#خنجر_الغضنفر
#الجزء_الثاني_بارت٦٠
#حنين_حاتم
انعام...
رجعنة للبيت تمددت بفراشي هلكانة مابية افتح عيوني وصداع راسي ودي افلشة بلحيطان
صوت قسورة وانغام برا يحجون
صوت صياح قسورة ومنصور يصيح علي وين تروح وييييين
شوية ودخلو علية
صوت انغام بيأس وحزن كالت
_انعام كومي شوفي ابنج شوفيلج صرفة ويا اني ومنصور تعبنة
_شكو ٧غ٢سيك قسورة
صحت علي
دخل عيونة حمر وشكلة باجي
نتر بزعل ومختنك كوة يججي
_بابا
كالها واختنك ادي على عيونة ودنك يشهك
_شبي ابوك
_مختفي صارلة ٣ ايام كلما احاجي عمي قيصر لو صميدع يكلولي مشغول
هسة حمزة خابرني كال مخطوف صارلة ٣ ايام وبقة يحجي علية يكلي ابونة مندري بحالة شنو ماشنو وانت ماكلفت روحك تجي انت وامك توكفون ويانا تسئلون شبي مابي
_لحظة يعني ابوك مخطوف ؟؟
_اي صارلة ليوم رابع
دموعي غوشت كلشي كدامي
حسيت عزائي ليوم عظييييييم
كلشي بجسمي جان يتهيء حتة يعزيني بمصابي
عيوني الي نملت دمع ادية لترتجف شفافي الي تتحرك وتتفوه بأشياء ماجنت اسمعها
صفير بأذاني وصوتة الي ينتر بية
لو اجتح جنازتي تذكري انتي الي يتمتي قسورة بيدج
معناها جان ناوي مومجرد كلام
يتصور من إنتزعتة من حياتي جان شي سهل علية
الله وحدة يعلم جنت مثل الي ينزع روحة من جسدة ويفرغ جسدة من الحياة
ثواني مرت علية واني اسأل روحي
منو بينا الي جان هاوية للثاني .؛ ومنو بينا الي اغرق لثاني
ليش دائما هيج يسوي من نتفارك
ليش دائما يجبرني اصلح اشياء اني ماكسرتها
ولا جنت سبب بكسرانها
ليش ميفهم انو اني مااكدر لا ويا ولابدونة
ليش يستهين بلموت وميفكر لا بأولادة ولا بأهلة
ليش يعاقبني بهلطريقة بكل مرة
ليش حياتة هيج تهون عندة
معقولة اني بلنسبة الة حياة
زين مافكر بية من قرر يروح
مايدري اني اتنفس بصورة طبيعية بس من اسمع اخبار حلوة عنة
شحجيلة حتة يفهم اني روحي بي
بس ملكَا مااكدر علي
ولا اكدر على امراضي
ولا اكدر على حرب سللامة الي مجبرة اكون طرف بيها برضاتي او غصب
شكم مرة الزم تلفون قسورة وادور بلمحادثة بلكي الكا ذاكرني أو سائل عني
شكم مرة اجر لسان قسورة واتمنا يكلي سألني عنج
شكد شميييييت عطرة بلغترة الي مدري شوكت دحستها وية ملابسي
وشكد حضنتها وبستها وشكد بللتها بدموعي
شلون يصير احب لشخص بس مااكدر على قربة
شلون يصير اتمنة سماع صوتة ومن اسمعة اتقيء
شلون يصير انو احسة امان ومن اشوفة ارجف خوف
شلون اشتهي حضنة ودلعة وسوالفة ومن اشوفة اصرخ حتة يبتعد عني
منين اجت هلتناقضات وشجابها بيناتنا
شلون غضنفر لجان ميخليني انام إلة وراسي على صدرة واكعد لصبح قراصتي طابعة على صدرة ولمكان احمر
هسة من اشوف صدرة جني شايفة جسم غريب
شلون وشلون وشلووووون
شلون اشرحلة كل هذا
شلون افهمة على لبية
و اني معلولة وماادري وين علتي
شلون اكلة انت علتي ودواي
ومنين اجيب الحجي الي يوصل كل هلأحساس
مدري شوكت بلكاع كعدت وتربعت وكلشي بية منهار
ولصرخة طلعت من حنجرتي وحالت شفافي دون خروجها
اعاين الهم يباوعولي تلاثتهم
ردت اضهر غير الي بداخلي وابين انو اني طبيعية
نترت بقسورة اغير الموقف
_وهوة حمزة شنو كاعد يعاتبك وليش يحجي عليك
واحنة شمدرينا مثلا نشم ايدنا
_عبالة ادري ومن كالي
عمو قيصر ضال يحجي علي ومرزلة
وهسة شنو شنسوي
يعاين علية ويحجي
شنسوي مثلا
_اني اريد اروح ماالي شغل بيج تجين ماتجين معلية
_يعني شنو مالك شغل بية انت موختاريت تجي وياي معناها تكون تحت طوعي وهاي سوالفك بطلهن
_يعني منروح ؟
بابا مخطوف ومنروح اني وياج هنا نبقة واحد مكابل لثاني
_واذا رحنة شنسوي ؟
_كلشي منسوي بس اقلها يكونلنة موقف
نوكف وياهم
هذا بابا شنو ماما نسيتي
انتي صح انفصلتي منة بس يبقا ابوية
انغام تدخلت هي ومنصور
_انعام خلي نتصل بيهم ونروحلهم ساعة زمان هيج لازم نوكف وياهم بهيج موقف ماترهم احنة موغربا
يربطنا بيهم قسورة
شنو احجي شلون افهمهم انو رايدة اروح مومارايدة
بس بياصفة اروح
ومن اروح يستقبلوني لو هم يكلولي من وراج صار كل هذا
من عفتي
ويذبون اللوم علية
وياترى مكانهم آمن لوهم ممكن ابني ينخطف مناك مثل ابو
انتهى بية التفكير واني يسيطر علية الرعب ولأفكار لسودة ورفضت لروحة رفض قطعي
للغرفة ركضت تجنبا لأي عتب منهم ولأي محاولة حتة يثنوني عن قراري
الي اني ممقتنعة بي
روحي احس تتكطع وكلبي الي يبجي موبس عيوني
لزمت لغترة مالتة
شميت عطرة
هنا بعد ماكدرت اسيطر على روحي وحسيت كلشي بية فقدت لسيطرة علي
صرخة طلعت من اعماق كلبي مرت بحسراتي المالية صدري
جانت صرخة مشلولة عاجزة مليانة ندم وعذاب ضمير
ليش غضنفر تريد تيتم ابنننننننك
تريد تلحكَ منة
موكافي علية كسرتها
كلكم تعوفوني اني موحمل فراك والللللللله
تروح يمها وترتاح هي بشوفتك وقربك واني
اني شنو حالي مافكرت بية
قسورة الي ماحس بنفسة مثل باقي لجهال غير لمن شافك
تريد تعووووووفة
دخلو علية تلاثتهم
صوتي اختفى بصدر انغام وجسمها يختض وياية وتهمس
_كافي ياعيني
ولج اني ادري بيج على ساعة تنفجرين
ليش خليتي يطلكج ليييييييش
لو مبتعدة مدة وكت تتعالجين تشتاقيلة اعرفج وترجعين
ليش كسرتي لرجال وكسرتي روحج وابنج
_شنو لماسويتة كليلييييي
دكتورة ورحت
شسوي بعد شسووووووووي
_اششش كافي تقهرين بروحج كافي الي كاتبة الله يصير
_ولومات هلمرة منو يعفيني من ذنبة
روحي
لو اهلة
لو ابننننننننة لواكفلي بسيفين
_وانتي شنو دخلج ؟
لا اول ولا اخر وحدة تطلك
اذا كل رجال تعوفة مرتة يسوي سوايتة جان مابقة احد
هوة انسان بايع حياتة من زمان
لاوكفو بعينة اهلة ولا بزرة
انتي شنو ذنبج ويلوموج
_ذنبي حبيتة
ذنبي عفت لدنيا واجيتلة
ذنبي صدكت بي ومامشيت ورا شكوكي وحاولت اعرف قبل ماتورط بجهال
وذنبي ماعندي سلطة على روحي
لا كادرة انسا ولا كادرة ارجعلة
منصور تقرب يمي بلكاع كعد ايدة على راسة وهمس
_انعام هسة هذا الحجي بعد ميفيد
اني رح اتصل بيهم هسة وباجر اخذ قسورة واروحلهم
مهما يكون يبقة ابو وذولة اهلة لازم يكون وياهم بهيج وقت
_ومنو يكول مكانهم آمن وحياة ابني متكون بخطر لو راح يمهم
_منصو:-احنة ماراح نتأخر ساعة زمان نشوفهم ونسلم عليهم ونرجع
مدنكة بلكاع مااعرف شجاوبة
رجع همس
_ها انعام نتوكل؟
_اي هذهو
طلعو وبقت انغام يمي
ساعة تلوم ساعة تهدي بية
اذا اقرب لناس اختي احسها مشيلتني جزء من لمسؤلية لعد اهلة شلون
اتصل بيهم منصور اسمع صوتة واني بلغرفة
يحجي وية قيصر ووراها صار يحجي وية ابو فدعم وابو ستار
سدة واجة يمي دك لباب ودخل
_منصور :- لناس ماجابو طاريج ولا كالو
يكلولي هوة ماخذ ملفات فساد وغسيل اموال واختلاس من ناس كبار وكاشفي وهسة يردوهن ويهدو
بس لأراق ماكو كالبين لبيت عليهن ومامخلين مكان يتردد علي ولا مخلين شخص يعرفة ماسائلي
وقيصر يدك ويلطم يلوم بروحة يكول راد يأمنهن يمي بس من شافني خايف علي وكتلة احركهن واخلصك منهن
اخذهن مني
ماتصورت لموضوع يوصل لهلمواصيل
انغام تعاين الة وتعاينلي وكالت
_اني اروح وياكم منصور
عالم وكفولنا وكفات ماتنسي لوما همة احنة بخبر كان من زمان
شلون مانوكف الهم بهيج ظروف عصيبة
لونتناني يموت ونروح نلطم علي بفاتحتة
اعرف بهاي حجايتها جانت تريد تخوفني
بصوت هامس ماليتة لغصات كلتلها
اني هم اجي
فجرية لبسنا وطلعنة الهم
بيتهم لجديد مانندلة كالو اوكفو يم لقديم وندزلكم واحد من لولد
دزولنا صميدع اخذنا
المنطقة صحراء شبه مقطوعة بيوت قليلة يمهم وبعد بيت عن بيت مسافة جبيرة بحيث لبيوت تبين زغيرة
لامحل يمهم لاسوكَ
دخلت الهم من لباب دموعي تجري مثل لداخل على فاتحة
وقسورة يصيح على عمامة ليش ماكلتولي بابا مخطوف لييييش
دخلونا جوا وكابلني يبجن وابجي وياهن
ثاني طبة الي اطبها ببجي ونوح من لباب
اعاين الهن عيونهن مليانة عتب بس مافتحن حلكهن بكلمة
خصوصا عمة امريكا وكشمش
حتة سلامهن علية وملكاهن الي بارد مومثل لعادة
سللامة ماكو مالمحتها
قيصر جان ماكو من طبينا
وراها دخل صاح على قسورة من لمطبخ كلولة تعال لابسات لبنات
دخل
جان لابس دشداشة هاي اول مرة اشوفة يلبس دشداشة
تقرب سلم على قسورة
عاين الي وكال شلونج ام قسورة
عايشة
كلتها ونزلت دموعي
احس بهلسؤال عبالك يكلي
شلونج هسة رتاحيتي من سمعتي مخوطف
تقرب كعد علدرج وقسورة يمة مدري شيحجي ويا بصوت ناصي
رغم فكري يمهم وعيني عليهم بس ماسمعتة من لهوسة كلها تحجي
لمن كام ركزت بي
هاي دشداشة غضنفر
نفسها الي حضنتها وشميتها من وكعت بلحمام
عرفتها من الاكمام و الدكم الي بيها جانن على شكل شذر لونة اسود وبي شطبات فيروزي شكلهن مثل خرز السبحة الي يلزمها بلظبط
جان ودي اصرخ بي واكلة انزعها
هاي ماتحلة بس على غضنفر لافهة على خاصرتة من مشة نزلها
جانت كصيرة علي فرق ٥ اصابع عن جف رجلة
طلع برا
جابو اكل حطو
اعاين الهن محد اكل يجاملنة يحركن لأكل ويرجعنة لمكانة
بقيت مدنكة وابجي
كشمش من مكانها كامت جابت كلنس من لطبلة وحطتة يمي وكعدت بصفي وصوتها يهمس
اندعيلة عد جدج الحسين
كليلة غضنفر عزيز علينة مانكدر بليا
كليلة هذا كافل ايتامي وين اروح بعد عينة
كليلة لخاطر ايتامي خل يتوسطلنة عد ربة ويردة النا
صوتها وكلامها جان يزيد عذابي
وبصوت مكسور همست الها
بلية متكولين اني لساني من لبارحة مالهج غير بلدعاء الة
هذا رجلي وابو وليدي
هذا حامي لحما وعمود بيتي
هذا روحي وراحتي وطيبة خاطري
هذا عشرة لعمر لماهانت ولا راح تهون
بس شسوي للظروف والدنيا الي لانصفتني ولا نصفتة
تعاينلي وتمسح بدموعها ماحجت
ترجع تصد علية احس كومة عتب بعيونها
احس تريد تسألني لعد شلون عفتي
وشلون هان عليج كل هلمدة
اتمنة بس تسألني حتة اشرحلها لبية
أو يمكن مااشرح لأن ادري ماراح يفهمني مخلوق
يمكن اني نفسي مافاهمة روحي
الي ادري بي هسة عندي استعداد انزع روحي وادفعها فدية بس يرجعو
صوت قيصر نززني من صفنتي من صاح على قسورة واخذة من ايدة وطلع
كمت ورا وصحت بدون شعور
قيصر وين ماخذة
هنا برا مارايحين مكان
بقيت الوب
شالو لسفرة محد اكل بس لجهال
راحن بلمطبخ يعزلن ويغسلن مواعين
بقت بس ام فدعم وعمة امريكا وكشمش الي جهالها يافعين اعمارهم بين ال١٦ وال١٣ بس بلطول
امهم اكصر منهم
ربع ساعة وطلعت ورا للمطبخ بلحديقة لجهال سألتهم علي
كالو عمو قيصر مدري وين اخذة وراح
كلبي يدك وجسمي يرجف
وين اخذة
خوفي ابني هم ينضر وهذا لجان مانعني من الجية لاغير
طلعت برا عاتبت منصور كتلة
غير جاي وياك هوة شلون تعوفة يطلع
موكتلي ساعة ونرجع صارلنة اكثر من ساعتين وهذا قسورة طلع الة اكثر من نص ساعة
بقة يهدي بية يكلي وين يروح تلكيهم هنا قريبين
واني ماادري بيهم من طلعو كلت اخذلي كسرة دخت من لسياقة
بقيت انتظر
ساعة عدت وهمة ماكو
لخوف تحول الى رعب
جسمي مالاح لكاع واكفة على حيلي وافتر بلبيت
نتصل على قيصر ميرد
وقسورة مبايلة بجنطتي
لحد مااجو لجهال من لشارع وكالو اجو اني نص حيلي رايح مني بهللحظات
من دخل بدون شعور حضنتة
ورجعت اضيح علي واكلة وين رحت
عاينت لقيصر بعتب وكتلة
ليش هيج قيصر عايزة هبطات اني وين وديت لولد
صدك جذذذذذب
لوضع الي احنة بي ميتحمل هيج تصرفات بدون تفكير
ماكلت يضل بالهم
مية فكرة اجت براسي
لا هوة الي ماخذ تلفونة ولا انت الي تجاوب
وين جنتو متكليييي
عاين الي بغضب رفع تك حاجب شمر علية علبة وعلاكة وطلع ماجاوبني
صوت انغام وعاني على روحي
على كيفج اكلتي لولد وشربتي صوتج شعلوة
شوفي بناتهم من يحجن وياهم حتة راسهن ميرفعنة متكليلي انتي شلون عشتي وياهم سنيين
سكتي انغام اني كلب ماضل عندي ولابراسي عقل
جان يكدر يكول نتأخر أو يرد على تلفونة اقلها
لعلبة بيدي مثل لقاصة لزغيرة
فتحتها بيها دفتر امتنان واوراق هواية مطبكات
وعلبة زغيرة
فتحتها بيها المحبس الي بيوم من لأيام جبتة وياي من امريكا وجنت ناوية انطي الة بس من شفت سللامة تنام يمة بلغرفة قبل ماافهم عفستة وشمرتة
وبعدين اتضح زوري ناطيتة الة
بيها جيس زغير فتحتة
بي ورد شكلة غريب يابس ومنتهي حتة لونة متغير
فتحت لأوراق جانن عبارة عن رسائل كاتبهن بخط ايدة
كل يوم رسالة من يوم طلعت من يمهم لحد شهر قبل اختطافة اخر تاريخ مكتوب برسالة ومرقمهن وية عدد لأيام كلهن مكتوب المستلم
ورد الباجلة
لكلام عبارة عن اشعار وكلام عتب وملامة
بس الأشتياق جان ينقرا بين الأحرف والأسطر
جوا دفتر منة جان اكو دفتر مذكرات
فتحتة
لتاريخ من جان بعمان مكتوب لسنة ولشهر بكل ورقة من طباعة الدفتر نفسة
كل ورقة أول سطر مكتوب بيها
انه يوم الفلاني الساعة الخامسة صباحا صحوت على امل اتصالكم وسأنتظر
وبنهاية الورقة مكتوب
انتهى يومي ولم اتلقى منكم اتصال سأغفو على امل ان تتصلو غدا واسمع اصواتكم
وبكل ورقة مكتوبة نفس الجملتين وبينهن جان اكو كلام متوجه الي
(احدى الأةراق التي تحمل تاريخ من سنة ٢٠٠٥ بتاريخ ١ مارس كان محتواها نصا كما بعث لي بصورة على الماسنجر)
''حبيبتي اليوم كان متعب جدا
بلتأكيد هو متعب لأني لم ارى وجهك فيه لم اتغزل بجمالك ومنحتيات جسدك الذي لم يغادرني ابدا
لم اداعب شفتيك بشفتي لم اعبث بخصرك بيداي كما كنت افعل وتقفزين ضاحكة
ضحكةً كنت احتسيها خمرا ينسيني من انا ومن اكون ومايسكن صدري من هموم
حبيبتي الأيام بدونك بطيئة ثقيلة على قلبي اللذي لا يحتمل فراقك وفراق الأولاد
حبيبتي ايا دائي ودوائي ايا مأمني واماني
يامن عهدتك رقيقةً كلندى من اين لكِ هذه القسوة
اوَ تبخلين عليً بأتصال
انا اللذي لم ابخل عليكِ حتى بروحي
حبيبتي ياطهري ويا عفتي ياشرفي ويا رجولتي
ستبقين عفيفةً نقية وإن لوثو جسدك غُصباً
فلعفة عفة الروح والطهر طهر القلب ''
دموعي ملن صفحات الكتاب
حيل لصدري ضميتة وعلجهة لثانية دفتر منة
وصرخة مكتومة
ناوي تروح مثلها وعايفلي دفتر
فتحت دفترها كلبت بصفحاتة
بنهاية لدفتر بأخير صفحة جان مكتوب كلام بخط ايدة
اكثر من جملة وحدة متشبه لثانية ماكو ترابط بينهن
اول جملة جانت نصا
صارت شوفتج وشوفة امج حلم
لجية يمج اسهل منها ماكو بس جية امج علي هية الصعبة
جواها مكتوب اسم شخص وعنوانة ورقم تلفون ومكتوب ارقام ٧ ٥ ٩٩ ٠٠ ٣
مافهمت شي
كلبت لورقة لوراها نفس لأرقام مكتوبات
خمس ورقات بيهن نفس ذني لأرقام بس بكل مرة مخربطهن بشكل
سديت لدفتر ورجعتهن للعلبة
فتحت لعلاكة
جانن بيها ملابس ملاتي من اجيتهم على كد مااسبح واشر ملابس ناسيتهن على لحبل
داخليات وثوب وشال وجواريب مافاركهن من ورا رجلية والم الذبوح والفطريات وألأكزما على كد ماجنت اغسل
على كد ماجنت اخبط تايت وشامبو وصابون وغسول جسم وحتة عملاق واسبح بيهن
صحت على منصور حتة نروح ووية غراضي دحست الملابس والعلبة
صوت قسورة بعناد نتر
اني مااروح ابقة هنا الى ان يلكون بابا
_شنو متروح قسورة احنة شنو اتفقنة
موكلنا ساعة ساعتين زمان ونرجع شحدا مابدا
مونطيتنا حجاية
_ اي وهسة غيرت رأيي مااجي اذا مااطمأن على بابا
تردين بابا يرجع ويلكاني مموجود
اني ابقة هنا وانتظر رجعتة
تقربت يمة اريد اقنعة بأي وسيلة
قيصر تدخل وكال عوفي اني يومين تلاثة واجيبة
_شنو ضلتة قيصر شيريد يسوي هوة
مضرتة اكثر من نفعة وهوة مامتعود يبات بأي مكان بدوني
_بس هذا مو اي مكان هذا بيت ابو
_واني مكايلة شي بس ابني واعرفة نحس وزعول يبقة يتعارك ويتمشكل
ابسط مابيها كدام عيني تعارك وية اخو لجبير كدامي ذيج المرة وغدو لحم
_لاقسورة زلمة معدل ماعلي شي يبقة يمي واني ادير بالي علي وعماتة هم عينهن علي
_ملابس ماجايب
_هاي الفروخ بعمرة كلهم وينطو
واذا ماكفتلة هدومهم بيدي اخذة واشتريلة
كل لحجج الي احجيهن يقابلهن برد ماخلالة حجة
اخر شي كتلة
قيصر اكون صريحة وياك اني خايفة علي اخاف يروح من نصكم مثل ماراح ابو
ولازغرا بيكم موقصدي بيكم قصور بس هوة هذا الضالي والي طلعت بي من لدنيا
ااخاف علي من ضللة
ثواني اذا يختفي من كدام عيني متتصور شنو يصير بية
_ادري بيج خايفة وحتة تطمأنين خل اكلج شغلتين
أول شي اني من لبيت ماجاي اطلع ولولد هم
وثاني شغلة هذا بيتنا محد يندلة لاقريب ولاغريب وهاي غايتة من غير مكاننا
وحتة ماجان يوصل النا ولايقبل نروحلة
هوة بنفسة يبقة هنا حتة من يرجع ابو يشوفة موجود ويعرف انو هوة جان ينتظر رجعتة
تلا كلامة تدخلهم كلهم وهمة يكلولي خطية بقي لتكسرين بخاطرة
وهوة يبجي وخانس يكسب عطفهم بدموعة
مارايدة ولا اكدر اسويها بس نجبرت ونحرجت
رجعت للبيت ولطريق كلة ابجي احس عفت كلبي يمة
قبل مندخل لبغداد كلتلهم رجعوني
كامو يضحكون يكلولي شبيج تخبلتي
اييي تخبلت مااكدر اعوفة ولا رايدة اعوفة بس هوة الحيوان احرجني
رجعوني خل اجيبة اني ماائمن علي وحدة
لومات مثل اختة شكول اني وشحجي
لليوم الندم ياكل بروحي شلون نمت وعفتها بلحمام
منصور كال باجر اجيبج وناخذة
انغام تكلي يومين ونرجع نجيبة فشلة هسة شيكونلون
اصريت وصلت مرحلة مثل لطفل ابجي واكللهم رجعوني
صوت منصور يهمس الي
نرجع ميخالف بس منجيبة
شنو منجيبة ؟
فشلة منهم وبس نسويها يزعلون
ابقي يمهم انتي هليومين واجي عليكم اني يوم لأثنين
شلون ابقة وبأي صفة واني مطلكة منة
انغام نترت :-ابقي بصفتج ظيفة وبس
لازم تحطين بيها مسميات همة بيا حال
موسنين بقيتي يمهم بصفة رهينة
هسة استثكَلتي تبقين ظيفة لخاطر ابنج
_حجاياتها حفرن بكَلبي بس ماجاوبتها
يمكن تعبتهم هواي ويمكن اذيتهم وياي
بس منو عندي غيرهم ومنو بقالي انتجي علي
وصلنة للبيت دنية ليل جنت خجلانة حيل مااعرف شنو احجي
منصور لغمطها وكللهم
مارحنا انعام تخربطت بلطريق وجنة بلمستشفى ضغطها مرتفع ستوا نزل وماكدرنا ناخذها خفنا تتخربط واحنة علطريق لخارجي
قيصر يعاينلي ويدقق بلنظر حسيتة مامصدك
كشمش اخذتني جوا سوتلي نومي وجابتة فرشتلي بغرفتة واشرتلي تعاي تمددي ارتاحي
منصور بعد ماكدر يروح صار ليل صبو عشة وتأخرو
دخلت للغرفة بلكاع جانت فارشتلي تتصور تلعب روحي انام بفراشة
دخلت وسديت لباب وراي
تقربت للفراش تمددت علي غمضت عيوني واشم بريحة مخدتة
مابيها عطرة وحسب كلامهم لاواصل لهنا ولاجاي للبيت
بس لغرفة خالين بيها غراضة ومسميها الة
رحت علكنتور فتحتة ٣ خانات مقفولات بس وحدة مفتوحة
بيها ملابسة
ادور بيهن على دشداشة مااريد لقوط ولقمصان
اريد لدشادشة الي مايلوكلة غيرها ولا احب اشوفة بغيرها
لكيت ثنين مسفطات تسفيط كشمش اعرفة
تكوي الملابس وتسفطهن بطريقة كلش نظامية وحلوة
كلهن مستوى واحد بكَد جف لأيد
حتة لملابس لداخلية مال خوانها جانت تكويهن و تسفطهن
لكنتور الي تكون كشمش مسؤلة علي جان عبارة عن لوحة فنية موكنتور
تسفطهن كل مجاميع نفس اللون سوا
جريت وحدة من دشاديشة حييل حضنتها لصدري وشميت ياختها
ادور على ريحتة بيهن
ماكو لضاهر مالابسهن من زماان
جريتهة علجرباية مددتها ونمت بصفها
وتحديدا على مكان لصدر خليت راسي
اليالي الي كضيناهن سوا كلهن اجن على بالي
هذا صوتة يهمس الي
ويلااااه ورد لباجلة يبعد الديرة وعربنا
هاي ايدة تمسح على راسي وصوتة الي يتمتم بصوت ناصي
حيلي وبعد حيلي
يعكَالي لراكز فوكَ هامتي
دموعي على دشداشتة وبوساتي تتوزع عليها من فوك ليجوا
نززني صوت قسورا برا يصيح وين امي
بساع لفيتها وجوا لبطانية خفيتها وطفرت للدوشك الي بلكاع تمددت علي
دفع لباب ودخل تقرب الي عبالة نايمة يريد يوعيني
صوتة بفرح يهمس ماما
كعدي
كعدي ماما
اتصلو اتصلو وعمو حجة وية بابا
طفرت على حيلي
شنو حجة شنو كال
ابوك زين مابي شي
عيونة تباوعلي بمكر
نترت بي
لتباوع هيج جاوبني
زين بابا حجة ويانا صوتة تعبان بس كال مابية شي
حجة وية عمو قيصر مااعرف شنو كالة
لبست حجابي وطلعت اريد افهم شنو كايل لقيصر
طلعت برا كلهن بلمطبخ يحجن وية قيصر
تقربت
من وصلت يمة سكت وعاين الي
كاللهن يلله طبن جوا ولحد توصل للأستقبال رح يجونة خطار
كشمش تقربت الي وكالت يكول حاجي ويا ومابي شي
فرحة غمرتني ودموعي ماكدرت امنعهن
دخلت جوا ودخلت انغام وياي
بقيت اندعي واصلي
ساعة فوك لثنتين يلله نمت رغم تعبانة
دشادشتة جوا وياي بلبطانية حاضنتها الليل كلة
واني نايمة اسمع صوت لباب نفتحت وضوة دخل
وصوت قيصر يكل لوحدة
وعيها بساع وعيييها
ادين كشمش من ورا لبطانية وصوتها يهمس
نعيمة
نعيمة كعدي بساع دخيلج
فزيت مرعوبة وخرت لغطة عني قيصر كبالي بساع تلمست و همشت شالي لفيت راسي بي لغرفة ضلمة بس ضوة دخل من فتحو لباب
صوتة يهمس تعاي وبيدة يأشر بأنفعال
تقربت الة لتلفون على اذانة
بعدة شوية عنة وكال هذا غضنفر احجي ويا
شحجي
احجي مثل لأوادم من يحجون كليلة احبك كليلة مااكدر بدونك
سوي شي بي حظ ولو مرة بحيااااااااتج
مامستوعبة لجاي يحجي افز من نترة بغضب بصوت هامس
خلا لتلفون على اذاني
صوت غضنفر يهمس بتعب
لاتصيح عليها
انة لأوراق ماادلي بشر بمكانهن انة اريد اموت مالك غرض بية
صوتة حيييييل صرخ ااااااخ
حسيت طبلة اذاني نزرفت
بتعدت ارجف واصرخ شبيك غضنفر شبييييييك
صوتة تغير وصوت واحد يصيح علي صوت ضرب وصياحة
بدون شعور جنت اصرخ
غضنفر اني احبك والله احبك ومااكدر بدونك
دليهم بلأوراق فدوة دليهم
ايد قيصر همش التلفون من على اذاني
وصار يصرخ بيهم
لاتضربو ولد لكللللللب
دخل الكاكم الة ارجع واحدكم بضهر ابووووووو
صوت عمة امريكا وام فدعم الي اجن يركضن مفزوعات جلبن بي ويتوسلن
يمة لاتصيح اخيك يمهم يضرونة
صميدع وستار نزلو من فوك يركضون علدرج
كسر خاطري صميدع عثر بلدرج ونلوت رجلة ووكع
كومو يتلوة من رجلة ويتألم
برا طلع قيصر وكلهم ورا
لحكتهم خطفت من يم شباك المطبخ
رجعت ليورا اسأل بروحي هذا شنو لأبيض
لمن اتقرب للشباك
دشداشة غضنفر على راسي لافة روحي بيها
وكفت بلباب شوية ونفتحت باب لشارع ودخل حمزة وورا سللامة تسأل شكو
وية ماكالت شكو قيصر حيل نتر بيها ومن ضهرها دفعها لباب لشارع يصيح
طلعيييييي
طلعي بت الكلب كل المصايب من جوا راسج
حمزة ماحجة شي لحك امة دخلها لمشتملها الي بابة من ورا لبيت ورجع يسأل شكو
قيصر ينتر بأي واحد يحاجي
شكو قابل
ميقبل يدليني بمكان لأوراق ميقببببل خبلني
يكللهم كتلوني لأوراق مادليكم بمكانهن ايسو
بقو يحجون ويتناقشون كل واحد حجاية الي يهدي والي يندعي والي ينطي مقترحات
دخلت جوا انغام بلصالة كاعدة وقسورة يمها راسة بحضنها ويبجي
تقربت الة جريتة
انت شبيك تبجي ماما
شبية يعني
ابوي مااعرف شنو وضعة وتكليلي شبيك تبجي
حضنتة لصدري يدفع بية ويشهك
لاتبجي ماما اندعيلة
انت طفل بريء قريب لربك
كلة اريد بابا منك حفظة الي ورجعة سالم
لخاطري ولخاطر اخوي
بقة يندعي ببراءة ودموعة تنزل صح فترة قليلة بس حبة لغضنفر فاق حبة الي وهذا الي شفتة بعيني
بأكثر من موقف
مانمنة ليلتها وصوت صرختة من ضربو براسي
واتخيل وين يضربو وشلون يتألم
فجرية منصور وانغام طالعين قبل مااكعد
جنت نايمة علكرويتة وقسورة بلكاع
من وعيت جانو مغطيني بدشداشتة على وجهي وصدري ولنص جسمي
رفعتها جانن لبنات بلمطبخ اسمع اصواتهن
كمت على حيلي صحت على اماني نطتني شال
كومت قسورة للغرفة يكمل نومتة سألت على انغام كالو راحت هية ورجلها وكالو يومين ويمرون ياخذوج انتي وقسورة
سألت على قيصر مارجعو اتصلو بي
كشمش :- لاوالله خية مكابل لتلفون وكاعد من الليل
لانام ولا اكلة لكمة
احطلج ريوك تاكلين
_مااشتهي لعسل
كمت طلعت برا ادور على قيصر
دكيت لباب صاح تفضل
دخلت وية دخلتي تأفأف ورفع تك حاجب بنضرة خزر ودار وجهة
تقربت يمة صبحت
فرك وجهة ورد
سألتة شنو صار على غضنفر
كلشي ماصار صارلهم ٥ ايام يدكون علي يردونة يكللهم على مكان لأوراق ميرضة يحجي
اتصلو بية كالو اثر علي خلي نسوانة جهالة يحاجو
معاند وميرضة يحجي
زين ليش ماتتصل بلعقيد الي امنك توصلهن الة
صفن وكال
هنة لو عد لعقيد مااتصور يسلمهن بعد بيهن ترقية وفلوس هذني
بس هم على كولتج راح اتصل بي
بس كولي منين احصل رقمة ومنين اجيبة
_ماطول تعرف اسمة اكيد تكدر تحصل رقمة من جماعة غضنفر
اسأل حمايتة على عناوينهم وارقامهم
شسأل انعام غضنفر حمايتة ٤ مرات بدلهم قبل مينخطف بشهرين وتالي طلع مستقيل اصلا
فكر فدوة حاول بلكي تكدر توصل الهم
هز راسة وماجاوب صافن للكاع
عفتة وطلعت
للعصر اجت سللامة سلمت وكعدت بلصالة تسولف وتستفسر وتنطي مقترحات
شوية وطب قيصر اشرلي كال جيبي قسورة وتعاي
رحت يمة
طلع تلفونة وكال
هذا رقم العقيد حصلو الي جماعة الي بلتربية
اتصلت بي وحجيت ويا كال لأوراق صعدن بجهات عليا ولايمكن بعد ننطيهن الكم وبقة يكلي محد يموت غير بيومة وهوة رايد يموت موتتة شرف ومن زمان يتواصل وياي واكثر من مرة نبه علية انو اذا نخطف أو صار اي شي علي مااسلم لأوراق ولا لأي سبب حتلو كتلو
من خلال كلامة اتضحلي انو هوة صديقة وعندة علاقة قوية بي
بقة يسولفلي ويكلي هوة كال اني ماتت بنتي وخسرت مرتي بعد شعندي عايش
عاد خل اموت موتة بيها حظ
حتة عليج مسولفلة وعلى ظروفكم وهواي تفاصيل
احجي ويا انتي قسورة بلكي يلين وينقهر عليكم
ماردت اخليج انتي وقسورة بلوسطة وروح فدعم بس مابيدي حيلة
عسا ولعل ينقهر على قسورة
دك علي ونطا لتلفون لقسورة بعدة يريد يوصي ويعلمة شنو يحجي
قسورة من وحدة نزلت دموعة وصار يشهك ويكلة
عمو اني ابن غضنفر قسورة
الله يخليك نطينا لأوراق خلي ننطيهن الهم ويرجع بابا
الله يخليك عمو اني كلش مشتاقلة
بابا اذا مات اني ادعي عليك عد رب لعالمين واكلة انت لسبب
سحبت لتلفون من ايدة بدموع وصوت ماليتة لكسرة ترجيتة ينطينا لأوراق لخاطر ابنة
بقة يستغفر وماحجة شي
اخذة قيصر مني وطلع برا يحجي ويا
شوية ودخل وجهة مستبشر كال
راح يدزهن النة ليوم
لمركز من ايام مبلغين كلشي ماكو كل يوم وعود وكل يوم يكولون جاي نشتغل علقضية ومن هلحجي وكلشي ماكو
للضهر ندكت لباب طلع طالب وويا ولد صاحبة
بقينة نتاني لأوراق يدزهن
لليل ولأوراق ماكو وعدة ليوم وصبحنة بيوم ثاني ولأوراق ماكو
نلوب ونتصل بي يكول انتظرو يوصلنكم ان شاء الله
وعدة اسبوع واحنة ننتظر لأوراق وهوة مادزهن
وكلما نتصل يكول جاي احاول احصلهن
لأوراق موعندي عند جهات عليا وجاي احاول احصلهن الكم
متنة وخلص صبرنا
كل يوم نصحا على امل لأوراق وكلما يتصلون يطلب منهم قيصر يحجي وية غضنفر ماينطو الة ولايخلو يسمع صوتة طالب طول هلفترة وية لولد ماعافهم
رغم مسافة بعيدة وتعب علي روحة ورجعة بين يوم ويوم ومرات لولد يجلبون بي يبات يمهم
شهر عدة شفنة بي لمر
لاهمة الي يخلونة نسمع صوتة ولا لعقيد يرحمنة ويدز لأوراق
كل اتصال يوعد ويحلف انو جاي يشتغل ويحاول يحصلهن وينطيهن النا
تعبنة هلكنا قسورة فقر دم صار بي من قلة لأكل
واني امشي واوكع من طولي
شهر كل الي بلبيت بلا عافية
نحط لصينية ونشيلها محد ياكل
وصلت مرحلة اوكف بلحديقة اصرخ يارب اخذني وخلصني
اذا اجاني خبر غضنفر اموت اني اموووووت
الى ان بيوم اتصل لعقيد طلب من قيصر يروح الة
رجع ويا لأوراق
لفرحة الي غمرتني خلتني بلكاع اسجد بدون شعور
لليل اتصلو بي كل يوم يتصلون من رقم شكل ومجرد مايتصلون وتخلص لمكالمة لخط بعد ميتحصل
بلغهم انو حصل لورق وطلب منهم يحددون مكان ووقت للتسليم
نطو موعد
سد لتلفون سألتة شوكت كال عكب باجر
يومين عدن مايرضة الوقت يمشي
الى ان حان وقت التسليم بلكاع كاعدة على سجادتي واسمع صوت حجيهم برا
طالب:- بربك صدك تحجي طفل يودي لفدية
شهر صارلة مايرضون نسمع صوتة تتصور بعدة عايش ؟
ترا مات وشبع موت بس ميكلولكم لأن يردون يوصلون للورق
عوف لولد سالم لأمة كافي عليها خسارة اختة
اذا انتو مضحين بي امة مامضحية بي
تقربت بأعصاب اصرخ على قيصر-
تريد تدز ابني يودي لفدية
احساسي مايوم خااااااااب
جنت خايفة اجيكم ويصير شي على ابني وطلع احساسي صح
تريد تضحي بأبني قيييييييييييييصر
شلون اضحي بي شلون
ولج هذا سلاحي بخصري ورجلي على رجلة ولعقيد داز ٥٠ شرطي وظابط وياي يتخفون ويحاوطون لمكان الي رح يتم التسليم بي ومااهد قسورة ولا يبعد عني خطوة
اسسسسسس لتبررر بحجج واهية
عيب علييييييك اني موطفلة كدامك برمشة عين ابني ممكن ينكتل
تكدر تأخر لطلقة انت لو تصدها عنة
اي اصدها عنة اصددددددها
بيدي راح اشيلة حتة مااخلي يمشي على لكاع
همة لايعرفون قسورة ولاالهم غاية
الي طالب قسورة غضنفر اخوي واعرفة
وليش يطلب قسورة لييييش
يمكن ماناوين يهدو ورايد يودعة
واني ابقة عليمكن مالتك
ابني ميتحرك خطوة من لبيت
واني هسة اطلع من لبيت واخذة واروح لبيتي
تردون تضيعو الي ماكافي اختتتتتتتتة
اني شسوي يابشر احتاريت بزماني
اخوي جاي يروح من ادية والله مامضحي بي ورب محمد ورايح ويا
وشيل اشيلة على صدري ماخلي حتة يلوح لكاع ولو صارلة شي اني مسؤل
مايوكل هلحجي مايووووووكل
سحبت قسورة من ايدة
دفعني ويكلي اروح عوفيني
حيل ضربتة بدون شعور وسحل اخذتة ليجوا
شوية واتصلو علي
ليجوا لحكني يكلي هاج
صوت غضنفر يهمس قسورا بابا تعال وجيب لأوراق مايأذوك كلشي مايسوولك اصلا ماتتواجه وياهم تذبهن بسطل زبالة وتروح
انة اريد اشوفك محد يمسك بسو
اخذ لتلفون مني يحجي وياهم
حيل سحبت قسورا للغرفة قفلت لباب علي ولمفتاح ضميتة بصدري
اجة قيصر حجة توسل راد كتلة اببببد
ورا ساعة اتصلو بي كللهم ماتقبل امة يجي لطفل
كلولة جيبهن انت وتعال
اخذ لفلوس لوحدة وراح
ولعقيد ويا علخط وظباط متخفين ولاحكي
ساعة ساعتين تلاثة قيصر مارجع وميرد على تلفونة
لبنات يلطمن واني حاضنة قسورة وابجي
اتخيل لو رايح ويا جان متت اني من اول ساعة
ساعة بل٩ بليل صوت سيارات برا
ركضنة كل احنة ناس تدفع بناس
فتحو لباب لولد نزل قيصر وويا طالب وصميدع وثنين ظباط
غضنفر ماوياهم
قيصر قميصة مشكوك وشعرة منكوش
عمة امريكا صرخت يبوووووو وكشمش حيل شكت ثوبها وبلكاع وكعت
ليورا رجعت عيوني مفتوحة
نتجيت علحايط احس بعد مابية اوكف
جسمي كلة يرجف دموعي تنزل شكولهم غوشت
مدري شوكت وكعت بلكاع
اسمع صوت وحجي وادين تضرب على وجهي
ماي نذب على وجهي نززني
وصوت عمة امريكا تصيح ولج كعدي كعديييي وليدج تخبل لاتزودين علتنا .......يتبع
مساء لخير حبايب لبارت ٥الاف كلمة تعبت وايدي شكلت 😭 ليش تفاعلكم متراجع هلشكل خو لفيس سنننطة ليش يعيوني هيج هذا تعبي ميستاهل دوسة لايك وتعليق
شفتو موعد لأمتحانت واني بركبتي اربع طلاب من اربع مراحل احتمال اقلص طول لبارت و اعذروني اذا اقصر وياكم
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!