#خنجر_لغضنفر
#البارت_السادس
#حنين_حاتم
خليني اطلع خلص مالي ضلة هنا
لاتوكف بوجهي
هلمرة لو اعرف اموت اطلع
كافي مااكدر على حياتكم
وحشكم الكم وخلوني اشرد بروحي
ايدة من حزامة سحبت شي
وصوت لأقسام
ولمسدس براسي تخلة وصوتة يصررررررررخ طلعة منا ماااكو
انة اخو كويكة واذا حكم لغضنفر سقط عنج
حكمي انة مايسقط
اذا لغضنفر حررج كرهينا
انة ليوم ارهنج
شنو شنو لعابة اني
بشر بشششر
ياناس دم ولحم
كافي لتخليني اكرهكم اكثر من هيج
اذا جان لغضنفر درع امان الهم
فأنت ماسويت شي هم جاي تحطني درع امان الك
لأن متكدر تواجههم بمساعدتهم الي بلشردة
لأن لازمين عليك لزمة ترة كلشي اعرف
حترمي نفسج ماعاش اليلزم علية لزمة
ويلله للبيت كدامي
ماارجع تريد تموتني موتني
ارجع المن لموتي
عاد خل اموت من صدك
يلله اضرب
عبالك يخوفني هلسلاح
جنك نسيت اني بت منو
ايدة على حلكي حيل تكتم ويتلفت علبيوت لكبالنة
نتر بية
طبي جوة
مااطب
لاء تطبين
وتواصلين لغضنفر برضاتج غصب عنج تودي وتواطني
ماهدج لو تطلع روحج
ليييش لييش شمسويتلك طلعت اتعس منة عوفني لاترحم ولاتخلي رحمة الله تنزل
كدامي بساع للبيت
ماارجع
تموتني موووت
اني شفت لموت بعيني هواااي لاعبالك تهددني بسلاح
اني يقيني بربي جبير
مثل ماخلصني من لحبس يخلصني منكم
طبي لتخلين حسي يعلة
مااطب
قيصر خليني اطلع مااكدر على حياتكم وروح بابا لماحلف بيها جذب افهمني انت انسان دارس ومثقف
من انعل ابو لدراسة لابو لثقافة
تردين للبيت وياي طلعة منا مااالج
تطلع روحج قبل متطلعين منا
غمضت عيوني ورخيت جسمي
وبحركَة طلعت لكلمات مني
خلص موتني لععد
صوتة من ضغط علزناد
وصوت انفاسي وتمتماتي وتشهدي
كسر هلصمت صوت يصرخ قيصصصصصر شجاي تسوي تسودنت
فتحت عيوني
شفتة
جان مدنك ولازم ضهرة
ركضو على صوتة فدعم وجدة
تقربو النة
صوت غضنفر يرعد
انة شكللللللت
انت كلت وانة هم الي كول
لو نسيت كويكة اختي وعارها مسني مثل مامسك
قيصر هد لبت خل تمشي بفالها مالها ضلة هنا
جدهم بكلمات اشبه بلصياح
الي يحكم على هلبت بلضلة هنا معناها يتزوجها حرام هاي روح ولجاي تسوونة لايرضي الله ولاعبادة
انة كلت وانتم بكيفكم بعد
صوتة متفاجأ يهمس
حلال عليك يبعد اخوك
بيدي ازفك عليها
وقيصر ميعرف شيبرر او يحجي
نداريت علي بنتر
تخبللللت
لا اريدك ولا اريد اخوك
خليني اطلع منا
تقرب الي
تطلعين
شي واحد ببالي اسوي ووراها بيدي اوديج لأهلج وعد
ماصدك بوعودكم بعد
مجبورة تصدكين
ماطولك تعرف منو لهزمني وتعرف غاياتهم واجههم بيها كدام غضنفر وخليكم ناركم تاكل حطبكم اني شلي شغل
صوتة يهمس ماااكدر مااااكدر
اي لأن لازمين عليك لزمة
ماعااااش مااعاااااش
ولج انة اشتغلهم علبارد بس خل اوصل لدليل ملموس وهنا انصبلهم محكمة لقصاص ومحد يسلم مني حتلو جان جديي
صوت غضنفر ينتر
شتهمس للبت خلصنا خل تمشي بدربها
ندار على فدعم امشي ركبها
رجع صد علية
انة كلت مالي حكم عليج بس مومعناها تطلعين من بيتنا مثل لحرامية
بصوت هامس كال
هانت عشرتنا بساع
حتة بسلام ماكلفتي روحج
وقيصر يرد علي مالها طلعة كللللت
من رخصتكم اريد احاجيها كلمتين وحدنة
بتعدو متوجهين للبيت
اباوعلة
هد روحة منهم وعلكراسي كعد
بقو واكفين يمة
عينة تصد علينة ويسوي روحة يجاجيهم ومويمنة
وقيصر بهمس يحاجيني
سمعتي شيكول
من هدج عبالج من لسعادة ولهنة
هدج من جرح كلبة
هدج لمن شاف روحة يكنلج مشاعر وبلمقابل انتي تنتضرين لفرصة حتة تشردين منة ومن حكمة
اخوي مجروح
ولأول مرة لجارحة ضعفة كدام مرة
ومن حس روحة ضعيف كدامج
هدج مثل مايهد لجناي طيرتة يختبرها تندل لبيت وطريق لردة يولا
لاتكسري اسألج بلله
ردي وصيريلة مرهم
انة اول مرة اشوفلة نقطة ضعف
جانت كويكة نقطة ضعفة جان يخاف من لموت علمودها يكول اذا متت تضيع
وهلكسرتة وضيعت هيبتة
ردي صيريلة نقطة ضعف
ردي اسألج بعشرتنة وزادنة
مدة وكت وانة بيدي اوصلج لأهلج
ارجع بس بشرط
اللهم طولة لبال احجي
اعرف ليش كاعد تتوسلي حتة ابقة
واعرف شنو لطبخة لتريد تطبخها وتريدني اصير نقطة ضعف الة حتة تم طبختك
مااكدر انة مااحط سري بحلك مرة
لعد ماابقة
دخيلك يارب صبرني
سمعيني
قبل متحجي دير بالك تجذب علية ترة بس افتهم مجذب علية متلكاني هنا
تهدد نعيمة
سمعي وديري بالج مخلوق يدري ترة متخلصين مني لو تطيرين موتشردين
انة اعرف جتال ابوي
واعرف امي نكتلت ضلم واعرف ياهو لشيع عليها
وطلعها موزينة بنضر لوادم
وسااكت تعرف وسااكت
وخال امك علج بحلوكهم
مااكدر احجي لسببين
لأول ماعندي دليل ملموس مااكدر اجازف وافتح هيج موضوع واجه اتهامات بدون دليل
ولثاني من خوفي علي
لأول فهمتة لثاني شنووو فهمني
وانتي شكو وتفهميييين
هااا شكلنة
لصبر ياااارب لصبر
خاب انة شورطني وحجيتلج
شوفي
انة مااكدر احجي وافضح لمستور لغضنفر يو عرف بروحة كتل امنة ضلم الله لعالم شيصير
اخوي واعرفة لو يذب روحة بتهلكة وينهي حياتة
لو يتخبل علوادم
مااكدر انة هذا لمجتفني كل هلسنين
مااكدر احجي من خوفي علي
وساكت وضام لوعتها هناااااا
ضرب على يسار صدرة
انة متحمل لماحملتة جبال صيريلي عون اسألج بروح ابوج
صيري عون وعيني لغضنفر
عيني على روحة ونارها
هوة بنضرة امنة موخوش ومارحم روحة من لملامة وكل هلسنين مسجون بعذاب ضميرة
وكل ليسوي يسكت لجة روحة عليها وعلى عملتة بيها
ادي من كد ماحركهن حتة بصمات مثل لبشر،ماعندة
تدرين مرة من لمرات لزم لخنجر يريد يكص ايدة
تدرين لحكت علي يصرخ انة بلية ادين ارتااااح
لا اصوب ولا انصاب
انة اديني مامنها نفع بس لمضرة لروحي وللوادم
نعقد صفقة
اوصلج لأهلي وبحضنهم
وانتي تضلين هنا الى ان اكشف لمستور
وشكد اضل يعني
ماضل شي
بس اوصل لمجانها
منو هية لتوصل لمكانها
مالج غرض
لا شوف من هسة اكلك
اي شي اسألك تجاوبني
موتريدني عون
معناها تحطني بلصورة وكلشي اعرف
مو تركنني على صفحة واضل مثل لأطرش بلزفة
لصبر يارب لصبببببببر
الكَة عمة امي لنهزمت ويانا
وورة كتلة امي ختفت ماادري وين راحت
ومن نسأل عليها مانلكَة جواب غير لصياح ولضرب
بس ماضل شي هانت
هانت وروحها لطاهرة لماتت بلا ذنب
مااارحمهم كلمن جانتلة يد بتدنيس طهارة امي وكتل ابوي ماااارحمة
مارحمة حتلو جان جدددي
شافهم تقربو سكت
وصلو يمنة
من بينهم شفتها اجتني تركض
حيييل شبكتني
واني ابجي وهية تبجي
قيصر اشرلها طبييها جوة
لزمت ايدي
كشمش شفتي حالي
صرت طوبة وواحد يشمرني علثاني
تعاي خية تعاي مالج غرض بيهم
مشيت وياها
وعيني علي من تقرب لقيصر،وكالة بهمس
نفسك بيها وماتحجي
وصوت قيصر يرد
لابيها ولابأي مرة
وسيرة لزواج لتجيبوها يمي
جا المن رديتها
بعدين تعرف
عفتهم يحجون ودخلتني
صوتهن جانن يتحاجن
من شافني سكتن
ولوجوه تكلبت
تأفأف وحسرات نجرت
كل ردود افعالهن تبينلي كرههن لرجعتي
من عدها وعرفت هلمرة ضلتي
فتحت جبهاات وياعالم شلون راح اواجه واني بطرك روحي
هلمرة اني مورهينة لغضنفر
اني رهينة قيصر وماضن قيصر كدهم
صوت جدهم ينتر طب وراي
انة كلت لبت اذا طبت لهذا لبيت واحد منكم ياخذها
مال تضل غريبة بنصنة ماترهم
عيب وحرام
ثنينهم واحد يباوع علثاني
صوتة بهمس
خوية اذا رايدها كول انة ازفنها بيدي الك
كتلك ماريدها ولا اريد اتزوج
جا ليش رديتها
كتلك بعدين تعرف
عينة تصد علية
جدهم يعاين منتضر اجابة
هوة ساكت وقيصر ساكت
حسيت نفسي مثل شي مكروه وثنينهم ميردو
سكوتة جان خنجرة الي نبت بخاصرتي هلمرة
وعيون لشمتانات علية
بصوت كلة حسرات ولشهكة تتخللة حجيت
جدي اني موسلعة حتة تخير بيهم
اني انسانة وعندي رأي وبهلأمور ماسمح اي كائن يقرر عني
ولضاهر موكد لمقام اني
صوتة هامس تقرب الي
لا حشا يابت لحسب ولنسب
انة الي موكد لمقام
وماريد اورط احد بعشرتي
انة مالي حياة
وعلية بدل لثار الف
لوادم تخاف من صيت جدي ومركزة
لو مات جدي انة اصفة مثل لجمل
لوطاح كثرت سجاجينة
جدي كالها وانة ليوم اكولها
انتي هنا خطار
تقرب الي بصوت هامس
ومالج غرض بقيصر انة اوديج لأهلج بس تانيني اكوم على حيلي
دموعي تنزل
المن ضلتي هنا
هوة مايريدني
ضالة لشلاع لكلب
طبيت للغرفة وية كشمش
مخنوكة ولدمعة بطرف عيني
حسرة كاتمة لنفس
ثاني مرة بيني وبين لطلعة خطوات وارجع برجلية
كأن لعنة صابتني من طبيت لهلبيت الي ماجاي اكدر اطلع منة
ماجاي افهم ليش يكول مااريدها
موقيصر يكول حبج
وينة لحب وهوة بنفسة رفضني كدام لكل
كشمش تحاجيني
نزيت
ها
ياها انتي وين صارلي ساعة احاجي روحي شني
ماادري ممنتبها
انتي وين جنتي من لبارحة
خية جنت فوك حبستني جدتي شكرية
ليش
خافت علية من لولد تدرين انة حايط نصيص هنا
زين ماعرفو منو الي رمة علي
خية لامحي من شارد بس قويصر مامخليهم يصوبو لغضنفر مايرضة واحد ياخذ حكة بمجانة من جنة جهال الي يصوبة يبقة ضامها الة لو تمر سنين
لجهال كلها تجي تشتكي لجدي وجدي ياخذ حكهم
إلة هوة مايخلي لاجبير ولا زغير يتدخل
والله ماادري شكلج
هلأنسان كتلة من لتناقض
ماينحزر ولاينفهم
هوة صكَد ماينحزر بس يم جدتي شكرية تلكَينا كتاب ومفتوح
ندكت لباب
دخلت بسعاد وبلقيس
يم رجلية كعدت بلقيس وصارت تبجي
اني اسفة انعام كل لصار بسببي
ليش شعليج انتي
اني بليل شفتج تدورين بكنتور لبنات
ونوب شفت بيدج ذهب ضميتي جوة راسج وفلوس حسبتيهن وهم ضميتيهن
وجنطتج محضرتها
تصورتج بكَتيهم وتردين تنهزمين
طلعت برة ومن شفتج طلعتي من لبيت تأكدت شكوكي بقيت اعاينلج من عبرتي لبيت وبرة واحد ملثم واكفلج ضليت مترددة احجي لو لاء
وية رجعتي من لمطبخ شفت قيصر نازل من فوك
شافني سألني شسوي هنا
حجيتلة
هوة بساع صعد فوك نزل سلاحة وطلع بلحديقة ورمة طلقة
بساع طلع غضنفر من لديوان وبيدة سلاح
وركض وراكم
بقو يرمون ناس على ناس
لغضنفر وقيصر ونوب طلع جدهم وعمامهم ضلو يم لباب جوة خاف احد يطب للنسوان
نوب هوة من بين لأشجار تختل وختفة
شوية وجابج جان شايلج
ماندري منو رمة علي ووكع هوة وياج
اوووووف منين طلعتيلي متكليلي
والله يانعومة مادري ممفتهمة سالفتج شنو
وماجان الي نية احجي الله شاهد كلت خل تنهزم تتجازة هية وربها اذا بايكتهم
بس من لاكاني قيصر كاعدة بعد مترهم انكر لأن لوكعددو ومالكوج قيصر راح يتهمني مساعدتج لأن شافني
اكرر اعتذاري منج وشتفصلين اني البس والله وجهي اسود حتة استحي اقابلج شفتيني من لبارحة ماطلعت من غرفة بسعاد من فشلتي
انتي مالج ذنب ليش احملج مسؤلية
مسامحتج
واحييج على هاي شجاعتج
غيرج يسكت وينكر
حضنتني وبقت تتعذر
خالها رايح لأقاربهم بعد ركبة سيارة منا ومجلبين بي
وبقت هية هنا
بيتهم يروش ناس تجي تتحمدلة علسلامة
ماطلعت من لغرفة اني وبلقيس
نسولف ونسهر سوة
جان يوم جمعة فجرية كعدنة نطلع وية كشمش ولبنات بلزرع
بلقيس وبسعاد وحدة افها من لثانية
اني شوية تعلمت
نشتغل وبسعاد تلعب وتكطع ورد
وبلقيس لبنات كلنلها متشتغلين انتي خطار
بقت تفتر بلمكان وجانت عدها كامرا تطكطك صو
نسمع صوتها تصيح
نباوع من كل مكان ماهية
صوتها قريب بس هية ماكو
وكشمش تتلاطم
جنت بوحدة صرت بثنين ربي
منين تجيني هلطراكيع هاي
خايبة هلا بلقيس وينجج
اني هنا فوك
عاينة جانت متشلبة على نخلة
ولج شصعدج
لتستهينين بية ترة احنة لعائلة كلها ساحة وميدان
لاخية ماستهين غير اختج تتسلق كناتير هنا
يلله جا ماتنزلين بلميدان مالج
صوتها بحسرة يرد
اخاف
جا دضلي هنا هسة نمشي وتضلين لوحدج
ولج والله اخاف مااتشاقة
لصعدة سهلة بس لنزلة ماتصورتها هيج صعبة
على رجليهة كامت تضرب وتعض بصبعها
هوة انة مبتلية بلوة
اختج تتختل جوة لنخل
وانتي فوك بلقمة
ندارت علية خايبة نعيمة انتي موش علوية
خاب ماتشورين بية بلكي انسطر واخلص
هيج شلون لمخابيل اضل
لا الي غرض باحد ولا احد الة غرض بية
يلله غمضي عيونج
راح اسطرج بساطوري موتفتحين دير بالج
تضحكين علي وانة لغمة مصدكة
ولج كشمش ياريت كل لعالم بفطارية كلبج
هاي منو حط هلسالفة براسج ترة لسيد بشر عاجز مثلكم
غير جدتي شكرية تكول
الله يسامحها
روحي شوفيلنا احد ينزلها
وليش ماترحين انتي
يا انتي لخير ولبركة ماتحرك خطوة قبلج
خاب ياخير هوة انة مثل جعب جدرية
وخري عني خل احشم لوادم
مشت متوجها للبيت
وبلقيس مجلبة بلشيالة الي يصعدن بيها للنخلة ومن فوك تطكلنة صور
وكشمش من بعيد تعد عليها تكلها لاتطيحين ونبتلي
وترجع تغم بروحها
انة صوجي اطلعجن
خاب انتن هم محسوبات علنسوان
شوية واجت وياها قيصر بس هوة بلبيت لولد كلهم بأشغالهم هوة جمعة معطل
عاين الها من بعيد ويضرب ايد بأيد
تقرب النة ويحجي عليها
شصعدج شوصلج متكليلي
هسة بعد صعدت شلون اموت روحي
لا عليمن بوية
ضلي فوك
دار وجهة ومشة
كشمش لحكتة تتوسل بي
نتر بيها
خاب انة ويا لنسوان ماعدي حجي
هسة بلله عليج شلون انزلهة فهميني
خوية هيج إعلى صدرك إحكَلها ونزلها شني اعلمك انة
مو هية لمشكلة بصدري
شمالة
رفع راسة للسمة
يبو خيمة لزركة ماتكلي شلون افهمها
كشمشة انتي سباعية ماترحين تنزليها وتكفيني شرج وشر روحي
يااااع جا انة مطي
خوية انة هم بشر مومطي
جا انة ماكلت هيج بس غير انت قوي وتكدر
لا جا انة ماكتلج غلطانة رورح ابوي
انة بهيج مواقف اضعف من لدودة
يااااع هاي من شوكت
مومرة نزلت حدهن من تعورت وهية فوك
جا انتي تجيبين حدهن على هاي
شمالها حدهن
خوية من لأخير انة هاي لبت ماانزلها شوفيلج غيري
شني تغشم روحك غير ماكو احد غيرك
صوت بلقيس تنتر بحركة
شدعواك عاد
ماريد تنزلني خلص لا خلفة الله عليك
اني انزل
مجرد ماحركت رجلها فلت جسمها من لشيالة وبقت مجلبة بيها من بطنها
وجهها نحك بلكرب مال لنخل
واديها حيل ملزمة بيها وباقي جسمها يتدلى
شفتة من يمي خطف وركض علنخلة بساع صعد
وتناوشها
بقة لازم ايدها وجسمها متدلي
وشوية شوية نزلها للكاع ووصلهة
من نزلت جان وجها متأذي
عافتنة وركضت للبيت
صحنة وراها ماردت
صحت على اختها تلحكها
لثولة فاكة حلكها ومنتهية من لضحك
شفتة لحكها ويحجي على كشمش يكللها
كلة منج
حرجتيني وحرجتي لبت
بلقيس:- مشيت مخنوكة
شفت نفسي بموقف صعب ومكان خطر لو وكعت مستحيل اكوم سالمة
وهوة يتعزز ميرضة يساعدني
شكد كرهتة وكرهت روحي الي طلبت منة لمساعدة
ركضت للبيت فشلانة وجسمي جان متأذي نحك بلنخلة
وجهي احس تطلع منة حرارة
بتعدت عن لبنات
سمعت صوت رجلين وراي
ضنيتها كشمش
نداريت عليها بنتر
روحي
شفتة هوة
عفتة ومشيت
حاول يوصل الي واني ابتعد واسرع خطواتي
صار لبيت كبالي
ماريد يلحكني ولا اريد اشوفة
ركضت يمين لبيت
صوتة من بعيد يصيح خاب اوكفي خل اصيح للفروخ
شني نلعب ركيضان
متكل لروحك شكو لاحكني
ترة هذا لبيت لكبالج مسكون
يمممة هوة هذا لتسولف علي كشمش
اي هوة
رجعت مبتعدة عن لبيت
تقرب الي
تردين للبيت لو ترحين يم لبنات
اروح يمهن
امشي لعد ازتج
اني اروح
براحتج
نداريت اريد امشي
ماعرف منين اروح
ولا اتذكر منين اجيت
اريد اصيحة مااكدر عزت نفسي ماتسمحلي
مشيت اهبد
صوتة من بعيد يصيح
عدل وكَبل يلحلوين عدل وكَبل
مشيت كبل واضحك
شفت فزاعة اذكر فتت من يمها
رحت بتجاها
وبقيت اهبد الى ان لكيتهن
بقينة نشتغل
مابقيت بقعة بلمكان ماصورتها
جمال لمكان ولزرع يسحرني
وموهبتي بلتصوير خلتني مااترك شي يفوتني
رجعنة بعد ماكملن لبنات
صوت حدهن من لحديقة تزمجر
تقربنة نترت بية
نزعي لا احطة بحلكج
انعام وكشمش متفاجئات مثلي
سألنها شكو داعي لهلغلط وشنو هوةالي تنزعة
اشرت على رجلية
عاينت جنت لابسة نعال لاستيك اسود قديم وتعبان
سألتهة بخجل هذا مالتج
لعفو ماادري عبالي مال واحد من لولد
شني قصدج.
هم لابسة نعالي بدون ماتحجين وهم تعيبين علي
هم نزل وهم يدبج
كشمش عاطت بيها
خاب حدهن هوة خلك نعال
وهم ياريت بي شوفة
يعضة لجلب وينجلب
ياتغديلة سبع فدوات
انة اغدي لنعالج سبع فدوات
خلفلة عليج يحدهن
انعام:- ماعرف شصارلي من كالت لكشمش هيج
بدون سابق انذار انفعلت وكمت اصيح عليها
انتي شنو من بشر متستحين
علمود نعال شحالة تفتعلين مشكلة وية لخطار
ونوب كشمش تروح سبع فدوات لنعالج
عاشت ايدج على هلذوق ولأخلاق لعالية ولأحترام
خاب شوف ياهو ليحجي
هدور علية وصخ رجلية
انتي شكد قليلة ادب
اهووووو هم حجت بلأدب
خاب ترحين فدوة لتربيتي
لا شردت بنص اليل وي زلم غربة
ولا ضليت مثل لطماطة لخايسة مشامر محد يريدني
بلقيس عاطت بيها
عيب عليج هذا لكلام
هذا شرف بنية
ولشرف موشي هين وهيج تطعنين بيها
انتي مالج غرض لاتصفين وية لعصابة
جم يوم ورادة لأهلج خليلج ذكر حلو
بقت هية تحجي واحنة نجاوبها
كشمش خانسة مالها صوت
نختمت لمشادات
بصوت حدهن تهمس بفحيح لبلقيس
خية انتي ضلي تختلي وي قيصر بلزرع بلكت يمشي سوكج مثل اختج
عوفي هلسوالف مالج غرض بيها
واشوف بلقيس بأصابعها لناعمة لمايعة حييل صفكتها راشدي
حدهن ونضربت
كَامت لدنية بصياحها ومهاددها على بلقيس
تلاثتنا لازميها وهية تريد تاكلها
وشبعت كشمش عض لأن مشبكتها
صوت خطواتة علدرج
صاح شكوووو
تقرب النة
بساع تحول صياح حدهن الى تمسكن وهية تشرحلة شلون احنة مسوين عليها عصابة ونتجاوز عليها وشلون بلقيس عمت عينها بلراشدي
ندار على بلقيس يضحك
ويعاين على اديها
رجع على حدهن ويضحك عليها
هاي لأدين مال فرخ شلون عمت عينج
خاب هوة انت دومك باطل
احشمي حدهن ترة محترميج لخاطر رجلج
بلقيس تقربت الة
بدموع وصوت كوة يطلع كالت الة
بت عمك بنت لأصول
تكول علية اتختل وياك بنص لبساتين بلكي يمشي سوكي مثل اختي
شنهووووو
صكَدد هذا لحجي حدهن
خوية اتغشمر وياها
حدهن هواي كبر راسج وهواي تتجاوزين
لاتحشمين خطار ولا جبير
ضبي لسانج ترة لا جدي ولا رجلج
انة افصم ضهرج وانعل طاهرج
لعرض هين عدجن
ندار عليها بخجل يتعذر
خوية مسحيها بوجهي
هاي وحدة مسودنة لا تاخذين بكلامها
اريد اخابر خالو واروح للبيت
يا شني خوية زعلتي منها هاي رعنة مالج غرض بيهة
مازعلت اني مشتاقة لأهلي وهية ماكالت شي ماترهم ضلتي هنا
تالي وكت حدهن الي تعلمنة شني ليصير وشني لمايصير
وحك الله اذا خابرتي خالج لتصير كتلة حدهن على ايدي
لا ماترهم فشلة زوجة ابن عمك وتمد ايدك عليها
انتي بكيفج بعد
انة كتلج د تطلعين منا حدهن تنكتل منا
بخجل بتسمت
هذهو ماروح
صوتة يهمس لكشمش
خاب شمالجن تلاثة انت
اكضها واكتلها
وترد علي كشمش
هوة انة اكدر
مثل بلاع لموس شني تغشم روحك
وذني وحدتهن اقوة شي عدها لراشدي
تلزمنا حدهن تلعب بينا جودة وكراتي
دخلنة جوة
عدة ليوم حدهن ضايجة وكلسا تكتل لجهال
مغربية وكت لصلا دكيت لباب ورحت يمها ردت اشوفها قبل متنام
جانت على سجادتها
تقربت الها ماحجت شي
عرفتها ماخذة على خاطرها من لصار لغضنفر بسببي
جريت ايدها ابوسها
حيل سحبتها مني
استغفر الله يمة
علوية بت محمد تحبين ايدي
انة احب ايدج
غير بيبيتي وابوس ايدها
ااااخ منج ينعيمة
ليش هيج كسرتي وكسرتينا
اني شبيدي بيبي ادري راح يصير كل هذا
غير قدرة الله
قدر الله على لراس بس منا ورايح ركدي
لا تسودنين بروحج يمة
بيبي اسألج سؤال
سألي
منو هية عمتهم الي نهزمت وية ام غضنفر وليش مختفية ومحد يندل مكانها
ياهو لحجالج عليها
قيصر
يمة لمرة شالت ومحد يندل مجانها
لاتجيبين طاريها كدام غضنفر
وليش محد يندل مكانها
هاا ماادري
بيبي ليش احسج تجذبين
ضربتني على راسي
خاب شني هازة كاروكج انة
بيبي قصدي احسج ضامة شي
وانتي شني صايرة شريطي تحققين وياي
بقيت احجي وياها مااخذت منها كلشي
بليل نامن لبنات واني وبلقيس نسولف
دكت لباب بسعاد
فتحتها
جانت جايبة بطانيتها ومخدتها
ها خير
هذا لحقير طردني
بلقيس:- ولج عيييب هذا رجلج
اي واذا رجلي غير هوة حقير
شسوالج
تقربت تشاور اختها
لتشاورين انعام موغريبة احجي
يريد ينزعني ثوبي
صفكت صدري حييل وضربت كصتي
ولج اني شكلت
معلية معلية اخذيني وياج
الله يعين هلولد عليج
والله كاسر خاطري
واثبت بصبرة طول هلمدة فعلا يحبج
عيني عليهن ومتفاجأة
تقربت لبسعاد
لزمتها كعدتها وصرت كبالها
بسعاد هاي سنة لحياة
من ينزعج هدومج ماراح ياكلج
راح يتزوجج على سنة الله ورسولة
ويبوسج منا ومنا
بخجل ردت اذا علبوس اني راضية
بس هوة يريد اشياء مال عفطية
لزمتها بلقيس من ايدها واخذتها لغرفتها
صاحت علية
كومي وياي
وكفت علدرج تحجي وياها
سمعيني بسعاد
والله لو غير واحد جان هسة رجعج علينة وفضحنة
ولج هذا يحبج غبرة افهمي
جرتها ومشت بيها ليفوك وتنتر
من غرفتج متطلعين
وشيطلب منج تمتثلين لأمرة
ماراح ياكلج
لزواج.حلو لتصيرين ثولة
يروح يتزوج عليج
خل يتزوج اني استحي ماانزع هدومي
حيل ضربتهاعلى راسها
نهجم بيتج موجنتي ٢٤ ساعة تفترين على راس بابا بلصلوخ
بس هذا مو بابا
هذا اقربلج من بابا
هذا صابر كل هلمدة عليج وعلى عنادج
تحطي ببطن عينج
امشي وياي للغرفة
مااطب
تطبين وغصبا ماعليج
جرت روحها تريد تشرد
حيل ضربتها على ضهرها وعضتها من زندها
كامت تصرخ ااخ
حاولت افرغها منها
نفتحت لباب وطلع صميدع
بغضب تقرب الها وحييل سحبها من ايدها
وينتر عليها
شبيج وياها ليش تضربيها
وهية خاتلة ورا ومجلبة بملابسة
بقت بلقيس تهامش عليها تريد تسحبها منة
الى ان جرتها حييل
صميدع بكل قوتة ضغط على ايدها ونتر
وانة اشم لهوة محد يمد ايدة على مريتي سمعتييييي
بتسامة نرسمت على شفاف بلقيس
وبدموع بللن عيونها ردت
اني ممنونة من ربي لأن قسم لأختي هيج قسمة
شفتي ياغبية شلون يدافع الج ومايقبل عليج وانتي معلعلتة وممرمرتة
وبضحك ويرد عليها خاب تلعب على دكات كَلبي
ماضنيت عشك لزغيرونة هيج يسل
يابختها بيك
ممنوع تطلع من غرفتها لو تصيرون لحم
وهاي انعام هنا خاف اروح اني
عليج الله تتصلين بية وتكليلي بس تطلع من غرفتها
جوة جناحة سحبها يكرص بخدودها
وهية تندار على اختها وتعيب عليها بلسانها
شوف لملعونة
والله كاسر خاطري هلصميدع
مترهم هيج يبقون لابد لولد يبزع ويمل
هوة لخلل يمة مامعقولة ميكدر يقشمرها هية طفلة
لا انعام ليغرج دلعها وسوالفها اختي ملعبة المايعجبها ماتسوي لو مهما يصير
مالنة غير بيبي شكرية
باجر لصبح نكللها يمها لحل اكيد
طبينة للغرفة نسولف ونضحك
غرفة بسعاد فوك غرفتنا مباشرةً
نسمع صوتها تصرخ
صح لصوت بعيد
بس واضح
بلقيس تعاينلي وتضحك واني اعاينلها واضحك
والله وطلع ضاملها ضمة
خليها تستاهل طكَت حوصلتة لولد
بقينة نضحك
صوتها راح
بلقيس بالها يمها كالت لازم اروح اشوفها
فتحت لباب توصل للدرج وترجع تستحي تروح
امشي وياي
لا فشلة استحي
زين خل نكعد بيبي شكرية
اخاف منها والله تاكلنلي هسة اذا وعيتها
لعد شلون بالي يمها خاف متأذية
ولحمام لفوك مابي ماي بليل مايصعد
طلعنة بلصالة
بقينة ننتضرها بلكي تنزل للحمام ونشوفها
مالها صوت
سمعنة صوت علدرج
جريتها
كلتلها تعاي خاف هذا صميدع هسة يكول مراقبينا فشلة
بقينة ورة لباب نعاين
شفنة واحد عبر لحمام وطلع للمطبخ
يم باب لمطبخ قبل ميفتحة لتفت
قيصر
عرفتة من طولة ومن دار وجها تأكدت
جان لابس دشداشة
وليشماغ على متنة
بلقيس تسألني وين رايح هذا
جريتها تعاي وياي
لازم اتأكد من شي
وشنو هلشي
امشي وياي هسة احجيلج
اخذتها ورحنة يم لشباك مال لدرج
يصير مطل على جهة الي بضهر لبيت
بقينة واكفين
واسولف الها
بلقيس:- يعني معقولة هذا قيصر يطلع منة كل هذا
ماادري اني مامتأكدة ليش هسة جبتج وياي
حتة نتأكد
شوية وشفنا تقرب للبيت
طولة ولبسة ومشيتة وليشماغ اسود نفس الجان حاطة على ركبتة
هية ترجف واني ارجف
جان بيدة شي شايلة
دخل للبيت وبقة لبيت يطفا ضوا ويعتلك
واحنة مخلوسات وحدة تباوع علثانية
ماطولج وياي تعاي لازم اواجها بهذا لشي واعرف شنو قصة هلبيت
وانتي هيج متأكدة راح يحجيلج
لتخافين يحجيلي عاقدة ويا اتفاق
هاي شنو يابا اتفاقات من ورانا
شعبالج لعد
بقينة بلغرفة ولباب مردودة
لا بسعاد نزلت ولا قيصر بين
ورة ساعة تقريبا
سمعنة صوت لباب علكيف نفتحت
ثنينا طفرنا
فتحنة لباب
طلعنة صار بوجهنا
عيونة تخازر متفاجأ
تقربت الة
وين جنت
ايبااااخ تحاسبيني نعيمة
انت كتلي ماجذب عليج وكلشي احجيلج
زين وهاي شنو جايبتها وياج صورة جرجوبة
بلقيس ترد علي اني لشاهد
هااا وان شاء الله بلسلامة راح تعدمني رمياَ بلقنادر
لتستهزء قر واعترف وين جنت
والله جنت اعقد اتفاقيات وية بلادن
اهووو
خاب وخري من دربي روحن اقرن قصص حب احسن الجن
قيصر ماوخر اذا متحجيلي شنو قصة هلبيت الي كلها تصيح مسكون وانت تدخلة تتخنس ومتنكر
نعيمة خل اصعد لحجرتي وكسري لشر واخذي هلفختاية ونامي
قيصر وحق الله اذا متحجيلي هسة الم هدومي واطلع من لبيت
على كصتة حيل ضرب
يطم روحة ليطيح سرة بحلك مرة ولا هلذلة
تحجي لو شلون
احجي بس وحك من خلق لأنس ولجان
اذا طلع هلخبر منج لو منها ثنينجن وياي اجرجن
بلعت ريكي
شتقصد
هذا لبيت ينعيمة....يتبع
مساء الخير
من بين انشغالي بزوارنة خطفت كم ساعة كتبت الكم لبارت واستميحكم عذرا بأن اوقف لقصة الى مابعد لأربعين اغلبكم تعرفون اني من محافضة كربلاء واريد انال شرف خدمة زوار الحسين ع
وبعد لأربعين اوعدكم ببارتات قوية ومليانة احداث
شوفوني تفاعل حبايب وصلنة بارت ٦ ولساكم تفاعلكم موشي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!