#خنجر_لغضنفر
#البارت_التاسع
#حنين_حاتم
صوت يتداخل بحلمي ماافرزنة
رمي رمي
بصوت عالي صرخخت وكمت على حيلي
عيوني على كشمش لكامت من فراشها وبشبختين ركضت للباب
صوت صراخه برة
طبي لحجرتج
لحد تطلللللللع
رمي رمي عتلك شي اشبه بلخيييال
لباب نفتحت وصراخها لمفزع
مات لفرخ مااااااااأت
بلكاع وكعت ادية على اذاناتي واصرخ
منو مات منوووووو
منو ماااااااات
لا لاااا
ماريد اموت
بابا لحكننيييي
ماما تعاليلي ماريد امووووت
لباب نسدت
لكهرباء طفت من كل لبيت
لنسوان يمنا كلهن طببوهن
جنت اسمع صوت من يصرخ بيهن
طبن بهاي لحجرة ولحد تطللللع
لفروخ لمنها
وصوت حدهن يرد علي
مات ابني
ابني مات غضنفررررررر
بصراخ يرد عليها طبي طبييييي
ناس حاضنة ناس ولجهال تتباجة
لغرفة زغيرة كلنة بيها
ارجف جنت ولافة راسي بلبطانية
ادين كشمش على ضهري
انعام شمالج خايبة طلعي راسج راح تختنكين
عوفيني عوفينيييييي
الله ياخذكم
الله ياخذ قيصر لورطني
الله يطيح حضي يوم طاوعتة
صوتها يصرخ
ولجن ناوشنياهاااااا
ناوشنياها بت لمعدوووووم
من طبت النا ماشفنا لراحة
من جوة لبطانية ومن بين لرمي واسمع صوتها
ماعرف شصار
حسيت احد حيل نهبد علية ونام فوكي
صراخها وصياحهن
لرعب لجنت احسة ماتوصفة كلمات
من بين لشخص لنايم فوكي ادين لزمن رجلية ونسحبت حيل
وصوتها يصيح
نطنياها خل اطلعها برة
خل اشمرها الهم خل تلحك ابوها ونخلص
خايبات جيبنها ليوم اشرب من دمهااااااااااا
كمت اصرخ بهستيريا
لا لااااااااااء
عوفيني عوفيني ماسويتلج شي عوفينييييييي
لباب نضربت وصوتة يصرخ شكووووو
صوت كشمش بخوف ترد علي خوية انعام راح تموتها حدهن
وبيبي شكرية تحاجي
يمة انت مصوب
ادخل يمنة لولد يسدون عنك
صوتة بنتر يجاوبها
هوة انة شمسوي هسة
واكف على حجرتجن خاف يطبون وكاض سلاحي
حدهن هودي هودي رحمة لخالقج ولج لموت على بيبانة وانتي تعاركين
ابني مات يغضنفر
نطو الي
نطونيااااااااا
وهاي ال..... طلعوها منا طلعوووووووها
اذا ماتطلعها منا املص راسهااا هسة
بعدني جوة لبطانية متقوقعة ماعرف شنو صار بس اسمع صياحهن وبيبي شكرية تهدي بي وتكلة
يمة عوفها مالك غرض بيها ستهدا برحمانك جرحك اخضر
بصوت عالي يصرخ
حدهن اذا اسمع صوت انة كتالج ليووووووم
ضرب لباب حيل وطلع
بقت تدردم وتحجي
نوب ترجع تدك وتلطم وتصيح ابني مات مات من وراها
صوت كشمش تهمسلي
نعيمة شمالج تخربطيتي
خايبة ردي
بهمس جاوبتها
مابية شي مابية
صوت لرمي بطل
كامت تروح علباب ويرجعن يجيبنها تريد تطلع
وغضنفر برة واكف مايخليها
هدوء صار برة
كلها مترقبة
صوتهم بلصالة يحجون وغضنفر يصيح
ليوم احرك ديار بني سعد عليهم
يدكونة واحنة اهل لحك
بعد ماكدرن يلزمنها
طلعت تصرخ وتدعي علية وتغلط
تسأل على ابنها
بهدوء يجاوبها
عبرنا من لخلفي من لحايط واخذو فرهود وصيهود للمستشفى وهسة فدعم لحكهم
اخذوني
اريد اشوفة اخذوني
بنفس لهدوء جاوبها
خوية طبي لمن غريضاتج وامشن نأمن عليجن يله نكدر ناخذ حكنة
يلزمونة من ايدنة لتوجعنا
بيجن
اخذوني لبني
مااطلع لأي مكان اريد ابني
صاح على كشمش يريد ملابس
طلعتلة بيبي شكرية ببجي سألتة يمة وين لويلاد
طلعو وراهم بلسيارات
اديها حيل تضرب على وجها
يبووووو هسة يسبكولهم ويموتوهم المن لحكوهم
لامايضلون وراهم بس يزتوهم من ديارنا يخوفوهم
حدهن بلصالة تدك وتلطم وكلهن يمها
نعناعة تضرب على رجليها وتحجي
راح لفرخ راح
خل تفوخ بت لمعدوم
خل تفووخ هية وقويصر
رجعت تسألهن
خايبات فرخ لدوج وينها شو ماهي
طلعت راسي من لبطانية
تلفتت
بسعاد
عزززة وينها
زوري تعاينلي
ماادري بيها ولا شفتها
نهضت وطلعت برة اتلفت برعب ادور عليها
يمة ماتت يمكن من لخوف
عيونة علية صدت ورجع دنك
باوعت لروحي بطرك لدشداشة
دخلت ادور على حجابي ماكو
جريت شيلة بلكاع جانت لبستها وصعدت ليفوك
طبيت لغرفتها ماهية
رجعت على لغرف لفوك وزوري وياي
مالها وجود
نزلت لدرج وببالي حجايات بلقيس من وصتني بيها
واني انزل سمعت صوتها
ركضت للغرقة
ولج وينج
صوتها يرد فوك فوك
باوعت لحف ستن وبطانيات
من جواهن مدت راسها
شحالها تبجي وتناشغ
نزلي تعاي ماكو شي راحو
اريد امييييي
دتعاي ياعيني منين نجيب امج هسة
علكيف دندلت رجليها وطفرت
ركضت علية تبجي
نزلنة اني وياها
جان كاعد علدرج
واحنة ننزل نزع فالينتا وبيدة دشادشة يريد يلبسها
ركزت على ضهرة
جرحة بي دم
لبسها وكام
من نزلنة لتفتت الة
وكتلة ترة جرحك
ايدة على حلكة وهمس ويفتح عيونة
اشششش
سكتت
شوية ودك لتلفون
ركض علي
كلهن عيونهن علي
صوتة بهمس
هافدعم
متأكدين
لا إلله إلا الله
صوت صراخهن كبن فد كبة
عيني علي من كال بصوت عالي
لااااااء
لاترحون ولاتوصلون
مايندفن حنون كبل مااحضة بجتالة
دم حنون مايروح هدر
بعدني صافنة علي واعصابي تتراجف
مات لطفل يربي
تقربت الة حيل تضرب على صدرة
كلة منك
مات ابني
من وراككككككم
جان مدنك مارفع راسة
سلاحة بيد ولأيد لثانية لازم ضهرة بيها
طلع يمشي بعجل وبيبي شكرية ورا
ولك يمة اكسرو لشر
ماتكضي ولك غضنفر هم يردون علينا ويصوبون واحد من لويلاد
يمة خلها للعشيرة تحلها
صوت نعناعة تصرخ عليها
هامج غضنفر بس ماهمج لطفيل لمات من ورا احفادج
ماردت عليها
كعدت علدرج وايدها على بطنها تلوج
طلع وعافهن يصرخن
وحدهن حيل تخرمش بوجها وتصرخ صراخ مفززع
صدت علية
بشبختين صارت فوكي
احس شعري ينفصل عن جلدة راسي
بأدين رجال وفك حيوان
حيل تضرب بية وتعض
وبكل صوتها تصرخ ليوم اكتلها حلال
كلهن يفكن بيها مني
وخرت عني كعدت بلكاع وحيل تصرخ يبو بكل قوتها وهنة وياها
كلبي يتكطع عليها
حقها ام
كمت من كدامها ختلت جوة
دخلت يمي كشمش
خية ضلي هنا لاتطلعين
سدت لباب وراحت
بقيت اسمع صوت بجيهن ولطمهن
كلسا تطب يمهن مجموعة
للعصر لزلم ماكو محد منهم بين ولا جابو جنازة
كلسا تنفتح لباب ويدخلن نسوان من اقاربهم يحطن غراضهن وعلاليكهن ويطلعن
دخلت وحدة جانت زغيرة
تقربت الي وسالتني
خية ماعدج خردة انطي للفرخ
لا والله
دردمت
شمالها لوادم ياهو لكلة وكال ماعندي
طلعت برة
من فتحت لباب صارت كبالي حدهن كاعدة وكلهن ملتمات داير مدايرهل جانت منتهية
وجها وثوبها مشكوك شعرها مملختة
خطفت كشمش بساع سدت لباب علية
شوية واجت بيدها بسعاد تبجي
دخلتها تلوم بيها
شبيج وياها
خية لكوم كايمة ولعرب نايمة
لوادم تلطم وهية وية لفروخ لكيتها تلعب توكي برة
صكَد جذب شمالج
شطولج خاب ليشوفج يحوفج
عافتها يمي وراحت
بقت تحوص تروح للباب وترجع
تقربت يمي وهمست
شكد خبيثة كشمش ماخلتني العب
هههههه فزت عليهن كلهن
يعني واذا العب توكي
حتة بلقيس اختي وبنات خالتي كبار وهم جانن يلعبن وياي جنة نصعد بلصطح ونلعب
ليش هنا كلشي مايعجبهم وكلشي يكلولي عقلي وكبري
اني شمسوية
هية لعبة مومقياس للعقل من عدمة
بس مووكتها تدرين فاتحة ولناس عدهم مصاب
اي قابل جاي اركص اني
حبيبتي انتي محسوبة على صميدع اذا احد يشوفج يلومو الة ويحجون علي على اختيارة
لا لا كلشي ولا يحجون على صميدع
هااا
هاي من شوكت
بتسمت بخجل ودنكت
اني احبة هوة فد حبااااب
بس يضوجني يومية يجبلي شيشة دبس يكلي شربيها كلها
اني افرغها بلحمام
هوة فد يفرح من اكلة اكلتها كلها
مدري اضحك مدري ابجي
وهية تحجي طبت جوكة نسوان بصراخ هرجن لبيت هررررج
باب لغرفة نفتح ونترس نسوان وجهال لصالة ولأستقبال بعد ميشيلهن كامن يطبن بلغرف
ناس تفتح كناتير وتدحس هدومها وغراضها لكناتير يردن ينفجرن
وناس لفت راسها وتمددت
ولجهال ناس فوك لجرابي وناس جواها
اني وبسعاد بركن لغرفة مثل لمنبوذين
من صراخ كشمش وحجيها علية احس كل لجاين تلعب روحهم مني ويكرهوني
لزلم مالهم حس لبيت خالي مختلي ولا رجال
لاعمامهم لالولد ولاحتة جدهم
وحدهن كلسا تشرد تريد تلطع وتصرخ خلوني اشوفة راح يدفنة غضنفر ومايخليني اشووووووفة
ويجيبنها سحل ليجوة
اسمي مايوكع من حلكها وكلما تنفتح لباب وتصد علية تبقة تحجي وتدعي وتريد تجيني ويلزمنها
تالي كمت ورة لباب ختلت صرت بسدة حتة ماتشوفني
عصرية صوت صراخهن علة حيل
صوت زلم ولجهال تصيح اجوو اجوو
كامن كلهن فتحن لباب وطلعن
تسللت رجلية ليبرة
جانن مشكلات دائرة ويلطمن بطريقة غريبة
يطبكن اديهن ويضربن على خواصرهن حيل
وهية بلكاع ممددة رجليها وفاتحة شيلتها ثوبها مشكوك وصدرها طالع
بصفها امها واخواتها هم مشككات لثيات ولشعر مملخ
دخلو من لمطبخ جانو قيصر وغضنفر لازمين لتابوت من لمقدمة
مدنكين كلهم ولكسرة واضحة عليهن
عيوني علي
دشداشتة كلها دم محزم بشماغة
ابو حنون شاك لدشداشة ويلطم حييل لازمي خوانة
نزلو لجنازة بلكاع وطلعو
من مشة شفت دشداشتة من ورة من منطقة عمليتة جان بيها بقعة دم
وبمشيتة يكَزل
بقت لجنازة جوة
لطمن لطم بحياتي مشايفة هيج شي
لصدور مملخة حمر وتتجارة دم
لشعر تارس لكَيعان
لوجوه مزلغة
بسعاد خاتلة جوة تخاف منهن
كعدت علدرج ابجي
شوية ودخلو شالو لجنازة
هنا صارت تتمالخ ممالخ وياهم
وترجع على غضنفر حيييل تضرب بي بكل قوتها
وية كل ضربة على صدرة جنت احس روحي تشوغ
وكلبي يتكطع
ضهرة علية وعيني على مكان عمليتة
بقة واكف ويتلقى عنها لضربات راسة متجه علجنازة ووجهة تجتمع بي كل ملامح لحزن ولغضب
ماعرف شوكت كمت من مكاني وصرت كدامة
وحيل اصرخ ضربيني الي
اني لسبب
اني الي خربطت حياتكم من طبيت
من وراي راح ابنج هوة مالة ذنب
ماحسيت غير على رجلها حييل تدوس ببطني
جنت بلكاع جوة رجليهن
صوتة يصرخ
وحييل سحبني من ايدي وصاح
كومي
وبيدة ليبرة سحلني
جنت امشي ويا وايدي لازمة بطني
تلمست حلكي جان اكو دم طالع
برة وكف ويهمسلي
ااخذج للمستشفى بيج شي
لا ميحتاج
صيري سباعية لاياكلنج
هسة بلله وين اوديج منهن ماتكليلي
دموعي نزلت
طلعني منا فدوة
اني مااكدر على عيشتكم ومارجعت بارادتي شوفة عينك قيصر هددني
جر حسرة طويلة وهمس
يجرالج يلحضيرية بس خل تفض سالفتنا
بيدي اطلعج بعد ماترهم ضلتج حدهن نشبتلج ماتعوفج بحالج بعد
صاح كشمش
وكاللها
صعديها فوك وديري بالج عليها
بتردد سألتة
خوية لجنازة جبتوها شني كتال حنون لكيتو
ايدة على جيبة تاشر
عاينت علي جان بي لخنجر وجيبة بي اثار دم
حيل على وجها ضربت
يعني هذا دم جتال حنون مودم حنون
طبن جوة راح تجي سيارات تاخذهن هسة
وين تردون بينا
ترحون للبصرة يم نسابتنا
وفاتحة حنون ولوادم لجايتنا
دكَيناهم ودكَونا
كتلو منة وكتلنا منهم
ولجاي مايندرى شني
نأمن عليجن وهناك فاتحتنا تتم على حسب لأصول
نطيهن خبر يتحضرن ولمو كلشي تحتاجو
ندار علية وهمس ديري بالج على روحج
انة ضال هنا كاعدلهم كعدة
كشمش بدموع ترد علي
خوية خاف يموتوك
هلة بلموت جا لماتو احسن مني
دخلنة جوة
صعدتني فوك ونزلت
بقيت بغرفة بسعاد
من لشباك اعاين الة
جان كاعد بلكاع بلزرع ويدخن
يمة فدعم ماعرف شيحجون
شوية واجة واحد من لجهال نطا دشداشة
وهوة كاعد نزع دشداشتة ولبسها
ايد فدعم تتلمس جرحة
ماعرف شيحجي ويا
دفع ايدة وكام على حيلة
شوية ودخلن سيارات نص ريم وكفن بلباب وبدو لولد يطلعون بغراضهن وبصعدون بلسيارات
صعدتلي بسعاد
يلله تعاي راح نروح
بساع كومي حتة نحجز لجامة
اي موهية زفة
كمت وياها
واوصي بيها ركدي وعقلي مالج شغل بلجهال ضلي يم كشمش لتتختلين شتغلي وحطي ايدج
راح نروح ببيت عالم غربة
فشلة
يلولمون صميدع على ختيارة
بقت تهز راسها وماعرف اذا لكلام يتعدا طبلة اذنها او لاء
نزلنة جانن راكبات كلهن
بيبي شكرية ونعناعة متانيات لناس كلها تصعد
وكاعدات يقفلن بلبيبان
طبيت للغرفة طلعت غراضي ولبست عباتي
ومشينة
طلعت نعناعة ركبت
وبيبي شكرية ورانة قفلت لباب
جانو واكفين برة كلهم
وكفت يمهم تحجي وياهم
مشينة
ايدة سحبتني
نداريت اعاين الة
جان يباوعلها وايدة بعدها حيل عاصرة ايدي
وصوت بسعاد يهمسلي
يلله بساع اخذن لجامات كلها
عينة عليها وصوتها يهمسلة
اي جدة خليها هنا يمك تروح تموتها حدهن
نوب كلها تعذرها ويكولون خطية محروك كلبها
هدني
فدعم يرد عليها
هوة بايع روحة لبنية بيش طالبتها تضل هنا
حييل تضرب على صدرة وتخزر
ولك فدعم مالك غرض سد بوزك وكرمنا بسكوتك
وترجع تقنع بي
جدة تروح تموت لفرخة بيدها خليها هنا يمك
ستمر فدعم يحجي ويكللها
شلون تضل هية ويا هنا وحدهم جدة صكَد تحجين
وهية تعض بصبعها حييل وعلى صفحة سحبتة
اسمعها تكلة
سودة بوشك ووش امك ماتنلصم
حلككَ فكاكة
خاب انة كوة اقنع بي وانت تنبص
كعد بلكاع ودنك
بصوت ناصي يحاجيها
جدة اخذي لبت انة اتورط بيها هنا
لاجدة فدوة اغديلك
شوف حالها
حيل سحبتني كدامة
وتلزمني من فكي تعصرة وتراوي خراميش حدهن
تدور بوجهي من كل لجهات وتراوي
عينة بوجهي يتفحص لأثار
خزرة حاجبة لمبتور من لنهاية ولشامة لجبيرة ليمة
شفتة الي لونها ازرك على بنفسجي
لون بشرتة لمخملي
نضرة عينة لبيها حزن وتحدي وقلق وقوة وغرابة وتناقض لكون كلة يجتمع بيها
دمعة من عيني نزلت
خايفة من لروحة وخايفة من لضلة
راح لأمان وغادر حياتي
رفعت عيني
صوتة بهمس رد
امري لألله خليها
مشن واني واكفة
عيني عليهن
نفض روحة وكام على حيلة
دخلي جوة
طبيت للمطبخ بقيت كاعدة
وهوة بلحديقة يدخن
معدتي احس نار تلهب بيها من لجوع
فتحت لثلاجة جان اكو اكل اشكال
كمت اخذ واكل شامي عامي
صوت وراي
درت وجهي اللكمة وكفتلي بزردومي
همس
كملي اكلج ودخلي جوة
همست لا مااشتهي
طبيت
شوية وغربت
كهرباء لبيت كلة طاكة
لبيت اضلم لغرف ضلمات فتحت باب لمطبخ ولأستقبال يدخل منهن ضوة
بقيت جوة بلغرفة
صار اليل وهوة برة مادخل
وبخوف وترقب مرن لساعات
تجاوزت ل٩.
صار لبيت ضللمة مينشاف كلشي منة
شعاع ضوة دخل
وتقرب الي
كمت على حيلي
صوتة يهمس
هذا فانوس راح اخلي بلصالة
اني برة
تردين شي
سلامتك
طلع برة
حاولت انام
محاولاتي لفاشلة نتهت واني احضن قميص بابا وعلى وجهي اخلي وابجي
كل امان جان بحياتي غادرني
وتبدل بضياع
ومصير مجهول
كل يوم يحتدم لصراع وكل يوم تكبر لورطة وكل يوم احس جذوري تنبت بهلمكان وتسحبني هاي لأرض
احتضن قميصة
ولوحدة تعصر بروحي
وهم انتضار لخلاص يتلاشة يوم بعد يوم
صرت احس لخلاص حلم صعب لمنال
بهذي اليلة تحديدا جنت انتضر شي
بس مااعرف شنوة
ماعرف شوكت غفيت واني احضن قميصة
جنت احس بلأمان من احتضنة
بلأحرى جنت اوهم نفسي بهلشي
صوت يضرب على باب غرفتي
اوعة وارجع اكمل نومتي
الى ان سمعت صوت شي نكسر
كمت على حيلي مفزوعة
ركضت برة
اعاين لفانوس بلكاع ومكسور وولنفط متبدي ولنار ماشية بية
تمشين خطوتين اريد اركض للمطبخ اجيب ماي
عثرت بشي
وصوت ونة
ايدة تلمست رجلي
ومن جيبة طلع شخاطة وحطها بيدي
شخطت عود ضوة خافت صار
شفتة جان بلكاع اشبه بلواكع
ايدة لازمة ضهرة
دم بضهرة
بهمس يحاجيني
بلكاونتر اكو شيشة جيبيها
بساع جبت دولكة مشي درتها علنار
خفتت
رحت للمطبخ اشعل بلعودان وتطفة كوة لكيتها
جبتها واجيت
ركبتها للفانوس جان باقي بي نفط شوية
شعلتة وخليتة علدرج
تقربت الة
سألتة شبيك
بهمس رد
مابية
رجعي نامي
بس نطيني كطن من لمطبخ
اغلب غراض لبيت جانن متضررات من لرمي
طلعت قطن تقربت الة
جان نازع دشداشتة وصدرة عاري
خليتة بلكاع ومشيت
صوتة لمتردد يهمس
بوية ثكلنا عليج
مانوش ضهري نضفي الي
كعدت ورا
واخذت لقطن نضفت لدم
جنت اضطر الزم ضهرة حتة اكدر انضفة
صوتة يهمس الي
خلوج الي سجينة خاصرة
وذراع انلوي منها
لصبح اخذج ائمنج عد جماعة
منو ذولة لجماعة
مالج غرض خوش اوادم لاتخافين
لفيت ضهرة
وكمت
دخلت للغرفة سديت لباب صارت هندس
ضربات ايدة علباب بخفة
فتحتها
مدلي لفانوس
خلي يمج انة ماحتاجة
اخذتة ودخلت
بعد ماكدرت انام
طلعت اتوضة لكيتة طالع من لحمام لاف جسمة بلخاولي
بقيت واكفا
تانيتة جزة لصالة ورحت نزعت حجابي وتوضيت
صليت
ودعيت وسالت ربي لفرج
شوية ودك لباب علية
طلعت ويا
ركبنة بسيارة مو مالتهم
لطريق كلة جنت ساكتة وهوة ساكت
وصلنة لمنطقة هم زراعية بس بعيدة عنهم
نزلني
جانن مررة و٢ بنات طلعن تلكنة
ولد شاب واني ابوس بيهن بعد مااكلني بلسلام
اسمعة يهمس للولد
لو متت لتردها لأهلي
تعبرها حدود لسعودية وتوديها لاهلها للمخيم
دس فلوس بجيبة
شكد متكلفك طلعتها هذا لمبلغ راح يكفي
شدد بكلامة وعادة علي
وخر عنة وتقرب الي
ببتسامة يأس جان يحاجيني
انة لو متت خايف من شغلة وحدة
ابوج يلزمني من خوانيكي
بهذلناج وتعبتي ويانة
لخنكة لجانت بصدري ماطلع مني حرف
مشة للسيارة واديهم تلوح الة
احس شي غادرني وراح ويا
صوتي يهمس دير بالك على نفسك
صوتي ماتعدة متر ولا وصل الة
ركب لسيارة
عينة علية
بتسم بتسامة يأس وخذلان وهمس
ديري بالج على نفسج
دخلوني جوة
هلو ورحبو وماقصرو وياي مقدار ذرة
بس ماجنت افقه حرف واحد من اليحجو
ولا عندي عقل يستوعب منهم شي
جنت احس كلشي بية راح ويا
خوفي علي تعدا وتجاوز كل لمقاييس
شعور لذنب دمرني وسلب راحتي
وعدن لأيام يوم يجر يوم اني هنا
لا اعرف شي عنهم ولا احد سأل عني
تعبت للحد الي صرت اطلب لموت من ربي بكل صلا
كلماتة وصوتة تتردد على مسامعي
كل يوم اكعد اعاين من لسطح من نصعد اني وبناتهم نفرش لفراش
اعاين للكمر واحاجي
ياترى متت ياغضنفر
نلت امنيتك لوحيدة
لو بعدك تدورها
معقولة عايش ومسألت عني
زين ليش من اسأل ابنهم يكلي محلولة خوية ومايرضة ينطيني اي معلومة
بقيت بحيرة ووجع كل يوم ينعاد علية
عصرية كاعدين اني وبناتهم بلحديقة يخبزن واني يمهن
سيارة وكفت
كلبي فرفح من شفتها
شفت قيصر نزل منها لو اني طلعلي جناحات احس
ركضت علي مثل لشايف واحد من اهلة
وطلعت لكلمة من شفافي بغصة
غضنفر بخير
حاجيني قيصر
بتسم وهمس
سنارتك دومها عامرة يغضنفر
تقرب الهم سلم ويتشكر منهم ويتعذر علتأخر
اشرلي لمي غراضج وركبي
بساع ركضت لميت جنطتي
سلمت عليهم وتشكرت منهم وركبت ويا
لطريق مر علية بسنة
نزلت ويا
دخلت جوة
كبالي جانو كلهم
لبنات وجهن يضحك
ركضن علية كلهن
اتلفت ادوره ماهوة
واسال بيهم كشمش وينها
ضحكة طويلة نجرت من لعيبية
صديت على غرفتة طلعت من لغرفة بنية شكلها غريب ماشايفتة عدهم
صوت بسعاد يهمس الي
هاي لبنية .........................
بلقيس
طلعت من بيتهم مخنوكة
ماودي اروح
بدي ابقة لعمر كلة على راسها ويمها
اعلم وافهم واطمأن عليها
طلعت وكلبي يمها ولطريق كلة اذرف لدموع
اذكر بيوم كلولي اخذوها فصلية
مانمت للصبح ابجي
وصلت بية خابرت بابا وكتلة كللهم ليعقدون عليها وخل يجون ياخذوني بمكانها
كلي فات لآوان
ولخوفني اكثر اعنادها
خوفي جان انو يجزع لولد ويحجي لأهلة ويخابرون اهلي و يكولون عايبة ومن هلأمور
وصلت للبيت اهلي من شافو شكلي تخبلو
شكد قنعت ردت
كلتلهم بجيت لأن فارقتها وراح اشتاقلها
ماصدكوني وكل ضنهم ابجي لأن هية موبخير
ماانكر انعام وكشمش صايراتلها اخوات وسانداتها
بس لخلاني اقلق هوة عنادها وية لولد
امي بيومها تخربطت
خالو اصر اتصل بيهم لأن جدهم وصانة من نوصل نطمنهم
خابرت جاوبتني كشمش
وبشرتني بيهم
هنا يلله كدرت اجر لنفس
من فرحتي كمت اهلهل
امي تسألني شكو شكو
نطو لتلفون الها
حجت امي وياها
جانت طبيعية وتضحك وتسولف
امي طمأنت ورتاحت
يوم ثاني فزيت من غبشة
ماكأن كم يوم
تعودت على توقيتهم
حتة لأكل من اكلة احس مابي نكها
لهوة من اشتمة احسة يختلف
كلشي يمهم يختلف
بين بيتهم اليضج بلحياة
لجهال وهوسة لنسوان الي ميكعدن ولا عدهن وقت راحة
لخطاطير وخبصتهم ولدهم
لسوالف وللمة
كلشي كلشي هناك حلو والة نكها
لزرع لمكان نقاء لجوو ولهوة لعذب
بين بيتنا الخالي من الحس
هدوء وكلمن بغرفتة
جانت بسعاد مسوية للبيت صوت
رحت سحبت لفلم وورة شكم يوم جبت لصور
احس كلشي بلصور حي
لناس ولزرع ولمكان مو كأن ورق
يلامسن شغفي بهلمكان لحلو ولطبيعة البديعة
بقة شي مني هناك
ماعرف بسبب خوفي على بسعاد
أو لسبب حبي للمكان الي كل متر بي هو لوحة فنية تستحق التامل والتصوير من كل لأبعاد
ورة مدة طلع تعيني
داومت بمدرسة بعيدة حيل علينا
وجنت اركب ٣ سيارات يلله اوصل
تبهذلت حيل
بابا قترح انو يعلمني لسياقة وبدل ماسيارتة واكفة بلباب اني اروح وارجع بيها
عصرية كاعدة ودخل هوة وابن عمي
اني ويا نفس لعمر
اني كملت دراستي وهوة بطل
من لزغر جانت امة حاطة بالها وياي
شوف بلقيس درجاتها اعلى منك
شوف بلقيس نجحت وانت لاء
الى ان خلقت بينا لعداوة ولغيرة ولكره
بقينة كلما نكبر كلما يزيد هلشي
ويوم بعد يوم تشتد لمنافسة ولغيرة
لدرجة وصلت بي من نجحت من لسادس يحرض ابوي على انو يحرمني من دراسة لجامعة
من باب لخوف ولحرص علية
بس بابا مانفهلة
هلشي خلا يرجع يقدم خارجي سادس ومتحن ونقبل هم تربية ونفس قسمي بس بتكريت
جان سمين صاحب صدر عالي وبطن متقدمة كصير احمر ابيضاني مصلع من مقدمة راسة بس هوة يصزين صفر حتة ميصير شكل شعرة بشع
عينة وسيعة بيها لون اصفر يشبه امة خلق واخلاق وطبع
جان لولد لوحيد على ٣ بنات
اخذ نصيبة من لدلال بما فيه لكفاية
بس جان عقلية اقتصادية محنكة رغم صغر سنة بس يملك محل تأسيس وانشائيات
وعندة شراكة بتريلة وية صديقة
رغم ذلك سيارتة اتعس موديل
لبسة دشاديش نادرا ما يكشخ
صداقاتة كلة وية شياب وزلم كبار
ورغم الحاح امة لشديد علزواج
جان داىما يأجل بحجة بعدة ممكون نفسة وهسة صارتلة لدراسة حجة
بيومها بابا جابة حتة يعلمني لسياقة لأن هوة مافارغ
حطني امام لأمر لواقع وورطني بي
لبست شلون مجان وطلعت ويا
مااخذ سيارتة راح على سيارة بابا رغم نبها انو لسيارة كايمة
ركبت يمة على اعصابي شكد كبرت واحس نفسي عقلت بس ويا ارجع طفلة ويرجع عنادي وعركنة ولمناكر كأن جهال
يحجي واني عيني علجامة واهز راسي
نزيت من سحب ايدي وخلاها علكير
وبقة يحرك بي ويحجي
منا تسرعين منا بريك منا كذا
سحبت ايدي حيل منة
وكف واشرلي نزل خل نتبادل
شنتبادل تريد تفلش سيارة بابا
لعد صارلي ساعة المن احجي وافهم
ماجنت وياك
عجييييب لعد وين جنتي
هسة شكو تعصبت
متريد تعلمني كول
استغفر الله
باع شلون تتحججين
تعاي صيري مكاني لتخافين اني وياج
صعدت
صار بحضني بحجة يخاف اسوي شي بدون فهم
ضايقني حيل قربة
خل ارجع بمكاني
اني دجة دبنكَ ماتعلم لتعب نفسك
لاياب حشاج اني لدجة بلعكس انتي فطنة وسباعية
خل ارجع لمكاني عفية
وكفها ورجعت
صوتة يهمس
ليش تكرهيني بلقيس
وليش داكرهك
سألي نفسج
متوهم
ولكلام لتدزي الي بيد بسعاد جنتي
يا كلام
لرسائل الي ورقهن خشن من دفتر ملاحضاتج لأحمر
هاي شدتحجي انت
انتي ناسية لو دتنكرين لو شنو بلضبط
اني ماعرف عن شنو دتحجي اصلا
ماشي ماشي
بقة ينافخ لطريق كلة
تانيت ارجع للبيت واتصل ببسعاد واسألها
من لجكمجة مدري شطلع عيني للجامة مانداريت علي
من نزلت من لسيارة بهمس كتلة حتة لايسمع بابا
ميحتاج بعد تجي
وبصوت عالي يرد علية
ماجاي عليج بيت عمي هذا
دخلت جوة
دخل هوة وبابا
بلمطبخ واكفة وطب يمي
علميز حط شي ونتر
محتفض بيهن لأن ادري بيج جبانة وموكد لمواجهة
طلع
فتحتها
جانت ورقة من دفتر ملاحضاتي
اول جملة مكتوبة حرفيا
اني اكرهك وانت واحد فاشل وماراح توصل الي لوتكطع نفسك وسلملي على امك لفاشلة لغوارة
لثانية
مكتوب بيها غبي لو شكد متقرة تبقة غبي ومراح تنجح
واسمي بنهاية لرسالة
لثالثة جانت لصدمة لخلتني فعليا انشل بمكاني من قريت
اني احب واحد وهوة ضابط وجوارينة واسمة فياض وبينا طلعات وطبات وصور ورسائل على عنادك لوتموت متوصل لأضفرة
حرفيا جنت اختض ودموعي تنزل
اسم لشخص لموجود بلرسالة فعلا موجود وفعلا جوارينة وضابط
ركضت علتلفون
يامن يحطها بيدي واذبحها واشرب من دمها
شلون هيج تسوي بية
الي اكول عنها بتي والي اكل بروحي من يوم اخذوها ماعايشة مثل لبشر كلشي بحساب وملامة
دكيت
رد علية صوت نعناعة
سلمت وطلبت احاجيها
بنتر وصياح ردت
سمعي خايبة
صاحبك حلو لاتاكلة موشفتي لحجي رحب بيج ستحة ومايكدر يرد ضيف
تردين تسويها خري مري
اختج فصلية ترة يعني زايد فضل خليناج تشوفيها وضفتينا ورحبنا وهلينة
لهنا وبسج
احنة روسنا تطمست بلعار وانتي جاية تفتحين جروحنا وتحطين بيها ملح
كفينا شرج لانريد كَربكم ولاتحاجونا ولانحاجيكم
احنة وادم بينا وبينكم دم وسدو بفصل يعني سالفة ابنكم ماننست
لجن احنة مانطرد بنيادم يضيفنا
قبل متكمل كلامها سديتة
دموعي تجري
نفسي عالي
اعصاب تلفت
اريد اصرخ بعلو لصوت لييييش
بقيت يومين مريضة وتغيبت عن دوامي
امي ابوي يسالون ماحجيت كلشي
ضميت لوعتي بصدري
ورة ٣ ايام داومت مخنوكة كلت اطلع من لبيت بلكي ارتاح وانسا
بليل ساعة ب١٢ كاعدة بلصالة على ضوة الالة اصحح اوراق لطلاب
دك لتلفون
اهلي نايمين
رفعت لسماعة بدون مااحجي
صوت يهمس بخنة ونفسة اعلى من صوتة
بلقيس اني محتاجج
همست بتساؤل
قيصر؟
اي
شنو شبيك
مابية
صوتة جان يتقطع ومختنك يجر لكلمة جر
سمعت صوت طلق يمة
بهستيريا احجي
شبيك قيصرر احجييي
اتصل باهلك
نطيني عنوانك خل اخابر اهلك
سمعيني بلقيس ماعندي وقت
باجر لليل اذا ماتصلت بيج ائمنج امانة ورقة وقلم بساع كتبي لراح اردة الج.
قيصر حاجيني شبيك.
منو وياك
وين انت
لتأمني بشي فدوة اني موكد لامانة
بس كلي وينك خل اخابر اهلك ويجوك
سمعيني وكتبي
صفحة لكصبة مال لهور من جهة لبزل لخايس بيتين خرايب اكو بيهن امانة تاخذيها يمج مدة وقت اذا مارجعت اتصلت بيج تتصلين بلرقم لراح ادزة الج
وتطلبين تحجين وية عبد الواحد وتكليلة يجي وياخذها منج
صوت يمة صياح
ختفة صوتة
بس بعدة لخط مفتوح
اسمع صراخ نسوان
بقيت اصيح
قيصر وينك
تسمعنيييي
صوت طلق وصراخ لنسوان يعلة
نغلق لخط
بلكاع وكعت خاوية .....يتبع
مساء لعافية عليكم
عذروني علتأخير وندعولي امانة اعراض كورونا كلها عندي بس كلت ماعوفكم تنتضرون ضغطت على نفسي رغم كوة اشوف من لسخونة
تفاعلو
تحياتي ومودتي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!