#خنجر_الغضنفر
#الجزء_الثاني_بارت٦٣
#حنين_حاتم
بلقيس ...
ايام عدت قيصر لا يتصل ولا يرد على اتصالاتي اخابر صميدع يووومية حجة وميحجي لصح كأنما سر
اطلب احجي وية بسعاد يكلي طالع
شوكت مااخابرة طالع
وصلت مرحلة صرت اشك بي ميريدني ويحاول يتشرد مني
غير حجي امي وسوالفها
اكلها خلي نروح الهم بحجة نشوف بسعاد ونفهم شكو ونذبحها على قبلة وياهم اذا فعلا بطل يريدني وعلى كولتج شبع بية وعافني
متقبل وتكلي عيب وفشلة شنو نروحلهم وانتي مخطوبة
هوة ميريدج وواضحة مثل لشمس اخذج وتندم
طبعا يتندم شافج مفلفلة وذابة روحج جنج ماشايفة شوكت ماشفتج خانبة بي ليكدام نطيتي كل الي بنفسة خليتي يمل منج
بعد شكو يتزوجج مبقة شي متشوق الة علمود يتزوجج
كل الي بنفسة اخذة
عفاج من بنية متكولين اخلي شي ورا الزواج
الخطوبة لعالم تسوي بيها مقبلات صخام بعينج وعين امج انتي ماخليتي شي
يوم هاي شجاي تحجين
بلا هلحركات بلقيس يعني من يطفا ضوا لأستقبال شنو معناها
معناها نعسااااان
جاي من طريق ويريد يرتاح
وليش تضلين يمة اذا نايم
دنكت مااعرف شنو اجاوبها
جان من يغفا يحصرني بحضنة بين ادي وكلما اريد اكوم يبقة مجلب ويعتني
تتصور واصلين للمرحلة الي ببالها ومقتتعة والحجي وياها ميت
عفتها ورحت لغرفتي
عصرية نصير راد يطلع يلعب بقة يبجي ويلح
اخذتة وكتلة تعال نروح نشتري
طلعنة برا ستوني سديت لباب وراي شفتة
مشيت خطوتين حسيتة ورانا همست لنصير كتلة ندار وشوفة جاي يمشي ورانا
لتفت وبصوت عالي كال اي ماما هذا ورانا
تمنيت لكاع تنشك وتبلعني
طلعنا من لفرع وصرنة قريبيت علشارع لعام بس اعبرة تصير مجموعة محلات كبالي
واني امشي حسيت شخص قريب علية بطرف عيني شفتة
سرعت خطواتي
صوتة يهمس ام نصير ليش تنهزمين مااكلج حجايتين واكلج الله وياج
وكفت نداريت الة بنتر
من تمشي وراي واني مرة لمنطقة كلها متعرفني ولاتعرف اخلاقي
شنو معناها
ماكلت اجيبلها حجاية
لعد شنو لبيدي مبقة خط رجعة حضرتيني واهلج طردو اهلي
بلقيس امج كالت لأمي انتي نجبرتي على هاي الخطوبة لأن ابو نصير ماقابل علية عبن سامع احبج وتبادليني
اني بعدني اريدج وادري غصب عنج لصار
عوفي واني من عين باجر اعقد عليج و نصير اوكل احسن محامي ومااخلي ابو ياخذة منج
لحجي الي وصلك موصحيح اني مقتنعة بخطيبي رايدتة ولجاي تحجي عيب وحرام اني على ذمة رجال
واترجاك بعد لتفتح هذا لموضوع
وعيب تعترض طريقي لتخليني اوصلها لخالي وتصير مشكلة احنة جيران وبينا عشرة ووكفتك وية نصير ماانساها بس ماكو قسمة
مع السلامة
مشيت ونصير يلتف كلسا يكلي بعدة واكف بمكانة
جنت امشي بساع اخاف لايلحكنة وفكَري يجيب واحد من جهال رواء كبالي وتصير فضيحتي بفلس
طبيت للسوبرماركت شترينة وبقيت افتر مااريد اطلع اخاف الكا بعدة واكف
طلعت ورا مدة اتلفت جان رايح
رجعنة للبيت
وعدت مدة اخاف اطلع نصير برة من لجهال
جان عبوسي يدافعلة من يوم خربت لخطوبة وهوة مالة شغل بي اببد ينكتل كدامة يسوي نفسة ميشوفة
رغم جان يفتعل مشاكل علمودة
بس لضاهر اهلة مانعي
بعد اتصالات والحاح مني على صميدع فهمت غضنفر مخطوف وقيصر لاهي ويا كل هاي المدة وهوة مايريد يحجيلي عود ميريد يقلقني
ضليت الوم بي واحجي علي
وراها كوة كدت احصل قيصر وحجيت ويا
جان تعبان واضح من صوتة
كل الي حجا كلي تعبان واريدج تعذريني
جنت ابجي واني اهمسلة عاذرتك والله شلون ماعذرك
ورا يومين اتصلت بي بعد مااخذت رقمة الجديد من صميدع
حجيت ويا جان مهموم ماحجة شي بس سلم علية ووراها كالي بلقيس سامحيني اني مضطر ابتعد
هلمرة
يمكن صدك مامقسوم النة ننجمع
ويمكن صدك انتي مونصيبي ولاقسمتي
انة لو يبقة آخر يوم بعمري ماعوفج ولا راح اتخلة عندج وطلاكَ مااطلكَ
بس انتي لو مليتي وتعبج لأنتظار وردتي تعوفيني وتشوفين حياتج براحتج
هاي شجاي تحجي قيصر شبيك حلمان؟
بلقيس سمعيني زين وكت ماعندي لدقيقة تفرقلي حياتي وحياة اخوي وعائلتي بخطر
وللمرة المليون اعوفج والسبب عائلتي
للمرة المليون عائلتي تحدد مصيري غصب عني
شنو احجي بلقيس وبيش ابررلج موقفي
وانة ماكسرني شي بهلدنية بكَد عائلتي
يمكن همة مجرد سبب وهذا امر الله
انة راضي وقانع
انة جبت عمري راضي بحكم ربي شينة وزينة
سلبني ابوي وانة فرخ لحيمي
سلبني امي بفضيحة وانة ادريبها مظلومة وسنين ضيعت شبابي ادور حكَها
واخر لضاع مني انتي
كلما احصلج تضيعين
انة شمسوي بدنياتي بلقيس
ليش مقسوملي اركض ورا لفرح ويشرد مني
شمالها لدنية تحزمتلي بحزامين
هواي علية انام بحضنج
هواي علية تصيرين بستري وتتسمين مرتي
قيصر شصاير فدوة لعينك كلبي راح
مع السلامة بلقيس ديري بالج على نفسج وتانيني
اذا طلعت سالم وكدرت ائمن حياتهم واطمأن عليهم انة اسحبج يمي
واذا متت لاتنسيني
ديري بالج على روحج يراحتي
حتة من لوداع محروم
بلقيس مشتاقلج ورب محمد تعبان ادعيلي ارتاح
ولو انة محسب حسابي منا وغاد ماكو راحة
شلون يرتاح لعايف روحة وبلا موادع يهاجر
شلووون
دموعي غوشت عيوني الخنكة تارسة صدري وريتي كوة جنت انطق
قيصر فهمني لصاير فدوة لعينج
تعوفني مثل اطرش بلزفة وتسافر واني اتاني عرسنا
شحجي لأمي وبيش اقنعها
شحجي لخوالي وهمة كل فترا يردون يخابروك حتة تحدد لعرس
ليش تعوفني اخذني وياك فدوة لعينك يموتني الحجي
اموت والله تعبت واني ابرر
جبت عمري ابررلك وانت تعوفني بدون ماتكلف نفسك تشرحلي
ششرح بلقيس والله لثانية تفرقلي
على باب المستشفى واكفين وادم نيتهم كتل اخوي وانة اتلاطم مثل لنسوان ماادري شلون رح اطلعة
رحميني من لمعاتب بلقيس
ورب محمد تعباااااااان
لاتصيرين وية الدنيا علية تانيني واذا ماكدرتي معذورة
تانيتي هواي وتعبتي من يوم لعرفتيني وانة مممرمرج ومبهذل حالج
محوللة وموهوبة
مااطلب تعذريني والله استحي اكولها
وادري ماخليتلج عذر بس شبيدي
مجتف ولخلق محمد مجتف بلقيس
صوت احد صاحلة ونفسة الي بدا يرتفع بسبب ركضة وراها نسد الخط بوجهي
بدموع هويت للكاع منهارة اندب حظي لو اختياري
لليل خابرتنا بلقيس كالت .............
انعام
رجع لمكانة عينة بلمبايل رفع راسة وكال شني بوية ناكل اوادم شكالولكم علينة
شو اماني شردتيها ومرة غضنفر تكليلي لاتحبها وانة من بزرها
كولو مانريدك وفضوها
كام على حيلة وهوة ينتر بأمة
انة راد للبيت ومن تردين تردين عود اتصلي عل وانة اجيج
امة كامت على حيلها تتوسل بي يضل وعمة امريكا وجهها نكلب لونة من الفشلة وماتعرف شلون تبرر مرقفها تالي صاحو على لولد وعمو ابو ستار وابو فدعم يلله ركدو وقنع وكعد
اخذو للأستقبال وعمة مدرينة كلبت وجهها على عمة امريكا وهية كعدت يمها تتعذر ورجعت صاحت على اماني تدري بيها تحبها وتتأثر منها
اماني بضحكة وسالفة غيرت الموضوع
حبيبة واجتماعية ودمها يلعب اكثر من تهاني قبل
صوت قسورة بلمطبخ يصيح علية
طلعتلة جان لابس دشداشة جابها الة قيصر ومرجع شعرة ليورا ولابس ساعة وعطر تارس روحة من عطور ابو
لدشداشة طويلة علي رافعها بيدة
باوعتلة وكوا كاتمة الضحكة
هاي شمسوي بروحك
نتر كلشي مامسوي صيحيلي اماني
شلك بيها
اريد تحط تلفوني على الشحن
جيبة اني احطة
لاهي تحطة فوك بشاحنة عمو صميدع بساع تشحن
اي جيبة اني اصعد واحطة
شيصدعح لدرج
مالك علاقة
نطاني لتلفون فتحتة جان بي ٧٠ %
باوعتلة واني لفار يلعب بعبي
قسورة تلفونك بي شحن شلك بهاي السالفة شتريد من اماني
كلشي ماريد لازم تحطين سالفة حتة شحن ماريد جيبي
سحبة من ايدي ومشة
احس خرج عن سيطرتي من يوم اجينة
ومااكدر اعاقبة كلها توكف بوجهي ويكلولي عوفي ضايج على ابو
ابلع سوالفة غصب عني واعوفة
دخلت جوا ردت اسأل اماني ماكدرت
لبنية لبيها مكفيها وكافي عليها امها وتحقيقها واني وعدتها اساعدها
احسها مثل لطوبة صايرة كل واحد يريد يرميها بملعبة
ولبنية ماشفت منها لاتصرف موحلو ولا حتة نظرة
لوبلمطبخ لو يم امها كاعدة
الخلل بولدنا
شوية ودخل صميدع صاح على عمة مدينة يريدون ياخذوها للمستشفى بعد مااكلت كلبهم تريد تروح
راحت وقسورة وحمزة وابنها دعيبل رايحين وياها
دعيبل اسمة القيقي عبد الواحد على اسم جدة
بس عمرة ماسامع بهذا الأسم ولايعرفة وحتة لو احد يصيحلة بي ميلتفت ولايرد
بقت عمة مدينة ل١١ يلله رجعت طريق المستشفى طويل
رجعت من لباب تدك وتلطم قبضت كلبي
خاف جان عندي ذرة امل
جانت تصفك ايد بأيد وتبث الياس بكلماتها
عمة امريكا حست علية هية ولبنات حسيت بطني تأذيني كمت من يمهم رحت للمطبخ
اعاين لعمة مدينة دخلت لغرفة غضنفر كعدت تكلب بملابسة وتدور بغراضة تباوع بيهن عفتها وطلعت
ورة اكثر من ساعة جنت بلمطبخ اني واماني ورقية وكشمش كملنة لغدا وطلعنة نصلي
كعدت علسجادة بجيت هواي مثل كل يومية وية ماكمت حسيت لنزيف لزمني
دخلت للحمام اخذت احتياطي ورجعت للغرفة دخلت
نسيت عمة مدرينة جوا
من دخلت نزت وضمت شي وراها
ضليت اختلس لنظر عليها حاولت اعرف شنو بقت خافيتة وراها دحستة جواها وصارت ترجع الملابس والغراض
شوية وسمعت صوت سللامة تسأل عليها برة
خلت وطلعت
رجعت على مكانها الملابس والغراض داير مدايرة
بقيت انفش بيهن وادور
لكيت ورقة مكتوبة بخط ايد
لخط يشبه خط غضنفر كلماتة جبيرة وفراغات بين كلمة وكلمة
لورقة جديدة ولكتابة نضيفة ومبينة جديدة
مكتوب سلام ليفوك
وراها مكتوب معاتب
ليش ماتمر ولا تسأل كطعت فد كطعة ورطتني ورحت
اذا موحمل مسؤليتي ليش طلعتني منهم وليش كلت احميها ودكيت صدر
كل لرسالة ماتطلع خمس اسطر بس لكلام مالي لورقا كلها لكون لخط جبير وفراغات بين الكلمات
رجعتها وطبكتها وردت اطلع
ميز التلفزيون يصير يم لباب
علتلفزيون جانت اكو ورقة بيضة بيها تاريخ ٢٠٠٣/١١/٨
شلتها من ملمسها اتضح صورة
كلبتها ركزت بيها
غضنفر ويمة بنية حاضنها ايدة على جتفها وثنينهم يضحكون بلصورة باين لفرح على وجههم
لبنية لابسة كلابية لونها فيروزي وخالة مكياج وشعرها مميش وعلى راسها مشمر خفيف مال لكلابية
وغضنفر يمها لابس دشداشة بيضة وايدة فارها على متنها
بقيت اركز بلبنية شكلها ماشايفتة اببد
لبنية حليوة ويطلع عمرها ٢٠ سنة أو اقل
على وكفتي وندفعت لباب لصورة ورا لبردة خليتها على لرازونة مال لشباك بساع وماعرف اذا ثبتت او وكعت
درت وجهي بساع دخلت عمة مدينة مخبوصة
شافتني تقربت للتلفزيون تدور
رجعت فترت من لجهة لثانية
سألتني ماشفتي شي هنا
شي مثل شنو
صص صورة هيج صورة
صورة شنو
شني هوة تحقيق نعيمة لكيتي شي هنا
لاء
صفكت صدرها حيل وطلعت مخبوصة تدردم على روحها وتكول عززة بعيني وين راحت
ركضت برا تسأل بيهن
شلت لصورة من مكانها عفستها وبصدري ضميتها وطلعت برا
جانت واكفة بلمطبخ وكشمش يمها مدري شيحجن من طبيت سكتن
خليتها طلعت وتقربت لكشمش واحس نار صعدت لراسي
طلعت لصورة وراويتها الها
قبل ماانطق نزلت دموعي تجري
احس روحي راح اوكع من طولي وبغصة كوة حجيت وسألتها
كشمش بروح بيبي وجدو وفدعم هاية منو
علكاونتر دارت وجهها ودموعها تجري
جريتها وصرت بوجهها
احجي كشمش هاي منو حلفتج بلأعزاز لتجذبين علية
جذبات غضنفر كافية علية خسرني سنين كومة
لاتجذبين علية احلفج بشباب فدعم
زاد بجيها وايدها على عيونها وللكاع نزلت تشاهك
كعدت يمها جانت مختنكة ماتكدر تحجي
طلعت لبخاخ من صدرها وصارت تبخ بحلكها حسيتها نتهت
بصوت مكسور مهزوز حرفيا يرجف همست الها برجاء
هاي الصورة مثل الي ببالي
بس جاوبيني اي لو لاء
بس هزي راسج
صوتها بحسرة همست
اي
وجرتني تريد تحضني
دفعتها وشمرت لصورة بلكاع وركض طبيت للغرفة
شنو بجيت شنو روحي فرفحت
ملابسة بلكاع طشرتهن وحيل جنت املخ بيهن وارجع على روحي
كشمش دكت لباب اكثر من مرة وعلى كيف تحاجيني
مافتحتة الها
منو هاي ومنين عرفها وشوكت لحك تزوجها
لتاريخ ٢٠٠٢ ١١/٨
رجعت بذاكرتي اتذكر بهاي السنة من بدايتها لنهايتها همة نشغلو ببيت ابن عم جدو جانو مطلوبين ثار ويردون يكتلون حفيدهم لزغير وكل يومية رايحين الهم ومرات يباتون وخصوصا بشهر ال١١ هواي صدفت باتو يمهم وبآخر مرة من كالو فضيناها ضلو فترة يمهم
عقلي كام يربط شي بشي
غلط صح ماادري لمهم اقنع روحي
بدموع جنت اعاتب صورتة
على ذمتك ويمك بنفس لبيت ووتزوجتها علية لعد من جنت بعمان شنو سويت
شوكت يخلص جذبك شوووووكت
على كد اللطم والبجي مدري شوكت نمت على روحي وملابسة داير مدايري
وعاني صوت قسورة من دخل يمي
جانت دنية عصر
ترددت بين انو اكعدهم كلهم واراويهم لصورة واطلع كل الي بكلبي
اتصلت بأنغام سولفت الها
كالت كلشي لتسوين ابنهم مينطون بي ويطلعولة الف عذر وانتي هسة مطلقة بأعتبار
رجال مريض وبالهم يمة محد يعيرج اهتمام ويلمون لسالفة قابل يصيرون وياج ضدة
باجر نجي ناخذج رتاحي ومنا لمن يستقر وضعة اذا تحبين والج نية ترجعيلة رجعي وفتحي الموضوع ويا شخصيا وعاتبي وفهمي منة
واذا تكولين لا والله مرتاحة هيج هم بكيفج انسي لسالفة وعوفي
سديتة منها
ماكدرت اتحمل بقيت الوب
لزمت لتلفون و اتصلت بقيصر ردت احجي ويا لأن بعد مااكدر احس راح انفجر شعور مااكدر اخفي لألم لبية جان يجبرني على افعال ماردت اسويها
دكيت علي جاوبني صوت هوسة يمة
طلبت احجي وية غضنفر بأستهزاء رد علية
شلون يحجي وياج مثلا
زين نطي لتلفون خل يراسلني
بيا حال هوا شيراسلج انعام عندج شي كولي اوصلة الة
بغصة وتردد همست كوة يطلع لكلام مني
قيصر لكيت صورة بيها غضنفر ووحدة تاريخ لصورة من ٢٠٠٢ وكشمش كالتلي متزوجها
اريد افهم منة
شتفهمين انعام شتفهمين
زين خلي اجي للمستشفى اسمع من عندة افهم
والله رح اموت
هسة خل يكوم بلسلامة وابدن بسوالفجن انتي وذيج الحية ولجن عمي رجال بين الحياة والموت ماهامجن
هامتجن صورة
شهلكَلب وشهلئااامة
نتر علية وسدة بوجهي
رحت علكنتور بهستيريا جنت ادور بي
اريدلي شي يثبت لعكس
شي يكلي ماخانني ولو بأحلامة
شلون وليييييش
شوكت وشلون ماحسيت
ومنو هاي ومنين يعرفها
على كد لنار لبية جنت احس حرارة تطلع من جسمي
كمت على حيلي لملابس داير مدايري وبثوبي بقعة دم
دمرني النزيف يخف ويرجع
من كثر لأدوية الي اخذتها علمود يوكف كامت تطلعلي لحية
تعبببببت
دخلت للحمام بدلت ملابسي
عمة مدينة طول احسها تراقبني واسمعها تسأل لجهال علية من اكون بلحمام لو بغرفتي
كشمش تتختل مااشوفها من اكون بلصالة تطب لغرفتها لو تختل بلمطبخ
يوم ثاني اجو انغام ومنصور جلبو بيهم للغدا ورا لضهر صارحتهم برغبتي بلروحة وية انغام ومنصور بقو يسألون مستغربين وعمة مدينة صارت تلوم وترزل رجلج مريض شلون تعوفي ومن هلحجي
للحظة جنت رايدة احجي كلشي بس مادري شلون لزمت نفسي
منصور وانغام اقنعوهم بحجة ياخذوني للطبيب مامانعو لأن يدرون بية تعبانة وهنا محد الة خلكي
قسورة عاند يريد يبقة
انهيت جدالنة وعنادة بجملة وحدة
خيرتة بين لروحة وياي اتعالج واشوف وضعي وشوكت ميحب يتصل بأبو او يجي يشوفة ساعة زمان ويرجع
وبين يبقا يم ابو للدوم وبعد ميشوف وجهي
من شافو عنادي واصراري
كلهم كلولة روح وية امك بينما تتعالج وتصير زينة واحنة ندزلك واحد من عمامك يجيبكم من يطلع ابوك
رجعنة كل احنة قسورة مدلغم ومايحجي وياي لطريق كلة وحتة عمامة وعماتة طلع زعلان منهم ماسلم عليهم
وصلنة للبيت جنت منهارة وتعبانة لاكدرت انام ولا هودت من التفكير
فجرية اخذت قسورة ورحت لقبر منة
بجيت يمها لحد ماقسورة صار يصيح علية ويتعارك وياي يلله وعيت على نفسي ورجعت
من لباب تلكوني منصور وانغام يحجون علية
ماخذة لطفل بعدها لشمس ماطالعة ماخفتي توكعين يحتار بيج بروحة
عفتهم ودخلت للغرفة
شوية وطبت علية انغام بقت تسولف وياي وتهدي بية ساعة تكلي ليش قاهرة روحج انتي موتطلكتي من عندة وماتردي وكدرتي تكملين بدونة انسي لسالفة كأنما ماشفتي ولا سمعتي شي
وساعة تنطي مبررات وتكلي يجوز فاهمة غلط يجوز عندة عذر بوقتها يجوز انجبر
مادخل عقلي كل لكالتة
اللحظات المرت علية جانت موت بصورة ثانية
قسورة يخابر قيصر يحجي ويا ويسألة علي
انغام تروح وترجع علية احسها مهمومة تريد تحجي شي ومترددة
سمعت صوت صياحهم هية ومنصور
طلعت بلصالة اريد ادك لباب عليهم ومترددة
بقيت الوب اتقرب للباب اتسمع وارجع اوخر
صوتة رتفع بلصياح ويكللها
بلبداية طلعتيلج حجة على ابو امك تريدك يمها علمود تزوجك وتنطكرتي ومتقبلين نطلع وهسة تكليلي اختي شلون اعوفها واطلع بطلت متريد ترجع لرجلها
كافي انغام اني تعبببت منج ومن حججج
دااكلج امي تعبانة امي مريضة ترديها تموت واني هنا
تردين لعالم تاكل وجهي
حجي وياج بعد ماعندي
عندج منا لراس لشهر لخميس يعجيج تجين وياي حياج تكولين ابقة علمود اختي براحتج
اني طالع راس لشهر
بتعدت عن لباب
فتحها صرت بوجها صفن علية ثواني وراها كمل طريقة للشارع
طلعت انغام ورا تريد تلحكة شافتني رجعت تريد تطب للغرفة
جريتها احجي وياها
شنو لسالفة فهميني انغام
ماكو شي
احجي ترا سمعت حجية وياج
كعدت على لقنفة وايدها على عيونها وتبجي
بصوت باكي حجت
خالتي من يوم الي اجت بفاتحة منة لليوم وهي تلح علي تكلة ارجع واذا متريد تجي وياك عوفها وتعال واني ازوجك اغاتها شكم مرة اسمع بصماتها بدون ميدري ومن اواجهة يكلي ماكو هيج شي ويحذفهن كام
لمن شافتة معاند كامت سوتلها فلم جديد
وكل يوم وكلي امي تعبانة وتريدني يمها
لحد قبل شكم يوم من لكيتو غضنفر وخابرتيني كلتي عايش ومابي شي اتصل بقيصر حجة ويا وكالة احنة احتمال نطلع هلأيام امنكم يمهم كالي لخميس نطلع بدون حتة مياخذ رأيي
من راسة قرر ولوحدة عبالك اني موبشر لعابة وياخذها ويا بجنطتة شوكت ميعجبة
انغام رجلج يحبج ومستحيل يفكر بهيج شي
ولو يريد يعوفج جان سواها من زمان
ليش هيج حاطة السالفة براسة ومكبرتها حتلو مالة نية يتزوج من هذا حجيج ينوي
يجوز خالتي صدك مريضة
يعني قصدج عادي اطلع ويا
وانتي شلون اعوفج
شكو علية نبيع لبيت ونطوني حصتي واجر وابقة هنا شنو زغيرة
مستحيل انعام مااطلع بدونج
اني اروح هناك غريبة ياكلوني كبل تزوجة علية الله وكيلج
انتي توكفين بوجهها تستحي منج اقلها تحترمج
اني ماتطيقني من يوم جبتة واجيت
ميخالف طلعو واني اطلع وراكم
جذابة
لا موجذابة مبقة شي من لسنة خل تخلص ونلحكم اني وقسورة
لتنسين قسورة مومثل قبل امرة بيدي هسة طلعولة اهل وهوة متعلق بيهم
اشوف وضعي ويا ووياهم شلون وتالي الحككم
ماعوفج وحدج لتخافين
بتسمت ودموعها بعينها
جريت لتلفون وهمست الها
اتصلي بي وطيبي خاطرة بكلمتين خل يرجع مالة داعي مكبرتها هيج
خابرتة ودخلت للغرفة تحجي ويا
شوية ورجع صالحها
اسمعة يحجي وياها من لباب حضنها ويكللها مخبلة شلون اتزوج عليج
شلون اكسرج وانتي يتيمة ام واب
كون الله يكسرني اذا افكر اكسرج
دموعي نزلت
تذكرت غضنفر
شلون نطا كلبة هيج سوا بية
جنت بس رايدة اعرف شنو اسبابة
يوم ثاني بدو انغام ومنصور بأجرائات السفر وانغام تشتري صوغات لخالاتي وخوالي وبناتهم ولخميس يطلعون ب١١ بليل طيارتهم
يوم لثلاثاء ساعة ب٨ فزيت شبعانة نوم لأن نمت من وكت بقيت بفراشي اتكلب
فتحت تلفوني اباوع بي جانت جايتني رسالة فايبر من قيصر ووحدة من ابن كشمش
فتحت رسالة قيصر مكتوب بيها
احنة هسة رح نطلع من لبيت ومااعرف اذا نكدر نطلع بسلامة لو لاء
هوة رفض جيتج ويانا ورفض بقائج وجان لازم نخليج تطلعين من لبيت كال مااطلع من لعراق اذا ماتطلع انعام من لبيت
جان خايف لاتنضرين مثل ذيج لمرة
احنة طلعتنة مجازفة وهوة جان خايف على ضلتكم يمنة وطلعتكم ويانا
اذا وصلنة بلسلامة رح اتواصل وياج
واذا ماتصلت ابرينة وابري الذمة
لصورة الي شفتيها هاي صورة بت عمتي مدينة من رجلها لأولاني لبنية رابية عد ابوها من لزغر ومتزوجة وهاي صورة ماخذها وياها بيوم عرسها
وهاي لخطة من سللامة هوة طلب مني اخابرها واكللها تطفشج بأي خطة بدون متأذيج
لمهم تطلعج من لبيت
وهوة حتة مايدري بسالفة لصورة
هوة نطاها لضوء لأخضر بأن تطلعج من لبيت وبس
مايعرف باقي التفاصيل
دموعي تجري رجعت اقرا الكلام مرة ثانية
اتصلت بي ماعندة نت
اتصلت بي علرصيد يطلع خارج نطاق التغطية
دخلت على رسالة ابن كشمش
مكتوب بيها
سامحيني خية وحك الله ماراضية بس قيصر كالي اتعاون وية سلامة خاطر يبعدونج من لبيت
هوا كال هية تحس بلذنب تجاهي لأن عافتني وماراح تعوفني هلمرة الة اكرهها بية
واذا كلتلها حياتي بخطر رح تتمسك بية اكثر لأن جبرت هذا لشعور قبل وماكدرت بلياي
جان خايف ينعاد نفس لشي ويانا بيوم طلعنة بلصقوط جان خايف تنضرين من جديد بسببة وتبقين محملتة ذنب هذا لشي مثل من حملتي ذنب لصارلج وكتها ولليوم ماكدرتي تسامحي ولوما خطفة مارجعتيلة
حيل بلكاع ركعت لتلفون وصرت ابجي بصوت عالي واصيح على انغام وقسورة
دخلو يمي متفاجأين قسورة لم لمبايل ورجع لبطارية ونطا الي فتحت لرسائل ونطيتهين لأنغام تقراهن
بقة يصيح يريد يقراهن
تلاوة وياها واخذ لتلفون جان منهار مجرد كتلة سافرو وعافونة
قراهن لكلام لبيهن ماواضح بس هوة فهم على هوا وصار يصرخ كلة من وراج انتي
عافني وطلع انغام لبست عبايتها ولحكتة شوية ورجعت كالت مالحكت بي عبر لشارع يركض
كمت على حيلي اريد الحكة بقت تهدي بية ونكلي عوفي هوة يتخبل من هاي لسالفة
مو دوم يكلج شنو لابسة عباتج ولاحكتني
تحرجين بي كدام اصدقائة
هسة هوة شوية ويجي وين يروح قابل
ضلت تهدي بية وتلوم تكلي ليش حجيتي كدامة
عيني علساعة
مرت نص ساعة
ساعة
ثنين
تلاثة
بلشارع تلاثتنا ندور علي اني افتر على رجلية بلدرابين ومنصور وانغام ماادري بيهم وين
مثل لمخبلة كمت ادكدك بلبوب واسأل علي
ساعة فوك ل٤ لعصر وقسورة ماكو عقلي يجيب ويودي
ساعة اكول ندلو مكاننا وخطفو ابني
ساعة اكول ركب وراح لبيت ابو
ساعة اكول ندعم
افكار سوداوية اخذت طاقتي
على وكفتي بباب لعالم ووكعت بلكاع
صوت لمرة تصرخ جوا ولكم هاي دكت لباب ووكعت
شنو هلبلوة هاي منين اجتنا
.
.
.
.
.
ضوة قوي بعيوني اتكلب واغطي وجهي بلبطانية وبعدة لضوة
اتعاجز اكوم اطفي
بصوت عالي صرخت طفي لضوة متكول بشر نايم
نتر بية قميصي ماكو تأخرت على دوامي كومي دوري الي
بلخانة البلوسط معلك
اسمع صوت لنفش مالتة وبساع لبسة وطلع وضرب لباب ورا
مااجاني نوم وراها ابد
كمت على حيلي ادوس على لملابس امشي واشيل وارجعن لمكانهن عافس لدنيا عفس
طلعت برا لصالة نفس لحالة قنادرة تارساتها
بقيت كاعدة بلبالكون شربت جاي وسويتلي لفة جبن
دخلت للمطبخ اسوي غدا
طلعت منة ساعة فوك ال١٠ بقيت اقرة بكتاب مال كاتبة كويتية كلش تعجبني كتاباتها كل اصداراتها عندي
طفيت لغدا واخذت لكتاب ونزلت جوا
كبالتة مساحات خضراء كعدت بيها
اختنك من لبيت حيل
دك تلفوني
صوتة بفرح كال انتي وين
بلبيت وين يعني شعجب متصل بية ليوم
بلعادة حنة من اني ادك مترد تكلي مشغول
عندي الج مفاجأة
شنو هي
تخضري وحضري غداج جايج وجايبها هسة
شنو هي غير اعرف
اجي وتشوفيها
كمت صعدت للشقة كترتها من جديد ومسحت لغبار وبقيت انتظر
صارت فوك الوحدة وهوا ماكو
تغديت ونعست حيل رجعت لفراشي بلغرفة شغلت لتدفئة ولفيت روحي ونمت
فزيت ورا ساعة بالي يمة رجعت اتصلت بي ماجاوب
كمت لبست ونزلت يم انغام
دكيت لبلب فتحتها الي تلكتني طيوبة ستوها تخطي وتوكع
صارت كبالي تصفك وتضحك الي
تقربت شلتها ابوس بيها واشمها
شوية وندكت لباب راحت انغام فتحتها صوت بنية تحجي وياها
كمت اشوف منو
جانت رواسي بت جارتنا
من اجيت اني سكتن هية وانغام
وراها ضحكت انغام وكالت الها تفضلي
همست ميرسي تسلمي خالة مستعجلة غير مرة
راحت لبنية وانغام دخلت
سألتها شتريد كالت ماكو شي علمود سيارة منصور
دخلنة جوة الاعب بطيبة واسولف وياها اكلها ليوم تأخر
تهمس الي
وانتي جنج غيرانة من رواسي ترا طفلة ومتفهم
بابا لتشدين لوثاق علي ترا همة يكرهون القيد
خلي على راحتة يتأخر يجي من وكت وين يروح قابل غير دوام
جريت حسرة وماجاوبتها
لهناك اتصل بية كال وينج
جوا يم انغام
تعال
اجة
كمت على حيلي اسأل بي وين لمفاجأة
من جيبة لوراني طلع علبة بيها ساعة كلش جانت عاجبتني بس مااخذتها لأن غالية
اخذتها من ايدة فرحانة بيها بس هوا مدري شبي حسيتة ضايج رغم من حاجاني جان حيل فرحان
حتة فرحت على فرحتة
همس يستأذن من انغام يدخل لغرفتها يتمدد
كلتلة اخذ راحتك
طب جوا بعد ماطلع تغدينة وكملنة وهوة نايم
ساعة بل٤ لعصر فز كال طالع
لحكتة اسأل بي وين
نتر بية مالج علاقة كافي تحقيق تحقيق بلطبة وبلطلعة ترا زهكتينييي
طبك لباب بوجهي وطلع
بقيت مخنوكة
خليت وصعدت للشقة
وية دخلتي اجة اشعار على تلفوني
فتحتة رسالة من عندة
قريتها مكتوب .....يتبع
بنوتات عذروني اذا اتاخر عليكم بلنشر والله حساب لفيس دمرني يسجل خروج وحدة ومحتارة بي احتمال اعطلة واريد اعتذر منكم واطلب اجازة يومين لظرف خارج عن ارادتي اتمنا تلتمسولي لعذر واعوضكم ان شاء الله وراها وشكرا مقدما
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!