#خنجر_لغضنفر
#البارت_الرابع_٤
#حنين_حاتم
غمضت عيوني
لثواني اذكر شفت شي
رجعت ركزت بخوف
شفت شخص يطلع من لبيت ملثم ولابس دشداشة مامبين منو ماواضح
واني صافنة وارجف من لخوف
صوت هامس من وراي
يصيح شتسوين هناااااا
نداريت رجلية تعاندني وجسمي متيبس
مممنو ممنو هنا
بصوت اشبه بلفحيح يهمس
موتج
بسم الله
منو انت
شتسوين هنا وشعندج بلطابق لثاني
من زمجرتة عرفتة
ااجيت اخذ كتاب من قيصر
بيني وبين اخوي خراب من لزغر وانة سنين اسعا اصلحة وانتي جاية تزيدين لطين بلة
شتقصد
اهووووو تريد تسولف لفسكَانة
فضيها للغرفة وحشمي من طبيتي لبيتنا وانتي تتختلين توالي اليل
ترة مأمنيلج
لو امن لبزون شحمة
شنو قصدك
ادري اشيلج واخضنج مثل كاسيت
انة احجي هندي يوعربي
مشيت علدرج بعض كلامهم شوية احتاجلي صفنة يلله افهم مغزا
فتت من يمة جان يتنفس بسرعة عبرتةا والتفت كلسا الة بعدة بمكانة
طبيت للغرفة طبكت لباب وارجف
تقربت يم كشمشة ختلت روحي بيها وندحست بغطاها واليل كلة اتكلب وكلسا ترفسني
تهذي وتتكلب عبثة بنومها ومزعجة
تحملت كلشي من خوفي مجلبة بثوبها مثل لطفل
حاولت وحاولت ردت بس انام
خوف
غربة
ضياع ومستقبل مجهول الى حد يصعب التكهن بي
وشوقي لأهلي
خوفي انحرم منهم ويتنفذ لجاي يحجو
لحد لآن صابرة
منتضرة الكا لفرصة لمناسبة واتصل بمحمد واطلع منا بأي ثمن لمهم اطلع
كلشي بهاي لبيئة على نقيض وية بيئتي صعب صعععب لتأقلم هنا
فجرية ندكت لباب وكشمش مثل لمخبلة طفرت
من ورة لباب تحاجيها لعيبية
تقربت الي تريد تكعدني
لزمت ايدها
كاعدة ترة
جا كومي خية هاي حاقدة علينة من وراج وورة جايناتج لاتسويلنا سالفة
كمت وياها مخنوكة كلت اشرد للشغل من تفكيري
طلعنة بلمطبخ واكفين نلبس ونعناعة تحسب بينا مثل روس لغنم
صفنت وكالت
بيجن نقص
كشمش:- مني نقص كلنة موجودات
فرخ لدوج وينها
نايمة بغرفتها
يااااااااع شني يمة حاسبة روحها عروس
بيا وكت لفصلية تنام للضحاوي وبناتنا يطوشن
امشي كعديها وبساع طلعن كشف لوكت
راحت عليها كشمش تكعدها
رجعت لوحدها وعين علية وعين على نعناعة
بتلعثم كالت
كشمش:- يدة انة اسد مجانها عوفية عودها طري مابيها على شغلنا خل تنشف شوية وتكبر ونطلعها
علما تنشف تذبلنا فرخ
عافتنا وراحت الها بلعوجية حييل تضرب على باب غرفتها
صميدع يشتغل حارس حراستة ليلي جان ماخذ اجازة شكم يوم وخلصت اجازتة ورجع لشغلة
دفعت لباب وطبتلها للغرفة
مانسمع غير صراخ بسعاد
ركضنة اني وكشمش ولباقيات ركضن يتفرجن
ونشوف بسعاد فوك لكنتور صاعدة وتصرخ منها
ونعناعة بلعوجية تلسوع بيها
كشمش تتوسل بيها
عوفيها يدة انة بمجانها خاب هية هاي لفاهية ناخذها عون فرعون
صرت كدامها وحاولت اسحب لعوجية منها
وكلتلها
بيبي صباح الله خير ستهدي بلرحمان عتبريها ماموجودة وهية مامنها فايدة زعطوطة تضل تكمز علينا
وجودها زيادة عدد مو اكثر
دفعتني بيدها وماهتمت لكلامي
وبسعاد تطفر فوك لكنتور رايحة راجعة
اعاين كنتور عالي شصعدها
مانفضت الة وبسعاد مكتولة ونازلة
مشينة هية من دونة بطرك لدشداشة ولعبا تسحل بيها وراها كلسا طايحة منها وننبهها ترجع تجيبها
وياريت تمشي بيها مثل لبنات
تتلفت وتمشي فاكة حلكها وتضحك تسكر تنتهي على اتفه شي
شبعت كفخ من كشمش
كعدنة بلكاع ولسلال داير مدايرنا من كل لجهات نملي مجموعة ويودنها لبنات ونرجع على غيرهن
رغم شغل بسيط واحنة كاعدين بس احس ادية نشلت
وبسعاد كضتها تعض لجزء لمستوي وتشمر علينة لخلال
كشمش تسولف الي عن لمكان
خية هاي صفحتنا كلها بأسم جدي
إلة بستانين بأسم نعناعة
هذن هربتها من خذاها جدي سجلهن بأسمها
بلله متكليلي شحب منها
ياااااع
جا انتي ماشايفتها بزغرها
جانت بني سعد مزامط ومذابح عليها بوكتها
وهية حبت جدي
جان يغنيلها
فتح ورد لباجلة
عيشة كدر وأمدلة
فتح ورد لباجلة
يجي لمحبوب شكلة
عضة وبوسة من شفافة
شمعنة ورد لباكَلة
ورد لباجلة يكولوها علحلوة عبن شني ورد لباجلة من يطلع شوفتة ترد بلميت لروح
هاااا
زين ليش اهلة مجانو راضين بيها
خية اهلها واهل جدي بينهم دم وثار قديم بس تصافو لجل عينهم عبن جدي جان عزيز ابو خطبها الة وماكسر بخاطرة بس عمامة تخاربو ويا
ويسولفون عليها طبت بزفة خذت ديار بني سعد من لطول للطول
عكس جدتي شكرية
طبت بثوبها لأسود
يتيمة وهدوها عمامها لجدي
وتكربص جدي بيها وجدتي نعناعة ذبت عمل يكولون
ضلت جدتي شكرية اشهر مايكَربلها جدي يخاف على زعل نعناعة
تالي من حبلت بعمي خليل الله يرحمة يلله عدل بينهن
يعني هية بيبي شكرية ماعدها بس عمو خليل ورحيل
لا عدها ثنين بنات متزوجات ماخذيهن عمامنة بلبصرة
جدتي نعناعة سطرتهم ولد
وجدتي قادسية ماتشوف تدرين بيها
هاي تصير بت عمة واخذها عبن بيها لولة هنا لعايبة تطيح براس ابن عمها حتلو ازغر منها
وكويكة جانو ناوين ينطوها يا لصميدع يا لفدعم عبن لباقين كلهم معرسين
زين ليش ستعجلو عليها مو جانت طالبة ويكَولون قيصر ناوي يخليها تكمل
خية هية من ماتت امها جان عمرها ٣ سنين وجم شهر بس ماعدها جنسية
ومن طلعولها جنسية جانت فرخة جبيرة مايعرفون شكثر عمرها بس عبن ناعمة قدروها ه سنين
وهية اضن ٩ عمرها قيصر كال مدري ١٠
من كبرت ولغضنفر شاف لولد يتحججون ويستحون يكلولة مانريدها
نقهر عليها وكال خل تدرس ويكول لحد يكللها عمرج اكبر من هيج. خاف تنقهر
من كضت متوسطة
بعد هنا ماكو من هاي لوحدة لمدري شسمها
اعدادية
اي هية هاي
كعدوها بلبيت من دونة ماتشتغل حاطة هلكتب مال قيصر ودومها سرحانة ماتدري بلدنيا طشت لو رشت
جدي على جم مرة يفتح لموضوع وي فدعم وصميدع
يتشردون بحجج
لغضنفر حزت بنفسة ونقهر على اختة
جان يحبها موش شلون ماكان
من حيث جنة اذا نريد شي ونخاف من لغضنفر بس ندهديها علي
مايرفضلها طلب
واذا تكاون وي واحد محد يلزمة
توكف بينهم كويكة يعوف كلشي ويطلع من لحوش كلة
جانت مرهم لغضنغر
اذكر مرة من لأمرار تكاون وي وادم علمود طيور مالات بيبيتي قادسية ووهمة سامعين بمعزة كويكة عد لغضنغر
بس محلفينة بيها
نسدت.لسالفة وماتت بساعتها
جانت مرهم يخية بس هسة صارت لجمة بكلبة
خي عون كلبة شيحمل ثنينهن عابنة وزغرنة
وهية تحجي قاطعتها من انتبهت على بسعاد ماكو
ندارينة ندور عليها
كامت كشمشة تتلاطم عبالها شردت
تلطم على وجها وتكول
كلة من جدتي نعناعة ورطتني بيها انة احتار بيها بلشغل
كشمش:- رفعت عباتي وكمت امشي بكل حيلي ادورها بين لزرع وانعام تهبد وراي كلسا مجلب بثوبها شي
عبرنة بساتين لنخل وصرنة بنص لحنطة ومانكدر نطب بيها ونعبر للصوب لثاني يندمر لمحصول
لازم نرد منين مااجينة وندور لصوب لغادي
نداريت على انعام اصفك بوجهي
شفتي لوعد
كتلها انة اشتغل بمجانها
دكت على صخام وجهي شلون تشوف كشمشة ماعدها شي لازم يصخموني ويلطموني
انعام :- اعاينلهة كعدت بلكاع تربعت وتعاين للسمة
ربي كضيت عمري الطم وية لكبار واكل وية لزغار
ونوب هلزعط كبرت وتعاي يكشمشة تدوهني بيهن
وبدروبهن
انة تعبت لامن لرجل لامن لأهل ياهو ليفتكَ تعاي يصخمانة ركَعي ورا
دعاينلي عاد ربي عايين
كومي حبيبة ربح رحيم هسة نلكاها لتخافين وين تروح هاي لفطيرة شتندل
دخل الكاها وحك شارة جدج ينعيمة الة اعضها بمجان اخليلها عاهة ماتنساها للدوم
سحبتها من ايدها ومشينة
علما وصلنة لموقعنة غدينة نكت من لتعب
صديت علجهة لورانا ولشمس بعيني
احاول بنضري اشمل كل لمكان واكفة بمكاني اندار بجسمي لكل لجهات ونضري متصبب على ابعد مدى وكوة اقاوم لشمس
والمح ثنين جوة شجرة
نداريت على كشمش اشرتلها
واشوف كشمش خطفت من يمي وطارت الهم
لحكتها احاول الحك بيها والزمها
لمن وصلت جانت كشمشة نايمة فوك بسعاد وذيج تضحك بعلو حسها وشاركة لحلك
وصميدع منتجي علنخلة كوة كاتم ضحكتة ويصيح عليهن
وخرتها عنها
وبسعاد بعدها تتدعبل بلزرع ولازمة بطنها وتضحك
تنافخ وتعاينلهم بغضب
رفعت اديها وتحجي
ربي عساهم بلبرص ولجرب ولفالول واكزيما لجلاب وسوادين لهوايش
ندارت علية بحركَة
شمالج متنحرة ماتكولين امين
اريد ابلع ضحكتي حتة اجاوبها
سحبتني من ايدي وتنتر
ضحكي ضحكي هوة انتي بيش فالحة لو تصيحين شقصدج لو إتمضحكين
مشينة وهمة بقو
التفت الهم كلسا كاعدين واحد كبال لثاني هوة يتأمل ضحكها وشيطنتها ويتبسم صافن بيها
وهية تهمش بهلورد وتطش ليفوك وتكمز
نضراتة الها كعدتة وهوة لام رجلي لصدرة
كلشي بي ينبأ بعشق ووله جعل رجل مثل صميدع يتحمل شيطنة طفلة مدللة ويحتويها ويحاول يعلمها
فرحة بداخلي مشاعر غريبة لاطفت كرهي لهذا لمكان وحاولت تجعلني اغير نضرتي
نفضت افكاري عني
وداخلي يجاوب
واني شعلية اناي اطلع منا مستحيل ابقة
لمن لسلال ورجعنة جانت فوك ل٩ ونص
غسلنة ودخلنة جوة
همة ورانا طبو
طبيت للحمام سبحت وذبيت ملابسي
طلعت واشوف بيبي شكرية كاعدة وغضنفر وصميدع وفدعم و عبود وفرهود كاعدين يمها يسولفون وصوتهم عالي
مشيت بخجل واستر بنفسي
شعري نتها من لحجاب كام يتساقط
طبيت للغرفة كعدت امشط ودموعي تنزل
تحضرني لذكريات
حلم ونباك من اجفاني بفجرية حلوة
بيوم وليلة ضاع بابا وضاع لأمان واجينة هنا
خلصت روح وذبيت نفسي بمخدع لغضنفر
احس حتة لهوة شح
وكلبي جن غرفة قديمة مالاحتها شمس من سنين
لاصوتهم يمرني يطفي شوك
ولاعندي صورة اقشمر روحي بيها
عيوني للسقف ودموعي تجري عليهم وعلى حالي
وبدأت لحكاية
يرويها طهر قلبي
حيث الغربة والحبس والتمني والتوق لرؤيا الأحبة
دموع تتلألأ في ناضري لتروي صحراء قلبي بحياة غريبة
تبزغ من قلب العادات التي طالما كنت على نقيض معها
وكان قلبي يتجول بعيدا باحثا عن حلم
حلم كان يرمي على شفتي ضحكةً طويلة
وفي طرفة عين
اختفى كل شيء
حل الخراب
ليأخذ معه حلمي
مكتبتي التي طالما شغفتني
فنجان قهوتي بتلك الخلطة السرية المتوارثة
قصيدة ثورتنا
وشهابنا الذي اطفأ كوننا بإنطفائه
رحل وترك اثرا لايمحى وغصة شوق تذيب احشائي
لم اكن اتخيل ان المسافات ستدخل بيننا الى هذا الحد
اود لو ان لمسافات تطوى
واخبركم اني دونكم لست بخير
اود ان اشكو
صمت صمت
واسرار مدفونة
احترقت بين طيات الماضي
اشجاني ذكرياتي
وكيف للقلب ان ينسا ماعهدناه معا
وتلك العيون العارية التي ترعبني
وتخبرني بأن الشامة التي تعتلي ذلك الحاجب المبتور هي نقطة النهاية......كتاباتي حنين حاتم
ندكت لباب وصوتة ينتر
اكو شخص علتلفون يسأل عليج
كمت بساع لفيت حجابي نزلت ردانات ثوبي وطلعت
صار بوجهي
يخازر
تمشيت للتلفون
لزمت لسماعة وكلت الو
اعاينلة من دخل للغرفة
بقيت خايفة مااكدر حتة احجي
وصوت علطرف لثاني يكلي
نعومة ماما حاجيني انتي بخير
دموعي تنزل
شحجي وشكول من ياخير ابديلج
صوتها ثار اشجاني وغصاتي الي تتعالة اريد اكتمها حتة يطلع مني لكلام بوضوح
ماكدرت
الى ان حسيت بعد مابية اكتم الغصة ولبجية
ختنكت بعبراتي وطلع لصوت من بين شفافي يتقطع بلشهكة
ماما لحكَيني اني مااكدر بعد والله مااكدر
اشوف لباب نفتحت وعيونة علية
وبيبي شكرية تقربت الي
لمساتها على متوني كأن أعادت لمشاعري توازنها الي اخلة سماع صوتها الحنين
واعادتلي زمام لأمور بلسيطرة على نفسي
اخذت لسماعة مني سلمت وصوت ماما يرد بلهفة
شبيها نعومة فدوة حجية كليلي ليش هيج تإخرت خوالها متخبلين بس مابيدهم شي تجتفنا هنا
يايمة كلشي مابيها عيارة
هية مشتاكَتلج وتعبت لأن دوم تتصل وماتحصلكم
ماعرف يمكن لسبب بلخطوط احنة هم نتصل وماكو
نطتني لسماعة وشفافها تهمس يم اذاني
لاتجلطين لمرة طمنيها كامت تلهث ونكَطع نفسها من لخوف عليج
حجيت وياها
بصعوبة اكتم لبية وابين الها طبيعية
بقت تسأل عن حالي وارد بخير
طلبت تحجي ويا
عيني على باب غرفتة كلت هسة يطلع وادري بي ويانا على سماعة لتلفون لثاني
وفعلا شوية ونفتحت لباب
تقرب الي اخذ لسماعة من ايدي وسلم
ماعرف شنو تكلة ماما
بس بقة يتعذر الها بحجج واهية ويكللها انو لولد لعبرهم نلزم ونحكم ويحجي بألغاز وكلمات مختصرة
ما اعرف شنو تكلة وهوة يجاريها و يكللها
ان شاء الله
اكيد
بدون متوصين
سد لسماعة ورجع يم بيبي شكرية كعد
مشيت بخطوات مكسورة للغرفة
شوية ودخلت يمي كشمشة
ها خية شمالج تبجين
اريد اهلي كشمش تعبت
اترجاج ساعديني اني مااكدر
كم يوم تعبني واخذن من طاقتي اذا ابقة هنا اموت
مو استهانة بيكم ولا تقليل شأن منكم حشا
وكل لكلتة عنكم بساعة غضب اعتذر عنة
انتو مامودين علية اني لذبيت روحي بنصكم وورطتكم وورطت روحي ولمفروض اتحمل نتيجة افعالي بس والله مااكدر
شلون اشرحلج كشمش
مثل سمجة ويطلعوها من دجلة ويذبوها ببركة ماي مالح
خايبة كافي انة كَلبي رجيج وذني عيونج لشهل من يدمعن يخلن كَلبي لرهيف هيج يرفرف
لعد ساعديني اترجاج
شلون اساعدج
بس امنيلي طلعتي منا وهذهو
وشلون ائمنها
بعدين نسولف ونتفق
خل احجي وية معارفي واتفق ويا
اااخ منج واااااخ من كلبي ليطاوعج
عافتني وطلعت
مشطت وطلعت اريد اكعد يم بيبي شكرية
عاينت جان يمها صميدع
بعد نحرجت لا اكدر اروح يمها ولا اكدر ارجع للغرفة
تكترت على صفحة واسمعها تحاجي
شني يمة كَالو بيضة وسكتو كَالو سمرة وزمطو جاشمالها لسميرة مملوحة ودمها يلعب
اسمعة بصوت ناصي يجاوبها
لا انة موعلى هاي جدة
تقرب الها وشاورها
خايب شمالك العب بلتين لمن يلين
لتخليني اعلي حسي منا لوادم
وتغمزلة
ايدة على حلكَها وعينة على فدعم وغضنفر ويكللها
لتسمعيهم يدة يكَلبوني علبطانة غير انة ابيع عليهم بطولات
سرح ويلعب بلحيتة
يشيب لراس ياعشكَ لزغيرونة
بصوت عالي ضحكت وهوة كام بساع من يمها يندار ويأشرلها بعيونة عليهم
نترت بي خاب دمش
ندارت علية بيدها اشرتلي
تقربت الها
على ضهري اديها تمسد وتكلي
شكثر عمرج ينعيمة
٢٥
جا ليش لساع ضالة بلية عرس
بابا ماينطي إلة سيد ومواصفات معينة ومااجاني احد مناسب
ها جا هلكَول ليش ضالة ماعايزج حسن ويهج يكَل للكَمر ميل وانة بمجانك
شكرا بيبي والله عيونج لحلوة
شنو كال لأمي غضنفر
طمنها عنج غير
وليش جذب عليها بسالفة لمهربجي
يمة تغشمين روحج لغصنفر مايرضة يهدج لحد مايوصل لكويكة
يوصللها وهم يكتلها مثل ماكتل امة لضالم لعاق
شنو هذا مالة رادع مالة رداد
شنو هيج لدم رخيص عندة
ميخاف باجر ورا حساب وكتاب
شلون يحط راسة علمخدة وينام مثلنة اريد اعرف
على متني كفختني
وتصيح على كشمش الي كبالنة تكنس بلكاع
خاب كشمشة شني هاي صاحبتج منين تطفة مابيها دكَمة
خاب بسج دخيل جدج يتورط بنيادم يحجيلة وياج سالفة
يمة لغضنفر يحب كويكة بعز روحة
وهوة صح ماراضي علسوتة بس مايكتلها
هوة يريد يردها لهنا مايكَدر على فراكها ماتشوفينة شلون غدة يخوف من يوم شردتها
هوة حتة من راد يعرسها جان مقهور عليها عبن ولاد عمومتها واحد يذبها علاخر
وراد يعرسها على شيخ حتة يكسر خشومهم وهم لأن من عمامنة وجريبين علينا
ومن سألها كالتلة راضية
بس ورا تضل تبجبج وتحبس روحها
يرد يسألها تكَلة شورك على راسي
ودودهتة وماخذ منها لاحكَ ولا باطل
يعني تقنعيني انو هوة ماجبرها
لايمة شيجبر منها هية اذا كالت عللبن اسود يكللها اي
اني بعيني شفتة يدفنها بيبي لتخبليني
لتفتت يمنة ويسرة وجرتني عليها ودنكَت بصوت هامس تحجي
يمة كويكة من ماتت امها جدام عينها تمرضت وضلت هواي تصخن بليل وتهذي
وتنشمر على جم مرة
جان لغضنفر يهبد يروح صوب لسوك يجيبلها بهلأدوية وماملحك
صوتها راح
ومرة من لأمرار صخنت حيل
خذتها جدتج نعناعة لوادم جووها براسها ونطوها دوة عرب خلتة الها ومسحت جسمها بي
وتخربطت ليلتها وكام يطلع بجسمها مدري شني حب وتضل تهرش بي تهرش الى ان ينفتح ويطلع منة دم
وضلت على هلحال اشهر
لغضنفر مجابلها وهاد لدنية
تمرض عليها وقيصر ممالخ هوة ويا
يوم يفشخة ويشرد يوم يشكك هدومة وكل هذا ولغضنفر يسكتلة
رغم وي غيرة يدور لحرشة دوارة
حاول يلمهم إعلى صدرة
جان مقهور عليهم لا ام ولا ابو
كويكة نربطها لا يفيد نحطها بطاسة ماي لايفيد تضل تهرش تملخ روحها تملخ
جسمها نترس اثار وتشوه من لهرش
الى ان بيوم هرشت هرشت بضهرها الى ان كام يتجارة دم
لانكَدر نمنعها طفلة ويحكها تموت تغدي جنازة
ولابيدنا شي عليها
لدكاترة يكولون لازم ماتحكة وتلتزم بلدوة
وهية إتسدون من تشوف لدوة يحركَها
ماتخلينة نحطلها ولوحطينا تضل تهرش بلأزيد
مانشوف غير لغضنفر شالها بذيج اليلة وركض بيها ماندري وين
لبست عباتي وتبعتة
ولكيتة بضهر لبيت طامها بلرمل ويدير ماي على لرملات يبردن وتهدأ
وصار كلما تهيج ياخذها بلرملات يدفنها هم يشبكها حتة لاتهرش وهم لرمل مبلل يبردها
وتسكن علي
من يومها وصار لغضنفر كلما تهيج ياخذها ويركض بيها
صدك تحجين بيبي
اي جدة صكَد
لعد شوماكَالتلي
انة ادري بيها يمة سوتج معبارة وعبرت لصوب لحبيب وهلضليتي بمجانها
دموعي تجري حتة هاي لخرسة خدعتني وصورتلي نفسها مضطهدة ومضلومة
مشيت للغرفة مخنوكة خنكة بس الله لعالم بيها
طبيت للغرفة
تقوقعت على نفسي وبدت حفلة لدموع
ولملامة وتأنيب لضمير
ولأفكار لسيئة تتراقص مع انغام بكائي المكتوم
صوت حجي برة
ركزت بي هذا صوتة
كمت اريد اتأكد من شي
لبست وطلعت عيوني تتفحص طولة
وترجعني ذاكرتي اليلة ماقبل امس
لطول مثل طولة بس لملامح كانت متخفية وراء يشماغ
واذا كان فعلا هو ليش يروح للبيت الي كلهم يحجون عنة الخرافات ويوثقوها بدلائل وشهود
جان فرحان ويضحك وية كشمش وبيبي شكرية
ولفهمتة من كلامة وياهن
بأن هوة شغل وضيفة معاون بلمدرسة الي يداوم بيها
ندار علية
وبأسرع مايكون شحيت نضري عنة
تقرب الي سلم وسألني علكتاب مالتي الجان بغرفتة
يمي
شجابة يمج
اني اخذتة
عيونة نفتحت وبأنفعال نتر
شوصلج وشلون طبيتي لغرفتي
طبيت اخذتة من جنت انت نايم ساعة ..
وركزت على ذكر لوقت حتة يعرف طبتي جانت بلوقت لجان هوة موبلغرفة
تقرب الي اكثر
وبصوت اشبه بلهمس كال
يعني لغطا لعلى لجرباية انتي محركتة
نفيت هلشي ووخرت من كدامة بساع من صدت عيني علي جان يراقب وعيونة تخازر بغضب
دقايق وسمعت صياح قيصر الي نادرا ماينسمع
نضربت لباب وطبت كشمش بعجل تتلفت وجها يتخاطف
لزمتها من اديها
شبيج شكو
وخري وخري وياهو ليدك لباب كليلة موهنا
ليش وشنو هلصياح
هلتكاربو وكدرت ابوي على امي
يردون علي كل واحد يطلع شوغتة بية
وليش تسكتين
جا احسن مايتمالخون ويغدون لحم
خل حركتهم بية ولا يطلعوها واحد بلآخر
وهمة ليش تصايحو
هيج قيصر طخت عدة يعارك غضنفر
راسي علباب اسمعة يصيح علي
شني هاي زرعتها بينة وهية غريبة تطلع على اسرارنة شينة وزينة شني معناها
لا انت لمتزوجها ولا تخلي غيرك ياخذها
ومنو هذا ليتجرأ ياخذها
وينة خل يطلع راسة خل يصير زلمة ويكول انة اريدها
هوة انت راح تخليني اسويها واخليك تضرب اخماس بأسداس
وشني هاي لتسويها
مالك غرض
لحكة
وشتد صياحهم
شني مالي غرض
انة لمسؤل لوحيد هنا عنها
جا اذا هيج عرس عليها وفضنة شني ضلتها هنا بينة غريبة وعزبة
شني احنة انبياء ملايجة
ها وتكولها بوجهي
جاشني مرتك هية وهيج مغتاض عليها
ترة مافهمنة فلمك
اطلع من وجهي قيصر لاتخليني اصوبك
يلله صوب هوة بس انة ضليت
صوبني وخل لبيت لأم طيرة
عافة وطلع
اعاين الة كأن امامي كتلة من جبروت مصطنع اذابتة جملة وحدة
جملة كانت كفيلة تخلي لغضنفر بعنفوانة يعود لعرينة مكسور مدنك راسة
وايدة على رجلي تضرب بخفة
نفس عالي وصدرة يخرخش كأن
اعاين كشمشة دكت لباب على كيفها وتحاجي
خوية تريد جاي
اعمرلك نركيلة
مدري شكاللها جرت حسرة وتلعنت لشيطان وتروح وترجع بلصالة
كبالها نعناعة ومرت جليل يضحكن عليها
طلعت برة تدور على قيصر ورجعت
عاطت بيها نعناعة بسج فر ركدي شعليج بيهم اخوان بينهم
دخل جدو ابو خليل
وورا لفلح دخلو مسواك وغراض للمطبخ
اخذنة منهم من لباب
سأل علولد كلولة كلمن بغرفتة بس فدعم طالع
طب على غرفة عضنفر
مدري شحجة ويا وطلعو ثنينهم
وكف يمهن بلمطبخ كاللهن باجر عدكم خطار
سألن منو
كاللهن حضرن غداجن وطلع
بقن يحللن بكيفهن
لبيت جان عبارة عن ديوان ببداية لحديقة ويمة حمام وتواليت
وبنهاية لحديقة يجي لبيت وتفاصيلة
علجهة ليمنة تنانير طين تلاثة وصريفة وقفاص طيور ودجاج وعلى صفحة بركة ماي صغيرة مسويها للبط ولبشوش
نص مال حدهن وجهالها ونص مال جدتهم قادسية
وعلجهة ليمنة زريبة بيها سطبل مال خيول يستخدموها بلمناطق الي يصعب على لسيارة توصلها
على صفحة حلال هواي حتة بعران
بهاي لصفحة اكو مشتمل زغير بنائة بسيط
يسكن بي فلاح جبير بلعمر هوة وزوجتة واطفالة مسؤلين عن لحلال
اكلهم وصحتهم وكلشي يخصهم
مغربية كعدت من لنوم كوة اشيل روحي من لفراش
لغرفة تخنك وضلمة هيج وكت مابيها شباك يطل
طلعت جان لبيت خالي بس لحجيات كل وحدة بصفحة
اسمع ضحك لبنات من برة
طلعت برة اتبع لصوت
جانن بصوب لحلال على كتر كاعدات وكدامهن طين يدوسن بي برجليهن
وبسعاد تكمز وتاخذ منهن وتسوي بيت مال لعاب على جهة
تقربت الهن
كشمش تعاينلي وتضحك
هاي كل ليكعد من لنوم هيج وجهة يبركَ
وتردعليها زوري لا جدتي شكرية تكول هذا نور محمد بوجهها
بنتر حجت حدهن
بري محمد منها
بلعت لكلمة وسويت نفسي ماسمعت
ستفسرت عن لديسوو
كشمش:- خية جاي نسوي تنورين طين جدد
ذنيج زغار وتعبانات
مديت ادي وياهن اساعدهن
جانن ناس تعجن وناس تدوس بلرجلين قبل ميذبون علي مي ماعرف شنو يخلطون ويا مواد
واخر مرحلة هية لتشكيل
يشكلنة على هيئة سافات واحد ورة لثاني
بس موبنفس لوقت
يشكلون ساف واحد ويتانو ييبس
ويوم ثاني يلله يشكلون ساف ثاني
بهاي لطريقة يكون قوي ويعمر اكبر وقت ممكن
لتفتت على كشمش اسألها
ليش هيج ريحة لطين موحلوة رغم اني شامتها بحديقتنا كلش حلوة خصوصا من يلوحها مي
عبن نحط وياها سرجين
شنووووو
شمالج شهكتي جا لوما لسرجين يطيح هذا حالة حال لسوكَيات مايطولن يتفطرن وخبزتهن تصير ماتستوي زين
نكتت ادية وكمت
معدتي احس تكلب كامت
ركضت على صفحة اتقيء
شفتة يطلع من لديوان معصب من مشيتة عرفتة
لحكَة فدعم يحجي ويا دفعة ومشة
بقة يمشي بمحاذاتة ويحاجي
لحد ماطلع برة وهوة ورا
مشيت ناحية لبيت ادورها
لكَعدة وياها حلوة وشكواي ماتنتهي
دخلت جوة وكفت بباب غرفتها ومن ورة لباب سمعت صوت تذمرها وشكواها من قالونها
دكيتة ودخلت
جانت لازمة بطنها وتتلوة
اخ يابوية
اخ يايمة
سالتها تحتاجين شي
كالت لايمة اخذت دوة عرب وهسة اصير زينة
ماردت اضوجها مشيت محتارة وين اروح
بعدني اخطو خطوات معدودة تجاه لأستقبال ووجهتي كانت لمكتبة الي متحوي سوى قرائين وتفاسير وشكم كتاب مال قيصر
صديت على باب جدتهم نعناعة من نفتح وطلعو منة ولد جليل ثنين
جانو ازغر من غضنفر بس بلضخامة يبينون اكبر
صدو علية ثنينهم
درت وجهي خجلانة ورجعت للغرفة ماطلعت بعد
طبت كشمش بيدها صينية لعشة
همة عادتهم ياكلون على سفرة وحدة كلهم لابناء ولأحفاد
بس علمودي لبنات يجيبن لصينية ويجن
تعشينة وورة لعشة بقينة نسولف
لبنات ينامن من وكت بس اني اسهر لأن اخذلي كسرة لضهر متعودة من جنت اداوم
بقيت بفراشي اتكَلب
جنت مرتاحة لأن كشمش كالت منطلع باجر للشغل لأن راح يجون خطار
ولفهمتة من يجي خطار يجون كل اقاربهم لقريبين عليهم كترحيب بلضيف يتجمعون
ساعة فوك ل١٢ ولنوم جافاني من اجيت لهلمكان
بلأحرى من جنة بلسجن
اليل كان بلنسبة الي ذكريات السجن وفقد بابا
صوتة بآخر مرة لتمينة بيها على سفرة عشة وهوة يكلي بعد مااوكف بقسمتج ابد
اي احد يتقدملج حتلو مو سيد ازوجح
شعجب تنازلت عن شروطك
ماضل شي بلعمر واريد اطمأن عليج
متت بابا وماطمأنيت علية
من كل جهة انكلب تحضرني ذكرى
وذكريات ذيج لأدين لجانت تعبث بطهر جسدي لبالي الي اهلكتة ليالي لحبس التاخذ من لحيل
ذيج لذكريات لمؤلمة كان الها لنصيب لأكبر من كل صفنة وحسرة وكسرة خاطر ودمعة بصلاة كل فجرية
صوت باب لمطبخ من نفتح ونسد
ونفتح لباب الي علجها لثانية وهم نسد
كلشي بداخلي يكَلي هذا قيصر
دقايق وندكَت باب لغرفة
حاولت اكعد كشمش اخاف افتحها ويطلعلي هوة
بقت تتكلب وتهذي
من ورة لباب كلت منو
صوت ناصي رد علية
انة ام جليل يمة
نعناعة شتريد مني بهليل
فتحت لباب علكيف
من ايدي سحبتني
تعاي شمالج شني راح اكلج تمدين تك عين
من طلعت جانو كبالي حدهن وعبود وفرهود ولد جليل
الي هوة ابن نعنانة لجبير
وجوه تتخاطف وملامح مرتبكا ناس تعاين على ناس قطعت لصمت نعناعة وسحبتني للقنفات
وكالت
يمة احنة ماهاين علينة ضلتج هنا
صعبة وماضم عليج نخاف واحد من ويلادنة تدنة نفسة عليج ويتكارب وي لغضنفر وشيخلصنة
وانتي هم ماترهم ضلتج هنا حالج حال لأسيرة
انة ولويلاد اتفقنة نطلعج منا بس،مانكدر نوصلج لأهلج
نعبرج صوبنا ونركبج وانتي شوف وين تمشين لكَرابتج جوارينكم
ستبشرت من كلامها رغم ماارتاح للهلعائلة كلها
بس فهمت همة جاي يساعدوني لغايات خاصة بيهم متهمني ايا كانت لمهم اطلع واخلص
نطيتهم موافقتي لمبدئية وكلتلهم افكر واخابر اقاربي وانطيكم خبر حتة تحددون يوم ووقت وتامنون كلشي
دخلت للغرفة مرتاحة
بس جانب بداخلي متخوف
خايف عليهم من نار لغضنفر لو عرف بية شردت
بيبي شكرية الي شايلة همومة وبسببة وبسبب هبطاتة صار بيها قالون عصبي
كشمش الي عليها علامة وراح تكون اول شخص بدائرة لشك
صليت وحاولت قدر لمستطاع ابعد هلأفكار وافكر بنفسي وبس
لصبح كان مومثل كل يوم
جنت اعاين لكل شخص بتأنيب لضمير نضرات اشبه بلوداع
واعرف لو طلعت راح ينضرون كلهم
ام فدعم كبالي تعجن هية ومرة جليل
رفعت راسها ضحكتلي وصبحت وتسألني على جرحي ماخف لأثر
مشيت للمطبخ جان مزدحم رغم كبر حجمة
بلحوش كشمش وزوري ولعيبية وثنين من بنات إسماعيل متربعات بلكاع ناس تثرم وناس على لبريمزات يحمسن
وكدور كبار مصخمة وريحة زفرة لدم واللحم بطشوت يغسلن بي
كبالي جان فدعم يشطف لكاع لكلها دم
ومسار لدم واصل لصوب لديوان
كعدت يم كشمش
ايدها ستقرت على جبيني
شمالج مصخنة
لا
شو وشج اصفر
لان ستوني كاعدة
عيني علباب من دخلن جوكة نسوان
كامن كلهن وذبن لبيدهن يهلن بيهن ويرحبن
جانن اقاربهم من نفس لقرية جايات يرحبن بلضيف لجاي
سلمن علكل ودخلن جوة وبقن لبنات يمنة تحزمن بعبيهن يساعدنة
ماخلني الزم شي ويضحكن على لزمتي للجفجير ولجمجة لأن كبار مااسيطر عليهن
بقيت اثرم واكشر بتيتة وبصل
قبل ل١١ غداهن ستوة ولخبز ماخبزن الى ان يطب لخطار يبدن حتة ياكلون حار
ورة لصلا
طب عليهن طفل صاح اجو اجو
اشوف ملاطمهن وخبصتهن وناس تصيح على ناس
ولوكفت تغسل من لطبخ والي تعدل حجابها
طلعن برة كلهن سطفن من اكبر نفر لازغر نفر
ومن بعيد نشوف سيارة وحدة تتقرب للبيت
ولزلم لازمين لباب لخارجية كلهم وويمهم لجهال
وبعلو لصوت يصيحون حييهم حيييهم رغم بعدهم ماواصلين للبيت
تناقض بداخلي
بين فخر بهلمكان وبين كره للضرف لخلاني هنا
بعيوني اكو لمعة فخر واعتزاز بهيج ناس وبكوني اقربلهم ولو من بعيد
وزاد هلفخر من شفت لنزلو من لسيارة نفرين لاغير
وعرفت ان هلذبح ولملكا كلة ولخبصة علمود نفرين
نفرين مرة ورجال
بتجاهنا اجت لمرة يحوطوها لاطفال زافينها
لبسها وكلشي بيها اوحالي بمسكنها
من تقربت وجه بشوش ملامح انثوية ناعمة جسم ممشوق لابسة كوستم وحجاب يحتضن وجها لناعم وكلشي بي زغير
من ركضة بسعاد عليها
وحضنتها الها عرفتها اختها
سلمت علكل ودخلناها جوة متعرف تجامل منو او ترد على منو من كثرنا
من بين هوستهم كالت بيبي شكرية
يمة كشمش اخذيها لغرفتجن خل تبدل وتغسل جاية من درب
وبسعاد لازمتها من ايدها شلون لطفل تكوم تكوم وياها تكعد هية وياها
للغرفة اخذنها لبنات
ولحكتهن بطلب من كشمش
جانت حاضنة اختها وكلسا يبجن ثنينهن
لفهمتة منها هية محصلة تلفونهم ومحاجية جدي ابو خليل وواكعة علي ومتوسلة بي تجي تشوف اختها يوم واحد وتروح
وهوة مارافض بلعكس كايللها هلا بلضيف
عين غطا وعين فراش
جابها خالها واجت
بقة خالها يم لزلم بلديوان
بدلت وبينما تبدل جانت بسعاد تنطيها مختصر مفيد عن كلشي هنا
وكشمش تعض شفة وتغمز بسعاد منطلقة ولايمها
ندارت علية وسألت
جنج مو منهم شكلج يختلف وحتة كلامج
قبل مااحجي جاوبتها بسعاد
اي هاي من كربلاء ابوها نعدم وامها واختها شردن وهية حبسها غضنفر هنا
بين لخجل الي نرسم على وجه لبنية من سذاجة اختها ورعونتها وبين وجهي لجان يحتقن وية كل كلمة تحجيها
ضحكنة ثنينة وبدت تستفسر عني واستفسر عنها
اني اسمي بلقيس طالبة تربية ولوما قسمة ربي جان هسة اني بمكان بسعاد
بس جنت يم بيت خالتي بحكم كون جامعتي بلديوانية مناك اداوم
ومن صار لصار اني ماانام اليل
كلبي يمها
اني ربيتها
من اجت للدنية ماما تمرضت واني صرت مسؤلة عنها
لبيت من يوم طلعت مالي واهس اطبة
صرت حتة بلعطل مااجي لاهلي
تمرضت عليها وتعبت
يكلولي مرتاحة اجذبهم
اختي بزر دلال
وين بيها على هلعيشة
دموعها نزلن
صوت كشمش يطمنها ويهديها
ياااع تبجين عليها
خية ابجي على روحج غير مدللة بجال صميدع
فعلا مدللة صميدع يحبها وكشمش صايرتلها ام ابد متخلي احد يأذيها
تتصدى عنها كلشي
تعاين الها وتبجي
راح تبقين غصة ومرار
راح ابقة الوم بروحي لأن لوجنت موجودة ماجان صرتي انتي لضحية
اقلها اني جبيرة فاهمة لدنية
انتي شسفتي منها حتة تنقتلين تحت مسمى لزواج
عيوني عليهن
تذكرت انغام وماما
تذكرت غضنفر من يكل لجدتة قطعو لاتصال بساع لأن يدفعون مبالغ جبيرة رشاوي للامن لمسؤل عن لمخيم علمود دقايق قليلة
دموعي تجري وياهن
اريدهم
ياربي صعبة بيوم وليلة اصفا وحيدة
لا ام لا اب لا اخت ولا حتة عشيرة
كلهم ضاعو كلهم
اني نتهيت
اااااخ
تغدت لبنية هية وخالها وبقو للعصر
قريب لمغرب اعدو لعدة للرحيل
طلعت لبنية من لغرفة بيدها جنطتها تريد تسلم وتطلع
صوت وراها يصرخ بشكل مفزععععع....يتبع
مساء لخير اعتذر اذا اكو اغلاط بلبارت مالحكت اراجعة
تفاعلو لطفا
جماعة لفيس تصويت وتعليقات لطفا
ركزو بلخاطرة وهذا لتصميم بيهن غش 😁
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!