلجرجف
جكارة بحلكة
بتسم ويهمسلي
بيج على زلزال ثاني
ضحكت ورديت
صير عاقل لتخليني اطلع انام بلصالة
هيهات يضل عكَل وي هلحسن
ايدي على صدرة وهمست
غضنفر توعدني سالفة جليل تنتهني
راسة نتجا على لمخدة نفخ لدخان
ندار علية ايدة تمسد على شعري بتسم وهمس
وانة اكدر اكول لاء
بلله عليج جذبت انة من كتلج تضلين ذراع انلوي منها
حبيبي وكل اهلي
اني من تخليت عن كلشي واجيتك وصديت وياك جبهات جنت واثقة من اختياري وخطوتي
مااريدك تخليني اندم
_حشااا يموت كل فعل يخرب صورتي بعينج
_وتعيش انت سند وعافية وروح الية
حييل حضني
وعلى ايدة نمت للصبح
جانت ليلة نمت بيها بين ادي جن حاضني بابا
كعدت ساعة بل١٠ لصبح قررت اتصل بأمي
دكيت عليها لرقم متعرفة لأن مسوين جديد
الووو منو
اني انعام ماما
صوت شهكاتها تعالة وراها كالت
اني ماعرف احد بهذا لاسم وسدتة بوجهي
بقيت ادك الى ان جاوبتني
ماما مشتاقتلج حبابة لتسدي
اني هنا مرتاحة والله وغضنفر شايلني على كفوك لراحة
والله ماما هسة يلله لكيت نفسي
سنين اني يمكم احس روحي ضايعة رغم كل اجواء لأستقرار الي تحيط بية
صوتها يهمس الي ببحة ودموع
الله يسعدج اني ماردت غير مصلحتج
راح ابقة طول عمري حاطة كلبي بشيشة من خوفي عليج من حياتهم وطبايعهم
لتخافين اني عندي رجال يبيع لدنية علمودي والله ماما بدون مبالغة
الله يسعدكم
مع لسلامة
سدتة
ادري زعلانة بس لمهم سمعت صوتها وطمأنت هية علية واعرف ماما كلشي عدها ولا تنكسر كلمتها لذا اي ردة فعل تبدر منها اقدرها
بعدني واكفة علتلفون اجة على بالي اتصل ببلقيس خصوصا من عرفت من غضنفر بسفر قيصر الي جان رايح يخطبها
صحت على بسعاد سألتها علرقم كالت ماعدهم تلفون امي كاسرتة
بس اعرف رقم جوارينهم اتصلت مرة بقيصر من عندة واني ضميتة بدون مااحد يدري
كل فترة اتصل بيهم اسألهم عن اخبارها يكلولي ماتطلع ولاتجينة
وراها حسيت لناس ملو مني بطلت اتصل
رديلي لرقم
ردتة الي دكيت رد علية صوت رجال
سلمت وطلبت منة يدز احد الهم ويكللها انعام تريد تحجي وياج
كال ماشي
ورة اكثر من ساعة رجع دك
شلتة
الوو بلقيس
صوتها يهمس الي بحركة
ها انعام
شلونج شخبارج
اخباري هه يااخبار انعام .....يتبع
مساء لخير عليكم طلبتو صور اشباه للأبطال اني نزلتهن ببارتات قديمة
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!