#خنجر_الغضنفر
#بارت_٤١
#حنين_حاتم
بلقيس
فتحت عيوني تلمست بطني الي كأن سجاجين نابتة بيها
تلفتت برعب اسأل وينة ابني ويييينة
تقربت الي امي لزمت ايدي صوتها يرد علية
على كيفج ماما ابنج بلخدج
يعني مابي شي عاايش عااايش
عايش بس يبقة بلخدج الى ان يكتمل مريئة
اتلفت عليهم وجوههم متكول هيج
معبسين ومغثوثين
_ماما شكو شصاير ليش احسكم مافرحانين
_والله ياامي ماادري شكلج
إتضح انو موبس لجارة متقدمة وشاغلة عنق الرحم
وإنما ملتسقة بلمثانة همات
كد ماصاير ضغط على المثانة من قبل الجارة رايدة تنفجر
دكتورتج تكلي لومامسويلها لعملية هلأيام الله لعالم شنو جان ممكن يصير بيها هي ولطفل
هسة ابني شلونة اني مومهم
بلخدج ماما
يبقة يمهم الى ان يكتمل نمو مريئة
شكد يبقة يعني
مااعرف غير همة يقررون
اريد اشوفة
صيري زينة وبعدين شوفي
زياد جان واكف على صفحة يم لشباك ويدخن ماتقرب الي الى ان امي كملت حجيها
ذب لجكارة من لشباك واجاني
باس راسي وتحمدلي لسلامة
بتسم وهمسلي سمينا نصير
بقو يمي احسهم موعلى بعضهم كأن اكو شي
بقيت اسأل بيهم شنو صاير
ليش هيج وجوهكم مخطوفة
ليش احس مافرحانين بسلامتنا
اجوبتهم متشفي غليلي
زياد يكلي خلصت كلوبنا من الخوف والإنتضار وتعبانين
وامي تكلي اني مانايمة من لبارحة ونعسانة
جاب زياد اكل لأمي ودزتة على شغلات جابهن من البيت وراح يبات ببيتنا على اساس
بقيت اليل كلة مانايمة
اتوسل بيها تاخذني اشوفة تكلي خليها علصبح هسة ميقبلون
اتصلت من المستشفى بزوجة خالي احمد وطلبت منها تبدخل وية نصير
المرية مامانعت وكالت باجر جايتكم
تانيناها اجت بقيت اوصي بيها علي
صبحية ساعة بل١٠ بعد ماشافني لدكتور وجيك وضعي كلولي اكلع لمت امي غراضنا وتجتلي
رحنة على الخدج
من برة شفتة ماخلوني ادخل
اشرتلي علي من بين مجموعة اسررة زغار
مكتوب اسمة واسمي على السرير الي خالينا بي ماشفت كلشي منة غير ادي الي رافعهن ليفوك ويبجي
بقيت اعاينلة وابجي
واحجي ويا
ماما صير قوي مثل امك
كوملي بلسلامة خل اقر عيني بيك
اني ماعندي سند ولا عندي فرحة بهلدنية غيرك
كوة سحبتني امي بعد مافرفحت بجي
شلون اطلع وهوة هنا
غريزة لأمومة خلتني ارجف بجي علي
طلعت للبيت زياد مااجة
امي كالتي يجوز نايم خطية اليل كلة مانام كلسا دازي على شي
ركبنة تكسي ورجعنة للبيت
نزلتني امي فتحتلنا لباب رواء بيدها ابنها
عاينتلي تقربت بوستني وتهمسلي لحمد لله على سلامتكم
يلله لتضوجين تكسبين بي اجر
لتفتت على امي عاقجة حواجبي
هاي شدتحجي ماما
دخلي ياماما تقصد على زياد تكسبين اجر بعشرتة
تريدج ترجعيلة ليوم قبل باجر متدرين بيها
كوة اتحرك واتنفس مابية حتة احجي عفتها ودخلنة جوة
تمددت على جربايتي
سألتها امي على نوفل كالت بلدوام
_وزياد وينة لعد
_يازياد مااجة لهنا ولا شفنا بقة نوفل يتاني وفرشتلة بلأستقبال تالي نام لوحدة
راحت امي علتلفون اتصلت ببيتهم طلعلها عمو حجت ويا سلمت علي وكلتلة بلقيس جابت وسألتة على زياد بقت مااعرف شنو تحجي ويا
سدتة وبقت صافنة
اني كبالها صحت عليها سألتها
_شكالج على زياد
_ها يكول مخابرينا من لشغل مالتة عدهم بيت ومن العجة واكع القالب مالتة كلة ورايح مستعجل يشوفلها جارة
ومساع متصل بعمج متخبل كايلة خسران كوومة وراح يرجع يعيد كلشي على حسابة
ومتخبل يكول
_جريت نفس مخنوكة
هذا زياد ميصيرلة جارة حتة ماتانة يطمأن علية
ولا كلف روحة يبلغنة
غلبني النعاس ونمت
فزيت ضهرية امي تكعد بية تكلي كومي شربي عصير وتمشي
ضليت اتمشة بلبيت
واعاين امي تتراكض خطية بين طبخ ومواعين وتنضيف
ورواء حاطة ابنها وكاعدة بغرفتها
كملت امي لغدة وكعدت تصلي
شوية واجة نوفل
اجة للغرفة سلم علية وتحمدلي لسلامة بيدة علاليك فاكها نطاهن لأمي وجايب معلاك خلا كدامي يكلي اكلي شحالج صفرة
بقة يسولف وجابها على زياد.يسأل ليش مااجة بات
عيني على رواء تروح وترجع كدام لغرفها شايلة ابنها وتنافخ
ترخص لولد وراح لغرفتة
شوية وسمعنة صوت صياحة
طلع من لغرفة بيدة حضاين وملابس وصخة مال ابنة
بلكاع شمرهن وصاح عليها
ملابس وصخة ونكَسة تدحسين بيهن جوة لجرباية شكووو
اطب للغرفة ريحتها عبارة عن بول يكرم لسامع
ادري شوكت تبطلين هلطبع
ملابس وصخة عندج شمريها بلحمام
حطت ابنها على لكرويتة ووكفت تحجي ويا
ليش هوة اني شلحك
وينة وقتي حتة الحك اهتم بنضافة غرفتي
شنو وينة وقتج نهار شطولة شتسوين بي
اشتغل يعني شسوي مثلا
صفنت عليها كل الي تسوي تكعد لصبح تتريك هية وابنها تغسل ماعونها تطلع برة تفسل لطارمة وتكعد ترشها وتثرم زلاطة وية امي ومرات اذا ابنها نايم تغسل مواعين لغدا
ولوخبزت امي تلزم الها قبق التنور
شمرّت عن اديها وتصيح هاك شوف ادية من ورة التنور كبها حروك
وابنك ميكعد راحة كون ورا ورا
منو الة اذا ردت اسويلي شغلة كون انومة يلله
شمرت الحضاين بلكاع ودخل للغرفة يستشيط
دنكت شالتهن وراحت للحمام
شوية وطبت امي تلوب
تكلي لفتهن بعلاكة وشمرتهن بلزبالة ماغسلتهن
وهسة يومين وتطلعلها دشداشة من ملاتها تشككهن تسويهن حضاين وهم من يتوسخن تذبهن وراس لشهر تكلة ماعندي ملابس وتروح تشتري بذاك الحساب
شعليج بيها خليها شتسوي خل تسوي
ليش ماما موحرام هذا التبذير حتة الله ميرضا
ولد عمرة ٣٢ سنة صارلة ٦ سنوات متعين وراتبة ماشاء الله
ولا عندة بيت لا عندة قطعة ارض وراس لشهر يتداين منج
بقت تحجي عليها وتلوم
مبذرة ومتعرف تتصرف ومن هلحجي
عدن يومين اني اتصل بأم نوفل يومية اطمأن على نصوري تكلي كلشي مابي لتخافين طمأني
زياد لا اتصل ولا بين عمو اتصل بينا مرتين من دوامة سأل علية وعلى نصير
سألتة امي على زياد يكللها كلش تعبان ومتأذي لاياكل ولايلفي للبيت يشتغل بأدي ورجلي مامطلع حتة عمال لوحدة يشتغل لأن خسران بيها هواي وميهون يدفع من فلوسة لضامهن
شكد حجينا اني وامة نكلة راح تموت روحك من التعب مياخذ حجي
واهل لملك منطي اسبوعين يردونة يكمل لقالب كلة
يوم رابع شوية بديت اتحسن واكدر اتحرك
ام مرة خالو ام نوفل يروحلها نوفل يمية للمستشفى يشوف شنو تحتاج امي تروح ويا مرات
المرة وكفتلنا وكفة ماتنسي الى ان شلت خياطي هية داخلة وية نصير مستشفى
زياد اتصل مرتين ماحجيت ويا خليت امي تجاوبة
لعبانة روحي منة وكارهتة
بأكثر لأوقات الي حتاجيتة بيها لكيتة يعوفني علمود الفلوس وحتة لايضطر يدفع شي من جيبة
بأكثر اوقاتي العصيبة لكيت لغربة يوكفولي وهوة حتة ماكلف نفسة يجي يشوف ابنة
الى ان سمحولنا نطلع نصير اني منتهية من الخوف علي
رحنة اني وامي ونوفل الي ١٥ يوم جايبة
رحنة جبنا نطو الي حضنتا وشميتة ضامتة لصدري الطريق كلة
جان ناعم حيييل كأنما عمرة سبع اشهر
الطريق كلة ماشفتة جان همي ادفي الجو بارد وطريقنا بعيد جنت حاضنتة لصدري وابجي
تمنيت الي يسوق زياد مونوفل
تمنيت هوة الي يركض بية ويشيلني اني وابني بمحنتنا
وصلنة للبيت
دخلت بي للغرفة جان نايم ولكهرباء طافية غرفتي ضلمة بقيت منتضرتة يكعد حتة اشوفة
اسمع صوتة من يبجي
نوفل بلسيارة شوية واجة جايب كاروك
امي بقت تحجي علي تكلة ليش جبت اني كلت لعصر نطلع ونشتريلة
_ لا هذا هدية كومتهم بلسلامة
مجرد مادخل لغرفتة سمعنة صوت مصايحهم ورواء تكلة صاير رجلها رسميا تركض بيها للمستشفيات يارايح ياراد من جابت ليهسا لاتدري بأبنك ولا بية
بقينة اني وامي نسمع عركهم ووحدة تباوع بوجه لثانية
شوية واجت لكهرباء
تقربت الة بلهفة وخرت الغطا عن وجها
شكلة حلو بس غريب ميشبه اي احد
شوية وفز يبجي شلتة لحضني
فتح عيونة ركزت بي
دموعي نزلت
بيومها كتشفت انو ابني مريض متلازمة داون(منغوليا)
حضنتة لصدري حيييل وصرت اصرخ بصوت عالي
ياربي شنو لسويتة بحياتي حتة هيج اتعذب
لازواجي مثل لعالم
لاحملي لاولادتي ولا حتة طفلي مثل لعالم
هوة يصرخ واني هم ابجي
سحبتة امي مني وبقت تحجي علية
حمدي ربج وشكري هذا رحمة من ربج
هذا يدخلج لجنة
سألتها زياد يدري
كالت اي شافة ولولد ماكال شي حمد الله وشكرة وكال ماطولها هي سالمة هذهو
بقت تحجي وتهدي بية
وصوت رواء برة يستفز اي صبر باقي بية
تفتر وتغني لأبنها بصوت عالي
احلى لولد اموري
احلى لولد اموري
ومن اجة نوفل تلكتة من باب لغرفة تكلة عليمن تبجي هوة رجلها أصلع وجنة متغولي شسمنة وهي عيونها عمص قابل عليمن يطلع لطفل
شطت من سمعت كلامها
ركضت ليبرة اريد اطلع ناري بيها
لزمتني امي تتوسل
يمة جفينا لشر ماطول نوفل ردها وعاط بيها هذهو
عوفيها مثل لجلب تعوي
جم يوم ان شاء الله ويجي رجلج ونروح لبغداد ونخلض
_اروح ويا زياد وارجعلة على شنو
اذا هوة بوقت حاجتي إلة اول لناس عافني
الرجال اذا موبوقت الحاجة لعد شوكت يوكف لزوجتة ويسندها
_معلينا بي يمة وكلشي منريد منة
خلي بس اسمة رجل يسد حلوك لناس ويخلصنة من سلطة خوالج ومن رواء وسوالفها
خلينا نروح لبغداد ونأجر هناك يقصر ميقصر حسبي روحج مطلكة
نعيش براتبج ونخلص من الحجي والتدخلات الى ان شوف شلون الله يفرجها علينا
بقيت يومين اني موعلى بعضي بجي ونوح
جان هادء واغلب وقتة نايم
ينام بليل وينام بلنهار ابد ماتعبني
بس قهرني حالة
كل مااباوعلة دموعي تجري
لو كبر شلون راح يعيش وية هلناس الي ماترحم امثالة
لقاهرني انو نصير اول واخر خلفتي
ماراح يكونلة اخوان لوكبرت ومتت يعينو على هلدنية
وا لأبو اب صالح
قهري وحركة كلبي علي اخذتني لتفكير بلمستقبل لبعيد
عدة اسبوع مانشفت دمعتي
دنية ليل ودك لباب زياد
دخلة نوفل للأستقبال طلب يشوفني اني ماطلعت
اخذتلة امي نصير
بقيت بلصالة اعاينلة من فتحة لباب ضهرة صاير علية ميشوفني
حضنة حيل راسة على صدرة وصار يختض
امي ونوفل يحجون ويا يكلولة اذكر الله
لاتبجي الك بي اجر عد الله
عيوني علي
سألهم علية وعلى صحتي جان مكسور حيل وواضح علي تعبان حتة صوتة متغير
وجهة اصفر وجوا عيونة سواد مال السهر
اجت امي لحت علية كومي يمة سلمي علي لخاطري
موطايقة وجها واذا اطلع راح اتعارك ويا مااريد لفضايح كدام نوفل ومرتة
كومي يمة لخاطري ولخاطر وليدج
خلينا نروح لبغداد نستقر هناك ونخلص حتلو تزاعلون تتعاركون تغدون لحم عاد محد يدري
بس ماطولنا هنا بديالى نبقة محكومين
اني لبيت اأجرة مااخلي فارغ وادفع اجار لبيت الي نكعد بي ببغداد حتة وكت ماتتعاركون انتي ويا
لبيت بيتي مااضل اتهجول واطلع يومية من لبيت
بقت تقنع بية وتتوسل وتكلي تعاي شوفي شحالة يكسر لخاطر يكول تورطت وخسرت كومة فلوس
خطية كوة يكوم ويكعد ضهرة لازمة بيدة
يكلي اني تعبي وشغلي هذا المن غير الها ولنصير
بقت تلح لبست حجابي وكمت وياها
سلمت علي
تقرب حضني كدام نوفل وكعد بصفي
بقة يبوس بنصوري ويحجي وياي يسألني عن عمليتي
وراها بدة يسولف عن لبيت
كال اجرت الكم بيت نضيف وجبير دفعت مال شهرين ونقلت بي غراضنة جبت بردات وفرش للأستقبال ولصالة ويبقة لنواقص انتو من تجون كملوها
امي كالت بيتنا هم نبيع اغراضة ونأجرة لأن نوفل يريد يرجع وية اهلة
نوفل كال
_اذا هيج لعد اني ائجرة
اني ماعبالي تردون تأجرو
اني رواء مدتقبل ترجع عود كلت اقنعها
بس شيقنعها هاي هم تروح تسويلها زعلة
احسن ماأجر بغير مكان
عاد هنا لجوارين عرفونة وكلهم ماشاء الله خوش ناس وعدهم حمية وغيرة علجار
امي فرحت وكالت حتة ماابيع غراضنا وكلشي منشيل نخليهن بمكانهن ونشوف وضعنا نستقر هناك لاء
بيومها بقت تلح علية تكلي روحي ويا واني الم اغراضنا وملابسنا واخلي نوفل يجيبني فد يومين هيج
مااردت اروح بقت تلح علية
خطية تعبان ومريض روحي شوفي شوفي لبيت شوفي لوضعية شنو يجوز لبيت موعلى ماينا
خوما كبل نروح ونتورط
اقتنعت بكلامها
لبست ولبست نصوري واخذتلنة شكم قطعة ورحنة ويا
ركبنة لسيارة
عيني على ادي سود ومشككات منتهيات كوة يلزم الستيرن ويسوق
بقيت الوم بي ليش هيج تسوي
جر حسرة طويلة وكال
_جنت مخنوك ومهموم من شفت نصوري تأذيت حيل نفسيتي تعبت
ردت بس انهزم مااكدرت لااشوفج ولا اشوفة
رحت منا لكيت لعجة موكعة لبيت ورايح كل تعبنا
ذبيت روحي بي
جنت انتقم من روحي
لاكدرت احميج ولا كدرت احمي ابننا
من شنو تحمينا انت شعليك قابل هاي ارادة الله
جر حسرة طويلة وماحجة شي
وصلنة للبيت
حجمة زين ونضيف
نمنة بيومها بلغرفة لجو بارد جان كوة نمنة
اخذني لحضنة وبقة اليل كلة يسولف وياي ويلعب وية نصوري
اليل كلة يشكي من ضهرة
عدن شكم يوم امي جابها نوفل
طلعنة اني وياها شترينا نواقص لبيت
لاعمتي تدري بينا ولا عمو محدبيهم يندل مكانة
امي كالت خليهم ميندلونة حتة نخلص من المشاكل
امي تستلم اجار بيتنا تساهم بي وية اجار لبيت ولمصرف تكول مااريد زياد يمن علية ولا اريدة يكول عيشتها لو صرفت عليها
نتصل ببسعاد كل مدة امي تحجي وياها تفرفر على جهالها تسولف وياهم
ومشت لسنين بينا نصوري كبر
زياد هوة هوة يبخل ويانة بكلشي
منعتمد علي ابد لابمسواك ولا بكلشي هوة يجيب شي امي تجيب ضعفة
يطلع لصبح يجي لضهرية يتغدا ويرجع للمحل ميرجع غير بليل
رتاحينة بمكانة امي تموت على نصوري
ابيضاني مدبدب وجهة بريييء حيل
محبوب وحنين سوالفة تخبل
عدت السنين عشناها على لحلوة والمرة
نصوري صار عمرة ٣ سنوات لدنيا حلوة بوجودة
هذا الي بيوم من لأيام بجيت لأن شفتة شكلة هيج
صار روح البيت وفرحتنا بلدنية
اني وامي نحتار شنو ننكل العاب
يصيحلها ماما ويصيحلي بكيس عود بلقيس
٣ سنوات لاشفنة عمو ولا مرتة ولا اي احد من عدهم وكلما افتح الموضوع وية زياد يكلي احسن الج والي
لا ااكللهم رجعتها ولا اجيب طارييج لأن امي بس تعرف مرجعج متعوفج تنبش لكاع وتلكاج وتجيج وتبدي لمشاكل ونرجع نفس للطاس ونفس الحمام
خلينا هيج مرتاحين كلما يجيبولي طاريج اكللهم مااريد ارجعها يكلولي تزوج غيرها اكللهم ميخالف اتزوج بس انتو تدفعون لحاضر،وتسوون لعرس وكل لمصاريف عليكم
امي ماعندها وابوي يكللهم خل يولي نايم على لفلوس ويريدني ازوجة وعلى هللرنة مسكتهم بهلسالفة وخلصان راسي بارد
اقتنع بكلامة بس يبقة شك بداخلي
اخاف يكون ضام عليهم لأن ممتقبلين نصوري ويكولون علي نغل ولهلسبب ميحجي لأحد ميريد لاقارب تعرف انو هوة اعترف بلنغل حسب كلامهم
ويبقون يعيرون بي ويطلعون حجي
بس مابيدي شي مااكدر اكلة اثبتلي لعكس
لأن معناها ام زياد متعوفنا بعد
ومشت لأيام عادية زياد وطباعة تعودت عليها واني وامي نعوض كل نواقص لبيت نطلع اني وياها ونشتري
طلعت صبحية للدوام لسيارة مدري شبيها ماشتغلت
تمشيت للشارع وركبت نفرات
رجعت ضهرية تعبانة لفيت راسي ونمت فزيت على نصوري يفزز بية
كاعدة اتغدة ودك التلفون
رفعت لسماعة
الو منوو
اني عمتج ام زياد ماعرفتيني
ولو حقج سنين صارلج ماسامعة صوتي
شلونج شلونة ابنج
قصدج حفيدج نصير
منين اجة حفيدي يمة
دخيل الله
لا حفيدج رضيتي او لاء غصبا ماعليج حفيدج
لاحبيبة اني ماعندي حفيد غير حمادة
حمادة منو
بصوت عالي حييل ضحكت
ولج انتي والله ثولة
عبالج شايلة رحمج ومخلفتلة منغولي ويضل عليج
من جنتي حامل وكلتيلة على وضعج هوة تزوج
وحمادة هسة عمرة سنتين فدوة لطولة
شنو عبالج يضل عليج ويضل بلة خلفة يعاينلج انتي والمنغولي
ههههه والله شايفة روحج
هاي انتي شدتحجين تخبلتي اكيييد
عيوني روحي لبيتج الي تزوجتي بي وشوفي حمادة وامة حتة تقتنعين
هسة روحي
لأن زياد يمهم هسة عايف لعامل بلمحل
ياعاااامل
ههههه روحي روحي وسألي ياعامل
جريت حجابي وجبة امي وركضت ليبرة بدون عقل
لحكتني امي تسأل شكو وين رايحة
كلتلها رايحة اجيب حاجة من المحل
وصلت للبيت
نزلت من التكسي كلتلة تانيني
ردت ادك لباب بعدين كلت لا
دنية ضهر ماكو احد
على لحايط تشلبيت مثل المخبلة لسايق نزل يسأل بية شنو جاية تبوكين وتورطيني
دموعي تنزل حلفتلة رجلي جاي يخوني واريد الزمة بلجرم متلبس
ركب سيارتة وكالي خوية حتة كروتج مااريدها عافني وراح
طفرت بلحديقة
تزلغن ادية
تمشيت ليجوة باب لمطبخ مسدود بس مامقفول فتحتة على كيف ودخلت
لصالة كبال لمطبخ
تمشيت محد اكو بيها
وصلت للغرفة جريت نفس عميق
وحيل ضغطت على ليدة وفتحت لباب
عيوني نفتحن .........
قيصر
دكيت لباب فتحها الي كريم
كبالي جانو خالي وخالتي صوت صراخها مجرد ماشافتني تقربت تبجي
شكو شكو شصاااير
حيل تنتر وتأشر بديها
تريد تورطني قيصصصصر
تريد تضيع مني لأكول ولماكو
ليييش مووعدتني تعوفهم وتنسا وتعيش حياتك
شكو شكو
اسأل واتلفت عليهم
كعدت على لقنقة وايديها على راسها
فهمت انو جايهم تبليغ من المركز واسعد مشتكي علية كايللهم شايفني اراقبة
واجاهم انذار وطالبينا للمركز
بقت تبجي وتتوسل بية
خوية جفينا لشر فدوة لعينك
وكفت على حيلي رحت علتلفون اتصلت بصاحبي الي ساعدني بقيت الوم بي
تهمتة انو هوة حاجيلهم
لأن ادري ومتأكد ماعفنة ورانة اي شي
ولا هوة شافني من جنت اراقبة ولا خليتة يحس علية
كال والله ماحجيت الهم بس خالك من شافنة دوم نطلع سوة وتجي علية واجي عليك ومناخذة ويانا من نطلع شك بلسالفة
وكعد قررني وحلف اذا مااحجيلة الصدك لا يعرفني ولا اعرفة
جذبت علي والفتلة قصة
طلبت سيارتة يوم ثاني من اجيتك طلع حاط بيها مسجل ومسجل كل لكلام الي حجينة اني وياك بقة يعاتب بية ويلوم
وتعارك وياي وحلف ميحجي وياي بعد
اني مانطيت بيك بس هذا لصار
لبست ملابسي وطلعت منهار
كلتلهم محد يلزمني
وهيفاء ماارحمها لا هي ولااخوها ولا اسعد
اذا مااذبهم بنفس التهلكة الذبوني بيها مااطلع رجال
وبهذا لبيت بعد مااجي حتة لااسببلكم مشاكل
لحكتني كويكة ليبرة تبجي وتتوسل بية ارجع عن قراري
عفتها ورحت للشارع اريد ائجر تكسي
لحكتني تبجي
من بتعدت وعجزت انو تقنعني بصوت عالي صرخت
تريد بيتنا يروح من عدنا
حتة نكدر نستلمك وعقنا على ورقة تحقلهم انو اذا تعرضت هيفاء أو اخوها او اسعد لأي اذى نفسي او بدني يسحبون لبيت من عدنا
لأن احنة وقعنة على انو نمنعك من التعرض الهم وجان لازم نقدم ضمانات
بصوت عالي صرخت تريدني اتشرد بلشارع اني وابني قيصصصصصر
تريد تضيع روحك وتضيعني
هيفاء اي شي يصيرلها انت اول المشكوك بيهم
وكفت مذهول
تقربت الي لزمت ايدي
تتوسل وتبجي
استر علية انة ايامي بهلدنية معدودة لاتلوع كلبي عليك خل اتوكل لدار حقي وروح شتسوي سوي
فدوة اغديلك
لاتمرمرني كافي علية الكيمياوي
كافي علية الام كلياتي وراسي
بلكاع كعدت تبجي منهارة
دنكت عليها بست راسها وهمست
كافي لتبجين خلص ماالي شغل بيهم
وعد مااسويلهم شي
وللمرة لثانية عفت ثاري لخاطر خواني
للمرة لثانية عفت تعب سنين لخاطر خواني
وتناسيت جن ماصايرة لسالفة
بس بقت تدك بلكلبي وتنهش بروحي
جان عشمي انتقم منهم وارتااااح
بقيت بعذاب مااكدر كلشي اسوي
خصوصا بعد مادرو
كمت اشوف اللهفة والدمعة والخوف بعيون كويكة بكل مرة اطلع بيها واتأخر
كمت احس روحي عذاب الها اضافة لعذاب،مرضها
كمت احاول حتة من لبيت مااطلع حتة اتعبها
وعدت مدة طويل جنت اتعب كل يوم واحس لهلاوس ترجعلي
كلما اتذكر لسوو بية واتذكر انو اني مااكدر اخذ،حقي منهم احس نار وتغلي بية
كلما اتذكر انو همة عاشو وكرتاحين وتنعمو بفلوس واذيتي
واني حتة صحتي ونفسي خسرتها
كلبي يتكطع وروحي تفور
بدت نفسيتي تتعب بديت يوم عن يوم اتغير
رجعت عصبي على طول صرت لااطاق
خالي ازهر يجي يشوفني كل فترة يحاول يقنعني ارجع للدكتور اراجع يمة جنت ارفض
وصلت مرحلة من كثر التفكير بيهم كمت اهلوس بأسمائهم واني نايم
وعدت سنة اني على هلوضع وحالتي تسوء يوم عن يوم
جنت نايم ودك لباب علية خالي كلي كوم وياي
سألتة
_ شكو وين تريد بية
_امشي ومعليك
بلباب سيارتة واكفة وبيها صديقي لجان يساعدني قبل متكتشف كوثر والي هوة اصلا صديق خالو وهوة الي عرفني علي
ركبت وياهم مشت لسيارة اسأل بيهم شكو ميحجون
واحنة بلطريق خالو فتح الجكمجة وطلع منها اوراق خلاهن بيدي
كلبت بيهن
جانن اوراق تنازل عن ملكية
بيهن اسم هيفاء واسمة
سألتة هاي شنو
قبل ميجاوبني وكف لسيارة واشرلي انززل بسرعة
نزلت وكفنة بضهر لسيارة بقينة ننتضر،الى ان اجت سيارة نزلو منها ثنين مدنيين
اجو علينا مشة وياهم صعدنا لشقة طابق ثاني
اسأل شكو يسدون بحلكي
طلع من جيبة مفتاح واحنة علدرج
تقرب للشقة فتح لباب على كيف ومجرد مافتحها دخلة ركض كدامنة دفعو باب لغرفة
اقتحموها
دخلنة وراهم
عيوني نفتحت بذهووول
هيفاء واسعد بنفس المشهد الي شفتهم بي
دموعي بللت رومشي قشعريرة نشوة سعادة على احساس بلنصر وفرحة ماشالها عقلي حسيت لكاع فترت بية
لزموني لولد
غواش بعيوني
عيني عليهم من سحلوهم بلجرجف مغطين رواحهم وللسيارة اخذوهم
راح خالي وياهم
راح لولد جابلي مي غسل وجهي وطلعني بلبكونة
رتاحيت كدرت اجر لنفس
سألتة شنو هذا لصار كدامي اني بحلم بعلم
صوتة يهمس الي بفرحة
بعدك ماشفت شي
نيالك على هلخال الي صارلة فوك لسنة يخطط ويتكتك حتة ياخذ حقك
ليل مع نهار،لامل ولاكل
شايل همك اكثر،منك
شنو لصار سولفلي شلون هيج وشنو هاي لأوراق
هلأوراق تثبت تنازلها لخالك عن ملكية الشقة الي شتروها بفلوسك
ولجاي اكثر واكثر
اشرحلي شلون احجيلي تفاصيل
لا مااحجي كلشي هوة يحجيلك كل لتفاصيل
رجعت للبيت فرحان ماحجيتلهم تانيتة يجي
ولأول مرة بحياتي طبيت من لبلب ابةس بلكل
حتة كوثر متفاجأة وفرحانة تكلي موعوايدك تضحك وتبوس بينا يومية اصبح عليك ترد من ورة خشمك وكارهني
حسرة ترست كلبي واني اتذكر شكد اذيتها وتعبتها لا ملت مني ولا شتكت
بليل يلله رجع خالي من لباب تلكيتة اسأل
دخل بعد ماشرب جاية اتصل بصاحبنة واجة لولد
وبدة يحجي بحضور الكل
_اني من شفتك شلون تعبت وبدت حالتك تنتكس حيل نكسرت عليك
كل احنة كلوبنا تتكطع عليك ومابيدنا شي
شاب تضيع من عدنا يوم بعد يوم وهمة عايشين ومتنعمين
وكلما اشوف تغيرك يوم بعد يوم اتأذة
كمنة اني وكوثر نروح للطبيب مالتك نحجيلة عن حالتك ينطينة ادوية مهدأة نخليها الك بلعصير وبلحليب ويصر علينا انو نجيبك وانت تعاند
فهمنة لدكتور انو ماطول براسك فكرة لأنتقام منهم ومتكدر تطبقها راح تبقة تأذي بنفسك والحواليك
فكرة زغيرة بدت ببالي تكبر يوم بعد يوم
استعانيت ببيتر سولفلي على كل لتفاصيل الي محصليها انت ويا عن اسعد
وماجذب عليك سالفة لدعوة مالتهم وسالفة لبيت ضمانة هاي من عدنا حتة نبعدك عنهم
بديت افكر
ردت انتقملك منهم بنفس الطريقة لأذوك بيها
بنفس الطريقة الي انت جنت ناوي تنتقم منهم بيها
جانت لخاتونة طالعة لمطعم ووياها طفل اتضح بعدين انو هوة ابن اسعد مبقي يمها تضوج تبقة وحدها
دخلت وراها لنفس لمكان كعدت علطبلة لوراها
واني اشرب جاي بقيت اكح بصوت عالي
ندارت علية وسألتني تحتاج شي
كلتلها شكرا
كمت من لمكان مشيت خطوتين ويم لطبلة مالتها سويت نفسي وكعت
بقيت اسمع صوتها وصوت لنادل يصحون بية
غسلو وجهي ووعيت
تشكرت من عدهم
كعدت على لطبلة وجابولي عصير
شوية وكامت هية
بساع دفعت لحساب ولحكتها هلى اساس رايح لسيارتي شفتها تريد تأجر تكسي عرضت عليها انو اوصلها واصريت كعربون شكر على موقفها
ركبت وياي بقينة نسولف
وخالك ماقصر،اخذت سيارة صاحبي موديل لسنة وكشخت على لآخر وعطر فاخر
وكلشي ممكن يجذب وحدة مثلها جلبة فلوس
ماشاء الله عليها شريفة من اول ركبة سيارة نطتني رقم تلفونهم
اتصلت بيها
بقيت اسولف وياها بليل وطلبت انو اعزمها على مطعم
واخذتها لمطعم راقي
واحسن اكل وكلتها
ورجعتها للبيت
عدة فترة اني وياها طبة وطلعة ونسولف خليتها تحبني وبينتلها انو اني احبها حب ماصاير
هدايا وفلوس ومطاعم
حسستها انو اني بدونها اموت
خليتها تتيقن وتتأكد من انو هي صارت تعنيلي لحياة وبدونها مااكو اي حياة
عرضت عليها لزواج
وافقت بس بشرط انو اسعد ميدري
وفهمتني انو اسعد اخوها
اما هادي ماجان الة اي وجود لا حجت عنة ولا جابتلي طارية
وافقت ولأن ادري زواجي منها باطل حاولت ابتعد عنها هلفترة وبنفس لوقت خليت اسعد يعرف بصورة غير مباشرة عن زواجنة
من عرف بدة يهددها أما تنطي فلوس أو يفضحها يمي ويحجيلي على ماضيها
بقة يسحب منها فلوس وكل فترة يجي للبيت ادري بي ينام وياها
ادري بكلشي وجنت اغلس منتضر،اورطها اكثر واكثر
وقنعتها انو نبيع لبيت ونسافر ولاية ثانية ونسوي عرس على راحتنا ونتمم زواجنا
فرحت حيل تريد تخلص من اسعد ادري بيها
قنعتها انو اني اشتري لبيت منها لأختي حتة ابني يسكن وياها
وبغير ولاية نشتري بيت من نشيل
كلتلها خل انطيج فلوس
كالتلي لاء فلوسي على فلوسك وناخذ بيت جبير وسيارة وافتحلي مشروع
وصارت لشقة رسميا بأسمي
وجبتلها اوراق مزورة مال بيت بأسمها واسمي مناصفة واخذتها ورحنة طيران شافتة واني لامشتري لبيت ولا غيرة
اسعد بدة يسويلها مشاكل
كل فترة تسحب مني فلوس
انطيها حتة تامنلي اكثر واكثر
جان مسافر بشغل ورجع
رحنة اني وياها جبنا من لمطار
بلمطبخ هية ولحكها علساس يغسل
لحكتهم خلسة واشوفة حصرها بين لطباخ ولحايط ويبوس بيها وهي تدفع بي ويحط ايدة على مكانات بجسمها
وكلسا يكلي روح جيبلي جكاير من جوة تعبان مابية انزل
عرفت لأخ يريد يسرسحني حتة يسوي الي يريدة
طلعت قفلت لباب من برة
ركبت سيارتي ورحت للمركز بلغتهم انو زوجتي تخوني واجيتك طاير جبتك حتة تشوفها وتبرد نارك وترتاح
هذا حقك اخذتا الك
هوة يحجي واني عيوني مفتوحة ومذهول
طبيب على كتف بيتر وكال
هذا لسبع ماقصر هواي ساعدني وصرف كومة من عندة ان شاء الله نستلم تعويض من المحكمة وكل الي صرفة يرجعلة
تقربت لخالي حيل حضنتة
ورغم شفتها بعيني طلعت من لبيت بفضيحة بس تمنيت لو مخليني اني الي اخذ حقي بيدي
بعد مدة جانت محكمتهم
وبعد اكثر من جلسة نحكملة بلتفريق ونحكم عليها بلحبس لمدة ٤ سنوات ودفع مبلغ مالي لخالي صح ماجان بكد لمبلغ الي دفعتة اني الها
بس جان مباغ لاباس بي
بوقتها كوثر صحتها جانت موزينة
التهينة بيها
حاولت احصللي فرصة حتة ازورها بلسجن
ورحتلة بعد مدة
رحت اشوفها بلكي يشفي غليلي
من شافتني نصدمت
رفعت لسماعة على لجهة لثانية وبدموع جانت ترد علية
منهارة وتبجي وتتوسل
تبررلي وتكلي هاي حوبتك
بقت تبجي وتكلي
عمري ماردت ائذيك بس اسعد جان يضغط علية ويستغل موقفي
كلما يشوفني استقر يجي يهدد بية ويسحب مني فلوس صار يتعاطا ومن يخلصن فلوسة يجي علية يريد مني واني اضطر اجيبلة حتة لايفضحني
وتاليتي وكعت بشر اعمالي
سكتتها واني اشرحلها انو الي تزوجتة من طرفي ماكلتلها خالي بس
فهمتها انو اني دازة
جنت احس بلفرح واني اشوف الصدمة والذهول الي على وجهها
من شرحتلها انو كلشي سوا وياها هوة جذب بجذب
كل حبة ودلعة ومداراتة الها جان تمثيل
نهارت بلبجي وقبل ماتوكع بلكاع عفتها وطلعت
فرحااان ماجنت امشي علكاع
جان يوم حققت بي اعضم انتصاراتي
وعدت مدة كوثر يوم عن يوم تذبل وتتعب نتواصل وية لأهل
جانت امنيتها تحجي وية غضنفر
كل مانتصل اتوسل بي يحاجيها يرفض
بدت يوم عن يوم تتدهور صحتها الى ان دخلنة بيها مستشفى
بدت اعضائها تنهار واحد ورة لثاني
بهلوقت كلما يتصلون جنت ابلغهم انو هي زينة ومابيها شي
الى ان وصلت مرحلة تبجي لكافر من كد ماتعبت واعضائها تهاوت شفتها بحالات مااكدر حتة احجيها
جنت اموت وياها علبطيء
ونفسيتي تتعب يوم بعد يوم
الى ان ماتت كوثر
وبلغربة ندفنت لا اهل ولا احباب
ماتت وخلتني مسلوب روح
ماتت اختي وريحة امي
والي جنت اهون روحي بيها كلما اشتاق لأهلي
بقت طريقة موتتها والحالة الي ماتت عليها تتهش بروحي
جنت اصرخ واشكك بهدومي واكللها لاتكولين ماعدي ام ولا اخت يشكن ثوبهن علية
بقيت مفرفح عليها وليدها صار ونيسي
رغم نفسيتي تعبت وحالتي رجعت تدهورت هواي بس ماهملتة
زوجها تأثر هواي بعد موتتها وحتة خالتي
خلي ازهر اسوء من حالي وتوفي تمرض وميقبل يجينا يكلة خالة كوثر ماهي بلبيت مااروح
طلعت اربعينها وعدت اشهر على وفاتها ومابلغت اهلي
كلما اتثل بيهم اكللهم اني طالع لو كوثر بلدوام وعلى هلمنوال
يسألون بية اذا ميتة احجيلنا كول
جنت اقنع بيهم انو صوتها رجع انتكس ومتكدر تحجي ومشيتها عليهم هيج
الى ان طبينا بل٢٠٠٣ وسقط.النضام ونفتحت لحدود بهلفترة اتصل بيهم ماكو ميتحصلون لا همة ولا بيت عمي اسماعيل ولا حتة عمتي تهاني
بقيت بقلق عليهم
عديت لعدة للسفر وقررت الرجوع للعراق
محد قبل لاخالي ولا خالتي ولا رجلها ولا حتة غضنفر
لزغير
بقو يتوسلون بية لوضع يخوف لتروح
اصريت ان اروح
بعد مابية صبر
لجان باعدني عنهم راح
حضرت اغراضي وكلشي
وودعتهم واني اوعدهم انو مااكطع بيهم وهمة كالو شوف لأوضاع شلونها اذا تبشر بخير
احنة هم نرجع
ركبت طيارتي ساعة بل٩ بليل
ونزلت منها بعد رحلة طويلة متعبة بأكثر من محطة
حطت اقدامي بمطار بغداد وبديت الاحض الفرق بكلشي العمارات الي متضررة من اثار القصف والأبنية الي كلها اثار وزروف طلق
وصلت لمدينتي ودخلت لناحيتنا
نزلت من التكسي علشارع وتمشيت ليجوة
اعاين من بعيد على بيتنا
على ركبي كعدت بلكاع
تلفتت اصرخ وين بيتنا وين اهلي وينهههههم
..........
بقيت الوج صار الصبح ومحد منهم بيين
الى ان دك التلفون لصبح
وصوت عمو إسماعيل يطمننا كال
احنة بلمستشفى واحد من ولدهم متصوب
سألنا علولد كال كلشي مابيهم كل احنة بخير هسة شوية ونجي
بقينة ننتضرهم
كلبي نتها مامصدكة يطب علية واشوفة بطولة
ساعة ب١١ طبو الجهال من برة يصيحون اجو اجو
ركضت عمة امريكا اولنة
ركضنة وراها
عمو رحيل ايدة ملفوفة ولباقين كلشي مابيهم
دخلو جوة بيبي وعمتي يهلهل ونتباجة فرحانين بسلامتهم
نسألهم شكو يكولون ماكو شي حليناها
كلبي مامطمأن خايفة لاهمة هم يرجعون يدكونة ردت انفرد بي افتهم منة
تانيتة صعد للغرفة وبساع لحكتة
جنت مقهورة حيل وماقابلة على الي سوا بس مفرفحة علي للحضة جان ممكن يروح من ادية
حيل حضنتة لصدري واني الوم بي واعاتب
راسي على صدرة ويهمس الي
هنا لوادم من تشوف لمقابل يسكت تاكل وجها تستصغرة وتكوم تتحجج وماترضة باي فصل .
شوفة عينج هلجماعة سكتنالهم هواي سوو لعمايل ونكول ميخالف كامو يتمادون
لو نريد اهد من اول مرة اخذ لولد واروح اسويها عليهم كربلا
بس انة ماخذ عهد مااستخدم سلاحي إلة وقت لضرورة
هسة شوفي شلون راح يضمون راسهم ويجرون بوش وكولي غضنفر كال
عمي ياوكت واحد يتجرأ يندك بينا وانة حي
بس غير من وراج
جتفتيني وخليتيني
بيومها توسلت بي نطلع منا نروح فندق تروح اي مكان خاف يرجعون علينا خصوصا من فهمت مصوب ٢ من ولدهم
بقة يضحك ويكلي
شوفيهم شلون راح يضمون راسهم
كبل جنة ياهو ليندك بينا اخذ لولد واهد مالي غرض بأحد من خذيتج وانة تكترت عن هلسالفة
خفت على روحي لخاطرج
ولخاطرج بعت لموت بسعر لتراب
وانة لجنت شاري بأغلى لأثمان
همة شافونا ساكتين عبالهم نخاف
مايدرون لمجتفتنا لنساوين
هسة شوفيهم شلون راح ينهزمون واذكرج
عدت مدة ماكو شي ولسالفة نخلت وقبلو بلفصل وسدوها بضرف اسبوع
من عدها وتأكدت انو هنا لناس من تشوف احد يتسامح وياها ويحاول يحل لأمور وديا
ياكلو يستقوون علي ويستهينون بي
وعدت مدة مستقرين ماعدنا شي لجهال تكبر يوم بعد يوم ولعمر يمشي واحنة منحس علي
غضنفر يلح علية يكلي خل نسوي طفل وبعد هذهو حتة يكبرون سوة فد تعبة
رفضت وكتلة خليني اجر نفس ماعاول يكبرون
عدت السنين وعشنة ذبت وياهم وصرت وحدة منهم حتة لهجتي بدون ماانتبه صارت تشبه لهجتهم
لمشاكل متخلص ولكونهم ناس عدهم لحمة
اي سالفة تصير حتلو اقارب من بعيد كلها تلتم وتفزع
ولسالفة الي ميفزعون بيها ويحاولون يحلوها بفلوس ويتجفون لشر
يشوفون لمقابل يتمادا ويضن ان هوة صاحب حق حتلو ماجان على حق ويكوم يدك ويهادد
بينما لسالفة الي يهدون بيها ويلتمون بكثرتهم مثل النمل لوصارت مشكلة مدري منين مامنين يطلعون وبضرف ساعة ينجمعون
تنحل بساع وبأقل خسائر
من عدها وعرفت انو الي يعيش هنا اذا ميصير اسد يضل كبش تاكلة لأسود
وعرفت انو كل لجانو يسوو هوة صراع من اجل لبقاء
وإتضحلي بأكثر من مشكلة انو سبب لجان يسوي غضنفر قبل
عركاتة ولصيت الي مسوي لنفسة بخنجرة الي كلها تعرفا
لأن هنا لبقاء للأقوة
غابة والي ميثبت نفسة بيها بوقت لمشكلة ويهد هوة وولد عمامة واخوتة يموت جوة لرجلين حتة لوجان صاحب حق
من عدها وعرفت انو محد بيهم رايد العركات والمصايب والفصول بس هي لناس تريد هلشي
لناس هي الي تجبر المقابل على هلتصرف
هاي حياتهم الي جنت الومهم عليها واتنقد واكللهم لناس وين وصلت وانتو لساكم تتعاركون على اتفه لأسباب
لاهمة اختاروها ولاهمة حابينها
هنا نولدو وهنا نجبرو يتأقلمون وية هلحياة
ويتشابهون بهلناس
واذا ماصارو مثلهم مصيرهم لموت .حق باطل
وعدت لسنين بيبي نزل لماي لأبيض بعيونها وكامت تخرف تحجي اشياء غريبة
مرات نفهمها ومرات لاء
نعناعة كلشي مابيها رغم اكبر من بيبي شكرية بس كل لحيل بيها .
يمكن لأن ماتعبت مثلها
وبمرة كعدت بيبي تسولف النا سوالف قديمة
بدتها من عرسها ختمتها وهي تعترف على نعناعة انو هي لسبب بمرض كوثر الجلدي من حانت طفلة
وبيون ماخذتها تجويها براسها هي الي متسببة الها بزيادة علطفح عدها
وكملتها وهي تعترف على وجود عقد زواج يثبت زواج ام غضنفر من ياسين ويثبت طهارتها
وجليل وولدة همة الي ضمو ام مهودر عد اقاربهم لان يدرون عدها لعقد بس ميندلون وين
وشكد محاولين يخلوها تعترف عن مكانة ماكادريلها
لمتها نعناعة بسالفة مرة مخرفة ومدري شتحجي
مع انو لكل يدري اغلب الي كالتة صح
دخل غضنفر تلكا جمزة وحجالة كلشي
بقة مصدوم ويسال ببيبي
ولغريبة انو بيبي من سألها نكرت وماتذكرت اي شي من الحجي الي كالتة النا
عدت مدة جنة كاعدين على لغدة كلنة منجمعين ام فدعم يم بيبي تسويلها لكم توكلها هي وكشمش مسلولات عن لكمتها ونضافتها وكلشي ابد ميقصرن وياها رغم تعاند وتدفعهن
ناكل كل احنة وسنطة ورجعت بيبي فتحت نفس الموظوع وحجت بي بلتفصيل ولمكانات والتواريخ
كلها منصتة الها
غضنفر عاين على جدة كأن يكلة شنو ردك على عمايل مرتك
جدو اللكمة وكفتلة بزردومة نكت ايدة من لاكل رفع راسة عاين الها وكال
انتي طالق طالق طالق
صرخت وشكت ثوبها وحيل تعد على بيبي وتصرخ عليها
عاط بيها غضنفر لمي جوالاتج وطلعي برة لتخلينا نسوي شي ميعجبج
اخذت ملابسها تدك وتلطم وتبجي لمت كلشي الها وطلعت تندعي على بيبي وتتحسب
بيي تسال شمالها نعناعة ليش تحجي علية ياهو وياها
دموعي نزلت
سبحانك ياربي حتة مرضها بي صالح للكل
عدت مدة جدو تعبان حيل كلهم مداري ومحد مقصر ويا لاولدة ولا احفادة
فدعم مايرضة يتزوج
بسعاد وزوري ثنينهن حبلن وجابن بنات
تهاني ماصار عدها شي
منة كبرت
لشخصية الي شايلتها ماكأن طفلة
جانت مسيطرة على كل لجهال حتة الي اكبر منها
جانت عدها جملة عملها الها فدعم من ميلعبوها لجهال تتخصر،وتكللهم
العب لو اخرب الملعب
وهنا تقصد انو تصيح لفدعم ويخرب لعبتهم اذا ميخلوها تلعب
جانو يتخبلون منها لأن اذا تخسر تكلب لدنية بلبجي ويجي فدعم يعيد اللعبة ويخليها تكسب غصبا هلكل
محد من لاطفال يحبها
مسيطرة بجال فدعم وغضنفر يضحك يكللهم هاي من تكبر تصير نعناعة لثانية وتحكم لبيت
حمزة يموت عليها
علاقتة بيها كلش حلوة
رغم هي انانية ومتطلبة بس جان سند الها يدافعلها دوم وياخذ حقها
جنت اشوف بيهم غضنفر وكوثر بس زغار
حتة علاقتهم
اما قسوَّرة جان هادء حيل وفقير عكسها
اشبها بقيصر
سوالفة هدوءة انعزالة كلشي بي حتة معانيية اكو شبه قليل
ومشت لأيام ودخلنة بسنة ٢٠٠٣
هذي السنة الي بوادرها ابدا مابشرت بخير
في يوم ١٩ اذار شنت قوات التحالف غارة جوية على قصر الرئاسة في بغداد
ودخلت القوات الي بغداد وسقطت بغداد دون اي مقاةمة تذكر وشاهد الكل جندي امريكي يضع علم امريكا على رأس التمثال البرونزي لصدام حسين وصط تصفيق وتهليلل لمجموعة من العراقيين
وبعدها بأيام قليلة دخلت القوات الى البصرة وسيطرو على حقول البترول من منطقة الخليج
وبعدها ب٣ ايام دخلو الي محافظتنا وتوغلو بمناطق عديدة وحدثت ضربات جوية عديدة ضد مناطق عسكرية ومدنية
سيطرو على اغلب المحافظات بدون اي اشتباكات وبدون اي مقاومة من عناصر الأمن والجيش والشرطة.
بعد ايام اصبح العراق محتل رسميا
جان كبالنا اكو ملعب بعيوننا جنة نشوف الطائرات تهبط بوسط الملعب وينزلون منها الجنود وينتشرون ويفترون بكل ارجاء المحافظة بدون اي رادع
بهلأيام جان جدو وعمامهم متخبلين
طب علينة من لباب يصيح وينهم لولد
جمعهم وسمعة واني بلصالة يكللهم
فدعم وغضنفر متبقون
احنة امننا خروجكم عكب باجر تطلعون
صوت غضنفر يعترض
شلون اطلع مرتي وجهالي
_،كلشي ماعليهم واحنة ماراح نبقة نغير مكاننة هلأسبوع معارفنة يلكولنا مكان ببغداد ونطلع
مااكدر شلون اعوفكم
مرتي وجهالي شلون اعوفهم
بقة جدة وعمامة يقنعون بي ويكلولة لازم تطلع
ضليت الوب شمعنا يردون غضنفر يطلع ليييش
فدعم ضابط ويجوز مأذي احد ويخافون علي من الناس
غضنفر ليش يردون ينهزم
ماكدرت اصبر دفعت لباب ودخلت عليهم
بصياح ودموع سألتة
شضام علية
ليش يردونك تنهزم لييش
تقرب الي سحبني من ايدي وبقة يلوم شلون هيج اطب عليهم واصيح
دفعتة واني اصرخ واملخ بخدودي
شضام علية احجي
احجييييي
اني كلبي مامرتاح من يوم شفت البنطرون لليوم
احجي لا اموت روحي ......يتبع
ماكدرت اكملة عذروني ايدي شكلت والله
باجر ان شاء الله انتضرو بارت لعصر ينزل قبل ل٥ تكميلي لهذا لبارت وعذروني من لتقصير
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!