رواية خنجر الغضنفر الفصل الخامس والستون 65 - بقلم Hunen23Hatum

#خنجر_الغضنفر

#الجزء_الثاني_بارت٦٥

#حنين_حاتم

بلقيس: ولله ياانعام اخاف احجي وافتح على روحي باب خصوصا همة مامقتنعين بقيصر وصارت غصب عنهم عمي ابو زياد وافق وهمة نحطو امام لأمر لواقع
وإلا همة لو عليهم ابد ميوافقون على قيصر وجانو رايدي لهذا جواريني وكاتلين روحهم علي همة وامي شاري 
وضالة مثل بلاع الموس لا اكدر اسكت لأن لعب نفسي وسواها بلا ملح ولا اكدر احجي اخاف افتح على روحي باب
بقت تشكي من عندة وتسولف علي شلون مزهكها
تغدينا وراها المرة نفسها طيب بلأكل قسورة تخبل على طبخها ورا لغدا ترخصت راحت تنام قسورة سحبت المبايل من عندة وبقو هوة ونصير يلعبون بلحديقة مصارعة
ماشاء الله نصير رغم زغير بس يتفوق على قسورة
اخذتني ورحنا بغرفتها كعدنة نسولف
بلكاع خلينة مخاد وتمددنا وضلينة نسولف بدتها سوالف من زواجهة من ابن عمها والضيم الي عايشتة ويا ومصايب عمتها بيها وزواجة عليها وختمتها بخذلان قيصر الها
شكد اكول حياتي صعبة وشكد اكول الله اختبرني هواي
بس من سمعت مصيبتها احس هونت علية مصائبي
احس ارواحنا المتعوبة تتشابه وتتآلف
ترتاح من تحجيلي وارتاح من احجيلها
صوتها يهمس بضحكة
التم التعوس على خايب الرجا شنو هلحظوظ هاي
سبحان الله هواي نتشابه
انتي حبيتي غضنفر غصبا عنج وجمعتج بي ظروف غريبة وصعبة واني هم حبيت قيصر  بطريقة مشابهة الها
انتي نجبرتي على محمد وضاعت سنين من عمرج من ورا
واني نجبرت على زياد وضاع شبابي وندفنت ويا
انتي ماتت بنيتج وصفيتي بطرك قسورة
واني مات طفلي وخسرت رحمي وصفيت بطركَ نصير
وتالي الي حبيناهم ثنينهم عافونة وبنفس الظرف

صفنت على كلامها فعلا اكو قواسم مشتركة بيناتنا هواي اول مرة انتبه الها موبس بلحياة الي عشناها والظروف الي واجهتنا حتة بشخصياتنا اكو تشابه
سألتها واني اضحك

انتي يابرج بلقيس

جدي وانتي

اسد

نززنا صوت نصير من دخل يحجي بطريقة مامفهومة ويأشر على قسورة الي واكف ورا ميت من الضحك

كمت على حيلي واني اخازر بقسورة واسألة شمسوي للطفل

بضحك رد علية كلشي مامسوي والله

بقة يحجي تعب وهوة يشرح مافهمت علي بس امة حسيتها فهمت من سألتها شكو
كالت ماكو شي فد واحد فارغ يتدلع
عاينت للساعة جانت فوك الخمسة طفرت واني ادور على حجابي
بقت تلح ابقو على لعشة جلبت يينا هي وامها
تعذرت لأمتحانات قسورة الي قربت وهوة كلشي ماكو
من رجعنة للبيت لكيتها دازتلي رسالة على لواتساب كاتبة بيها نعومة قسورة متحارش ببنية فايتة بلدربونة ونصير اجة يشكي ماقابل علي بس اني ماكتلج ماردتة ينحرج كدامنة بس الله عليج لتضربي ابنج بمرحلة مواهقة وهي هاي سوالف المراهقين كعدي احجي ويا ووعي
الله يساعدج ويقويج وتكبري وتربي احسن تربية

بحسرة وخنكة والدموع يجرن ردين عليها بصمة ماجنت اكدر اكتب

ااااخ يابلقيس شحجي تمنيت بهاي المرحلة مايربة بدون رجال
تمنيت احد على راسة ابو عمة منصور
تالي كلها عافتنا هانت ان شاء الله ونطلع ونخلص

بقت تهدأ بية وتهون علية وتكلي صادقي خلي يسولفلج واخذي كلشي من باب لمزاح حتلو لشي غلط خلي يكتلج الموضوع وبعدين حاولي توجهي بصورة غير مباشرة لتقسين ويا ولتخلي يبتعد عنج ابنج مايعرف غيرج لتخلي يلجأ للشارع وولد لشارع ويضيع منج
مسؤليتج جبيرة الله يعينج ويعيني ونكبرهم ويشيلون راسنة ويجازونة
بقينة نحجي واخذت رأيها بلموضوع كالتلي سولفي ويا من باب لمزاح كليلة يكولون شايفلك وحدة حلوة دليني عليها خل اخطبها الك ومن هلباب حتة ينكسر حاجز المستحة لبينكم ويكوم ميضم عليج شي
قررت اعمل بنصيحتها  واتفقنا نطلع ثاني يوم للمتنزه
طلعنا ومناك رحنة للسوك اخذتلة ملابس طلعة وبيت
لشغلات الي جان يجيبهن ابو كلهن بعدهن جدد بس اني ردت افرحة
رجعنة للبيت وبدة يدرس امتحاناتة مابقالها شي
اني وبلقيس نتواصل دوم تعلقنا ببعض وقوت علاقتنا حيل
خصوصا بعد ماراحت انغام صرت احس بفراغ جبير ولبيت وحشة احسة يريد ياكلنا صرنا نطلع كل فترة احنا وياها وامها وابنها
قسورة مومثل اول ماسافرو جان ضايع ومعنفص وطول لوقت معصب وكلشي ميعجبة ويطلع حركتة بية يحسسني بلذنب
بس هلفترة احسة تغير هواي دائما مزاجة مستعدل ومرتاح وطبيعي حتة ميجيب طاريهم عكس اول ايام كل فكرة بيهم وعينة علتلفون
من بدت امتحانات قسورة بعد ماطلعنا ركزت ويا ردتة ينجح حتة نطلع بأسرع وقت خايفة على انغام وبالي يمها ماتعرف ولا ام لا اخت يمها
بدة يمتحن شد حيلة هولي جان متحمس للسفر ولهلسبب ركز بدراستة حيل
اسبوعين امتحاناتة طلعت روحي بيهن
الى ان خلص يلله جرينا نفس
ورا ١٥ يوم استلم نتيجتة جان مكمل بدرسين صدمني
لدرجة بجيت على كد التعب الي تعبتة ويا وتأجل سفرنا الى مابعد امتحاناتة الدور الثاني
جنت خايفة على انغام لدرجة قررت اخلي يترك لسنة وميمتحن اصلا
اتصلت بيهم وحجيتلهم على درجات قسورة و صارحتهم بهذا الشي

صوت منصور بضحك رد علية
لا يابا شنو لسالفة تضيعين من عندة سنة علمود انغام ترا نجذب عليج وانغام دايرة بالها على نفسها واصلا كاضية لنهار متمددة لاتتحرك ولاتشيل ثكل بس هية رادت تخوفج  حتة تجين لأن مامصدكة بيج عبالها تقشمريها ومالج نية تجين وكلما تتأخرين تكلي موكتلك متجي
من طمنوني عليها يلله جريت نفس
بهلفترا خليت لقسورة مدرسة رياضيات واني درستة انكليزي
واجت امتحاناتة صدفت وية بداية العالم الدراسي الجديد  متحن لمادتين وورة ايام استلم النتيجة ناجح
صح درجاتة خمسينات بس فرحت حيل بس ردتة يطلع من لثاني واخلص
جنت انطي عذر لأن ظروفنا جانت صعبة ومواد هواي فاتتة
رجعنة اني وبلقيس نطلع واروح يمها وتجي يمي كمعدل بلأسبوع اقل شي نطلع ٣ مرات ولو تجي يمي لو اروح يمها
الى ان كملت اوراق قسورة وفيزنا وعدينا العدة للسفر
بقت تبجي وتكلي جنت اسكت امي بيج
اكللها حتة غضنفر عاف مرتة وسافر مو بس قيصر عافني لأن ظرفهم صعبة ورايحين علمود علاج هسة شلون اسكتها وبيش اقنعها لو درت بيج سافرتي
ومن هلباب قررت تضم عليها وماحجت الها عن سفري
وبليلة سفرنا اجت يمنا باتت بقينا للصبح كاعدين ونسولف هية توصيني على روحي وقسورة واني اوصيها على روحها ونصير
صبحية وصلونا للمطار وهناك توادعنا وداع جان عبارة عن شكوى وبكاء
ركبنة لطيارة وبرحلة طويلة ومن محطة لمحطة وصلنة
من نزلنة بلمطار تذكرت اول مرة سافرت بيها
حضن امي وصراخها وبجيها الي تلكاني
هلمرة ماكو حضنها
بس منصور وانغام وثنين من اولاد خوالي ونسوانهم استقبلونا
بجيت لا ارادي من حضنت انغام الي بطنها دعبلة كدامها وسمنانة ومتغيرة هواي
فرحانة بيها وبشكلها شكد تمنيت هاي اللحظة وشكد دعيت الها الله يترس حضنها وترتاح بعد هلتعب والانتظار
وسبحانة ربي جازة صبرهم بخير جزاء
١٠ سنوات تكللن بطيوبة الي اجت للدنية بعد سبوعين من جيتنا الهم
اجتي بنهاية شهر السابع ولادة مبكرة
جانت ناعمة زغيرونة تخوف حجمها موقانوني  سمرة على ابوها ماتشبه انغام
طايرين فرح بيها كل احنة
منصور ماخلة شي ماسوا لكاروك والجرباية والألعاب والملابس محتار شينكل وشيجيب هوا وخالتي
بقينة وياهم شهرين بنفس البيت طيوبة تعبتنا حيل اول ايام رأتها تعبانة وناسور بشريان كلبها  وراها لزمها ابو صفار وياداخلين بيها مستشفى يامطلعيها لحد ماقبط عمرها شهرين يلله استقر وضعها وصارت زينة
خالتي جانت ساكنة وية ولد خالو لجبير بس من رادو منصور وانغام يجون اجرت شقة غرفتين وصالة ومطبخ وصحيات اني وقسورة ننام وياها جنة
الى ان طمأنيت على انغام ووطيبة يلله بدينة ندور على  شقة جارتهم الي فوكاهم بلغتنا برغبتها بلأنتقال من الحي بعد شهرين بقو يلحون كالو تانيها الى ان تشيل حرامات تسكنين بمكان بعيد علينا هية كلها شهرين
ماجنت رايدة بس انحرجت من ملحتهم
كاعدة اسفط بملابس قسورة بلخانة الي خصصتها النا خالتي من الكنتور واشعارات هواي من  تلفونة بدت تجي
كمت علي فتحتة لاعندة واتساب ولا فايبر بس فيس وماسنجر
دخلت على الماسنجر كلشي ماكو
بقة لتلفون بيدي
واني لازمتة اجة اشعار رسالة واتساب
رجعت اكلب بلتلفون ماكو اي واتساب تخبلت
نزلت لبردة اقرة بلرسالة
لرسالة من قيصر كاتبلة بيها ها عمو شلونك شلونها امك وشلون صارن خالتك وبتها من تفرغ خابر ابوك يريد يحجي وياك

يحجي ويا !!!
ويسالة عن خالتة وعن طيبة
احس عقلي فصل
طول هلفترة لاهية وية انغام مخففة الرقابة علي افتح مبايلة اكلب بي ماالكة شي اعوفة
اصعب شعور ممكن يعيشة انسان انو يحس نفسة مستغفلي ومنو
من ضناية
مستغفلني وضام علية
لزمت لتلفون واخذتة ونزلت لجارتنا جوا لبنية سورية محترفة مبايلات رغم زغيرة بس ماشاء الله داهية مرتين حساب منصور يروح وترجعة الة واي مشاكل تصير بمبايلاتهم يركضون الها
نطيتة الها وشرحتلها
بقت تكلب بلتلفون وراها فتحت تطبيق شكلة مثل لساعة وبدت تطلعلي من عندة تطبيقات ثانية خافيهن بي
من ضمنهن تطبيق لواتساب والفايبر
دخلت على لواتساب محادثات قيصر وابن كشمش وحمزة  وابو وزوج  وعمة امريكا وصميدع
كلهم دازيلة وكلهم يتواصلون ويا وماحاجيلي
دموعي تجري كوة جنت اقرة بلرسائل
دخلت على محادثة قيصر بقيت اصعد بيها ليفوك اريد اشوف تاريخ اول رسالة شوكت
اريد اعرف من زمان يتواصلون ويا وضام علية لو بلجديد
تاريخ اول رسالة جان صدمة عمري
بعد سفرهم بشهر واحد فقط
بعد سفرهم بشهر واحد متواصل ويا ومخابرة اكثر من مرة وحاجي ويا
بقيت انزل واقرة بلرسائل
يسولفلة على غضنفر يكلة ديتعالج وعندة عملية بعد شهرين
وراها اكو رسائل كايلة بيهن احنة بلهند هسة ودازلة صورة هوة وغضنفر
غضنفر على كرسي متحرك كاعد وشكلة يخوف كأنما شخص ثاني
صميدع واكف يمة هوة انعم من صميدع
نزلت دموعي
قربت لصورة لوجهي ولاارادي بست وجهة ودموعي تجري
بقيت اكلب بلمحادثات اكو بصمات
فتحتهن جانن عبارة عن صوت غضنفر بيهن مثل لطفل الي ستوا يتعلم النطق
وراهن رسائل كاتبلة بيهن هايبوية تفهم علية لو لاء
راد علي ببصمة صوتة بيها يبجي ويكلة شلون ماافهم عليك كلشي افهم متتصور شكد فرحان من سمعت صوتك تحجي
لو تدري شكد مشتاق لصوتك يابابا

وهوة راد علي واني هم مشتاقلك انت وامك بكد شلاع كلبي وتعبي
هانت يبعد ابوك مابقة شي ان شاء الله

جنت كاعدة بباب لشقة من سمعت خطوات علدرج وصوتة يدندن بساع ركضت طبيت جوا سكرنت لمحادثة مال قيصر ودزيتهن لمبايلي وحذفتهن من يمة وحذفت المحادثة ورجعتة للشحن

دخل سأل على مبايلة كتلة علشحن

بس اني عفتة بلغرفة شجابة للصالة

ماادري

فتحة بقة يكلب بي رفع راسة وهمس ورافع حاجبة وبهاي الحركة كأنما قيصر واكف كبالي
ماما فاتحة تلفوني ؟

لاء

باوع بي ورجع باوع علية واخذة وطلع

ماردت احجيلة حتة ارجع افتحة مرة ثانية واقرة باقي لكلام لأن ماقريت الة لقليل
واريد اعرف شنو لسبب الي خلا يضم علية
وين يريد يوصل هوة وياهم بهاي التصرفات
وردت اتعمق اكثر واعرف هوة ضام علية من ذاتة لو همة موصي

على كعدتي اكلب بلسكرينات ودموعي تنزل اقرة كلام غضنفر ويا اكو شكم صورة ماقاريتهن بس علسريع سكرنتهن قبل مايجي بعجلة
صافنة اقرة بيهن
وكفت عد جملة هزت كياني
قبلها جان قسورة كاتبلة بابا لشوكت اضم عليها
ترة كلبها يمك وعلى طول قلقانة عليكم وهية وعمة بلقيس يتخابرن وحدة تسأل لثانية عنكم
خلي اكللها وخل نجي يمك ويلتم شملنا اني مشتاقلك وهي هم مشتاقتلك

هوة راد علي وكايلة شيلتم شملنا بوية وانة لحاجتين يشيلوهن من جواي
شلون تريدها تشوفني بهاي الحالة وتعيش وياي خدامة انة اذا ماارجع غضنفر لأولي وتردلي صحتي مااريد اكسر بختها واعلعلها بية وبأمراضي
واهلي اعرفهم اذا اجت يمي بعد يشيلون ايدهم مني بأعتبار زوجتي اولى الناس بخدمتي وانة يابعد ابوك ماردتها خدامة
وحك غلاتك وغلاتها مايهون علية ابد
ولا اتحمل تشوفني وانة بهذا الحال
هي بقت عملية وحدة اذا نجحت انة اجيكم بنفسي والمكم يمي واذا مانجحت انة مااريد اعلعكم بية
انت بعدك زغير موحمل مسؤليتي وامك تعبانة وماشافت وياي غير التعب ماريد اتعبها اكثر من هيج

باقي الرسائل جان يتوسلة ويكلة امي ماتتعاجز من خدمتك وهي تحبك واني صرت جبير واكدر اتحمل مسؤليتك
هوة يجاري مايكسر بخاطرة وبنهاية كل محادثة يوصي يحذف الكلام

على كعدتي ودكت بلقيس صار فترة طويلة ماحاجية وياها تراسلني على كد لسلام ماالحك من ورا طيوبة ملتهية وياها انغام حتة شيل متعرف تشيلها اني اكمط واسبح واشيل وانضف

صوتها كرب كلبي من همست
شلونج نعومة

شبي صوتج

سلامتج بس مريضة شوية

شبيج خيرج

كلياتي اسم الله عليج التهابات وحصو وحيل متعباتني والله صار اسبوع نايمة بلفراش وامي محتارة بية وبنصوري

سودة علية شجاج

هنة من زمان هيج بس اني هاملتهن وهسة زادن علية
انتو شلونكم شلون صارت طيوبة

لحمد لله تبوس ايدج

الله يحفظها بشريني ماكو اخبار عن جماعتنا

سدي وراح ادزلج كتابة مااكدر احجي

سديتة ودزيت الها سكرينات الي عندي
بقت متفاجأة حالها من حالي وتحجي على قيصر لأن مايتواصل وياها وترجع تلوم اختها وتكلي حرام تتسمة اختي لابيها محنة ولاعدها كلب علينا
امي تفرفح عليها وهي بلجذب متكلف روحها اتصال

لاتلوميها هي لمسكينة منيلها مبايل ماعدهن كلهن اني عشت وياهم شهر وشفت لايحطون بيدهن تلفون ولاينطوهن تلفوناتهم

سكتي انعام لاتبرريلها يعني ماتكدر تاخذ تلفون رجلها

ماطول غضنفر مايريدني اعرف اخبارهم ولااتواصل وياهم معناها هوة مانعهن

يعني ماتكدر بلبسكوت تتواصل ويانا انعام هي المحنة موكوة واختي مابيها محنة علينا نخرطت وياهم وصارولها اهل احنة نموت نعيش آخر همها اصلا

الله اعلم شنو ظروفهم

اني بعد مااعذر انعام
مااعذر اي بشر
كافي اعذر اعذر جبت عمري كلة ادورلهم اعذار
تعبت والله تعببببببت

بقيت اهون عليها وغيرت الموضوع
بساع نزلن دموعها وبساع ختمت لأتصال وهي مختنكة وتتلوة من لألم

عدت مدة اني اتواصل وية بلقيس وصحتها بلنازل المسكينة تراجع وماملحكة بلتالي نزلن الحصوات بلمحالب واستقرن بلمثانة
وراها شالت المرية الي فوكَانا وانتقلنا بمكانها
اخذنا اغراض مستعملة نضيفة ورتبنا وضعنا لشقة نفس شقتهم صالة وغرفتين نوم ومطبخ وصحيات
بعد اكثرمن ٣ ايام يلله استقرينا تماما رغم اغراضنا قليلة وماعدنا شي
عدة ايام اني اكضي نص نهاري يمهم مااكدر على فراك طيوبة
منصور رجع يشتغل سايق حمل من مقاطعة المقاطعة ومن ولاية لولاية شغلة متعب وصعب ويغيب عن لبيت هواي بس واردة جيد جدا وهذا هوة الي مصبرهم علي
بغرفتي متمددة ساعة ب٨ لصبح اتعاجز اكوم
اسمع صوت صراخ انغام
ركضت للباب كل الي ببالي طيبة
كوة وصلت وكوة فتحت لباب ونزلت لدرج
دكيت لباب برعب فتحتها الي تصرخ وشايلة طيبة بيدها
اخذت طيوبة الي مخلوسة منها ونترت بيها
ولج شكو شصاااير

خالتي خالتي مابيها نفسسس

ذبيت طيبة بلكاع وركضت للغرفة
على جربايتها نايمة بس عاينت بوجهها عرفتها ميتة ولضاهر من الليل ميتة لأن وجهة مزرك وشفتها بيضة
ركضت خابرت علأسعاف
انغام جانت منهارة كاعدة يمها وتصرخ ولج خالة كومي شكول لمنصور لو رجع سأل عنج
طيبة تبجي عليج كومي خالة فدوة لعينج

لزمت لتلفون اتصلت بخوالي بعد عنة شكم حي
من اجو جانت لأسعاف جاية واستوهم ديشيلوها خالي لوسطاني تعبان حيل موات اصلا
ولزغير هم رجال جبير بلعمر
ولدهم ركضو بيها واحنة بلبيت ضلينة ندك وننوح
اتصلو بمنصور كلولة واحد يذب لمهمة على لثاني تالي ابن خالو لجبير اتصل بي وحجالة
بقينة نتاني جيتة حتة ندفنها لليل يلله وصل
جان منهار خطية
وطلعت تابوتها من شقتهاا
ماجذبت اببد من رادتة يمها و كالتلة اريد اشوفك واشبع منك احس ايامي قريبة
احمد الله انو انغام اقتنعت وراحو يمها
وإلا لو ميتة خالتي وهمة بلعراق ماجان سامحها منصور للموت
وسبحان الله جيتهم يمها بيها كل الخير رأسا حبلت انغام كأنما بركات دعائها جان تأثيرها اقوة
راحت خالتي ودفناها وسوينالها فاتحة
فاتحة جنت اتخيلها فاتحة امي الي ماحضرتها ولاوكفت على قبرها
بجيت بدفنتها واني اكللها خالة كلي لأمي تسامحني وتبريني الذمة
كليلها كل الي كالتة الي صار
كليلها ندمانة لأن ماسمعت كلامها وكليلها تدير بالها على منة
ايام عدت تعبنة بيهن هواي
وخصوصا منصور ورا اربعينها يلله رجع لشغلة ومارس حياتة
بقة مهموم عليها ومخنوك يكول ماشبعنا منها ولاشبعت من طيبة
جنت اهون علي واكلة اقلها شافتها وشالتها ولعبت وياها
امي لمسكينة ماتت لاشافتني ولاشافت بزري
ولا شافت بزر انغام
فترة عصيبة عدت بطلاع الروح وخلة مكان خالتي وضلت انغام تنام وحدها من يروح منصور
مرات انزل يمها بس قسورة مايرضة يجي يبات وياي يكلي ماارتاح الة بفراشي كامت هي تجي تبات يمنا وتضل كل فترة تجيب كاروك طيبة وترجع ترجعة للشقة من يجي منصور

طول هاي الفترة افتح مبايل قسورة اقرة محادثاتهم وحجيهم ويا
الى ان حان موعد عملية غضنفر الي وعدة بيها  بداية شهر٣ من سنة ٢٠١٥ واني اقرة كلامهم كل فترة بدون مايدري بية
بيوم لعملية مانمت للصبح متوترة ولازمة كلبي
حسب الي قريتة هاي العملية راح تخلي يرجع يمشي على رجلي ثنينهن بدون حتة عكاز
بس بعد العملية يحتاج علاج طبيعي بلقليل ٤ اشهر حسب حالتة
من خلال لبصمات الي جنت اسمعهم جان يشكيلة من ضعف ايدة ليمين ميكدر يلزم بيها كلشي ترجف ويوكع لشي منها
وفكة الي من جهة اليمين اعصابة شبه تالفة بحيث كوة ينفهم وكوة يكدر يحجي
بصمة عن بصمة جنت الاحظ تغير بكلامة وطريقة نطقة فرحة تغمر قلبي لااراداي

صارت لساعة ب٨ واني كاعدة العملية من زمان يأجلوها الة لأن كلبة تعبان
كعد قسورة جان باين علي لأرتباك والترقب
بقة لازم تلفونة يدخل جوا ويرجع يطلع
كلسا يدكون علي احس علي رغم خالة صامت
ياخذة ويدخل جوا يحجي وياهم ويطلع ميريد يحسسني عود
طيوبة بحجلتها كاعدة كبالي تبتعد وترجع تجيني تضحك وتصفك ماخذة روحي بحركاتها وسوالفها
تصيحلي مما وامها تصيحها كَوكَا متنطق غير ذني الكلمتين وتسمي المي بوبو شي ميشبه شي
قسورة ستوا يلله طول وستوة يلله بينت عندة شوارب وصوتة خشن وبنيتة اخذت هيئة رجولية
عكس منة ازغر من عندة  وطكَت
اما هوة بعمر ل١٥ يلله بدة جسمة يبين
كاعد كبالي ساعة فوك ال١٢ دك تلفونة اخذة وطلع برا متوتر وهوة بلمطبخ جاوب بصوت عالي شوية كال
شنو عمو صدك تحجي
عليك الله
خاف ناصب علية عمو بداعتي احجي لصدك ترا اليل كلة مانايم

دموعي تنزل لوحدها واني اشوفة ينتر وجسمة يرجف من لعصبية ولانفعال
رجلية لوحدها ترجف
مااعرف شوكت وصلت يمة ولزمت كتفة
بصوت حاشر بي الألم والغصة الي تجرعتها لمجرد سمعت هلكلمات منة
همست يممة قسورة احجي ابوك شبي عمليتة نجحت
مات عاش حاجيني قسورا

صفن بوجهي وكع التلفون من ايدة ........

بلقيس من سافرت انغام ماحجيت لأمي على سفرها لان ادري تاكل كلبي
عدت مدة تسألني عليها كل يوم اكللها حجة الى ان كالتلي خل نروح يمها ضايجين
وبدت تلح بلموضوع احسها شكت بعد ماكدرت اضم عنها
كلتلها سافرت يم اختها تداريها لأن جايبة
ماقتنعت وتكلي يجذبون عليج اكيد رجلها سحبها يمة ومايكلولج لأن مايريدج لأفندي قيصر
حقة شلة بيج بعد اذا شبعتي ليكدام وطلعتيها من نفسة
شحجي ماتقنع عدها وجهة نظرها شي تستقتل علي حتلو غلط
بقت كل مدة تعيد هذا الموال وتاخذلها اسبوع تدك وتنوح

كلياتي يوم عن يوم يزيد المهن وهاملتهن
بدة الدوام وكل يوم اني متخربطة وماخذة اجازة الى ان ب مرة جان دوامنا ضهري وتخربطت بلصف
صديقاتي اخذوني للطبيب كالي عندج حصوتين وحجمهن جبير وصلايب جراحة نطاني ادوية وبديت استمر عليهن ولوجع كلشي ميفيد ويا
كل فترة اروح متحركات من مكانهن الى ان نزلن بلحالب ودراري عبارة عن دم والألم لايطاق وية النفس لااتحرك ولا اكدر اشيل روحي من لفراش
امي هلفترة كفت عني وماتجيب طارية بس اسمعها من تحجي وية خالي لومرتة تكللهم عايفها هنا شحالها بلجذب مايسأل عنها واخو الي كاتل روحة علي وعايفها علمود علاجة سحب مرتة وابنة يمة وعلى حسب لأصول
اكلها تكلي لاء راحت يم اختها عبالها اني غشيمة مثلها

اخلي لمخدة على اذاني مااريد اسمع صوتها
تعبت واني ادورلة اعذار
تواصلت وية انعام وفاجأتني بسكرينات بيها محادثات بين قسورة وغضنفر وحتة قيصر
طلبت رقمة من عدها نطتة الي حفظتة وكل يوم اريد اراسلة واكول لاء
هوة لا راسلني ولا سأل عني
عدت مدة تعبت حيل كلما اروح للدكتور يكلي هانت لدوا جاي يجيب مفعول وجاي ينزلن وان شاء الله يوكعن وتخلصين من عدهن
الي صار بهاي الفترة صار عندي احتباس بلدرار
مااتدرر ابد
عدن يومين ولثالث وراها كال لدكتور تحتاجين عملية
تواصلت وية انعام وحجيتلها بقت مهمومة علية ومقهورة
وراها راسلتني نطتني عنوان دكتور بأربيل وكالتلي حجزتلج يمة اخذي اوراقج وراح ادزلج فلوس روحي طيران هذا دكتور كلش زين
بقيت الوم بيها وكلتلها هذا دكتوري هم زين واني متفقة ويا وحاجزة
كالت الغي الحجز وروحي لهذا لدكتور اني راح اظبطلج كلشي ودزيتلج فلوس طيرانج انتي ووالدتج وابنج وفلوس علاج وكلشي تحتاجي
بقيت اتشكر منها وخجلانة حيل
ورة ايام حان موعد سفري امي ماقابلة وتلوم بية تكلي شنو معناها رايحة لأربيل لميت لسالفة وكلتلها لدكتور كال عمليتج صعبة ومااتحمل مسؤليتها وحولني على هذا الطبيب
سافرنا ويوم ثاني جان عندي موعد وية الدكتور 
انعام حتة فندق حاجزة النة ونطتني عنوانة واسمة
بتنا ويوم ثاني رحنة للدكتور سوالي فحوصات وورا ماطلعن كال ماعندج شي وحددلي موعد عملليتي
قبل لعملية بساعات رحنة للمستشفى اني وامي ونصير ننتظر
وراها دخلوني للغرفة الي نبدل بيها
لبست الزي الأزرق وطلعت من الغرفة متوجها لصالة العمليات ووبيدي اوراقي وامي وراي
راحت هي استقرت يم نصير بوستهم وتمشيت متوجها للصالة ودموعي تجري
تمشيت واني اتشاهد على روحي واسأل ربي
ليش هيج حياتي كضيتها خذلان وحرمان وامراض وعمليات
شوكت ارتاح وشوكت اعيش مابقالي من عمري
قريب باب الصالة خطوات وديصيحون على اسمي
اسمع صوت احد وراي صاح اسمي
اللغة عربية
والصوت مألوف
نداريت ليورا من مصدر الصوت .......يتبع
مساء الخير ياعوووومري خو وفيت بوعدي وماقصرت وياكم رغم ايدي شكلت والله من ل٥ لحد هسة اكتب بس كلت افرحكم لان مقصرة وياكم  شوفوني تفاعل يفرح 🥰