رواية خنجر الغضنفر الفصل الرابع والستون 64 - بقلم Hunen23Hatum

قيصر :-

فجرية لمستشفى هدوء الخفر اغلبهم نايمين
جنت متمدد بلسرير مقابيل سرير غضنفر بيناتهن مسافة قليلة
غافي بس مامرتاح كلسا اتفزز
وهم من يوم دخلت ويا نومي صار كلش خفيف اخاف يفز يريد شي واني نايم
حسيت صوت حركة قريب
نكلبت اعاين غضنفر نايم بقيت مركز بي اريد اعرف مصدر لحركة منين
من جوا لسرير مالتة جانن اكو رجلين
فركت عيوني عبالي يتراوالي
ركزت زين فعلا جانن رجلين وحذاء رجالي
بقيت بمكاني جامد ماتحركت ماردت احسسة انو اني كاعد
بقة دقايق على كعدتة من تأكد مني بعد ماتحركت
على كيفة صار يتسحب وكام
وكف على طولة سحب المخدة من جوا راس غضنفر خلاها على راسة  وبيدة سلاح خلاها على لمخدة
سلاحي بيدي من مكاني رميت علي مااجت بي اجت بلحايط
طفر على حيلة يتلفت عبالة لطلقة من برا
صوت هرجة صار برا وركض وصياح
بساع للشباك ركض يريد يطفر من عندة وينهزم على ايدة رميت  بينما نفضت لفراش عني وطفرتلة جان شامر روحة من الشباك تقربت يم غضنفر اتفحصة
وخرت لمخدة عنة واسأل بي
خوما بيك شي

دخلو علينة امن ودكاترة ومضمدين وناس مرافقين وية المرضى كلها تسأل شكو وانخبصو
تخبلت كمت اصيح عليهم
وين لأمن هذا منين دخل النة
ثواني لومتأخر جان مات اخوي
شوية واجة مسؤل الردهة يتعذر وينتر عالأمن ويهددبيهم بلعقوبة
حولو على القسم الفوك وعلى باب الغرفةخلو عنصر امن
شوية واتصل بية العقيد بقة يحجي ويكلي موكلتلك طلعة شمتاني من كتلة لدكتور رافض كال اني باجر اجي واحجي ويا
ضليت بيومها كاعد وحتة هوا بعد مانام
كلسا ياخذ المبايل من ايدي يكتبلي خايف على لنسوان ولجهال
خايف على انعام تنضر مرة ثانية من وراي
هلمرة لو نضرو بمقدار شعرة ماراح اسامح نفسي
بقيت اهدأ بي واحاول امتص غضبة
اجة لدكتور الي يجي يومية لصبح يشوف وضعة
قاس ضغطة جان مرتفع
ضربو ابرة وبقة يراقب بي كلسا يجي يشوف ضغطة
وراها رجع ضربة ابرة خلاني بقلق

شوية وصاحني بباب لغرفة
كال اني رح اكتبلكم خروج وتحويل بس على مسؤليتك لأن وضعة مو مال سفر
لا ضغطة مستقر ولا كلبة تمام بس ماطول بقائة خطر طلعتة اهون رغم بيها مجازفة بس اذا تحبون اخذو وياكم مضمد وتكفلو بسفرة وتذكرتة ذهاب واياب فقط حتة يكون ويا بلطيارة ومجرد متوصلون حجزولة اياب ويرجع
اذا تحب اني ارتبها الك واشوفلك واحد من لولد

بفرحة رديت علي
ماشي دكتور رتبلنة الموضوع من يمك وانة راح اشتغل على اوراقنة بهليومين
اتصلت بلدببة الطيبون كلتلهم اريد فلوس ولبيوت الكم ابقي لمفاتيح يمكم اجروهن واخذو فلوسكم 
جدهم لرجال ماقصر دز فلوس واسلحة وذهب نسوانهم يكلي بيعهن وسد عازتك
رجعت لذهب ولاسلحة لفلوس الي دزهن يكفن طلعتنا واجار بيت ومصرف شهر واحد لا اكثر
اتصلت على صميدع وعمي رحيل اجوني للمستشفى فهمتهم وطلبت منهم يجهزون اوراق لكل ويفيزون
يوم ثاني كملو كلشي ويوم لثلاثاء طيارتنا لصبح ساعة بل١٠ فيزنا عمان وحضرو كلشي
طالب محصللهم شراي للأثاث بيعة وحدة اخذهن بسعر زهيد
بلغرفة كاعد ودخلو علية ثنين
بعد لسلام فهمت لعقيد زارعهم بلمستشفى يحمي غضنفر
بقو يحجون ويتفقون وياي على طريقة يطلعون بيها غضنفر من المستشفى بسرية وبدون مااحد يعرف
ومن خلال حجيهم فهمت اكو ٤ بباب المستشفى واكفين منتظرين نطلع ويستغلون لوضع ويلحكونة وبأقرب فرصة ينهون حياتة وحياتي
اتفقنا على انو همة يحالولون يلهوهم واحنة نطلع من باب يودي على سكن الدكاترة
عمارات ٣ ورا المستشفى اكو باب داخلي يأدي الهن
وبلحديقة الي وراهن اكو باب يطلع علشارع بس محد يستخدمة غير مجتمع السكن
طلعو من يمي راحو للمدير اتفقو ويا ورجعو بلغوني بتمام كلشي وراح يطلعون ويانا ٣ عناصر امن وبرا سيارتين رح يدزهن لعقيد ينتظرنة
وللبيت يدز سيارة كية تنقل اهلي قبلنا بنص ساعة
من نوصل رح نلكاهم متواجدين

لهناك اتصلت ببلقيس جنت منهار مخنوك تعبان
من شباك الغرفة من فوك جنت اشوفهم واكفين جوا
للصبح يتناوبون بلحديقة ناس تنام وناس تناطر وكلسا سيارة جاية عليهم يجييولهم امدادات وتلفوناتهم ليلتها ماسكتت كأنما حاسين
سلاحي بجيبي بس ماجنت مطمأن
كلسا افتح لباب اشوف لأمن الي موكفيهم على لغرفة ماقصرو خطية واحد ينام واحد يحرس

دكيت عليها  ماعرف شنو حجيت وياها
كل الي اتذكرة نزلت دموعي واني احجي وراها ماسيطرت على نفسي
صوتها المبحوح وهي تعاتبني خفت انطيها امل وانة ادري الموت يبعد عنة طابق واحد
جنت حرفيا يااائس
ريحة الموت بخشمي واحساس بداخلي يكلي ماراح  نكدر نطلع هلمرة
سديتة منها وصوت معاتبها يعذب بية
وصوت ضميري يصرخ وين اروح من حوبة بختج يابلقيس

ماطلع الفجر غير وروحي طالعة
فجرية كعدتة حتة نتحضر
جان كاعد ادري بي بس يتضاهر النوم
اجة مضمد ساعدني لبسنا ولملمت غراضنة وجهزت كلشي
تانيت لولد اتصلو بية كالو متانيك يم باب السكن الداخلي نزلنة ويانا الامن الي جانو يحرسون على لباب
بلمصعد نزلنا بلحديقة نمشي لدنية ضلمة بعدها جنة نمشي ونتلفت وصلنة للسكن الي يصير بعيد مسافة عن بناية المستشفى
تلكوني الولد الي دازهم العقيد ولأمن رجعو دخلنة للسكن نتختل وصلنا لباب الي ورا يصيرن اكو ثنين واحد بعيد خاص بلسيارات ولثاني زغير قريب
رحنة على لبعيد طلعنة جانن سيارات ثنين ينتظرنة بساع صعدنا وانطلقنا
من وصلنة غضنفر نزع محبسة ونطا للسايق ونطا رقم قسورة وطلب منة يوصلة الة ويكلة هذا من ابوك

دخلنة للمطار ندور عليهم
يم المطعم جانو كاعدين كلهم
كشمش وعمة امريكا واماني  يتباجن على انعام
تلكنة كلهن يبوسن بي ويتحمدلة لسللامة
وسللامة تبشرة بنجاح الخطة وطفشان انعام
من سولفتلي كشمش عليها وعلى كسرتها من شافت لصورة حيل انكسر خاطري عليها
وقبل مايحين موعد طيارتنا دزيت الها رسالة ابرر بيها واشرح الي ماكدر غضنفر يشرحة الها
وكشمش هم لزمت تلفون ابنها وخلتة يكتب الها رسالة جانت تعتذر بيها وتطلب لسموحة على اشتراكها بلجذب عليها
عمة امريكا بهاي اللحظات جانت تحجي وية تهاني تبجي وتوصي بيها على روحها وجهالها
ركبنا لطيارة ومجرد مااقلعت غضنفر تخربط وراح من عدنا
لولد لمضمد حتار شنو يسويلة نطا ابرة وبقة يسعف بي
ضغطة ارتفع لدرجة خشمة طك دم
وكلبة دكاتة صارت مامستقرة نفسة ثكل حييل
بلكوة جان يتنفس
مومجرد كم ساعة صارن سنة .........

انعام

وعيت بلمستشفى لجوارين ناقليني ملابسي كلها دم على كد مانازفة
المرة اتصلت بأنغام واجو علية هي ومنصور وقسورة
من شفتة كل تناقضات الكون اجتمعت بية
احضنة مدري اضربة
اصيح علي والوم على سوايتة مدري ابجي من الفرح
تقرب الي عيونة دامعة وهمس لحمد لله على سلامتج ماما اني اسف كلة من وراي

وين جنت ولك

صوت انغام ترد علية بحركة وخدودها مزلغة
لحيوان رايح يم الوكيل مال لوجبة ابنة صديقة بلمدرسة وكاعد يمة من لضهر لحد هسة
من صحنة بلجامع ام علي المرة سامعة واجت تكلي هستوني جبت لوجبة وشفتة يم الوكيل كاعد
وية ابنة

ماحجيت شي ويا جنت زعلانة علي
رجعنة للبيت سحبت المبايل من عندة عقاب الة نطا الي بكل طواعية عود ديبينلي انو هوة حاس بغلطة وندمان
عدن يومين احنة نمشي بتحويلة لبيت
لأن لنص لثاني بأسم منصور
دارة بأسمي حتة اكدر ابيعة والحكهم
خلال هلأيام اني مااحجي ويا قسورة
بليلة لخميس صالحتنا انغام حلفت ماتروح اذا مانتصالح
ضحكني صوت منصور الي من لمطبخ يصيح
باعي لحجج الي دتطلعهن حتة بس تبطل تصالحو فدوا لعينج مالي خلك ترجع تجلبلي بهلحجة
ضحكنة كل احنة وجريتة لحضني بوستة بعد عتب وملامة بقة يعتذر ويكلي جنت ضايج وردت انهزم من لبيت شفت صديقي جلب بية نسيت روحي ويا ابو حاطلة حمامات زينة يم لمحل بقيت العب وياهن ونطير بيهن متونسين عليهن نسيت روحي

بيومها مانمنا  للصبح نسولف اني وانغام الي خايفة تعوفني
وتحلفني بأن الحكهم بأسرع وقت
جنت احاول اطمنها وكلتلها بس تخلص لسنة احاول ابيع لبيت بهاي الفترة والحككم شعندي باقية بعد وشحصلت من لعراق
راحو ووصلناهم للمطار ورجعنا سيارة منصور بقت يمي وصاني عليها كال بليل يجي ولد صاحبي تنطي لسويج مخليها يمة يشتغل بيها ويدز الة فلوس كل شهر
برجعتي للبيت مريت على دلال ببداية المطنقة وصيتة على شراي للبيت نطيتة حجمة وملحقاتة كال لعصر امرلكم اشوفة
عصرية اجة شافة قدرة وكالي احاول احصلج سعر زين
عدن شكم يوم لبيت وحشة عليهم حيل
اتصلو بينا اول ماوصلو خالتي حجت ويانا جانت فرحانة حيل بيهم

تبجي من لفرح وتلوم بية تكلي ليش بقيتي
ليش مااجيتي وياهم صعبة ضلتج لوحدج.
جنت انتظر اتصال منهم ماكو
حتة قسورة احس علي عينة علمبابل كلما يدك يطفر عبالة احد منهم
محد اتصل
بس ردت اعرف همة بخير لو لاء
رغم كلبي ملجوم من سوايتهم لو كايليلي منريدج ويانا خوف أو مو خوف جان بتعدت بدون كل هلسوالف
لقاهرني انو سمحو لسللامة تأذيني ونولوها الي ببالها
لقاهرني انو حط ايدة بيد سللامة حتة يطفشني
هوة ماخايف علية بكد ماخايف احملة لمسؤلية
هوة لو خايف علية ماجان سوا هيج بروحة جان فكر بية وبأبنة ولو ثانية
جان كال شنو مصيرهم من بعدي
لو شكد ميكبر يبقة بللحظة ضعف يتصرف تصرفات طائشة لاتحمد عقباها
غايتة بس يحسسني بلذنب
ويخليني الوم روحي ويزغرني بنظر نفسي ونظر ابني
مخنوكة مني ولعتاب تارس صدري
جنت رايدة اعاتبة على هوااي شغلات
اولهن انتمائة للسياسة الي ماحصلنا منها كلشي وعاد الغلطة مرة ثانية بدون تفكير
وثاني شي من ورط روحة وية ناس يمكن هوة مو كدهم بدون ميفكر لابأبنة ولا بأخو ولا بأهلة
وثالثهن من طلعني من بيتهم ومن حياتهم بهاي الطريقة
يمكن مومقسمتنا نعيش وية بعض ويمكن حجاية امي صح أو يمكن حجية هوة الصح من كالي اني وياج دوة لبعض خلينا نرجع وتلتأم جروحنة
مااعرف منو لصح
بس الشي لوحيد الي متأكدة منة
احنة صرنة مثل لنار ولبانزين
كلما اسامحة على غلطة يسوي الي اكبر منها ويفتح جروحي لقديمة
ويرجع يخطو خطوات مامدروسة ويذب روحة بلنار بدون تفكير  بس حتة يحسسني بلذنب وحتة يثبتلي بأن هوة مايكدر بدوني
مرات احسة طفل من يريد شي ياج علي لدرجة لو يحصلة لويودي روحة للموت بيدة
لحظات جنت افكر واوصل لنتيجة بأن غضنفر جان مريض
مريض بشي اسمة انعام
جان يشوفني نقطة الضعف الي لمجرد تكون يمة يبقة بامان وتبقة حياتة ثمينة عندة
ومجرد ماتبتعد عنة يرخص حياتة ويبيعها بأبخس لأثمان

ايام قليلة عدن اجونة اكثر من شراي على لبيت وحصلت على سعر مناسب وتكاتبنا بعد ماستلمت المبلغ
ونفس الدلال حصللي بيت بنفس منطقتنا بس شوية ليكدام
لبيت زغير على كدنا واجارة على كد لأيد
هاي لسنة قسورة همل نفسة ودروسة خصوصا من نخطف ابو ولشهر لفات منصور وانغام ياخذولة اجايز  ويأجلولة امتحاناتة الشهرية اخذتة ورحت للمدرسة مالتة شرحت وضعنة للمدير وطلبت انو يعيدولة امتحانات الشهر لثاني
المدرسين كالو مابقة وقت لشهر لجاي امتحاتهم مال اخير لسنة  مبقة شي كلها ١٦ يوم على لأمتحانات لشفهية
تواسيل وترجيتهم كالو نحسبلة درجات لشهر لأول مال شهرين ونسويلة فصلي
تشكرت من عدهم ورجعنة للبيت حصرتة حتة  يدرس لأن مواد هواي فايتتة
بقة يتهرب ويتوسل بية علمبايل وعدتة اذا يكمل لمواد انطي الة
بقة صافن
صفنة ذكرتني بمنة من جانت تصفن ثواني وتطلع خطة تقنعني بيها وتحقق مرادها ايا كان
ماجنت اكدر عليها ابد
شلون يردوني اطلع وتبقة منة هنا لوحدها
شلون يمر علية شهر مااروح بي يم قبرها وابجي واشكيلها من ابوها واخوها المرمرو حالي

قطع شرودي من كال
شوفي نعومة

ولك شنو نعومة

ديلله فوك مندلعج
باعي ادرس ساعة واخذ لمبايل نص ساعة

ربع ساعة ماكو غيرها

ماشي نعومة ماشي امرنا لألله نكدرلج احنة

اقرة ابو لسان اقرة

عفتة ورحت للمطبخ كاعد كبالي بلصالة بقرا وكفت اسويلة عصير موز وحليب وطلعت زبيب وجوز مااخلة منهن ابد رغم ميجبهن بس اقشمر بي اكلة حتة تصير ذكي مثل منة قبل وبعد متحتاج تدرس

واني واكفة ندكت باب لشارع
عبالي باب لجوارين لأن من كعدنة بهلبيت لليوم محددك بابنة
رجع ندك مرة لخ
لبست حجابي وطلعت
من ورا لباب كلت منوو
صوت انثوي غريب كالت اني

فتحت لباب وصرت ورا مديت راسي
لشكل موغريب علية ابد
رمشت عيوني اكثر من مرة
دمعت عيني
تقربت الي اشرتلها تفضلي صوتها يهمس لو تدرين شكد صارلي افتر واسأل يلله حصلتج
حيل شمرت روحها بحضني وبكل قوتي حضنتها وصرنة نبجي ثنيناتنا
وعانة صوت طفل وياها من صار يجر بملابسها يريد يدخل للحمام
داخت بي بساع تريد تنزعة وتسأل بية عل لتواليت
اشرت الها تفضلي و ودخلتها ليجوا ادلي بيها
دخلتة وبقيت واكفة يم لباب الى ان طلعو هية ويا
للصالة اخذتهم كعدو وجبتلهم ماي
بحسرة على حالها وشكلها المتغير هواي همست اسألها
شصاير بيج بلقيس متغيرة هواي

انتي هم ضعفانة ومتغيرة

هاي الدنية وهاي عمايلها
شلونج شخبارج

شخباري انعام طايح حظي حشاج
والدنية تلطش بية لاكعد حظي وية ابن عمي ولا وية قيصر العافني معلكة وسافر

مو ادافعلة بس صدكيني نجبر متتصوريين شنو حالهم طول ذيج المدة بسببب خطف غضنفر
لوتشوفين حال قيصر تبجين علي
تكولين شايب لحيتة شطولها وشعرة شثخنا لدشداشة شغرضها علي
نوم مينام خطية اسبوع هوا دتخل وية غضنفر لو يناملة ساعة بليوم لو ماكو
والله شكلة تكولين زومبي من التعب والركض والهبطات والسهر
انتي هم عذري خطية ماشاف راحة
قيصر لوبيدة ميعوفج ثانية مودفاعا عنة قابل شخاش بجيبي بس صدك هوة حبج
حتة اول مرة من سفرة جدة الله يرحمة تخبل والله يسولف علي غضنفر يكول وصل مرحلة الجنون
يمكن هوة مامسولف الج حتة دخل مصح نفسي

ماعرف شكولج انعام
اني عاذرتة والله بس اهلي امي شلون اقنعها ومنين اجيب اعذار تقنعهم
تصدكين ماكلت الهم سافر لحد هسة
كلتلهم اخو سوة عملية مرة لخ وملتهي ويا
خوالي وامي اكلو كلبي يكلولي خل نروح الهم نتحمد لسلامة لأخو
شحجي وشكول حطيت نفسي بموقف سخيف

ماصار شي كليلهم هسة تخربط وضعة وعمليتة فشلت وسفرو برا يعالجو

اخاف مايصدكون بية

اني احجي وياهم نطيهم رقمي خل يتصلون بية امج موتعرفني وشايفتني

اي تتذكرج من يوم اجيتي بفاتحة بابا وبقيتي يمنا للسابع انتي وبسعاد
زين نعومة سؤال

اي تفضلي

همة ميتواصلون وياج وية قسورة

خليها سكتة بلقيس لو تدرين شلون طلعوني من لبيت ومنو الي طلعتني تضحكين علية

ليش طلعوج الي ادري بي غضنفر من يوم طلكج وهوة عابد بغداد وروحة بيج وكل لسوا بروحة لأن خسرج

الله وكيلج خلو سللامة تحوك خطة قذرة ضدي و٤ ايام اني الوب قنعوني متزوج علية وخلوني مثل السمجة المتزوهرة ولقهرني هوة طالب منة تطفشني بحجة خايف لا ننضر بطلعتنا وياهم مثل ذيج المرة
يعني ميكدر يحجز النة بغير طيارة
ميكدر اقلها يفهمني يكلي خايف عليكم مااكدر اخذكم وياي بعدين اسحبكم
كومة حلول كدامة بس هوة بكل مرة لازم يشمت سللامة بية ولازم ينصرها علية

لا انعام لا تظلمي اني بحياتي ماشفت رجال يحب مرتة بكد حب غضنفر الج
حتة قيصر مرات اضحك ويا اكلة غضنفر يحب انعام اكثر من حبك الي
يكلي هوة ميحبها هوة مجنون بيها
دوم يكلي حب غضنفر لأنعام موحلو لأن حب تملك
وهوس مومجرد حب
دائما يكلي ومن الحب ماقتل
وغضنفر وانعام قتلو نفسهم بهذا الحب
يمكن اني وياج تشابهت اقدارنا رغم قصصنا مختلفة
تتذكرين من بقيت يمكم شنو جنتي تحجين علي
جنتي تسمي الثور الهايج والمخبل ابو خنجر
شحببج بي وشلون وكعتي يا انغام وانتي جنتي تخافين من طارية وتسمي العاق لأن كاتل امة

ماادري شنو لحببني بي
تصدكين مااذكر بيوم تغزل بية بصورة مباشرة ولا حتة نطق كلمة احبج الى ان رحت لأمريكا
شلون حبيتة واني الي جنت مشمأزة منة ومن تصرفاتة
ولقصص الي سمعتها عنة
ماجذب عليج بلبداية جان عطف علي
ولسبب بيبي وكشمش همة الي حجولي مظلوميتة وشلون عمامة وجدة دمرو وطفولتة وخلقو منة وحش يثيرو بعار امة المسكينة
وراها تحول هذا العطف الى حب بس مو اي حب
لعنة لحكتني لأمريكا وسلبت احلى ايام حياتي الى ان سحبني الطوق الى عل ركَبتي ورجعني الهم
هذا الطوق الي احسة سواني حيوان وانسحب منة مثل ماينسحب الحيوان من طوقة

حشاج نعومة لاتكولين هيج
مو اكلج اقدارنا متشابهة انتي لعنة غضنفر ماعافتج لليوم واني لعنة قيصر مرافقتني
رغم صار خطيبي ورجلي شرعا ولليوم بعدة مصدر قلق وسلبان راحة الي
موبس اني وياج ماشفنة راحة حتة همة
حتة بناتهم وعائلتهم بشكل عام
يمكن هلي لعنة امهم المسكينة الي راحت بغير ذنب
واذا الموئودة سألت بأي ذنب قتلت
ياترى ممكن تدين ابنها وعمامة وجدة وتوكفهم يوم لقيامة وتطلب حقها منهم
ولو سامحتهم معقولة الله يسامحمهم

دموعي نزلت واني استمع لكلام بلقيس
كامت تقربت كعدت يمي وصوتها يهمس
نعومة لاتبجين سودة علية ماشفتي راحة مثل حالي
هم صفيتي بطرك ابنج واني هم بطرك وليدي

رفعت راسي اعاين لأبنها
دبدوب ابيضاني خدودة حمرة وجهة ملائكي ضحكتة قادرة ان تاخذ لأنسان لعالم ثاني
تجمع لدمع بعيوني واني اخذة لحضني وبكل برائة حضني ويطبطب على متني ويكلي لاتجين حالة (لاتبجين خالة )
حضنتة واني ادعي ربي واسألة ببرائة هذا الطفل وكَلبى النقي الي مايعرف من خبث الحياة شي
بإن يلتفت النا ويصلح حالي وحال امة
ويكتبلنا لأستقرار ولراحة وية الأشخاص الي نحبهم ويطمننا عنهم

بقت يمي بيومها بلقيس واتصلت بأمها وفتحنا كامرا وحجيت وياها حتة تتطمأن وسولفت الها على حال غضنفر وكلتلها عمليتة فشلت بس قيصر ماحجة بلجديد اكتشفنا وسفرو للهند يتعالج وان شاء الله بس يصير زين ويرجعوز مباشرة يتزوج قيصر بلقيس وبعد ميأجل الموضوع لحظة
بقيت اتعذر منها نيابة عنهم واشرح الها صعوبة ظروف قيصر والموقف الي نحط بي
المرة حسيتها اقتنعت وبقت تندعي الهم وتتعذر عن تقصيرهم لأن مازارو غضنفر
استأذنت منها ببقاء بلقيس يمنا للعصر مامانعت

قسورة كيف خلص من الدراسة حط المبايل هوة ونصوري ابنها وكعد يعلم بي علألعاب طلع عين الطفل
اني وبلقيس ندمجنة حيل نسيناهم ونسينة روحنا
احس ارواحنا المتعوبة تاشابه
شنو تحجيلي كأن تحجي عني
وشنو تحجي عن قيصر كإنما تحجي عن غضنفر
والعكس صحيح
تحجي عن دلعة ودلالة وخبالة وسوالفة وياها
تذكرني بغضنفر وسوالفة ابقة صافنة عجيب شكد يتشابهون  حتة بجبهم
عصرية اخذتها ورحنة للسوك ليمنة اخذت لأبنها تراك والها فستان مال عصرونيات واخذت حلويات وكباب وركبتها تكسي ودفعت كروتها وحلفتها ماتكطع بية
بقت تحجي وماقبلت تاخذهن وتلاوت وياي علكروة
راحت وبعيونا دمع ثنيناتنا
اول ماوصلت راسلتني علواتساب بعد ماتبادلنا لأرقام وبقينة فترة نتواصل وية بعض
نتخابر يومية بلساعات تونسني واونسها
تهون علية واهون عليها
كلما تتصل تسألني ها ماخابروج واني هم اسألها
لا اتصلو بيها ولا بية
خابرتني يوم خميس كالت باجر معزومة يمنها والدتها حجت وياي والحت علية بلجية ونطتني عنوانهم وكالتلي بس توصلين اتصلي بينا ونطلعلج

حصرت قسورة خليتة يقرا بيومها لإن يوم ثاني رح يضيع كلة بدون دراسة ومابقة شي على امتحانتة الشفهية
اتصلت بية انغام فرحانة بدون سلام نترت بية بضرخة تارسها اللفرح من زمان ماشفتها هيج فرحانة
ولج انعام باركيلي باركيلييييي

مبروك بس شكو ولج

اختج حامل حااااااامل

صدك تحجين عليج الله

وروح بابا

ياروووووحي الف مبروك ولج والله مامصدكة

ولا اني

الله يتمملج على خير بجاه كل ذي جاه

اللهم امين

ديري بالج على روحج

لا لبد مادير بالي على  روحي انتي تعالي وديري بالج علية لعد شوكت اتدلل عليج اني
يلله عجلي بجيتج ترا بت اختج متبهذلة امها مابيها حظ تنام على بطنها بليل ورح تخنكها

ياااا ولج مخبلة صدك تحجين

صوت منصور يرد علية
دخيلج انعام تعاي شوفيها للخبلة شدتسوي
كعب عالي وتكمز بخبال وتمشي مسافات بعيدة وتشيل ثكل وتنام على بطنها
تعاليلها اني تغبت ترا اذا صار شي على بتي اموتها

دموعي تجري واضحك مااعرف شنو اجاوبهم
فرحانة فرحة ماابيعها بملايين
خانكتتي لعبرة كوة رديت علي وكتلة

اجي والله اجي بس خل تخلص امتحانات قسورة مبقة شي كلها اسبوعين
تحملها وتحمل خبالها بينما اجي ودير بالك عليها فدوة لعينك

شلون ماادير بالي عليها شعندي غيرها
هاج هاي امي تسلم عليج

نطا لخالتي بقت تحجي على انغام وتلوم بيها مقابلة عليها خوفتني تكلي لبارحة جابت لدرج من لكول للطول ركض ومدنكدر الها نحجي وياها تزعل وتكلب وجهها
تعالي عقليها ماعاولنة حبلت والله ستجاب دعواتنا

حجيت ويا انغام يطب الحجي من اذان يطلع من لثانية حجتها تكلي انسا روحي حامل

سديتة واني بقلق عليها وادعي تخلصلأمتحانات على خير وينجح قسورة واروح يمها خوفي عليها يزيد من حجولي واني صرت احسب يوم يوم وكل ساعة اتصل بيها اسأل عليها

يوم ثاني ركبنا ورحنا لبيت بلقيس وامها
علشارع نزلنا واتصلنا بيها طلعت النا دخلنا للفرع مالتهم جان اكو ولد بداية لفرع واكف من مشينا تبعنا لحد ماوصلنا للبيت قسورة كلسا يندار الة ويخازر بي كوة لازمتة واسكت بي اكلة معليك بي ماماشي ورانا هذا هوة طريقة

بلقيس تتحسر وبدت تحجي وتشكيلي منة
فهمت هوا هذا الي خاطبها قبل خطبة قيصر الها وحتة بعد مانخطبت بعدة يريدها ويدز امة كل فترة عليها تقرة براسها تكللها فسخي وابني ياخذج
وحجتلي عن مخاوفها من امها الي كل يوم تزيد بألحالها وتكللها عوفي قيصر واخذي هذا الولد مناسب الج ويحبح ورايدج لحد هسا
دخلنة جوة سلمنا على امها راحت تجيب جاي
وكملت بلقيس تشكيلي منة

بلقيس:- شحجيلج انعام من يوم الي سافر قيصر وهوة لازملي لدربونة تكولين احد موصي
وين ماولي الكا بوجهي
ولد جان ثكيل ومرتب ماادري شجا هيج تخبل هسة
اشك بأمي هي الي حاجيتلة ولهلسبب هيج ديسوي

انعام:- زين ليش ماتحجين لخالج أو ابنة يشوفولج صرفة ويا
شنو معناها لازملج لدربونة هاي مو تصرفات رجا
هاي سوالف مراهقين
ديجيبلج سمعة هذا مومال ينسكت عنة

بلقيس: ولله ياانعام اخاف احجي وافتح على روحي باب ضالة مثل بلاع للموس خصوصا همة مامقتنعين بقيصر وصارت غصب عنهم عمي ابو زياد وافق وهمة نحطو امام لأمر لواقع
وإلا همة لو عليهم ابد ميوافقون على قيصر وجانو رايدي لهذا جواريني وكاتلين روحهم علي همة وامي شاري
.......يتبع
٤ الاف جان بس طلعت من لبرنامج ورجعت لكيتة ٣ الاف و٢٠٠ 😭😭😭😭 لبارت لثاني بل٩ أو بل١٠ ينزل شوكت مااكمل انشر