#خنجر_لغضنفر
#حنين_حاتم
#البارت_الثالث_٣
نزل خنجرة واشر علية
هاي لمرة مرهونتلي
تضل هنا للموت
لا تشوف اهلها ولاتوصلهم
لاتتزوج ولا تنخطب ولا الها اي حقووووووق
واذا اسمع جنس بنيادم مواطنها لو حاط عينة عليها لو ناوي ولو نية يتقدملها خطوة
اذبحهم بأراضيييييييهم
وكفت على حيلي داخلي ينتفض
ليش
لييييش
انت موكلت دلينة مكانها وتطلعين لأهلج غانمة
كلت لو لااااء
مو هذا وعدك
مو هاي دكَة صدركم لبابا
عافني براكين وطلع
للمطبخ لحكتة وكشمش لازمة ايدي وتحط ايدها على حلكي تسكت بية
دفعتها ولحكتة اصرررخ
اني انسان روح خلقني ربي حتة تالي تجي انت تحدد مصيري وتحكم على سنين تعبي وتعب بابا
ليش انت منووووو
على يامال هيج تتحكم بية
اني ماانتمي الكم مالكم حكم علية
لو ستضعفتوني لأن لوحدي
طلع ماهمة صراخي
صوت جدهم جوة يصيح جيبوها الي
هديت كشمش وركضت علي
بلكاع كعدت واصرخ
بابا موراد يبوس ايدك وهوة يتوسلك توصلنا سالمين
انت موعدت بابا
انت موشيخ وينة وعدك حاجينييي
تقرب الي ايدة على راسي وكال
وعدنة الج نندل مجانها وتطلعين سالمة
بس احنة ماندليناها ولا وصلنة الها
وجتفونا بفصل ومرة
نار لغضنفر ماسكنت
ثنين طعننة امة واختة
يابوية خل يهدأ ومحلولة ان شاء الله احنة مانضلم بس انتي تعديتي حدودج ويانة
ورغم هذا انة وياج موضدج
بس خل تعدي مدة بعدة صوابة حار لتلومي جان يعزها حييل
الي يمسج يمسني يعزيزة ابوج
بس هونج علينا صوابنا موهين
عافني وطلع
صرت اصرخ ورا
جدو لتطلع طلعني مناااا
جدو اني امانة بابا يمك
دموعي تجري اريد اطلع منا ياربي تعبببت
مااكدر اعيش هنا مااكدر صععععبة
صوتها وراي
سكتنها هاي لنَمرة لا اكوم ارفس ببطنها روسنا ثايلة
نداريت عليها بحركة
شنو ترفسين ببطني اني شنو حيوانة ماابقة هنا لو تذبحوني اطلع يعني اطلللع
تقربت الي بنت وحدة من ولدهم اسمها حدهن نترت بية
خايبة دبس فكري تشردين والله لأكتلج بيدي واسلمج للغضنفر خاف قصر ذيج لمرة وياج ماحد خنجرة
امها ماجابتها لتمد ايدها علية والله اكسر ايدها واعلكَها بركَبتها ركضت على باب لشارع اريد اطلع
للحوش لحكَتني هية وحفيداتها اربعة متزوجات ولد عمومهن وعايشات وياهم
جلبن بية وسحل ليجوة طببني واني اصرخ
هدوووني
ليوم اشتكي عليكم
شنو ماكو شرطة ماكو قانون على اي اساس ينحكم علية بلسجن هنا
يم اذاني همست حدهن
ههههههه تسأل علقانون بت لمعدوم اذا يتطبق لقانون عليج انتي بعداد لموتى هسة
اموت بلسجون ولا اموت هنا يمكم
هدننننننننني
سحللني للمطبخ تناوشتني من ايدهن وحيل على ضهري صفكَتني وصاحت هيدي لا اكسر عضامج طلعتي حسنا للوادم
ولتمن علية هية وياهن ضرب ورفس اصرخ محد يجيني
اشوف من بين رجليهن كشمش اجت تركض توخر بيهن
نترت بيها نعناعة
تميلين لا احطنج فوكها هلنَمرة
لو تردين احجي لجدج على سوالفج لغبر
انسحبت وبتعدت عني بعيون دامعة تفرك بديها
بقيت جواهن يضربن بية مثل لحيوان كل وحدة اخذت حيفها مني
من يوم طبيت لبيتهم وهنة يتحلفن بية وهسة نطوهن لضوء لأخضر
احس ادين ناعة تتلمسني وتبعد بيهن عني
وحدة منهن جانت صاعدة على ضهري ومثبتتني بلكاع ولباقيات يضربن
اسمع صوتها تصرخ عوفوها خطية راح تموت
وراها وخرن عني وصار مراكض
كوة رفعت راسي من لكاع واشوف بسعاد لفصلية تركض شاردة وهنة وراها
طلعن كلهن يريدن يلحكَن بيها
لركض لجانت تركضة مومال بنية عادية
جانت رافعة لدشداشة لركباتها وتركض بكل حيلها
وتصرخ مفزوعة وخايفة
تجاوزت لحديقة وطلعت برة
عافنها ورجعن يركضن علتلفون
خابرو عليهم للديوان وكلولهم لفصلية شردت
ماعرف شنو جاوبهن بس بقن يتلاطمن ويتباجن بلمطبخ وكل وحدة تصيح اني معلية
كومني كشمشة وزوري
رادن يصعدني فوك
اشرت الهن نعناعة
وين وين ان شاء الله
كشمشة: فوك يدة غير بحجرتها
لاموحجرتها
حجرتها لمن جانت خطار
هسة بحجرة لخدم تكعد نكَلن جوالاتها وخركَها للحجرة لجوة لدرج لويلاد ضالين بلديوان ينامون من براها
زوري:- جدة جا خليها يمنة تنام بحجرتنا
ماحجت شي
اخذني للغرفة
كعدن يحجن علية ويلومن
كشمشة:- ليش هيج ينعيمة خليتيهن يطكَنج
خية جنتي معززة مكرمة مايمسنج
هسة كلها تكَوم تكفخ بيج مثلي ماطول جدة نعناعة ضربتج جدامهن
بعد حتة لخدم مايحترمنج
ماريد احد يحترمني اريد اطلع منا وبس
ساعديني كشمش مالي غيرج فدوة
خية شساعدج صكَد جذب خاف انتي حكمو عليج تنرهنين هنا انة يذبحوني بمجاني وشارة جدج
شوية وسمعنة صوت صياحهم
طلعن لبنات واني من ورة لباب اعاين
شفت صميدع طب وشايل بسعاد بيدة ورا غضنفر طب وصررخ
وينججججن
صكَد متعاونات على نعيمة وطاكَاتها
كلها ساكتة ويعاينن على نعنانة
صاح على كشمشة
كامت تلطم على وجها
صخام لصخم كشمشة وموت لكرفها وفكها منكم بكلشي لازم يحطوني
تقربت الة مدنكَة
امر خوية
لحجي لكَلتة صكَد
ممما ماا ماادري
احجيييي الج لأمان محد يمسج
اي اي اييييي خوية صكَد صكَد
تقرب لنعناعة وصاح
شعيط ومعيط وجرار لخيط
وينهن جلابج
ولك احشم
جدي يدري بسوايتجن
تدرن بي مايرضة
لبت رهنتها يعني انة لمسؤل لوحيد عنها محد الة حكَ يمد ايدة عليها
تغلط تشكولي وانة احاسبها
سمعتتن ؟
اي اي
عافها ومشة
عيني على صميدع شايل بسعاد رجليها متربة ومشككة وكلها شوك ودشداشتها مفتوكة
بقة يلوم ويحجي عليهن ويكَللهن هاي بت بغداد مامعلمة علينا لاعبات فلك بنعيمة جدامها لبت متسودنا لكَيناها تتراجف ومصخنة وتذب من راسها
اعاين علي جان خايف عليها طببها للغرفة وبقة يمها
بسعاد سمرة ورفيعة بس ملامحها حلوة هندية
ولفهمتا من كشمش صميدع يحب لسمر ومن شايفها كَبل كَايللهم انة اخذها
بقيت ابجي واليل كلة اتألم من كل مكان بجسمي
ماطلعت من لغرفة لحد ثاني يوم وزوري تخدم بية
نايمة ولبنات يمي وندكت لباب
فزت زوري حطت شيلتها على راسها وفتحتة
وخرت من لباب ودخلت وياها بسعاد تبجي
عافتهن يسألن بيها وتقربت الية
حطت راسها بحضني وتكَلي
اني انهزم وياج حبابة
كشمش تضحك وتكللها
عيارة ياهو ليمج اشو صميدع متسودن عليج وطاير بيج جنة فرخ
سكتي غير هسة ضربني
ليش
كالي حطيلي عشة
كَتلة مابية حيل
كَالي تكَومين لا اربطج بلجرباية ومحد يخلصج مني اهد حيلج وحكَ علي ومدري شيسوي بوجها حركات
كَتلة حتة اضربك والله لتشوفني ناعمة ترة اني عدائة ولاعبة
كال شنهووو تمدين ايدج علية غير انعل طاهرج
كتلة طخوب اني انعل طاهرك
ضربني راشدي وكَالي
هية هاي لأصول يلمتعلمة هيج علموج بلمدرسة تغلطين على ابو بيتج
طلعي من لحجرة ماريد اشوفن وجهج
كشمش :- عززززة بعينج غير لو حاجية هيج وي فدعم لو غضنفر جا كسروج
بس هذا صميدع حنين وطيب
ياحنين غير شوه وجهي
انعام :- ايدي على خدها واحجي وياها
بسعاد سمعيني انتي صرتي زوجتة ولولد شاهد الله ماشفت منة غير كل اخلاق وحمية من طبيت لهلبيت لحد هسة
ولضاهر يحبج من موقف ليوم
كسبي الج سند بوسط هلعالم
شيكلج كليلة ان شاء الله عناد لتعاندين ماطولة ممأذيج طاوعي
إلة اذا اللهم طلب منج شي متكدرين علي ذيج لساعة رفضي بس بأدب وفهمي لسبب
اني ماريدة ضايجة منة عوفيني هنا يمج
ماشي رتاحي وبعدين رجعي لغرفتج
بقت اليل كلة تسولف على اهلها
لفهمتة هية بت عم لولد الي عقد على كويكة
وراجعة من لمدرسة واهلها من خوفهم من لغضنفر ولناس لرايحة ويا دازيها بهدومها بس حتة يخلصون من لمشاكل
بقت تبجي على مدرستها
غفت يمنا
متمددة افكر بحالي واشوف رجلين جوة لباب تخطف كلسا تروح وترجع
فتحت لباب علكيف
شفت صميدع
جان كاعد علدرج ومبين علي مغثوث
من شاف لباب نفتحت كام بساع طب للغرفة وسدها
كعدتها كلتلها روحي يمة خطية يستحي يدك لباب
ماقبلت وبقت مجلبة بلمخدة
لفجر كعدنا على دكَة لباب
عاينت جانت لساعة توها بل٥ لفجر
كامن لبنات بساع لبسن شيلاتهن وبدون تغسول وجه ركضن
شوية ورجعن علية وكالن
نعناعة تكَول تعاي ويانة
وين
نحوش وي الطواشات
لييش
خية كومي فدوة اغديلج هناك افهمج
صح تعبانة بس كمت من باب لفضول وكفن لبنات بلمطبخ ولفن عبيهن على خاصرتهن
يلبسنها على راسهن اول شي ونوب يشدن لردانات ببعضها على بطنهن ونوب يذبنها من راسهن تبقة مجلبة بخصرهن تستر لجزء لسفلي من لجسم
ولجزء لعلوي يسترنا بلشيلة وثوبهن ابو الزخمة يصير فضفاض
سونلي مثلهن جنت متونسة على سوالفهم وهنة ضايجات ويمشن ويحجن
كشمش:- اخ اااخ يمتة اعرس واخلص من الحوش
انعام:- ليش الي تعرس بعد متحوش
اي خية لتعرس هنا اول جم شهر عروس مدللة ماتطلع تحوش
وراها تحبل بعد ماترهم تشتغل ونوب تخلف وتلتهي بلخلفة
يعفوها من لشغل
شكد عمرج كشمش
مادري خية بس اضن لعام سألت قيصر كالي ١٧
وشعجب ممزوجة موتكولين ثاني غسلة تستحق عرس
عرسوني على ابن عمي اسماعيل وبعدني عروس الي ٤ اشهر طاح علي حايط جوارينا وموتة
وعافني للحجي ولملامة كلها تصير فكَر جسحت لزلمة
شنو هلكلام هذا يومة
اي يخية ضليت هلضلة وبعد محد خطبني كلها تخاف يكولون فكَر وجسحت رجلها وطلعن علي هلحجي لمايخافن الله
انتي وردة كشمش معليج بيهن هنيالة الي تصيرين من نصيبة
الله يجبر بخاطرج ااااخ شحلوج وشحلو مناطيكَج
وكَفنة جانن ٥ من بنات عمهم واكَفات
و ٣ نسوان طواشات محزمات بعبيهن ولافات وجوههن بلشيلة
لعد موذني نسوان يشتغلن بعد شكو يطلعوجن وياهن
خية مانعوف حلالنا بيد لغرب لازم فوك راسهن شمدرينا شغلهن شني
وهم مايكدرن وحدهن لكيعان عينج وماتشوف ولفلح عايفيلهم لشغل لصعب حرث وسكَي
هاي شغلتنا سهلة
اعاين الهن هنة يتشلبن علنخلة يكصن عثك لتمر وبكَونية يحطنا ويشمرنا النة
نبقة احنة جوة بتوجيهات من كشمشة
نعزل لمستوي زايد عن لنص ونص عن لخلال بسلال خوص كبار ولباقيات يعزلنو الي يبيعو عن الي يجبسو وعن الي ياخذو للبيت للأكل
كملنة من جهة وكَامن حطن كل وحدة سلة على راسها يودنهن على كتر ويكملن
كَمت اني وياهن اول ماصعدن لسلة على راسي حسيت كأن شايلة لبستان كلة على راسي
فتر راسي بس مشيت خطوتين ختل توازني وطاحت لسلة مني وطحت وهنة يضحكن علية
من بعيد شفناهم يطلعون لأشغالهم
تقرب لغضنفر بتجاهنا كَمت الم لتمر بساع بساع خايفة منة وهنة بعدهن كل وحدة لازمتلها نخلة منتجية عليها وتضحك علية
تقرب صبح عليهن
ودنك يلم بلتمر وكاللهن
وطحيل لينام بضلوعجن سفيهات إعليمن إتمضحكن ماتلمن نعمة الله
تقربت كشمش بعدها مختنكا وكالت الة
انت ماشفتها من طاحت
لا شفتها .وضحك
باوعت علي اجيت احجي تنهدت وستغفرت
يعاين على ادية من الم بلتمر واسمعة يكل لكشمش
هوة حضي يذب علية وين لفاهية
انة اختك يغضنفر هاي موفاهية هاي مايعة من حلاتها
جا شمالج ويهج جنة طاسة عمالة
غمها وراح
ضليت اضحك عليها
تقربت الي وصارت تلم تمر بشليلها وتحطة بلسلة وتكَلي هذا لختم لازم يومية اخذة منة
يختمني بكَصتي صبح ومسا
ضحكنة وهية لفطيرة تضحك ويانا
ل٩ يلله كملن
مشينة ننكت بروحنا من لتعب
صح كشمش وزوري ماخلني اشتغل هواي وشالن عني بس هم هلكت
وكفنا بلحديقة نغسل وننكت ملابسنا
دخل قيصر مستعجل يركض
صدت عينة علية ضحك وكَال
من عاشر لقوم ...
اشر بيدة وطب جوة
دخلنة ليجوة
جانن بلمطبخ يطبخن
جان عدهم طباخين وكل تلاثة واكفات على طباخ
دخلنة ليجوة كشمش كالت راح اسوي ريوك
بنات عمها لزمن سرة علحمام
شفتها بيبي شكرية كاعدة بلصالة تقربت يمها
صباح لخير
صبحج الله بلنور هلا بنعيمة
يممة نور محمد بوَّشج
طني احبنج
باستني حيل
وتطبطب الي على فراشها حتة اكعد يمها
ندارت علية وكالت
متعوبة من لطوش ها ؟
شوية
امس من طكَنج انة كَلبي يفرفر عليج بس ماعندي حيل يعيني شوفة عينج
لبارحة تخربطيت
تأشر الي على بطنها المنفوخة عبالك حامل
قالوني هاج علي كوة اجر نفسي
بس انتي منا ورايح من يطكَنج احتمي بلغضنفر
لو اموت
عليش
لأن اذا حتميت بي معناها اكون راضية عن قانون حاميها حراميها
سكتي خايبة شلون انة بلسانج ليرادلة حش
يمة لغضنفر طيب سمعي مني مالج غرض بيهن
ذن حقودات وغليات
لغضنفر طيب وشهم بس مايسكت عن حكَة وجدة الله يسلمة طبع براسة سوالف لديوان من زغرة
لأن ابو الله يرحمة جان عزيز جدج وجان يكَول هذا ليشيل اسمي من اموت
جان سبع ودمة حامي بس مومثل لغضنفر لاء
لغضنفر دمرة لحقد وكرها للنسوان بسبب امة
ليش شسوت امة
شردت وي صاحب رجلها ورجلها بعدة ترابة اخضر
وشسولها
خلو لغضنفر يكتلها عمت عيني علي وتخبل لفرخ
لطمت صدري شنوووووو
كتل امة كتلها لضالم لعاق
ايدها على حلكَي تسكت بية
خايبة نخرسي خرسج لبين كون
لاكال لمثل علج المخبل ترس حلكَة
شنو قصدج
سمعيني يمة
حجاية لبيها مضرة الج بلعيها وسكتي
صبري وصيري زينة عسا الله يحنن كلبة عليج وياخذج
منوة
غضنفر
تخبلت غييير
شبية اخذة هلمخبل ابو منجل جنة ثور هايج
نخمدي خايبة نخمدي وولي من وجهي
لا بيبي حبابة سولفيلي نصحيني احب حجيك
لا جدة شكَينا لدف وبطلنا لمغاني
كومي مني لا اكسرج بهلعوجية مايفيد وياج حجي اذن طين واذن عجين
كمت من يمها اضحك على حجاياتها
صديت علمطبخ جانت بابة مفتوحة وبرة لبنات واكفات على تنانير لطين يخبزن
وناس بلكاع تدولج وتشنكَ
تقربت الهن
اشرتلي كشمشة رحت يمهن
كاعدات على صينية يددولجن تنترس يخبزنها لواكفات علتنور ونوب يرجعن يترسنها الهن
هاي شنو شكد تخبزون
صلي على محمد خية جاماتشوفينة عيال
ميخالف بس هواي هذا لخبز
خية هذا نصة تاكلة لفروخ وهمة يلعبون
دهاج شوفي
فلك طرك كفخت ابن حدهن لمد ايدة همش ٣ خبزات وركض
اعاين علي وجهة املح من اللعب وخشمة وصخ يمسحة بطرف ردانة وبجامتة طافرة علي وراسة احمر بي حنة
اعاين على حدهن سمرة حمرة وجها يابس متعوب رغم مبينة بت لعشرين
عدها ٥ اطفال نفس لكَصة
نداريت على بسعاد تكرص بشنك لعجين وتاكل وكشمش تكفخ بيها
خايبة شمالج شني فرخة كليتي لعجينات
اووي عوفيني اكل والله طيب
تبسج بسج لايصير بيج دود مثل لفروخ
شو نطيني خل اضوك وياج عود شنو طعمة
همشت جزء من لشنكة واضوك بي
ياشو طيب ولج نطيني بعد
كشمشة :- امدة حضي كل وحدة ابرد من طيز لسقا خاب بمجان ماتعينني دباعن قسمة كضن صينيتها لثانية
كملن لخبز وجابن سمج دخلنة بلتنور
بقن يشون ولريحة تشهي
ستغليت لفرصة وطبيت جوة ادور على تلفون
بلصالة جان اكو واحد
اخذتة لجوة لدرج ودكيت لرقم الي اتصلتة علية ماما من عندة
دكيت هواي ماحصلتهم
رجعت دكيت رقم محمد
جاوبني سلمت علي وسأل عن حالي
حجيتلة بأختصار لصار وياي
بقة محتار شلون يساعدني
اخر شي كالي
اشردج نفس ماشردت بتهم كويكة مدري شسمها ادزلج واحد من ربعي من يمكم واوكفيلة بنفس لمكان وهوة يجيبج لبغداد ومناك نشوفلج حل
اخاف محمد فلحهم بليل مخليهم يحرسون من يوم شردت
تأزم لوضع مو نفس قبل بسهولة شردوني قيصر وكشمشة
ميخالف حاولي وباي وقت تكدرين تسوين هلشي نطيني خبر
ماشي
سديتة وبقيت اتلفت اخاف احد سامعني
رحت يمهن
واكفات بلمطبخ يحضرن للغدة
بلكاع حدهن حاطة كدر وتخوط بي لبن
ماعرف شلون من لتفتت طرف ثوبي دخل بلكدر بدون ماانتبه
صرخت
هي هي وعمة حتة عمة
طرف ثوبج لخايس دخل بللبن
ماادري لعفو ممنتبها
لعفو للمساجين
كَالت لكلمة وتخازر بية
مدري شصار بية فرررت
شالت لكدر وشمرتة برة هوة ولبي
لحكَتها
شتقصدين
مااقصد هوة لبعبة معزة يمعمع
احترمي نفسج اني لايمج ولا بكَرباج شنو تعيريني بحبسي
خايبة تميلي مني لا اكضج ازوهرج لعافية نوب علينة بت لمعدوم
احترمي نفسج ياقليلة لأدب وسيرة بابا لتجيبيها على لسانج
خاب شوفن ياهي لتعلمني لتربية خريجة لسجون
بشريني لضابط و لشريطي مالة شبعو بيج يو لالة
هنا نهاريت وفقدت ونسيت تربيتي واخلاقي ونزلت لأدنى مستوى ونمت فوكَها ومن راسها كفشتها
لموجودات حاولن يفاككنة بلأول ويوخرني عنها
بس من شافني اذيتها بخبالي وعصبيتي
همن علية سحلني منها تكفخ وسحل من شعري
كمت اصرخ
من ثكَلهن وقوة اديهن احس روحي تطلع نتهيت
اسمع صراخ
هاي شنييي
وخرن عنها وخررررررن
صطفن وحدة يم لثانية
عاينت جان جدو ابو خليل
تقرب الي سحبني بيدة وكومني
شبيجن وي لبت
ردت علي حدهن تتمسكن
عمي ماشفتها ملخت هدومي وكطعت شعري هاك شوف
ولبنيات يشهدن إتغلط علي
هاي لطويرة تملخج يحدهن
خايبة اشوف بعيني وماصدكَ
يعني انة اجذب جدي
سكتها وبصياح كَال لماتعرفنة كلجن هاي لبت ضيييفة هنا ولحكم لكَالة غضنفر مومعنا تطكَنها وتعاملنها حالها من حال لخدم
ضيفة وانة مطاوع لغضنفر بس بين مايبرة صوابة ووراها اوديها بيدي لأهلها
كَومي بوية ومالج غرض بيهن واي واحد ياذيج تكَليلي
بين مالله يهدي هلمسودن ونعقدلة عليج
جدو شدتحجي انت موكلت ارجعج بيدي لأهلج مو هستوك تكَول
اي يابت ابوج اذا عنند لغضنفر وزومل انة شبيدي معناها يااكتلج يااكتلة يلله احلها
جدو دخيلك لو تكتلوني لو تزوجوني للغضنفر بلحالتين هلشي موتي
محلولة يبت ابوج محلولة لتفكرين بشي انتي ضيفة مدة وكت ونحلها
عافني وطلع مستعجل للديوان
كمت على حيلي كشمش وزوري اجني يركضن
كشمش تخاف منهن مدري بشنو يهددن بيها
وزوري جبانة وازغر وحدة بلبيت تخاف من لكل
طببني للغرفة كشمشة جانت مخنوكة وموعلى بعضها دمعتها بعينها وتتصفن حتة مااكلت
لزمت ايدها كشمشة لتضوجين علية اني اطلع منا اطلع وهاي لضوضاء لجاي تصير تخدمني بلكي يجزعون مني ويودوني لأهلي
ضحكت بستهزاء وردت
كشمش:- يجزعون منج ويودوج؟؟
بطرانة خية هنا لرجال ماتجزعة مرة عدهم هواي حلول ابسطها لحبس مثل ماحبسو كويكة
شبيج انتي
لبية ماينحجي خليني طبكَ مسدود وممشية إعليج شارة جدج كفي عن لمشاكل وهيدي
عافتني تريد تطلع
جريت ايدها
كشمش سولفيلي شبيج اني اساعدج
خية شتساعدين انتي وذاك ابو طويلة ورطتوني والله لعالم لغضنفر شراح يسوي بية
لييش شكو ياستار
لغضنفر داري بية انة مشردتج ومساع من شافني كالي
عفية يبت عمنة تشجعين بيهن يعصن ويطلعن عن طوعنا انتي وذاك
سألتا شكو شصاير
رد علية
من وديتيها بيدج وشردتيها ماكلتي عيب على اهلي وتنحسب شينة على ديوانهم
مافكرتي بهيبة لبيت لعايشة بي وبصيت جدج وولاد عمامج
ضليت ابجي مااعرف شجاوبة
ترة هوة من زمان يدري بيج انتي وقيصر شردتوني وشكم مرة يتهدد بيكم
اي خية جان شاك بس هسة احسنة متوكد يحجيلي تيفاصيل
لعد لاتطلعين اخاف يضربج ابقي هنا
لو اكلج خل اشردج
تعاي ننهزم اني وياج وبسعاد ونخلص منهم
خية جنج تعلمتي علشردة صارت حلوة عدج
شمالني اشرد واطمس روس اهلي بلعار ماكافي عار مرة عمي وكويكة
لعد شلون خاف يضربج وياذيج
شفايتلي يضربني
لغضنفر مايضرب حرمة ابد
يصوب بلمنجل لويحبس ويحرمنة شم لهوة
لعد شجابركم ليش ساكتات هذا رضوخجن هوة الي يخليهم يستقوون عليجن
اهووو ردينا لحجي لمدارس
خية سكتي مني انة دولباني لضيم وانتي اجيتيني تجمالة
جابت غدة للغرفة واجت
كعدنة ناكل اني وياها وبسعاد وزوري
اسمع حدهن برة تحجي علية وتشيش بيهم
حدهن:- هاي لبت شني تضل بيننا وتفتر جدام ولدنة وهية غريبة
ماترهم عمي شوفولكم صرفة
خل غضنفر يتزوجها
ركضت زوري وكفت ورة لباب تتسمع وتتبسم
ويرد عليها جدو ابو خليل
لبت ضيفتنا عيب هذا لحجي
اسمع لغضنفر ينتر بيها
انة كايل هاي رهينتي وحالف الي يحط عينا عليها لو يدنالها ادفنها هية ويا
وواثق من ولدنا واعرفهم شني
بس انتي اذا ماواثقة من روحج عاد هاي سالفة ثانية
حدهن:- لشيطان شاطر غضنفر وهاي لبت مامعروف اصلها من فصلها شمدرينا شتسوي ماتسوي ببيتنا مثل ماشردت كويكة كلشي يطلع منها
جاوبتها جدتهم شكرية
لمايمد شليلة محد يعبيلة
لبت منين تعرف خالة اكويكة لو ما هية تدليها وتكللها
ماعرف شصار بس
نسمعهم يتحاجون وجدو ابو خليل يصيح عليهن
ها هسة رتاحيتن هلكَام لولد زوهرتنة مايعاول يناساها وينسة شينتها تنبشن نبش وتذكرن بي
لحكَة فرهود ابن عمهم جليل يحجي علي ويكلة تعال كمل غداك
كشمشة ماتحملت فتحت لباب على كيف وسحلتنة صرنة اربعتنة كل وحدة راسها فوك لثانية ونعاين
فرهود يصير رجل حدهن
صاحت علي مغتاضة لأن طلع يراضي غضنفر وهية تكره غضنفر ودوم يسولفن عليها لبنات يكولن رجلها يكتلها ويشكي منها تكلة انت ماتعرف تاخذ حكَك ولا حاط لروحك مكانة لغضنفر ماخذ مكانك يم جدة وانت مالك كل مكان حالك حال لزعاطيط
ويكتلها وتوكف بوجها قوية وترادد جلدها متدبغ بلكتل وهنا عدهم عادي لحما ولعم يضرب لجنة
فماضال واحد بلبيت ماكاتلها
من سمعتة يراضي بغضنفرر وركض ورا يتوسل بي حتة يجي ياكل
نترت بصوت عالي
كل هذا علمود بت لمعدوم
احس حيلي طاح من هلكلمة لصارت طابع الية
ندارن لبنات علية يهدن بية
مانسمع غير لصياح
مدينة روسنة خلسة ونشوف حدهن ناكعة من فوك ليجوة بللبن وغضنفر بيدة دولكة ويهامش عليها
ويصرخ على رجلها
ربيها تدري بية لو مديت ايدي مامدها خالية ينتر ويصيح
وبلكاع قيصر بعدة ياكل مامهتم ويفلس بلسمج براحة ايدة ومنفصل عنهم رغم كلهم واكفين على حيلهم ويحجزون بي عنها ويهدو
رفع راسة وعاين الة بستهزاء
اي لتمدها خالية بس دير بالك رمانتين بفرد ايد ماتنلزم
غضنفر بنتر كال وهوة يهز ايدة
كَضة لعرس وإجت لرعنة تهلهل
شتقصد ولللك
بصوت ناصي يكلة لزمال دافنينة سوة
إتوكل
طلع من لأستقبال
واحنة ورة لباب كشمش داست على رجل بسعاد وهاي لفاهية تكومت بلكاع وكل احنة فوكها
نفتحت لباب وطحنة بلكَاع
اعاين علي صد علينة وبطرف شفافة بتسامة ماكدر يخفيها
هز ايدة ومشة اسمعة يكول
صادوك وانت لنجر يغراب
والله غراب ماغيرك
على ضهري ضربتني كشمشة عابج هاي فوك مايدافعلج
شنو لفايدة يدافعلي وهوة لحابسني ومخلي ليسوة ولميسوة يتشاطر علية
اصبري خية الله يهدي ان شاء الله ويعقد عليح وتنفك لجبسة ونخلص
شنووو تنفك لجبسة براسي
ادري شبية تخبلت واخذ هذا لطباكَات
اني كلتها وهاي لحجاية توصلة وتتعدا اني هنا ماابقة اطلع يعني اطلع لو يبقة اخر يوم بعمري
اعاين الة بيدة كلاص لماي ضربة علميز وكال
هم بي بلة ورد لباجلة خلة وطلع
بقيت انافخ مخنوكة
عصرية لبيت يروش بلجهال وكلهن لاهيات صديت على غرفتة جانت مسدودة
كبالي بيبي شكرية
تسبح وعينها للتلفزيون
جريت لتلفون وختلت جوة لدرج
بقيت ادك ادك كوة تحصلو
رد علية شخص يبين شاب
سلمت بأدب وعرفت عن نفسي وطلبت احجي وية امي
هاي هيج خالة عدها بنية معدلة
شكرا ممكن تنطي لتلفون لماما
خالة ماهية طالعة بس انتي ليش باقية هناك ليش مااجيتي وياها شنو مانعجب
لا موهيج بس صارت ضروف وتعرقلت اجي ان شاء الله
اي يوم لمنا نشوفج
شفتج بلصور وانة اكول ليش خالة ضامتج عنة
اتاري لوجنات تفاح ولشفة فستقة
منين جابوك يمشمش كربلاء
اسمع صوت صراخ ويانا بلتلفون
ايا ناااقص غييييييررررة
سدي سديييي لا اجي اكسرة براسججججججج
اتلفت مثل لمخبلة
منين يجي لصوت يربييي
سديتة ومشيت للغرفة
طبيت وسديت لباب
ورجعت علي قفلتة مرتين
اسمع صوت بغرفتة حايط على حايط.وية غرفة لبنات
يخابر ومدري شيحجي يصيح
من بين صياحة سمعت
تعبببت ياخوية تعبببت صورتهن ببالي وحجاية لزلم سد حلكَة بفصلية وجم فلس
وهاي لتلعب على شيب لخلفوني دودهتني على ساعة انحرها وانحر روحي واخلص
بقيت ابجي وخايفة
طبت يمي كشمشة
جانت تبجي وتمسح بخشمها بشيلتها
سألتها كشمش شبيج
شبت بيج عوفيني عوفينيييي
لفت راسها وتغطت
عفتها
شوية ودخلت بسعاد شاركة لحلك كالت
صالحني
ها اكول فرحانة شلون صالحج
جنت واكفة يم لمغسلة
وكف يمي وكالي
اذا كل كَمر اسمر وبخدة شامة عمي تدوده لوادم ومايضل براسها عقل
مدت راسها كشمش وكالت
اي عمي عالم تصبح وتمسي علتغزل
وعالم تكوم وتكعد بكفخات الك بيها ارادة يبو خيمة لزركة
طلعت برة كالت جاي يشون معلاك وياكلون خل اجيبلج لفة بسكوت واجي
شوية وسمعت صوت حدهن ولعيبية ( مصغر لعابة هوة اسم يطلق على شديدة الجمال )
يصيحن على بسعاد
مديت راسي انقهر عليها
اشوف لعيبية لازمتها من ملابسها وتكللها
يلخماطة ماتستحين على وجهج خامطة لشيش بكَفاج
طلعت اتلفت شفتةماكو رحت عليهن
من شافتني عقجت وجهها وبسرها كالت
لفتنا بت لمعدوم ماخذاها لبين وي ابوها وخلصنا
عبالها ماسمعتها
نترت بيها
حدهن شيليني من راسج اني هنا خطار وماباقية ومالي شغل بواحد منكم ولتخافين ولدكم بشينهم وزينهم موبعيني ولا ببالي
يا يلوكَ لأم لشلوكَ موبعينها خاب همة شبيهم عميان خاطر يعاينولج ايسي
حدهن ولتالي وياج فهميني يابت لحلال مالج شغل بية كفيني شرج وبسعاد اني دزيتها تجيبلي اكل لأن مالي خلك بطني تأذيني
بطنج توجعج ليش انتي هم تجيج مثل لنسوان يلمعنسة
حدهن كاااافي كافي ترة دتدوسين بمصاريني واني اسكت لخاطر جدوو
لا هم عوزج تحجين
اخذي هاي فرخ لدوج وراوينا مكَفاج يلله
جريت بسعاد ومشيت استغفر وداخلي يغلي
لمسكتني كثرتهن وغربتي
طبينة للغرفة
بسعاد فرحانة تكلي
حدهن تكول علية فرخ لدوج يعني اني كتكوت هههة اوي فدوة رحتلي
تكرص بخدودها وتضحك
تقربت يمي بصوت ناصي تسألني شبيها كشمشة
تخاف منها
سكتي هسة رادت تاكلني عوفيها
بقت بلة عشة
بسعاد شوية وراحت
كشمشة غفت وكامت تشخر
بقيت مخنوكة وضايجة
لبست حجابي وعلى كيفي طلعت اريد اخذ من قيصر كتاب
كلت ادز واحد من لجهال
كلهم بلغرف
صعدت على كيفي جانت لساعة قريب ل١١
دكيت لباب وتكترت
اكثر من مرة دكيتها محد فتحها الي
واني ادك بيها ندفعت ونفتحت لوحدها
ماعرف شصارلي من شفت تفاصيل لغرفة
تذكرت ماما وانغام
تذكرت من جنة ننام سوة
دموعي تجري
ختنكت حييل
دنكت على كتاب بلكاع هدا الية صديق بابا وجان ضايع من جابن اغراضي وملابسي لبنات
شلتة
ركزت على لجرباية اكو كأن شخص نايم بس موهيئتة قيصر طويل
وخرت لغطا جانن مجموعة مخاد صافهن ومغطيهن
طلعت
برة جان اكو بلصالة مال لطابق لثاني شباك ضخم حيل من فوك ليجوة
وكفت يمة اعاين علبيت لكالن علي كشمشة ولبنات مسكون
شفت لأضوية تطفة وتعتلك بطريقة غريبة
مرة على كيف ومرة علسريع
ولجامة مدري شنو كدامها اسود يتحرك
لوهلة حسيت راح اوكع بلكاع
بساع ركضت سويت لدرج شبختين
واني انزل بدورة لدرج يصير بقية لشباك بلوجه
صار بوجهي لبيت مشيت بساع اريد اخلص من منضرة
غمضت عيوني
لثواني اذكر شفت شي
رجعت ركزت بخوف
شفت شخص يطلع من لبيت ملثم ولابس دشداشة مامبين منو ماواضح
واني صافنة وارجف من لخوف
صوت هامس من وراي
يصيح شتسوين هناااااا....يتبع
مساء لورد حبايب استميحكم عذرا لنشر راح.يكون بين يوم ويوم ولبارت ٤ الاف يعني ممقصرة وياكم
لان مشاغل لبيت وماريد استعجل بلقصة تتطلب تدقيق وتأني
صوتو ونطوني رئيكم حبايبي 😊
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!