#خنجر_الغضنفر
#الجزء_الثاني_بارت٦١
#حنين_حاتم
قيصر؛- طلعت من لبيت ولأوراق وياي ووياي صميدع بنفس لسيارة من اوصل قريب علمكان انزل من لسيارة و اكمل مشي وحدي
واني اسوق طالب اتصل بصميدع مااعرف شنو يحجي ويا سحب لجنطة من ورا ويريد يفتحها
نترت بي شجاي تسوي
يحجي ويا ويأشرلي صبر
فتحهة صور الأوراق سدة ويسأل بية شلون اكنك علرصيد
هسة وكتك انت
دك تلفوني جاوبت
صوت واحد منهم بنتر
انزل من لسيارة واركب بلسيارة الي بركن لبيت الي بابة احمر
تلفتت شفتة
نزلت ورحت عليها بيها واحد لاف وجهة بلفاف
مشت بية مسافة ونزلني
كملت مشي وكلسا يدكون علية من خط ويدخلوني بأفرع ضيقة وكلسا بفرع
حتة تيهت منين اجيت
ظباط منتشرين بلمكان لابسين مدني كمستطرقين ناس بسيارات وناس تمشي لعقيد وكف وكفة حلوة وكال ماعوفك
بس من بدو عبر لتلفون يفوتوني بأفرع ويكلولي اركض بكل سرعتك تيهتهم وتيهوني
لحد ماطلعت من فرع طلعني على شارع وساحة
ركزت لشارع نفسة الي اجيت منة بس بنهايتة
لغريبة انو لمكان الي حددو مكان شعبي ويعج بلبشر هلشي خلاني طول لوقت خايف
تقربت مشي مسافة بعيدة محدديلي لموقع يم عمود علي صور شخصية مرشحة للأنتخابات وكبالها محلات معزلة كلولي تحديدا توكف يمها
تلفوني دك باوعت طالب
ماجاوبتة
بقة يدك هواي وارفضة
اتمشة قريب اريد اوصل يم لصورة والمكان اتلفت مالمحت اي احد يوحي انو هوة منهم
دك تلفوني رقم غريب
رديت وجهوني لسطل زبالة فتحتة ببطنة علاكة بيضة بيها تلفون
كلولي اشمر مبايلي بلزبالة واتواصل وياهم من خلال لتلفون الي بلعلاكة
سويت مثل ماكالو
تمشيت مسافة بعيدة اكثر من ٣ ارباع لساعة اني امشي وكلسا يوجهوني لفرع
الى ان وصلت لمنطقة شبه مهجورة ووراها شوارع خارجية وخط سريع كلولي اوكف يمة
وكفت اكثر من ثلث ساعة انتظر اتصال منهم لا اكدر ارجع ولا اكدر اتقدم
تعبت واني انتظر
على وكفتي انتظر اتصالهم
واسمع صوت طالب وراي يهرول ويصيح اوكف قيصر اووووكف
نداريت معصب منة نترت بي انت شجابك وشكو لحكتني
سحل لجنطة من ايدي وجرني يسحل بية يكلي امشي
وين امشي طالب شبيك شارب شييي
امشي وياي بس خل نوخر منا واني افهمك
ولك شتفهمني ارجع لمكانك لاتعم علينة انة ماعاولت نوصل للتفاوض واسلمهم لأوراق
لأوراق هاي مو اصلية
انضحك عليك قيصر انت نحطيت طعععععم يردون يوصلون للأكبر منهم من خلالك
ولك هلي شجاي تحجيييي
حيل نفش الجنطة وطشر لأوراق ويشيل بيهن ويأشر ويقرا ذني مو اصليات وروح فدعم مو اصليات
صافن علي مصدوم
عينة صدت وراي وحيل جيت فوكي نام وبلكاع صرنة ثنينة
رمي اعتلك من بعيد من جهة محلات ثنين مال تبديل زيوت سيارات تقريبا بس هنة بلمكان
ولظباط المدنيين يرمون من سياراتهم الي لاحكين طالب بيها يحاولون يمنعو يوصل الي
متجاهلين وجودنا بلوسط مثل لجلاب بلكاع
مناوشات ناس على ناس الى ان انهزمو
تقربو النا بلسيارة نزل منها العميد وويا ثنين ظباط مدنيين
هجمت عليهم بدون وعي تمالخت وياهم
جنت منهار واصيح عليهم
هيج حياتي رخيصة ومستهينين بيييييية
لعد لو جايب لطفل شجان موقفي كدام امة
لعميد بقة يهدأ بية ويحلف انو لأوراق صحيحة ولخطة محبوكة ولخرق الي صار سببة طالب وتدخلة
طالب بأنهيار يصيح
لااااء لأوراق موصحيحة اني متأكد ١٠٠%
وانت شمدرييييك
ادري ادريييييي
شمدريك طالب لتخبلني
دنك وايدة على جبينة اني جنت اشتغل ويا بآخر فترة ونريد نوصل للي كتل بنتة ولمن عجز يوصل لراس خيط
صارحني بذني لأوراق
وبقاهن يمي مدة واعرف لبيهن وذني لأوراق الي منطيهن الك ميتطابقن وياهن بأي شي
محتواهن يختلف
وليش ماحجييييت
ماجنت ادري بس مساع سولفت لمسؤل حرس عرفتة من خلال غضنفر بقة يضحك كالي واضحة مثل عين لشمس دزو اخو طعم حتة يلزموهم
وهاي لأوراق ماطول صعدت لجهات عليا مستحيل بعد ينطوهن اكيد نطوهم اوراق غيرهن
اتصلت بصميدع سألتة على محتويات لأوراق
دزلي صورهن
بقيت اكلب بيهن اوراق عادية بعضها كتابة ايد
يختلفن اختلاف جذري عن لأوراق الأصلية
كتلة يفهمك
كال شفهم من عندة ترا نزل من لسيارة وبتعد عني مسافة ومامسموحلي اعبر هاي لمسافة لظباط منبهين علية
اني اجيت ورا كلت بلكي الحك عليك
ادك عليك متجاوب
جبت صميدع واجينة نهبد صارلنة اكثر من ساعة نفتر الي ان شفناك من بعيد
نداريت علي بصدمة وذهول وعتب
مع الأسف عليك امنتلك واجيت وياك مطمأن
وانت بكلب بارد هيج تسوي
بقة يبرر ويإكدلي انو لخطة جانت ماشية على اتم وجه وجانو رح يلزمونهم مجرد مايتقربون الي حتة ياخذون الجنطة وبهلشي يكونون ضربو عصفورين بحجر وصلو لمكان غضنفر وبنفس لوقت لأوراق تمشي ولأجرائات تتم ويخلصون لبلد من هلناس بس طالب هوة الي خرب كلشي
بقة يبرر ولآخر لحظة مصر انو لغلط من يمنة
لا وصار يذب اللوم علينة
ماطلعت منة كلمة اعتذار وحدة
اشر للشباب الي ويا كللهم وصلوهم بعد ماسيارتنا ننخلت بلطلق
لأن سووها حصن ووراها خاتلين ويرمون لكونها اقرب من سياراتهم
رحنة وياهم للبيت رجعونا
تمنيت تنكلب بية لسيارة ولا ارجع للبيت وحدي
وهنة ينتظرن جيتي ووياي غضنفر
نزلنة لجهال برا دخلو يصيحون اجو اجو
نفتحت لباب وكلهن بلحديقة يعاينن
صراخهن عتلة وانعام بلكاع اغمى عليها
مينطن فرصة احجي ولا يسمعن
الي شكت ثوبها والي تصرخ وتمشع شعرها
سديت لباب وصرت انتر بيهن
بسسسس بسسسسسسسسسسس
شبيجن شكو شصاير
فتهمتن شكووو
سكتن ويعاينن الي
لمكان الي نطو النة غلط ورجعنة
عمة امريكا بدموع لزمت قميصي وكالت
وهذا حالك شني
مني هيج سوا بيج
تضحك على عقولنة قيصر
غضنفر ماات احجي
ماامات والله مامات
ليش هوة هذا خبر ينضم مثلا
كوة هديتهن وسكتن وبطلن مصارخ
ندارن على انعام الي بلكاع والتهن يكعدن بيها
وعنها وليجوا دخلن يسألن بية علصار
مااعرف شجاوبهن
حجيت الهن مقتطفات وطلعت برا يم طالب احاول افهم منة واسأل بي عسا ولعل يعرف شي يكدر يساعدنا بي
بقة يحلف يكول كلشي مااعرف
هوا ضمهن يمي فترة وكالي اذا صارلي شي تسلمهن لشخص ونطاني رقمة وعنوانة
سألتة علشخص
نطاني اسمة وطلعلي رقمة من تلفونة
اتصلت بي حجيت ويا كتلة اني اخو غضنفر اريد اقابلك انكر معرفتة يغضنفر وسدة بوجهي
طالب اتصل بي من تلفونة
فتح مايك سلم وكلة اني واحد من حماية غضنفر وعندي بعد اوراق وجان موصيني اسلمهن الك
بسرعة طلب من عندة عنوان وكلة رح ادزلك واحد من لولد هسة
طالب رد علي بحزم
لا مستحيل اسلمهن لأي احد غيرك
هوة محرص علية اعذرني مااكدر انطيهن
مع لسلامة
قبل ميسدة كالة
لا لا اوكف لتسدة راح ادزلك عنوان تجيني علي واني استلمهن منك بنفسي
سدة بعد مااخذ لعنوان منة
عاينتلة بتساؤل
هاي شجاي تسوي طالب
هي ورطة ورطة خل نروح هسة ولو بلهدف لو بلنجف
يعني لكلام لكلتة الة موصح
يمعود كلشي ماعندي لا اوراق ولا غيرهن بس اريد التقي بي بلكي يقبل يساعدنا
ركبنا اني ويا ورحنة للمكان الي نطانة عنوانة
كهوة بمنطقة شعبية
اجة لوحدة
كعد يمنة رأسا سأل علأوراق طالب بلع ريك وهمسلة
ماجبتهن وياي
وليش ماجبتهن تلعب علية ولك
بنتر كالها وكام على حيلة يريد يروح
طالب لزمة وهمسلة بصوت ناصي
غضنفر نخطف صارلة فترة ولأوراق عند لعميد وميقل يسلمهن النة كلت بلكي انت تكدر تحلصهن النة وتساعدنا وشنو تريد احنة نسوي
ضحك وهز ايدة بأستهزاء وتقرب الة بنتر عصر ايدة وهمس
شوف ولك اذا تتصل بية بعد متلكة روحك غير بلسجن
وغضنفر هوة الي ذب روحة بهلتهلكة لتضل تنبش ترة تلحكة
عافنة ومشة
وطالب بعدة ماستسلم لحكة مااعرف شنو يحجي ويا
ماكدرت اتقرب لأن حرفيا جنت فاقد وصلت مرحلة مااسيطر على نفسي وهوة بحجية واستهزائة جان يلعب على اعصابي
بقة طالب يحجي ويا واتي كاعد ومن بعيد اعاين الهم
مشة وطالب لحكة للسيارة صعد يمة بلصدر
ماعرف شنو راواو بتلفونة
شوية ورجع فرحان
تقرب الي ويهمس نحلت
شلووون
هسة حجيت ويا ومليت ايدي منة
على شنو
سمعني بصمة واتساب بيها صوت غضنفر يحجي ويا ويكلة الملف يمي واذا متصدك رح اردلك شكم رقم من الأعداد المكتوبة علي ويردلة شكم رقم
وكال هذا لرقم موكامل
اذا جبتليا كامل بظرف يوم لأوراق يكونن يمك
اخاف يجذب علينة
لا ميجذب ترا هذا ايدة واصلة نسيبة يصير ......
يجيب لأوراق ويجيب اغاتهن
بس كلي لرقم منين نحصلة
ندور بغراضة ونسأل بلكي نكدر نحلصهن
بوجهنة رحنة لبيتة دورنا بي نفشنا نفش كلشي مالكينة
اتصلنة بحمايتة كلهم القديمين ولجدد سألناهم استفسرنا منهم ماعدهم اي معلومة
ساعة بل١ بليل رجعنة للبيت راد يروح ماخليتة
كتلة بات ولصباح رباح
فرشتلة يمي بلأستقبال
طلعت من جيبي سيم كالت وتلفون جبتهن واني راجع
دخلت لسيم كارت وخليت لمبايل علشحن
عفت يمة ستار وصميدع ودخلت جوا اشوفهن
جانن نايمات كلهن ولبيت اضلم بس غرفة غضنفر من جوا بابها ضوا طالع
كعدت بلمطبخ ادخن وصافن
شوية ونفتحت لغرفة وتقربت الي انعام بجادر لصلا
عاينت الها وجهة تعبان وعيونها وارمة
تقربت الي وهمست
قيصر عليك بروح فدعم اذا ميت كلي
انتن شبيجن
يعني هوة سر مثلا واضمة
بابا ماميت وحتلو ميت لاسامح الله اني ماعندي اي خبر ولا اعرف شي عنة لاشفتة ولا شفت احد
رمي ومناوشت هذا كل لشفتة
عاينت الي بيأس جرت حسرة ودارت وجههة ومشت تتعثر بلجادر طبت وسدت لباب
دخلت للأستقبال لولد نايمين بس طالب كاعد وغينة بتلفونة
تقربت تمددت بلفراش اسألة هواي تدور براسي
بديتها بسؤالة عن لسبب الي خلة غضنفر يشغلة ويا ويأمن هيج اوراق مهمة يمة
ندار علية كعد على حيلة تربع شغل جكارتة نفخ دخانة وكال
شوف خوية انة من ماتت لمرحومة بت اخوك وانة شايل حمل جبير على صدري احس روحي جنت لسبب بموتتها
صفنت متفاجأ وعقلي يجيب ويودي
شلون يعني مافهمت
بدة يحجيلي عن جارات الهم عدهن علاقة قوية بأمتنان ووحدة منهن عاشكتة موت ولان تشوفة يوصل امتنان للمدرسة وتشوفة مهتم بيها لكون فدعم موصي بيها متصورتة يحبها ومددتة بأنو اذا ميبتعد عن بأمتنان تضرة
من بدة يحجي بلأسماء صرت اربط بين حجية والكلام الجان مكتوب بدفتر مذكراتها وبخط ايدها
بديت اني اسأل بي واكلة هيج صار وهيج
وبدور حاولت تورط امتنان وتضرها هية ولظابط صاحبها
بقة يأيد كلامي ويسألني منين اعرف
سولفتلة علدفتر
دنك راسة وكال انة ماجذب عليك
صدك جنت احبها ورايد اخطبها خاطر احافظ عليها واتمم وصية صاحبي
وبدور جانت ناويتلها على نية كشرة وانة ضليت مربط كلشي مااكدر اسوي بس حاولت ابعدها عنها واقشمرها خاطر تعوفها
وفعلا بتعدت عنها
وبيوم جانت بدور جايتني للبيت
مااخفي عليك وانت اكيد تعرف بدور من ياملة
بيني وبينك ياخوية جانت تريد ذيج لسالفة مني بكل وسيلة وتذب روحها علية ذبابة
انة نوبة يغلبني لشيطان حالي حال كل شاب ونوبة اتعوذ بليس
بيومها جانت شاربة اضن
ضلت تبجي وتكلي انت متحبني وصوتها عالي وتذب روحها علية وتحضن وتبوس
لااكدر اتجاوب وياها وانة وواكف بباب بيتي ولا اكدر اعيط بيها شاربة اخاف كلشي يطلع منها تروح تصيح وتفضحني واختي جوا كاعدة تدرس
ضليت انطيها على مايها بس اريدها تولي
سمعت صوت خطوات مديت راسي من يم الحاجز لبيننا وبينهم شفتها خطفت راحت لبيتهم
وراها بأنهيار دفعت بدور وضربتها وطردتها بقت تهدد مااخذت كلامها بجدية ابد
ساعة فوك ال١ بليل وعينة على صراخ ام قسورو
جانت برا طلعنة ونشوف لمرحومة معلكة
من يومها وانة احمل روحي جزءجبير من الصار
والوم بنفسي
صافن علي وهوة يحجي
مدري شوكت صرت فوكة واخنك بي
واصيح علي
ليش ماحجيت لامها
ليش ماحجيت لمنصور جان همة تصرفو
اقلها جان شالو من المنطقة وتجفو شرهن
كوة انطق من ورا ادي الضاغطة على زردومي واحاول افهمة
ماكدرت احجيلهم والله ماكدرت
هي جانت تبجي وتترجاني مااجيب طاري الظابط ولا اجيب طاري تهديد بدون ووعدتني ماتروح يمها وصدك نفذت وعدها بس مااعرف شنو لوداها الهن بليلتها
بس يمكن لسبب اني
يمكن جانت تبادرني وتحبني ومن شافت بدور يمي شكت بشي ويمكن من راحت الها
تريد تستفسر منها وتعرف شنو لبيني وبينها
قيصر:- وتحجيها كدامي بانذل
ضاحك على عقل لطفلة وتبيع براسها حبجيات وخليتها تروح لبيت ل..... حتة تفهم شنو لبينك وبينهن
بهاي لطريقة جنت تصون امانة فدعم يانذذذذذذل
بمكان ماتسولف لأمها
بمكان متوعيها وتفهمها علي جان يصير وية بتها
وعلاقتها بأنسان جان ناوي يكسرها المستفاد الوحيد بدور الي مصاحبها ومسوي وياها علاقة
واني الي الوم بأمها لمسكينة وماكل كلبها
انت الملام الوحيييييييد
ماوعيت غير على ستار وصميدع يسحبون بية من فوكة وهوة يكح ومختنك
كعدت علقنفة مذهوووول
افكار هواي اجت على بالي وصرت اربط
اول فكرة جانت
انو ممكن يكون الظابط الي راد يغتصب امتنان هوة الي سوة بيهن هيج أو دز احد يأذيهن ويمكن هنة الي ستدرجن امتنان
أو يحوز فعلا راحت الهن من غيرتها تريد تفهم شنو لبين بدور وطالب
عقلي فصل صورتها تجي ببالي
نترت بي
بسلا سولفت هاي لشغلات لغضنفرررر
مدنك مايجاوبتي ولود نطو مي ويفركون بصدرة
كمت على حيلي تقربت الة
كاز على اسناني وكوة لازم روحي
للمرة لثانية اسألك حجيت هذا لحجي لغضنفر
سولفتلة على صخام الوجه
لاء لاء
مو اكول معقولة كتلة على سوايتك الخسيسة وية الطفلة وعافك تمشي بطولك
بس انة جانت غايتي احميها
اي وواضح
انت جانت غايتك تتونس ببدور وتقنع روحك انو هلشي علمود امتنان حتة متحس بلذنب
لوفعلا خايف عليها جان حجيت لأمها
وروح امي جنت خايف عليها وكل هذا سويتة علمودها
وروح فدعم وداعة خوتنا لماانساها للموت ماضميت على اهلها إلة من خوفي انو يأذوها او يبطلوها من لمدرسة
ولأن شفتها ابتعدت عن بدور وعافت الظابط وماعدها اي تواصل وياهن
وبقيت وية بدور حتة تعوف امتنان
انة روحي تجز منها انة استعر منها حتة من تدك بابنا
اللكمة الي تجيبها للبيت لا اكلها ولا اخلي اختي تاكلها كبل للزبالة
وسويت كل هذا لخاطر امتنان
انة غلطان ادري ومعترف بغلطي
بس وحك الله ماجانلي نية سوء ابد
وجنت ناطرها تكبر واعرس عليها
جنت رايدها حلالي
ولك ياحلال ياحراااام طفلة طفلللللللة شلون دنت نفسك عليها
مادنت نفسي ردت احميهاااااا
على شنو تدني نفسي وهي من بزري
انة ردت احميها وانفذ وصية صاحبي
كافي اسكتت اسكت
بقة يحجي ويبرر ويتعذر
ماكدرت اعذرة ولا نطيتة ولو مبرر واحد
للحظات جنت رايد اطردة من لبيت بس وكفن بعيني وكفاتة وركضة ويانا
نكسرت عيني ماكدرت
بقيت احاول اهدء وانسة واقنع بروحي بأن هوة مالة ذنب
يحجي وية لولد
رفعت راسي للسكف وصرت اغفي
انام وافز على سوالفهم
الى ان وعتني جملة كال بيها
هوة من عرف بيهم كايمين يشتغلون بجيش ال.........
شك همة ورة كتلتها
شكد قنعتة شكد حجيت واخذتة للسجن الي محبوسين بي الولد الي لقطتهم الكامرا وهمة يقتحمون لبيت ويكتلوهن
بس ماقتنع وبقة يكلي ذولة همة دازينهم حتة يكتلوها بدون ميعوفون دليل وراهم
قنعتة حجيت كتلة شموصلهم الها وانت سنين تدور عليها وعلاقاتك ومعارفك وماكدرت توصل
يكلي انة لو ادري بيها بلعراق من زمان جا لكيتها
بس جنت اضن بأمريكا ماخذتهم ومنهزمة
كتلة لو همة فعلا جان ماكتلو بدور ومنال وامهن وياها
جان كتلوها بس هية
يكلي اكيد اضطرو يكتلوهن كلهن إما حتة يزول لشك
أو خافو لايتعرفن عليهم بعدين وينلزمون
منين مااجيبة يطلعلي بعذر مقتنع ومتأكد انو همة ورة موتتها ومصر
رام ماكو اي دليل يثبت
بس هوا باني كل اسبابة على طريقة موتتها وتعليقها بلشجرة
فركت وجهي وتقربت الة
تقصدمن بهذا الحجي ؟
ولد عمك جليل
يعني هوة هذا سبب شكة بأنو يكونون الهم يد بموتتها
اي هذا لسبب لأن هي لوحيدة علكَوها بلشجرة ولأن عرف بيهم مشتغلين بجيش ال......
بقيت افكر بلسالفة ونسيت سالفة لأوراق
للفجر انة كاعد
وراها كعد طالب عاين الي صبح وراح للحمام
شوية ورجع لبس حذائة يريد يمشي
اشرتلة . وين
امش لأهلي بعد شني ضلتي وانت منا لهنا خونتني
انة ماخونتك انة توجهتلك بأتهام صريح وسببة كلامك الي خلاني كلش صعدت براسي وفرت
حط روحك بمكاني
وانت لوما تدري هاي فعلتك غلط ماجان ضميت على غضنغر جان صارحتة
دنك وجر حسرة ماجاوب
شمر حذائة وكعد علقنفة وكال هسة منين نحصل لرقم
خل افتح كنتورة لهنا يجوز نلكا
دخلت جوا صحت على عمتي امريكا ووطلبت منها تسويلي درب ادخل للغرفة
طبيت جوا بعد ماطلعت انعام للصالة هي وقسورة
فتحت لكنتور وتعاوننا انة وعمتي نفشنا خركة خركة ودورنا بيهن ماخلينة شي يعتب
طلعنة من الغرفة مهجومة على كد مانفشنة ودورنا حتة بلملابس وكلشي ماكو
رحت للأستقبال حاير
رجعنة اتصلنة على حمايتة لقداما كالو ماعدنة اي معلومة
لليل احنة خابت امالنا وايسنا
جانت لمهلة يوم واحد فقط وخلص ليوم
كعدت بلأستقبال شبه منهار
شعور مااتمنا لعدوي
اخوي بينة وبين لموت شعرة وانة ماجاي اكدر اسوي كلشي
شعور العجز ممميييت
اتصل بينة بطالب بليل يسألة عن لرقم
بيأس بلغة انو ماحصلنة لرقم وحاول يقنعة بأنو ينطينا وقت اطول بلكي نكدر نحصلة سدة بوجهة
رجع يتصل بي ميجاوب وراها نحضر
طلعت من لبيت مخنوووووك
ركبت لسيارة وبكل سرعة سقت
ماادري وين نزلت
بلكاع كعدت ادخن عبرت ل١٠ وانة بمكاني كاعد
عفت لسيارة وصرت امشي مادري وين رايح
تمنيت بس يتصلون بية واكدر احصل غضنفر واسألة علرقم واجيب لأوراق
بس ماكو من بعد لصار بعد ماتصلو ابد رغم لتلفون الي اخذتة من سطل الزبالة بتوجيهاتهم لايزال بجيبي
مشيت هواي ماادري بروحي
وعاني صوت هورن لوري
جنت على طريق يفوتن منة اللوريات والسيارات الكبار
التفتت ادور علسيارة مال ستار ماكو
ضليت امشي ادور عليها ماتصورت اكون ماشي هلكد
من وصلت الها
جان تلفوني بلجكمجة يدك
جريتة رقم غريب خطي جديد ماحافظ رقم اي احد
جاوبت
صوت ستار ينتر وينك قيصر تعالل للبيت بسااااع
شكو
لكينا لرقم لكيناااااا
شلون وين
تعال هسة ونحجي
سقت بأسرع مايمكن متجاهل كون لسيارة تعبانة صعدت حماوتها
وصلت للبيت متلهف
من لباب تلكوني لجهال يحجون
وكلهم بلأستقبال وكلها تحجي
حطو دفتر بيدي بي رقم متكرر بأكثر من ورقة
كلبت لدفتر اعاين هذا نفسة دفتر منة
انعام انبرت تشرح الي
سألت عمة من نفشتو لغرفة على شنو تدورون
كالت قيصر يدور على رقم لو لكا تنحل لسالفة كلهة
تذكرت الرقم هذا من نطيتني لدفتر انتبهتلة مكتوب هواي بأكثر من ورقة وكل مرة مخربط بشكل
كأنما شخص كاتبة هواي حتة يحفظة
ولخط خط غضنفر اعرفة يكتب لأرقام بصورة مائلة
بس كالت عمة رقم ويحل لسالفة وبغراض غضنفر رأسا خطر على بالي يكون هوة هذا
جريت لتلفون بفرح طلعت رقم طالب من تلفون صميدع واتصلت بي
بلغتة بلرقم
كال ردليا
رديتة الة
كال بدايتة نفس لبصمة الي سمعها الي بس اخر ٣ ارقام جدد ماجانن بلبصمة
يعني هوة ؟؟
اي اكيد هوة
هسة شنسوي
اتصل بي من تلفونك وكلة لكينة لرقم انة حاضرني موتدري
سديتة من طالب واتصلت علرقم
رد علية
كتلة لرقم يمي
ماصدك يكلي مسويلكم لعبة جديدة تحفو شري احسن الكم
حلفتلة انو لرقم يمي
كال تعالي بنفس المكان الي لتقينا بي
اخذت ستار ورحت
جان جايب ويا لابتوب وكالي ادك الرقم بي اذا نفتح اجيبلك لأوراق باجر
لا ماانطيك لرقم اذا مااشوف لأوراق وبشرط اشوفهن لطالب ويتأكد منهن اصليات يلله انطيك لرقم
صوتة بضحك يهمس الي
ترا اخوك يمي يعني اذا نفتحت لحاسبة ليوم يبات يمكم
سالفة لأوراق متفيدني منا بس افتح اللابتوب احركَ فلمهن وبعد مابيهن كل نفع
يشيلوهن ويشمروهن بلزبالة
بلعت ريكي مذهول
يعني انت الي خاطفة ؟
هم سمعت فد يوم ظابط يخطف
اني رجال اسعة لرزقي
ورزقي وية لناس الي اخوك يريد يسحب لكراسي من جواهم
جان ناوي ينطيني لأوراق الي واني قشمرتة وعدتة بأنو افضحهم جنت رايد اخذهت منة واسلمهن للمسؤلين واستبم حلاوتي واترقة
بس فجأة غير رأية ودزهن للعميد ضفر
بنتر كال
ترد لرقم لو اكوووووم
ماجان كدامي حل ثاني
رديتة الة
فورا نفتحت لحاسبة
ابتسامة شكت وجها وصوتة بمكر همسلي
فرشولة فراشة الليلة يبات يمكم
عافني وكام
لحكتة بلباب ثنين من الي ويا صارو كدامة الى ان ركب ومشة
رجعت للبيت مخنوك وخايف
خوفي اكون ضيعت الشي الوحيد الي اكدر اسلوم بي حتة ارجع غضنفر
لأول مرة احس بعجز لهلدرجة
طول عمرنة كلشي يواجهنا محلول ومكضي لو مهما يكون جبير ويصعب علينا
ويامن ورطت روحك ياغضنفر
دخلت للبيت مخنوك من لباب تلكوني كالو انعام متخربطة الها يومين كلشي متاكل من يوم رحت علساس اسلم لاوراق ورجعت وهية مو على بعضها
اخذنا للمستشفى ضغطها هابط خلولها مغذي بقينة الى ان خلص وطلعنة
واحنة بلطريف تلفوني دك
طلعتة تصورت واحد من لولد يسألون على انعام
صوت يهمس الي
فرشتولة لغضنفر ؟
ششش شنوو شنوو
من لفرحة صرت مااعرف شنو ارد علي
صوتة يهمس هامافارشلة عرفتك
ماراح ادزة لعد
لا لا فرشتلة ورب محمد فرشتلة
لعجز الي حسيتة واني اكول هاي الجملة ودموعي تجري بذل وهوان
كل عمري ماحاسة
صوتة يضحك بصوت عالي وكالي
خوش لعد تانو وفرشولة زييييين حطولة جرجف ابيض موتحطولة الوان
سدة بوجهي
اخر جملة اماتتني حرفيا
لاااكدر احجي ولا اكدر اسكت من دموعي الي نزلت عرفنني
يسألن بية انعام وكشمش واماني
انعام حيل تخض بجتفي ومجلبة بقميصي من ورا
همست اهديهن
كلولي فرشولة رح يهدو يمكن
لو يجيبو النة همة
من لفرحة وحدة تهلهل وحدة تبجي
انعام بس نزلنا من لسيارة بلكاع سجدت بعتبة لباب
كومنها لبنات وعبايتها كلها تراب
نريدها تطب ماترضة تكلي هنا بلباب اتاني ماادخل ليوم
قسورة طلع على صوتنا وعمتي امريكا وام فدعم ولبنات ولفروخ لتمت وسللامة وحمزة فترو من مشتملهم كل احنة برا واكفين ومتاني
وانة مثل بلاع الموس امثل الفرحة حالي من حالهن ولشتي كلها ترجف
ماادري اندعي يمشي لو قت
ماادري اندعي يوكف وتنخسف بية الأرض وتبتعلني واخلص
منين ماالتفت وكلما اغمض عيونة اتذكر صوتة من يكلي حضرولة جرجف ابيض
شكد احاول اقنع روحي انو مايقصد بيها شي بس مااكدر
ساعة فوك ال٢ ونص سيارات سود عاليات من فوك تقربن
حاولنة ادخل لنسوان خفنة لا الهم نية يأذونة
كل وحدة اعند من لثانية
والي نجبرها تصرخ وتملخ بروحها
عفتهن لمن عجزت وياهن
من بعيد ماتقربو النا
نفتحت لباب من لجهة لثانية وشخص نزل
الطول طولة بس الجسم مو هوة نحلاااان منتهي
كلما يتقرب تتوضح ملامحة
جانو ثنين ساندي
انعام تريد تركض الة كوة لازماتها
تقربنة من بعيد انة ولولد
هدو وهوة ستمر بخطوات بطيئة كوة يتقدم النا
لولد ركضو انة ماعانني رجلية كوة جنت امشي
هاي اللحظات ماانساها ابببد
مجرد ماوصلو للسيارة واحد منهم باقل لثانية طلع سلاحة ورما ٣ طلقات
مااعرف شنو لصار
غضنفر على وجهة وكع على لأسفلت مال لشارع
جريت لسلاح من خصري وبكل خيلي ركضت وراهم
رجلية الي لثواني حسيتهن بادن
هسة احس كل لحيل بيهن
صورة اخوي الي نحك وجهة بأسفلت الشارع صعدت للدم لراسي
وهمة بساع شحطو وبلمح لبصر اختفو من كدامي
صرت ارمي رغم ادري ماالوحهم
بكل قوتي ارمي واصرخ
نداريت واني اشوفهن ملتمات علي ويتصارخن
قبل ماارجع الهم جانو لولد مصعدي بلسيارة ومن يمي فاتو بكل سرعتهم عمي ابو ستار وصميدع وستار وحمزة وغضنفر
رجعت الهن اهرول متوجه للسيارة
جلبن بية يردن يجن وياي
انعام على رجلي دنكت وتبوس بيها
صعدتها بس هية وقسورة ومشيت
اتصلت بيهم نطوني اسم المستشفى
لسيارة بانزين مابيها حمزة مخلصها بسكوت يفتر بيها وكفت اترس بانزين وروحي تطلع
من وصلت جانو مدخلي عمليات
فهمت من لولد طلقة وحدة جاية بضهرة ولباقيات مالايحاتة
انعام حتاريت بيها كلسا وطاحت
تخوف شكلها هواي تغير شهر مر علينة هية يوم عن يوم تذبل غدت مومياء
عايشة علماي وصلت مرحلة اذا نجبرها على لأكل تتقيء كل الي تاكلة
مرتين اخذنها عمتي وام فدعم يحطولها دم
اسألهن شكو يكللي مابيها شي سوالف نسوان
ساعتين عدت وهوة جوا
واحنة ننتظر
ساعتين ضهرة مفتوح ويشتغلون بي
بلغونة بنجاح العملية التام وبقينة ننتضر يصحة
جان بلأنعاش
٣ ساعات بقة
هاي ل٣ ساعات مرن علينة بسنييين
وراها اتضح انو لطلقة مخترقة العمود الفقري
ورة ماصحة سمحو لأنعام بس تشوفة
لكون لطبيب الي شاف حالتها حجة وية لدكتور لمسؤل وكللهم حالتهة تعبانة خل تشوفة عقلها شبه منهار فاقدة علي
خل تتطمأن علي ليصير بيها شي
بس هي سمحولها تدخل
اجة طالب وثنين من حماية غضنفر هم ويا
شوية واجة لعقيد ويا ظباط بقة يتحمد لسلامة ويتعذر وكال ضروري تتصل بية باجر واكد علية اكثر من مرة
جنت بوضع مايسمحلي كلشي اسوي
شيكلولي اكلهم اي
متاني بس اطمأن علي
وراها اجو ثنين اعضاء مجلس وظباط وناس واصلة عجت المستشفى بيهم ولدكاترة من شافوهخ نخبصو فد خبصة بغضنفر
مااعرف شجابهم هسة رغم طول فترة خطفة ماشفت اي بشر منهم
للغرفة صاحني لدكتور وجان حيل مهتم بغضنفر وانخبص من شافهم
بعد مقدمات هواي مالها داعي
كالي
اكون صريح وياك
اكو احتمال انو اخوك ......
انعام
ايام عدت علية جنت اموت بيهن وارجع اصحا
مامر علية اسبوع ماغبت عن لوعي
صارو يجيبولي لمغذي للبيت وام فدعم تعلكة الي
نزيف لزمني طول هلمدة
نزيف حاد دمرني
يكطع فترة ويرجع
عدا خشمي الي ينزف من يوم راح قيصر ورجع حالة يخوف
لأكل ماشتهي
واذا تكلت مايستقر بمعدتي اقل لساعة واتقيئة كلة
سكنت لمستشفى
انغام اجتني مرتين كالت امشي ويانا مارحت وياها
ماكدرت
تتصل بية يومية هية ومنصور
قسورة تعب وذبل
رغم اشوف علاقتة بيهم قوت ونخرط وياهم حتة حجايتة يقلدهم ويحجي مثلهم
علاقتة بحمزة كلش قوت
بس اشوف لحزن بعينة ولدمعة
كلما يشوف حالي يكابلني ويبجي
من جابو من رمو علي مم طاح كدام عيوني على وجهة
لحظات اماتن صبري وايماني وكل سبب ممكن يخليني استمر
لحظات لعنت بيهن كل ثانية فكرت بلبعد عنة
لحظات حلفت بيهن الف مرة بأن لو كام سالم ماعوفة ثانية
من لبجي ومن شافو حالي وضغطي الي وصل ارقام لايمكن يعيش وياها انسان
لدكتور حجة وية لمسؤل عن غرفة لانعاش وتوسطلي ودخلوني يمة
دخلت تقربت الة حرفيا ارتجف
كعدت يمة جان صدرة عاري وكلة صوندات ويمة اجهزة
ولأول مرة اتقرب الة ومااشماز
لأول مرة اشتم ريحتة وانفاسة ومااعرك ولا احس برغبة بلسبح وحتة اصدك مديت ايدي لصدرة
تقربت الة اكثر
كأن مامصدكة
همست الة
مشتاقلتللللك
ميتة على حضنك والله
غضنفر كوم الله عليك لا تعوفني
توبة والله توبة
للموت ماعوفك بس لاتعوفني
كوم نومني على حضنك واحجيلي غزل اني مااحسيت روحي مرة من صدك غير وياك
كوم خل نعيش الما عشنا
خل نسوي كلشي بقة بنفسنا وماسوينا
هلمرة ماعوفك حتلو عشرتك تتعبني
هلمرة وياك على جهنم مو بس علحلوة والمرة
كوم فدواتك اموت لو عفتني والله اموت
تروح يم منة وتخليني
ولك والله اموووووت
قسورة محتاجك واني دااموت بدونك
كوووم
كوم
ستمريت اهمس الة ودموعي تجري
خليت راسي على صدرة
بعد سنيييين
بوست صدرة
بوست وجهة وادي وحتة جفوف رجلة
جنت ابجي مامصدكة جاي ابوسة بدون مااشمأز بدون ماايصير شي وياي
وبلأخير همست الة واني فرحانة
غضنفر راح انام بحضنك بدون مااخاف منك واشمأز
دكو علباب واشرولي اطلع
كمت واني اعلين الة
طلعت برا
قيصر بوجهي جان يحجي بنتر وية صميدع
تقربت الة واسمعة يكلة .......يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!