#خنجر_لغضنفر
#البارت_السابع_٧
#حنين_حاتم
على كصتة حيل ضرب
يطم روحة ليطيح سرة بحلك مرة ولا هلذلة
تحجي لو شلون
احجي بس وحك من خلق لأنس ولجان
اذا طلع هلخبر منج لو منها ثنينجن وياي اجرجن
بلعت ريكي
شتقصد
هذا لبيت ينعيمة قصتة طويلة
كلي اذان صاغية سولف
بتعد عن لباب واشر الي اتقرب
عيونة على بلقيس وبهمس حجة وياها
خوية انتي تيسري نامي خالج باجر جاي وعكبة تمشون لأهلج شلج بهلسوالف
يعني تحجي لأنعام واني تكلي تيسري
اي لا حكَج بوية وروحي كعدي كشمش وزوري ووياج اختج ام لفيوز وجيبيلنا حب وعلج وسهرتنا غباشي
اهووو كام يتحجج
ربي عاينلي لو تاخذني لو تاخذهن
هسة تحجي لو شلون
يعني الة تعرفين
اي مثل ماجبرتني ابقة هنا تحطني بلصورة بكل خطوة تسويها
نعيمة هلسالفة بيها حز ركاب كضي لسانج انتي وياهة
ماشي ماشي
خاب هاي لماشي انة مامأمن الها
لا لا امن لتخاف
نعيمة لو واحد درة نروح بولة بشط
هسة مو كتلك اي
يربي مامأمنلج شلون بية شورطني
وانتي لثانية كلما تلحين اتردد اكثر كسرن لشر وروحن نامن
ابببد
نعيمة لبيت بي ناس عليهم محكومية وانة ضامهم بهلبيت
لضوة ولأمور التصير بي كلها حتة نخوف لناس منة ويبتعدون عنة ومحد يتقرب الة
بليل اطلع اخذ الهم اكل ياكلون
عود صدكتك يعني
لوما بعيني شفتك تبلغ على لبيوت لكدامكم وتأشر لواحد وشوية واجت لسيارة جفتتهم
حيل سحبني من متني ويهمس بعصبية ونفاذ صبر
انتي منين طلعتيلييييي
بلحض يانصيب
خاب انتي شني ماتكليلي سحير اليل
انتو دجاج تنامون ورة لعشة
احنة متعودين نسهر من وكت بابا جان نشاطهم كلة بليل
هنا وين اروح اكابل لشباك جنت واقرة كتب
انعام اني ماجنت ابلغ عليهم
جنت ادز ولد صاحبي يبلغ اهاليهم
جنت ابوك لسان جدي من يصير تفتيش ويجن سيارات لأمن
وبلسر ادز صاحبي يبلغ لبيوت الي ادري عدهم فرارية حتة ينهزمون
جدي يو عرف ينضر
وانة اروح بيها
ولشباب الي بلبيت تنتهي حياتهم
انتي هسة بركبتج حياة شباب بريئين تهمتهم رفعو سلاحهم ضد لأمن حتة يحافضون على بيوتهم الي نجبرو يترحلون منها
واهوارنا لجففوها وخربو اجمل معالم مدينتنا
صوتة يهمس النة
انعام لأمام علي رضي الله عنه يكول ليت عنقي كعنق لزرافة
انة مادري شلون صارحتجن بهلشي ولا اعرف شلون امنت ارواح عالم بيد ثنين نسوان
لا لتخاف من ناحيتي امن وطمأن مستحيل اتسبب بمضرة انسان لو على موتي
اني جازفت بنفسي حتة انقذ اختك واني حتة مااعرف اذا جانت صادقة اولاء تتصور ائذي بشر
عيونة على بلقيس
بحزم ردت
سرك ببير اضلم مالة قرار
مجرد مااطلع من بيتكم راح ازيح عن فكري كلشي سمعتة ببيتكم لاتضن بيوم افشي سر يخصكم ولا لأقرب ناسي
اقل مايكون ردا لجميلكم الي ابقة لعمر كلة شايلتة على راسي ولايمكن اتسبب بهجمان بيت اختي
سالم راسج
ولنعم
انة اروح لغرفتي راح يأذن ليوم راح يجونة وادم طبن هسة يكعدن يتحضرن للطبخ
يلله مثل ماوصيتجن
صعد هوة واحنة طبينة
كل وحدة دخلت بفراشها
حطيت راسي علمخدة اجت صورتهم ببالي
غمضت وفاضن عيوني
ومثل كاغد وشبت بي لنار
وكأن خريف عمري بدأ من دخلت هلمكان
تساقطو مني اهلي
تعريت من كلشي مثل مايتعرى لشجر
اصدقائي
احلامي
مشاعري
دموعي
كلشي
كلشي بهلحياة هوة تجربة نكبر بيها ونتعلم إلا لفقدان
يكسر لضهر ويهدم لحيل ويسرق اجمل لحضات لعمر
رغم شكد احاول اتأقلم واتعايش
بس مااحس نفسي انتمي لهلمكان
بروحي لهفة على حياتي وبيئتي وناسي واهلي
ماينحمل فراككم والله
عفتوني غريبة ضايعة بوسط سرااب
كل يوم احضن فراشي واسأل نفسي
لهلدرجة اني نكرة
لهلدرجة روحي رخيصة
روحي الي وين متروح تلكة لموت كدامها
أدركت انو لهروب عمرة ماكان حل
ولا عمرة غير من واقعي شي
غمضت وسبحت بوسط ضلام روحي
لمسات على صدري وتنزل بلطني وتاخذ مستقرها اسفل بطني بعبث مقرف
صوتي يهمس بخنكة وشهكة بداعة ستر خواتك عوفني
ويرد علية بصوت مقزز ينتر
لتجيبين خواتي على لسانج ....... ....... عملاء خونة غوغائيين
عيوني تسبل ولمساتة تتراوح على افخاذي
ودموعي تنزل بحرارة وصوتي يهمس
بابا لوثو شرفك
بابا اخذني يمك
ندعيلي يعجلون بموتي واخلص
وكأن روحة تسمعني وتستجيب الي
بيني وبين انو تنذبح طهارتي على ايدة لنكسة ثواتي
ويبتعد عني ويكتفي بلي اخذة من جسدي البالي لمتعب الممزق من لداخل
ويتركني بوسط تفكيري
هاوية ترتطم بهاوية
ومامن مصير
يكتفي بلقرف الي يتركة بداخلي ولنقاط السوداء الي تكبر كل يوم وتحتضن قلبي مثل بئر يحتض ماء
كل يوم اسأل نفسي شوكت اتخلص من ذكريات الحبس الي تنتقم مني وتقتل كل امل ممكن ينمو بداخلي
افكاري المشؤمة ذكرياتي المحزنة
امانيي الي لاتزال محلقة على امل ان تتحرر وتتحقق
ادية لخاضعة لهذا لذل وراضية بي
صوت شخير كشمش صحاني من تفكيري
مابقة شي على كعدتهم وليوم عدهم خطار
عمامهم يتجمعون كلهم
لبيت يسكن بي عمهم رحيل وجليل واولادهم واولاد خليل الي همة غضنفر وقيصر لباقين بيوتهم وحدهم بس نفس لمكان بعد بضع امتار
والي فهمتة من كشمش يتجمعون علمود يحجون بسالفة غضنفر ولصار ويا ولشخص لرما
اذن لفجر طلعت اتوضة
صار بوجهي جان طالع من الحمام
محندب ولازم ضهرة
جان لابس صروال ابيض وفالينة داخلية
درت وجهي راجعة للغرفة
صوتة يهمس من رخصتج توعيلي واحد من لولد
بهمس رديت شلون اطب غرفهم ماترهم عذرني مااكدر
مشيت خطوات للغرفة وية ماسديت لباب لمحتة بطرف عيني جان داير وجها علمغسلة مدنك ومنتجي عليها وضهرة كلة دم
فانيلتة بيها بقعة جبيرة
ماعرف شنو لخلاني اهرع تجاها بخوف
ها شش شنننو
ايدة على شفافة تهمس
اششش راح توعيها
منو هية
جدتي شكرية
لبيها كافيها ماريد تشوفني تروح تتخربط
شبي جرحك ليش هيج نازف
اجاني ملك لموت تغشمر وياي وراح
شنووو هاي شدتحجي
عليك الله ليش هيج تنزف
صوتة يبتلع غصات لألم ويتجرع لمرار ويتكلم بهدوء مصطنع وبتسامة مثلجة وكأنها ابتسامة مكر وتحدي
بس كانت شهكاتة من بين لأحرف تتسلل لروحي وتعبث بثباتي
تجعل رجفة ايدي تزداد
هذي لرجفة الي تلازم لحضات حزني وضعفي
موكتلج زارني ملك لموت تغشمر وياي وراح
لكاني اعرج بلية عكاز
لكاني بشر يستنشق دخان الجكاير بدل لهوا
لكة اثار لماتو بخنجري جحيم جهنم ينصب على راسي ليلية
كلبني يمنة يسرة فوك حدر
مابية الي يريدة
عافني ومشة
ماافهم مغزى كلامة بس صوتة جان يفضح الألم الي يخفي
رجلية اخذتني لغرفة لولد فوك
دكيت لباب مرتين وبتعدت
نفتحت
فدعم فتحها جان بطرك لشورت ولفالينة من شافني رجع ورة لباب وبغضب همس
شكووو شصعدج هنا
انزل جوة وتعرف
عفتة ونزلت بساع
صار بوجهي جان منتجي علحايط واشبه بلي يهوي للكاع شوية شوية
بتسامة ماعرفت افسرها
بس ماكانت ابتسامة بشرية
وجسمة نسحب وحاول يوكف عدل وبأنتصاب
دخلت للغرفة
بس مازارني لنوم
اذاني يم لباب
صوت فدعم يهمس انة غلام ابوي
شمالك خوية شني هذا لدم
نعيمة شجابها يمك
شتسوي
شعدها وياك
بعد بعد وعيهم وكللهم نعيمة جانت تسبح وياي
ختفة صوتهم
ورة ربع ساعة سمعت صوت باب غرفتها من نفتح
بقيت بلغرفة انتضرها تدك علينة لباب
لبنات غاطات بلنوم
لنوم الي نسيتة من يوم دخلت لحبس
وحتة لو نمت توعيني كوابيسي
ندكت لباب وصوتها يهمس
نعيمة كشمش زوري بلغيس
كومن يمة لا تجيجن نعناعة تصهل
كومن يعيني صلن اذن وقرة قرعان
فتحت لباب
بتسمت وصبحت علية وتمشت لغرفتة
خل اوعي غضنفر
ادية لزمتها
بيبي غضنفر ماهوة
ياااع وين يروح وانتي شمدريج
تحجي وتبتسملي بمكر
بقيت ساكتة ماعرف شنو اكللها
طلعت حدهن تلف بشيلتنا وتسحب ابنها الي يبجي ويردد جوعااان
عاينت الي وحجت بمكر
ها شوساكتة
ماتجاوبيها
كلياها غضنفر اخذو لويلاد للمستشفى لأن جرحة نازف
يممممة صخام بوجه لعدو
شمالة نازف
ياهو ويا
مادري يكول عزرائيل تقشمر ويا وراح
صفكت صدرها حيل
يمة سودة بوجهي
ركضت على غرفتة فتحت لباب
فراشة بي دم
تضرب على وجهها وتحجي
كتلة خل واحد من لويلاد ينام يمك خاف تتخربط مايرضة
بعدها تعاين الي ومتجاهلة ابنها اليبجي
سألتها بيبي شكرية
حدهن شمدريج راح للمستشفى اخاف بلديوان وجابولة مضمد يو عمتج ام فدعم داوتة
لا اني سمعتهم من حجو وكالو نروح للمستشفى
ويلومون بي لأن مايكعد
ندارت علية وكملت
تدرين غرفتي بصف لحمام واسمع
اسمع كللللشي
بقيت لازمة بيبي شكرية الي تلطم وتجر حسرات علي
وبدقايق نتفخت بطنها
وكامت كوة تتنفس
اهدي بيبي هسة يجيبو مابي شي
طلعت نعناعة تعاين النة
مدري شبسبست الها حدهن
ضربت ايد بأيد وتقربت بغل تحجي
هوة اذا مايجيب اجلج مايرتاح غضنفر
وعلكيف تهمس بيبي شكرية
بيش طالبتني عسا يومج كبل يومي يعكَرب الرمل
شتبسبسن احجي بصوت عالي يو خايفة
يااااااع منين اخاف منج
صوتة من جوة صاح وطلع من غرفة نعناعة
صباح الله خير شكو هلنكرة
بيبي شكرية تتلاطم تلكتة
حجي غضنفر مدري شمالة ماخذي لويلاد فراشة كلة دم لكيتة
وماردو لسة
انعام:- لا ماصارلهم هواي من طلعو
نضراتة ركز علية وتقرب الي
وانتي شمالج خايفة
لا مو خايفة على بيبي شكرية قالونها هاج
هاا هيج
صوتة يصيح على ام فدعم
وينج بوية يلله كعدي بناتج
رجع صاح عليهن
كشمش زوري كومن سون النة ريوك
من شفتة شلون يكعد بيهن بينما حدهن واكفة ماكللهة سوي ريوك ولعيبية وقسمة نايمات ماصاحلهن
حيل نقهرت
بهمس احجي وية بيبي شكرية
شنو هلتفرقة لعد ميكعد بنات عمو جليل ونسوان ولدة
لو بس على هلمسكينات جاير
رجليهن مفطرة من لوكفة ولشغل مالهن لون
لايمة انة مادافعلة
بس هوة مايحب يضوك اللكمة غير من ادين ام فدعم وبناتها نفسهن طيبة وطبختهن بيها بذرة
يعني شنو
يعني اللكمة الي يطبخنها الله يبارك بيها ونشبع ويزيد
نطلع للفلح
لعد لمعينات لجانن يشتغلن وينهن
يمة هذن بس من عدنة خطار نودي عليهن
يحطن ايدهن بلطبخ ويعينن لبنات
بهلأثناء طلعن لبنات
وصوتة يصيح عجلن بوية ورانة ضيوف
بالي يمة
شكد ماحاول اشغل نفسي يرجع تفكيري يتمحور علي
شعور لذنب لميرضا يعوفني
شردت اختة
بسببي نفصلت بسعاد الهم
بسببي غضنفر تصوب
جان ببالي اسأل عن امي واختي الي نقطعن تماما من اخر اتصال
بس خجلانة ومترددة
كشمش بلمطبخ بيدها طاوة جبيرة وتحمس بيها ريحة زفرة
تقربت الها
جان مخ مال طلي حامستة ويا بصل وريحة دهن لحر تفوح منة وفوكا ذبت بيض
صديت علجها لثانية جان محطوط كدر وبي ينسلك رئة لطلي
ستفسرت
هاي شنو كشمش
هاي فشافيش خية للفروخ يحبوها
ها وشنو طعمها
هسة تستوي وضوكيها غير تموع بلحلك تكولين حلغوم
عفتها تكمل ورحت للغرفة
وعيت بلقيس
كعدي خل نشبع منج باجر ترحون
اجة خالو
لابعدة بعدها لدنية ضلمة
انعام امانة اختي ديري بالج عليها
اني مااكدر اتصل بيها خاف نعناعة تسويلها سالفة
انتي كل فترة اتصلي بية بسكوت وخل احجي وياجن
اطمأن عليها
ان شاء الله
بقة بنفسي اروح لبستان لباكلة واصور هناك
بي ورد يجننن
ولج هذا بستان نعناعة
لعد اني ليش مارحتلة خفت لجهال يفتنون الها
بعدين نقشمر كشمش ونخليها تاخذنة اني هم بنفسي اكعد بنص هلورد واشم ريحتة منضرة يرد لروح
من اوصل ان شاء الله ادز ملابس الج ولبسعاد
كوستمات فساتين
دخلت كشمش بيدها صينية
المن يلبسن لكوستمات ولفساطين لحبوبتي
غير يسووهن مزق
خية خليهن يتعلمن على ثيابنة
شمالها الوانها تخبل لأحمر ولأخضر ولبرتغالي
وخلي كواستمج مال لأرامل الج
نيلي وجوزي واسود
ادري قلة الوان شني
ضحكنة ثنينة
حطت لأكل اني مااشتهي شربت حليب وتكترت
بدينة نسمع اصوات لجهال ولبنات
دكت لباب ام فدعم
تحاجي كشمش
كومي يمة اخيج يدور على هدومة رد من لمستشفى
ادري شمالة فدعم دومة مضيع هدمة
ستوقفتها بسؤالي
شكال
يكول مابي شي زين اجة ياخذلة هدوم وهوة هم يبدل هدومة مدماية من شايلة
شسوولة يعني
يمة ماينفهم كلشي منة بس يصيح مدري شمالة
هسة يروح لحجي وكال مناك اخابركم واطمنكم
كشمش بعدها تلوم بي لأن تعزل ملابسة وتكويهن وهوة ينفش ويضيعهن
سألتها
كشمش فدعم شيشتغل
وي جدي
اي شنو يشتعل
خية لأدري بي جدي معاون امر سجن ......
طلع تقاعد بس بقة يشتغل وي لحكومة مدري شني وفدعم دومة ويا
زين هوة شمخلص
ثالث متوسط
وليش دائما هيج منعزل ومالة صوت
امي تكول طالع على خالي لجبير
هيج رزن وهادي ومالة غرض بأحد حتة علاقتة وياي موش مثل صميدع سالفة وضحكة بينا ونتغشمر ونتمالخ ساعة لساعة
فدعم حتة حجابي استحي انزعنة جدامة
زين شنو شغلة وية جدج وهوة مخلص ثالث
ماادري شني شغلة وحتة غضنفر جديتي تكول يشتغل وي صاحب جدي بس انة شاكة بي يشتغل وي جدي بس هية تجذب علينة
ليش تجذب
ماادري بس انة شاكة عبن جدي من يخابرو بلتلفون يصرف كل ليمة ويطلعهم برة الى ان يكمل اتصالة
بس غضنفر مايصرفة يضل يمة وجدامة يسولف
انة هذا لخلاني اشك
موشرط يجوز يرتاحلة ومأمنلة متطلع منة حجاية
كتوم
اندري بيهم خية
انة شلي غرض
صوت فدعم صاح
خاب وين صارن لهدووووووم
دهر فرج عطلتيني
طلعت بساع تركض علدرج
طبت بسعاد
تقربت لبلقيس وكامت تبجي
راح تروحين وتعوفيني
كافي بطلي هاي لسوالف هذا مكانج وبيتج
صرتي جزء منهم الله يهدي ويعقدلج محكمة ولو ماعتقد يقبلون اهلة بس انتي حاولي مالج شغل بيهم
وموضوع دراستج هم لحي بي بلكي يقتنع
تقربت الها بمكر وسألتها
لبارحة شنو هذا لصياح
بتسمت بخجل وكالت
جنة نلعب
وشتلعبون
بلبداية لعبنة لعبة حلوة بعدين خربها
وشلون بلله
كالي تعاي خل ننزع حترينا
عرفت وين يريد يوصل لحقير
كتلة لو تموت
ستغفر وضرب كصتة مدري شنو دردم
بعدين من شافني زعلت ودرت وجهي
سحبني وباسني وكال شورانة على كولة جديتي شكرية نلعب بلتين لمن يلين
اني وبلقيس وحدة تباوع علثانية
حطت ايدها على خدها وجرت حسرة
ليوم فزيت مرتاحة وامنت عبالي تم كلشي
ولج شلون بيج فهميني شلووووون
على كيفج بلقيس ترة بعدها طفلة ومن تزوجت مومثل باقي لبنات زفة وعرس ولأم تعلم ولخالة تفهم
هية شو طبت جنطتها بضهرها
انعام دبريني شلون لابد لولد يمل خاف يروح يحجي لأهلة وتصير سالفة لو توصل لزلمهم ويخابرون بابا وعمامي
معليج اني اخلي بيبي شكرية تحاجيها وتخوفها
اي كلش تخاف علساس هية
بس كليلي بليلة لعرس شسوة بسالفة لوصلة لبيضة
فاكة حلكها وترد بضحك
ههههه هههه اني شفتة شفتة
نزل علساس يجيب من لسيارة غراض وصعد بيدة جيس طلع منة راس مال دجاجة كلة دم
مسحة بلوصلة ونطاها لأمة
صوت لجهال ومعاركهن
طلعنة اني وياها
جانت عمتهم امريكا جاية
وياها ولد شباب وبنية دون ال١٥
مرت اسماعيل وولدها هم
كلهن محزمات ويشتغلن
من شافنة شتغل تبسبسهن
شكم وحدة من اقاربهم جانن جايات
كعدنة يم كشمش جانت تعجن هية وتهاني بت عمتهم امريكا
حلوة وشاطرة هبت ريح على كولتهم
اجت بيبي شكرية كعدت يمنة
ومدري شتبسبس على نعناعة وجناينها
اسولف وية تهاني سألتها
دراسة لو لاء
خية رابع ابتدائي وبطلت
تعرفين تقرين وتكتبين
موكلش
صوت بيبي شكرية يرد
يمة لتبلبش ولا لعمة
اهم شي تعرفين تقرين قرعان
وصوتها يرد بحماس
اي بيبي اقرة قرعان واجود مثل ابوي
ياااع ابوج وين اكو مثلة ومثل صوتة لحلو اغديلة سبع فدوات
شوية ودخلو من جهة لديوا يتمشون بتجاهنا هوة وقيصر وفدعم لازمينة
جان لازم ضهرة ومحندب ويمشي على كيف
دخل ورا جدة وعمهم اسماعيل وجليل تلكَاهم يسأل
اشرلهم علديوان
وهوة اشرلة علغرفة واسمع صوتة يكلة مابية اريد اتمدد كلولهم عصرية يجون
تقرب النة
ركضت علي تهاني وحيل حضنتة
عيني على فدعم لينتر بيها
ولج احشمي صرتي مرة شني ياهو لكاضتة وبايستة شمالج رعنة
وصوتها يرد علي بدلع
بايستمن هوة بس غضنفر عبن مريض بستة
وصميدع
عبن توة معرس
وعبود
عبن ناجح كالو
ندار على قيصر،
خوية تفضل الزم سرة وانة وراك
ولج شمااالج
شمالج تضلين مثل شمام فطير
وصوت غضنفر يصيح بي
خاب شمالك نشبتلها هية غير من بزرنا
حالها حال
دنك وماكمل كلامة
مشة بساع
وورا فدعم ينتر
جوز من هاي لمشية انت مريض شني جم دوب شايلها بحيلك بوية ماسمعت لدكتور بكول رادة لفقرة متحلحلة واذا ماتداري روحك تصكط
تجاهلة ومشة متوجه للبيت
تلكتة عمتة ام تهاني شبكتة حييل
عيوني علي من غمض عينة ووجهة كش من ضغطت على ضهرة بحضنتها
فدعم تقرب يريد يوخرها
بساع ادي تلاقفت ايدة واشرلة من ورة ضهرها بعيونة
يعوفها
بقت تبوسة وتشمة
تالي نتبهت على روحها وكالت
يمة سودة بووشي نسيت صوابك
وقيصر يرد عليها بعد وكت عمة على هلشبكَة لفقرة وصلت لهور لجبايش
جا دتعال خل اوصل فقراتك لهور لحمار
حيل تحضنهم وتشمهم بكل قوتها
دخلو جوة بلأستقبال همة وولدها
شوية وطبو لجهال كالو اجة خال بلقيس ويكول مستعجل ميرضة يتغدة يكول خل بلقيس تحضر روحها بين ما يشرب ستكان لجاي
كامت بساع نكتت اديها وطبت للغرفة
تتحرك بلغرفة بساع برتباك
طلعت كوستمها لأجت بي
حيل نزعت دشداشة كشمش ولبست ملابسها بساع بساع
دموعها لتمسحهن قبل مينزلن
متريد بسعاد تشوفها
ندارت عليها بضحك
انتي شكو تبجين
حضنتها حييل
اششش عيب تبجين صرتي مرة
انتي موطفلة انتي هنا زوجة مسؤلة
صيري عاقلة ورفعي راس بابا
ان شاء الله نجي نزورج اني ويا
طلعت برة هية وياها
كشمش خشمها احمر وعيونها دامعة وزوري تتختل ماتريد تشوفها
صوتها بغصة تستأذن وتكل لجدي
من رخصتك نطك صورة جماعية اخذها ذكرى منكم
وبضحكة عدل عكالة وتقرب
اي ليش لا
وكف يمها وكلهن طلعن سطفن سرة
وبصوت عالي صاح علولد
اجو كلهم
عيوني تدورة ماكو
خالها على يمينها وجدهم على يسارها ولولد بصفهم
ولبنات بلكاع نصن وكعدن ولجهال كوة كوة يطلعون روحهم ناس تتشلبة علحايط ناس علباب وشي جوة رجليهم
وكشمش كبالنا لازمة لكامرة بلمكلوب وتصيح
كولو جيس طرشيييييي
اشرت الها بلقيس
طكي بعد وحدة
حتة ادز الكم وحدة ووحدة تبقة يمي
وراها كلمن راح على شغلة
صوتها تهمس
كلهم بلصورة بس هوة ماكو
غير مالة خلك
صوت خالها اشر الها يستعجلها
ووكفو كدامة فدعم وعبود
ماتطلع منا
شني تطلع من ديارنا وكت لغدة
لاصايرة ولادايرة
جدهم سبكلة وجلبو بي
راح للديوان اخذو
وطبينا جوة
بلصالة مدو لسفرة
جنة نساعد لبنات بنقل لأكل
من كملنة دخلنة للغرفة صوت عمتهم امريكا تصيح
يبنيات
شني حابسات رواحجن ماتحشمن
خاب احنة لخطار ولبيت بيتجن
كومن يلله يمنة
زوري تجاوبها
اي عمة اجينا اجينا
نترت بيها
انتي ليش تجمعين روحي وحدج اني استحي من ولدها
بلقيس نبت اني هم
وبسعاد تفر بيدها
عود هنة يكللي لاتستحين من صميدع ويعلمن بية وهنة يتختلن هنا
جا لو كالولجن نزعن هدومجن مثلي شتسون
ايد بلقيس حيل سكتتها وتعض بزندها
ولج انتي شنو
متكليلي شوكت تعقلين
بعد الحاح منها طلعنة كلنة وحدة خاتلة ورة لثانية تقودنا كشمش عبالك قيادي خطواتها يس يم
مليانة ثقة
كعدت وبيدها سفطة خبز بقت تشمر بي علسفرة
لولد بركن لسفرة واحنة بلركن لثاني
بلبداية جنة مستحين وراها من شفنة شراهتهم بلأكل وكلهم ماخذين راحتهم
شوية زال لخجل
بلقيس تهمس الي
وينة غضنفر
شدراني
صوت زوري تهمس
مايكدر يكعد بلكاع جدتي ودتلة غدا جوة بحجرتة
سوالفهم وضحكهم طول لأكل ماسكتو
ناس تشمر على ناس بلأكل وكلمن يشيل لحمتة يدنيها لغيرة
بلقيس نطلقت بلسوالف هية وتهاني
صوتها لناعم تحجي وية بيبي شكرية
بيبي عود شنو معنا العب بلتين لمن يلين
نضرات صميدع وحواجبة تخازر ببسعاد
لولد يبتسمون ومدنكين
غيرت لموضوع بيبي شكرية بضحكة
وبلقيس عادت لسؤال
قيصر يهمس بضحك
جاوبيها جدة جاوبي
من ورة ضهر لولد نمدت ايدها وكرصتة
وهوة يضحك
ترد بسعاد
اني اعرف معنا
يعني لتين من يصير لين يصير ملمسة حلو وطعمة طيب
قيصر بنتر يلله عوفن لتين وتغدن
هسة كلي صح كلامي لو لاء
بضحك يندار على عمتة امريكا
عمة شحجاج وجبتيهن هنا عايزين احنة
احنة وحدة تباوع علثانية
غسلن مواعين ودخلنة للغرفة وهمة راحو للديوان
دخلت بيبي شكرية حيل تضرب على خدودها
من عدها عرفنا لمقصد من التين هوة نهدي المرأة
وهذا المثل يكولو للي متزوج زغيرة وشالعة كلبة
يكولولة العب بلتين لمن يلين
يعني تانيها تكبر وذيج لساعة سوي مايحلالك
وحدة واكعة بحضن لثانية من لفشلة
وبلقيس متقبل تطلع من لغرفة
٣ مرات خالها يودي عليها بيد لجهال وهية تتلاطم تكلي شلون احط عيني بعينهم من اطلع
كوة طلعت
واصرت نطلع وياها لباب لخارجي من فشلتها
طلعنة وياها كلنة
واكفين بلباب يسلمون وكلها واكفا برة تودعهم
ولجهال مجلبين بلسيارة من ورة
وبيبي شكرية شايلة طاسة ماي
وام فدعم ترست لسيارة من لزرع اشكال
وكل وحدة بيهن حطت بيد بلقيس علاكة صوغة
صوت خالها يسأل بيهم علتمر خوما يخرب ورانا طريق طويل
رد علي قيصر لا ماعلي شي يستوي اكثر ويلين
عيونة على بلقيس ويحجي ببتسامة ماكرة
صعدو وادينا تلوح الهم
وبيدة طبك لباب من صعدت بلقيس وبهمس كال
ديرو بالكم علتين اوو قصدي على روحكم
عين تضحك وعين تبجي
ودعت اختها
ومشت لسيارة بيهم
رجعنة جوة
جان ستوة طالع
بهمس يعاتب جدة
غير تكلولي من طلعو
فشلة ماسلمت عليهم
بوية رد لحجرتك انت مريض معذور
دخلو جوة
ضهرية اني ولبنات بلغرفة ونسمع صوت بسعاد هية وصميدع
بين خايفة عليها وبين اكول بلكي ياخذها ويخلصون من هلقلق
بس صوتهم مال عرك وصياحة علة
شوية واجت
خدها احمررر
دخلت للغرفة تبجي اريدهة تسكت افهم شبيها ماكو
لحقير لخبيث شاف اختي راحت كال خل اكتلها
هسة غير نفتهم ليش
يكلي شلون تطلعين اسرار غرفتنا
الي يصير بينج وبين رجلج محد يدري بي غير ربج
ماتسولفين لبنيادم حتلو اختج
وضربني وبقة يصيح ويكلي تعبت منج
انة بشر وعندي طاقة
بعدها لنفس طيبة وياج
لاتبزعيني وتخليني اطلع وجهي لثاني
وطردج
لا اني اجيت
بلقيس موكالت الج متطلعين من غرفتج عسما تصيرون لحم
اريد اروح لأهلي
خل يرجعون ياخذوني وياهم
تقربت الها كشمش تضحك
خاب هوة لعب شني
واخذتها على صفحة مدري شتهمس الها وتحاجيها
بساع طلعت بسعاد وصعدت فوك
شوية ونزل صميدع دك لباب على كيف
فتحتها
همس
خوية صعدي لبسعاد تريدج
صعدت الها اني وكشمش
جانت بلكاع وساترة نفسها بجرجف
نداريت على كشمش بضحكة
ولج ملعونة شكلتيلها وقنعتيها
مالج غرض
نطي لخبز خبازتة
غسلنالها وبدلت ونزلت ويانة
عصرية اتصلت بلقيس كالت وصلنا
حجن وياها لبنات وبشرتها كشمش كامت تهلهل من لفرح
شوية ودخل للمطبخ فدعم صاح لحد من لفروخ يطلع
ليطلع اكسر جدامة
ودخل يم غضنفر
طلعو هوة ويا
جان لابس دشداشة وعلى خصرة حزام ولاف لدشداشة وصروالة طالع
شماغ شامرة على راسة بعبث
مشة ويا
ركضن لبنات من شباك لمطبخ يعاينن
شوية واجت زوري
كالت اجو عمامنة وولدهم من لبصرة
بقت زوري تعاين وتجي تنقل النة
لهناك دزن واحد من لجهال ووصنة يتخنس بلزرع ومايخلي احد يشوفة
يتسنط الهن
اجة مكتول ويهادد عليهن
من وراجن ومن وراجن
بقن يحوصن يردن يعرفن شصار
بيبي شكرية على سجادتها تصلي
ونعناعة تروح وترجع بلصالة
وكلسا تتصل على تلفون لديوان تحاجي جليل
شوية ودخلو فدعم وصميدع وقيصر
ركض صعدو لدرج ونزلو بيدهم سلاح
سبكَت الهم وجوة رجليهم صارت تكمش بملابسهم وتلطم وتبجي
جدة فدوة اغديلكم كسرو لشر
ولك قويصر ابوك راح من ورة هلسوالف لاترحون مني انت واخيك
ولكم يمة اعفو عنهم وارضو بفصل وسدو لسالفة
قيصر بلكاع دنك
غضنفر مارضة
وكال ندكَهم هسة
ولعطوة يومين
بصوت عالي تصرخ
تركض على منيتك يغضنفررررررررر
كلهن تجمهرن يم لمطبخ
شفناهم من طلعو كلهم
كأن نمل موبشر من كثرهم
وكلمن سلاحة بيدة
وياهم مراهقين جهال داير مدايرة كلهم
وهوة مدري شيحجي ويدفع بيهم
حدهن تدز بجهالها يركضون يجيبولها حجايتين ويجون
صوت ابنها يركض تقرب ذب لحجاية وراح
غضنفر يريد يروح وياهم ومايخلو
دفعهم ومشة لازم ضهرة ويسحل بسلاحة
ركبو لسيارات
دموعي تجري
خوف خووووف
شفافي تهمس
ربي يمتة لخلاص
صوت سياراتهم من شحطن
وستقرن كبال بيت علصوب لثاني
ناس نزلت وناس من داخل لسيارة ترمي
احس لمنطقة كلها تنهزز بصوت لرمي
لبيت ننخل نخل
صوت لرمي مستمررر
بلكاع هويت
ادية على اذاناتي واصرخ
لاء لااااء
ماتو ياربي ماتوووو
دخيلك اللهي طلعني منا
خلصني
اني مااكدر على عيشتهم
صوت صرخة
كبال عيني طاحت بلكاع
ركضن عليها كلهن
واني متقوقعة بمكاني وعيوني مفتوحة كل حيلهن
صوت كشمش تلطم وتصرخ
جدة حاجيني شمالج
جدددة
غمضت عيوني
لكاع لجواي احس تهتز
صوت كل طلقة كان يدخلني بدوامة من لوجع ولضياع
توقف لرمي
صوتهن يسولفن
كلشي عاد لوضعة
بيبي شكرية كبالي تشرب دواها
حدهن تكتل بلجهال
كشمش علسنك واكفة تغسل ستكانات
زين ولبيت
ولناس لبي
ام اخت زوجة ابن ابو
بعدني بمكاني بين لكاونتر ولثلاجة وعيوني تاخذ نضرة علكل
صوتها بضحك يهمس
خايبة شني بزونة
ماتكومين
كمت بذهول اباوع للكل
لناس لبيت
كشمش زرفو تزرف
ماتو لعالم ماتو
لاخية لتخافين لبيت خالي
همة دكوهم حتة يكلولهم عرفنا ابنكم الصوب غضنفر
شلون عرفو ومنو كاللهم
ولد عمي جليل كالو شايفين ابنهم
تمشيت للغرفة مكتئبة متعوبة غارقة بلضجيج الي براسي
احس اكو شي هائل يثور بداخلي
لكلام ميسعفني
ولصمت احسة يقتلني
اني موهنا
اني مانخلقت لهذا لمكان
دخلت للغرفة
صوتهن برة وهنة يمارسن حياتهن جان يذبحني من لوريد للوريد
صوت هوستهم من دخلو
صوتة من طببو لغرفتة
كلشي جنت انصت الة بتركيز
شوية ودخلن لبنات بيدهن صينية لعشة
اكلن وشالنها
كل وحدة لتهت بشي
بعدني خانسة وبعدة لخوف مسيطر على كل ذرة بية
تمددنة بلفراش
صوت كشمش تحجي بتعب
نامن ورانة كعدة من لفجر باجر
شوية وسمعت صوت شخيرهن
براكين بداخلي هايجة
اريد فضاء اصرخ بي بكل قوتي
الى ان استفرغ كل هلأفكار
عيني علساعة جزت ال١٢
غمضت
كوابيسي تسللت لروحي
اسبح بضلام روحي وبكل زاوية الي كوابيس تتكرر بنفس الشخوص والمضمون
صوت يتداخل بحلمي ماافرزنة
رمي رمي
بصوت عالي صرخخت وكمت على حيلي
عيوني على كشمش لكامت من فراشها وبشبختين ركضت للباب
صوت صراخه برة
طبي لحجرتج
لحد تطلللللللع
رمي رمي عتلك شي اشبه بلخيييال
لباب نفتحت وصراخها لمفزع
مات لفرخ مااااااااأت ....يتبع
مساء لعافية اعتذر علتأخير مسخنة كوة اشوف لأحرف واكتب تفاعلو حبايبي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!