#خنجر_الغضنفر
#البارت_السادس_والعشرون_٢٦
#حنين_حاتم
انعام....
تقربت الها لزمتها حسيتها راح توكع
شبيج بسعاد خيرج شصاير
شهكت بصوت عالي ومثل طفل تعالن شهكاتها تريد تنطق ماتكدر
سحبتها على صفحة
كعدتها على لكرويتة جبتلها كلاص مي شربتة
ستمرت خانسة وبس دموع يتجارن بغزارة وشهكة بصدرها تريد تتنفس متكدر
بيبي شكرية لزمت راسها وتقرة علي سور حافضتهن
وهية مثل لمخروع تخنس وترد تفز وتشاهك بصوت عالي عيونها جاحضات ومركز نضرهن على مكان واحد لتمينا كل احنة عليها نريد نفهم شبيها
نعناعة ركضت على غرفة جدي فتحت لباب واسمعها تهمسلة
شمالها فرخ لدوج جنها ملبوسة طلعت من يمك مخلوسة شكلتلها
كام على حيلة تقرب الها
ايدة على راسها تمسح وهمس
اني ابوج بسعاد بوية لاتكولين ماعندي ابووو
إلبكَة بعمرج وعمر لوالدة وأخيتج
لموت حكَ يبوية ترحميلة
كل احنة تفاجأنة من كلامة لرجال مايشكي من شي وبعدة زغير
بيبي شكرية جرت فوطتها على وجههة وتربعت وصارت تنعة
انة انة بعازتك يلدللتنيييييي
وفاركتني بوية مجبل لعيد وفاركتني
بعدت عني يلوالد ليش بعدت عنيي
يلحنان جا وين حملتو يلحناااان
كابلتها ام فدعم ونعناعة وعمة امريكا شوية وطبت علينا مرت عمو إسماعيل وبتها قسمة
هم سون دائرة يم بسعاد وينعن
ولبنية مخلوسة تخض براسها يمنة ويسرة كأن دتحاول تستوعب لسمعتة
حاضنة جسمها بأديها وتشاهك بدون صوت
شوية ودخلن نسوان من برة
وبدقايق نترس لبيت وكلها تلطم وتبجي ويواجهن بسعاد لمخلوسة مدري من سماع لخبر مدري من لطمهن اغلبهن حتة ميعرفن منو لميت اجن فازعات بكل حيلهن
خلة لبيت من لزلم
عمة امريكا اخذت زوري ودتها للبيت خافت علطفل يخترع وهي هم نفسة متصلح طبت لنسوان عليها
اجيت على بسعاد اريد اكومها بيبي شكرية صاحت علية عوفيها جدة وين تردين بيها عيب من لوادم
طلعت برة ادور على غضنفر
دزيت حمزة صاحلة
تقرب يمي
_هابوية شطلعج
_شلون بلقيس تبقة هنا ماتروح للفاتحة
_جدي يكول امها مخابرة علي كايلتلة ماخليهم يدفنو إلة بسعاد تجي وتحضر دفنة ابوها
_هسة شلون لعد
_جدي جاي يتشاور وي اخوتة وولدهم شوية ونصفا على راي
دخلت جوة بقيت يمها حاضنتها
حسيتها ماراح تطلع منها بسلامة
لأن وضعها ميطمن ابد
بعدها بصدمة لخبر
قريب لتسع سنوات هي ماشايفتة وينقلولها خبر موتة
حسيت كلبي يتطع على منضرها
تذكرت بابا الي لليوم ماستوعبت خبر موتة
ماعفتها ابد
زوجات ولد اخوة جدو ستلمن لمطبخ جاي مواعين
وكفن وكفة محزمات بعبيهن واي وحدة من عدنة تطب للمطبخ يطلعنها
حجايتهن انتم اصحاب مصاب جا احنة شنهي فزعتنا
ورة اكثر من ساعة دزو على بيبي شكرية برة
بقينة واكفين بلمطبخ نتسمع الها
اسمع جدو يكللها
انتي ونعناعة وبسعاد حضرن رواحجن بينما يجون وولادنة ونطلع
صحت على غضنفر بعتبة لمطبخ طلبت منة اروح وياها
_مايصير بوية ماياخذون نسوان بس لعجايز عبن ماترهم بسعاد تروح وحدها
_فدوة غضنفر،مااكدر اعوفها كلبي ماينطيني والله متدري شديصير بيها لبنية مخلوسة وبيبي ونعناعة همهن اللطم تروح تتخربط لبنية
فدوة خليني اروح وياها
بلقيس بعدها عروس خطية
_امري لألله
تحضري بساعج وكليلها ظاهر ماتاخذة يضل هنا
_خطية خل يروح يشوف بيبيتة وخالتة ماشايفي
_صوت واحد يحجي وية جدو بصوت عالي
ابو خليل بينا وبينهم جاينة جبيرة روحتكم الهم تطيح لميانة وتصير خري مري ولاجن بينا وبينهم حكَ وسواد وجه لليوم نتعاير بي
_لموت مابي هلحسبات ولبت عاشت بينا ومابينا وبينها كل احقاد ولسوة لعملة ابن عمها حتة موش اخوها وهمة عداوة من زمان وي عايلة عمهم
ولزلمة ابو بلقيس بس عوزة يبوس ادينة وهوة يوصينا بيها بيوم خذيناها
وصلنا لراس لدربونة يدك على راسة مثل لمودع جنازة
وامها لمرة حالفة مايندفن ابوها اذا ماتحضر بتة لزغيرة
ولواجب نوكفلهم بينا وبينهم حفيد شايل منهم ومننة
ولضفر،عمرة مايطلع من اللحم
ندار علينة ويأشر
يلله بوية يلله فضنها
دخلت جوة اخذت بسعاد بدلت ثوبها وغسلت بيبي شكرية لابسة لسود من طبيتلهم ونعناعة لابسة من يوم موتة حنون
اخذت دشداشة من بسعاد قصيرة علية لبست عباتي وطلعت
هنة ركبن كدامي
كوة حشرت روحي بلسيارة وكوة قبلو ياخذوني
وصلنة جانت دنية لعصر رغم لسيارة لركبناها جانت تمشي سريع كلش
وبيبي لطريق كلة لازمة لكشن وتصيح
يمة على كيفك راح تكلبها بينة
احنة بسيارة جان يسوقها فدعم
وويانة ٣ سيارات بيها جدو وغضنفر وصميدع وستار وعمو رحيل وإسماعيل وولد عم جدو ثنين وولدهم خمسة وسيارة بيك اب زغيرة بيها خمس طليان
همة نزلو قبلنة بعيد عن لبيت مسافة وتقدمو للبيت مشي سلاح بيدهم ويكولون
سوو برة شي يسمونة عراضة
بحياتي مشايفة شي مهيب لهلدرجة
احنة نزلنة يم بيتهم دخلنة جوة اني وبسعاد نتراكض من صوت لرمي
نعناعة من لباب صاحت يبووووو
وبيبي شكرية بعبايتها طبت تكول بلنص
وكفت وهنة داير مدايرها محد يعرفها
عبايتها بيدها وتكول وهنة وراها يردن
اجاكم هذا نمرود
يادفانة
اجاكم هذا نمرود
يادفانة
وعلى لعدوان هذا ماخذ لزود
واجاكم هذا نمرود
يادفاانة
وين تريد عمك مركز لنيبة
ووين تريد
عمك مركز لنيبة
وجدك لليعيل مجتف يجيبة
ووين تريد
عمك مركز لنيبة
ووين تريد
عمك مركز لنيبة
وها ها ها
وهذا منين
هذا منين
ولد ليعدل لكول
وهذا منين
ولد ليعدل لكول
فدوة لعراضة
ولتفك تحلالة
فدوة لعراضة
ولتفك تحلالة
معدل وحتة لكبر حيالة
فدوة لعراضة
ولتفك تحلالة
ومعدل وحتة لكبر حيالة وفدوة لعراضة
ولتفك يحلالة
بلنص بيبي شكرية ونعناعة يهوسون ولنسوان تلطم
وبرة صوت لرمي وصوت لمهاويل ولكولات
جنت احس لكاع تهتز جوة رجلينا بكد مادبجو
علما فضت بيبي ونعناعة ملاكاهن للنسوان
يلله شفت بلقيس
جانت بلكاع كاعدة شادة ربطتها على راسها وتصرخ
بابا والله بنية والله باباااااا
شلون تصدك بيهم واني تربيتك بابااااا
بيش احلفلك اني بنية
حاولت اتقرب الها ماكدرت جانت فاتحة ثكيلة حيل ماكو مكان امشي بي واوصل الها نحشرنا يم لباب بسعاد خانسة بسدي حتة محد شافها
شافت امها من كعدن لنسوان
من بعيد صاحت
ماماااااا
مات ابوي وماشفتة ولج ماماااااااا
كامت امها مثل لمخروعة تتلفت تدور على صوتها
اشرولها شافتها
كامت تغوص بين لنسوان تريد توصل الها
وصلت الها بلكاع وكعت بعد ماحضنتها وتصرخ
عليتناااااا
مات من ورة همجن
حسبي الله علجان لسبببب
الله لايوفقهم لدمرو حياتنا وضيعونة
ولك ابو بلقيس جانت امنيتك نلتم كل احنة مثل قبل
تالي لتمينة بفاتحتك عمت عينيييي
من بين لنسوان اتنقل كلسا ادوس على وحدة وصلت لبلقيس
حضنتها جانت كاعدة ايدها على راسها وتنود
وجهها احمر مزلغ وحضنها مليان بخصلات شعرها لبني
حسيت بكسرتها من تقربت احجي وياها وهي تبتسم ودموعها تجري وتهز راسها بلرفض لكلامي الي جنت ادري ميسوي كلشي بس احاول اهدئها بي
دخلو لتابوت نزلو بلكاع لتمن كلهن علي
عيوني على بلقيس لطلعت من كترها وصلة بيضة وتصرخ
بابا هذا نيشاني
بابا والله مانزلت راسك
بابا هذا نيشاني هاك شوووفة
شالو لجنازة وماقبلو ياخذون اي مرية بس ام بلقيس ووحدة من خواتة
اعاين على بلقيس بلحديقة كامت تصرخ
متطلع جنازة بابا اذا متاخذوني
وبسعاد ركضت على عمها لزمت ادي وتريد تبوسهن
وتتوسل بي
بعد صراخهن واصرارهن حضرو كية للنسوان
وماقبلو احد يروح بس زوجتة وبناتة واخواتة اني وبيبي شكرية ونعناعة ركبنة وية لولد لأن كالو مناك نرجع بس نحضر،لدفنة
لطريق كلة اعاين على بلقيس من لجامة جانت بلكية ملخت روحها
تركع براسها بلجام مال لكية
وترجع تملخ بشعرها ويسترن بيها
بسعاد صافنة وبس دموع تجري
بمقبرة لنجف نزلنة ولدفان محضر لقبر بس وصلنا ستلم لجنازة وبدة بلدفن
كملو دفنة واحنة بعيد كاعدات ماخلونة نتقرب الى ان دفنو وبتعدو يفسحون لمجال للنسوان
تقربن بناتة وزوجتة علقبرر
وبيبي شكرية كاعدة يمهن وتنعة
يلمسوي لكبر لاباب لاشباج
من نشتاك كلي نعاين منيين
بوية بنياتك اجن هليوم نوكف علكبر وكفة لمحتاجين
نمد لأيد نصرخ والله مشتاكييين
بسعاد:- اي والله بابا مشتاكييييين
بلقيس فقدت ملخت نفسها وحيل بكل قوتها تشيل من تراب لقبر وتشمرة على راسها
من شافوها كامت تحفر بتراب لقبر شالها واحد واخذها للسيارة سحل
ركبن هنة كوة سحبوهن من يمة
واحنة ركبنة
بسعاد بقت تتوسل بصميدع يبقيها الى ان تكمل لفاتحة
نقهر عليها ووافق بس خايف عليها
طلب من غضنفر انو ابقة اني يمها حتة ادير بالي عليها
وحتة يكون مطمأن عليها وعلى ابنة
راحو همة واحنة رجعنة وياهم بلكية
بلقيس بلطريق تخربطت كوة صحيناها
وصلنة للبيت
دخلن للبيت يتصارخن
شلون نطب بيتك وانت مابي
بسعاد لكونها خانسة محد الة شغل بيها ماكأن ابوها لميت
كلها مخبوصة ببلقيس وامها وواخوات ابو بلقيس
بليل فرشو لأقاربهم كلها باتت يمهم كلهم من بغداد
ماعدهم احد بديالى
نمنة بلغرفة اني ولبنات وبنات خالاتهن
للصبح مانامن يتذكرن سوالفة ويبجن
سألتهن عن سبب موتة
_بلقيس:- تدرين صارلي شكم يوم من تزوجت
عمتي الله لاينطيها لعافية من حقدها وشرها مسويتلنا عمل بحيث رجلي كلما يتقربلي اشوفة حيوان واضل اصرخ
خابرتني امي لبارحة بليل كالت يمة مرة عمج
مخابرة على ابوج وكايلتلة بنتك بيها شي لان ماجاي تخلي ابني ياخذها
جوارين اهلي كايلة لأمي خل ياخذها يدخلون على ابو لجوادين ويباتون بفندق
بابا من ذيج لسالفة لصارتلي بيوم خابرني قيصر وهوة مهموم
لليوم مانسدت لسالفة ولليوم يحجون بية واشكال لحجي نكال عني ولبركة بعمتي ام زياد
اني خفت على بابا قشمرت رجلي واخذتة رحنة زرنة وحجزنا فندق
ولحمد لله تمت شغلتنا ورجعنة للبيت
صبحية خابرتني امي تصرخ لحكي ابوج تخربط
ركبنا اني وزياد ورحنة لديالى
من وصلنة جانو مدخلي انعاش
سالت امي شبي ليش تخربط
كالت ماادري دكت علينا مرة عمج ام زياد ماعرف شحجت ويا وطاح من طولة
ركضت علجوارين شالو وياي
ضارباتة جلطتين
لاولى خفيفة بس لثانية سكتتة
مات ابوي وهوة يتصورني مصخمة وجها
ماعرف شكالتلة عني بس ماسامحها للموت
من شافني اغفي خطية سكتن حتة انام لأن جاية من طريق طويل وتعبانة
اما هنة مانامن للصبح الي تبجي والي تقرالة قرآن
صبحية من وكت كعدنا
وبدت لناس تجي
كاعدة اني بلمطبخ اساعد وماسمع غير صياح بلقيس
طلعت برة واشوف
مرة عمها بكل صلافة جاية
وبلقيس تصرخ بيها
انتي شنوووو تكتلين لميت وتمشين بجنازتة
_عيب عليج شنو هلحجي
ماراح ارد عليج لأن انتي صاحبة مصاب واني جاية ائدي لواجب واروح
بلقيس تقربت الها وتصرخ تعالي اني هم اريد ائدي لواجب وياج
سحبتها تريد تضربها تجمهرن كلهن عليها كوة فرغنها منها بعد مانزعتها عبايتها وحجابها ومتقبل تنطيهن الها
وحدة من لنسوان نطتنها عبايتها وطلعت بساع منهزمة
٣ ايام لفاتحة بلقيس تلطم لطم مخبلات
توصل مرحلة توكع من لتعب
جانت تصرخ متت من وراي بابا
بس والله مضلومة
بسعاد ماطلع صوتها
يوم ثالث من طشت لناس وخلة لبيت
بلحديقة اني وبنات خالاتهم وخوالهم نغسل بلمواعين لأجار يردون يرجعوهن
كملنا وكاعدين نشطف بيهن
صوت صراخ من جوة مرعب
دخلنا
جانت بسعاد جوة لدرج كاعدة وتصرخ
ستمرت اكثر من نص ساعة تصرخ
ابنها يحوم حواليها ويبجي
اخذتة بلقيس وكالت عوفوها خل تطلع حسرتها لاتتمرض
يوم ثاني لصبح جان لازم نرجع
اجو علينة غضنفر وصميدع من اليل طالعين وصلولنا وجه لفجر
ماقبلو يدخلون
طلعنة وبسعاد تبجي وتودعهن
وامها توصي بصميدع يجيبها الهم
غضنفر دحس بيدي فلوس كالي نطي الهم وجبيهم عيب
خليتة بيد ام بلقيس تخبلت ماقبلت تاخذ كالت وكفتكم وعنوتكم مناك لهنا كلش كافية
شمرتهن عليها وطلعنة
للضهر وصلنة للبيت
اتصلنا بيهم طمنناهم
دخلنة للغرفة نمنة جنة تعبانين حيل
عصرية اجت عمة امريكا ومرت عمهم اسماعيل وقسمة
واقارب جدو وجبن بسعاد
الي جايبة قماش اسود والي خلت بيدها فلوس
للمغرب راحن
وكفنة اني وسللامة بلمطبخ نسوي عشة
جانت ضايجة ماعرف شبيها
سألتها
سللامة شبيج صاير شي
انتي شلج غرض بية عود مسوية روحج حنينة وطيبة وتوكفين للكل انة اعرفنج شني
مسمومة وشينة وغدارة
لوما غدارة ماخذيتي رجال من مرتة
سللامة اني مااكرهج الله شاهد
وبودي اساعدج بس مابيدي عليج شي
زواجي من غضنفر ماجان سهل لتتصورين هين علية انزل على شرج
اني من تزوجتة شترطت علي يعوف ثارة
تزوجتة من خوفي علي من نفسة واحقادة الي ممكن تاخذة للموت
لو رايدة اتزوجة جان من زمان خطيت هلخطوة
اني اعرف غضنفر قبل ٩ سنين
وقبل متجين انتي فصلية اني دخلت لهذا لبيت رهينة
وغضنفر جان رايدني وترجاني ابقة
بس اني جنت خايفة من حياتهم وجنت متصورة لو طلعت راح اكدر اعيش بعيدة عنة واكمل حياتي عادي
بس ماجنت متصورة نفسي اكنلة مشاعر لهلدرجة
خلينة نفتح صفحة جديدة
حسبيني موشريجة حسبيني صديقة
واني اوعدج احاول ائثر على غضنفر من ناحيتج
لاخية خل وعدج الج
كلشي ماريد منج
خاويني واخاويج واخذ رجلج واخليج
انتي كلبتيها
خذيتي رجلي وهسة جاية تردين تخاويني
درب تعبان هذا
براحتج بس حطيها ببالج اني عمري ماكرهتج
وزواجي من غضنفر جان خوف علي اكثر من رغبة بي
جنت ناوية احمي من نفسة بشرطي وادري بي رجال وكد حجايتة لهلسبب كسرت ضهرة بهيج شرط
حتة يبقة خيمة الج والي ولحمزة
هوة بس الج خية احنة شلايحنة من فية
بليل بحضنج وبلنهار عينة تلصلص وراج
فيج الج كفيني شرج وميلي عني
كملت شغلي وطلعت من لمطبخ كعدت يم زوري بحضنها ابنها اخذتة منها
لساهم مامسمي وهي ورجلها يتعاركون هوة يريدة على اسم جدة وهي تكلة خو على اسم جدي عكاب
_بيش طالبين لولد زوري هاي اسماء قديمة وجبيرة
_انة ردتة احمد بس من ستار راد يسمي على اسم جدة
كتلة خو جدي احسن وهوة عاند وانة اعند منة
واحنة نسولف طلع جدو من لأستقبال وكال
باجر مدينة راح تجي هي وفروخها
بيبي شكرية من لفرح دمعت عيونها
ولجهال كامو يصفكون
هييييييي هيييييي عمة مدينة
نعناعة عوجت حلكها وتهمس
شدو روسكم يكرعااان
بقيت اسأل بلبنات عنها شكد عدها ولد وبنات وشكد عمرها
زوري تهمسلي بضحكة
عدها فروخ بس موفروخ جانو من يجونا نشيل
ليش
وكحين خية مايلعبون بلكاع لعبهم فوك لغراض فوك روسنا مثل بسعاد من جانت تكمز على لكنتور من خذيناها
عمتي جانت لو كضتهم تجرم بيهم تسد عليهم لباب محد يخلصهم منها
_راح تجي هسة ديري بالج تتنعوصين كدامها
قبل ٣ سنين اجت سودنت بسعاد من عدها وكامت بسعاد تحجي مثلنا لا وأحسن من عدنا
_ليش مصرين انو اني اتنعوص ترة هذا حجيي واصلا اني زينة لعد لو تشوفون بنات خالاتي ذنيج بنات لجمعية لو حجن تطك مرارتج من لفهاوة ولنعومة
_ شكبرهم اطفالهة
اخر مرة اجتنة جانو اصغر واحد بيهم محيسن ٩ سنوات بس مشعوذين تكولين دكت لغارة من يجونة
عدها ثنين بنات حل زواج وثنين ولد هم حل زواج وثنين ولد لازغار
من تجينة تبقة شهرين تلاثة
لأن ماتجي غير كل ٣ سنوات لو ٤
بقيت للصبح ماكدرت انام خايفة من عدها من حجتلي زوري عليها
ومن كل عقلي اليل كلة اتدرب اريد احجي مثلها
تالي كلت
شبية اني خايفة شنو راح تاكلني قابل وبعدين اني مامجبورة اغير لكنتي هذا طبعي وهاي لهجة مدينتي
صار لفجر يلله نمت
اقل لنص ساعة وبدت لحركة بديت اسمع صوتهم وخبصة لجهال فرحانين بيها وبجهالها الي معروفين
من يجون يسوون لاطفال جيش ويرحون على لناس يأذون بيهم لو يمردون لزرع لو يكتلون بجهال لعالم
كمت على حيلي وعيت غضنفر يروح لشغلة
ايدة سحبتني لحضنة
يمعود هدني اني اليل كلة مانايمة خايفة من عمتك
_اييي ام حميد هسة تسويلج كلب وتكلبج على لبطانة
تسويج وحدة من عدنة
_انت ليش تخوف بية
_انتي من كل عقلج خايفة
ترة ام محمد كلش طيبة بس صوت عالي
كلبها نضيف واخت اخوها بلفزعات مشهودلها بلفواتح ولأعراس تلكيها تقود لقطيع ولازمة لدفة مثل قبطان لسفينة
كشمش نسختها لثانية
بس كشمش جانت مكسورة شوكتها من ورة قيصر وفدعم وسوالفهم دومهم مورطيها
شلون يعني
جانو قيصر وفدعم يشركوها بدكايكهم ولو رادت تحجيلها كلمة حدهن ولعيبية ولباقيات يهددن بيها ترة نفضحج عد جدي
الله يذكرها بلخير خو انتو نسيتوها ولا جن بتكم
افاااا عيب عليج
قبل شهرين سكفتلها غرفتها
شنو هاي شدتحجي
انة مارضيت بسللامة وقبلت ابقيها هنا لو ما كشمش كالتلي انة رجلي زين وياي واحبنة واريدة ماريد ينخرب بيتي
من عدها وكمت اروح لرجلها لمجان شغلة
والله نطاها رجال مثلها فقير ومايعرف يحقد بمكان شغلة جانو يصيحولة عباس لوصخ شاغول ويذب روحة علشغل اسمنة مبهذل وهدومة وصخة ومتعوب كلبة نضيف بجكارة وسالفتين نسة لصار
ومن عدها وصار صاحبي
كل مدة اتلثم واروحلة لمجان شغلة
يشكيلي هم كشمش،نسوان اخوتة شادات وياها
شلت فلوس ونطيتة وكتلة اعزل بيها
وصدك عازل ناس جابتلي اخبارة
بس لقهرني من كالولي غرفتة ومطبخة سكفهن جذوع نخل ويخرن عليهم وغركانين
دزيتلهم فلوس بيد جماعة ورة شجم يوم سمعت اخبار طيبة عنهم
اذا هيج لعد ليش متخلينة نلتقي بيها
رجلها مايكول بس يخاف من اهلة
بيني وبينج رجلها ماعندة شخصية وحتة ماعندة كلمة لأمر ولنهي لخوانة
حتة بمرتة وفروخة يتحكمون
تصوري صاير عندة ٣ ولد خوانة كايليلة بعد ممنوع تخلف
شني انت تلث ولد واحنة كل واحد ولد واحد
واحنة نحجي اسمع صوت نعناعة
نعيمة ماتنزلين وي لبنات شني ربج وحد
صوتة يهمس الي ويمسد على ضهري
نزلي بوية هي هاي تعارك ذبان وجهها تريدلها زلة
نزلت يمهن
جانن يطبخن برة
بسعاد مالها خلك مريضة ماخليناها تشتغل زوري نفسة ومحتارة بأبنها
ام فدعم واكفة علتنور وجوة رجليها معجانتين خبز كبار وقسمة تدولج الها وهي تخبز
تهاني تنضف بلبيت واني وسللامة نطبخ
شوية واجن نسوان ولد اخوة جدو دخلن جوة وبقن بناتهن وجناينهن يمنة يسولفن
الي تنضف خضرة والي تسوي زلاطة
والي تحضر اللبن
سللامة تبزل بلتمن واني واكفة احمس اللحم
لجمجة جبيرة وثكيلة كوة جنت احركها
سللامة لزمت بطنها وكامت تتلوة منها وتصرخ بطني
كلتلها طبي جوة رتاحي اني اكملة
وهي تتمشة تريد تدخل صحت عليها
سلامة لبيتنجان احمسة ونوب اذب لماي ولمعجون لو بلا حمس
ماجاوبتني
سويتة مثل مااحنة نطبخة بدون حمس
قبغت لكدور ونصيت عليهن لنار ودخلنة جوة وية لأذان
موسم لتمر خلص بعد ماكو طوش
عيني علنخلات وتذكرت كشمش من جانت تاخذنة ونطلع
نززني من صفنتي جهال يركضون علينا بكل حيلهم
فركت عيوني اريد اركز
قبل مايوصلون كل واحد تشلبالة على نخلة وكام يكاطف من فوكاها
من بعيد سيارة واكفة ووحدة ضخمة تعض اصبعها حييل وتاشر الهم تسب بيهم بيدها
بنات كبار اجن يركضن لعبي مفتحة ويضحكن
وصلن النة يشبكن بينة ويبوسن
شمرن لغراض وطبن جوة يسألن على جدهم وبيبيتهم
ولد ثنين يافعين شايلين جنط خلوهن ودخلو للأستقبال
تقربت هي سمرة حمرة طويلة وجها عركان وتلهث عبايتها مفتوحة دشداشتها لونها ازرق تسح جواها
بيدها جنط بس ماشايلتهن تسحل بيهن سحل ولعجاجة على يمينها ويسارها
طلعو لولد يتراكضون اخذو لغراض من ايدها ودخلو رجلها
دخلنة كل احنة جوة
ناس تسلم وناس تتشابك
بناتها صوتهن عالي ومكابلاتني ويسألن بية انتي منهي
شسمج منين اهلج
دخل غضنفر شايل ثنين من جهالها على ضهرة
وفدعم خانكلة واحد منهم وطببة يسحل بي
دخلوهم جوة
فدعم:- ادري لجاي من سفر غير يجي تعبان يريد ينام يرتاح ولكم عمي شني موصيكم علينا
طبيتو علينا تكول جيش لحبشة
هذا ابرها لحبشة جايب كَزوتة ويا من لبصرة لهنا
صوب ابن لحفافة وهدت هسة كوة سدينا حلكها بزبيل عنب وغضنفر طلعلها لباجة من لجدر ونطاها الها
ولكم توكم طبيتو شمالكم شادين حيلكم بحزامين
غضنفر يندس بي ويهمسلة
بعد افتح لباب وكلهم تفضلو لاهلكم
ركضت للكدور وكفت يمهن
لحكتني تهاني كالت خل نصب بين ما يصلون
ضلينة نصب بصواني وبسعاد تنكل بيهن
سللامة تشكي من بطنها بقت كاعدة
كملنة لغدة على سفرة وحدة كعدنة
عيني عليها وخايفة منها
بيدها كلبت طاسة لمركة بلخاشوكة
ندارت على غضنفر وصاحت
_إخرب بيتك يغضنفر على هلغسمة
شمالهن بيتنجاناتج يتروكَصن بلمركة حبوبا
رجعت على غضنفر
خايب هاي بناتنة وحدتهن لو تحزمت تعادل عشر زلم
وين لكيت هاي لمايعة لابستلي حضينة براسها
تلمست راسي من كل عقلي
جنت لابسة ربطة لونها احمر وبيها طوب سود
ودشداشتي حمرة بحاشية سودة
يضحك ويعاين علية ندار عليها يهمس الها
_هاي لمايعة لماتعجبج جانت ماتكل للفلك ولك وتخاف من عيشتنة جانت لو نرمت رصاصة يمها تخر وتطيح
بس إعلى مودي تقبلت وتعايشت ويانا
هاي لماتعجبج عافت امريكا واجت للهور وعيشة ديارنا
ويلاااه ورد لباجلة هاي
تسوة لديرة ولبيها
وعلديرة علم كلبي مخليها
موش مرية قبلة ولومتت اتمدد إعليها
صوتها صاحت اسم الله بيش طالب روحك
عينة علية وكمل
ملج لموت لو مرني معناها مر ليها
وليوجعني يوجهعا ويبجيها
كلبين كون عندي عبن واحد مايكفيها
لو وسدت لتراب تضل عيني إعلى رصعتها واحاتيها
ويلااااااه يهلوادم وصيتي انة رصعتها اندفن بيها
إسم الله إبيش طالب رويحتك شني لنسوان كليلة
شني يمة تغديلها لديرة فدوة ياهي هي وبتمن
بس صكَد يو كال لمثل
حجارة لماتعجبك تفشخك
هوة يضحك ويعاينلي
وفدعم يحجي بيها يتعمد يشحن بيها علية وعلى بسعاد
ورة لضهر هية وبناتها نامن
بس ولدها بقو كاعدين بلأستقبال يم جدهم ولولد وخوالهم
لمن نامو غافلوهم وطلعو يلعبون برة
بل٤ بيبي شكرية كعدتهن ورحنة نسوي تمتوعة
سلامة لزمت بطنها
سويت جاي خليت لإستكانات بلنجانة وجبت لقوري وخبز عروك ام فدعم مسوية وخبز سمسم
خليتهن بلكاع بقت تعاين علمجانة وخازرة
انتي شني جايبتهن بطويسة جا شني ماعدنة صواني
يدون مااناقشها كمت جبت صينية سفطتهن بيها وصبيت
عيني عليها تكعد ببناتها وتهمس الهن
إويتة خيبة إويتة
نجيرس وصمخ نجيرس ماتكعدن شنهي اول طيحتة لنوم
وهية تحجي دخل فدعم يسحل بولدها وهمة يصرخون
بيدة رشم مال حصن يضربونة بيها حتة يمشي
يدك عليهم بيها ويسحل بيهم واحدهم يحط فدعم جوة اباطة
سحلهم للصالة يتباجون مزوركهم
طلعو غضنفر وعمو رحيل وإسماعيل ماقبلو علي فرغوهم من ادي ويحجون علي
همة تختلو ورة بيبي الي لزمت إستعداد وفتحت اديها تحمي بيهم
رحيل:- بوية شمالك وي فروخ عمتك خزيتنا توهم اجو تلكيتهم تكتل بيهم
ولكم عمي كضوهم
كضووووهم
لكيتهم علشارع لعام فاتحين لتاير لسبير من سيارتي وواجين بي نار، وحاطيلهم جذع نخلة وسعفات وعلشارع يسلبون بلوادم
ياسيارة لتفوت يسبكولها .........
قيصر....
عيوني على ايدة الي بيها شي ويلوحلي بي
فتحت زين ركزت
سحبتهن من ايدة
هاي شوكت فيزت
لبارحة بليل
موكلت هلأيام يدزلك ابن عمك فلوس
اي كالي اروح على واحد من اصدقائة اخذ من عدهم فلوس لأن يتأخرن بينما يوصلن
ها بلخير عليكم
شوية وصعدت هيفاء صبحت وجانت جايبة صينية لريوك وياها
بعتبة لشقة تريكنا
جنة نضحك ونسولف وبية خوفا من روحتهم
ماعرف وين اروح بحالتي ووضعي لجاي يسوء يوم بعد يوم ومنو الي هنا
بدون مقدمات لكيت نفسي اهمس الهم
_اني قررت وحسمت امري اطلع وياكم لأمريكا
فرحة بعيون هيفاء اما هادي جان صافن وبينلي انو ماعندة علم بهلشي
ندار عليها متفاجأ
حسيت كأن جانو يتحاجون بعيونهم
بقة هادي طول مااحنة ناكل علامات لأنزعاج واضحة علي
ماعرف اذا نزعج من رغبتي بلروحة وياهم لو من اختة لأن مامنطيتة خبر بهلشي
تانيت يرحون وكلت امر لهيفاء على شغلها وافهم منها
عيني عليهم من نزلو هيفاء ماراحت للشغل دخلت للشقة
نزلت علدرج وبقيت كاعد اتسمع الهم
صوتة ينتر بيها انتي شلون تاخذين هيج قرار بدون ماتكليلي يعني احنة حياتنا مندري شلون راح تدبر هناك ثنينة مابيدنا مهنة وشهادتي متوكل خبز هناك لازم اعادلها ماخذي ويانا فوك لحمل تعلاوة ولد يعرج وصوتة يخوف ياهو ليشغلة هناك لوادم تخاف منة
لا حمل ولا تعلاوة ماشاء الله لولد ابن خير واهلة غاني حتة عن لشغل يعني لابحاجتي ولابحاجتك شايل روحة
حسيت حركة صارت وصوت احد يقترب للباب بساع صعدت فوك
بيومها ماراحت هيفاء للشغل بقيت متاني بلكي تطلع واكدر احاجيها
عصرية طلع هادي
دكيت لباب فتحتها الي جانت تبجي
عيونها ورامة
سدت لباب وطلعت برة
بلبلكونة الي بلباب خالين كراسي ثنين وطبلة
كعدنة عليهن
شمالج هيفاء جنتي تبجين
لا سلامتك
هادي مايريدني وياكم مو ؟
مو ميريدك بس شاك انو اني عندي شي تاجاهك لأن اصريت وبقيت اقنع بي
خوية سالفة لبيها مضرة الج انة ماريدها
انة متراجع عن قراري وهادي مالج غرض انة افهمة
لا ميحتاج اني قنعتة
هوة ماضايج منك بلعكس يعزك بس يخاف عليك
يكلي خاف هناك ميكدر يتأقلم بسبب وضعة وخاف اهلة ميدزولة فلوس ويتبهذل
احنة عاد ابن عمنة هناك ننتجي علي هوة منو الة
حجية صحيح
بس انة زلمة واكدر اعين روحي
لاتشوفيني هيج انة مكسور لصارلي موشوية
بس وكت لعازة انة اعين روحي واعيش نفسي لا اتكل عليكم ولا على غيركم
نزلت اتمشة
كعدت بكهوة
شوية وشفتة من بعيد جاي علية
درت وجهي خاطر لايشوفني
تقرب الي كعد يمي وهمس
زعلان تدور وجهك عني مو
لا عليمن ازعل
كوم وياي يلله خل نفيز اخاف رحلتنة تقبط خوما تجي ورانا
لا خوية انة تراجعت عن قراري
موبكيفك احنة منطلع بدونك
يلله كوم
سحب ايدي ومشينة
جان باقي شكم مقعد بس
فيزت وياهم على نفس لرحلة
ورة يومين جانت رحلتنة
بهليومين لتهينة بتجهيز اغراضنا وتصفية شقتهم من لأثاث لبعض بعنا ولبعض ميسوة لبيع نطينا لأبو لمك وصينا ينطي لناس فقرة
وركبنا طيران رحللتنا ستمرت ايام عبر اكثر من محطة
وصلنة منهكين
بآخر محطة بلمطار،جان ينتضرنا ابن عمهم
دخلنة وعيونهم تدور علي
فزيت على صرخة......يتبع
مساء لخير حبايبي صار بارتين تفاعلكم موشي ليش جذي يعيوني
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!