رواية خنجر الغضنفر الفصل الخامس والأربعون 45 - بقلم Hunen23Hatum

#خنجر_الغضنغر
#الجزء_الثاني_بارت٤٥
#حنين_حاتم

بليل ساعة ب١٢ ندكت علينا باب الغرفة الي مخصصيها النا وصوت مرة لشيخ من ورة لباب تصيح
يمة ذولة زلامكم برة ووويلادي يكولون خل يطلعن الهم مايكدرون يطببونهم لشيخ مايرضا

نفتحت باب لغرفة وطلعن كلهن يتراكضن واولهن ام فدعم
بس اني على كعدتي بلكاع ماكمت من فراشي ومنة تبجي تريد تطلع وراهن
شوية ورجعتلي كشمش كالت كومي ولج كومي
اجو ابوي وعمي إسماعيل وصميدع مابيهم شي لحمد لله هذا غضنفر برة يريدج انتي ولجهال
كومي شوفي شحالة

دموعي نزلت راسي دنكتة للكاع
بيا عين يطلب يشوفني بياعين
واني نذبحت من ورا
ليش ماكالي بشغلة
ليش ماصارحنيييي
اني لو ادري بشغلة ماارتبط بي لو اعرف موتي يصير ببعادي عنة

دكومي ياعيوني مووكت هلحجي

عوفيني كشمش ممشية عليج روح العزاز

عافتني وطلعت
اسمع صوت صياح برة
منة فتحت لباب تعاين شكو
وقسوَّرة ختل بحضني
شوية ونست منة ليبرة كمت وراها ورة لصوت تمشي بس صحت بيها طكَتها ركضة
لحكتها يم باب لمطبخ وكفت وهمة برة بلحديقة كلهم
اشوف لشيخ لزم غضنفر من متونة وحيل خضة وينتر بي
انت مخبببببل
شلون تجي لهنا
متخاف يتبعوك ويأذون عيالك واحنة هم يلوحنة من اذاكم
لاتوصل لهنا خل عيالك آمنين وشوفلك ديرة هج بيها بينما لوضع يهدأ ولوادم تنسا

صوتة يهمس للشيخ
انة جاي اخذ مستمسكاتهم وابلغهم يتحضرون خاطر نطلع كل احنة قجق هليومين مانضل
رتبت امورنا وراح يطلعونا جماعة علشمال

خوش هسة يجيبون مستمسكاتهم ولهنا لاتوصل
لا انت ولا عمامك ولا اي احد
تتصلون بينا من اي مكان واحنة نجيبهم الك من تتمم امورك

بتعد لرجال من كدامة
شافني
صوتة يهمس،للشيخ يستأذنة يدخل جوا
قبل مايوصل الي سحبت لجهال ومشيت
قريب باب لغرفة عصرني من معصمي وجرني
صرت كبالة
وكفت طول بطول ويا
جان لابس بنطرون وقميص راسة مزين صفر وملفوف بشاش شفتة بيها كدمة ويم عينة ضربة
ايدة ملفوفة لركبته
عيونة تتجول بعيد عن عيوني
صوتة يهمس
شلونكم

_ميخصك

عيونة على جهة لباب ايدة تقربت لأيدي راد يلزمني
اصابعة طخن اصابعي
ولأول مرة بحياتي شفت ايدة ترجف
رفع ايدة مسح وجهة
صوتة همس
مكتوبلي انغدر بعرضي من نخلقت لليوم
السموحة انعام

السموحة ؟
تطلبها بهلبساطة
واذا سامحتك راح تنسة لصار بية
لو اني راح انسا مثلا
لسموحة تطلبها عن شنو بلضبببط
عن جذبك لو عن شرفي الي تلوث

عيونة توسعت وعض شفافة
ماركز بوجهي تقرب الي يم وجهي دنة وجهة
انة لجبت عمري كلة اتمنة لموت
ليوم طلبت الله يمدني بعمرين بس حتة اوصلكم لبر لأمان
دفنت جدي وفدعم
بس والله ثم والله ماهد حيلي غيرج
حيل ضرب على رجلة
لو ضاريني بعافيتي ولا ضاريني بيج
السموحة يااعز من إنضر كلبي بيها
اطلعج من لعراق ولتردينا يجرا

وأسأل الله ياخذ عمري ولا عيشة بعذاب الضمير
هسة عرفتي شنو جنت اقصد
ليش يابوية عطلتينا لو مخليتنا طالعين
جاماراحو لعزاز ولاضروني بيج

لو كايللي على شغلك
جان بعمري ماحبيتك
ومااجيت للعراق
ولا تجرأت بعمري ارتبط بيك

وانة لوما خايف من خسارتج مااضم عليج
انة لوما ادري بكلبج ملجوم من موتة ابوج مااضم عنج
بس وروح لغوالي لكسرو ضهري بطيحتهم
ماضريت بنيام باطل بعمري
ولامسيت شرف طاهرة وراس منة لمااحلف بي جذب
كل لجنت اسوي جنت اعذب بلضرب
وهذا شغلي وشغل كل ظابط
ومن اخذتج تسرحت واصبحت مدني
بس تلطخت ادينا بدم المجاتيل
وإحتركَ الأخضر بسعر اليابس
من كتلج ذنبي جبير قصدي ثارات ولد جليل لجنت اخذة الهم ومادريت بلباطل مالهم ألة بوكت متأخر
هذا ذنبي
انة لخاطرج عفت شغلي
لأن ادري كلبج ملجوم وردتج تأمنين

هذا الأمان الوعدتني بي؟
مااسامحك للموت
لوتصبني ذهب مااسامحك
اني صرت نكَسة بسببك
ليش ماكَتلي على شغلك وخليتلي حرية لأختيار
ليش إستغفلتني
اني نهزمت من موت وبجذبك علية رجعتني للموت مرة ثانية
نهزمت من السجن ولقذرين لبي وبجذبك علية ضيعت شرفي الي حافظت علي لآخر رمق
حافضت على شرفي لآخر نفس بية
ومن وراك نهتك شرفي
هاي موضريبة ذنبك هاي ضريبة جذبك
لأن لو جنت صادق وياي ماجان ذبيت نفسي بلنار بعشرتي الك
تتذكر محمد من جذب علية حتة يتزوجني شنو كتلي

بسة انة ماجذبت لغاية

نفس لشي
تتذكر من
كتلي لزلمة مايجذب
لزلمة يحجي الصدك ومايخاف من شي هي روح وماينزعها غير باريها
هسة تساويت وية محمد
ومثل ماشطبتة شطبتك من حياتي
انسا شي اسمة انعام
انسااااااا

ولأطفال ولحب الي بيننا

هذا الحب هش وضعيف مابي امان
والحب لمابي امان عمرة مايستمر
تريدني اطلع وياك ولو صارر وندلوك لو رجعو ضروني وضرو اطفالي
هلمرة ماراح اسامح نفسي اببببببد
كالتها امي واني ليوم اكولها
اني ام وواجبي احمي اطفالي
احميهم حتة منك و حتة من نفسهم

انعام وروح فدعم هلمرة

اشششش لاتسمع امة اسكت
وروح لاتسببلنا اذية بجيتك لهنا لبينا كافينا

عفتة ومشيت للغرفة
قسوَّرة بيدي بس منة بقت برة ماترضا تطب مجلبة بملابسة
نومت قسورة وتمددت بفراشي
شوية وطبن ناس ورة ناس
ام فدعم تسولف وية كشمش تكللها صميدع يكول فدعم طلع قبلنا واحنة نلحكة
انة كلبي مامطمأن يكشمش
اخيج بي شي وضامين علية
احجي ممشية عليج روح جدج

كشمش وجهها للكنتور تمسح بدموعها بطرف دشداشتها
وترد عليها
كلشي مابي يمة شبيج تفاولين
ميموت فدعم ويعوف الحبيب مالة ماتدرين بي

غطيت راسي وجوة راسي دموعي تجري
فلاونزة لزمتني على كد ماسبحت
وشكد مااشطف احس بعدني نكَسة
شكَد مااشطف احس لسة اثار ذيج العلاقة بية
تعبت من هذا الشعور دمرني
وية كل رمشة ترمشها عيني ينعاد المشهد وتنعاد كل ذكرى كدامي
جانت امنيتي لوجنت بطرك روحي جان انهيت حياتي بسلاسة وخلصت من هلعذاب
بس ماكاسر ضهري ومجتفني غير هلأطفال الي مااعرف شنو مصيرهم

عدن يومين اتصل بيهم غضنفر
جنت بلحمام اشطف للمرة المليون
ساعة ب١١ بليل واسمع لرجال يحجي وية زوجتة بلممر يكللها
ماادري شبي اوادم عدهم ثار وياهم يمكن ومندلين مكانهم ويريد يطلع هوة وعيالة بأسرع وقت هسة اتصل يكلي دبرلي سلاح وفلوسة جاهزة من اجي
وحضرلي عيالي فجرية احنة يمكم بس ادك هورن يطلعونلي
عاد اني كتلو لاتجي ولاتوصل احنة نزتهم الك علشارع
طبي طلعي سلاحي وسلاح جبر حطيهن الي بجنطة خل ياخذوهن فدا عن عمر لويلاد حتة فلوسهن ماريد عيالة كعديهم من وكت قبل لأذان حتة يتحضرون
الله يسترنا وتفض هلسالفة ونخلص من عبئ هلأمانة

ماعرف شنو لصارلي من سمعت حجيهم
لشتي كلها ترجف
واني واكفة زلكت بلحمام وعلى مقعدي وكعت
على كعدتي وجسمي يرجف
الزم لملابس توكع من ادية
طلعت من لحمام
رحت للغرفة
تفكير هد حيلي ولخوف خلاني احضن اطفالي لصدري وانحب
خايفة من جية لفجر
وخايفة من لروحة وياهم
وعيت منة بهمس شاورتها كومي بابا برة يريدج
طفرت على حيلها بس سمعت اسمة
جريت قسورة لصدري وطلعت واني اغتنم فرصتي لوحيدة لخلق مستقبل آمن لأطفالي
عاينت يمنة يسرة غرفة لحجي وزوجتة طالع منها ضوة باقي لغرف مسدودة ولبيت اضلم وسنطة
تمشيت للمطبخ همس ثنينهم شايلتهم
غفو على جتفي
لبيبان مفتوحة
برة شفت لحجي بركن لبيت حاط سلاح وينضف بي
ضهرة علية
درت من جهة لبيت لثانية
بيت عمتهم بصفهم يجون عليهم عصرية مرات مامحتكة بيهم ولاعندي سالفة وياهم حتة من يجون مااطلع بس بحالة انو يجيني شعور لقرف وقررت اسبح بعد مااسيطر على نفسي
تصير عندي حاجة مللحة للسبح
اضطر اطلع واسبح مرات ومرات
دكيت عليهم لباب
ادية خدرت من لجهال
بقيت واكفة هواي وادك جسمي يرجف خوف وبرد
شوية وطلعلي ابوهم متفاجأ
يفرك بعيونة

ها يابا خيرج شصاير خومابيكم شي
تعاي طبي باردة

تقربت الة دنكت على عتبة بيتة بلكاع تربعت وكتلة
عمي اني دخيلة يمك مااطب اذا ماتحلف تحميني
دموعي تجري وشفافي ترجف وكل ذرة بية ترتعش
أو أكَلك عوفني يطبني مرض بس احلفلي تحميلي اطفالي

دنك يمي معصب
كومي يابا صدك جذب غير افهم شصاير

قبل ماتفهم احلف تأمنهم يلله اطب

يابا الج لأمان انتي وياهم والي يمسج افصم ضهرو بس احجي ترة مرمرتيني

دخلني ليجوة
زوجتة طلعت من غرفتها اجت يمنا بلمطبخ
شرحتلة الي سمعتة من شيخ إحمود
وفهمتة غايتي مااروح وياهم
واريد منة يضمني ببيتة ومايحجي لأحد عن مكاني
الى ان يرحون همة واني ابقة هنا انتظر جية انغام

لرجال بقة صافن مايعرف شنو يجاوبني
كام على حيلة جابلنة مي
مرتة رفضت وكالتلي تردين اخوي يتفشل وية رجلج وعمامة ويطلع بوجه لقباحة وممحافض على امانتهم
تردين اخوي يزغر كدامهم وهوة الي دك صدرة الهم وتحمل عبئ هلأمانة
كومي وياي خل ارجعج لخاطر لرجال الي آواكم وحافظ عليكم
سحبتني من ملابسي بعصبية ونتر

رجلها نتر بيها وسحب ايدها

ندارت علي تحجي علي
_ ابو جبر لو درة ميباوع بوجهي بعد ليوم لدين
اخوي واعرف زعلة خصوصا بهيج موظوع

_اني دكيتلها صدري وحلفت احميها قبل مااطببها للبيت
هاي دخيلة عدي
ولو نلزمو محد يتضرر غيرها
همة يردون يضرو ويضرون زوجتة ولدليل ماتعرضو بس الها
تضل هنا يمنة ومحد يدري لااخوج ولااي مخلوق الى ان تجيها اختها

ندار علية واشرلي
طبي يابا لحجرة اخواتج نامي انتي وجهالج واحنة لاشفناج ولاندري بيج وين ولانندلج ديرة
والله يستر عليج وعلى بناتنا

كمت واني استمع لنقاش زوجتة لمعترضة واحتد نقاشهم انها بنتر وهوة يسكتها
دخلت للغرفة وحدة من بناتة كالت منو
كامت على حيلها وفتحت لضوة
ابوها من برة حاجاها
فرشت النا حطيت لجهال علفراش وحضنت رجلية لصدري دموعي تجري
وروحي لهيبها ماتطفي بحار
غريزة لأم جانت اقوة واعظم من انو اجازف بيهم
بوقتها عرفت انو حب لأم هوة اقوة واسما واطهر حب
بقة لرجال كاعد تحسبا لأي شي
ومرتة مابطلت حجيها وملامتها
الى ان ندكت بابهم قبل اذان لفجر قفل لباب علينا قبل مايروح يفتحها
بقيت ورا باب لغرفة اتسنط
لجهال نايمين
اسمع صوت برا خبصة
طلع لرجال وبقت مرتة بلصالة من جوة لباب اشوف خيال خطواتها رايحة راجعة بلصالة وتلوم برجلها وترجع تحجي علية
صوت حجيهم برة اسمع طراطيش كلمة افهمها وكلمة لاء الى ان اختفا لصوت وصارت هدوء
ورة اكثر من ربع ساعة ندكت لباب
طلعت جان متكتر على صفحة
همس بصوت ناصي
يابا مشو اهلج
اني ساعدتج عبن دكيتلج صدر وخفت لاينعاد عليج لصار بيج هناك
وهاي ماارضاها على عدوي
بس يشهد الله لو ادري عندج هيج إزلمة فلا اسويها
كلب لدنيا بلصياح
لبيت نفضة نففففض يدور عليج
وبرا شلون لنسوان يصفك ايد بأيد ويضرب على رجلي
يرجع يضرب على صدرة ويصيح كلة مني
مارضة يمشي ولارضة يتحرك خطوة
تالي عمامة كامو يحجون كالولة كافي تعطلنة ذيج لمرة من ورا مرتك تأخرنا وراحو جدك وفدعم
هلمرة هم نتعطل وينضر احد كافي لخسرنا
امشي وعوفها هي ختارت طريقها
وهي من لاول كالتلك بس اطلع منا متشوف وجهي يعني اكيد مرهمة امورها
مشة وياهم ويوصي بابو جبر يكلة هي قريبة وهسة ترجع الكم انة اعرف تفكيرها
مارادت تمشي ويانة وبس نمشي هسة تجيكم لأن ماالها احد هنا
اعبرهم وارد انة مااعوفها
بس ديرو بالكم عليها هي ولجهال امانة

دموعي نزلت
علي على اطفالي على روحي وعلى حبنة
قسوَّرة صرخ رجعت للغرفة
رجعتلة نومتة
صفنت بلسقف
سرحت
رجعت بية لذاكرة لذيج لأيام
ايام لأمان الي مايجي مثلها
لأمان الي عفتة واجيت برجلية للتعب ولشقا
لااني الي رتاحيت ببعادي عنة ولا اني الي رتاحيت من اجيت يمة
بهاي اللحظة تحديدا وضعني حبي بلمنتصف لا اكدر اتقدم ولا اكدر ارجع ليورة
من نخلقت لليوم اجذف
اجذف بأدية ورجلية
لاوصلت للبر ولا سلمت من الغرق
كل الي صار انو اطرافي اماتها التجذيف
ماعاد عندي شي يسند جسدي
بهاي الليلة ودعت جوانب هواااي من روحي ودفنتها تحت وسادة اطفالي
نقضت وعود لبقاء
وحلفت ان اتناسا كل عهد قطعنا
لأول مرة اكون متأكدة هلكد من قراري لأول مرة اخذ قرار ومااتردد ولو لحظة
رغم كان هلقرار اشد واعظم حمل وضعتة على كاهلي
بس ماجان امامي خيار
جنت رايدة موطن ثاني مابي اي وجه من لوجوه الي اعرفها
مابي وجوه ملكاهم يذكرني بلي عشتة
مابي وجوه اخجل بكل لحضة اعاين الهم واتخيلهم يشوفوني ملوثة
وتحديدا جنت رايدة اهرب من غضنفر الى الآنهاية
ماريد يجي يوم ويجمعني بي مكان
يجمعني فراش
ماريد اتذكر ذيج لعلاقة القذرة
صرت اقرف من نفسي ومن غضنفر وحتة من اسم غرفة النوم
ماريد ناس بيوم من لأيام يزل لسانهم امام اطفالي ويحجون شي عن لصارلي
مااريد ناس بيوم يدفعهم موقف او مشكلة الى ان يفضحون لماضي كدام اطفالي
هذا ليوم لوصار ماراح اتردد لحظة بان اقتل نفسي
ليوم الي يعرفون اطفالي بي انو امهم مغتصبة راح يكون اخر يوم بعمري
كل هاي لأفكار خطرت على بالي قبل مااخذ قرار الفراق الأبدي
ومن غير رجعة

عدن يومين عليهم همة يتلاطمون
لايكدرون يكلون لحجي إحمود ولايكدرون يسكتون حسيت بحجم الورطة الي صارتلهم بسببي
اتصلت بأنغام استعجلها
بلغتني انو فورا راح يحجزون
وسبب تأخرهم هوة شغل منصور
جان يصفي حسابة ويصفون اغراضهم وشغلاتهم ومقررين يرجعون للعراق
هذا الخبر جان الصدمة الي خلتني اسد لتلفون بدون ماانطق
ومابيدي غير التقبل
جانت رغبتي انو اهرب من لعراق كلة
وورة يومين اجو انغام ومنصور اتصلو بية وبلغوني
اخذني الرجال الهم للفندق تشكرت منة هواي وطلبت منة بأن يبلغني اذا اتصلو بيهم يطمنوهم
وينطيني الرقم الي يتصلون منة
جانت غايتي أنو اتصل بي وابلغة انو اني راح اطلع برا لعراق وية انغام وابلغة انو ميرجع ولايدور علية ولايتعب نفسة

الي جان بية شي موعادي
نفسيتي جانت تعبانة الى درجة مااعرف شلون بقيت عايشة مااعرف شلون قاومت لحضات اليأس وشعور القرف المميت وماانهيت حياتي
وسبحان ربي الي نطاني كل هلقوة وخلاني اصمد واهرب بأطفالي واختار البعد
واني الي بيوم بتعدت عنة بهتت حياتي ونطفا كل لون بية
لقائي بأنغام كان لحضات ماانساها
جنت حاضنتها واصرخ ولج انغام ماتت انعام ماتتتت
ولج وين امي وينها كليلها خل تطلع
خل ترجع تحميني مثل ماجانت تسوي
كليلها خل ترجع تقسا علية اني بحاجة قسوتها وانانيتها
كليلها ليوم يلله تأكدت ان محد بهلدنية يعرف مصلحتي بكدها
كليلها ندمانة والله ندمانة
ليش ماسمعت حجايتها

جانت تبجي وتهدأ بية
صح فرق بيني وبينها هواي بس لحظتها حسيت نفسي طفلة ورتميت بحظنها
منصور اخذ لجهال وطلع
جان رأيهم انو نرجع لكربلاء ولنفس منطقتنا
بس اني رفضت وكلتلهم مااريد اشوف اي احد من لناس الي نعرفهم
ستقرينا انو نأجر ببغداد مؤقت
خالتي ام منصور بقت يم خالي رفضت تجي وياهم لأن خالي مريض حيل خافت لاترجع ويموت وهي بعيدة عنة
والي اكتشفتة بهلأيام انو اختي تاركة دراستها من وفاة امي ومابلغتني حتة لاتزيد همومي
ولسبب منصور مايكدر على مصاريفها
بس لسبب لحقيقي ماجان لمصاريف
لسبب لحقيقي منصور عمرة ماقبل على دوامها من يومة رايد مرة للبيت فقط لادوام ولادراسة
من ماتت امي استغل كونها لوحدها
جانت امي واكفة بعينة
ومقشمرها ومبطلها بحجة قلة لمصاريف رغم يكدر يقتصد ويخليها تكمل بس هوة اختار لأسهل لأن هاي رغبتة لأساسية
اتصلت ببيت اخت حجي إحمود
وبشرتني بأتصال غضنفر بلحجي ومبلغة انو همة وصلو ومستقرين بلأردن ومبلغهم انو بس يهدأ لوضع شوية هوة راح يجي

اخذت لرقم من عندة ونطيتة لانعام ومنصور حجو ويا وبلغو برغبتي وفهمو انو ميدور علية ولا يحاول يتواصل وياي
منصور اخذ لتلفون وحجة ويا
جنت اتسمع الة وهوة يحاول يشرحلة وضعي ويكلة خليها شوية تتحسن نفسيتها
هي تعبانة ومريضة
بيها خوفة منك ولصارلها موشوية
مااعرف شنو يكلة بس بنهاية لمكالمة بقة يحلف الة انو اني بخير ولجهال بأحسن حال
بعد ايام
انتقلنا لبيت اجار
وصارحتني انغام انو لجايبي وياهم مبلغ يادوب يجيب بيت ٥٠ متر
طلعت ذهبي وفلوس جان خالهن غضنفر بجنطتي
من وارد لمحل مالتة مبلغ لابأس بي
بعت ذهبي ولفلوس لعندي ولعدهم واخذنا بيت ٥٠ متر طابق واحد عبارة عن استقبال ومطبخ وغرفة

استقرينا اني ولأطفال بلأستقبال
بدة منصور يدور على شغل ماحصل شي ولأن مابيدة مهنة غير لسياقة
شكم فلس بقن عدهم قرر يشتري بيهن تكسي
عدت فترة استقرينا
منة جبيرة تذكر غضنفر وتسال علي من ابسطها لو اعيط بيها مجرد ماتستهضم تتذكرة وتضل تبجي تريدة بس قسورة ميذكرة
إلة من يشوفها تبجي يكوم يبجي وياها علي
نفسيتي يوم عن يوم تزيد سوء
مسؤلية لأطفال جبيرة ماانكر انغام ومنصور ممقصرين وياي بس مامتعودة على هلحمل
جان شايل عني هواي
كل هذا شي واشتياقي الة
حنيني لأيامنا شي ماالكة بداخلي تفسير الة
اصعب شي انو تشتاق لأنسان وتخاف منة بآن واحد
انو تريد قربة بس ماتكدر علي
اشتاقلة بس من اصفن ادري لايمكن اكدر احضنة او حتة اكون ويا بغرفة وحدة
ولو صارت وشفتة مااكدر يمكن حتة انزع حجابي كدامة
حجم لضرر الي بروحي جان شي جبيييير
شي خلا عندي امراااض ماشفيت منها لليوم
لليوم اسبح بليوم كمعدل بين ٥الى ٧ مرات
دوم جنت اسمع منصور يشتكي من نفاذ المي من يريد يسبح دوم اسمعة يكل لأنغام اختج بيها وهواس اخذيها لطبيب
بس لغريب انو لوهواس جان بس علية
بس على جسمي
ولأغرب انو ماجنت اليف ولا اغسل شعري بشي
كل لجنت اسوي اشطف واسمي واشطف واسمي الى ان اوكع بلكاع منهارة واصرخ واضرب على جسمي
عدت سنة علينة
ماعرف شلون عدت ولا اذكر منها غير مقتطفات
لأن جنت اسبح اكثر من مااكل واكثر من مااشوف اطفالي واكثر من مااحجي
بهلفترة
بديت احاول اراجع لدوامي
اوراقي وكل شغلاتي لقديمة بحوزة انغام
صورنا مستمسكاتنا كلشي جانت امي محافظة علي بجنطة سودة جبيرة
وكأن تدري هذا ليوم جاي
روحات ورجعات وجر وعر واشهر مراجعة
كدرت ارجع لوظيفتي
وداومت دوام رسمي
بديت اكون صداقات واطلع من جو لبيت ولكآبة لجنت عايشة بي
بس شكد مااحاول مااكدر
بنص لدوام جنت اطلع من لصف واركض للحمامات اسبح بدون وعي وادراك للي جاي اسوي
وهواي مرات سبحت واني بملابسي
مااوعة على نفسي غير من يدكون علية لباب زميلاتي الي صارو يعرفون حالتي ويقدرون وضعي
يسدون عني شواغر
ويحاولون يقووني وهونون علية
شوكت ميضيعوني يلكوني بلحمام

نززني صوت انغام من كالت
انعام تسمعين لولد شجاي يكول
صارلة ساعة يحاجيج شبيييج ....يتبع
مسائكم فلة اعذروني علتأخير متتخيلون هذا لبارت شلون نكتب 🥺
شكرا للي يتفاعلون والي ميتفاعلون هم شكرا الهم🥰
بس اريد اطلب منكم طلب
نسبة لمشاهدة مال لبارتات كلش قليلة مقارنة بلجزء لأول لبنات مديوصلهم اشعار اغلبهم
اتمنة تساعدوني بأنو متابعيني يعرفون بنزول لجزء لثاني لطفا ممتنة الكم على دعواتكم