#خنجر_لغضنغر
#البارت_الثاني_عشر
#حنين_حاتم
صوتي يهمس بخوف
اني عندي امانة تخص قيصر طلب مني اسلمها الك
بس قيصر مصوب وبلأنعاش صارلة ٤ ايام ماصحة واهلة كالبين لدنية يردون يعرفون منهو لصوبة
دموعي نزلت ودكات كلبي طبول تقرع
تعلن موتي بهلورطة
انت شمدريك
اني بنفس قريتهم
ولأمانة لازم تجي تاخذها هوة طلب مني هلشي
وشدد علي
خوية لامانة حرمة انة وين احطها
احنا كومة زلم
كومة زلم ؟
اخاف انت واحد من لولد الي بلبيت الي
اشش اششش اشششش
صوتة يكرر لكلمة بهستيرية
وفتح موضوع ثاني
عبر لسماعة وجنت اسمع دكات كلبة ونفسة لعالي
كمل بهمس ولكلمات من شفافة ترجف وتتقطع بنفسة لعالي
خوية خلي لمرة يمج انتي تكدرين عليها
انة وين احطها احتار بيها
انة وضعي كلش صعب
اني ماعندي مشكلة ابقيها يمي
بس اخاف هلشي بي مضرة لقيصر أو الها
ولان هوة شدد علية اتصل بيك واسلمها الك بعد ٣ ايام اذا ماتصل بية
يجوز لان مايريد يثكَل عليج
مااضن تنضر بضلتها يمج
سديتة منة من حسيتة فعلا موكد لأمانة
ومن ردة فعلة عرفت هوة واحد من لولد الي بلبيت
وتأكدت ضرفة ميسمح يستقبلها
خابرت زياد حجيتلة
بقة يلوم بية
زياد:- اني لسة مامصدك طاوعتج
ولج شمسويتلي ساحرتني
هسة بلله لو صار شي علولد ومات احنة شنسوي بيها
كلبي فز من ضلوعي
وصوتي يهمس بخوف اسم الله علي
_علساس ماجنتي تدعين يموت وبسعاد ترجع الكم اول مااخذوها
شحدا مابدا
_اي هاي قبل مااعرفهم
_ هسة شلون قرريها للمرة ساليها عن اهلها اقاربها بيتها وخلي نرجعها
-مستحيل
_شنو مستحيل لعد تبقة هنا مترهم هم عدها اهل ناس يقلقون عليها
-ماعتقد لأن من اجت لحد لآن مجابت طاريهم
-سدي راح اجيج وافهم منهة
شوية واجة بيتنا مسافة قريبة عليهم
سلم وبقة يمازحها ابوية جان بلدوام وامي تسوي غدة
زياد:- حجية ماشتاقيتي لاهلج
خاب يااهل هوة انة اعرفهم شايفتهم احد سائل عني
رجلي مات كَبل عشرين سنة مدري شكثر
ولويلاد واحد خذنة لنسوان وشالن بي لبغداد وبعد لاشفتة ولا وصلني
ولثاني مات
دنكت وصوتها يهمس بحسرة
قشمرو لفروخ وخذو للهور يسبحون
وغدرو منعولين لصفحة ويلاد لحرام كلة علمود سميجات
عبن جان مت عيني سبع هيج يغط ايدة بلهور يطلع ثلث سمجات
ولو كض لهور يغربلة تغربل هيج لسمج يتطافر بين ادي
صوت زياد يهمس الي
فود سمنسر هذا مو فرخ
اسكت بلكي نحصل منها شي
ومن مات لفرخ كلها شردت وكلها تكول مالنة غرض
وراح دمة مت عيني عليك يمة مهودر
خذاك لهور وهلنشف لهور وانت مارديت
شيلتهة على وجها وتنعة
ايدي على عيوني امسح دمعات تناثرن بكلماتها الي يرق الها لقلب وصوت نعيها لحنين وحجايتها لمالحة
ايد زياد على ضهرها تمسد
كافي حجية لو ندري ماسائليج
يمة انة خذاني ابن عمي وانة عمري ثلثتعش سنة وجان علي ثار وكضيت عمري ويا مهجولة
ياكوت يا ديوانية وتالي هنا ستقرينا
لا احد ينشد عنة ولا يعرفون مجاننة
يخاف تطلع من اهلة ويندلونة عبن لوادم لكتل منهم مايعوفون حكَهم لوبعد مية سنة
لمن مات وخلاني بطرك لفروخ لاكاع لا بيت
كلشي ماكو
خلفلة على لوادم لخيرة خذوني يمهم جان إبيتي طين وكصب وجذوع وي كل مطرة اغرك
لجبير خذنة بسحورتهن ولزغير خذا ربة وخذا ويا عويناتي وعافيتي
بس ماخذاني
وسفة
اسم الله عليج عمرج طويل
ياعمر يمة هوة شكثر ضل بي
انة متانية ربي ياخذ امانتة
زياد يحاول يستفسر،منها وهي بس تاخذ راس خيط تنطلق تسولف عن حياتها
بقينة نستمع الها سوالفهة حلوة
تالي تأخر عندة شغل سألها
_حجية فدوة لعينج عندي شغل بس جاوبيني
صميدع ليش امنج عد بلقيس وليش شدد عليها تطلعج مناك
_ياصميدع هذا يمة قويصر خذاني
بلعت ريكي من حجت ولخوف داهمني
صوتة يجاوبها
زياد :- هسة اسمة قويصر صميدع مومهم بس جاوبي على سؤالي
انة لو ادري يايمة عليش اجي وياكم
بس انة اجيت لأن هوة كالي شغلة حياة او موت
بلقيس:- انتي شتصيرين من عندة
-انة اصير عمة امة
_من جان يحاجيني بلتلفون ويمة صوت طلق وصراخ نسوان انتي وين جنتي
-خاب غير انة لجنت اصرخ من صار مناوش ورمي انة ضريرة يايمة بس اسمع اصوات كلشي ماشفت
وهوة لزم ايدي عصرها وكالي جدة انة قيصر ابن امنة وشالني وركض بية
اسمع بس صوت لجيلات
وقويصر كلساع يهدكني بلكاع ويرمي عليهم
ويرد يشيلني ويتختل بية بين لزرع
لمن ماشمرني بلخرابة اللكيتوني بيها
وكالي تضلين هنا تتانين وحدة اسمها بلقيس تجيج وتاخذج
وعافني ومدري وين ولة اسمع بص صوت لجيلات
اضنة يريد يفتح دفاتر عتيجة
وانة يايمة مالي خلك لمشاكل
خالة شنو هاي لدفاتر لعتيكة وليش تخافين
هيج سالفة قديمة تخص امة
زين هوة شلون اخذج ومنو لجان يرمي علي
يمة انة ساكنة وي مرية كرابة اهلهم من بعيد عدها ثنين بنيات
وويلاد تلاثة
من زمان صارت سالفة ومشكلة جبيرة
ونجبرت اسكن عدهم
همة شاهد الله مامقصرين لابلكمة لابهدمة
بس مايخلوني اطلع برة اشم هوة
ولايخلون بشر يشوفني
وليش هيج حابسيج
ها مو هيج همة مو مو يخافون علي
من شنو
يمة انة ضريرة ماادري لاتضلين تنشدين بية
ستثكلتوني شمروني بلشارع ويلاد لحلال لهواي
دودة بين طابوكتين الله كتبلها عيشة
خالة موهيج بس احنة خايفين
انتي امانة ونخاف ضلتج يمنة تسبب مشاكل لقيصر فدحاول نلكة راس خيط
خاب ماتعوفوني انة ارد انام
ميل جنك حولي راسك مدهرب
دفعت زياد وتمددت
وزياد يستشيط ويرد عليها
تعيب على راسي وهية عمامتها مال ابو جعفر لمنصور
اسكت لتسمعك
حييل كفختة
خاب دول غاد ول
تقرب الي يهمس بصوت ناصي يخاف منها تسمعة
بلقيس هاي لمرة اذا ماطلعت وراها مصيبة اكص ايدي
ايدة على ضهرة وبتذمر يحجي
ااااخ لسة ضهري يوجعني من شلتها
صوت لتلفون
طفر هلى حيلة وصاح على امي
عمة هاي اكيد امي اذا سألت علية كليلها مويمكم
بتساؤل حجينا ثنينة نفس لوكت اني وماما
ليش ؟
ايدة الي تسللت للحيلة ويرجع يمسد على صلعتة
كأن يدور على جواب بيها
ورد بتوتر فاضج جذبتة
مو دزتني على لسوك وهسة اذا عرفت لساني مارايح تاكل كلبي
سحب جكايرة وترخص
وعيونة تأشرلي عليها ويهمس
شوفي نامت نامت تسوي روحها متدري
اذا ماطلعت ضامتلها ضميمة وجاي تضحك على عقولنا
اي دروح الة تكعدلك
دشوف حالها لمسكينة راسها بكد مامعصبتة صاير جزئين
طلع واعاين الة
ركب لبايسكل رفع كلابيتة لمقلمة
الي منطقة لحوض بيها تايخة ومتغير لونها بكد ماقديمة
وهي اصلا مالت عمو
ضعف بسبب لسكري وصار زياد يلبس بملابسة
رفع دشداشتة عاضها بحلكة وكوة مسيطر علبايسكل ومشة يهتز بي اول مرة يركبة
مااكرهة بس يدقني بتصرفاتة اكثر صفات اكرهها بلرجل هي لبخل
وهوة جانت هاي لصفة لسائدة بي
اكو ناس ميبين عليهم بخلهم إلة لمن نتعمق بتفاصيلهم
بس هوة فاضل نفسة بحيث يكعد بلكهاوي وية اصدقائي ميشرب جاي يستسحف
يرجع لبيتهم ويشرب
بابا ينحرج من يطلع ويا مكان بسبب تصرفاتة
اذكر بحفلة لتخرج مالتي
اجة لابس لقاط مال عمو
جان جبير علي وراهي لردانات مغطية جف ايدة وسيقان لبنطرون من جوة متطبكة ومتكومة علحذاء
يطلب جكارة من زملائي كلسا يطلب من واحد
حرفيا خزاني
مجنت رايدة جيتة بس هوة كوة حط روحة واحرج بابا
من رجعنة نهاريت وفقدت وصيحت علي
جنت مستهضمة وبنفس لوقت مقهورة علي لأن شفت نضرات الأستنقاص والضحك والهمس صار بفلس علي
نقهرت علي ونقهرت من تصرفة
يمكن لو ماعندة مااضوج
بس غركان بلخير
بمدة قياسية جمع الي ماكدرو عمو وبابا يجمعو طول حياتهم
يبيع ويشتري بلسيارات وسيارتة سكراب
ياخذ لسيارة بسعر زهيد تعبانة يصلحها ويعدل عليها ويبيعها بمكسب جبير
ندار علية يضحك يلوح الي ولازم لبايسكل بتك ايد
دخلت جوة ايتشيط غضب من عندة
لمثلة سيارة اخر موديل ولكشخة وجيبة مليان
هوة حتة فلوس ميشيل
عدت مدة هية يمنة
احاول احصل بسعاد انعام احاجيهن بس كلما اتصل يجاوبني واحد من ولدهم لو نعناعة
ولفهمتة من كثرة اتصالاتي ممنوع وحدة من لبنات تجاوب
صارو يعرفون رقم جوارينة يرفعون لسماعة ويبقة مشغول
تعبت واني ماحصهن وماما وبابا يلحون بشأن ام مهودر
وكل مدة يحاجون زياد عليها ويطلعلهم حجج بصديقة
ضليت بحيرة لا اكدر احجيلهم ولا اكدر اسكت
خايفة من مسؤليتها
بالي يمة
رجعت اتصلت بصديقة سألتة عنة
كال لسا ماصاحي
يمعود راح يصيرلة شهر تأكد فدوة لعينك
متوكد خوية قويصر لساعة بلمستشفى ماصاحي واهلة متسودنين اخو لجبير متمرض علي وجديتة منتهية يكولون مجبلينها (واضعيها على لقبلة)
ايدي على كلبي الي يسرف بدقاتة
والي للوهلة حسيتة راح يطلع من مكانة
رديت بخنكة واليأس يتملكني
تكدر تنطيني اسم المستشفى ليرقد بيها
ماعرفة بس اسألج صحباني
صوتة يصيح عليهم يسألهم
ونوب رجع يحجي وياي نطاني لأسم
ماكدرت حتة اشكرة
ختنكت بعبرتي
سديت لتلفون ولورقة بيدي بيها اسم المستشفى ولردهة
رغبتي بشوفتة
هاجس بداخلي يكبر كل يوم
تأكدت وكتها شعوري تجاها مومجرد خوف علي
ولا بسبب لامانة الي حملها الي
شعوري جان مختلف
رغم انكاري
رغم لصمت الي يتمكن مني بكل مرة اسأل روحي شنو يعنيلي هلأنسان ليش احسة واحد من اهلي
مدري كل اهلي
مااصعبهة لمن يتغلغل حب بداخلنة
وصاحبة بين لحياة ولموت
لاني لاكدر انسا
ولا اني لاكدر استمر
بلنص باقية بلنص
بين الأستمرار والتراجع
دائما اسمع بدايات لعلاقات تكون اجمل شي
إلة احنة بدايتنا مختلفة
وياخوفي من هذا الحب الي بدا يهدمني
بدا يضعفني بدل ميقويني
دموعي تنزل وصوتي يهمس للصورة لبيها كلهم
وكأن روحي جانت تدري اكو بيهم شخص ماراح يغادرني بسهولة
وكأن جنت اعرف لذكريات ماراح تكفيني
جنت احتاج صورة
صورة كل يوم الزمها وأسئلة
شوكت تصحا
شوكت ترحمني من هذا لعذاب
مابين لخوف عليك ولخوف من امانتك
وعدت لأيام
لحجية كل يوم نقررها اني وزياد ولاناخذ منها حق ولا باطل احس ضامة شي وتخاف تحجي
واحس بحجم خوفها من عصبيتها ونرفزتها من يلح وياها زياد يريد يفهم
توصل بيها حتة تضرية
وياخذها بلشقة وميهتم
ماانكر وكفتة وياي كبرتة بعيني هواي
بس الي احسة تجاها هوة اخ منافس طول عمرنا جنة رويسية
حب ومشاعر واعجاب عمرها مانوجدت بقواميسي
تجاه زياد
كل الي تحسة تجاهة امتنان من وكفتة الي
وكتها بس تأكدت احنة منختار نحب ولا نختار لأشخاص الي نحبهم
لحب هوة الي يختارنا
بابا بدة يضايق زياد بإلحاحة
وزياد ينحرج خلصن كل لأعذار
تعبنة وياها
واهلي بدو يشكون
٣ اشهر مرت وهية يمنة
كل فترة اتصل بصديق قيصر اسال عنة
ويكلي بعدة ماصحة واهلة وضعهم كلش صعب
تعبت للحد الي صرت ابجي واتوسلها
خالة فدوة نطيني ولو راس خيط
رسيني على بر
ساعديني الله يساعدج اني بموقف صعب
منا اهلي ومنا قيصر الي مديتشافا
وانة شلي غرض
خاب هوة انة روحي ماعاينتها شعينج
كليلي قيصر ليش امنج يمي
وكليلي ليش نضرب وليش تضارب علمود يطلعج
ومنو الي ضربة
اني لازم اخبر اهلة
ساعديني لازم اوصل الهم وافهمهم على سالفة قيصر ولناس الي صوبو
انة مالي غرض مالي غرض
لاتحطيني بلوسطة
دموع تطشرن على وجها
يمة انة اتاني ساعتي لاتعلعليني
انة ايامي بلدنية كاضية
خليني اموت براحة
لو درو لمجاليب بمجاني مايرحموني
يموتوني كبل ما
كبل ماشنو كملي
هيج ماكو شي
خالة رحميني فدوة اهلي اكلو كلبي
واني بديت اخاف
لتخليني اخذج الهم لتجبريني هيج اتصرف
حيل سحبت ايدي تبوسها
فدوة اغديلج لاترديني
خليني هنا
صوت امي وراي تتسائل بهمس ومعصبة
هاي ليش دتبوس ايدج بلقيس
هاي لمرة شنو وراها احجي
اني سمعت كللللشي
ولج تردين تورطينا وياهم
ولج احنة موحمل لعشاير واحكامها
تردين تضيعين مثل ماضاعت اختج مني
حيل تضرب على وجهها
وكعدت بلكاع لازمة كلبها
تقربت الها بتوسل
فدوة سكتي لايسمعج بابا
ماسكت بلقيس
وهسة اصيحلة واحجيلة كلشي
دخيلج ماما دخيلج حتة من دوامي يبطلني
اذا تدرين بي ليش هيج تسوين
ليش تتصرفين بدون مترجعين النة
توبة والله
سمعيني بلقيس
ترجعين لمرة منين ماجبتيها وتجفينة لشر
صوتها كامت تنعة
شيلتها على وجها وتنعة
كسرت خاطري وعيني على ماما تقربت الها تسكت بيها
تسحب بدينها تبوس بيهن وتتوسل الها
بأن ماترجعها
وتردد
يأذوني والله يمة
مايرحمون بحالي وانة عليلة
اي ليش يأذوج غير نعرف
سالفة قديمة وانة تعاقبيت انحبس
وعبن طلعت هسة يأذوني
ولو عرفو قويصر مطلعني مايرحمو ترة
يكتلو حلال لوبعد ميت سنة
ماما بقت مصدومة
_دخيلك ياربي منين جبتيلنا هلورطة بلقيس
وشنو تاليها
تقربت الها اهدء بيها
_ماما ان شاء الله يصحا لولد ويجي ياخذها ونخلص
هية امانة لاتنسين
وهوة مأمنها وماحرص علية إلة لأن خايف على حياتها
خليها يمنة هسة بيش ضارتنة
نصبر وبلكي الله يفرجها علي ويصير زين ويجي ياخذها
- ماشي بلقيش ماشي نصبر نشوف تاليها وين
امري لألله
وعدت مدة
وهية يمنة
تعبت من محلة امي
وتعبت من بابا الي يومية مخابر زياد ولولد تعب ويانة وتورط
وينك ياقيصر وبيش ورطتني
كوم خليني اجر نفس
ماجريت نفس من يوم اتصالك
قبط شهر رابع وهية يمنة
كاعدين نتعلل ساعة فوك ل٩ يمنة زياد وهي تسولف متونسين عليها
ومانحس غير بابنا تفلشت
وصوت رمي عشوائي
بيتنا نشالت ونركعت
كمنا نتلاطم
بابا علما وصل للباب هوة وزياد منتهي ومتخربط
بلمطبخ جنت اعاين
وهية جوة هية وماما
من كامت تتلاطم وتملخ بوجها وتصرخ
ولك يمة مهودر عسني لحكتك ولاهلعيشة
أمدا هلعمر لكضيتة بلخوف والذلة
واحد لزم بابا من ملابسة وثنين حاصرين زياد علحايط
وشكم واحد دخلولنا للبيت لا إحم ولا دستور
طبو ثنين للمطبخ علية
وواحد راح للأستقبال
ركضت للصالة اريد اشرد للغرف
واسمع صراخها جوة
ولج بلغيس
ولج يمة قويصر كالي تدير بالها عليج
ولج بلغيس لحكيني جدة
ماكدرت كلبي يتكطع عليها
ركضت عليها
صوت لصياح برة
وهمة متعاونين عليها يردون يشيلوها
احس لمكان ضلم
ضوضاء راسي ورجلية لتتراجف من اشكالهم ولسلاح لبديهم
شلون عبرو سيطرات بي
شلون وصلولنا
دماغي توقف وكلشي بية توقف
ادية لتهمش بيها منهم
صراخها وبجيها وخوفها ليوصلني من المس اديها وتعصرهن بكل قوتها كأن لموت ديخطفها وترديني اخلصها
احس نار شتعلت بصفحة وجهي ورطوبة
وبلكاع حيل نركعت
وجسدي من اثر لضربة نرطم بلحايط
كمت على حيلي وصراخ ماما لواكفة كدامي تمنعني الحكهم
عيوني عليهم من طلعو بيها
وصوتي يتقطع بشهكاتي
هديني ماماااااا
هديني هاي امانة قيصر
ولج ماما امانة
تفهمين شنو اماااااااااااانة
يموتوها راح يموتوها
حيل جانت تدفعني من بطني
شفت ام تلوذ مثل لبوة تحاول تحمي بتها
شفت بيها قوة كل عمري ماشايفتها رغم شكد رافست وشكد دفعتها
بس ماهدتني
صوت سياراتهم من شحطن
وصياح بابا وزياد وراهم
جنت واكعة بلكاع
وعيوني على امي الي لازمة اديها لكلهن خراميش مني
دخل بابا
تقرب الي حيل بكل قوتة صفكني
ومن فكي عصرني ويصرح بية
ليش ليش ولج ليييش
اني انسان مسالم كل عمري امشي بصف لحايط
اكول عدي بنات
ماعدي ولد ازمط بيهم
اخاف عليجن
ماكافي عملة ابن عمج لشفية وامة لخسرتنة بسعاد
تردين تضيعين مثلها
واحنا بعد ذاك لتعب وعمرنا الي نفنا بتربيتجن
نصفة ادينا للحايط
زياد لازمة ويسحب بي ويحجي ويا
عمو اني اتحمل امسؤلية
اني الي اخذتها
لمفروض اوعيها وامنعها
عينة علية ويهمس
شمنعها واني نفسي مادري شلون طاوعتها
وخر عني كعد علقنفة
ايدة تسجب بياخة دشداشتة بعبث ويفتح لدكم
نفسة يصعد
صد على ماما بلكاع كاعدة وبحالة ذهول وصدمة
تقرب الها يحاجيها
بيج شي
تهز براسها بدون حجي
واكف على حيلة وضرب حيل على رجلي واستغفر
تقرب الي بغصة ولدمعة شفتها تقاوم على رموشة
ليش بابا ليييش
ولج ليش سودتي وجهي
تدرين شيكولون
يصيحون خاطفينها
يصيحون ماخذيها من نص بيتهم احنة ورامين ثنين من فلحهم
ويردون مشية وفصل
ولج اني يردون مني مشية ونطوني عطوة يومين
شكول وشحجي
شكل للعالم شكللهم بتي جابتلي مصيبة لنص بيتي
مستغفلتني هي وابن اخوي ويقشمرون بية
زياد:- عمو اني اتحمل كافة تبعات لموضوع
بلقيس لتجيبها بلطاري كللهم اني الجبت لمرة واني لورطتك بيها
لا لهنا وبس كافي جذب
تحجون لصدك بلحرف لواحد
انت وياها
اجذب على لشيخ وتطلع جذبتي وين اودي وجهي رجال شكدني شكبرني
ثنينا مدنكين راسنا
دموعي تجري وزياد مخنوك ووملامح وجهة تنتفض
اتصل بابا بشيخ عشيرتنا وحجالة
بعد ماقررني وعرف مني كلشي
يوم ثاني نترس بيتنا زلم
بلصالة كاعدة وكلسا تجيني كفخة من امي
كلما يعلة صوتهم بلملامة على زياد وعلية
تعض اصبعها وحيل تكفخني
مرت عمو خابرت تعد وتصيح وغلطت علية
وتكل لماما
موصوججن هوة صوج ابني لسرسري لميكعد راحة
اكلة بس وكت لمصلحة يعرفونة
يكلي لا بيت عمي
من عمة لعماك وعمة امك على هلخلفة
يحسدوني عندي ولد
ميدرن نفعة بس للمسعدات
سدتة ماما بوجها
وتصفك ايد بأيد
حسيت بحجم لكارثة الي تسببت بيها لنفسي ولأهلي
يوم ثاني طلعو ابوي وعمامي وولدهم وولد عمام ابوي وشيخ لعشيرة وثنين شيوخ سادة وناس ماخذيهم واسطة خير
نهار كامل كضينا بلخوف
بليل رجعو
دخلو عمامي وولدهم للأستقبال بابا وزياد وعمو ابو زياد ماوياهم
طبت امي بخوف تسأل بيهم
رد عليها عمي لجبير
_تخربط لرجال من ورة عملة بتج وزياد لشفية
واخذنا للمستشفى ينزل ضغطة ويتحسن ويطلعو
_ندارت علية تلوم وتعض اصبع ودموعها تتجارة
رجعت تسأل بيهم
_شصار ماصار شكلولكم
_عمي رادو ياكلونا لوما لعالم لخيرة لماخذيهم وكفو بعينهم
لناس لساكنة عدهم كرابتها من بعيد
وجود لمرية ببيتنا اثبت علينا التهمة
وهسة همة يحكَونا بأنو احنة دايسين بيتهم ورامين ثنين من فلحهم وراعبين نسوانهم وخاطفين لمرة وكل هلمدة ضاميها
برجفة ودموع وخوف جنت احجي
_بس قيصر هوة الي ماخذها للمرية وويا بعد اصدقائة واكيد همة الي رامين فلحهم
ولمرية بنفسها هم اكدت هذا لشي وكالت قيصر اخذني وكالي تنتضرين بلقيس تجي وتساعدج
_ لمرة سألوها نكرت وتكول لاشفت قويصر ولا اكو هيج حجي
_اكيد هددوها انت ماشفتهم شلون سحلوها وهي تصرخ وتتوسل بينا نخلصها
_يكولون ماكو شي يثبت لأن همة ماشايفين اي واحد من لجاين ملثمين كلهم
ويكولون نخاف نتهم بيت ابو خليل بهيج تهمة
بدون دليل
لضاهر يخافون من جدهم
-شلون هسة لعد
لمصيبة مايخلونة نروح نستفسر من اهل قيصر
ونكللهم ابنكم ورطنة ونطلب منهم يتدخلون ويساعدونة
جبيرهم كال اذا توصل لسالفة لبيت ابو خليل بعد مالنة كعدة وياكم وسالفتنا نحلها بدم
وتالي ماصفيتو على شي
نحاول نحلها بفلوس بس الله اعلم شكد راح يطلبون
لخميس
ماقبلو نوصل وياهم لحل كالو ننتضر جبير فخذنا يجي علخميس ولكلمة كلمتة
بقينة بخوف وقلق على بابا
رجع ورة ساعتين
دخل لغرفتة وطلب من ماما ميشوف وجهي
طبيت للغرفة ابجي
المن الجأ ومنو يساعدني
تعال شوف حالي قيصر وشوف بيش ورطتني
عدة اليل علية ببجي وخوف ودعوات
علما اجة لخميس اني من لبجي وقلة لاكل ولنوم كمت امشي واطيح
راحو لخميس
ورجعو وجوه مكلبة ولغضب ماليها
لفهمتة ماما منهم
طالبيني بلأسم فصلية لواحد من لفلح الي مصوبي
لأن مسببيلة عاها ويكولون بعد محد تاخذة
وطالبين مبلغ يكسر لضهر لونبيع بيتنا وسيارة بابا منجيبة
وكعت فور سماعي كلامهم
فزيت بحضن ماما لشاكة لدشداشة وتلطم
بقيت ليوم كلة اني وماما نبجي
وابوي متخربط بلمستشفى
كمت على حيلي وركض للسماعة
من خطرت على بالي انعام
تذكرت مرة جبناها حجي على ضلتها يمهم وكالت اني باقية لاجل عمل انساني وسر قديم يخص شرف انسانة مجرد متضهر برائتها اطلع منا
ماعرف كأن رحمة ربي واستجابتة لدعائي اجتني بهيئة فكرة وصرت اربط.كلامها بكلام ام مهودر
دكيت ومثل لعادة يرفعون لسماعة ويبقة مشغول
بس مامليت ولا كليت
ساعة ٢ كلت خل اتصل بلكي واحد يجاوبني
دكيت
رد علية صوت وحدة تهمس
ها يمة
هاي انتي
سألتها انتي منو صوتها مسامعتة قبل
انة سلامة لا لا موسلامة
انتي منهي وشرايدة بهليل
حبابة حبابة ايا كان اسمج وايا كانت قرابتج الهم اترجاج ابوس ايدج عتبريها صدقة عن عمرج فدوة ساعديني
ياااع شمالج تتوسلين شمسوية من عملة
فدوة اني حياتي بخطر فدوة تساعديني
هسة غير تكول شلون اساعدها
باعي اريد منج تنطيني انعام لازم احجي وياها هسة
خاب انعام ولت من زماان وخلصنة منها
وين راحت وين
مشت وي صاحبها
منو صاحبها
واحد اسمة محمد
فدوة متكدرين تطلعليلي رقمة
خاب كسرتي خاطري وانة لاعرف اقرة ولا عرف اكتب شلون اطلعة الج
زين صيحيلي بسعاد تطلعلي لرقم
فرخ لدوج انة ماحجي وياها
فدوة حبابة الله يخليج الله ينطيج لعافية
بسج بسج شكلتي
هساع ادك لباب عليها مرتين اذا ماطلعت انة مالي غرض
نامت عليها سليمة كون كاضيتها نوم
عافت لسماعة وراحت تكعدها
واني ادعي
يارب ساعدني
يااارب
شوية ورفعت لسماعة وصوت بسعاد يرد علية
نسيت كلشي وعفت لعتب وعفت حتة لسلام ولسؤال عن حالها وطلبت منها تطلعلي رقم محمد
همست
ولج هية جانت حافضتة على كلبها مااعتقد مدونتة بلدفتر
دشوفي فدوة بلكي
بقت تكلب ووية كل ورقة تنكلب احس روحي تنشال وتنركع
يومين نطو مهلة لأهلي يسلموهم لفصل ويسلموني على طبق من فضة
يومين راح يقضن على حياتي كلها
صوتها من ردت اي اي هذا موجود
بس هذا موخط انعام
انعام خطها يخبل
هذا خط مرعبل
ولج اني وين وانتي وين
رديلي لرقم عجلي
ردتة الي بعدها تريد تسلم وتحجي
سديتة
وبساع فريت لأرقام
دكيت هواي
ماحصلت جواب
فجرية جنت نايمة يم لتلفون
بلأحرى كاعدة وبس عيوني مغمضات من لتعب
رن
فزيت مرعوبة
رديت بساع
صوت مرة جبيرة بلعمر
الو منو يمة داكين علينا هواي
خالة فدوة اريد محمد مسالة حياة او موت
اسمع ضربة صدرها
يممة خيير
فدوة خالة محتاجة منة رقم تلفون
راحت تكعدة وتاخرت
اكثر من عشر دقايق يلله رد علية صوتة بتثاقل ويتثاوب
منو
مومهم تعرف منو فدوة اني اقارب انعام ومحتاجتها بشغلة ضرورية اريد رقمها
اي اقارب انعام ماعدها اي احد بلعراق
اقاربها من بعيد
بقة يحقق وياي وكوة نطاني لرقم
سديتة منة
دكيت مرتين ورد صوتها
اي صوتها
.
.
.
الو منو
انعام موجودة
بلقيس هاي انتي
اي انعام اني بلقيس
ياعمري شلونج
موزينة انعام
شكو خيرج شبي صوتج منين جبتي رقمي
مصيبة يا انعام مصيبة
ولج شنو هي احجي
ماكدر لازم نتشاوف
شنتشاوف ولج تخبلتي
لازم تجين انعام بس انتي تخلصيني من لموت
ولج ياموت احجي فهميني وبطلي بجي
انعام
ورة مارحت من لبيت اهلي بمدة اتصل بية قيصر بليل بوقت متأخر
جان بوضع موطبيعي
صوت رمي يمة وصراخ نسوان
حاولت افهم شبي ماحجة كلي بساع دوني لعنوان
وطلب مني اتاني ثاني يوم لحد اليل اذا مارجع اتصل بية اروح للعنوان لنطا الي والكة امانة هناك واخذها
دقيقية من خابرج جان يوم خميس وصدفت ماطرة؟
اي اي من اجينة جانت كاعهم طين ولكيعان غركانة
يعني نفس ليوم الي ختفة بي وتصوب كملي
اي وراها ختفة وصارلة راح يصير اربع اشهر ماصحة ولمرة اجو اهلها رمو علينة
بلقيس:- بقيت احجيلها افهمها وهية متفاجأة
كملت شرح بأختصار وتوسلت الها تساعدني وكلتلها
انتي مرة سولفتي على سر
اكيد يخص هاي لمرة
انعام:- اي فعلا يخصها
هاي لمرة هي لوحيدة لتعرف ببرائة ام غضنفر وعدها دليل اعتقد
بس قيصر يكول مختفية جانت ومن يسأل عنها يصيحون علي ومحد يرضة يجاوب
ناس تكلة ماتت وناس تكلة نهزمت ورة موتتة امك
انعام:- بقة عقلي يربط
وتوصلت لأنو قيصر بيوم الي ختفة وتصوب جان رايح الها ولضاهر رامين علي ومصوبي
بس منو ذولة وليش اخذها منهم بلقوة ماطول لمرة مطاوعتة وقابلة تجي ويا
صوتها يترجاني علسماعة
فدوة تعاي واحجيلهم وشهدي حتة تخلصيني
تعالي لجدو ابو خليل وفهمي هوة انسان حقاني اكيد مراح يسكت
دموعي تنزل واتذكر كلام قيصر من ترجاني ابقة وكلي اريدج تكونين موجودة من افضحهم واوصل لعمة امي
لان غضنفر،لو عرف نفسة كاتل امنة ضلم مستحيل يطلع منها
شلون اجي وافضح لمضموم وغضنفر شنو ممكن يسوي لوعرف امة بريئة واني مو يمة حتة اداوي جرحة واعينة
جنت نقطة ضعفة
لو رحت وعرف بية مخطوبة راح اكونلة سجينة خاصر وحمل ينضاف لحملة
صوتي يرد عليها بدموع رغم متمنية اروح واشوفا
بلقيس مااكدر صعبة تدرين بطلعتي شكد نسألت وشكد واكفة علشباك اتراجف من لخوف
تدرين لو جافصة بكلمة وحدة جان كشفوني وجان رحت بخبر كان
ولج اني طالعة بأوراق مو اوراقي تفهمين لو نلزمت وعرفوني منو وين اروح
الحك بابا وداعتج
احنة طلعنة من لموت بمعجزة شتسولفين انتي
اني اذا رجعت هسة ونكشفت معناها احكم على نفسي بلموت هم تزوير وهم معارضة
اتصل بيهم وافهمهم بلتلفون واشهد
ميفيد لأتصال طالبين شهود يحلفون علقران
صعبة بلقيس اعتذر منج
ولج انعام تعوفيني اروح فصلية
اموت والله اموت مااتحمل
ليش اختج مو راحت فصلية وطلع خوش ادمي وصانها يجوز يطلع مثل صميدع ولزواج قسمة ونصيب
لاء مااكدر
اني مومثل بسعاد
ليش متكدرين
لأن لأن
ماكدرت احجيها
شكللها واني نفسي مامصدكة اكو بشر يحب بهيج مدة قياسية وبدون ميكون اكو تواصل
انعام فدوة
ترضيها على نفسج
حطي نفسج بمكاني
ياريت بيدي شي
جيتي صعبة
ولتردي مني اصعب ولج يفتح دفاتر ممكن تتسبب بموت ناس واذا نسألت بلحدود عن سبب جيتي شكول وشحجي
ولج اذا رجعو سألوني عن نفس لأسماء لسألوني عليها قبل وجاوبت اجوبة مختلفة معناها اني بعداد لموتى
انتي ليش خايفة انعام اوراقج اصولية لتنسين جدو ابو خليل مكانتة شنو اكيد هيج امور متعصى علي واكيد من وعد ابوج يطلعج اكيد ضمن هلشي بكل لوسائل لممكنة حتة يوفي بوعدة
مااكدر بلقيس اخاف مااكدر اجازف
ماشي انعام
خلفلة عليج
_
سدت لخط وصوتها يعذب بية ليوم كلة
للعصر بعد ماكدرت
تذكرت نفسي من جنت عدهم
وجنت اتوسل بليسوة ولميسوة حتة يساعدني
كلبي رق وصوتها ورجائها احس قطع نياطة
رحت على امي
بخوف صارحتها وادية على وجهي منتضرة ردة فعلها بهيئة راشدي أو كفخة
فاجئتني من كالت
ماشي
ترحين بس بشرط
تخيلتها تستهزأ بية
قبل متكليلي شرطج اشو مخايفة علية
متخافين بلجوازات انكشف
لاء مااخاف ابو خليل يعرف شغلة كلش زين
سبق وان طلع ابوج من محكومية ١٣ سنة بداية ل٨٢ جنتو جهال حكمو بتهمة لتبعية خالط اوراق وطلعة بمنتهى لسهولة ولحد قبل لانتفاضة ابوج سجلة نضيفة رغم علي لعين وكل خطوة يخطوها جانو يعرفونها ويومية مغير مكاننة ورغم ذلك ماشالو عينهم عننة لحد ماصار لصار،
واذا حسيتي بخوف بس طلبي تحجين ويا بلتلفون هوة يتصرف
كملت شرطها لتعجيزي
تاخذين محمد وياج
دموعي نزلت فهمت غايتها من هلشي شنو
ليش ماما هيج تسوين بية ليييش
صوتها بحزم وصياح
اني ام واجبي احميج
احميج من اي شي يسبب اذاج
حتة لو كانت نفسسسسسج
جنت لابسة جومسوت شتائي مستور جريت حجابي وطلعت
بقيت اهرول بكل قوتي
ردت مساحة فارغة
ردت اصرخ
ردت اكسر
ردت اضرب نفسي بلكي تصحا
نفسي لخايفة تروحلهم وية محمد
خايفة اكسر اخر امل باقي
وكفت بساحة اشبه بلجزرة
جريت نفس عميق
ولأنثى لبداخلي بدت تخطط
اكو ثأر لكلبي
اكو غصة عشتها اريد اعيشلهيا
حب أو غضب مااعرف
بس الي اعرفة اني قتنعت اخذ محمد
اكو حسرة بداخلي لليوم
ليش ماكلي
ليش ماعترف بحبة
اريد اشوف ردة فعلة من يشوف محمد وياي
اريدة يشرب من نفس لكاس
وقتها تبقة لكرامة يبقة لمكابر لو ينكسر
رجعت للبيت قررت اروح واحجيلهم عن كلشي ولو سألو عن سبب خطف قيصر للمرة وافتعالة هاي لمشكلة
اكللهم يريد يندل قبر والدتة
لأن اتذر كشمش كالت ميندلون وين مدفونة خافين قبرها عنهم
طبيت
كلتلها ماما موافقة
وبفرح اتصلت بمحمد ونطتة خبر
ماعرف شنو بقت تحجي ويا
فهمت هوة ديرفض اروح ويكللها لتورط نفسها وخايف علية ومن هلباب
لبست تجي وياي
ولطريق كلة توصي
يومين الج موااكثر
بس تتأخرين تعرفين شسوي
حصلنا طيارة ثاني يوم لفجر
فيزت ورجعنا
لميت ملابس بسيطة
وتانيت ورة لعشة اخذت خالتي ام منصور ورحت على سوق بسيط
ماعرف ليش ردت اخذ صوغة
اخذت خاتم الة جان بي شذرة كلش حلوة لونها اخضر على صفار
واخذت لبيبي شكرية ولأم فدعم عطر
ولزوري ثوب مال بيت مرتب ومستور
واخذت لكشمش ساعة
رغم ادري ماراح اشوفها بس تمنيت يجي يوم وتوصلها صوغتي
مانمت
ساعة بل٤ طلعت من لبيت
وياي ماما ومنصور
بقو يمي الى ان ختمت وركبت
بعد ٣ محطات وتعب نمت وفزيت
حطت طيارتي بعمان جانت لدنية فجر ستوة لوكت كاشف
ومناك جان لازم اركب اكو سيارات كبار واكو سيارات خصوصي زغار
فضلت لخصوصي اسرع واريح
اجرت وية عائلة رجال وزوجتة و٢ اطفال
بقو لطريق كلة يزعجون بية ولبنية إلة تكعد بحضني حتة تباوع من لجامة
تحملت ازعاجهم وجنت استشيط والوم بروحي
لوراكبة سيارة جبيرة
جنت ستوني مستلمة راتبي
وبآخر فترة صرت ابقة ل٩ بليل زيدو اجري
علحدود نزلنا
سلمت جوزاي ولخوف متملكني واذكر كلام ماما من كالتلي بس يحجون وياج أو تلتمسين لتشكيك بكلامهم كليلهم يخابرولج على ابو خليل
اول سؤال نسألتة
شعندج طلعتي قبل ٥ اشهر
علاج سيدي
بس احنة عدنة معلومات عائلتج هناك
بلي سيدي عائلتي هم طلعو علمود علاج لوالدة مريضة واحنة عدنا وراثة بهذا لمرض
وليش انتي راجعة وهمة مارجعو
اني راجعة علمود قريبتي احضر حفل زفافها وارجع
شنو هوة لعببببب يومية طابة طالعة
ولج انتي جدج مو جان محكوم ومات بلحببببببببس
صوتي يتراجف
سيدي اني قرابة عكَاب خليل لساعدي
معاون امر سجن لرضوانية ؟؟
بلي سيدي
دقيقة
لزم لتلفون ماعرف بيمن اتصل بقة يحجي
وراها سلمني جوازي وسأل شكد راح ابقة
سيدي بلزايد ٣ ايام
بتسامة نرسمت على وجها لجان يرعبني بتعابيرة وهمس
يابا نور لوطن بيكم ياهلا ياهلا
توجهت للسيارة برعب عيونهم علية جان خاتمبن وراكبين قبلي
نزلتنا لسيارة بكراج
ومناك اجرت تكسي لبيت محمد
جان ستوة لمغرب يجلجل
تمشيت بدربونتهم واني استنشق من كل بيت ريحة اكل شكل
وكبالي طفل تترصدلة امة تريدة يدخل ميقبل
تعض اصبع وتأشرلة
على طول لحدايق جان اكو زرع وورد يتدلى من لحيطان درابين بغداد
ريحة اهلنة
رغم مدة قصيرة بس احس مشتاقة وعيوني تاكل لشوارع
دكيت لباب
فتحها الي ابو بيداء
الي ستقبلني ببتسامة ساخرة مني يتصورني قشمر
ميعرف لو ماعندي غاية مااطب لبيتهم ولا اوصل
تلكوني هوة وياها
سلام وترحيب على عتب
مانكر شفت بعيونة شتياق
بس شي بداخلي كارهة
استغلاليتة وانانيتة خلتة يزغر بعيني ويتلاشة اي ود جانلة بكلبي
بتت يمهم ليلة اني بلصالة وهوة بلأستقبال
ماعرف شلون طلع علية لصبح
اسمع صوتها هي وزوجها بلغرفة وبدي انفجر
اذكر ماما جانت من يجي خطار هي تنام يم لنسوان وبابا ينام يم لزلم
فجرية رحت كعدتة
بدلنة وطلعنة بدون منكعدهم
سهرة لبارحة تكفيهم
وصلنة قريب لثنتين
دموعي نزلت مجرد ماشفت لبيت
جهالهم هرولو ليجوة يبلغوهم
لمراهقين بلعلو صوتهم يهلون ويرحبون
واكلو محمد بلسلام عبالك زلم
طلعن نسوانهم
زوري بكل حيلها تركض هية ودشداشتها علية
وتتبعها بسعاد كأن عدهن سباق
لحضنة لشمة
لدموع لتنزل من عيون بساعد كأن تشكيلي
كلشي ثار اشجاني وخلاني ابجي بدون انقطاع
صوت جدهم الي بعد ميعرف شلون يلبس نعالة
وهوة يم لباب يصيح حيهم حيهههم
عيوني عليها من طلعت مدنكة ضهرها وكوة تتقرب
وصوت نعناعة وراها
خاب انتي موش مريضة
تقرب جدهم تسالم وية محمد
وبيبي شكرية حييل تحضني وتشم بية وتهمس
يمة بت حلال مانستنا
يمة غزر زادنا بيح
وجهي على متنها وشفتة من طلع
بهدوء يتمشة وبتسامة على محيا
تقرب تسالم وية محمد وضرب جتف بجتف
سلامة لحار وترحيبة
دورتة علية من حط ايدة على راسة وهمس هلا خوية
دخلونة وصوت جدهم ليأشر
نحرو بساع ويختار من لحلال شي للذبح
محمد.بضحك يهمسلة
لاحجي احنة خاوين شيستوهن ذبايحكم حطولنا هلموجود
همستلة بخجل
هذا لذبح للعشة موهسة
صوت سللامة لتهمس لحدهن
خاب شمالة هذا ناكَل بطنة وجاينة
نداريت عليها
حدهن تكرص بيها وتتبسم بوجهي
حتة بسلامهن مسمومات
دخلنة جوة
بلأستقبال
بقو يسولفون ومحمد منطلق
شوية ومدو سفرة
تغدينا وكمت اغسل
جانن كلهن بلمطبخ يسولفن من دخلت سكتن
وكفت اغسل
جان بلباب يريد ياخذ لجاي
صوت حدهن تهمسلة بستفزاز
جا ماطرشت واحد من لفروخ من شوكت انت تجي تاخذ لجاي
رد عليها بنتر نطيني لجاي ومالج غرض
تقربت الي وهمست
هذا محمد جاي وياج شني معرسين انتم
نداريت عليها وبصوت عالي جاوبت
لا مخطوبين
_يا بيها لخير ان شاء الله
لايكين واحد علثاني
وندارت على سللامة
_ شخبار حملج سللامة
هاي جانت لضربة لقاضية
احس لكاونتر صار يهتز من ضغطة ادية
واني الطلعت منهم احس مضيعة
اني الي صارلي اشهر احن الهم
احس شي مني بقة يمهم
جن دافنة روحي يمهم
اني لجاية اغيضة بمحمد
صوتة ينتر بحدهن ونبرتة تغيرت لصياح
جيبي لجااااي
اخذة وراح
تمشيت للأستقبال
ستعجلت بفتح لموضوع حتة اعجل رحيلي واختصر على كلبي لضيم
بديت احجي ومحمد ينبص يشاركني لحديث
عيني علي
نتر بمحمد
خوية خلنة نفهم
ندار علية
كملي
من وصلت لسالفة تورط بلقيس واهلها
كلهم تخبلو
وجدهم دك صدر وكال هسة نلبس ونروح الهم
لوادم فوك ماحافضو على امانة ولدنة نوب يتورطون وبتهم تنضلم
وصوت غضنفر من كام على حيلة وكال
لا هاي لمانرضة بيها لو على حز لركَاب
محمد يكلي يلله كومي خل نروح
جاوبة جدو ابو خليل
لابوية ماتمشون اذا متكَضي ونفضها
انعام شاهد مانهدها الى ان نبري لوادم
لبسو وطلعو
ومحمد اخذو وياهم
رغم حسيتة ميريد يروح
بقيت يمهن
يسمن بية وبيبي شكرية تردهن
حدهن بصوت عالي تتعمد تسمعني
- هسة انتي بياشهر سللامة
وترد عليها وهي تمسح على بطنها
طبيت بلثالث
بيبي شكرية تهمس
عود هية ماتدري بيها بياشهر ام درب
نزلت لحنية ولاجنهن كبل يومين غاديات لحم
بقن يسولفن على قيصر وبيبي شكرية تبجي وتكلي ادعيلة يمة انتي بيج نور محمد
عصرية رجعو غضنفر ومحمد
كالو تمشين ويانة تحلفين علقران وتشهدين
اخذوني
ركبنا بلسيارة غضنفر يسوق
ماعرف ليش ردت اغيضة
بقيت اسولف وية محمد
وهوة مكيف نطلق وياي
لكاتلني برودة
برودة كأن يكلي نسيتج وكل لدتسوي ميهز مني شعرة
ليش اني نيران كَايدة وهوة ابرد من لجليد
برودة يستفزني اغيضة اكثر
نزلنة
دخلت
جانت لحديقة عبارة عن احذية ونعولة
لبيت زغير وموذاك لشي
بلصالة كعدوني ودخلو يمي ٣ زلم كبار وغضنفر واكف وراي
لزمت حجية لقران وخلت ايدي علي
واقسمت انو قيصر حاجيلي علمرية وكايلي ناوي يلكاها ومن زمان يدور عنها
ايدة حيل سحبتني وللمطبخ اخذني
طلعي خلصيني
ركبت لسيارة
محمد وين
معليج عوفي جوة بلكي يتعلم لمراجل شوية
ليش تحجي علي شبي موبعينك
ضحك ومارد
وصلني
نزلني ودخل
صوتة من صاح سللامة
جن غصة حشرت بزدومي
رجلية لمعاندتني ماترضة تدخل اريد اسمع شنو يكللها
طبيت جوة
بيبي شكرية بسعاد وام فدعم وزوري كلهن يسالن بية شصار ويسولفن
اني منفصلة
عقل ماضل براسي
لليل يلله اجو
كالو نحلت وجدو خليل كايللهم مالكم شغل بأهل بلقيس احنة نتحمل كلشي والي تأمرون بي حاضرين
طالبين فلوس على إعتبار محد ميت منهم
ولحجي كايللهم بضرف يومين هنة يمكم
دخل لغرفتة كدامي
لحكتة سللامة بساع
عيوني تلاحقهم
ماعرف شصارلي كلت لمحمد يلله خل نرجع هسة
ماقبلو وكالو متطلعون لحجي وصانة تباتون
شوية ورجع لحجي من لمستشفى
من لباب دخل مستبشر تقرب الي وباس راسي
ويصيح صلاوات على محمد
طبتكم خير علينا
من طبيتونا طبنا كل لخير
لدكتور يكول ليوم قويصر محرك ايدة مرتين
وكال هذا شي كلش زين
وبشرني كال منا ورايح نتوقع بأي وقت يصحا
دموعي نزلت فرح
باب غرفتة نفتح وطلع جان يلبس بفالينتة
تقرب لجدة بلفالينة ولصروال
ويسال بي
لتمست لفرحة بعيونة
واصر يروحلة يشوفة
جدة كالة تأخر لوقت باجر لصبح روح
راحو يم محمد
شوية وطلعت بوجها للحمام
سبحت وبدلت
وتعمدت تكعد يمنة وتمشط
رغم بببي شكرية مرتين صاحت بيها كلتلها لايدخل واحد من لويلاد طبي جوة بحجرتج
دخل هوة
كعد علدرج ويسولف وية بيبي شكرية ويضحك
فرشو لمحمد
كامت من مكانها وكعدت يمة علدرج
احس شي بصدري نخسف
بقو يسولفون واني اتصارع وية لنفس
سألت على محمد كلولي نام
كمت على حيلي مخنوكة مااكدر اريد لهوة
طلعت برة
ايد سحبتني بقوة
نداريت علي دموعي نزلن غدرني وضعفني وفضحن لبية
ملامح وجهة ممسوخة من لغضب
حيل عصر ايدي ونكتني ووجهة يتقرب الي وهمس من بين شفافة لجان عاضهن
ولج .....يتبع
لبارت خمس الاف كلمة ابهامي احس نفصل عن ايدي🥺 شوفوني تفاعل
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!