#خنجر_الغضنفر
#البارت_الخامس_والعشرون_٢٥
#حنين_حاتم
قيصر..
جان واكف كدامي يبتسم بمكر
_طاااااهر شجاابك يانذل
_مقبولة منك ابو طويلة
شلونك شخبارك لايكلك لسفر
يكولون صاير مثل ام لبزازين يومية بمكان ومحد يندلك
بس على منو يابا ماتعصى علية
_لا ولنعم مشهودلك يلنكَس عليمن تطلع طاهر
ابوك طاهر امك طاهرة ؟؟
_يابا كلشي منك مقبول بس لاتجيب امي بلسيرة
_تعال ابن لطاهرة طب
شجابك كَلي
_جايبلك امانة من جدك
توقعت لأمانة فلوس بس من طلع ضرف من جيبة
وقبل مايفتحة بتسم بمكر ويغمز ويهمسلي
بيك على شوفة هلصور لو كلبك رجيج
سحبتهن من ايدة حييل
فتحت لضرف جانن صور كلبتهن
احس عيوني قربن يطلعن من محجرهن
حسيت كأني خسرت ثورتي للمرة لثانية
كانت اول مرة اتذوق بيها شعور لغربة لهلحد
لاشعور يظاهي رؤية لأنسانة لوحيدة الي حبيتها وهي تلبس لأبيض
لوحدها بلصورة واكفة
على يمينها اكو واحد لابس قاط ومدنك يتناول شي من لكاع
لنضرة الي بعينها بألف شعور
لخذلان لبيها وصلني
عروس يزينها لحزن
لخيبة
كأن على وجهها مكتوب عتب
تمنيت اكدر اخترق لصورة وادخل احضنها بكل قوتي
اضمها بملابسي
احشرها بصدري حتة تسمع صوتة
تمنيت امزجها وي دمي
أو حتة اقتلها برصاصة واقتل نفسي اريد تغادرني فكرة انو راح تكون وية رجال ثاني بغرفة وحدة
عيونها لحزينة تعذبني
اني ماحبيت كل عمري
شجاني وطحت
ايدي تتلمس صدري وتنزل بطني ابحث عن مكان لألم الي اجهلة
عسا اطرافي لباردة تكدر تخمد لهيبة
كدامي طاهر ببتسامة ماكرة
يذب لملح على جرحي ويضحك
مانطقت حرف
جنت اغوص بأعماقي ابحث عن بقايا روحي لغارقة بوسط هلشعور الي بدة يلتهمني
ابحث بداخلي عن ايدي الي تلوح من وسط غرقها عسى اكدر انقذني
ضعت يابلقيس وضيعتج
صوت هادي يهمس وايدة تخضني بقوة
رفعت راسي اعاين الة
ايدة تأشر بإنفعال وينتر
يمعود شبيك ترة خرعتني اخض بيك تكول صنم متكلي شبيك تحجرت
ومنو هاي لعروس
رفعت راسي وبغصة طلعت لأحرف تشقق شفتي ولساني
هاي بلقيس
هاي حلمي لضايع
هاي ثورتي لخسرانة والي طلعت منها احمل ريحة حرق اجساد اصدقائي وبارود لأمن
هاي خيبتي
هاي وعد نقضا رجال
هاي كلمة شرف ماتت على شفافي
هاي مقبرتي الي دفنت بيها روحي واجيت لهنا فاااارغ
هاي اني بس بطين ثاني
صوتي لقبيح يحول دون كلماتي
كمت واني اعفس لصورة بيدي واتوجه للباب اغادر لمكان ولمدينة مثل نوارسنا لحلوة من غادرت اهوارنا لشحيحة
وصوت طاهر يصيح وراي
ذني فلوس راح اخليهن الك يم هذا لولد
لتعب نفسك وتتشرد ترة الكاك وين متروح
بصوت يتجمع بي انهزاماتي نترت
هلمرة ماتلكاني لا انت ولا همة
ووصلها لجدي وكلة
طيركم ضيعتو
طلعت برة
وكفت انتضر سيارة
صوت هادي وراي تقرب الي يهرول
_وين رايح قيصر
_ماعرف
ستهدي برحمانك وتعال ياخوية وين تريد تروح تعال نسولف اذا مختنك تعال نطلع اني وياك
عوفني هادي
بعدتة عني وتمشيت اعبر لشارع
لحكني
جنت محتاج اشرد من نفسي ومن كلشي
بقة مثل ضلي يتبعني ركبت لسيارة ركب
صوتة يهمسلي
قيصر اعقل شدتسوي وين رايح غير اعرف
بغضب نترت بي
عوفني
يااخي عوفنييييي
اني تعبان خليني اشرد من ضجيج روحي
طلعت لصورة من جيبي وبلجداحة حرقتها لتهبتها لنار وبدت تمشي بيها وهي بيدي
الى ان وصلت لنار لوجهها لنضرة عينها الي تحسسني بقباحة ذنبي
مالكيت نفسي غير واني اطفيها بيدي
متجاهل لسعة لنار لأصابعي ولرماد لملاهن
نكتت لرماد عنها
جان وجهها سليم
ملامح وجهها مالايحتها لنار
مكتوبلي اموت بهاي لنضرة واندفن بيها
رجعت لصورة لجيبي
وبديت امشي بكل سرعتي
لحكني
حاولت اضيعة
واخيرا تمكنت من انو اضيعة
وضيعت نفسي هم
مااعرف اني وين ولا اعرف طريق للرجعة
تمشيت لمحطة قطار
جانت فارغة وصامتة بيها شكم شخص
شوية ووكف لقطار،
نفتحت بابة وبدو لناس ينزلون
ثواني وكتض لمكان بيهم
ضوضااااء حجي ناس تبيع
ناس تسولف ناس متيهة بعض وتصيح
حسيت ضربات كلبي بدت تتسارع وجهي عرك صدري يضيق كلما جالة حسيت نفسي اريد اتقيء جسمي يرتعش اطرافي تتحرك لوحدها
بديت اشوف لناس كلها تتجه الية
اعداد هائلة متوجهين الي كأن ناوين يخنقوني
بديت اشوف لمكان يصغر لقطار ينسحب للأسفل ويختفي بداخل لكاع
لحيطان تقترب على بعض
وحفرة نار توسطت لمحطة
حاولت اسيطر على نفسي حاولت اطلع من لمكان بأسرع وقت
بس نكرة لنار حالت بيني وبين طريق لخروج
بلكاع كعدت وصرت اصرخ بكل قوتي
طلعوني منا طلعووووووووني
صارو يتجمهرون حولي
بلكاع جنت وكلهم داير مدايري
فقدت لسيطرة على نفسي وبديت اتصرف مثل لمجنون
هذا الي شفتة بعيون لناس الي بدت تبتعد عني وتصرخ
مجنون مخبول
بتعدو عني مسافة
حسيت كلشي بدة يرجع لوضعة
كمت على حيلي مكسور خاطر على نفسي
لياحال وصلت
معقولة هذا اني
جنت امشي وافواج لناس تنشق مبتعدة عني
كلشي توقعت بس انو اكون بهيج موقف بيوم من لأيام هاي الي ماخطرت على بالي
مشيت ومشيت الى ان حسيت راح اوكع من لتعب
بلكاع كعدت ونتجيت على حايط محل بعد مااخذت من عندة ٤ بواكيت جكاير
ايد على متني تخضني بكل قوتها
وصوت يصيح يم اذاني
فتحت عيني وجهها بوجهي
جانت معصبة وتنتر
_صدك جذب قيصر شتسوي هناااا
كمت على حيلي اعاين اني بلكاع نايم على كراتين شامرهن ابو لمحل
داير مدايري كطوف جكاير كومة
فركت وجهي واني احاول استوعب
وصوتها لايزال يوبخ
_لا انت اول ولا اخر واحد تتزوج لأنسانة الي يحبها ذاك هادي طلعت من دربونتنا كدام عينة زفوها على ابن عمها اشو ماسوة سواياتك
كافي عاين لنفسك
وين ثقافتك وين صيت اهلك بلزبل نايم ولجهال تضحك عليك
تضيع نفسك علمود انسانة جائز هية بأفضل حال هسة ونستك
اذا ماجانت حامل
كمت على حيلي متجاهل كلامها
مشيت خطوات
وهية تتبعني سحبت ايدي وعبرت لشارع وياها
جنت امشي وياها بس فكري مو عندي
مشينة مسافة دخلتني لمكان
جان لمحل الي تشتغل بي
كعدت علكرسي جابت الي جاي
شربت
غسلت وعدلت شعري
مشت لزباين واجت تقربت الي همست
_جوعان ؟
_لا
_اي حقك على هلجكاير لشاربهن متشتهي لعسل
كمت وعفتها
تبعتني بتوسل
ارجع للبيت هادي بالة يمك مانام اليل كلة
اجرت سيارة ورجعت
لشقتي مااكدر ادخل
دكيت لباب علي
فتحها يفرك بعيونة
سحبني يلوم بية
_صدك جذب ليش هيج تخلينة بقلق ترة ميصير هيج قيصر
_كلاص جاي بروح اهلك
نطا الي وبعدة يلوم
دخل جوة جاب فلوس حطهن كدامي
_هذني طاهر بقاهن الك
تلمستهن جانن قليلات مومثل كل مرة
سحبتهن دسيتهن بجيبي ونزلت من لبقال اخذت مسواك ووديتة الهم
بقة هادي يلوم
_متستحي شنو شاكيلك احنة شيخلصك من هيفاء ليوم
_يابا عتبروهن مساهمة بلمسواك اني مااحس بلذة لأكل اذا ماادفع بي
دخلت جوة يمة
جابلي لفة جبن ويهمس
نام تلكاك مانايم
لا وداعتك شبعان نوم اصلا
تعلمت على نومة لكاع
جريت حسرة على حالي استذكر فراشي وغرفتي
بقيت يمة للضهر
جان يسولفلي على مخططاتة بعد لسفر
_هناك لو رحنة الكالي شغل واشتغل مااخلي هيفاء تشتغل بعد
_ليش ماشتغلت هنا
_دورت هواي محد شغلني بس هيفاء محضوضة بس راحت قبلوها
شوية ودخلت هيفاء هلمرة جايبة ٣ لفات
شافت لمسواك كامت تحجي
عصرية نزلت للكهوة بقيت اشرب جاي وادخن
الي ان نزل يمي هادي
اول ماكعد كال بفرح.
_احنة راح نفيز خلال هلأيام
بينلتة فرحتي بسماع هلخبر رغم مافرحان وخايف من وضعي
ستغربت كلامة لأن الي فهمتة همة جانو مأجلين طلعتهم لأن فلوسهم قليلة
_كملتو فلوسكم؟
_اي ابن عمي راح يدزلنا خلا هليومين
بقينة نسولف الى ان صار اليل
صعد هوة لشقتة واني لشقتي بلعتبة بقيت كاعد
ورة هذا لباب ينتضرني عالم مجهول
تخيلات هلوسة جنون ماعرف شنو لجاي يصيرلي
ولا اعرف اذا سافرو شراح اسوي
صوت رجلين علدرج يقترب مني
صوتها يهمس
_عرفتك كاعد هنا
_شجابج
_اجيت افتح وياك موضوع
_تفضلي
_ليش متطلع ويانا شعندك باقي هنا
لا عائلة لا ارتباط وبكل لأحوال انت بغربة هنا لو بأمريكا
انت متغرب هيج هيج
صفنت على كلامها اقلبها بدماغي
فعلا ماعندي اي ارتباط ورجعتي للعراق تخوف ولسة جدي مااذنلي بهلشي ومامعلوم شوكت ممكن يأذنلي
وحتلو اذنلي ياترى راح اكدر ارجع للعراق
راح اكون بنفس لبلد لبي بلقيس بس مااكدر اتواصل وياها
صوتها يهمس يقنعني ويذيب اي تردد باقي بداخلي
انت تعبان قيصر اني فرحتي متنغصة لأن ادري محد عندك غيرنا راح ابقة افكر بيك
وحتة هادي
امشي ويانا هناك نستقر ونأجر شقة احنة نشتغل وانت اهلك مديقصرون وياك الله يحفضهم
_افكر وارجعلج خبر
كامت على حيلها تمشت خطوتين
وندارت الي دنكت همستلي
_هناك لأمريكيات لشكرات ينسوك بلقيس
_محد ينسينياها هاي معجونة بطينتي
_تصبح على خير
مشت وبقيت افكر بكلامها
واني بعتبة لباب شفت هادي نزل اشر سيارة وركبها توقعتة رايح للسوك
ورة اقل لساعة رجع ايدة فارغة
بقيت للفجر كاعد
قريب لأذان نمت
فزيت على صوتة يوعي بية فرحان ويلوحلي بشي بأيدة
فتحت عيوني افرك بيهن
عاينت على ايدة جان بيها ..............
بلقيس...
حاولت اتحمل وبعيني صورة ابوي وتوسلات امي
بس من بدة تخنك بية وحسيت لهوة نكطع
فتحت عيوني اصرخ زييااد شبيك تخنك بية
ماشفت زياد شفت كدامي ماعز بهيئة مرعبة كرون وفك واسنان وحوافر ماعز كاااامل
الي كدامي مابي من هيئة زياد ابدا
لكدامي حيوان لاغير
دفعتة بفوضوية ورعب وصرااخ
بتعد عني بلكاع وكع من اثر دفعي الة
فتح لضوة
عاينت الة
زياد بشحمة ولحمة
صرخ بية بإنفعال
شبيج تخبلتيييي
ماجذبت امي من كالت تسوي افلام ودتغطي على شي بيها
زياد جيبلي لقران احلفلك بي
اني شفتك بهيئة صخل
ايدة طبعت على وجهي وبصرخة نتر
إحترمي نفسج ادبسز اكو وحدة هيج تتجاوز على رجلها
اتجاوز شنو
دااكلك اني شفتك بهاي لهيئة
زياد اترجاك بدل متكون جزء من لمشكلة حاول تساعدني وكون جزء من لحل
شسويلج يعني اذا انتي كارهتني لدرجة تشوفيني حيوان
او يمكن مثل مدتكول امي دتجذبين وورا جذبج اكو شي
زياد انت بعضمة لسانك كلتها امك تكرهني
يعني كلشي ممكن تسويلي
واني مستعدة اثبتلك
شلون بله
نروح اني وياك لناس تفهم بهلامور ونشوف كلامهم
اني مااؤمن بهلامور شلون ترديني اصدكها
بلقيس عقلج وين عود هاي انتي لدارسة شخليتي للمتخلفين ولجهلة
هاي مابيها دارسة وجاهلة
لسحر موجود تكدر تنكر
اوووو بلقيس يزي عاد ييزي ماطلع عرس يومية حجة
اني تعبت شوفي صرفة لنفسج
عافني وطلع للصالة
رحت علتلفون دكيت على بيت عمو وطلبت احجي وية ماما
بدموع همست الها
ماما ماكدرت والله مجرد ماتقربلي شفت شكلة صخل
_ ماكو غير اخلي ابوج يقنعة يغير لكاشي مال لبيت ويكلة هاي هدية عرسكم
يوم ثاني لصبح اجو امي وابوي تريكو يمنة نطة بابا لزياد فلوس كالة غير كاشي لبيت وإعتبرها هدية عرسكم
ببالي لفكرة جانت انو اقنعة اني ويا نشلع لكاشي اختصارا لاجور لعمال وهمة بس يجون يخلون جديد
ومن نشلعة احاول ادور على لعمل بلكي الكا واخلص
اخذ لفلوس من بابا ونطن عيونة من لفرح عبالك كل عمرة مالازم فلوس ولاجنة يبيع ويشتري بلعقار ولسيارات
بنفس ليوم راحو اهلي لأن بابا عندة دوام بقت امي توصي بية
حجيت ويا على سالفة لكاشي كال اجليها فد يومين عندي شغل
بيومها طلع للشغل رجع ملابسة كلها تراب وجص
تلكيتة اسأل
_هاي شنو ملابسك وين جنت
_طلعت واحد خلفة ببيت لازمة لناس اكمل بناءة واسلمة الهم لخلفة طلب مني اشوفلة عامل على معرفتي لأن هوة مومنا محافضات ويجي يشتغل هنا
اني كلت ليش تروح للغريب اني اطلع ويا
_يعني شتغلت عمالة ؟
_اي ليش لاء
_كل لعندك وتشتغل عمالة حررام عليك تنافس لفقرة الي لكمتهم كوة دابرة
_حرمت عليج عيشتج حرام علية ليش
شتغل واجاني ليش ارفس لنعمة
سويلي لكمة اريد اناملي شكم ساعة ولد خالي ليوم يجونة همة ونسوانهم
حميت لاكل وخليتلة
اكل ونام
دكت علية امي واني احجي وياها ندكت لباب بقوة
طلعت بساع مفزوعة فتحتها
مرة عمو وياها مرية غريبة
دفعتني وطبت
لمرة سلمت ودخلت وياها
طبت تفرج بيها علبيت وتشرح الها
هذا لمطبخ شوفة عينج شكد وسيع
هاي لصالة
هاي غرفة لنوم ولمنور مناك وذني صحيات وفوك سطح تصعدين تشوفي
_ لادادة تعبان ماعجبني احنة نريد بيت نضيف هذا يكسرني بلتنضيف وهم ميبين بي
_بكيفج دادة هوة على كد فلوسة قابل شكد ناخذ منكم اجار واي شي تذبو علي نكطعة من فلوس لأجار
_عمة شنو لسالفة اشو تاجرين ببيتي واني كاعدة بي
_اي عيوني اذا انتي ماتردين ابني شنو ابقة اباوع على شبابة يضيع اريد اعرسة
وانتي الج فرصة اسبوع اخذج زياد خير وبركة
مااخذج وبقيتي تسوين افلام ترحين لبيت اهلج تندلين لسيارات لو ادليج حبيبة ؟
خليتها لمرة طلعت وهية وراها تريد تطلع
سحبتها على صفحة واغلي
_اكلج عمة اشو اني ماحزرتج
كلتي اذا ماتخذين زياد اسطكج بلسحورة وادمر حياتج اخذتة على عمات عيني حتة اخلص من اعمالج
يطب علية رجلي اشوفة حيوان واني وياج ندري انتي لسبب
هنوب طالعتلي بسالفة تردين تعرسي علية وتنطيني فرصة اسبوع
شنو لتردي بلضبط لأن اني بعد ماعندي صبر
لحد لآن جاي اتعامل بأخلاقي اما لوتجردت من اخلاقي وصرت مامؤدبة مثل ماتكولين علية
ترة ميوكف بعيني لا عم ولا زياد ولا كائن من كان
حياتي هاي محد ديعيشها غيري
اني الي داأتدمر
شنو لتردي مني
عفت ابنج لا خلصت
تزوجتة لاخلصت
فهميني شسوي ترة بأفعالج دتفعيني للخبال
اووووي عيني منيلج هذا لحجي
كوم زياد كوم اسمع وشوف مرتك شلون تهين بية ببيتك كوووم
دخلت ليجوة تصيح تريد توعي
وكفتلها وسديت باب لمطبخ عليها
وبنفاذ صبر وغضب نترت
شنو الي تردي منيييييييي
رفعت فوطتها على وجهها وصارت تبجي وتتحايل
شريد منج يبلقيس وشعندي وياج
تكرهيني انتي وامج من يومجن واخذتن لولد موحبا بي تردين تقشمري وتاخذنة يمجن امج دكت وناحت على تغيير لبيت نيتجن سو والله ليعلم بيها
اكلتيني وشربتيني ماطابة لبيتج اني طابة لبيت ابني
صوت زياد من وراي مخروع تقرب
_شكو يمة شبيج
بلقيس شصار شبيكم
_تعال يمة شوف مريتك شتسوي بية
يافشلتي كدام جارتنا كلتني وشربتني عود جاية لمرة تتبارك الكم خلت وشردت من ورة مرتك
_بلقيس شصاير فهميني
امك جايبة وحدة تاجر بيتنا حتة ماستاذنت مني
ضربت صدرها وشهكت وندارت علية تنتر
_عمة بعينج كون منا لهنا جذبتي
ولك يمة لمرة جاية تتبارك الكم وانة شوفتها لبيت بيها شي
لو ممنوع اطب بيت ابني
صوتة بنتر
بلقيس طبي سويلنة جاي
تعاي يمة هسة عليمن تبجين
دخلت للمطبخ افور مشكلتي مااكدر اجذب وامثل مثلها
سويت جاي اجيت خليتة علطبلة
لمصبرني مصيبتي لسودة ولحد لآن ماالي تأثير علي احسة كارهني وكلما احاول اقنعة انو اني داشوفة حيوان يتخبل علية وينفرني اكثر
اني نفسي ممصدكة لسحر يسوي هيج
ولاسامعة بهيج شي عمري وحياتي
بقيت بلغرفة وهمة مدري شيتبسبسون
اول ماطلعت فتحت ويا موضوع لكاشي
هسة روحي تحضري وحضري شي تقدمي ولد خالي على جية
طبيت للغرفة شايطة
تعوذت من لشيطان لبستلي كوستم خليت مكياج خفيف وطلعت للثلاجة جان اكو فاكهة باقية من الي جابة بابا كصصتة وخليتة بصينية
طلعت برة كتلة جيب بطل شربت
شربت عليمن هذا جاي وسوي
ادري فاتحة هي وجاين يخلفون علينا
_ليش وينة هوة لعرس ؟
عرفتة راح يفتح نفس لموضوع طبيت للمطبخ خدرت جاي وأفور وية فورة لجاي ودمعتي بعيني
ندكت لباب طلع ودخلو ويا ثنين ولد اعمارهم تلاثينية وياهم زوجاتهم واطفال
رحبت بيهم ودخلو للصالة
بعتبة لصالة عثر واحد من لجهال بلكاشي لمكفع ووكع على وجهة شوية من شفتة نشك وجرت دم
امة وابو فرفحو علي
وهوة بكل تفاهة وسذاجة يضحك ويكفخ لولد على راسة يكلة شبيك متشوف كسرت لكاشي مالتنة
كعدو بعد ماسكتو لطفل
اخذتة من ايد امة وبقيت افتر بي واسكتة
ام لطفل الي تعور بقت تسولف وياي وندمجنة اني وياها
هي هم خريجة تربية بقينة نسولف علمدرسة ولطلاب ومواقفهم
تمنيت يرحون قبل لعشة لأن كلشي ماعندي اطبخة وادري اذا اكلة يخزيني كدامهم
صلو وورة لاذان بعد مترهم لازم اسوي عشة
طلعت هلموجود نواشف وصحتلة على صفحة كتلة جيب لحم مثروم خل اسوي عروك
بصوت عالي بدون خجل
شيطلعني بهليل للكصاب متحجين بلنهار
عفية مرة متعرفين جاييج خطار
بيتج وثلاجتج متعرفين شبيهن مابيهن
تحول لموقف ضدي وصار يوبخ بية مثل طفلة ويتعمد يسمعهم
صوت ولد خالة من جوة صاحو
زياد على كيفك وية لبنية شنو احنة جاين نجربكم
نزلت دموعي تمنيت لأرض تنشك وتبلعني
وكفت علطباخ كملت لعشة بلكوة وصبيتة
لأكل جان عبارة عن بيتنجان وطماطة وبتيتة وقليل مايكفي نفرين
علما كملو وشلت لصينية اني كوة حابسة دموعي
اما هوة جان يضحك ومندمج ونفسة مفتوحة ياكل بشراهة
بلباب واكفين نودعهم
خلو لولد بيدة فلوس ولبنات هم خلن بيدي فلوس
صوت ام احمد لولد الي تعور تهمسلي
لتضوجين دادة احنة زياد متعودين علي موجديد علينة
بتسمت بخجل
راحو ومجرد ماركبو سيارتهم
نهاريت بلبجي
دخل ليجوة يفر ايدة ولاكان صاير شي
وعافني بلحديقة بلكاع كاعدة وابجي
نمت بلصالة بعيد عنة
لصبح كعد للشغل رجعت فتحت سالفة لكاشي ويا
نتر بية
اني ادري ابوج مانطاني لمبلغ حبا بية وادري هاي موهدية
يريد يسويلج قصر براسي
عليمن هلصرفيات ونفتح عيون لناس علينة
هذا لموجود لزوجة تتحمل زوجها
لغضب خلاني انزل لمستوى دنائتة
نطيني لفلوس
ليش اني ماكلهن مثلا ضميتهن ترة
نطيني لفلوس الي نطاهن النة ابوووي
طلع من جيبة مبلغ شمرة علية ونتر
ماعندي فلوسي بلعقار
لزمت لمبلغ بيدي مابي علاكة مسواك
راح هوة للشغل واني رحت راجعت على نقلي
بقيت مدة اراجع
وامة يومية رايحة راجعة علية تسمم بية
شكد حاولت اخذ لسانها وافضحها
من تجينة تسأل علي اكلها طالع بينما هوة يكون نايم بلغرفة
واحجي وياها على موضوع لعمل واحاول اسحب لسانها تنكر وتتفاجأ وتبيعهن علية
كاعدة بلغرفة لازمة دفاتر اصحح بيهن ودك تلفونة جاوب زياد
_تعالي هذا ابوج يريدج
اخذت لتلفون منة ومجرد ماكلت الو
اجاني صوت صياحة
_بلقيس لسا ماماخذج زياد ليييش
تردين تخزيني وللللج
ماكافي سالفتج لقديمة بلكوة نسدت
باجر اني جاي اني وامج واريد افهم شكوووووو
ورة شوية اتصلت امي
صوتها يهمسلي بخفوت
_بلقيس مرة عمج اتصلت بأبوج وتحجي وتعربد لعبت بعقل لرجال الله ليوفقها
لمهم سمعيني هاي جارتنا سولفت الها حالتج كالت خل ياخذها بغير مكان
هسة بعد وكت ماما قنعي روحو زورو وباتو بفندق وخل ياخذج ابوج راح يتخبل اخاف يتخربط للصبح
سديتة منها
غمضت عيوني جريت نفس عميق وتوجهت لمهمة تكاد تكون لأصعب في حياتي
تقربت الة حاولت انسا كل مواقفة لمخزية
_زياد احنة مارحنة زرنة خلي نروح هسة نغير جو ونزور بلكي ببركات لأمام ويتغير وضعي وتتم شغلتنا ونخلص من هلقلق
_انتي شبيج حلمانة ساعة ب٨ بابا وين اكوزيارة هسة
_اي احنة شكو ورانا نروح نزور ونبات بنفدق
_نبات بفندق ليييش فلوسنة هواي لو بيتنا بلبصرة
_منبات بس نروح نزور
زياد اني مريضة اريد لامام يبارك بية بلكي اصير زينة
بقيت تتوسل واقنع بي كوة قبل
ركبنة لسيارة ماكلف نفسة حتة يبدل بلدشداشة ولشحاطة طلعنة
زرنة وكملنة بلطلعة بباب فندق سويت نفسي تخربطت
لولد الي بلأستعلامات اشرولة يدخلني جوة ونطوني ماي
خليتة راح يجيبلي لفة من برة
وسألت لولد على فلوس حجز ليلة
لمبلغ الي نطو الي نسوان ولد خالة كواجب مايكفي واني الي مدة ماخذة اجازة بدون راتب من وكعتي
نزعت حلقتي ونطيتها للولد
جانت خفيفة كلش
ماقبل ياخذها كالي اني عامل هنا
اخذها بيعها ولفرق الك ترة هي تجيب سعر اكثر من فلوس لحجز
حسيتة قتنع
اخذت منة مفتاح لغرفة وصعدت
شوية وندكت لباب ودخل زياد يصيح علية
_ شصعدج تخبلتي اني شنو كتلج
_انت تاخرت واني كلش تخربطت خفت لا اوكع ولولد يحتار،بية
_منيلج فلوس اجرتي لغرفة هنا لفنادق غالية ليش تورطينا
_مالك علاقة اني دفعت فلوسها
بقة متوتر ويلوم بية ويكلي
بدل هلصرف خو اتسوك بيهن للبيت
حاولت ابقة هادئة وببالي حجايات امي
تمدد علجرباية واشرلي طفي لضوة
طفيتة وتقربت الة
غمضت عيوني وبداخلي اندعي يارب تتم واخلص من هلكابوس واكسر عين امة
تقرب الي جرني الة ........
انعام...صعدت للغرفة
فتحت لباب جانت ضلمة
شغلت لضوة
عاينت علجرباية جانت اكو علاكة بيضة
فتحتها بيها ضرف ركزت علطابع لبريدي لبي
ادية ترجف فتحتة
جانت رسالة
هذا خطها اعرفة
كيف حالك انعام
اني اشتاق اليكِ يااختي لا اعلم اذا كنتِ سعيدة ام لاء فكما تعلمين امي تنكر معرفتها بلهاتف الخاص بعائلة زوجكِ ولا املك اي حيلة للتواصل معكِ وانا هنا في ولاية كنتاكي اسعى لبناء مستقبلي وصعوبة لمواد تصعب علي ممارسة حياتي فليس لدي وقت سوى للنوم والأكل
اتمنى ان تكوني مرتاحة في زواجك
انت قوية اخذتي قراركِ اما انا الى الآن اتخبط في متاهة
اتمنى ان ننجمع مرة اخرى واتمنى لكِ السعادة والراحة
بعثت لكِ صوري
ابعثي لي صوركِ على عنوان السكن
ارسل تحياتي الى زوجكِ وعائلته
انغام
دموعي تنزل واني اتفرج صورها
جانن ٣ صور خليتهن على صدري وحضنتهن بكل قوتي وابوس بيهن
كلبت لعلاكة جان بيها قميص بابا
سحبتة حييل حضنتة وشميتة
كأن جنت مضيعة شي وهسة لكيتة
شميتة بكل قوة رغم مابقة اي شي من ريحة بابا بي
صوت وعاني من حنيني واشجاني
وينج انعام تعالي يلله
لميتهن بسرعة وشديت لعلاكة
نزلت جوة اخذت لتلفون على صفحة واتصلت بأمي دك هواااي بس ماجاوبتني
رحت يم لبنات جانت زوري مامرتاحة
وكفنة اني وسللامة علطباخ نسوي تعلولة سياح وتمر نسهي بلدهن لحر
اني احمس بلتمر وهي تسوي لسياح لان ماعرفلة اخربة
عيني على ايدها مدبدبة وبيضة مثل ادين لأطفال
بتسمت وسألتها
سللامة ايدج دبدوبة رغم انتي موسمينة
عاينتلي صفح وكالت
احسن من لصعاجيل
مافهمت بس حسيتها كلمة موحلوة
_عاشت ايدج حلو تصبين لسياح مو مثلي اني يتكطع عندي ويخرب
_بت لمدينة ماتلحك بت لهور لو شمايعلة مقامها
_لا عيني وين نلحككم انتو معدلات
_اي معدلات لاحطينة عينة على إزلمة متزوج ولا هجمنة بيت
_بس اني الي ادري بي بيتج مهجوم من زمان ولوما لفضيحة الي مسويتها لغضنفر ولنفسج ماجان اخذج
_سحبت لماعون حيل من ايدي ونترت
ميلي انة شغلي اعرفنة ماطالبة عونج
_وخرت عنها طبيت جوة وية مادست لعتبة صرخت زوري من بطنها
ركضنة عليها
بيبي شكرية من مكانها كالت
انة من وجها عرفتها وسعلتها جدة عدج وجع
لغبرة تكلي كلشي مامش
ام فدعم كالت ميلن
فحصتها وهية علدرج بعد ماسدن لباب وطردن لجهال
كالت هاي هسة تحصرنا لفجر
بقت بلغرفة جوة تلوب
كاعدة يمها وبدت لطلوكة تقوة عدها
سحبت ايدي وعصرتها
لزمتها كأن مال رجال بقيت اصرخ
دفعتني حيل وصاحت
اجتها تهاني
شمالج خية
تعاي خل اكض ايدج هاي نعيمة ساحت
لزمت ايدها وبقت تصرخ وامها تدحس شيلتها بحلكها تكللها فشلة لزلم تارسين حديقتنا
ورة ساعة طشو لزلم وبقو بس ولدنا عزلو لبرة واجو
للأستقبال دخلو
ستار كلسا يصيح على تهاني يسألها على زوري
للفجر وهي ماجابت
ام فدعم كالت هاي بجر وماجاي تنطي من روحها تخوف خل ناخذها للمستشفى
لبسنة اني وياها واخذونا فدعم وغضنفر للمستشفى
مرينة ببيتهم.اخذنا ملابس لطفل
وهي لطريق كلة تصرخ ورجليها يم فدعم علكير مادتهن كلما ياخذ بريك يدفع رجلها
وصلنة للمستشفى دخلنة جوة طببوها للصالة ودخلت امها وياها بقيت اني برة ويمي لجنطة
تعبانة ونعسانة غمضت عيوني
شوية وصحاني صوت واحد يصيح منو مرافقة لمريضة زهراء رحيل
اكثر من مرة عاد لاسم واني احجي بسري
هسة هاي لثولة وين راحت موديصيحون عليها
ماحس غير غضنفر من يم لاستعلامات ويأشرلي
كمت على حيلي شابكة لجنطة تقربت الة
_بوية احنة جايبينج عون يو فرعون
لزلمة موصارلة ساعة يصيح منو مرافقة زهراء
_اي واني شكو بزهراء
_جا انتي ويامن جاية وي جدتي شكرية غير وي زهراء
بقيت اضحك على روحي
ستار تقرب يسال بية شلونها
ماادري طبت جوة هي وعمة ام فدعم
وصاني اروح اشوفها
طبيت للصالة ادور عليها
فدعم:- واكفين برة لمستشفى ستار يلوب رايح راجع يطلك بمكان زوري
وغضنفر كاعد يم ابو كشك يشرب جاي ويرد ليورة
بيد ستكان لجاي وبيد جكارة
ويسولف وية ابو لكشك لكا ونس كيف علي
انة كاعد بلحشيش واغفي على روحي
ماشوف غير سيارة وكفت ونزلت منها امي ووراها نزلت تهاني لغبرة بطرك لدشداشة
احنة متعلمين بديارنا نسواننة تمشي بطرك لدشداشة عبن مامش غريب بينا كلها حوالينا عمام ابوي وولدهم واحفادهم وبناتهم عبن ماينطون للغريب
وهي لغبرة من تنخبص تنسا روحها
وراهن اجة طالب صاحبي ركن لسيارة واجة يركض بيدة عبا
تقربت عمتي دخلت ليجوة
وتهاني وراها ولولد لاحكها بلعباية
واتناوشها من راسها وحطيت بيها كلة حسيت راسها نمرد بين ادية
اعاين واشوف لدم على وجهها نزل
سحلتها خايف لايشوفني لأمن ويجلبون بية
كبالي حب مال ماي سحلتها غطيت راسها بي
اعاين للحب صار احمر كلة
طلعت راسها وساد حلكَها بيدي
تقرب الي طالب شمر لعباية على راسها
عفت لسويج يم غضنفر وركضت على سيارة طالب بالوني كعدتها وهي كاضة راسها وتصرخ
وحك الله ماريدنك بعد
انة نسيت عباتي بلسيارة عبن مشدوهة
سكتي ولج سكتتتتي
انة شبلاني جايب لروحي علة
ربي مالكيت غير هلمسودنة تبليني بعشكها
نزلني طالب يم بيت عمتة قابلة
تخيط راسها وبقينة احنة برة نتانيها
طالب يغسل بلسيارة مالتة وكع عليها دم
وانة كاعد براك لبيت وادخن وخايف عليها والوم بروحي شلون سويت هيج
صاح علية طالب يأشرلي بيدة
تقربت الة اشرلي على اخر كشنات بلسيارة
اسمع صوت ونين منا ولك فدعم بسلا سيارتي مسكونة
ميل شمالك سوالفك غبر مال نسوان
صعدنة بداخل لسيارة
مانسمع غير صوت مال شخير وكومة سودة جوة لكشنات مدري شنية كلشي مامبين منها
بيدي عودة مال خوص دحكتها بيها
كامت تتحرك
نوب وكفت بطولها
انة ويا واحدة كاض لثاني
صوت وحدة تونون
يماااا بويااااا
انة ووووين
ووووين اهلي شجابني هناااا
تقرب طالب يلطم على راسة
صكَد جذب حجية ردنة نموت من وراج
ادري شتسوين هنا انة اخر درب عبرية خذيتة كبل لعشرة وهسة دنية فجر ماتلكيلي وين جنتي
يما جنت نايمة انة
ودوني لاهلي شنهي خطفتونيييي
فدعم:- بعد حجية بععد سمعي لجوارين
لتخافين حتة إغتصاب ميرهملج بس كليلي اهلج ويين
اخذها طالب لأهلها وانة ضليت اتاني تهاني
شوية وطلعتلي ايدها على راسلها وعلى كصتها من جوة لشيلة لفاف ابيض
نترت نطيني فلوس
حطيتهن بيدها
اخذتهن وطبت تنطيهن للمرة
شوية واجت
زعلانة مني ماتدنت تهمس الي
وديني للبيت يلله
نطيني ايدج اوجيلج تعبانة انتي
ميل عني حبوبي مييل انة لااعرفنك ولاتعرفني
ياااع هيج صارت
اي وازيد بعد
اخذتها للبيت لطريق كلة اصالح اريد
تصدني وتدور وجهها
طبينة من لباب سألتها بيبي شكرية
بحزن ردت عليها
طحت على ويهي يم لمستشفى
تاشر علية وتكللها
وفدعم الله لاينطي لعافية وداني خيطني
اووو غصدي الله ينطي لعافية
دخلت للغرفة
جدتي طبت لغرفتها
ومحد اكو
ضليت احوس اريد احاجيها واراضيها
تقربت للباب اهمس الها
تهاني
هناي وسعدي
حاجيني بوية شمالج زعلانة وحكَ الله انة مابية اذية انتي تخبلين بية بسوالفج
هناية راح افتح لباب انة
ايد على جتفي حيل ضربت
وصوت جدتي شكرية تهمس
هايلفيسد تريد تدش علبت للحجرة وتصخم وجوهنا وي ابوها
ولك انة اعرفنك هلمانمت ضليت اترصدلك ورة لباب
جدة انتي كطاعة ارزاق
مت عينك رزق مال حرام شلك بي
بقت للصبح تناطر يم غرفتها الى ان غفيت وانة مامحاجيها
فزيت على صوت هلاهل وواحد يدفر بية برجلة
فتحت عيوني مخروع
شني شكو شصااار
صوت جدتي بفرح
كوم اختك جابت
اي كرة عيني وانة شني الزملها لحضينة يو اعصبلها لفرخ
خاب ماتعوفوني انامن اليل كلة سهران وي تهاني
داست على رجلي حسيت روحي شاغت
ولك وين سهران وياهة
جدة غير خذتها خيطت راسها
ها هلاكول
بقيت اغمض بعيوني اريد لنومة ترد ماكو
شوية ودخلو علية لفروخ كل واحد محنة بدم لخروف بمقدمة راسة ويكمزون يمي
كمت على حيلي جدي يصيح ويستريح
تقربت يمة حيل لغمط راسي بيدة بلدم
ولك نايم ياشليف لصوف
نايم ولبعورة تحوف
الي يسمعك يكول نايم ل١٢ اشو توها بل٩ فروخكم يخلون بنيادم ينام تكول بشوش
انعام:- تناوشت بيدي لطفل ملفوف بقماش ابيض
ولطريق كلة جان بحضني
زغيرون وملامحة ناعمة كلشي ممبين منة
اعاين الة وادعي يارب ميعدي هلشهر إلة واني حامل
طبينا للبيت ذبحو مال سلامتها هي ولطفل
وبقو لجهال برة كلسا طابين وبيبي شكرية تصيح طلعو لاتنكسون لبيت
جرتهم بسعاد كلهم للحمام سبح جماعي
وية ماطلعتهم من لحمام صاح عليها جدو
طبت يمة لغرفتة
طولت يمة
شوية وطلعت جانن عيونها وارمات
مدنكة راسها .......يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!