رواية خنجر الغضنفر الفصل الثاني والعشرون 22 - بقلم Hunen23Hatum

#خنجر_لغضنفر

#البارت_الثاني_والعشرون_٢٢

#حنين_حاتم

بلقيس ...

عصرية دك بابنة
بابا طالع وامي بغرفتها
ركضت افتح لباب
صاحت امي من جوة
بلقيس منو

محد ذولة جهال

فتحتلة لباب سلم علية وكال

بوية انة رحت لديرتهم تلاكيت وي جدهم وحجيتلة  شلون ضيفنا ابنهم ورحنة ويا نخطب
لرجال من عرف بية مضيف ولدهم اصر ابات وذبح وطبخو وماقصرو
بس كالولي قيصر سافر

سألت شنو لسبب
كال سافر علمود بنية يحبها وتحبة ولبنية مغتربة من زمان هي وعائلتها ولحكها حتة يرتبط بيها

اخر كلمات ماكملتهن عيوني كامت تغوش وحسيت نفسي راح اوكع

مشيت اريد ادخل و اتوجة على حيطان لبيت

صوت لحجي ابو صالح يصيح وراي

بوية بلقيس
بلقيييييس
بلقيس  إكَفي هاي امانة الج

جنت منهكة وخفت لا اوكع بلشارع حاولت بس ادخل للبيت تجاهلت صيحاتة
بس من كال امانة
نداريت وتقربت الة بلهفة تعدت كل لوصف
تمنيت تكون رسالة منة افهم بيها شنو لصار عقلي ممستوعب لسمعتة

ايدة نمدت بجيبة وطلع ورقة خلاها بيدي وكال بوية هاي لامانة نطاها الي ابنهم اسمة فدعم قيصر مأمنها عدة
ماسمعت لحجي لكالة وراها ردت بس اتناوش لباب واقراها

ورة لباب بلعتبة وكفت واقرة كلماتة بدموع منهمرة وحيل مهدود

منذ ان جفت اهوارنا و غادرت نوارسنا
شعرت ان حريتي قد سجنت بقفص صدري
وضاع حلمي الوحيد
في التحرر والتخلص من لخوف وعبودية السلطة
ضاع حلمي فحاولت ان اتشبه بهم
بطباعهم بقناعاتهم بعاداتهم
بإنتماء وروابط مزيفة
بشغفٍ مصطنع
ولكن الفشل كان حليفي
فأنا ها هنا بروح امي
لطالما شعرت اني اشبهها
تمنيت ان يكون حبنا قصةً افلاطونيةً لاتنتهي
وااسفااااه اصبحت غصةً لن تنتهي
لست مؤملاً اياكِ بهذه الأحرف فلأنانية ليست من طباعي
ولكن اردت ان تعرفي اني احببتك بقوة عضيمة وبنفس لقوة اجبرني قدري على التخلي
قدري منذ الأزل كان يرمي بأثقاله على قلبي المنهك
انا سليب لطفولة
انا يتيم حتى وجدتك 💔
سأخبرك سراً
لقد علق بكائي في حنجرتي
خوفا من ان يقرف احدهم من صوتي القبيح
حبيبتي إني اشفق على نفسي واشعر ان هذا البعد قاتلي
فلم يسلبوكِ مني  بل والله سلبوني قلبي ....حنين حاتم

دموعي تجري
صرخة تضج بصدري
ليشششش
منو
شلووون
شلون يكولون حبيت غيري وانت هذا حجيك
اسألمن عنك
مجتوفة ادين بحبك من يومي
ولك اني زامطت بيك زماااط
تالي تسافر،
ولك قيصر شحجي وشكول واهلي اول لشامتين بية

طبيت لغرفتي ابجي
عدت ايامي صعبة صعبببة بصعوبة حبنة
اني شجابني وشوداني الكم
اني شورطني بحبك شورطنيي
ليتني نايمة ومامجاوبة على اتصالك ليلتها

عدت ايام امي تطب وتطلع تسأل بية
ها شو بعد مابين لعاشق لولهان
شرد من اول مطب
تليفون ماكو من يوم لكسرتة امي
ضلت لوعتي بصدري مااكدر احجي
الى ان طيحتني بلفراش
سخنت ٤ ايام متواصلة
مستشفى قريبة ماكو جانو ياخذوني للمستوصف يومية
ويجيبولي ادوية من برة يكتبهن لدكتور
الم ببطني حتة لمي الي اشربة اتألم
صرت اطبك ٣ وجبات بوجبة وحدة
دكتورين رحت ماوكعو على علتي
يكلولي التهاب معوي
طول هلمدة اني مجازة واتكلب من بطني مثل لمسموم اليل بطولة ماانامة
وزني نزل ووجهي ذبل وصوفر
جنت واكفة علمغسلة وماما متجيتلي كوة اوكف على حيلي من المها ليل مع نهار
ندكت لباب راح بابا فتحها ودخل زياد صار بوجهي
دنك ودخل للاستقبال
شوية وصاحني بابا
طبيت سلمت
مارفع راسة رد لسلام وهوة مدنك
صوتة يهمسلي شلون صرتي

مارديت بابا رد علي

نفس لشي مدتتحسن اليل متنامة واكل ماكو

اشر لامي لبسو وامشو وياي لبغداد هناك دكاترة زينين يوكعون على علتها

امي ماجذبت خبر واني من لالم كمت شيكلولي مااحجي،بس،اريد اتحسن واخلص
لو يكلولي شربي نفط وتصيرين زينة ماجان ترددت

لبسنة واخذت امي شكم قطعة ملابس النة ورحنة ويا
وصلنة جانت دنية ليل
ماردنة نروح لبيتهم بابا كال نروح لوحدة من عماتي بس هوة اصر حييل واحرجنا

دخلنة للبيت بلاستقبال كاعدين فوك لنص ساعة محد طلع النة ولا شفنة احد

بابا حس ممرحب بوجودنا كال كومو
وية ماكمنة دخل عمو ومرتة
سلمو علينة وبعيونهم نضرات لشماتة ولتشفي كأن فرحانين بحالي
جنت لابسة جبة سودة مال ماما جبيرة علية ومبهذلة وشال شامرتة شمر ونعالي مال لبيت
لالم الي عشتة خلال ايام خلاني اكره كلشي ومالي خلك كلشي

بتنة بلاستقبال
اليل كلة جنت اون من لألم
ماما تغفة وترجع تكعدلي
وبابا غافي تعبان
فجرية حسيت لألم لايطاق

طلعت بلحديقة كعدت
عيوني للسمة وابجي
ربي رحمتك وعفوك ورضاك
مارايدة غير صحتي
تعبت يارب تعبببت
بس رايدة اخلص من لألم

نفتحت باب لشارع ودخل بيدة علاكة ريوك جان لابس دشداشة بيضة عرفتة راجع من لجامع

صبح علية وتقرب

كاعدة من وكت ليوم ؟

ليش اني نمت اصلا

هانت ان شاء الله تعاي تريكي

مااكدر اكل كلشي

دخل للمطبخ سلق بيض وخدر جاي جابلي ستكان جاي

اخذت رشفتين وعفتة
ماكدرت اكملة
صوتة يهمس،الي

شحالج صايرة

ليش احس اهلك شمتانين بية
بس لا انت هم مثلهم

عيب عليج لو شمتان مااتعنة واجيج
بلقيس اني ماانكر امي تكرهج ولا انكر ابوية على كلبها بس اني غير عنهم
اني من لزغر احبكم
جنت اشرد من بيتنا واجي يمكم

غمضت عيوني وتذكرت من جنة نلعب بلحديقة سوة
واخواتة ويانة

صوتة يهمس الي
موهين علية حالج وكل يوم اتصل بدوام عمو اسالة عليج
صح ماصارت لقسمة بس تبقين بت عمي عرضي وحسوبة علية ولمفروض قبل كل لناس اني يمكم بمحنتكم

تسلم زياد طول عمرك صاحب واجب

اسلم ؟
لا والله جني مااسلم ولا تعديتها لليوم

مافهمت اول بلأحرى حاولت اغبي نفسي

طول ليوم امة تسمم بينة بكلامها ومنيتها حتة على اللكمة الي تحطها النة
بابا كال بس نشوف لطبيب وبوجهنا للبيت

عصرية لبسنة ورحنة
سولفت حالتي للدكتور
سوالي فحوصات وسونار
طلعنة من عيادة لسونار رجعنة لعيادة لطبيب مسافة عنها
من شاف لسونار نفتحن عيونة وبذهول همس
يا الله دخيلك
بساع سحب اوراقة وقلم
ويهمس لبابا وين جنتو لبنية مرارتها راح تنفجر
باسرررع وقت عملية لازم
تكتلها اذا نفجرت

بدون ميفهمنا كلشي حولنا للمستشفى عملية

طول لطريق جنت ابجي وخايفة
امي وزياد وبابا وجوههم مخطوفة
دخلنة لمستشفى
جانت دنية لمغرب
اطلع لدكتور الي محوليني علي على اوراقي وكال ساعة ٨ عمليتج

بلموت عدة علية هذا لوقت دخلت صالة لعمليات مااكدر حتة امشي من لهبطة
على كرسي متحرك دخلوني
نسبة نجاح لعملية ٦٥ %
ودعت عيون بابا وماما لدامعة
وزياد الي يروح ويرجع هرج لمستشفى

تمددت علسدية
دموعي تتجارة
تعال شوف حالي قيصر
هم تحس بلي جاي يصيرلي
صوتي يهمس للبنية ليمي جانت تحضر بلأدوات ومنتضرة لدكتور

بتوسل همست الها حبابة اريد ورقة وقلم

شلج بيهن

اريد اكتب بيهن كلام اني خايفة اموت

منين اجيبلج

حبابة اترجاح

طلعت جابلتلي ورقة باص فارغة وقلم من جيبها

ادية ترجف ودموعي تتجارة واصابعي الترجف تخط لوعتي وحركة كلبي
اشتياقي وحنيني الي ماغادرني واني على فراش لموت

قيصر اني بعد لحضات راح اكون بين ادين ربي
اني مشتاقتلك والله
وداعة امي بهللحضات تمنيت اسمع صوتك من كل كلبي
اني خيبتي ولوعتي عليك راح تكتلني
اني لو متت انت لسبب
اني شبابي ضاع بهلحب
اني لاشفت ولا تهنيت كسرت اهلي وكسرت نفسي علمودك
تالي تجازيني بهجر

مابقة مكان بلباص اكتب طبكتة ونطيتة الها
بتوسل لزمت ايدها
حبابة لو متت نطي لاهلي عتبريها وصية ميت ووصليها الهم

لزمت اوراقي
قرت اسمي وكالت ان شاء الله
ليش تفاولين على نفسج

وهية تحجي دخلو ثنين دكاترة
جكة بأيدي وصوت يهمس شنو اسمج

بلقيس

شكد عمرج يابلقيس

حسيت شي صعد من رجلية لباقي جسمي تشنجن مااكدر احركهن
عيوني تغوش ولساني يثكل

صوتة يهمس

متزوجة

بلقيس تسمعيني

غمضت وبعد ماسمعت شي

صوت حجي اهلي
بقيت اكثر من نص ساعة افز وارجع اغفة
فتحت عيوني امي وابوي وزياد وعماتي ثنين

صوت ماما تهمس الي
لحمد لله على سلامتج ماما شسويتي بينة

تقربو الي يسلمون ويتحمدون لسلامة
بس هوة جان واكف برة لغرفة

ماسلم علية ولا تحمدلي لسلامة
اجة لدكتور جيكني وشاف وضعي
بتت ليلتها اني وماما
يوم ثاني لصبح اجو علينة بابا وزياد
بعد صارت رجعتنة صعبة لازم ابقة الى ان اطيب
زياد حسيتة مو نفس مااجينة
بس رغم هذا ماقبل بطلعتنة من لبيت
بابا كال نروح يم وحدة من عماتي
زياد ماقبل وكالة عيب شنو ترحون عد لنسابة
وعمو هم ماقبل

بقينة يمهم حسيت مرت عمو تغيرت شوية بتعاملها
زياد ميطب للبيت غير وقت لنوم
من تحسنت شوية كلت لبابا خل نروح
ورحنة حتة قبل ماا ارفع لخياط
يوم ثاني بابا من داوم ورجع كال زياد متصل بي وكايم يحجي علي ولايمة ومعاتبة على طلعتنا

عدن شكم يوم شلت لخياط صارت حركتي سهلة وتحسنت وتشافيت

حمدت الله بدل لمرة الف نتها لوجع وخلصت

ورة ايام بدة عندي صداع بجزؤ من راسي وينزل على خدي وركبتي،
كان لالم يستمر ايام
خلصت كل لمسكنات الي بل صيدلية وماكو نتيجة
رحت للدكتور شخصني وكال صداع نصفي
وبديت رحلة مؤلمة وية لصداع لنصفي
كرهت بيها نفسي ووصلت مرحلة لياس
جنت من كثر لألم افتر بلغرفة واركع راسي بلحيطان
نسيت لتفكير شنو
ايام اني على هلحالة اشد راسي وافتر بلبيت كلسا اركع راسي بشي
بابا يجيبلي ابر مسكنة يلله شوية اتحسن

رجعت من لدوام اني وبابا
دخلنة تفاجأنة ببيت عمو كلهم يمنة حتة لبنات
ميعاد وميادة متزوجات بلحلة ماخذات ولد خوالهن
سلمت علكل
ودخلت لغرفتي ابدل
بقو يمنة لليل زياد لا تقرب الي ولا دار بينا اي حديث
بليل علساس يرحون
طلعنة وراهم بلبستان واكفين كلنا وهمة ناس تسلم ونلس،تسولف

تقربت الي مرت عمو وسألتني

اكو هنا خضرة

اشرتلها
هناك بابا زارع

تعالي وياي اريد اشلعلي شوية ازرعة بحديقتنا

تمشيت وياها بتعدنة بلقدر الي لانسمعهم ولايسمعونة

لزمت ايدي تتلفت وهمست الي بمقت وتشفي

هااا راسج يوجعج موو
وبعد شكم يوم راح يرجع وجع بطنج
والله لاعلعلج مثل ماعلعلتي وحيدي وخليتي،لاهوة بسمة ولا هوة بكاع كره سيرة لزواج من وراج

هاي شدتحجين عمة

الي سمعتي حبيبة
والله لأسكطج واخليج برجليج تجين تتوسلي ياخذج

شقصدج ؟؟

كل لديصيرلج بفعل فاعل واني الي دااسوي
وماعتقج اذا متاخذين زياد وانتي بنفسج تطلبين منة يجي،يخطبج

ضحكت ضحكة استفزازية وهمست الها بنفس النبرة التحجي بيها
سمعيني هاي،سوالف لسحر اني مااؤمن بيها
اعرف ربي هوة لمسؤل عن عبادة وعندي ايمان قوي بي وهذا حجيج نكعي وشربي مية
ترة اني موغبية
انتي لو فعلا وراء امراضي
ولو فعلا تردين بهلشي تجبريني على زياد
جان سويتي سحر محبة وخليتيني اجي راكعة
هلسوالف ميعبرن علية

ضحكت وتهمسلي بحدية ونبرة غضب
لا حبيبة اني ماريدج تحبي وتوافقين علي عن رغبة
اني،اريد تاخذي مجبرة
اني اريد الوي ذراعج واخليج تجي مكسورة عين وغصب

عافتني ومشت
تقربت مصدومة ماعرف شنو الي منعني احجي
يمكن لان جنت ممقتنعة بكلامها
ومااؤمن بهلسوالف

ورة ايام قليلة وكعت ابجي واصرخ الم ببطني
رحت للطبيب ولتشخيص جان فتق ريح
هنا صدكت ان هي فعلا ورة هلشي
لزمت ماما وبابا حجيت الهم
كالو لازم نواجههم

اتصل بيهم وطلب يجون تحججو بشغل ودوام
كالو علجمعة
لأربعاء جانت عمليتي
وللمرة لثانية طبيت صالة عمليات
واني بين ادين ربي دعيت بحركة عليها
وكتلة ربي اريدك تفجعها مثل مافجعتني بصحتي
نجحت عمليتي وطلعت ثاني يوم
لجمعة اجو بس زياد ماوياهم كالو عندة شغل

ماما  وبابا واجهوها
لو هية نفتحت علينا وتعد وتصف صياح صياح وعمو صف وياها ويكل لبابا
انت جايبنا لبيتك علمود تهيننا
نكرت واصرت على لانكار
وتهمتني بانو اني ارتكب عليها
واخر شي سوتة كامت تبجي وتصرخ وشكت ثوبها
بابا كام وطلع
وعمو لملم عبايتها واخذها وطلع زعلان ويحجي على امي وعلية

يوم ثاني رجع بابا من لدوام كال زياد خابرني ويعاتب
وممصدك ابد وحيل مقهور وماخذ على خاطرة

بس بابا مدتشوف زياد متغير هلفترة مومثل قبل

بعد مااعرف بابا
هوة حيل مقهور وعتب وكال
اني ادري امي متحبكم بس متوصل بيها لهيج شي
وامي اول من فرح بفسخ خطوبتنا اني وبلقيس يعني مستحيل تسوي شي علمود نرجع

عدت مدة تشافيت بس الم راسي ميفاركني،
تعبت للحد الي صرت مثل لمسودنة
امي تهبد يومية جاراتنا ماخذاتها لناس متخصصين بهلأمور وتجيب ماي واوراق وبخورات
بس صرف فلوس كلشي مشفت
لاتحسنت ولاتغير شي

ورة ايام سائت حالتي كلش
كمت اكوم واطيح
بابا تخبل خابرهم وتعارك وياهم وكلب لدنية
وكال لعمو بنتي اذا صارلها شي اني احملكم كافة لمسؤلية

وراها صرت طريحة لفراش
سكنت لمستشفى بس نفس يصعد وينزل وعلمغذي
ايام عدت علية اني فاقدة
لا احجي لا اكل
مايوجعني شي بس احس ماعندي طاقة لكلشي
احس طاقتي خلصت وروحي جاي تطلع مني علبطيء

ماما فقدت بجي ودك ولطم
تبوس بادين لدكاترة تكللهم صحوها
مرتين غيرو لمستشفى واكثر من قسم يومية يحولوني على قسم ويتغير تشخيص لاطباء وتحاليل واشعة وفحوصات
كل لأطباء لمختصين اكدو انو جسمي صحيح وماعندي اي مشكلة
حولوني على طبيب نفسي
رجلية ماجانن يشيلني ابد
وادية مااكدر اتحكم بيهن مثل لمفصولات عن جسمي
ايام جنت اغيب عنهم ومااعرف شيصير ميصير
بس احس على جكات لابر وادين امي الي تغسل وجهي وتخلي لقران على راسي
واليل كلة تقرة ايات

زياد اكثر من مرة اجاني بس ماادري من اكعد يكلولي
وراها بدت تطلع بجسمي طكع زرك وبنفسجي جبيرة كل طكعة حجمها ٥ سنتمترات واكثر وحب ناعم ياكل بجسمي ويحفرة
بهلمرحلة اني فقدت تماما وغبت عن وعيي

ماعرف شنو لصارر
صحيت مثل لحلمان اصررخ

بيومها لدكتور طلب من اهلي يطلعوني من لمستشفى لأن كل فحوصاتي وتحاليالي سليمة

طلعوني للبيت

بهلوقت امي جانت متصلة بمرة عمو من لجوارين ومتوسلتها ومترجيتها تكف شرها عني

موافقة بشرط انو اخذ زياد
بابا جان بلدوام من رجع امي حاجيتلة
كلب لدنية بلصياح
اتصل بعمو تعارك ويا وتجاوز علي
عمي ممنطي بيها ابد وسادة بوجها

اهلي وصلو مرحلة من جزعهم وخوفهم علية
وافقو على شرطها
واتصلت بيها امي وبلغتها بموافقتنا
جنت اصحا كم ساعة وارجع انام
وراها تحسنت
صرت احس بلحوالية
اسمع لاصوات من يحجون
نطقت لأول مرة
فزيت من لنوم مخروعة من كابوس طول هلفترة لكوابيس ماعافتني
فزيت واصرخ بكل قوتي ماماااااااا لحكيني
امي وابوية جانو جوة جربايتي ينامون بلكاع
فزو يبجون من لفرح
دموعهم وهمة يبوسون بية
وصوتهم ليرتفع لرب لسماء بلشكر لأن سمعو صوتي
هاي جانت  بشائر شفائي
وراها تذوقت عصير بطيخ لاول مرة دخل شي معدتي بعد مدة طويلة
اجة زياد بطلب من بابا وبيومها عقدولي
بلاحول مني ولاقوة
جنت خايفة ارجع انتكس ردت لخلاص من وضعي بكل وسيلة وياسي من قيصر خلاني ماالي كل حيلة
ولا الي عين ارفض بعد
خوفي على اهلي موعلية
بابا شرط على زياد نعيش ببيت وحدنا
وهوة وافق

ونتهت رحلة حبنة قبل ماتبدي اصلا
حاولت اتناسا قيصر
بهلوقت جانت صحتي على كدي
جنت طول لوقت متمددة بفراشي تحسنت بس مارجعت نفس قبل
بقيت من اقل شي اتعب وكل فترة يغمى علية بدون سبب
صداع الي براسي صارت تخف نوباتة
يعني بلشهر،مرة او مرتين
زياد طول هلفترة يتردد علينا
مثل كل بنية اتمنة من يطب جايب بأيدة شي
اتمنة يجيبلي هدية يجيب فاكها من يجي على لأقل
اجان يجي فارغ ويروح فارغ

صبحية نايمة بفراشي وطبت ماما علية وكالتلي

بيت ام ميثاق دازين ابنهم بكولون اكو وحدة غلتلفون تريدج اسمهة انعام

لبست ورحت الهم
امي اصرت تجي وياي
بقت هية بلمطبخ تسولف وية امهم
واني عفتها طبيت للاستقبال طلعت لرقم ودكيت عليهم
جان رقم من داخل لعراق
دكيتة وبداخلي اتسائل شجابها للعراق

صوتها يهمس
بلقيس شلونج شخبارج

شلوني انعام هه يااخبار

شبيج عيوني خيرج

صفنت على حلي شحجيلها وششرح
ختصرت وضعي بكوني مريضة وتعبانة

انتي وين

اني بلعراق
تزوجنة اني وغضنفر قبل مدة

همست بغصة علخير عيوني الله يسعدكم

ويسعدج حبيبة

قيصر شلونة

مانعرف اخبارة ولاعدنة رقم تلفون الة
من سافر نكطعت اخبارة
بس جدو ابو خليل يعرف اخبارة من ناس ويكول بخير وكلشي مابي
وغضنفر هسة جاي يسعا ويحاول يتواصل ويا
لو عرفت اخبارة اكلج

لا ميحتاج تكليلي

لويش

لان بعد ميعنيلي شي اني مرة مخطوبة

ليش موسمعنة فسختي ؟.

لا موصحيح اني مافسخت على شنو افسخ ليش اكو من يستاهل
اني وصلت لموت مرتين وهوة بكل سهولة نسحب من حياتي وعافني بلوسط لا اكدر اتقدم ولا اكدر ارجع

شنو لصاير احسج مو ذيج بلقيس

لصار بية ميتسولف انعام
خليني بلوعتي ماعاولت انسا

احجيلي ليش تخليني بقلق عليج

همست بغصة اشرح لصارلي بأيجاز

اسمع صوتها بلسماعة حيل على وجها تضرب وتهمس
سودة بوجهي
ولج بلقيس كل هذا صاير وياج

هذا لاشيء من لعشتة ولشفتة

بدموع  تهمس الي لحمد لله على سلامتج
اسأل الله ان يعوضج بزياد ويسعدج

سلمت وسدتة
وبداخلي غصة تهمس،يعوضني بزياد
مااعتقد ..............

انعام....

سديت لخط واني اصرخ على بسعاد
لواكفة كبالي تبجي بعد ماسمعت صوت بلقيس وحجيها لكطع كلبي
ولج كل هذا صاير بأختج وانتي اخر من يعلم

واني  شبيدي يادادة
مااكدر اتصل بيها غير بليل ورة ل١٢ اتصل بلناس اوعيهم من نومهم واسالهم عليها
اهلي بهلوقت نايمين ولناس يستحون يدكون لباب عليهم حتة يصيحوها الي واحجي وياها
وسللامة حطت دابها ودابي تراقب بية وبس تشوفني اتقرب للتلفون تركض تكل لجدي
هااا لعد بس بسعاد تتصل باهلها
هي غضنفر محرم عليها تتصل بأهلها من يوم سوايتها من تخابرهم بلبسكوت وتكللهم مااخذني لسا

اووووف لو صحت لقيصر فرصة بيوم ورجع ولكاها متزوجة شنو ممكن يصير بي
ماكافي خسارتة لصوتة ورجلة ليعرج منها

بقيت طول ليوم مهمومة عليها
غضنفر ماشفتة هوة وجدو ولولد ناس يمهم بلديوان
لليل يله دخلو
وبطبتهم طبت عمة امريكا وزوري وتهاني يتعللن يمنة كل فترة يجن
كاعدين بلصالة كل احنة ملتمين حوالين صوبة بيبي شكرية لفوجيكا وبسعاد تكلي عليها حب وتكلب بي بيدها كلسا تنجوي

اني كاعدة وبصفي ام فدعم
سللامة كاعدة كبالي هي وابنها
من دخلت الهم ماجانت تحط مكياج ابد
بس من تزوجنة وكمت احط شي بسيط لكوني عروس
كامت هي تتكحل وتخلي حمرة وباورد

صوت بيبي شكرية تهمس
جغلودة اللحم ملونة هليوم
بس زوري وبسعاد فتهمن كامن يضحكن بصوت عالي
هية عاينت الهن ودارت وجها

دخلو صميدع وفدعم وجدو وغضنفر
شفت بشائر لفرح بوجه جدو تقرب كعد واشرلي
تعاي بوية
رحت يمة كعدني بصفة وهمس
انة ليوم اريد اسوي شي ومن كل خاطري
انة حاب اهدي انعام واحد من بساتين لباجلة
عبن هلوجه لسمح من طبت النا واحنة طبنا كل لخير
وانة مجربها هاي مو اول مرة تطبلنا وتجيب لخير وياها
بذيج طبتها قيصر،بنفس ليوم حرك ايدة مرتين ووراها بفترة صحا
وهلمرة طبتها النا بيها كل لخير حقنت بحيرة دم جانت راح تصير بين ويلاد لعم وتمتد لأحفادهم
وتحرك لاخضر وليابس

غضنفر بصفي كعد ويهمس الي
عاد انة الليلة يلوحني من هذا الخير لو مامش

كتمت لضحكة ونداريت على جدو
شكرتة
جدو اني اشكرك على كلامك لحلو يجوز فعلا طبتي خير ويجوز هذا الي كاتبة الله
بس اني تعذرني لبستان ماااكدر اخذة
عتبرة وصل

يااااع ترديني ؟
مايرد لجريم إلة لبخيل

صوت غضنفر يهمس الي
عيب تردين جدي شكري وسكتي

سويت مثل ماكالي
بقينة نسولف لاحضت وجه نعناعة تغير من قبلت بلبستان

صوت فدعم يهمس يكسر لصمت الي صار

اكلجن انة جوعان
مااكلت بلعشة
ندار على تهاني يهمس
كومي سويلي اكل

ايدها على راسها تفرك بي وتكلة مالي غرض

هااا مو اعنجرلج لصفحة لثانية

ياااع وحكَ الله اشكيك عد جدي

ابو خليل .:- شمالة هذا وياج

فدعم بضحك :- لا جدي مابية شي
كام ويهمس الها
اروح للحبيب

لحكتة للمطبخ
تعال راح اسويلك والله

ماريد لاخلفة الله عليج

لاتروح فدوة اسويلك اسويلك

فدعم:- اضوكَ

تهاني:- اي ضوك وصيح لجدي هم خل ياكل وياك هوة يحب هاي لمخلمة

تردين اصيح جدي يضوك لا هايهية

فدعم:- نداريت على غضنفر الي تقرب لتهاني ومن جيبة طلع فلوس خلاهن بيدها

تهاني:- يااع شني هاي خوية مااخذ وحك الله

مثل مازوري اخذت انتي هم حالج من حالها

اخذتهن من  ايدة وتقربت تريد تشبكة

غضنفر يعاين الي ويضحك يدري بية اتسودن عليها من غيرتي

همس الها وخري ولج

ياااع طني  احبك شمالك

حبي لحايط اذا مصررة

فدعم :-  صميت ايدي اجيت اضربها ختلت بسد لثلاجة
تقربت لغضنفر همستلة

ذكرني من نعرس اشك راسها بلحبّيب على عمايلها

انعام:- بقو يمنة تعللو ووراها اخذهم فدعم وداهم

كلمن دخل لغرفتة

صعدت ووراي دخل غضنفر واني علدرج اسمع صوت صراخ نعناعة من غرفتها
ياخير بطبنة من طبببت
ابني واحفادي لتطشروووو
هذا هوة لخير
على يامال تطيها واحد من لبساتين

صوتة يهمس الها
نعناعة هودي شمالج

غضنفر يضحك ويكلي اويلي راح تتسودن

دخلت للغرفة وهوة بقة بلصالة يدخن
جنت كاعدة بلكاع اكوي بملابسها
تقرب كعد يمي
يعاين الي ويهمس،

هلأدين لترفات هم يطلع منهن شغل

لعد شعبالك

راح تمدد علجرباية
واني اعلك بلملابس شفت بنطرون مدحوس بينهن

سحبتة اجة بيدي
جان لونة زيتوني وبي نطاق
اخذتة واجيت يمة

غضنفر هذا شنو

صفن للحضات وراها كال

هذا مال فدعم

شيسوي عندك

مادري يمكن لبنات من سفطن ملابسي هنا جايباتة بلغلط

غضنفر للمرة لمليون اسألك شنو شغلك

ليش احس هذا لسؤال ماخذ،حيز جبير بتفيرج

فعلا ماخذ حيز بتفكيري
ممكن تجاوبني بدون لف ودوران

طفي لضوة وتعاي اجاوبج

طفيتة بكل سذاجة واجيت متوقعا راح يحجيلي

ايدة للفراش سحبتني وهمس
انتي تشككين بية وعلى هلعملة لازم تتعاقبين

غضنفر احجي صدك

بلله عليج منو كالج انة اتغشمر

احجيلي شنو شغلك

ارتوي واحجيلج

وليش موهسة

هسة انة فكري مشغول خل يصفة واحجيلج

وشلون يصفة

تعاي انة اكلج شلون يصفا

غضنفففففر بلا هلكلام واحجي

صوتتتتتج لاتعلي

لعد احجيلي ليش تتهرب ليش احسك تخاف من هذا لسؤال وتحاول تغير لموضوع كل مرة

انة اخاف ؟
من شني اخاف
منج ؟؟

انة حبيتج وبحبج نعتيت من ياختي
ليش تستغلين حبي
هذا ضعفي كدامج لتحسبينا خوف
اوعدنج بعد ماتشوفينا للموت

ايدة سحبت ايدي بكل قوة

ومن لكنتور سحب عباية ذبها على راسي وهمس
امشي

وين

مارد علية

سحبني
نزلنة لدرج

علكيف فتح لبيبان وطلعنة واني كلسا اسأل
وين ماخذني غضنفر،

ركبنة لسيارة

مشت وبتعدنة عن لبيت بديت اخاف

صحت علي

وين تريد بية

ندار علية وهمس

موتردين تعرفين شغلي

نداريت علجامة وسكتت

بقت لسيارة تمشي الى ان عبرنا ديارهم

طلعت علتبليط

وكف وهمسلي نزلي

نزلت وكفنة كبال....يتبع
لبارت كتبتة بدون واهس
اريد اشوف تعليقات حلوة تسويلي واهس حتة استمر صرت بس بدي اخلصها اكتب بدون واهس 😭