رواية خنجر الغضنفر الفصل التاسع والثلاثون 39 - بقلم Hunen23Hatum

على لميز يم الولد الي ينضم دخولنا جان اكو كابسة اوراق حجم جبير
سحبتها بكل قوتي ودخلت واني استمع الة وهوة يشرح للطبيب الثاني
الولد الي ينضم دخولنا سحبها من ايدي وطلب مني اكعد واهدأ
حاولت اتماسك نفسي بقيت استمع الهم وداخلي يثور

_بعد الي عرفتة من زوجتة ثبتت عندي مرضة بلبارونويا
ومثل ماتعرف البارونويا اعراضها ثابتة ومزمنة
وارجح سبب هلشي كمية الضغوط والصدمات الي تعرض الها بصغرة حسب ماشرح الي هوة واكدت زوجتة بجيتها السابقة
قتل امة ضلم على ايد اخو اكدمة
فقدانة لساقة وصوتة من اجل اثبات برائتها
خسرانة للوسيلة الوحيدة الي ممكن يثبت بيها براءة امة
انهزام اختة الي سببت الهم العار
في المجتمعات الشرقية مثل هيج فعل يلحق العار بلعشيرة بأكملها
خسرانة لحبيبتة
بلأضافة الى اصابتة بلرهاب والي مثل ممعروف عدنا
اي مريض اضطرابات تستجد عندة امور فيما بعد حتى وإن تشافا من اضطراباتة
كل هلامور خلتة يصاب بلبارونويا
والي اكدلي هلشي
كلام زوجتة الي بينتلي انو حبيبتة سبق وان خانتة وتزوجت ابن عمها
هلشي خلا يشك بخيانة زوجتة الة وية ابن عمها
الي هوة اصلا مو ابن عمها مجرد جار قديم الهم من كانو ببلدهم الأم
لكن بسبب تأثرة بخيانة حبيبتة بقت هلقصة عالقة بمخيلتة وبلااوعي
لهلسبب بقة عايش بهلقصة حتة بعد انتهائها وحتى بعد زواجة وسفرة
حتة اثناء لعلاقة الزوجية جان ينادي زوجتة بأسم حبيبتة الي خانتة

_الطبيب الثاني:- بس هذه مو ادلة كافية على اصابتة بهذا المرض جائز تكون مجرد اضطرابات عادية تحصلة من تأثير الدواء واعراضة الجانبية

_الي خلاني اتأكد اكثر من دخل لهنا وبكل جلسة الة احسة عايش بنضرية تآمر زوجتة واخوها وجارهم
ودائما يشرحلي انو همة ضحكو علي وخدعو
وتآمرو ضدة
سرقو
ودائما يخططون من وراءة
وهلشي وصلة الى انو يشك بحمل زوجتة
يددعي خيانتها مع انو ماكو ولا دليل ملموس يثبت هلشي
يدعي تآمر اسعد ويشك بأنو ماعندة لازوجة ولا اطفال
مع انو الرجل متزوج من اكثر من ثلاث سنوات
وزوجتة ام ل٣ اطفال وحامل
والي خلاني اتأكد اكثر
منذ دخولة لهنا وهوة يشك حتة بلأكل الي ننطي الة
يبقة يسأل عن مكوناتة
يشك بلدوة ويخاف من عندة يتصور انو هذا سم يمكن
هذا التشخيص النهائي لحالتة وكلشي بي يثبت ان هوة مريض بارونويا

_الطبيب الثاني :-، لاحضت منذ دخولة للمكان بدأت حالتة تسوء اكثر واكثر
واحتمال راح تبقة تسوء
لكونة كان مصاب برهاب لأماكن المغلقة هلشي راح يسببلة مضاعافات اخرى
افضل لو نكتبلة خروج بكفالة اقاربة وبشرط انو يئوو ويحرصون على مرافقتة بداخل لبيت وخارجة والأشراف على حالتة وايضا يلتزمون بمراجعتة عد طبيبة المختص ويوقعون على انو اي اذى ممكن يصدر منة همة المسؤلين عنة
أو نكتبلة الخروج مع الترحيل الى بلدة

_خروجة حاليا صعب
تعرف مرض البارونويا اعراضة ثابتة ومزمنة وممكن بمراحل متقدمة تدفعة لقتل زوجتة أو اخوها او جارهم
لكونة متيقن من خيانتهم وتآمرهم ضدة
ويخطط للخروج وينتضر هلشي بكل لحضة حتة ينتقم منهم
ماعندة اقارب هنا غير اختة وزوجها
وزوجتة واخوها
وزوجتة فعلا انسانة وفية ومخلصة حتى بعد الأذى الي تعرضت الة من عندة
اجت لهنا وطلبت ان تشرحلي حالتة جانت تبجي وهي تطلب مني ان اكتبلة الخروج وترحيلة على بلدة
لأنه خايفة علي من الحبس بهلمكان لكونة يعاني من الرهاب لأماكن المغلقة
وطلبت مني ان ابقي دائما بلحديقة وقريب من اشخاص يحبهم ويرتاح الهم
طلبت ان تشوفة بس اني خفت من يشوفها ينهار ويأذيها لهذا رفضت ووعدتها انو من التمس التحسن بحالتة ممكن اسمح الها بمقابلتة

كلبي يعتصر من الي سمعتة
كل لكالو جان صح حتة خوفي من الدوا الي ينطو الي وشكي بي
بس سبب هلشي انو اني جنت متخوف من انو يكون هلدوة هوة سبب تدهور حالتي لأني كلي ثقة قبل دخولي لهلمكان ماجنت اعاني من اي شي
الي ألمني انو هوة طول ذيج الفترة جان يددعي انو هوة مصدكني بسالفة خيانة هيفاء وتآمرهم علية وينطيني دفعة امل ويدفعني للتفكير بخطة للأيقاع بيهم
وهذا كلة طلع كذب
حتة الطبيب جان يضحك على عقلي
من فرط احساسي بلضلم ولكون محد يصدكني
لوهلة شكيت بأنو كل الصار وكل الكالو عن حالتي صح
وانو كل لصار وياي هي فعلا هلاوس مني
للحضة حسيت اليأس التهم كل عقلي وإستحوذ على روحي وتفكيري

بقو يتناقشون عني واخر جملة كالها الطبيب المسؤل عن حالتي
بحالة وحدة نسمح بخروجة
إما تجي اختة وتتكفل بي وبعلاجة عد مختص وتوقع على انو هي المسؤلة عن اي فعل يصدر منة
أو يخرج ويترحل على بلدة
ومااسمح بهلشي بلحاليتين إلة بعد ماالتمس التحسن بوضعة

طلع لطبيب الثاني جنت كاعد قريب على لباب
عاين الي صفن بوجهي دقايق وكمل طريقة
اشرلي لولد الي ينضم دخولنة بأن ادخل
جانت انهيارات الكون كلها تحدث بداخلي
بس دخلت هادء صامت من فرط هدوئي وبرودي حسيتني جثة وتتحرك

دخلت يمة
إستقبلني بإبتسامة ودودة وهوة يسألني وين وصلت بتفكيري بخطة للأطاحة بيهم واضهار برائتي

هنا حرفيا حسيت كلبي يتكطع الممم
حسيت الكل جاي يدفعني للجنون
صرخة جانت بداخلي
ليش شنو لسويتة حتة استحق كل هذا
االأنسانة الي المفروض قرب لناس الي ضحكت الكل علية
جان بداخلي صوت يصرخ
لو تعرفون ماضيي شنو شلون جنت عايش
شنو تفكيري
مبادئي
شلون جنت اوكف بوجه الضلم دائما حتة لو كلفني هلشي حياتي
تاليتي مضلوم ومحد يصدك بية

كتمت كلشي بية ومن هللحضة قررت اضغط على نفسي واتصرف بطبيعية وعادية مفرطة
بحيث اجبرهم بتصرفاتي ان يصدكون انو اني انسان طبيعي وكل الي كالتة عني ادعائات

بقة يحجي وياي
جنت ادوس على كم الغضب والأنفعال الي خلا اجزائي تر جججف واتعامل ويا طبيعي
جاوبتة على سؤالة وقنعتة انو اني
_قررت انسا كل مخططاتي لأثبات برائتي واترك كلشي واذا كنت بريء فأكيد الحياة والأقدار راح تنصفني
كل الي اريدة هوة نسيانهم والأبتعاد عنهم

_من تقصد بهذا كلامك

_اقصد زوجتي واخوها وابن عمها أو صديقهم مثل مايددعون

ماطلعت إلة وأقنعتنة بأنو اني خلاص تناسيت خططي بلأنتقام وركنتها على جنب وقررت اعيش لنفسي وانسا الأنتقام وابتعد عنة لكونة اتعبني وانهك عقلي

بقة يشجع بية على هلشي نوبة
ونوبة يرجع يذكرني بكلامي واعرف بهلشي يحاول يستفزني ويتأكد كلامي مؤقت ومجرد كلام لو فعلا قناعة تامة وقرار غير قابل للرجوع
بقيت اصر واقنعة
الى ان انتهى وقت الجلسة
طول الوقت كان مصدوم من الي احجي
وحاول هواي يثينني ويذكرني بخيانتها الي وتآمرهم ضدي وكل الكلام الي جنت اكولة الة
جنت انتفض غضب
احس وحدة من ادية ماالي سيطرة عليها
تريد تسحب اي شي كدامي وتضربة براسة
من فرط عدم سيطرتي عليها جنت الزمها بأيدي لثانية
وكأنما ماجانت جزء من جسمي
جنت اردعها بأديدي لثانية واحشرها اسفل المكتب جتة امنعها من ان تضربة بأي شي بمتناولها
الى ان طلعت من المكان
جنت احس براكين بداخلي هاجت واريد انفجر
ركضت بكل طاقتي مبتعد عن المكان
وبأبعد نقطى بلحديقة جثيت على ركبي وصرخت
ساعدني ياااااارب
مااللي غيرك
محد يعرف ببرائتي غيرك
انت رب العدالة الي متقبل بلضلم
اني اذا ماقتصيت لنفسي منهم ممكن اتخبل او أموت نفسي
ساعدني بلخروج منا يااااارب

بقيت حاضن جسمي لصدري وكاعد
جنت افكر بأنو لازم اثبت الهم تحسني
يمكن سماعي لكلامهم كان رحمة من ربي حتة اكدر اثبت الهم النضير
سواء كان تحليل الطبيب صح أو لاء
لازم اكون العكس
موبس حتة اطلع
حتة ارجع لنفسي ووعييي

وبديت من هليوم احاول اسيطر على نفسي
بمواضع جنت اتصارع وية نفسي
بلحضة اكون مقتنع بقراري وقناعتي واكول خلاص اسيطر على نفسي واثبت الهم خطأ تشخيصهم
بس جنت اعجز
بدون ماانتبه الكة نفسي اضرب احد علمود كرسي أو مكان أو حجاية ماقصدني بيها
بدون ماانتبه الكة نفسي لازم ايدي الي تكون لازمة اي شي ممكن يضرر أو يأذي المقابل واتصارع وياها
بديت ابتعد عن الكل حتة لا افقد وأأذي احد
وبهلأبتعاد جنت اثبت للدكتور ضهور اعراض جديدة عندي
وهية كرهي للناس وحبي للوحدة
عجزت امام نفسي
كلشي جنت مسيطر علي
إلة نوبات الغضب الي بداخلي
جان اكو بداخلي ثورة
احساس كوني مضلوم ومخان ونحاكت مآمرات ضدي ومع ذلك نسجنت هنا وهمة برة يزاولون حياتهم بفلوسي
قبضو ثمن ضلمهم الي وتآمرهم ضدي
قبضو ثمن بياض نيتي ونقاء روحي وطيبتي
هلأحساس جان يدفعني للرغبة بتحطيم الناس والأشياء وكلشي يجي كدامي
وصلت لمراحل تجيني رغبة شديدة بأن اقتل
وهواي فكرت اقتل نفسي
هواي تبادر لذهني انو لوسيلة الوحيد لأثبات براىتي هي انو اموت نفسي
فكرة بداخلي تكبر انو من اموت راح يصدكون انو اني مضلوم
تعبببت وصلت لمرحلة انو ماالي سيطرة لا على جسمي ولا على تفكيري ولا على اي شي بية
وصلت مرحلة العجز كدام جسدي وفكري

الى ان بيوم
بعد نوبة صراخ وهستيرية اصابتني قررت ان اقتل نفسي حتة اثبت للكل انو اني بريء
وحتة يعرفون انو همة ضلموني
بهللحضات جان الااوعي والرهاب مسيطر على كل ذرة بتفكيري

دخلت للحمامات دورت على اي شي اكدر اموت نفسي بي
جان اكو عمال ثنين ميتركون الحمامات ابدا
تلفتت بكل مكان بحثا عن مرادي
مالكيت غير جيس بسطل لزبالة مغلفي بي
سحبتة بدون مينتبهون الي ودخلت بي للحمام
لفيتة على راسي حاولت اخنك روحي بي
بس اكتشفت انو جان بي اكثر من ثقب
طلعت محبط
تعباان
صرت اخاف من افكاري
اخاف من ان انفرد بنفسي
كل هذا جنت اعيشة بيني وبين نفسي
جنت احرص على انو مااخلي اي احد يحس علية
فعلا وصلت لمرحلة انو احس الكل مراقبني
المكان والبي شعوري بكونهم يضحكون على عقلي جان اكثر شي يتعبني ويألمني
رجعت للغرف
تمددت على فراشي منهك
غمضت عيوني واني ادعي انو الله يقبض روحي قبل مااقبضها اني وادزها الة
أو يدفعني حزني ويأسي بأن اقتل اي احد كدامي

نايم وفزيت على صوت احد يوعي بية
فتحت عيوني
رجعت غمضتهن فركتهن بأيدي عبالي احلم
رجعت فتحتهن
صوتها يهمس الي
قيصر سودة بوجهي عليك شصاير بيييييك

...............

بلقيس
امي حست علية توترت ردت انفجر
كلتلة احمد احجي شصار ترة بلقيس كاعدة على نار من البارحة
عاين الها والي وكال زياد خاطب لمى بت خالتة
ومنتضر دورة لسنة مال ابوج ويتزوجها
اني ماشفتة ماجان موجود
بس عمج وزوجتة كالولي
مرة عمج من عرفت حامل بقت تدقق وشلون ومنين شرحت الها وراويتها ورقة لسونار الي نطيتيها الي وشرحت الها كلام الدكتورة
بقت تنغز بحجيها
إلة شوية ردت اتعارك وية اعمج من وراها
اني احجي ويا ميجاوبني
عينة عليها يفهم منها شنو رأيها يلله يحجي
حرام مورجال
يجوز تزعلين خالو
بس صدك ماعندة اي حجاية ولا إلة رأي
اني من شفت لأبو هيج غسلت ايدي من لأبن

_وتلوموني من احجي
مو مرة لا والله شيطان رجيم

_ام بلقيس:- اني هسة اخاف لا امة تروح تحجي براسة اني ماريدها ترجع بتي مابايعتها
بس لازم يصير عدهم علم بحملها
ورجلها بلذات لازم يعرف
وبعد هوة حر
يكول اريدها يعوف بت خالتة ويرجع مرتة
ولو اني اخاف من لحوبة
بس هوة زياد معروف مال يجمع ثنين على ذمتة مستحيل
هوة وحدة ومموتها جوع جان
هوة عقليتة اقتصادية ميهمة روحة واحتياجاتة الشخصية اهم شي الفلوس
كلش كلش اذا راد يرجعها اشرط علي لو يجي يعيش يمنة لو يعزل الها
يكول لاء
خليها طلاك منطلك
يريد يطلك هوة خل يروح يطلكها

عيني على امي بعد كلشي صار واحسها متريدني اتطلك ودتلمح بكلامها انو تريدني ارجعلة وممكن بكلمتين يفرون راسها خوالي وترجعني

بقيت اعاين عليهم مافتحت حلكي
خالو يكللها

_ لا طلاك مترهم تتطلك ماكو اي سبب يستوجب وكل اسبابها ينحلن
ماطول لولد لايشرب لا يدور نسوان لاعندة زايدة ناقصة منكدر نعيبة
يبقة لبخل هذا طبع بي وهوة موغريب عنكم من اخذتة تعرفة كلش زين وتعرف طبعة
وهي عدها راتب وتكدر تصرف على نفسها وتعوض حرمانة
سالفة امة وتدخلها هم يصيرلها حل وترة كل لعمات هيج
بس لطلاك حتة الله ميقبل بي
طفل يجي للدنية شنو ذنبة يربة بلا اب
ومنو يكول لو تطلكت تاخذ احسن من زياد
شين الي تعرفة احسن من الزين الي متعرفة

بقيت استمع لكلامهم
ماانكر لوهلة إقتنعت بكلام خالي
زياد عيبة لوحيد لبخل وامة الي ساطرتة وتأثيرها علي قوي
ماانكر من حبة الي سوة امور بحياتة ممسويها
ماانسة من تفلشت سيارتة بسببي ورغم ميت قهر عليها وحسيتة راح يوكع من طولة بس بوقتها عاينلي وكال فدوة الج
ولا انسة من وكف بوجه عمامي وجان مستعد يبيع عقار وسيارة علمودي
ماانسة من استقتل علية
تبقة امة وتمسكة بيها وسماعة كلامها وتنفيذة بلحرف لواحد
رغم ماجان هيج قبل زواجنة وجان دائما يعاندها
وماالها حجاية علي ابدا
حتة من راد يخطبني وماقبلت جبرها وخلاها تجي
يمكن اذا بتعد عنها تتغير حياتنا نوعا ما
وبما انو اني حامل موقفي جيد
اكدر اشرط علي اعيش وية امي بحجة انو اخاف امة تضربني مثل ماسوت ذيج لمرة ويتأذة لطفل
هم نخلص من مرة نوفل وهم يصيرلي حل وهم لطلاك صعب اني بوضعي وضرفي مااكدر علي
اصير بيد خوالي
وطلاكي معناتة اعيش هنا ويبقة نوفل ومرتة يمنة
ومعناها ماسويت شي
ام زياد لثانية يمي

كمت على حيلي رحت علتلفون
اريد اذبحها على قبلة
تعبت من وضعي
زياد بي عيوب وعندة كومة اغلاط بس نكدر نصلحهن لو جان متمسك بية ورايدني
خطوبتة للمى ادري بيها حتة يكسر خشمي واعرفة مالة نفس بيها
يحبني بس امة ماخلتنا نشوف دربنا
بين سحورتها وبين تدخلها وضغطها علينا
خلتنة نوج ونطفة
ضربة الي كلشي سوا من ضغطها الي وصلني للخبال
وبخبالي جنت اخليها تشمت بي وبأختيارة

قررت اتصل بي واذبحها ويا على قبلة
اذا عاف لمى واجا يمي ونسا كلشي صار ووافق يبدي وياي من لصفر
اكونلة زوجة صالحة واتغاضا عن كل اخطائة وعيوبة
وبهلشي اكسر خشم امة
مااخليها تشمت بية ولا انولها الي تريدة
انتصاري يكون بقبولة انو يجي يعيش يمنا
أو يأجر قريب علينا
بهلشي بس يثبتلي انو اني على حق جنت وامة باطل

دكيت على تلفون اهلة
رد علية صوت عمو
سلمت علي سلامة ثكيل واسمع صوتها يمة تلقن بي وتعد علية
طلبت احجي وية زياد
كلي هسة اصيحة فوك بغرفتة
صاح علي
بقيت استمع لمعاركهم وهي تلوم بي وتكلة ليش صحتلة كللها شتردين من عندة
تريد تقرة براسة هي وامها وتورطة واحنة كلنة ندري لطفل الي ببطنها طاح وزياد مامتقرب الها بعدها تنزف وراحت لبيت خالها وبعد مارجعت
بعد منين اجة هذا الطفل
منين اجونة لتوم
ماعدنا وراثة لا اهلك ولا اهلي يخلفون توام
بقيت افور واني اسمع كلامها
لاحجيت ولا بررت
لأن هذا الي جنت متوقعتة
بقيت منتضرة اسمع لزياد
واعرف اذا جان مصدك كلامها لو لاء
وبداخلي فكرة
انو اذا لمست ولو مقدار ذرة من لشك بلطفل الي ببطني
انسا زياد ومايجمعني بي سقف واحد لو على حز ركبتي

من بين افكاري ودموعي لتنهمر واني امسح على بطني واحاجي الجنين
مضلوم مثل امك
قبل متجي للدنية بدت ضليمتك
شحال لو اجيت للدنية
شحال لو كبرت وعرفت انو اهلك شاكين بنسبك

نززتي صوتة يهمس بتعب وحسرة
الو بلقيس

هلو زياد شلونك

ااااااخ زين زين

سمعت خاطب

اي صحيح

مبروك

الله يبارك بيج

وصللك خبر حملي ؟،

اي مساع حجولي

ماراح تسألني شلون ومنين
ماراح تحجيلي السنفونية مال امك الي دتعزفها لأبوك وهي تتهمني بشرفي للمرة لمليون
اذا شاك بنسب هلطفل اسمعك
احجي كل البداخلك خل نذبحها على قبلة

صوتة يجر نفس عميق وراها جر اخ طويلة وهمس
رغم كل الحجي الي نكال عنج بيوم رحت وياج مثل لمطي حتة تساعدين ابن عم زوج بسعاد ماشكيت بيج
صدكتج وتزوجتج
مو حتة استرج مثل ماكالو ومثل مااني بللحضة عصبية حجيتها
تزوجتج حب ورغبة والله الي يشهد
وحتة بعد ماتزوجنا ولكلام الي نكال واتهام امي ونسوان عمامي الج وكلها صاحت بيها شي
جنت رايد اتقرب الج حتة اثبت لعكس واكسر خشومهم بس انتي مافهمتيني
اجي هسة بعد كل هذا اشكك بنسب لطفل
لوماعندي بيج ثقة عمياء جان عفتج من اول عثرة ومن اول حجاية طلعت عليج

دموعي نزلت همست
ولمى

لحضة شيطان وتسرع مني
وشي ندمت علي بنفس اللحضة الي خطبتها بيها

ولحل هسة شنو

اتصور انتي طلعتي من لبيت تبوسين لأدين تطلبين لخلاص مني واخر جملة كلتيها مااكدر اعيش وياك
انتي هسة شنو تردين كليلي
شنو لحل الي تردي لنفسج

نرجع بس بشرط تعوف لمى

حسرة طويلة نجرت ووراها كال
ماشي

وتجي هنا يمنا نعيش يم امي

لا بلقيس هاي الي مااكدر عليها

_ولا حتة لخاطري

_ولا حتة لخاطرج

_هيج مالي خاطر

_خاطرج جبير والمسألة معليها بأمي ادري بيج راح تحطين امي بلنص
بس لسالفة تخصني وتخص شغلي
اني هنا اعرف لدنيا كلها وكلها تعرفني
اني هنا بنيت اسمي والي صيت
اجي لديالى معناها اخسر تعب سنين وارجع من لصفر ابدي
وانتي تعرفين شغلي شكد مهم عندي
وبعدين اني ابن بغداد عشت وربيت بيها مامجبور اطلع منها ولا اكدر اعيش غير بيها

_لعد شلون شنو حللك

_تجون انتي ومرة عمو عوفو بيتكم و هنا اجرو
هم تامنين على امج
وهم هي ترتاح بقربها يمج
ومكانكم مااخلي احد يعرف بي ولا حتة امي

نطيتة الموافقة وسديت التلفون امي وخالي كبالي لاح لفرح على محياهم
تقربت الي امي
تشجع بية وتكلي

_زين سويتي

_دوامي شلون اخاف هلمرة مااحصل نقل

_مبقة شي وتطبين بلسابع
خلي لسابع يخلص من تطبين بلثامن يلله نكلة يشوف لبيت
بينما يلكا ويرتبة ويحطلج بي غراض نكول طبيتي بلتاسع اخذي اجازة امومة
منا لسنة الله كريم عود
شوف شلون تصير بعد
يجوز نكدر نقنعة ونرجع لهنا ممعروف منا لوكتها شيصير

اقتنعت بكلامها
بقة كل فترة يتصل بية من لشغل لو من لشارع
يسأل عن احوالي وعن لطفل
احسة فرحان بي
سألتة عن رأي اهلة برجعتي مانطاني اجابة صريحة وغير الموظوع
حسيتة ضام عليهم
سولفت لأمي
كالت خل يضم عليها اكيد عندة اسبابة
اول وتالي متبقة لسالفة مضمومة احنة اقارب

اكلت لسابع وطبيت بلثامن
بديت اجهز ملابس للطفل
طول فترة حملي جانت حركتة قليلة حيل
بلثامن بدة ينزل علية دم كل فترة شي قليل
امي الحت علية كالتلي خل نروح للدكتورة نجيك وضعج
رحنة لنفس لدكتورة سولفت الها على حالتي
وذكرتها بية وشرحتلها انو اني حامل بتوم فقدت واحد وبقة واحد
بقت تسألني عن لحمل
وين يتحرك
ووين يرفس اكثر شي
يخمل لو دائما حرك
سولفت الها انو حركتة قليلة وماتحرك إلة بنهاية الخامس بداية السادس
بقت تلوم ليش مااجيت وجيكت وضعي بوقتها
امي جاوبتها وشرحت الها انو هي من جانت حامل بية هم ماتحركت لحد لسادس فلهلسبب تصورنا انو هلشي طبيعي

طلبت مني اسوي سونار سويت سونار برة
ام لسونار بقت هواي تحرك بلجهاز على بطني وتكلبني كلسا من صفحة
واكثر،من مرة تنطيني مي اشرب وتكلي طلعي برة شوية وتعالي
بقيت بقلق اني وامي
الى ان بآخر مرة طبيت رجعت خلت لجهاز
صفنت بوجهي وكالت
ماما طفلج ...........

انعام
اتصلت بينا وكالت قيصر محكوم بتهمة تعدي على زوجتة وحاكمين علي يدخل مصح نفسي وداخل مدة شهرين ووراها ماعرف شنو صاير ويا بلمصح ومخلي
يطلع بكفالة ماعرف منو كافلة ومطلعة على مسؤليتة بشروط

_ماكدرتي تعرفين منو كافلة ووين رايح
زوجتة وين
مافهمتي شنو لصاير بينهم
وشنو الي خلا يضربها

_لا هذا كل الي عرفة منصور تدرين مينطون معلومات إلا للأقارب من الدرجة لأولى
يتحفضون عل كاشي يخص المرضى
هاي لمعلومات اكثر شي من لجوارين عرفها
ولجوارين كالو بلمصح ميدرون بي طالع اصلا يعني ميعرفون مكانة لجديد وين

لسماعة جانت بيني وبين غضنفر
سلمها الي وبدت الخيبة على ملامح وجها
بلكاع كعد وادي على راسة

_ضاع اخوي

_كول يا الله غضنفر

بقيت اهدء بي
صاح على جدة وعمامة
بقة يسولف وياهم ويلوم بجدة لأن طلعة برة لعراق
بقة يتناقش وياهم وقرر يتواصل وية صديق الة هناك ويطلب منة يدور علي ويتقصا اخبارة اكثر

بهلأيام جدو كدر يحصل نقل لفدعم وجان يحرص على انو ميخلي فدعم يعرف هوة الي طلب نقلة
متفق وية مدير المركز الي يداوم بي
ومفهمة انو سبب نقلة هوة تغيبة عن لواجب وتقصيرة بهواي امور بلفترة لأخيرة

ونتقل فدعم بلبصرة بقة يتردد على بيت عمة مدينة
تتصل بينة من جوارين الهم كل فترة
فرحانة بي تكول ممشي لفروخ على لسراط المستقيم
ومايشرب من يوم لراح يمهم تكول يستحي من رجلي وعيالي
ولفروخ مايخلو يشوف دربة كلما يريد يشرد منهم يختلي بروحة يلحكو
بلكي هنا نشوفلة فرخة من كرابتنا ونقنعا يعرس

يبقة التلفون من ايد لأيد يتنقل
تحاول تطمن بينا علي بس يغلبها حزنها علي وتكعد تشكي همة وحالة
جنة نسمع صوتها وهي تمسح دموعها وتخفي بجيها من تسولف عنة
رغم تحاول جاهدة انو تطمنة ومتخلينا بقلق
بس نحس عليها شكد مكسورة علي
عمة مدينة القاسية بلطبع والي متبجي ابدا
جان يوصلنا صوت بجيها الي تحاول تخفي
وبكل مرة يطلبون منها جدو وعمو رحيل ولولد انو يحجون ويا
تكللهم نايم
لو طالع برة
وبكل مرة تنطيهم حجة
والكل يعرف هلحجة جذب
لكل متأكد هوة ميريد يحجي وياهم

جان يحجي وية غضنفر من لشارع يخابرة ويسولف ويا
وبكل مرة يتصل بي يبقة مهموم علي ومخنوك
صاحبة طالب رايحلة للبصرة اكثر من مرة
غضنفر كل فترة يريد يروحلة بس ينشغل بسالفة
طول هلفترة جانو مشغولين بسالفة تخص حفيد اخو جدو
كاتلة واحد بلغلط ويومية ملمومين ورايحين
طول هلفترة جنت اشوف غضنفر عصبي مشغول
وعدة مدة دخلت بشهري
بسعاد دخلت قبلي بس تأخرت بولادتها كملت شهرها وماجابت
راحت لدكتورة شكم مرة تكللها تحركي امشي صعدي درج
عادي تتاخر ولادتج لأن كعدتي فترة طويلة ورة حملج لأول يلله حبلتي
الى ان اجة موعد ولادتي
هم طلكت بليل
ساعة ٨
جان غضنفر ماموجود
اشهر عدت وسالفة حفيد اخو جدو مانحلت مشية رايحة مشية راجعة
كل فترة تكبر وتتعقد
وكل اتفاق يصير من لعشاير لمتدخلة يرفضو اهل لولد لمكتول
وبقو طول هلمدة جر وعر ويومية عطوة
بيومها جانو رايحين هوة والولد وجدو وعمامة محد اكو بلبيت
بقت ام فدعم تحاول وياي
الى ان جبت على ايدها
كصت الحبل السري خلتة على صدري
حضنتة حييل وشميتة
نضفتني وكومتني للحمام غسلتلي
ردت اسبح ماخلتني
بدلت الي هي وكشمش لبسنني لكنتور كلة وطلعنني
تلكتني منة بيد بيبي تبجي من شافتني حاضنتة
عاينت للساعة جانت فوك ال١٠
منتضرة شوكت يجي ويتفاجأ بأبنة الي تارس حضني
عيني على بسعاد بمكانها تروح وترجع ولازمة بطنها
لناس الي مكتول منهم بنص المدينة
ولمنطقة الي احنة بيها ناحية على حدود المحافظة
لهلسبب يتأخرون بكل روحة الهم

طبت سللامة سوت الي تشريب لحم وجابتة
بقت يمي الى ان كملت اكل اخذت لصينية للمطبخ غسلتها وراحت لمشتملها
قبل متطلع سألتنا محتاجين شي اني راح اسد بابي وانام

جاوبتها بيبي وهي تبوس حمزة
كلشي منريد

ساعة ١١ الة ثلث دخلو
بقيت اني بغرفتي وصيتهن ميجيبن طاري
ختلت لطفل بكتري وغطيتة
وعلى ايدي لثانية منة الوليلها
دخل جان لضوة طافي
تقرب الي عبالة نايمة

فتح لضوة عاينلي سلم وتقرب

ايدة على جبيني يتفحص
شمالج مغيمة
وجهج شمالة اصفر

بتسمت بوجها واني اسحب ايدة واخليها على بطني
عيونة اتسعن واللمعة بيهن
شواربة تحركن وهوة يبتسم
صوتة تعالى بلضحكات بعد لغطة عن بطني
يتلفت

_ وينة كَرة عيني وينة

سحبت الغطة عنة وهمستلة اششش

رفع دشداشتة ليفوك وطفر من فوكي راح من جهتة

_يمعود على كيفك لاتدوس ببطني

سحبة بيدة على كيف
من نحرة شمة حيييل
يم اذانة تمتم ويبوس بي
تقرب الي على جبيني باسني ويهمس
انة كلبي يمكم
جنت حاس اكو شي
ماتدرين شلون سقت بس اريد اوصل
صار لدرب شطولة

_شنو راح نسمي

صفن يفكر

_مو انت تسمي اني اسمي
انت سميت منة
اني اسمي

_ماشي سمي بس انطيج خمس اسماء اختاري من بينهم

_وشنو هلأسماء

_قسوَّرة . ضرغام .همام. مياس . شهم

_وشمعنا هلأسماء

_انة مااسمي غير على القاب لأسد

_ليش

_مابيها ليش انة تعجبني هلأسماء

_حيرتني ترة وولا واحد عجبني

معناها انة اختار قسوَّرة

عجبني لأسم غريب ومميز ماناقشتة
وهوة يحجي فزت منة
هي شافت قسوَّرة بيدة لوتخبلت بلبجي وتصرخ بابا
دكت لباب كشمش كالت

_خية جيبيها يمي على واهس لفروخ تسكت
ماقبل ينطيها الها
جان تعبان نام بلكاع نامت منة على صدرة
اجت يمي كشمش
نامت بصفي علجرباية وقسوَّرة بيناتنا نام
بقت خطية كلما يفز تكعدلة هية تنطي الي ارضعة وترجع تنومة تاخذة مني

لفجر نايمين وماسمع غير صراخ كشمش
فتحت براكت يمي علجرباية
ماشوف غير كشمش تصرخ فوك لجرباية وغضنفر مفزوع

نداريت اسأل بي انت شصعدك هنا
ايدة على راسة مدنك يفرك بوجها وكال
ماادري بكشمش هنا
هي بساع سحبت روحها وطلعت

تقربت الة اسأل بي شسويت

_مديت ايدي على خصرها وحضنتها
عبالي انتي وحكَ الله
غير تحجين تكولين

_اني ادري بيك راح تكعد
وبعدين شنو متعرف ريحتي انت
كشمش اسمن مني مالاحضت هلشي

_خاب هوة انة لنومة بعيني شمدريني يابوية
شردت من منة اليل كلة رجليها لو بعلباتي لو بخاصرتي

بقيت انوم بقسورة وهوة يضحك يكلي همزين حست علية وصرخت جا طوخت ومديت ايدي على غير مكان

ضربت على رجلة واني اضحك
شوية وكام بدل وراح للشغل
طبت يمي كشمش كعدت وايدها على خدها
وتلوم بية تكلي رجلج ستوج جايبة شعدة صاعد يمج ميصير ميصلح

ترة هوة ماصعد يمي صعد يمج غمزت الها واضحك

ايدها على خدودها وتلطم
وانتي فرحانة
سودة بوجهج
غير لو تسمع جدتي نعناعة إلة تطلعة محبلني

منين تسمع حبيبة
هاي لسالفة تبقة جوة هاي الغرفة ماتطلع منها

طلعت جابتلي كيمر ودبس
تريكت فزو ثنينهم فد بجية
حسيت اريد ابجي وياهم
هاي المسؤلية ترعببني
والي يرعبني اكثر حاجتي لمساعدتهم
هلشي راح يكون كارت للأذن الهم بلتدخل بتربية اطفالي وهلشي بحد ذاتة كفيل ان يرعبني
بقيت اتصدا لسوالف بيبي وام فدعم وحتة نعناعة
وحدة تكلي ماي وشكر وحدة تكلي كحلي وحدة تكلي خل نكمطة بلعكس حتة يطلع عضمة قوي
واخر شي كام يطلع بي حب من بوس غضنفر ولحيتة يتحسس منها
طبن علية كلهن مقتنعات بحجي نعناعة يكللي هل نجوي حتة لاينتشر هذا لحب بي
هنا لكيت نفسي انفجر بوجههن واصرخ
محد الة علاقة بقسوَّرة
هلشغلات بمنة ماسووها احس فرحتهم بلبنية مومثل لولد
قليل يتدخلون بيها وقليل يهتمون الها
تعبت بس اريدة يكبر حتة اخلص
يوم سابع الي
طلكت بسعاد جيبتها ام فدعم هم ولد سمو خليل بطلب من جدو
غضنفر ماجان قابل على لأسم
وكال لجدو
خليل واحد ومات
وميتكرر
بس هوة اصر انو يريد يبقة يسمع اسمة بلبيت
ويبقة هلأسم يذكرهم بي حتة بعد ميموت جدو

طول هلفترة غضنفر فرحان بقسورة بس ميكدر يشيلة ولايتقرب الة من ورة منة الي من لغيرة تكوم ترجف وتصرخ
طول هلمدة هوة على تواصل وية صديقة وينتضر منة اخبار عن قيصر
الى ان بيوم جان متمدد يمي علجرباية ومنة تلعب يمة
صوت بيبي صاحت علي يمة واحد يريدك بلتلفون

لبس دشداشتة وطلع
منة طلعت ورا ستوها تخطي وتوكع
بساع لفيت روحي بحجابي ولفيت قسورة ببطانيتة ولحكتها
خليت قسورة بلكاع يم بيبي ورحت الزمها عيني علي من كال
شسوت بي هاي بت لحرام
شللووون
شوداااااا يمهااا
شلون صار هيج شلوووووون
ووين لكتة واخذتة شدلاها بمكاااانة .....يتبع