#خنجر_الغضنفر
#بارت_٤٠
#حنين_حاتم
قيصر ....
نايم وفزيت على صوت احد يوعي بية
فتحت عيوني
رجعت غمضتهن فركتهن بأيدي عبالي احلم
رجعت فتحتهن
صوتها يهمس الي
قيصر سودة بوجهي عليك شصاير بيييييك
فتحت عيوني بذهول من سمعت صوتها
حيييل سحبتها لحضني
بهللحضة ماجن شايف كوثر جن شايف امي
جن شايف ديرة هلي كلها
حاضنها وبلكاع وكعت من الجرباية وبعدها بحضني
حييل عصرت وجناتها بيدي واتلمس بوجهها عبالي لساني حلمان
دموعها تجري
صوتها بي بحة يذكرني بصوت امي
حييل تخرط بخدودها
سودة بوجهي عليك ياخوية خبلوك خبلوووووك
تتلمس بوجهي وتبوس بدية
ولك قيصر هاي تاليتتتتك
متتت كون ولا اشوفك بهلحال
عمت عيوني كون ولا اشوفك هييييج
جان وقت وجبة الأكل وكلهم طالعين بلصالة مال الأكل بس اني جنت نايم
اذكر واحد من الممرضين راد يوعيني دفرتة وكمت اصيح
عافني وهوة ينتر وينبهني انو ماكو اكل ماطول فوتت الوجبة
الطبيب الي دخل وياها من شافني استقبلتها بودية بتعد وبقة من بعيد يختلس النضر وبيدة اوراق يوهمني انو ملتهي بيهن
لزمت اديها احاول اسيطر عليها
وبراسي سؤال يجول
ليش هيج مقهورة على شكلي
معقولة حالي يقهر لهلدرجة
جريتها لصدري اشم بيها جني شابك جدتي شكرية
اشم بيها واصيح افييش ياريحة هلي
دفنت راسها يم متني وتنعى
ولج يمة تعاي شوفي شبيهج شصار بحالة
معانييج لجنت اشوفهن بوجها ماهننا مختفيات
ولج يمة تعاي شوفي حالة هذا التحبينة جنتي اكثرنا
يشبهج بكلشي موبس بلشكل ولطباع حتة بضليمتج ماشاف شي من حياتة مثلج مضلووووم
تاليتة حالة حال المخابيل ولج يمممة
جريت وجهها متني
لا كوثر إلة انتي
انة مابية شي مالج شغل بيهم باعيلي
اي اي يبعد عيوني كلشي مابيك ماالك غرض بيهم وبليحجونة
احس كأن طفل كدامها وتحاول تهديني بهلكلام خوفا من ان اثور
عصرت ايدها بكل قوتي
كوثر سمعيني انة مابية شي كل الحجو الج موصحيح
انة اجيت هنا ضلم
ماجان كدامي وسيلة لبرائتي غير انو ادعي المرض حتة اخلص من الحبس
وبلنهاية نحبست هنا
اشش هسة مووكت الحجي
اني وقعت على اوراق كفالتك وعلى مسؤليتي راح اطلعك
بهلأيام ينضرون بسالفتك ولدكتور يجهز التقرير الجديد
شجابج لهنا شدلاج بمكاني
لطبيب مالتك اتصل بية وبلغني انو زوجتك ناطيتة رقم تلفوننا
منيلها رقم تلفونكم
شمدريني انة كلت يجوز انت محصلة من لعراق وناطي الها
هسة عوفك من هلسالفة لمهم وصلت الك وراح تطلع منا
يمي اخذك بعد ماكو حبس ومصح
صفنت
تذكرت كلام لدكتور من كال مااطلعة إلة التمس التحسن بحالتة
فرحة على حزن
هلشي معنا إما اني فعلا تحسنت وهمة لاحضو هلشي
أو معنا تمثيلي كدر يقنعهم انو اني تحسنت
عدن هلأيام علية فرحاان
رغم شايل هم شلون ادخل لبيت رجل كوثر واتعامل عادي بعد لسوو بينا
نسيت وسامحتها وعمري ماحقدت عليها ودوم اكول
غضنفر ضغط عليها
دوم اذبها براس غضنفر مثل ماتعودت من صغري اسوي شماعة واعلك عليها كل اخطائنا وذنوبنا
لحد ماصار هوة نفسة اقتنع انو هوة سبب بكل ذنب صار وراح يصير
لحد.ماكام يستحلي كلشي غلط لأن بكل لأحوال احنة نذب لصوج بي
خنكة بصدري استصعب طبتي كدام رجلها
شعور بداخلي وصوت يهمسلي
شلون اطب لبيت اختي لشردت من بيتنا وماحطت النا اي اعتبار عادي وكأن شيء لم يحدث
على لأقل لمفروض يكونلي موقف كدام رجلها
على لأقل لمفروض اخذ منها موقف حتة لاتضن انو اني قابل على الغلط الي سوتة
بس مجبور اتعامل طبيعي وانسة جرحها
مجبور انسا طعنتها
مجبور انسا طلعتها شسوت بينا وشكد ضرتنا وشلون نشبجت قصص واكثر من سنة احنة نركَعها من صفحة ترد تنفتكَ من صفحة
مجبور اتعامل طبيعي حتة اكدر اخذ حقي
حتة ارتاح وارجع لنفسي
حتة يبطل شعور الرغبة بالقتل والتكسير يسيطر علية
حتة ابطل اطلع حركتي بكلشي كدامي
راحت بيومها وتنتضر منهم اتصال يبلغوها انو صار مسموح تجي تستلمني بعد متوقع هي وزوجها
هلأيام عشتهن بقلق وتفكير
شلون الزم نفسي
شلون راح امنع نفسي من انو اروحلهم للبيت واشرب من دمهم
الى ان اجتني وهي توقع على اوراق هواي هي ورجلها وطلعوني
ودعت هذا المكان واني اوعد نفسي اقتص للأيام الي قضيتهن هنا ضلم
اوعد روحي الشفافة الماتت بسبب خداعهم
اوعد طيب نيتي الي نذبحت على اديهم
بأنو احول ايامهم لعذاب لامتناهي
انو اخلي الخراب يترس حياتهم مثل ماترسوني امراض مثل ماخلوني من صدمتي بيهم امشي واحجي وية روحي
مثل ماخلوني اكوم واطيح من طولي
وصلنة لبيتهم جان بولاية ثانية
فور دخولي للمكان ادين زغيرة لافت على رجلية دنكت واشوف طفل حاضنني من رجلية بكل حنية وبراءة
دنكت رفعتة بيدي
جان يضحك ويصفك
خالو خالو
يندار على بيبيتة ويكوللها
صار عندي خال مثل توفي
صوتها من همستلة
غضنفر يمة عوف خالك خل يرتاح
من سمعت اسمة حسيت جن واحد من ضلوعي تحرك من مكانة
حييل حضنتة لصدري وشميتة
كعدت على الكرويتة كوثر طبت للمطبخ تسويلي جاي
وصوتها وهي تحجي من المطبخ
_اكيد مشتاق للجاي العراقي
شلون خبطة جابولنا بيت اخو خالتي من لعراق تخببل
نضرات خالتها الي هي المفروض خالتي
بس ماشايفها ولا شايفتني
وكل لمرات لجايتنا بيهن اني جنت يم عمتي مدينة بلبصرة ادرس
تخوفها وهي تفرك اديها وكلساع تصيح للطفل تعال هنا يمي بيبي
صوتها من تندار على ابنها وتهمسلة
_ ليروح يأذي كوم اخذة منة شنو مرايد ابنك
كلش خلاني ارجف اعصاب
جانت بداخلي رغبة بان اصرخ بكل قوتي
شنو شفتي علية حتة هيج تحجين
قبل ماافقد حاولت اتماالك نفسي من شفتها تلح
صحت على كوثر وكلتلها اريد ارتاح اتمدد
اي خوية تدلل
اجت علية تريد اتجيلي
بهدوء همست الها
مابية شي يبعد اخيج انة امشي
بس لحكيني بلجاي ريحتة شكت خشمي
_اصعد فوك وبيك خير وتدلل جنك على جاي
اصيرلك جاي
صعدت لحكني ابنها يريد يصعد يمي
عيني تختلس لنضر على خالتي الي سحبتة بكل قوتها
حاولت اهدي نفسي
ونطيتها لعذر بخوفها لكونها متعرفني
وكل الي تعرفة عني انسان طالع من مصح نفسي وكاتل زوجتة كتلة موت
تمددت علجرباية وعيني تفتر علحيطان
بكل حايط من غرفتها اكو صورة النا
حتة لجدي وجدتي
بعدني على صفنتي دكت لباب ودخلت بيدها لجاي
نطتة الي
بتسمت واني اكتم صوت بداخلي يريد يصرخ لييييش
ليش هيج سويتي
شلون نطاج كلبج
ليش ماسريتيني وكلتيلي
ليش من نفتحت سالفة ابن خالتنة بوكتها
كلتي لشور شوركم
ووراها من ورة ضهرنا تشردين ويا
جرح بكلبي احس شوفتها هيجتة
صوتها من دنكت ودموعها كامن ينزلن وتهمس بشهكا
_شبيك صافن بوجهي
هاي صفنتك تحسسني بذنبي اكثر
احجي صرخ خل ارد عليك وابررلك
خل انطيك ولو عذر واحد يخليك تعذرني وماتحقد علية مثل غضنفر
_مااريد اسمع اي شي يخص هذا الموضوع
لأن كل الكلام وكل الأعذار وكل المبررات ماتنطيج الحق تسوين بينا لسويتي
بس مااريد افتح هذا الموضوع ولا اريد احجي بي
خليني ناسي
وخليني اوهم روحي انو سامحتج
مسحت دموعها
كامت على حيلها من لكنتور طلعت الي اوراق
ماتعدتني حوبتكم ولا شفت راحة وحكَ الله
حيل سحبت حجابها الي من دخلنا مانزعتة بساع طبت للمطبخ
عيوني نفتحن بذهول
جانت حررفيا صلعة
ايدها لزمت ايدي بقوة وبأنفعال ودموع كملت
كل مدة يكلولي هاي اخر ايام الج
واطيح واوصل لموت وارجع اكوم على حيلي
مكتوبلي اشوف لموت بعيوني كل مدة واعد لعدة لسفر بعيد وارجع للحياة مرة ثانية
مكتوبلي اضل اتعذب
واكوم واكعد اكللهم هاي حوبة غضنفر
الله كسرني مثل ماكسرتة
ماانسة نضرة عينة من اجة لهنا
ادري بي لو اجة ماتعدي على خير
بس انة ردتة يجي
عسا ينكسر خاطرة علية ويسامحني بس ماسامحني ادري بي
جبتة حتة ينكسر خاطرة علية وعلى حالي وتالي طلع منا مكسور خاطر من وراي
سحبت راسها وعلى صلعتها طبعت بوسة ودموع تناثرن ماكدرت اخفيهن
عدت مدة اني هنا
جنت احاول اتأقلم واتعافا من تعبي وتدهور صحتي
تعرفت على اخو خالتي وامي بس من غير ام
شاب زغير
والي فهمتة جدي متزوج ورة وفاة بيبيتي بس محد يدري بزواجة ومخلف ولد وبنية ومن زمان طالع بيهم
بنتة وزوجتة ميتين بحادث تماس كهربائي
باقي بس خالي
يطلع بداية لأربعينات بس شكلة مرتب ويبين ازغر من عمرة
منفصل وماعندة غير توفي بعمر ابن كوثر
خالتي ماجانت عدها تواصل ويا بس من رايدة تطلع متواصلة ويا وطالبة منة يسويلهم فيزة
لولد صاحب شخصية حلوة
إجتماعي
ماحسيتة خال كأن صديق الي حتة ماجنت اصيحة خالو
بأسمة اصيحة
حسيت بي حنية
كلشي يسوي يذكرني بغضنفر
من مداراتة الي واصرارة انو يطلعني ويعرفني على اصدقاءة ويحاول يخليني اتواصل وية لناس واطلع من وحدتي
عرفني على كل اصدقاءة تقريبا
من الحاحهم انو بكل جمعة الهم وكل طلعة ياخذوني وياهم حتلو هوة ميطلع ويانا
حسيتة كأن هوة يوصيهم
زوجتة مطلكَها بس عندة تواصل وياها
اصدقاء وعلاقتهم طيبة
كوثر طول فترة تواجدها هنا رغم مرضها
ماتاركة حلمها ومكملة دراستها
ومثل ماجانت تحلم تصير معلمة مثلي
محققة حلمها
معلمة رياض اطفال رحومة بتعاملها
ومعروفة بكونها ذات قلب طيب لكل يحبها
اشوف لهفة لأطفال عليها من اوصلها لصبح للدوام
من تنزل يستقبلوها لطلاب بلأحضان
وتحرص على ان تبوسهم كلهم يومية واحد واحد
توفي يموت عليها وخالي زهير من يجي يكول خابصنا خبص بيج متكليلي شمسويتلة
جان يحجيها بكسرة ويكول
توفي يكلي اتمنة خالة كوثر تصير امي
تعاملها وية لأطفال حبها للكل وتعاملها بطيبة وية لكل
رغم اشوف خالتي تكسرها بحجيها
على اتفه لأسباب تفتعل مشكلة وتعصب عليها
بلمقابل جانت كوثر تتعامل وياها بمنتهى لأدب والذوق
كلشي يبدر منها يأاكدلي خوفها من الموت
جنت اتذكر روحي من جنت اداوم
شديد صارم لجهال تخاف مني
جنت اذا يشوفوني بلشارع يشردون
اضحك عليها واكللها انتي شنو من معلمة محد يحترمج تدمع عينها وتكلي
خلي اعاملهم بطيبة بلكي اذا متت الله يسلط لغضنفر ناس تعاملة مثل مااني اعامل هلأطفال
اتألم اتكطع عليها
اصعب شعور من انو تشوف اعز ناسك يتألمون وانت مابيدك شي عليهم عاجز تتفرج على ايامهم كيف يخطفها شبح الموت
عدت مدة اني احاول احصللي شغل رجل كوثر يشتغل حدقجي يرتب لحدايق ويهتم بلزرع
شغلة زين
طول هلمدة الح عليهم على شغل
يكلولي مدنحصل
وراها اكتشفت انو
من ضمن الأوراق الي وقعو عليها قبل خروجي
هوة انو مااشتغل ولا اشغل اي وضيفة لمدة لاتقل عن ست اشهر
لأن هاي اقل مدة يكون بيها لمريض الي مثل تشخيصي تحسن
تأذيت حيل
استصعبها اعيش عالة عليهم
ورة مدة اجاني استدعاء من المحكمة بلتفريق
رحت وراحو وياي كوثر وخالو زهير
وقبل مندخل للمحكمة المحامي مالتها اخذنا على صفحة وحجة ويانا
والي تفاجأت بي
طلبة وهوة يكلي
زوجتك عدها استعداد تتنازل عن حقوقها وعن تقسيم الممتلكات وكلشي بلمقابل بشرط انو تطلقها شرعيا بمجرد حصولها على حق التفريق من المحكمة
بدون تفكير وافقت
ردت اخلص منها
ماريد يربطني بيها شي وعلى اساس هلشي تكدر تحتال علية
ردت ابتعد عنها ويتم صرف النضر عن قضيتنا لقديمة
حتة من اقتص منهم محد يحطني بدائرة الشك
مثل مامعروف اقل مدة للتفريق ٦ اسابيع
بمدة قياسية وبسبب قوة حجتها وشرعية اسبابها بنضر لقانون
واساسا من محاكمتي لأولى لقاضي نبهها انو يحقلها لتفريق بس هي بوقتها باعت شرفيات
حصلت على التفريق وتنازلت عن حقها بلتقسيم وكلشي
رحنة للشقة جانن لأغراض بقبو اسفل لبارك خالهن ابو لملك
بعت الأغراض بمبلغ لابأس بي لأبو لملك
كل مدة اروح مراجعة للطبيب
وبكل مرة اروحلة يبدل دواي
الي اصلا ماجنت اشربة
تنطي الي كوثر اخلي جوة لساني واتانيها تروح واذبة واتمضمض من اي بقايا منة بحلكي
ماعرف اذا جنت فعلا عصبي لو خالتي هي الي تخاف مني زيادة عن اللزوم
رجل كوثر من طالعين علأساس يتعالج بس ماصايرتلة عملية
بس كوثر صايرتلها عملية ونسبة نجاحها عالية وصوتها راجع بس متضرر بي بحة قوية
الي يسمع صوتها يحسها جبيرة حيل
من بعت لأغراض لأبو لملك بلغني انو مرتين يجون ناس يسألون عني
وهوة مفهمة انو اني رحت يم اختي حسب ماهيفاء حاجيتلة من سائلها علية
ماتواصلت وية اهلي
مااكدر اتواصل وياهم ادري ماطول عرفو بية يم كوثر يسوونها سالفة ويبقون يلومون
عدن علية ال٦ اشهر بطلاع لروح
واخيرا حصلتلي شغل
وية كريم رجل كوثر بديت
شوية شوية تعلمت على شغلتة واحلا مابيها انو برة
ماكو بيبان ماكو حبسة
شكد تحسنت وشكد جانت كوثر وابنها الهم فضل بتحسن حالتي بس بقيت اختنك من لبيبان لمسدودة
اختنك من الغرف الزغيرة
مااصعد مصعد حتة لو اضطر اصعد عشرين طابق مشي
ركوب لطيارة بحد ذاتة بلنسبة الي عذاب
بقة عندي خوف من لناس
بقيت مااثق بأي كلمة يحجوها
واي شي يصير وياي خارج لبيت ارجع اسولفة لكوثر اخذ رأيها
عدة مدة حسيت رجعت لنفسي لقديمة
مرتاح اجري الي احصلة لابأس بي
اساهم بلمصرف
وانطي لكوثر فلوس الها
جانت تضحك وتكلي ذني الك ضامتهن مااكيسهن
كل فترة تروح تاخذ كيمياوي
تتعب هواي وجها يصفرر
تبقة شكم يوم ماعدها طاقة ومخنوكة
احاول اطلعها من كآبتها واحساسها بأن لموت قريب منها نضرتها بعد جلسة لكيمياوي وهي تحضن ابنها
جانت احد اسباب عذابي بهلدنية
واحد لأسباب الي خلتني اتحمل ذلة الكعدة وية النسيب وخالتي الي ماجنها خالتي كل حنية مابيها
مااحس اي شي تجاهها كأن انسانة غريبة
كل هلشي جنت اتحملة مااكدر ابتعد عنها
اخاف تموت واني مويمها
اخاف ابقة الوم بنفسي ليش بتعدت عنها
وبنفس لوقت اريد ابنها يحبني يتعود علية
مااريد تموت وابنها ميعرف اي احد من اهلها
بعد تفكير وملحة من كوثر وكريم قررت اتصل بأهلي
بيومها تلقيت رزالة وملامة من غضنفر وجدي وعمامي ومن لكل
بس جدتي شجعتني انو ابقة يمها
بسكوت عنهم اخذت لتلفون للحجرة مالتها وتحاجيني
تكلي اخيتك مواتة يمة مالك غرض بيهم ضل يمها
بقيت كل مدة اتواصل وياهم
سولفت لغضنفر على لسوتة بية هيفاء واهلها
بقة مرة يلوم بية مرة يشيلهم ويركعهم بلغلط
اسأل عن فدعم كلما اتصل يكلولي بلشغل
عدت سنة على تواجدي هنا
كل الي احصلة مااخذ منة غير الربع الي ولباقي اساهم بي وياهم
انام بلصالة جوة على الاريكا
غضنفر بحضني ينام
تعلقت بي وهوة هم تعلق بية موشلون ماجان
زوجها جان فقير حييل ناهيك عن كونة اخرس بلا صوت يعينة للتواصل وخلق احاديث وية لناس
خالي زهير بين يوم ويوم يمنة بليل نسهر ووقت متأخر يلله يروح خالتي وكوثر يلحن علي يتزوج وهوة يرفض
يروح وهوة حاضن توفي الي يغفة من التعب واللعب وية غضنفر
غضنفر طفل ذكي اجي اريد ادرسة يضحك علية هوة يدرسني
بعد ماحسيت نفسي ستقريت
راحت لعين عني
لطبيب حرفيا كالي بعد متحتاج تزورني
نطاني مهدأ كلش آمن حتة لانسان لصاحي يكدر ياخذة وكلي بس وقت الحاجة
ونبهني انو ازورة بوقت الي تستجد عندي امور ثانية
هنا حسيت انو حان لوقت لمحكمة لقصاص
ويامن تبالشو
انة حكَ امي عشرين سنة ومانسيتة
ولليوم لو ارجع للعراق هم عندي استعداد ارجع اجازف وماعوفة
منا بديت عن طريق اصدقاء عرفني عليهم خالي زهير
بديت اتقصا عنهم واحاول اعرف اخبارهم
دزيت شخص للمكان لجان يسكن بي اسعد
عرفت انو مغير مكانة
لولد سأل عنة بحجة شغل ونبهتة انو اذا سألو يبلغ لجوارين
اة فهمتة على شغل اسعد لجان يشتغل حلاق
بلغتة انو اذا سألو يفهمهم انو هوة جان معميل الة بلمحل اليشتغل بي
وقرر يفتح محل كوافير ولكونة معجب بشغل اسعد
قرر يجيبة ويا يشتغل
ولهلسبب جاي يسأل عنة
رجع وجايبلي عنوانة
يوم ثاني خليتة راح لنفس لمكان
وفعلا طلع يسكن بهلمكان
نبهتة وشددت علي انو ميخلي اي احد يشك مايعوف ورا شي ننلزم منة اذا نفذت مخططي
فهمتة من يسأل لجوارين يوضح الهم سبب سؤالة عنة
تنكرت بشفقة ومناضر وبقيت من بعيد اراقبة كل فترة
كل يوم اغير لسيارة الي اروح بيها
اغير لبسي وستايل شعري ولمناضر وكلشي
الى ان كدرت الكاها
بعد مراقبة ٥ ايام راح الها
مكان بعيد بأطراف لمدينة
منطقة شبه قروية
جنت مقرر اندل لمكان ووراها افكر بلخطة
بشرط ان تكون خطة بيها كمية دهاء تعادل دهائهم اضعاف مضاعفة
لجمة بكلبي اريد يضوكون من نفس لكاس
اريد يحسون الي حسيتة
رجعت بيومها فرحاااان
احس بأنتصار
نشوة سعادة
حسيت خلص بديت اكدر اتنفس مثل لناس
منا ابدي اخذ حقي واتحرر من قيد الشك والخيبة والثورة الي تركوها بداخلي
رجعت للبيت لأول مرة احس بفرح موطبيعي
دكيت لباب فتحها الي كريم
كبالي جانو خالي وخالتي صوت صراخها مجرد ماشافتني تقربت تبجي
شكو شكو شصاااير ......
بلقيس
بآخر مرة طبيت رجعت خلت لجهاز
صفنت بوجهي وكالت
ماما طفلج منتهي وين جنتييييي
لجارة مالتج متقدمة شاغلة حيز عنق الرحم اغلبة
شكم طفل عندج
هذا اول واحد وتدرين طرحت لتوم مالتة
عيونها نفتحن بذهول
معقولة
ماما هاي لحالة تصير غالبا وية الي تجيب عمليات
ومتاخذ فرق بين عملية واخرى
يعني بين طفل وطفل سنة
بهلحالة يصير هلشي
دموعي تنزل
دكتورة ابني بي شي
ماما حاليا مااكدر احدد الى ان يدخل بلتاسع
لأن غالبا هيج حالات بلتاسع يلله نكدر نحدد بعد اكتمال نموهم
بس وجب لتنبيه انو انتي تولدين عملية لازم
اول اسبوع بلتاسع نسوي عمليتج ماطول دتنزفين من هسة
معناها احتمال ٨٠ % نضطر نشيل رحمج لأن راح يصير فيضان دم يصعب لسيطرة علي
نزلت دموعي واني اشرح الها لصار وياية من طرحت
صوتها يهمس بحسرة
رب لعالمين يحبج
لصار وياج ميتصدك
والدكتورة الي اشرفت على حالتج فعلا رحمة اللهية
رحمة من ربج حفظ رحمج وبنفس لوقت حفظلج احد اطفالج
بقت تهدأ بية وتكلي لتخافين
نطتني تعاليم ابقة نايمة على ضهري مااترك ابدا إلة للضرورة ابقة رافعة رجلية الى ان ادخل بشهري
طلعت من يمها نفجرت بلبجي
يم السكرتيرة وكفت اضرب ابرة ضمن لعلاج
صوتها يهمس الي
خالة عمليتج كلش صعبة ترة
قبل اكثر من سنة جنت اشتغل عد دكتورة ثانية
اجتها نفس لحالة رفضتها وماقبلت تتحمل مسؤليتها
امي تسكت بيها تكللها لاعيوني مخربطة مونفس حالتها
وهي مصرة تقنع بيها
لا دادة نفس حالتها هم جارتها متقدمة لعنق لرحم وتنزف من لثامن
لدكتورة كلتلها عمليتج فوق لكبرى ولو انتي تعيشين لو لطفل ورفضت تستقبلها
بلكاع كعدت نهاريت
احس رجلية ماعادت تشيلني
ليش كل هذا يصير وياي
شكم مرة ياربي راح تطلعني من حلك لموت
خلاص اني تعبت اخذها لأمانتك وخل ارتاح
برة لتمن علية لنسوان
يتسائلن ولسكرتيرة ماقصرت شرحت لهن حالتي
كومتني امي تبجي على حالي
واني امشي وحدة من لنسوان لحكتني
لزمت امي من ايدها وسالتها
اكلج دادة هاي بتج ماماخذتها لسيد علوية
على شنو
دادة هوة لطفل الي يصير ويا هيج
لو تابعة ويطلع مشوه
لو عمل اسم الله
هوة لطفل الي يقاوم لعمل لو يطلع مخبل لو حرك
عفتها واني اسد اذاناتي بكل قوتي
كأن مابكلبهم كل رحمة
كل وحدة تزيدها علية من صفحة
نداريت على امي بعدها يم لمرية ومنطلقة وياها بلسوالف
ماعرف شنو تكللها وتأشر الها كأن دتليها على مكان
صحت عليها واني انتفض احس راح اوكع من طولي
اجني تركض
لزمت ايدي صعدنا تكسي
وصلنة للبيت
دخلت مخنوكة طبيت للغرفة فرفحت بجي
ولزاد لطين بلة يوم ثاني نوفل جاب زوجتة واجة
رجعها امي من لباب تلكتهم تشتكي حالي
بقت كلسا تجي يمي وبيدها لطفل تلعب بي وتدلع بي لو صرخ
تصيح اعلى منة يمة سووودة علية وليدي لحلو
احس كأن شمتانة بية
احس كل الي تسوي تتعمد تضوجني
اشكي لأمي تكلي انتي تتحسيين زيادة ابنها وفرحانة بي
متمددة بغرفتي لباب مردودة وهي تخابر بلصالة متدري بية كاعدة
امي برة زارعة خضرة بلكاع يومية تطلع ترشة وتكعد بلعتبة ويجن يمها جاراتنا
اسمع صوتها تحاجي امها تكللها
ايي دفعتة علية حتة يضربني عبالها يوكع ابني
تالي عاش ابني وهي وكعت بشر اعمالها
والله اخذ حيفي منها
ان شاء الله يموت ابنها واتشمت بيها
اني لكاتلني يطب ويطلع لأفندي مالي يسأل عنها وعن صحتها
عبالك هي مرتة مو اني
اندري شمسويتلة
دموعي تنزل ماجنت اتخيل اكو ناس تشمت بلموت
راسي رفعتة للسمة وحاجيت ربي
ياربي لاتحلي رواء وام زياد يشمتن بية
لاتروح تعبي على لخالي بلاش
بس هوة الي يكدر يصلح حياتي ويحميني بهلدنية لاتحرمني منة
لاتاخذة مني
لو الك نية تاخذة ليش ماخليتة يموت وية اخو
ليش خليتة يكبر
ويكبر لأمل بية يوم بعد يوم
اني علمودة تحملت اشكال لحجي
ولخاطرة مستعدة اتحمل بعد وبعد
لاتحرمني منة
بجيت الى ان نمت
اتصلت بزياد حجيت الة
نقهر وتأذة
بقة يطمن بية وكلي
_مومهم عندي لطفل اهم شي انتي تكومين بلسلامة
_حتلو كمت بلسلامة راح يشيلون رحمي
خلاص بعد مااخلف
_مومهم بلقيس صحتج اهم من كلشي
نزلت دموعي توقعت راح ينقهر من يعرف انو بعد ماراح يصير اب
فرحة لامست قلبي من كلامة وحسيت كبر بعيني
سديتة منة واني مطمأنة من ناحيتة
صلاتي جنت واني نايمة اصليها
مااتحرك غير للتواليت
حتة لسبح امي متخليني اسبح كل ٣ ايام يلله
حرمت نفسي من كلشي في سبيل لا انحرم منة
شهر عدة علية اني نايمة على ضهري
تعبت من الخدر والدمار الي يلزم ضهري
الى ان دخلت بلتاسع
الخوف من اول لحضة بدة عندي
رحت للدكتورة جيكت وضعي وحددتلي عملية يوم ٥ الي بشهري
بس نبهتني انو لطفل لمريء مالتة مامكتمل
مع ذلك لاازم تجيبني لأن اذا بقيت واجاني طلوك راح اموت اني ولطفل
يوم ثلاثاء لصبح ساعة ب٨ طلعنة اني وامي ونوفل للمستشفى
لنزيف ماوكف عندي لحد لحضة دخولي للصالة لعملية
وصلنة للمستشفى
ورة نص ساعة اجة زياد جان قلق علية
حيل حضني
وايدة تعصر وجهي وهمس الي
_انتي قوية بلقيس اني بحياتي ماشفت احد اقوة منج
انتي اقوة من هلمحنة وراح تتعديها وتكومين بلسلامة
تجاوزتي لأكبر منها
راح انتضرج تطلعين انتي وابني ونرجع نلتم
ببيت واحد
تصيرلنة عائلة وكيان وإستقلال
ننسا كل لراح
نعيش لفاتنا ونبدي من جديد
على جبيني طبع بوسة ونطاني دفعة امل كلش جبيرة
كدر بكلامة يمتص جزء جبير من توتري
دخلت للصالة
على حلكي خلو الأوكسجين
ثواني وحسيت لخدر سرة من رجلية وصعد لباقي جسمي
غمضت عيوني واني اتذكر كلامة
سلمت روحي الهم واني ادعي ربي واتمتم بدموع
اسمع صوت حجيهم
حسيت من شالوني من سرير
كلسا اصيح بردانة ويغطون بية
الى ان وعيت
فتحت عيوني تلمست بطني الي كأن سجاجين نابتة بيها
تلفتت برعب اسأل وينة ابني ويييينة
تقربت الي امي لزمت ايدي صوتها يرد علية .......
انعام كبالي ينتر
شسوت بي هاي بت لحرام
شللووون
شوداااااا يمهااا
شلون صار هيج شلوووووون
ووين لكتة واخذتة شدلاها بمكاااانة
بقيت يمة الوب
على صوتة لتمو يسألون شكو
سدت لتلفون ومدنك راسة كال
_قيصر علومة ماتبشر بخير
كلها تسأل شبييي
تكتر على لدرج وبقة يسولف الهم
_هاي مرتة بت الحرام مدولبتة
جان مارايدها انة لجيت علي وكتلة عرس عليها استقر عبالي يرتاح
طلعت حية نلعب بأحوالة من يوم لخذاها
اكو مرة بت اوادم تشتكي على زلمتها وتوصلها للمحاكم
تتوقعون قيصر يضرب ضرب موت بدون سبب
انة متوكد اخوي طاكها هيج إلة لو لشغلة تخص لشرف
قويصر،ماامدحنة عبن اخوي
بس كلنة ندري بي كلبة طيب
رب الي جان يخلص حدهن من ادين رجلها ومايرضا علي رغم سوايات حدهن ماينلبس عليها ثوب
رب الي جان يوكف بوجهي وحتة انعام من جانت غريبة بيننا وكف بوجهي وحماها بساعة شيطان بيوم خليت خنجري على ركبتها نام نيوم فوكي وتلاوة وياي واخذة مني،
كلها تأيد كلامة
قيصر انسان مسالم وطيب مامأذي احد بحياتة
معقولة يضربها هيج ضرب بدون سبب قوي
كعدت بصفة
همست الة
بس هوة داخل مصح نفسي
انعام كلشي مابي اخوي هسة صاحبي فهمني
كال هنا ياهو ليريد يخلص روحة من تهمة يددعي المرض
وبهلوسيلة يحصلون احكام مخففة
ولضاهر قيصر هيج مسوي
بيبي شكرية من مكانها ترد علي
_اي جدة قويصر عقلة يوزن بلد
شني مصح شمرضا
يمة جان اذا يكض لجريدة هيج يلبكَ لبكَ
بسعاد تناقش
وشعليها هاي بهاي بيبي لقراءة مو تقيم لصحة لأنسان
يعني شني ولج
يعني بيبي مننطي قيمة لصحة لأنسان بس لأن يقرة بسرعة
ياااااع قيمة شني
عدنا تمن بعد جدتج يفيدج
تحجي بلقيمة بسعاد انة وين وانتي وين
لابيبي نفس لمسار احجي ترة
بعدها تريد تناقش كرصتها
_سكتي انتي مو وكت فلسفتج
صميدع يعاين عليها ويخازر
_انة هاي كتب قويصر من تكومين تقرين بيها ماارتاحلج لاتخليني احركهن
_اهووو عاد رجعت على لكتب اي وين انطي وجهي لو ماهية مااكدر اسهر وية ابنك
انت اشوخر واني للصبح احتار بيش الهي روحي والولي للصبح
_غير عدي شعل يابوية
_جااني عاذرتك ماكايلة شي
_يابعد جبدي لتعذر
_الله يرزقك ويهون لتعب ان شاء الله
غضنفر يعاين عليهم
_هسة نعوف سالفة قيصر ونصفك الكم
وبلنهاية نحب نشكر المخرج والكاتب على هاي المشاعر الي لابوقتها ولابمكانها
_صميدع :- اي بلله كول شعندك بسالفة قيصر
هوة شني قيصر ورة لبيت ونلكالة حل
غير عابر سبع شطوط شبيدنا علي
ندار على جدة وعمامة وكال
_نخلقلة حل من جوة لكاع
مثل ماخلقنالة سبيل للطلعة من العراق بأي ثمن
وورطنا ودوهننا وضيعنا
_ابو خليل:- كل لحلول ارضا بيها وراهمة وانة وياكم بكل حل تكولونا كافي علي فدعم لضاع
بس استبعد سالفة ردتة لهنا وشيلها من احتمالاتك
_معناها نردة للأردن
وكل فترة نروح نطمأن علي نشوفة
يحس،عندة اهل واخوة وعمام
ذنب قيصر بركبتي ورركبتك جدي
ابو خليل.... دنك راسة للأرض جر حسرة مهموم رفع راسة وكال
انة موافق خل احد يقنعا يرد للأردن وان شاء الله مانعوفة
هاي وينها لأردن بسيارة نمشيلة
عدن كم يوم رجعو اتصلو بي
غضنفر حجالة على رغبتهم برجوعة للأردن ووعدة انو كل فترة واحد من عدهم يجي بزورة ويبقة يمة مدة
رفض رفض قطعي وكلة اني مااطلع من امريكا قبل مااخذ حكَي
وكوثر مااعوفها
كالة حرفيا
اختي تعبانة مااضنها تكمل هلسنة مااكدر اعوفها
غضنفر بقة شكم يوم مهموم
وكل فترة يتصل كل سؤالة عنها
قيصر يكلة انطيها للك تحجي وياها يرفض
بقو يتواصلون وية قيصر وبحجة قيصر بسكوت لبنات يحاجن كوثر ويسولفن وياها
قسوَّرة بهلمدة بدة ينشنش وشكلة يبين جان عندة ابو صفار نزلت نسبتة وتحسن
غضنفر ميكدر يتقرب الة
منة تتخبل من لبجي ولصراخ توصل بيها تصير حاجوز بينا وبين قسوَّرة متخلي حتة يشوفة
وهوة يفرفح علي بس ميريد يأذيها
تمرضت وضعفت اكل ماكو رضاعة قليلة احاول مااهملها بس وقت ماعندي اتعببب هواي
وصلت بية استعين بسللامة تساعدني بأحتياجاتي
منة ستوهة تمشي مااكدر اعوفها لازم وراها وراها و
قسوَّرة هم مااكدر اهدة
تعبت نفسيتي تدمرت
ماالحك ابدل ماالحك امشط صرت اتحسر علسبح
غضنفر بليل يكضيها يسوي مميات ويعزل وياي
اليل راحة للناس
اني اكضي اكوي اسفط ملابس اعزل ارتب
مواعين لعشة علية ماالحك اغسلهن بس اطلع من لغرفة منة لازم توكع على شي لو تحط شي بحلكها
لو تروح على قسوَّرة الي بلكوة انومة واخلص
كاعدة بلكاع الوليها على رجلية وقسوَّرة على صدري واخض بي
دخل غضنفر
عمة امريكا وزوري يجن كل فترة بس تهاني متجي
عبالنة ابوها يمنعها
حلفت زوري انو هي الي متقبل تجي ومحد مانعها
كالي تهاني تحدد عرسها بلأسبوع لقادم
اتصل عمها عزمنا
لا ابوها اتصل ولا عمة امريكا
بيوم حنتها محد بينا قبل يروح
جدو بقة يحجي ويلوم كلها متقبل تروح
كشمش سادة لباب ونسمع صوت بجيها
ام فدعم كالت حالفة مااحضر عسرها ماطول لعريس موش وليدي
بيبي كالت انة مااكدر اشوفنها تنزف لغير فدعم
وحكَ لرضى ابو محمد اكض ابوها لأكرع على كولة فدعم
واسوي وصلتين وافوخ كلبي بي
تالي لبسنة اني وبسعاد وبيبي نعناعة ورحنة
بيتهم هووسة يروش جهال ونسوان وكلها تركص
لجهال وياي ثنينهم
بسعاد جابت بس خليل
اختنكنا ولجهال نجعصو كضوها بجي
كوة وصلنة الها سلمنة عليها
تحضن بينا وتمسح بدموعها
ماكدرت اتحمل خليت وطلعت
لحكتني بسعاد جبنة لدرب كلة نبجي
يوم ثاني مصباح عرسها اخذت بيبي شكرية من لولد ومن عمامهم كل واحد مبلغ مالي هدية الها بيد جدو دزتهن لعمة امريكا وتعذرت عن لروحة نيابة عن لكل
ورة ٣ ايام من عرسها اجة فدعم
كاعدين على صينية لغدة كل احنة وفجأة دخل
بيبي شكرية وجدو وعمو رحيل كامو على حيلهم
جدو يتلفت ويأشر علجهال
فهمنة ديوصي انو محد يجيبلة طاري عرسها
امة جرت فوطتها على عيونها تمسح بدموعها بقت مدنكة بلصينية ماتحركت ولا رفعت راسها
دخل مبتسم ايدة بجيوبة بضهرة جنطتة
عاين علينة وكال
_جمعة خير ان شاء الله تغدو تغدوووو اييي هنا اليعشك مثل ساري يهجحو بدير ثانية لو يهجون ويخلو
جدو بأرتباك يتلفت كالة
_شش،شجابك
_خلص عرسها بعد شعندي ضال
موهججتوني علمودها
_شللك بهلحجي
_لاجدي لاتغشم روححححححك
موسويت كل هذا وسبوعين تركض بسالفتي ووسطت لدنيا كلها حتة لا تنكشف خاطر تهججني
حتة يتم عرس حفيدتك على اتم وجه
لأن انة عار
بيبي شكرية :، يممة لاتكول هيج شني عار انت فخر بني سعد
_لاعااار هججتوني خفتو لا اسويلها مشاكل
خفتو لا اسكر واروح للعرس واحجي كلشي
خفتو لا الزم لعريس واوصفلة لون شعرها وترافة خدها وميلة خصرها
بلكاع كعد تربع وبصوت عالي يصيح ويضرب على ايدة
هاي بتي على ايدي ربيتها تالي تروح للمايندل عللتها وين
تالي تروح للماسهر اليالي يرسم وجهها بلبزل
كصيبتها لجنت اضفرها بيدي يجي تالي غيري يفلها ويشم عطرها
_احششششم ولك بت عرست وعلى ذمة غيرك لاتجيبها بلطاري عيييب
_انعل ابو لعييب انة مو طلعت عاار بلنسبة الكم مااعرف لعيب شنو مااعرفنة
انة رخيص
من نص حضني اخذتوها وشمرتوها لغيري
حتة تهاني الي من بزري إستكثرتوها علية
وانة احسب يوم يوم
اقيس بطولها شبر شبر
_ام فدعم:- يمة موش قسمتك مامكتوبة الك
_لامالها غرض لقسمة
انتو لصوج بيكم تستعرون مني
انة عار بنضركم تخافون على تهاني ينكال عنها مرة لسكير
هذا لسكير بشر ماخفتو على كلبببببببة
ندار على جدة
_ماكلت مايطلع علي صبح بيوم زفتها
بلبصرة وترن براسي هلاهل حنتها
بلبصرة وتجي كبالي صورتها وهي لابسة لبدلة لغيري
كل هذا علمود لشرب
عار صرت
عاااار
انة ليوم اريد اركبكم لعار من صدددددددك
واطلع ....... ابن .......... اذا مااصيرلكم وصمة عار تذكرها لأحفاد
حييل شمر لجنطة بلكاع وطلع لمسدس من خصرة وطلع برة
لحكو كلهم وبيبي تربعت بلكاع
طلعو حمزة وظاهر برة
صوت صياحهم علة
ركب سيارة جدي ومشة ميدرون وين راح
بيبي ركضت ورا زتتة لحد لديوان تتوسل يمة ارجع
ولك يمة اعقققل
وامة لمسكينة بلعتبة كعدت وتلطم لاحول ولاقوةى
نزيت على صرخة كشمش بصوت عالي تصرخ بجدي
ضيعتههههههم
كلة منك
غضنفر طفل خليتة يكتل اممممممة
قيصر غصبتو يطلع من لعراق وحرمتو من حبيبة كلبة رغم جان كدامكم مليون حللللل
وهسة فدعم
انت لسبب جدي انتتتتتت
كلة منك
ضعيتهم انت وعكرب لرمل
فدعم اذا صارلة شي محد يخلصكم مني
وحك الله اموت روحي واموتكككككم
جدو صافن عليها مذهول
امها ركضت عليها تسد بحلكها وهي تدفع بيها وتكللها دكافي هديني هدينييييي
لضغط يولد لأنفجار
فدعم مسودن بيها تدرون بي من لزغرر جانت اذا تتمرض يتمرض وياها
محد منكم وكف ويا كلكم تخليتو عنة
لو سوة بروحة شي شتسوالنة هسة شتسووووووة
تلهث وصدرها يصعد وينزل
دموعها تجري
عينها على جدو ماابدة اي ردة فعل كأن بعد ديحاول يستوعب الي حجتة
وعلى صفحة نعناعة تهز ايدها واكفة وتبث سمها همس
دخلت جوة حبست نفسها هي وجهالها
عمو رحيل وصميدع وعمو إسماعيل بلشغل شوية ودخل غضنفر تلكو جدو وبيبي سولفولة
ببدلة لعمل ركب سيارتة
جدو راد يركب ويا ماخلا
كلة هوا ضايج منك ابقة لتجي
بقة محتار وبينت علي حيرتة من سماعة لكلام كشمش.
لاعندة سيارة ويكدر يلحكهم ضل برة بلعتبة كاعد
شوية واجو ولد عمامة وولدهم واحفادهم
اتضح انو نعناعة مخابرة عليهم
بيبي شكرية تلوب بلصالة
ماتحملت دكت لباب على بيبي نعناعة
_انتي ليش دومج فاضحتنا شني معناها هسة من خابرتيهم وكلتيلهم
_اي خل يجون يفزعون لايروح فدعم افندي يخزينا وية لوادم
_موهللحكة غضنفر وهوة طلع صاحي يعني مايسوي هيج ساعة عصبية وحجاها
وهللحكة اخيية يجيبة ويجي
ليش كبرتي لسالفة وجبتيهم ناس لبيهم كافيهم
كافي عليهم سوالف ولدهم يومية سالفة
جايبتهم شني شماتة
_ياااع فوكاها لنوب
فوك ماجايين يفزعون لأحفادج
بقت بيبي تتجادل وياها تالي ماكدرتلها عافتها وتكترت بلصالة تسبح وتندعي
شوية وطبو علينا لدببا لطيبون على كولة فدعم
كعدن بلصالة يم بيبي يسولفن
وكفنة بلمطبخ نحضر جاي ولأستكاين
قسوَّرة نايم بس منة جوة رجلية كلسا اوديها يم بيبي وترجع علية
اجة حفيد ابن عم جدو اخذهن من عدنا وراح
بسعاد اخذت صينية للنسوان
ورة تقريبا ساعة رجع غضنفر من برة تلكو يسألون
_جاوبهم بكسرة كضيتة يم لبزل يكسر ببطالة لشرب
_ابو خليل:- ليش ماجبتة لايرزح يسويلة سالفة لو يسويها ويروح لعيال بت عمتة صكَد
_كلشي مايسوي جدي من حلات روحة ضال يرفس
حجيت ويا لحد ماطحت على صفحة
كالي روح ارتاح خوية كلشي مااسوي لاتخاف
دخل غضنفر جوة سلم وصعد للغرفة بعد مارجعت فوك لكون لفوك احسنلي هادء ومعزول
اخذت منة ولحكتة
طبيت جان متمدد على لجرباية دخلت ركضت علي تكوم وتوكع نامت على صدرة
ستوة اخذ قسورة مني وهي عاطت
تقربت اريد ابوسة لو هي كامت ترفس بلكاع
سحبت قسورة من عندة وتكترت على صفحة
كل قوتها تشبك بي وحيل تجرة من لحيتة وهوة متونس
يبوس بيها ويشم ركبتها يدفن راسة بركبتها ويدغدغها بلحيتة تسكر من الضحك تموت على هللعبة
تقربت سحبتها من عندة
_كافي راح يوكف كلبها من الضحك موزين هيج
_لالتخافين عليها فوصة كلشي ميصير بيها انة لراح يوكف كلبي المسحون
_تقربت الة بستة من ركبتة
رجع راسة ليورة وإرتخة وصوتة يهمس
شتعلو اهلج منة حارمتنا من نعمة الله
تقربت الة تدفعني عنة
من يصير لموضوع يخص غضنفر احسها بنية جبيرة موكأن طفلة
وصلت مرحلة اغار من عدها
جرها يبوس بيها حييل بكل قوتة يبوسها ويدغدغ بيها
نترت بزعل
_اي شنو احنة مالنة نصيب لعد شو قسوَّرة متبوسة هيج ترة هوة هم الة حق عليك
دنك ويهمسلي
_يتدلل قسوَّرة وامة اليل بطولة الهم
_همست بضحك اثير غضبة وينك ووين الييل انت تنام تعبان تتحجج بمنة عبالك ماادري بيك
_ها هيييج صار الحجي
خل يجي اليل وحك الله الة اخليج صرخة بلسمة وصرخة بلكاع
يهمس وايدة حييل شادة على خصري ويعصرني
_اسحب كلامي عمي والله اتشاقة
يضحك ويهمسلي فات لأوان
حللت كتلتج
منة من تشوفة مندمج وياي يسولف تكوم تبجي حتة يهتم الها
حررفيا احسها مرة جبيررة من تسوي هيج
توصل بية احط عقلي وية عقلها
درت وجهي واني اهمس بزعل
_هاي شكد انانية احسها تحبك حب تمللك
ايدة تلعب بلحيتة منتجي على ايدة لثانية ومتمدد علجرباية رفع تك حاجب ويغمز ويهمسلي
_منو امها
لو نسيتي
_لا اني مومثلها
_انتي اخس ماشايفة روحج
_وهسة انت ضايج يعني بمكان متفرح
_انة كلتها بيوم وارد هسة اكولها
غيرتج عصبيتج خبالج علية رجفة ايدج وصوتج اليعلى رغم بلعادة ماينسمع الحجي الي يكوم يطفر منج بدون حساب
انة بهاي التفاصيل اشوفن كَدري
غاري يبوية شمابيج
عيوني تلمع ودمعة تتلألأ بأجفاني من يحجي
شكد عشت ويا شكد تغزل بية وشكد يرتجل اشعار من يصفن بوجهي
بس لليوم مالكيت كلام ارد علي بي
من يحجي احس كل الحجي يصير ماصخ
احس اعضم شي ممكن ينكال هوة تافه كدام الي يكولة
اكتفي بلسكوت والدموع الي تنزل غصب عني حب وفخر بكوني انتسب الة
من انام على صدرة ماكأن صار سنين اعرفة
ولا كأن صار اكثر من سنة متزوجين
كأنما ليوم نزفيت علي
كأنما ليوم اول ليلة الي بحضنة
مو من فراغ هلاحساس
من حبة وإهتمامة ودلعة الي
ولليوم مابطل هلعادة
من يريد يتقرب الي يبدي يبوسني من جف رجلي لحد راسي
قبل ميوصل لراسي احس نفسي ذبت وبغير عالم حلقت
ماجنت بين ادي مرة ويمارس وياها رغباتة كرجل
جنت لوحة يتفنن بيها
وحتة بللحضات الي احسة بيهن ذايب
بتعب يهمس الي غزل وابيات مااعرف منين يجيبهن
جان كريييييم
بكلشي يبدر منة كريم
كريم بحبة بدلعة بغزلة بزعلة وحتة بجفاءة كريم
سللامة لبنية ماقصرت ابد طول هلفترة
صرت احسها تقبلت وضعها
بس ممقتنعا دوم اسأل نفسي موجانت تحبة ومستقتلة علي شلون بساع تقبلت ونستة وعادي تعودت انو يكون مووالها ولا حتة حاولت ترجع تسحبة الها أو تفرق بيننا
قسمة تجينة كل فترة ابقة اسولف وياها اسألها عليها احاول اعرف منها اكو شي جاي تطبخة سللامة لو هاي مجرد تخيلات مني
تبقة تشكي حالها و تكلي لا والله ماامدحها بس كلش تغيرت
وترة حيل مكسورة
وكل الي تسوي من طيب خاطر لاتمثيل ولاغاية
تكوم وتكعد تكلي انة حيوانة شلون جنت اسمع لنعناعة وهي بأول عثرة باعتني وصارت ضدي
مكسورة عينها من سواية غضنفر تكلي اهلي كلولة اكتلها وهوة حماني
جان بيدة يشمرني بلشارع وياخذ ابنة وبعد سواية غضنفر بأخواني اخوي لجبير حالف علية كايل الهم وين ماالكاها اكتلها حلال
عبالهم انة دليتة على مجانهم
اخوتي الخنت هذا لبيت علمودهم وجنت حتة ابوك حتة اسد عازتهم تخلو عني
وناوين على موتي
ماوكف بعينهم كلشي
انة الله كتبلي عمر جديد على ايد غضنفر طلع من نفسي
من يوم الي شفت حبة لنعيمة ودلالة الها ومغازلة كدامنة من غير مستحة
طلع من نفسي من يوم لشفتة مات على فراكها
من يوم لشفت جيتها حييتة
براسي يدك غزلة واشعارة الها هنا مطبوعة
ماكو مرة تشوف كل هلشي من رجلها وهوة هاجرها وحتة ماحاسبها مرة وتبقة تحبة
انة ضالة هنا بحمايتة لو طلعت منا انكتل
اخوي كايللهم اختنا بت حرام خانت رجلها ولنوب خانتنا
ومرة ابوي مامقصرة تارسة راسهم
فهمت من كلامها انو هي ممتنة من غضنفر وحاسة بذنبها وكل الي تسوي تكفيرا عن خطأها
تأكدت انو نعناعة من ابتعدت عنها طول هلفترة بشرط من جدي وكذلك غضنفر جان شرطة انو ماينسد على سللامة واي شخص من هلبيت باب غرفة وحدة
سللامة رجعت لصوابها
بقيت اندعي بسرري انو تبقة هيج الله هاديها وعقلها براسها خوش تفكر ومواقفها لحد لآن وية لكل صلحتها وكدرت تضهر للكل صورة حلوة
احس هسة يلله اقتنعت سللامة انو غضنفر ميريدها
وهسة يلله استسلمت
عدت مدة بدة قسوَّرة ينشنش
فدعم عاقل ماعندة شي
رجع لهنا يداوم
مالة شغل بأحد منشوفة ولا يكعد ويانة على سفرة يطلع لصبح يرجع بليل
سالفة حفيد ابن عم جدو مانسدت
ضلت جر وعر
ميقبلون بأي حل
يردون لولد الي كتل منهم
وبليلة من ليالي الشتا لباردة اتصلو بينا بيت ابن عم جدو يبلغونة انو اهل لولد الي كتلو منهم دكَوهم للمرة لثالثة
ورغم ٣ مرات يغيرون مكانهم وهم يندلوهم
بيومها طالعين كلهم من لبيت رايحين خطار وابوهم مريض مارايح وياهم
جايين داكيهم وصدفة الرجال نايم خطية
لجوارين فازعين كايليهم ترة ابوهم جوة
محد راضي يوكف الرمي ضال يلوب من غرفة لغرفة
الى ان مفلشين لبيت على راسة ورايحين
جايين اهلة لاكين لرجال ميت خطية واكع علي شباك ضخم بواجهية لبيت من لصالة لفوك للصالة لجوة ومسكتة بمكانة
جدو بلصالة طلع يدك على راسة بثنين ادي
تخبلووووو علي
رجال جبير الة مكانتة وهيبتة وحفيدة اصلا كتل بلغلط مامتعمد
طلعو كلهم على صيحة جدهم
نزلنا نتلاطم النومة بعيونة ولجهال فازة تبجي
صاح عليهم كلمن يجيب سلاحة ويلحكني
كلهم ركضو حتة فدعم الي عازل روحة وحتة لكمة بلبيت مياكل يتعامل ويانا كأن فندق يجي يبات وبس
صرنة نتوسل بيهم
وبيبي تجرجر بديهم تريد تبوسها
فدوة حجي استر علينا رجال جبير وهذا يومة
غضنفر الي من يوم تزوجنة لليوم باعد نفسة عن هلأمور ومالة شغل كلش
لف دشادشتة على خاصرتة وتلثم بشماغة لأسود ونزل
وكفت كبالة واتوسل فدوة لعينك عوفهم
اعفو عنهم وحدة بوحدة كتلتو منهم وكتلو منكم
ماهمة توسلاتي ولادموعي واني اسحب بي واوكف بوجها ويدفعني
جوة رجلي وكعت واتوسل
غضنفر فدوة لعينك استر علية وين اروح لوصارلك شي انت مريض لتروح توكع من طولك فددددوة لاتطلع
وحدة بوحدة مالكم حق بعد
لتصيرون ضللام ارواح تروح بلا ذنب وانتو ترحون بيها
_ولج ياوحدة بوحدة راح يصيرلنة سننننة ندز بهلوادم ونرد ليورة
٣ مرات دكَو بيت عمنة وماجازو من عدنا
لكدامهم ولوراهم دفعو الهم وضلو مهجولين يومية بديرة
يدكون وينوحون على هلطفل لأن يدرون عزيز جدة
واخر لأحفاد
صوبو تلاثة من اخوتة وماحجينة كلنا خل تبرد نارهم مانزيد لطين بلة
تلاثة ولرابع كتلو
عمي احنة مانعيل وحكَ الله بس ماننام على لعيلة
دفعني وطلع ورة جدة
بلكاع كعدت وجهالي لصدري وابجي
تذكرت حجاية امي
بقيت الوج صار الصبح ومحد منهم بيين
الى ان دك التلفون لصبح .....يتبع
هلاااو
☹☹
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!