#خنجر_الغضنفر
#الجزء_الثاني_بارت٥٥
#حنين_حاتم
انعام....
دفعت لباب ودخلت جوا
عبرت من فوك ستار وصميدع ومنصور وصلتلة لفراشة
رفعت لغطا اباوع ماهوة خال مخاد بمكانة
حسيت نغزة بكلبي تذكرت حالة جان لازم كلبة ويتنفس بصعوبة ويفتح بأزرار قميصة
نداريت على قيصر
هذا ماهوة
تقرب يطفر من فوكهم يريد يتأكد
لضوة طافي
عاين على فراشة صفك ايد بأيد بأنفعال
حيل يخض بستار وصميدع يوعي بيهم
طفرو ثنينهم متفاجأين من خضة الهم
ولكم ماهوة طالععععع
كومو بساع ليروح يتخربط وهوة يسوق
لبسو كلهم وطلعو منصور طلع وياهم
بقيت جوة الوج
للفجر همة ماكو
كاعدة علسجادة ابجي وقسورة يمي كلسا يروح للباب ويرجع
لمصيبة من لشدهة محد بيهم ماخذ مبايلة كلهن علشحن
صوت لباب نربدت
كلبي نربد وياها
ركضت اتعثر بجادري وقسورة كدامي وانغام تلبس بحجابها ولحكتنة
فتح لباب دخلو اربعتهم وهوة ماكو
انعام:- هاااا وينة
منصور :-ماكو فرينة الدنيا ماهوة
قيصر :- جيبيلنا مبايلاتنا خل نمش بوية انة اعرفة وين راح موببغداد ادري بي ليش نتعب روحنا هنا
دموعي تجمعن بعيني
يعني وين ممكن يكون راح
لجليل وولدة اكو غيرها
هوة من زمان كالها جليل حرام يعيش وراد يكتلة بس ماخلينا تصورنا لسالفة ماتت
ماتصورنا حقدهم يخليهم يذبون هيج تهم باطلة عليج ويشيعون هيج حجي
على صوتهم طلع طالب
اباوعلة شكلة متغير حيل هاي اول مرة اركز بي من اشهر ضعفان هواي لحيتة مازينها لسا
ذبلان تغير احسة موذاك طالب
تأثرة بموتتة منة موشي عادي
خلاني اشك
وسألت بثينة اكثر من مرة كالت لا ماكو شي بس هوة فدعم موصي بيها من ميت بحضنة ولهلسبب متأذي عليها يكول ماصنت لأمانة
وكف لنومة بعينة يسأل شكو شصار
قيصر يحجيلة وقسورة دخل جوة جابلهم مبايلاتهم
ولابس قمصلتة وواكف استعداد
نترت بي
انت وين تريد ان شاء الله شو لابس وواكف استعداد
اروح وياهم لعد شنو بابا ضايع واني اكعد هنا يم النسوان اتصفن
اول شي ابوك موطفل وضايع وثاني شي اي تكعد يم لنسوان لعد احنة شنو نبقة وحدنا
عمك يروح للشغل من لصبح لليل احنة نضل وحدنا
اي طالب يمكم
طالب:- لاء قسورة انة امش وياهم واخيتي ديرو بالكم عليها من اطمأن على غضنفر وارد وان شاء الله ماتأخر
اشرتلة بنتر واخزر بي مااريدهم يتحسسون
ادخل جوا وبطل تقرر من راسك ترجعلي اول شي وتستأذن
حيل ينتر ويضرب رجلة بلكاع فاجأني
اروح كتلج اروووووح هسة رح يرحون وبعد متخليني اروح وياهم مثل منة من ماتت وهي تتوسل بيج علروحة لعمو قيصر وماخليتيها
خطف ندار علية قيصر عاقد حاجبة
تقرب يمي وهمس بجدية
ام امتنان جنتي تندلين مكاني ؟؟؟؟؟
تدرين بية بلعراق ؟؟
حيل سحبت قسورة وراي وكرصتة
منصور تقرب يتدارك الوضع
منصور:- لايابا ابو القوص وين نندلك ووين ندري بيك هذا يسولف لوحدة جاهل
ماحس غير قسورة ينبت ادري ثنينهن بضهري وبكل قوتة دفعني ردت اوكع على وجهي
تقرب لقيصر لزم بنطرونة وتجمع الدمع بعينة
يشيرلي بأصبع الأتهام ويشهك ويكلة
عمو ماما جانت تندلك وهي الي ماخلتنة نجيك وحتة من ندلت مكانك واجينة للتربية الي تداوم بيها اتفقت وية عمو منصور وقشمرتنة كالولنا ميداوم هنا اني سمعت كلشي بوقتها
حتة امتنان قبل متموت جانت تفز من النوم تبجي على بابا وعمو فدعم
لو تدري شكد توسلت بماما وشكد بجت حتة توصل الكم
عيوني علي مصدومة
ابن بطني كاعد يدينني ويتهمني بأذيتهم
لأن ردت احميهم لأن جنت خايفة عليهم ورغم كلشي سويتة تالي لحكني لهنا ثار ابوهم وماتت اختة بذنب ابو
ابو الي يتصور حرمتهم منة خباثة
ميدري كل يوم جنت اموت الف موتة واني اتذكر حبيبي وزوجي وابو بيتي وشريك روحي
واني اتذكر ليالينة وسهرنا غزلة وحضنة الي لليوم احس طبعاتة بية
حرمت نفسي منة ضيعت شبابي وكرست حياتي الهم
حرمت نفسي من كلشي خوفا عليهم
تالي ابني يتهمني ويشتكي لعمة مني
دموعي عمن عيوني امسح بيهن وخطف من يمي
ركض للغرفة جاب وصلة كلها تراب مدري شنو ملفوف ببطنها نكتها بأنفعال وكع منها دفتر واوراق مطبكات بحجم زغير
شال دفتر لونة وردي ابو السبرنكَ بي رسمة لولو كاتي اتذكر كتلت نفسها علي
فتحة وصار يكلب بي بسرعة وياشر لعمة يكلة باع عمو شوووووف
ادي ترجف وجسمة ينتر بأنفعال يشمر بأدي ويأشر الة
شوف
بااااع
شوف ماما شنو جانت تسوي
مااعرف شنو المكتوب بلدفتر ولا ادري عنة ولافتحت جنطتها لليوم ملابسها وكلشي يخصها مااكدر المسهن ولا اوصل الهن حتة الغرفة الي تنام بيها مااطبلها
عيوني على قيصر يقرة بلكلام ويكلب بإنفعال منصور تقرب شال لأوراق المطبكات يفتح بيهن يعاين الهن
ويرفع راسة يباوعلي يلم شفافة ويهز راسة
تقربت سحبت الدفتر من ايد قيصر
سحلة من ايدي وصار ينتر بأنفعال
شكد ظلمتي جهالج وظلمتي غضنفر شكككككككد
ولج شلون نطاج كلبج تدفنيها وماتنطيني خبر وانتي تدرين بية بلعراق لا وعندج معلومات عني توصلج الي بمنتهى السهولة
بأي حقققققققققققق
بأي حق تدفنين الطفلة ومتكلفين نفسج حتة تبلغينة بأي حقققق
تدرين غضنفر لو قرة هذا الحجي شيسوييييييييي
يموت وحق الحق يموت
ولج انة واحس كلبي تملخخخخ
مانكسر خاطرج عليها ماكلتي خطييييية
ولج ماتتتت وبكلبها الف حسرة على شوفة ابوها
ياويلج من الله وعذابة ياويلللللج
ياويلي على شنووووووو
على شبابي الضاع
على بنتي الراحت من ادية بيوم وليلة
على تضحياتي الي تجازن بلغدر والنكراااااان
على الجذبة الي جنت عايشة بيها
ردت احميهم من ذنب ابوهم
ولهنا لحكني ذنبة وخطف بنيتي من حضني
لهنا وماخلصت من ذنبة
الله يعلم بية ردت احميهم
انتو ياويلكممممم من ذنبي
ياويلكم من لوعتي على شرفي الضاع بسببكم وبسبب ثاراتكم وية جليل الي اخذ حقة مني ومن شرفي بلكلام الي بثة علية
انتو ياويلكم من ذنب روح بنتي الطاهرة الي زهقت بسبب طيش ابوها وحبة للدم ولثار الي ميرضة يعوفة
وهسة رح يروح ينتقم لمقتل منة وهم يرجعون على قسورة واصفة اني ايدي للحايط
روحو ولتراووني وجهكم وانسو بيوم لكيتوني اعتبروني لليوم ضايعة وقسورة اعتبرو مات وية اختة
روحو واخذو ثاراتكم وياكم
اني موحمل تعب وحق الحقققق عوفوني وعوفولي ذرة الأمان الي بقت بحياتي
روحو اخذو ثاراتكم بعيد عني
اني مابقالي شي اخسرة كلشي مابقالييييييييي
كل الي وهبة الله الي خسرتة من يوم ذبيت نفسي بهاوية غضنفر
طلعو من حياتي وعوفولي ابني اربي واكبرة بعيد عنكم وعن ثاراتكم الماتخلللللص
حييل سحب قسورة من ايدي ونتر
نجوم السما اقربببلج قسورة ابنننا
والضفر مايطلع من اللحم
حرمتي من بتة وماتتت الطفلة سالفة جليل وولدة تهيؤات من غضنفر واني نفسي ممقتنع بيها وين لكوكم ووين وصلو الكم وهوة نفسة صارلة سنين يدور وماحصللكم اثر
جليل وولدة يوصلولكم بهلسهولة
منة ماتت من ورا اهمالج
بيت موزينات تخلين بنية حديثة حمرة خضرة تروح يمهن اميييش انتي اميش
واني شمدريني اشم ايدي
لو هوة لبشر خيارة وينضاكَ
مرة كاعدة ببيتي لااطلع ولااعرف غيرهن وهنة عاشت سنتين يمنة ماعدهن زايدة ناقصة واشوفهن خلوقات وخوش بنات شمدريني يطلعن هيج
ممبين عليهن ابببببد حالهن من حالنة
مالك حق تتهمني بأهمالي الها اني ربيت وكبرت ومداريتهم مثل المي بلصينية
هذا قدرها وهذا يومها
خللللص لعد لتكولين ذنب غضنفر كولي قدرها ويومها
اني ماكلت هوة الي حجاها بنفسة وهوة متأكد ومتيقن
مارد علية عيونة على قسورة ويوجه بي
طب عمو جيبلك شكم لبسة وتعال
وين وين تريد بي قسورة ميخطو خطوة برا لبيت
ولايروح وياكم لأي مكان
اني ماأمن علي لاوياك ولاوية ابو ولاوية اي مخلوق
ميباوعلي يحجي وية منصور
راح ناخذة شكم يوم يشوف عمامة وعماتة ولفروخ يتعرفون علي ونردة ذاك ليوم ماشفنا حتة لبنات ماشافنة كضاها كاعد يم ابو
عوف منصور وباوعلي محد مسؤل عن قسورة بهلبيت غيري
بنتر يرد علية
محد مسؤل عن قسورة غير ابو وعمامة وانتي موكفو يبقة يمج
يروح حالة من حال اختة
ماطول غضنفر شاك بجليل وولدة الهم يد معناها ماراح يعوفهم الي ان يتأكد ولحد ذاك لوقت حياتكم بخطر انة مابايع ابن اخوي تمشين ويانا حياج
تضلين ضلي
بس قسورة ميضل هنا
بأنفعال صرت اسحب بي من ايدة ودموعي تجري واصرخ بدون شعور
نطيني ابني واطلعو برة بيتي
اني صوجي دزيتة الكم صوجيييييي
تتصورين لوما دازتة النة يعني ماراح يجي يوم ونلكا
مصير الحي يتلاكَة
انتي مرة دارسة وماشاء الله عليج فاهمة لتكبريها وهي زغيرة
لوتخلين لولد يمشي ويانا لوتمشين انتي ويا
ومنصور وزوجتة اذا يحبون يجون هم حياهم عين غطا وعين فراش
الهم لدار والنة العتبة
لانريد داركم ولانريد لعتبة اكسر لشر وعوف ابني وبطل تحقد بي علية وروحو منين مااجيتو
ابني بحضانتي بعدة طفل ومن عين باجر اطلكَ نفسي من ابو وحتة مكاني اغيرة
يريد يشوفة يجي مرة بلشهر يشوفة كدام عيني ويروح
تقرب الي ويهمس بتهديد
انعام انتي بتنا وعشتي بينا موشوية وانة اعزج واحترمج هلمرة غضنفر مايهدج ولايهد ابنة لو تطيرين لآخر لدنيا وترة محد يكدر يضرة ولايضركم ماطولكم يمة بيتة آمن ومايجرأ مخلوق يوصل الة
وعيب نوصل للمحاكم ولو وصلناها مااضن لقانون ينصفج ترة غضنفر بأتصال واحد يكدر ياخذة منج فلا توصلينة لهلمواصيل
نداريت على منصور الي واكف متفرج
منصور ماتحجي تسمعة شيكول
ام امتنان بعد الي سمعتة منهم اني حتة على حياتنا مامأمن خلي الطفل يروح يم اهلة بينما يحلون لسالفة اذا بقة يمنا معناها لو راد ابو يخطي خطوة وياخذ ثار امتنان اول مايرجعون على قسورة لاسامح الله
انتي اعرف بسالفة لثارات
واذا ما مأمنة علي روحي ويا
يابا كلنة نروح ويا خاف تكولين خايف على روحي من ضلتكم يمنا
بدموع وحسرة رديت اني من بيتي مااطلع وابني هم مايطلع
ماشوف غير سحبو قسورة وهوة بكل هدوء طلع وياهم حتة مالتفت الي ولاعاين
صحت وراهم بلاحيلة
تانوني خل البس
وكفو ويعاينون الي
طبيت للغرفة اطلع بلملابس وارجع ارجعهن
شلون اروح وياهم شلووووون
وسلامة لو شافتني ماتلزم ابني وتحشي براسة
متحاول تفضح المستور
متدز ابنها مثل ماجانت تسوي
شلون اعاين بوجوههن شوفتهن تذكرني بلصار
تذكرني شكد ضربن علباب وصرخن واني جوة استغيث بلامجيب
وهوة ! شلون احط عيني بعينة شلون ابات ببيت هوة موجود بي
صوت انغام تستعجلني
رفعت راسي اعاين الها جانت لابسة وبيدها جنطة زغيرة بيها ملابسها
انتي شكو لابسة
شنو شكو لابسة غير نروح وياكم
يعني عبالج هناك يمهم امان
لج انتي ماشايفة حياتهم سأليني الي
_انعام غضنفر هسة ائمن مكان النة وهمة ماطول عدهم ثار وشاكين مقتل منة يكون اقتصاص معناها انتي وابنج واحنة بدائرة الخطر
غضنفر حماية والة وزنة يعني بضلة نأمن احسن مانضل هنا ويلوحنة طشار من بعيد لبعيد واحنة لابيها لاعليها غصبا ماعليهم يأمنونا لحد ماتخلص سوالفهم احنة شنو ذنبنا
اعاينلها ولشتي كلها ترجف
هذا ليوم ماحسبتلة حساب ولاتصورت رح يجي
اذا قيصر هيج ردة فعلة من درة بيها جانت تريد توصللهم غضنفر لودرة شيسوي
لبست شلون ماجان واخذتلي قطعتين ملابس وكمت وياهم كوة علية رجلية معاندتني
ركبنة اني وانغام بسيارة منصور وقسورة مايرضة يركب ويانا راح وياهم
لطريق كلة كلما نصير قريبين عليهم اباوعلة شلون منطلق ويسولف وياهم عبالك يعرفهم من سنين
كلبي بحتصر كلما تصد عيني علي
هذا الجنت خايفة منة
خايفة علي من حياتهم وخايفة انجبر ابقة اتواصل وياهم وسللامة ماممكن تعوفني بحالي
لسر الي حافظت علي لونكشف يكون اخر يوم الي بهلدنيا
وصلنة للبيت جانن ٣ بيوت منفصلات بس واحد يم لثاني لبيت الي بلوسط جبير والي على يمينة ويسارة ازغر من عندة بس تصميمهن متشابه
حماية بلباب و٣ سيارات طابكَات
احس الدية نسدت بوجهي من نفتح لباب وكلولنا تفضلو
دخلت اتمشة حديقة جبيرة عليمين وليسار زرع وبلوسط شتايكَر
صوت لبنات واكفات بلباب يم لمطبخ
كلهن لابسات اسود حتة ماميزتهن
صوت صريخهن من بعيد حية الفاجعة بية جن ستوها ميتة
تقربن الي وبكل حيلهن يلطمن
بلكاع هويت متربعة وحيل على رجلية اضرب
عمة امريكا كبالي مدري شوكت شكت ثوبها وحيل تصرخ
عيوني تغوش ودبيجهن يهز لكَاع جواية
بصوت عالي جنت اصرخ
راحت بنيتي ولج عمممة
ربيت وكبرت وللكبر سلمتها ولج عمممة
تتقرب الي تضرب على وجها وتصرخ من عمة لعماني كوووون
سودة بوجهي حبوبة منة
جنت من بينهن ادورها
الي لليوم محتفظة بشيلتها وثوبها اشم عطرها بيهن
كمت ادور عليها واسأل
كشمش كبالي برطمت ودارت وجهها للحايط
صوت عمة امريكا من وراي
ماتت ييمة راحت لدار حقها لحكَت عمود بيتها وعزيزها فدهم ماضلتلها جم يوم وراهم وماتت
دخلت جوة مخنوكة صارت بوجههي بباب المطبخ واكفة
لابسة الوان من دونهن
تقربت الي من شافتني تدنت باستني وتهمس
الله يرحمها خطية صفيتي اديج للحايط خسرتي كلشي
يلله لتضوجين
دخلت جوة بنيات مراهقات من حل إمتنان تقربن الي بوسني بيهن من تهاني
حيل يبوسن ويشمن مثلها حجاياتهن تارستها الحنية
دخلني جوة نخبصن بية
بساع جابن الجاي والنومي والكعك هبة ريح
دخلو منصور جوة
انغام كاعدة يمي
كابللني كلهن وبدن يسألن شلون ماتتت وليش
انغام تحجي الهن جنت مدنكة مااكدر احجي ولابية اتذكر واسولف
بس دموع تجري وحسرة كتمت صوتي واخذت حيلي
كلما ارفع راسي ادور بيبي شكرية بينهن
اتذكر حجاياتها
اسمي بصوتها من تصيحني نعيمة
سمعت صوتة نزيت عبالي يتراولي
رفعت راسي على خيالة من فات وراح للأستقبال من يم اللشباك
نزيت على حيلي ركض للأستقبال
لحكتني كشمش
شمالج خية شبيج فزيتي
من شافتة ابتسمت وتهمس
هاااا شفتي
صيحيلي قيصر
شلج بي
صيحي فدوة
دخلت صاحتة الي واجت وكف بعيد عني عينة علباب وكال ها
قيصر امانة الله عليك لاتحجيلة على الدفتر ولا تكلة اني جنت ادري بيك بلعراق ولاتكلة منة جانت تبجي تريد تلتقي بيكم
فدوة لاتحجيلة
_تخافين منة ؟
_لاء مو مسألة خوف
_موهلأكول اخوية اعرفنة يضر روحة ومايضرج
_مومسألة خوف صدك بس مااريد يعرف يبقة ينقهر
_تخافين علي ينقهر جا ماخفتي علي يموت من خذيتيهم وشردتي وتدرين رويحتة بيكم
تدرين شجان يحجيلي عنكم من اتصل بي من جنت بأمريكا
يكلي انة هسة نولدت من عرست على نعيمة ومن جابتلي نعيمة ثانية
قيصر رحمة للميتين احلفك بروح فدعم بطل عتب والله لبية مكفيني
اني ام ونذبج شرفي وحياتي وحياة اطفالي جانت بخطر شلون ماانهزم
من شفتة جاي لفجر مثل الحرامية وجهة مخطوف يطلب من حجي حمود المسعودي يشوفنة وبهاي اذاني سمعت لرجال يحجي وية زوجتة يكللها لاكينهم واحتمال مايطلعون سالمين
شلون اروح وياهم واني مامئمنة على حياتي
اني ردت احمي اطفالي والله ماردت غيرها
_هسة شني المطلوب مني
_لاتحجيلة بروح فدعم
_مااحجيلة مولأن حلفتي بس البي مكفي
اشوفج حالة اجة للبيت بلية نعال ولامحفظة ولامبايل
اكلة وين جنت يكلي
تثق بلله ماادري وين جنت
طلعت برة لكيت واحد من حمايتة جان ويا
يكلي مكابل كبر فدعم وجدة ويكلهم ديرو بالكم عليها بنيتي زغيرة علكَبر ترفة وتخاف
تدرين هاي اللوعة الي بصدرة ماتطفة للموت
لأن ماوكف على قبرها ولاشافها بعينة من ندفنت
للموت يبقة مامصدك ولامستوعب
ايدي على عيوني دموعي تجري
كافي احلفك بلله كافي
والله بفاتحتها لااشوف ولااسمع كضيتها بلمستشفى
هوة اني لشفتها ووكفت على قبرها لليوم اوكف بلباب وكت حلة الطالبات واتانيها
وحق الحق لليوم اتخيل تجيني هي وصدريتها وجنطتها بضهرها
تفكر بأخوك ومقهور علي
اني محد فكر بحالي
اني وصلت الجنون عقل ماجان براسي من نهزمت منهم جان الخوف وحدة الي يقودني ومسيطر علية
صوت من جوا صاحولة
عافني وراح
دخلت جوا يم باب لأستقبال لداخلية تعمدت اكعد
من اسمع صوتة احس روحي تطلع من صدري وترجع الي
مشتاااااكة بحجم هلكون
بس لو لمس جزء مني يمكن يصير بية شي
لباب نفتحت ودخل ليجوا كال سلام عليكم ومشة حتة مالتفت راح جوة طلع ملابس ودخل للحمام
اسمع صوت قيصر بلأستقبال يحجي وية منصور بصوت عالي وبنتر يكلة
انة مااعتب على انعام
انعام مرة ومفجوعة بس انت تندل مكاني
شلون تدفنها وانت تندل مكان عمها وماتجي وتبلغني
منصور:- قيصر خوية احنة جنة بصدمة والله مامستوعبين مثل لحلم بساع بساع صار وبساع ندفنت
لبنية جسمها ازرك وهواي باقية برا علشجرة وشرحوها مومال تتأخر هي الها ليلة ميتة ونهار بطولة يلله سلموها النة يعني مومال تنتظر علما اجي من بغداد الكم بلقليل ٦ ساعات ولو الكاك لوما الكا
وبصراحة ردنا ندفنها بدون مشاكل وردنة فاتحها تعدي على خير كافي علينة طالب وخبالة
وماجذب عليك جنة خايفين من انو تحملون انعام المسؤلية وهي لبيها مكفيها بوقتها
لامالكم حق ابد
لوجايين بوقتها ماتمر مرور لكرام
هذول الي شفتوهم بلكامرات ونحكمو جائز وراهم احد
واحنة شمدرينا ياخوية
صوت لباب نفتح وطلع من لحمام لابس صروال وفالينة ولخاولي على شعرة ونازل على وجهة
رغم كبران هواي ومتغير بس بعدة جسمة مثل ماهوة
ثواني خطف شفت صدرة وزنودة مااعرف شنو لصارلي
جسمة لجان يثيرني مثل اي مرة
وجنت ودي احضنة من اشوف صدري عاري
ماعرف شنو حسيت من شفتة ليوم
شعور مختلف
حسيت محتاجة اسبح بشدددددة
شعور ماممكن اقاومة مثل المدمن من يطلب ادمانة
مالكيت نفسي غير بلحمام متربعة بملابسي جوة الدوش
صديت على لتعلاكة ورا لباب جانن ملابسة الي نازعهن
كمت على حيلي تلمستهن شميتهن
شفايفي تطبع بوسات على الملابس
لباب نفتحت صار بوجهي
صفن علية
هديت الدشداشة وجسمي صار يرجف
مد ايدة للدشداشة من جيبها طلع جكارة واخذهن وراح
بساع قفلت لباب ورا
شوية ودكت لباب انغام علية
تحاجيني
ها انعام انطيج ملابس
اي وجيبيلي خاولي
ناوشتهن الي لبستهن ونشفت شعري وطلعت
اشرتلي عمة امريكا على وحدة من الغرف
طبي يمة رتاحي هناك
فتحت لباب جانت لغرفة ضلمة
دخلت خطوتين
نزيت على سدة لباب وايد حيل سحبتني
ايدي تهمش وراي ادور على الضوة
جسمي بين ادي وراسة على جتفي ونفسة بركَبتي
ريحة عطر بخشمي بس موعطرة
اجة لضوة بيدي دست اكثر من دكمة الي ان شتغل
حيل دفعتة من صدرة
مال راسة ويعاين الي عيونة حمرة وبيها دموع
صوتة يهمس الي
انعام ولخلق محمد محتااااااجلج
نطيني جرحج خل اشافي
انة هم مثل حالج واتعس
اقلها عندج منها ذكرة
ولج انة حتة وجهها مااتذكرة
جنت اباوعلة واحس جسمي يرتجف واحس نفسي ريد اسبح رغبة ملللحة مااكدر اقاومها
ركضت على لباب بعدني افتحها ادي صارن عليها
حبسني بين جسمة ولباب وصوتة يهمس
ورد لباجلة هلمرة ماعوفج لوتتثالث لدنية
صوت قسورة علباب يضرب ويصيح بابا وينك
وخرت عن لباب فتحها وقابض على ايدي حيل
سحبتها من عندة استغليت دخول قسورة وبساع ركضت للحمام دخلت
فتحت لماي جوا كعدت
مثل لميت وتوة ردتلة روحة
احس بقذارة على جسمي بقيت جوا لماي الي ان خلص لحار وبقة ينزل بس بارد
جنت حرفيا ارتجف جوا الماي ومااكدر اطلع
شعور بداخلي ينمو من ساعة الي شفتة احس السبح صار اهم من النفس الي اتنفسة
صوت انغام علباب
هنا انعام صدك جذب هسة عبالهن صار شي بينكم طلعتي من لغرفة سبحتي يمعودة لناس الها لضاهر تعاي شوفي مرتة تحوص راح تطك كلسا وعاينت للحمام وفرت ايدها
جيبيلي ملابس
جابتلي من عدها
هاي وين يصيرلي يمعودة
شسويلج لعد هوة انتي شجايبة وياج كلة بجايم ماكو دشداشة بس لجبة
هوة اني شفت دربي من لميتهن شامي عامي خليت
بساع لبستهن وطلعت
بلصالة كعدت يمهن
بت عمة امريكا اماني جابت صوبة خلتها يمي
جنت ارججف
شمرت على جتفي بطانية
بقن يسولفن وسلامة كبالي تنافخ
بقت عمة امريكا تسولف على انفجار صاير يمهم قبل فترة تحاول تهون علية تسولفلي على مرة ميتين ولدها كل يومية تحط صينية لقاسم وتكعد بلباب تدك وتلطم
سلامة من وحدها كالت هوة الحزن بللبس لو بلكلب
اندري شلون عدها كلوب لنسوان تتونس وبزرها جوة لتراب لا والهن خلك وحيل للونسة
ماجاوبتها ومحد جاوبها عمة امريكا كملت سالفتها
على كعدتنة وصوتة من جوا بكل قوتة صاح
انعاااااااااام وينننننننننننج
كمت على حيلي مخترعة تقرب الي حييل بكل قوتة شمر شي مافرزتنة شنو لأن اجة بين عيني وخدي حسيت شي حاد نبت بلمكان وعيني من الألم احس جدحة صارت بيها
ليورا رجعت دخت
بلكاع كعدت
ادين على متوني واصواتهم اسمعها بس فاقدة من الشوغة والألم الي بعيني
احد دفعني وعمة امريكا حضنتني حيل واحد يدفع بيها حيل علية وصراخهن يتعالة
مااشوف شي من عمة امريكا وكشمش الي نايمات فوكي
بس اسمع صراخة وصوت لولد يحجون ويا
الكلمة لوحيدة الي فرزنتها
ولكم هدوني ليوم اشرب من دمهااااااا
بنتي مشغلتها وية لموزيناااااااااات .........
بلقيس....
كلت الو سلم وسكت
قطعت لصمت وكلت
ها تغير لوقت
لاء موهيج بس
شنو
ام نصير اني احبج واريدج
جفلت مصدومة بلي سمعتة
لأن ولامرة بين الي انوعندة رغبة بية ولامرة حسيت بتعاملة وياي انو اكو مشاعر تجاهي
مااعرف شوكت سديت التلفون بوجهة
بقة بيدي توقعت رح يرجع يدك
صاحت علية امي تريدة
اخذتة نطيتة الها ورجعت لمكاني فكري يجيب ويودي
قررت من يوم ثاني حتة نصير ابطلة من يمة
يوم ثاني جان عندة تدريب ورا اذان المغرب كلت مااخلي يروح من سمع كام يبجي ضربلة ركن زعلان
امي سألت كلتلها ديتعب ويتأذة
شوية ودك تلفونها
جاوبت كمت للمطبخ اسوي جاي
اسمعها تحجي وية خالي
ايوب جيرانا
صدك والله
يالعد ليش شبي وشعايزة ماشاء الله علي كامل ولكمال لله
بس كول هوة يقبل بيها وهي مابيها بزر
وكفت عد اخر كلمة
نصيت لنار علقوري ورحت يمها
ماما هاي شدتحجين شكو
تأشرلي وهية تحجي وية خالو بيدها تكلي صبري
عيني عليها ملامحها وردود افعالها بين تفرح وتتفاجأ
اي صحيح والله عاشت ايدك
اي اي صدك هاي سوالف نسوان مومال انت تفتح هيج موضوع وياهم
لا لا خليها علية معليك بلكة الله واهل لبيت ولنها صايرة لقسمة
ماتحملت تقربت الها
اخذته من ايدها سديتة
شكو شصاير هاي شدتحجين يوم
ماصاير غير كل خير
ايوب داز ابو منطي خبر لخالج احمد يريد يدز اهلة يتقدم الج
اي وخالو شكايللة
كايللة دزو لوالدة خل تحجي وية ام بلقيس
وكالي شرحيلها على وضع بلقيس و فهميها شايلة رحمها
واني خراعة خضرة هنا قرر خالو ونطة موافقة مبدأية بدون ميرجعلي لا وانتي مأيدتة
هسة ترجعين تتصلين بي وتبلغي اني مموافقة وخل يسدها من يمة
وليش اتصل وليش نسدها ونحط خالج بموقف محرج هية هسة لمرة بس تجي وتسمع شايلة رحمج لوحدهم يبطلون
خليها تطلع منهم
وشنو الة داعي لكل هذا
ضروري انفضح وكلها تدري بية اختلف عن النسوان ؟؟
ماكافي يسموني بلمنطقة ام المنغولي
اي خلي كلها تعرف حتة الي يريد يتقدم يعرف لكدام وضعج خاص
ومنو كلج اريد احد يتقدملي
دكااافي يابلقيس كافي شطلعت هاي سالفة تنسد بس تجي لمرة لتكبريها
همة لوحدهم يبطلون وخلص
حتة ليكول بينة عيب ولهلسببب مانطوني وتخرب مصلحة ابنج يمة
عوفي ابني على صفحة اني اصلا بعد مااخلي يروح يمة
بكيفج شتسوين سوي وين اكدرلج اني لبراسج براسج احجي مااحجي
من بدت تحجي بهلمنطوق عفتها ورحت للغرفة
شوية ودك تلفوني
رقم غريب
الو منو
اني ايوب
منين جبت رقمي
حصلتة بعد
تفضل شتريد
ام نصير اني دزيت اهلي حتة لاتفهميني غلط
اني من سديتي لتلفون بوجهي للصبح مانمت
وبصراحة خجلان من نفسي لأن اجيتج من هلباب
جان المفروض من لأول ادز اهلي
بس يلله مافات لأوان
شوف ايوب قبل مااحجي بأي شي
وقبل ماانطيك القبول او الرفض
اريد اكلك شغلة
اني مااكدر اخلف يعني ماافيدك
صوتة تمتم
يامحاسن الصدف
ياصدف
شوفي ام نصير اني متزوج قبل ومطلك ٣ مرات
والسبب ماكو خلفة
جانت نسبتي ٢ بس بآخر تحليل الي
نسبتي صفر
ولهلسبب لنسوان تشرد مني
حقهن ومحد يلومهن المال والبنون زينة الحياة الدنيا
اني بصراحة من اول يوم شفتج بي نعجبت بيج
ويوم عن يوم يزيد اعجابي
الى ان حسيت نفسي رايدج من كل كلبي
كمت اشوفج حتة بأحلامي
مااجذب عليج تصورت تبادليني ولو ذرة بس خابت امالي،
كلت اعترفلج وشيصير خل يصير
وبصراحة جنت متشجع لإن عندج طفل كلت تكتفي بي ومتريد خلفة بعد
سكتت مااعرف شجاوبة
طول ماهوة يحجي صورة قيصر تجي ببالي
ماطلع من كلبي لليوم ولاتمنيت شي بهلدنية بكد ماتمنيتة
بس الله وحدة الي عالم ومطلع على احوالي وهوة يدري من يوم تزوجت زياد شلتة من بالي وحاولت اتناسا
بس بقة قيصر غصة من ينجاب اسمة تترس صدري
وتتوسد ضلوعي ووية كل نفس احس تصعد وتنزل بين ريتي وصدري
بس لشغلات الي صارت اخر شي قطعت كل امل برجوعنا
وصار قيصر وقربة ذنب
وزلة الكل منتظرها علية
حتة خالو احسة يراقبنا يتصور يجيني للبيت أو التقي بي ومن اجت بسعاد اجة يركض يريد يتأكد جاي وياهم لو لاء
وكل فترة يتعمد يسألني عنة
بقة قيصر اي خطوة ممكن اخطيها تجاهة تفتح علية ابواب جهنم ولكل يتهمني بأن فعلا جنت اخون زياد ويا
ويثبت حجية واتهامة الية
نزيت على صوتة من صاح اكثر من مرة
الو ام نصير تسمعيني
الوووو
سديتة وراسي للسمة ودموعي تجري
دكيت رقمة واتصلت
بلا شعور جنت اتصرف
صوتة رد مخبوص وهوسة يمة
الو منو
اني بلقيس قيصر
بلقييييس ؟!
اي
شوية نص ساعة واني اخابرج
سديتة وبقت عيني علساعة انتظرة
مرت لنص ساعة وعدة ساعتين واني انتظرة
عبرت ال١١ وهوة مااتصل
لحد مانمت جانت عيني علمبايل وانتظرة
فزيت على صوت امي تحجي وتسولف وتضحك
كمت على حيلي جانت ساعة فوك ال١٠
تمشيت من يم الأستقبال عرفتها امة يمها
شوية وطلعت
اجت امي فرحانة تكلي ولج نطيني لحلوان
شكو
وافقت لمرة وافققققت تكلي ابني لبارحة صارحني وكلي ام نصير شايلة رحمها وفرحان يكلي اكيد تقبل بية لأن مثل وضعي ومتوالمين
بقيت صافنة محتارة شنو اجاوبها
عدن يومين وقيصر مارجع اتصل
دكيت علي مرتين ميجاوب وعدة اسبوع انتظر اتصالة وماكو
الى ان اجة خالو وكال
اني رجعت خبر للجماعة كلتلهم موافقين
وكفت على حيلي برعب صرت انتر بدون شعور
ليش خالو شلون هيج تسوي بدون مترجعلي
ارجعلج على شنو
ولد كامل مكمل وضعة مثل وضعج وراضي بيج
تتصورين احد يرضى بيج انتي
ترة مثل ايوب ميجيج
تحلمين يخطبج رجال خالي مختلي
ميخطبج غير الي مطلك والأرمل وبركبتة كومة جهال
وتعاي ربي وحيري بيهم
بطر مااريد ولد شاريج ورايدج
ومشاء الله مشتملة وحدة وضعة المادي فوق الممتاز وسمعتة تخبل
شتردين بعد
تزوجي وفضينة عاد قريبة على امج عينج عليها
كافي خل تنسد سالفة زياد وبهلخطوة تركعي بنعال على حلكَة
ماعندي رد
شحجي شبرر شكووول
البية لاينججي ولاينكال
دخلت للغرفة سديت لباب وبقيت ابجي
اي اريدة
ماطلع من نفسي لليوم
ولاشتهيت قرب رجال بكد ماشتهيت قربة
ماانسا شكد تانيتة يجي يخطبني
ولا انسة كسرتي من مااجة ومن اتصل جدة يبلغني بأن هوة سافر
نعاد هليوم علية بمرار اكبر
اتصلت ببسعاد بليل
تلفون خاص بيها ماعدها نحجي وياها من تلفون صميدع
جانت ساعة فوك ال١١
جاوبتني خايفة عبالها بينة شي
سلمت عليها وسألتها علي
خية شحجيلج وضع لبيت كلة مخربط
قيصر وغضنفر صار يومين ماشايفيهم ولاواصلين للبيت ونعيمة لكوها وطلعت منة ميتة ولبيت محبوص من يومها
اذا اجة كليلة خل يتصل بية
ماشي
خوما بيج شي
لاء بس كليلة يتصل ضروري .....يتبع
عذروني تأخرت عليكم والله خطاري بل١٠ وثلث طلعو وضغطت على نفسي وكتبت الكم
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!