رواية خنجر الغضنفر الفصل الثاني والأربعون 42 - بقلم Hunen23Hatum

#خنجر_الغضنفر

#بارت_٤٢

#حنين_حاتم

انعام
تقرب الي سحبني من ايدي وبقة يلوم  شلون هيج اطب عليهم واصيح
دفعتة واني اصرخ واملخ بخدودي
شضام علية احجي
احجييييي
اني كلبي مامرتاح من يوم شفت البنطرون لليوم
احجي لا اموت روحي

اي موترديني احجي تعاي بحجرتنا ونحجي

ماتتحرك منا احجي احجيلييي

ماعندي شي وحكَ الله بس جدي خايف علية من لوادم لتطلبني ثارات
عبن هسة راحت لحكومة وراحت وياها سلطتنا وصيتنا لجان مسكت لوادم ويخافون منة

غضنفر اني موطفلة وتضحك علية بهلحجي
احجي لصدك
كلي شنو شغلك كافي تجذب علية

ولج شمجذب عليج اروح ببدلة العمل المدهنة وارد بيها بعد بشني مجذب عليج
ليش ماعندج ثقة بية
سنين عشتي وياي وبأقل موقف تبيعين وتشكين بية وتحسسيني كأن عمرج ماعرفتيني

لعد ليش جدك مصر يشردك انت وفدعم بلذات

موبس احنة
كل لعايلة راح ننهزم مانضل هنا
جدي اول من ينضر بس هوة ماهامتة روحة يريد يطلعنة أول شي احنة
انعام انة موغريب عنج عشتي وياي كبل مااعرس عليج وتدرين بية شجنت
تعرفيني شلون جنت امد ايدي بزردوم لوادم واطلع حك ولد جليل موحبا بيهم
بس جنت متمني اموت بوحدة من عركاتي واخلص
وتالي وكت طلع مالهم كل حكَ عد لوادم وكل لجنة نسوي هوة باطل ولسبب همة وجذبهم ودهائهم
لوادم تسكت جانت تخاف من عمايلي ومن صيت جدي وفدعم
بس ضنج هسة لوادم راح تسكت ؟

خلاص لعد اذا ماعندك سبب غير هلشي  خل نطلع سوة
اتصل بأنغام واشوف بلكي هي ومنصور يدبرولنا فيز اذا ترهم ونطلع

جدة تقرب الي ودخل بلكلام

لابوية طلعتهم ماتتأخر يوم واحد هوة وفدعم عكب باجر لفجر ناطرتهم سيارة
يطلع غضنفر وفدعم ورا يطلع
بس يعبرون لحدود
احنة نطلع منا نروح يم وادمنا ببغداد هناك امنو النا كلشي وحضرولنا بيت يئوينا وسيارة جوة ادينا
نطلع منا بسكوت بليل ونعوف كلشي حتة سياراتنا نعوفها خاطر محد يشك ولا ننلزم منهن

جدو دخيلك ليش هيج تسوي
وين تريد تهزم غضنفر

يطلع للأردن هوة وفدعم مدة وكت بينما تهدأ لأوضاع ولعين تنشال من علينة
لوادم تخبلت يومية حاطيلهم واحد وكاتلي
ولسجن لجنت اشتغل بي انة كل لبي  تبعية وكرد
بسنة ل   طب علينة ....... بزيارة مفاجأة
وإنطا لمدير لمركز  امر مباشر بأعدام كل الي بلسجن
بيهم المحكوم سنة وسنتين وبيهم لمحوم عشرة وعشرين سنة وبيهم الي خلصانة محكوميتة وماضالة غير شهر وشهرين خاطر يطلع
انة ولمدير ولمعاون لثاني كلنالة سيدي ماترهم بيهم ناس ماضللها غير كم شهر وتطلع
جملتين حجيناهن وراها صار التهديد مباشر
واتهمنا بلعمالة والخيانة وتم تهديدنا
إما ننفذ الحكم الي صدر من عندة أو ينسفنا احنة وعوائلنا وحتة كَرابتنا بملف خوننة وعمالة 
المدير اصدر النا لامر بتنفيذ لحكم بصورة فورية ومباشرة بدون حتة منفهم شنو لأسباب
السجن جان بي غرف سرية بيها شخصيات جبيرة الها وزنها واسمها عد الشيعة
بيومها اجانة لأمر بأن نبدي بلغرف لسرية
قدمت استقالتي بيومها
وطلعت قبل ميتم تنفيذ الحكم ضدهم
مانقبلت استقالتي رفضوها وخيروني بين انو استمر بوضيفتي وملفي نضيف وامارس صلاحياتي حالي حال الباقين
وبين انو يقيلوني بملف فساد وعمالة واخذ جزائي
خيروني بين موتي وموت عائلتي وبين انو ننفذ حكم تصفية السجن من كل الي بي
معاون لآمر  لثاني الي برتبتي حاول يتمرد بلكي ينزلون رتبتة أو ينقلو
كلشي مافاد انتهى بية المطاف واني اددعي المرض وارقد بلمستشفى كذب
وتم تنفيذ الاعدام بحق ٧٥% من الي موجودين بلسجن
وتم اعدامهم واني كنت من ضمن اللجنة الي مدرجة اسمائها بتنفيذ الحكم
بس الله يشهد اني ماحضرت ولا وقعت
والله ليعلم اني ماجنت راضي وبعد تنفيذ الحكم بأيام قدمت على التقاعد وكعدت بلبيت
كل ملفات الفساد وملفات السجون صارت تنباع بمريدي بفلاسين وكل لأسماء المذكورة بيها
كامت تتطبق بحقهم عمليات تصفية
واحنة ادينا ملطخة بدم المجاتيل
انة مالكم غرض بية لمهم ائمن طلعتكم كلكم ووراها اطلع انة
اموت اعيش مايهم خذيت حكَي من هلدنية وزايد
ويم الله لقصاص
إن جنة ضلام مضلومين يم الله الحساب
بس هسة لازم اطلع لويلاد وتالي اطلعكم ناس ورة ناس

جدو هاي شدتحجي

حجيتلج نقطة ببحر يبوج وغضنفر طللابتة هواي لازم يطلع هوة وفدعم باسرع وقت

صميدع شمعنا ميطلع وياهم؟

يطلع كلنا نطلع
بس ذولة ابدا
لازم يطلعون كَبل لكل
انة ماريدهم يضلون عبن ماياخذون حجاية ويتصرفون من كيفهم دومهم
مااكدر اخليهم انة اخاف بتهورهم وتسرعهم نضيع كل احنة ومانسلم حتة علنسوان
هذا غضنفر شوفة عينج يصيح ويستريح يكلي مااطلع وشيصير خل يصير
وفدعم يكلي لزلمة خل يجرب يوصل لهنا إلة اردة بضهر ابو
وعلى هللرنة واحد يرفع واحد يكبس انة اريد اخلص منهم
وانة بكل هدوء ائمن حياة الكل

بقيت مدنكة ودموعي تجري اذبة على راسة يوكع على رجلي
ماادري لخلل بية واني فعلا ممنطيتة ثقة مثل مديكول لو هوة الي ديثير شكي ومديقنعني
عدة اليل علينة نلم بملابسة واحتياجاتنا الأساسية ونسوي كليجة وخبز ونضم
نخاف لاننحصر لو نضطر ننهزم بمكان مقطوع
علبيبان والشبابيك  دكو نايلون قوي كل لبيوت ليمنة
اليل منامنة كلة شغل وتحضير
مرتين صار رمي واطلاق نار بلملعب القريب علينة
بيبي رغم ماتشوف بس ضلت تلوب ليلية
ليلة الي قررو ينهزمون بيها
ماجنت راضية على طلعة غضنفر
يومين اني مااحجي ويا واتهرب منة رغم شكد حاول يحجي وياي
فجرية جنت كاعدة الم بجنطتة ملابسة وعلى كل ثوب سفطتة ذرفت دموع وحضنتة لصدري وتمتمت بأدعية مابيدي غيرها
جهالي يفترون يمي يبجون على بجيي
دخل يمي
تقرب الي ثنى رجلة وكعد
ايدة على وجهي مسح دموعي حيل سحب راسي لصدرة

كافي ولج انة ماراضي اطلع ونوب اشوف دموعج هاي
بس شبيدي
ضلتي هنا تضركم

اخذنا وياك

مااكدر صعبة احنة ماراح نطلع بسيارة
احنة نص لدرب منا راح نمشي مشي الى ان نعبر المحافظة
وماادري اذا راح نعيش لو نموت
شلون اجازف بيكم

دنكت ابجي فرفحت
عافني وطلع

شوية وسمعت صوت صياح جدة وعمامة وحتة لولد
مديت راسي من المحجر
اسمعة يتصايح وية جدة يكلة مااطلع
خل يجون ياخذوني
مااطلع بلية مرتي وجهالي حتة حمزة ماعوفة

ستمرو يصيحون علي ويتعاركون
نختمت بكعدة جدة على لقنفة وهوة يلزم كلبة

عافهم وطلع وججايتة مااطلع بدون مرتي وجهالي
نزلت جوة اريد الحكة احاجي
كلهم كبو بوجهي يكلولي جان قانع كوة قنعنا وركدنا
من صعد فوك يمج نزل متخبل
جدو ينتر بية
انتي متخافين على رجلج
خنجرة هذا الي يحطة جوة راسة ليلية مايحمي
ولا وكتنا مثل ذاك لوكت حتة اكدر انة احمي
خلي يطلع واحنة نلحكة بس خل لاوضاع تهدا
كلهم توجهولي باصابع لأتهام حتة كشمش تكلي اذا صار علي شي انتي لسبب

صعدت لغرفتي ابجي
مااعرف شتصرف ميتة خوف
لا اكدر اكلة روح
اخاف ينلزم لو ينكتل ويموت
ولا اكدر اكلة ضل اخاف ضلتة بيها موتتة وموتنا
نتها بية التفكير واني احجي ويا بباب المطبخ بعد مالحكو لولد وكوة جابو
مسحت دموعي واني مدنكة راسي كتلة
اطلع اني قابلة بطلعتك ومحالل وموهوب
جرني حيل حضنني
صوتة يتمتم الي بحسرة
وحك الله ماعوفنكم
وحكَ الله بس تعبرون لبغداد اخلي جدي يدزكم الي
انة موهاين علية
ولا راضي اعوفنكم بس ضلتي هنا تضركم
اذا نلزمت وانة بنصكم مايرحموكم حتة انتو
ياخذون لكل بذنبي
وانة ذنبي جبيير

دنكنت لدموع تجري وحسرة ترست صدري
وبداخلي صوت يصرخ
ياخوفي من ذنبك

حضنني حييل ويهمس الي
ديري بالج على روحج والجهال
انة امنتج عدهم ومادري شلون راح اطلع واعوفنكم انة طالع خاطر اضمن طلعتكم بسللامة
انة لوطلعت وياكم احتمال تموتون من وراي
وحك الله هذا الي خلاني اطلع
لاتضنين خايف على روحي
انة خايف عليكم مني
حيل باس راسي ويهمس الي
ديري بالج على روحج ياروح روحي انتي
وعدتج مااسوي اي شي يرملج ولا ييتم جهالنة
وانة عد وعدي كل ذيج السنين حاط روحي بشيشة لخاطرج
لخاطرج انة ستحليت لحياة بعد ماجنت مخاوي الموت
لخاطرج انة عفت كلشي
بس ماضنيت هلساعة جاية
ولاضنيت بيوم راح اعوفج وتفترك دروبنا
سامحيني
الله يشهد انج جنتيلي ام واخت
ورديتي ماي وجهي وهيبتي
وبعشرتج انة عرفت شنهي الحياة
سامحيني وثقي ماطلعت منا إلة من خوفي عليكم
مارديت كلشي ضليت بس دموع تجري ومدنكة
بقة يسكت بية ويحضنني كدامهم
تقرب يم اذاني همس
لبارحة بليل ضلت حسرة بكلبي احضنج واتوسد فراشج
صوت بجيي تعالة
ايدة على كتفي وحيل عصر زندي
احلفج بلله كافي تعذبيني
والله كوة علية طالع

دنك حضن منة ضل بلربع ساعة حاضنها ويشم بيها ويبوس
هدها دنك على قسوِّرة الي مجلب بثوبي

مجرد ماهدها اخذها منة فدعم حيل حضنها وطلع بيها برة
بكل قوتة عاصرها لصدرة ويحاجيها
اي واحد يأذيج كليلة من يرد عمو فدعم يفصم ضهرك
من ارد سولفيلي على سواياتهم
راح اشتريلج لعابات وثياب حلوة مثل عيونج اليخبلن
ماعرف شنو يتمتم الها ويهمسلها
طب ذبها بلكاع ويضحك ويكلي
ديري بالج عليها انة متانيها تكبر واعرسها بيدي
ههههه هوة هذا حضي اربيهن فروخ واتاني كبرتهن وتالي ياخذوهن الفايخين
ندار على لجهال يهدد بيهم
وحك الله الي يضربها لو يجر كصايبها لذهب لو مايلعبها ويا ارد وافصم ضهرة
وبصوت عالي يحجي بكل جدية ماكأن طفلة
الي يعيل بمننة عايل بية
والي يعيل بية اردة بضهر ابو

غضنفر مدنك يمها بلكاع ويحاجيها
وهية ماتت من البجي تبوس بديهم وتحضن بيهم من رجليهم كان مرة جبيرة تحجي وياهم
ديرو بيالكم على روحكم
احنة نتانيكم
بابا دير بالك على عمو فدعم هوة مامعرس وانة ضامة بدلتي لعرسة

يطلعون ليبرة وتلحكهم تصرخ وتبجي وتودع بيهم

طلع فدعم ليبرة زت غضنفر وراح غضنفر يتمشا بين لزرع الي ان يوصل للمكان الي تنتضرة بي لسيارة وياخذو جماعة جدو

لليل احنة نبجي ونتلاطم ننتضر منهم اتصال يبلغونة بوصولهم بأمان
اروح وارجع بمكاني
واندعي
صوت صرختي بداخلي محبوس
يا ابو عبد الله اني غريبة وانت غريب
اني يتيمة وانت تدري نحرمت من كل سند
لاتحرمني منة
خلي خيمة لأطفالة
لخاطر اطفالة ماريدهم يتيتمون مثلي

بليل تحديدا لساعة ب١٢ كل احنة بغرفنا الي نايم والي مثل حالي جافا لنوم
ندكت لباب نزلنا كل احنة
نعاين فدعم وغضنفر ثنينهم طبو علينا

جدو كام يدك على راسة شرجععععكم ولكم انة ماعاولت اطلعكم

فدعم صفك ايد بايد وياشر على غضنفر الي ركض علجهال يبوس بيهم ويحضن

_غضنفر رجعنة عبرنة بغداد وكال مااكدر
انة مااكدر اعوف مرتي وجهالي
يمعود عدل بدل كال اببد
رجعوني اخذهم وياي واطلع
لونموت سوة لو نعيش سوة

دموعي تجري ليش هيج سويت

مااكدرت وحك الله ماكدرت
شلون ائمن روحي وانتو ماادري عنكم شحالكم
مورجال الي يعوف اهلة يواجهون مصير مجهول ويامن روحة

بقو يلومون بي وجدو تخربط
كعد على لقنفة ادي على راسة
بصوت عالي كام يصيح
خليهم يموتوني
ياحياة هاي الي اعيشنها واعوفنكم هنا ماادري شراح يصير بيكم
انة لوحدي مااطلع
ومااطلع كبل ماأمن طلعة لنسوان
ماائمن روحي اذا ماائمن لنسوان والجهال

بقو محتارين
جدو فجرية قنعه دزه كاللة روح كدامنا لبغداد 
وفدعم يطلع وراك يجيبهم  بسيارة
وانة ادز لنسوان والفروخ وية عمك رحيل وصميدع
وانة وعمك اسماعيل نجي تالي
اقتنع يروح لأن يخاف يبقة ويانة وينلزم وهوة ويانة ونتأذة احنة لنسوان والجهال بسببة

طلع فجرية على عمات عينة راح وفدعم على اساس يلحكة ورة ساعتين
طلع وهوة يوصي بجدي ويكلة للضهر اذا مااجيتو انة ارد لهنا

طلعو وبقينة جوة كل احنة
عمو اسماعيل طلع يجيبلنة سيارات من معارفة
كالو نطلع بأكثر من سيارة
خوفهم جان من لناس الي بداخل محافظتنا مجرد ميعبرون المحافظة يأمنون

رجع عمو اسماعيل ورة ساعة مامحصل غير سيارة وحدة  من معارفة
طلع جدو يهبد متلثم هوة وفدعم
شوية ورجع لوحدة كال كلها تختلت
يخافون محد يرضة ينيطنا سيارة
فدعم رايح على جماعة قريبين علينا وكال هسة يجي

بعدة يحجي صوت طلق برا
والي ماجان بلحسبان انو همة جانو متانين اللحضة المناسبة
محد بلبيت غير عمو رحيل واسماعيل وصميدع
عتلة صوت الطلق شي خيال رمي على لبيت
ركضو حبسونة بغرفة لجوة لدرج جدو مريض وتعبان خافو علي حبسو هم ويانة
وطلعو اسلحتهم وناس ركضت للسطح ناس من لشبابيك
بلغرفة متحاضنين كل احنة نتباجة ونندعي ولجهال تتصارخ
ولرمي معتلك
الي برة كأن جيش وهد علينا
الرمي شي خيال
الى ان خلصت اسلحتهم لولد
وسكت سلاحهم واحد ورة لثاني
ركضو كدام لغرفة لمحبوسين بيها احنة وكفو
كل واحد لازملة شي بيدة
وكفو كدامها يحمونا
دقايق ودخلو علينا للبيت
بيبي ركضت على لباب تكللهم خل ياخذوني ويعوفوهم
لحضات مرن علينا حلم
جدو يلوب كوة مجلبين بي يريد يطلع الهم
بقو برة يتضاربون وياهم نسمع صوت مصايح لولد  وهمة يكلولهم نسواننة جوة
متطبون الهن
صوت صياحهم عتلة
صوت صراخهم طلعو غضنفر وابو خليل طلعو لشيبة طلعوووو
وينننة
جدو هد روحة من عدنة عت روحة عن وطلع الهم
ركضنة كل احنة ليبرة نتباجة ونتوسل بيهم
مارحمو صراخ لأطفال ولابجي لنسوان
كدام عيننا رمو  جدو طلقتين براسة ووكع بلكاع
صراخ عمامهم وهمة يعتون بروحهم ومجلبين بيهم مشبكينهم كل واحد لازمي ثنين
لغريبة انو لاملثمين ولامتنكرين
نتصارخ على جدو ونتباجة
ماكتفو بقتلة
بسيارتة لواكفة برة ربطو من رجلة بحبل ومشو بلسيارة وسحلو
بوضح النهار،
فرو لمنطقة كلها واحنة بلشارع نتصارخ ونركض ورة لسيارة مثل لمخابيل نسوان وجهال
وجسمة بلكاع ينسحب ويتملخ
مارحمونة ولارحمو شيبتة بلكاع سحلو وبس لعجاجة ورا ولدة وصميدع كل واحد يرفس بصفحة ويضربون بيهم

دخلونة  ليجوة كل احنة واخذو عمو رحيل واسماعيل وصميدع
ماندري وين
بلبيت ضلينة نتلاطم ونتصارخ
ورة اكثر من ساعة دخل فدعم من لباب يركض يلهث ويصرخ شكو شصاير
جلبن بي بيبيتة وامة كلنلة بساع انهزم بين لزرع لتخلي احد يشوفك
والي ماجنة ندري بي
انو اكو ٣ متخفين بلزرع برة منتضري
ومجرد مادخل فدعم دخلو علينة
سلاحة بيدة  وصاح علينة شردن بساع من الخلفي
كلهن  صرخن مانطلع بدونك
بصياح نتر بيهن
طلعن طللللعن وانة راح احاول اشغلهم اكثر وكت ممكن بلزرع ختلن وطلعن ديرن بالجن على رواحجن
بعدة يصرخ
ندفرت لباب لخلفي وطبن علينا نسوان
بيدهن تواثي
يصيحن وينها مرتة وينهم فروخة
قسم بلله حسيت نفسي بحلم
جهالي لصدري ثنينهم
جنة مذهولين
فدعم ركض علية صار كدامي وكاللهم
محد الة شغل بمرتة وجهالة
بقة مأشر سلاحة عليهم وحاطنة ورة ضهرة

واحد منهم صاح علي من برة
دلينا بمكانة ونعوف مرتة وجهالة ونعوف لنسوان كلهن

كاللهم ماشي وتجاهل صراخنة وتوسلاتنا
طلع برة واخذو خالين سلاح براسة
بلكاع وكعنة نتصارخ ونبجي علي

فدعم:- اخذوني ادليهم بمكان غضنفر
غضنفر متانيني قريب على سيطرة برة المحافظة
اتصل بية من الضهر لأن تأخرنا مالحكنا
وكالي انة ضال هنا على حدود المحافظة الى ان تجيبهم الي
واذا تاخرتو انة اطب وشيصير خل يصير
طلعت مستعجل ردت اجيب سيارة واخذهم الة
ورديت لكيت لبيت خالي من الزلم
بس عبرنا لبساتين طالب سبك الهم جان واكف بسيارتة متانيني علساس اجيبهم وناخذهم لغضنفر انة ويا
كلتلهم وكفو لسيارة هذا يندل مكانة اكثر مني
بقة طالب يمشي ورانا
قريب على لسيطرة مسافة اكو محطة بانزين
نزلو يعبون منها
طالب سيارتة كدامهم بساع زرك وطلع
كدام سيارتهم جانن اكو مجموعة سيارات ووراهم هم
لايكدرون يتقدمون ولايرجعون
علما عبو بانزين ومشو طالب تقدمهم بمسافة
وصلنة للسيطرة جان طالب بسيارتة كدامنة وغضنفر متقدمنا هواي
طلعو اسلحتهم بس مالحكو بي

وكفو يم سيارة طالب راحو ثنين علي نزلو يضربون بي
حاولت اخلصة منهم
اخذو سيارتة وراحو بيها ورة غضنفر
ولباقين بقو يضربون بينا
تكاثرو علينا وبديهم اسلحة وتواثي
جنت خايف يكون حاجيلة كلشي ادري بي اذا درة راح يرجع واذا رجع ميرحمو
صاح وهمة يضربون بي يريد يطمني
ماحجيتلة شي بس كتلة اكو جماعة جايين عليك اشرد

بعد ماخوونة من الضرب
بلكاع على ركبنا خلونا وبسلاحهم وجهو علينا
طلعتة من جيبي
هذا الي لكيتة بعد سنيييين
هذا الي ضاع غضنفر من ورا وقيصر ضيع شبابة علمودة
عقد ام غضنفر على يسن
بلصدفة لكيتة ببيت اهل طالب
بمرة حجزو وحجزو سيارتة ودزني اجيبلة اوراق لسيارة لأن ناسيهن
امة جانت طالعة اختة فتحتلي لباب ماتعرف لأوراق ياهننة جابتلي جنطة بيها كل مستمسكاتهم
واني اكلب بيهن اجة لعقد بيدي
قريت اسمها لكامل وصورتها وراها اتضحلي انو لمرة لماتت ببيتهم هي نفسها ام مهودر
ماتت ومات لسر وياها
بس بقت هلورقة تثبت طهارة انسانة ماتت ضلم بضلم
جنت ضامة اريد انطي لقيصر
طلعتة من جيبي ونطيتة لطالب وكتلة
اذا عشت انت
امانة وصلة لقيصر أو اي احد من اهلي

غمضت عيوني وصحت حياك ياموت
ماضل لااهل لاحبيبة

طالب:- على رجلية رمو طلقة بلكاع وكعت لازمها واتمرغل بلرمل
نايم على وجهي وصوت ٦ طلقات وحدة ورة لثانية نرمن
اريد ارفع راسي مااكدر
بلرمل دفنت وجهي
رفعت راسي وصرخت ......يتبع
يأسفني ان ابلغكم
الى هنا نصل الى ختام الحزء الاول من القصة
وان شاء الله لنا عودة في الشهر الثاني من السنة القادمة
متابعيني لقداما يعرفوني ابدا مااقطع قصة ولا احب اسوي جزئين بس الله يشهد ايدي بدت تشكل صارلها اكثر من اسبوع تتشنج هواي لأن اضغط عليها واكتب بارت طويل بمدة قصيرة لهذا قررت اخذ فترة راحة وان شاء الله راجعين وبقوة بأحداث قوية وجديدة
اعتذر منكم اذا صدمكم هلخبر بس صدقا تعبت
اعتذر على كل مرة تأخرت بيها بلتنزيل واشكر لبنات الي جانو ينزلون رفيوهات ويتفاعلون
واشكر كل شخص التمسلي العذر باوقات تقصيري
لجزء لثاني يبدأ بلشهر لثاني بدايتة او نهايتة مااعرف من اقرر ابلغكم بلكروب
وان شاء الله مااقصر وياكم بلفترة لجاية كل مدة نفتح بث نسولف بي وانطيكم غشوشات تصبيرة من لمن يبدأ لجزء لثاني
ب١٢ راح انزللكم مجموعة فديوات بلكروب بيها غش عن الأحداث المستقبيلة انتضروها ليوم
الى الملتقى 🥰