#خنجر_لغضنفر
#البارت_السابع_عشر_١٧
#حنين_حاتم
السلام عليكم ورحمة الله وبركاته
هذا لكلام اريدكم تقرو زين قبل متبلشون بلبارت لأن كلش مهم ابدا لتعبرو
فترة تواجد انعام ببيت اهل غضنفر ماجانت سنة وحدة جانت ٤ سنوات واهلها طلعو من لعراق بسنة ١٩٩٥ لكن اني لخصتها بسنة وحدة لأن سبب بقائها يمهم هوة عرقلة تسببت بيها شخصية همة ميردونها تنذكر بلقصة ولهذا لسبب لخصت ل٥ سنوات لأن مااكدر اكتبلكم لعرقلة ومسبباتها ولا اكدر اذكر لشخصية الي جانت تتسبب بعرقلة خروج انعام
ولسبب شخصي يخصهم همة وشخصي كلش بحيث اذا نذكر حتما راح تنكشف لقصة وشخصياتها
ومشت لقصة تمام ووصلنة بارت ١٧ وماكو اي شي
بس ليوم تفاجأت بيهم وهمة ينبهوني انو اكو حدث مستقبلي اذا ماغيرت لسنة لطلعت بيها من لعراق من ٩٢ الى ٩٥ اكو حدث راح يصير بي تناقض وماراح اكدر ابررة لهذا وجب لتنبيه انو انعام طلعت من لعراق بسنة ١٩٩٥ وراح ارجع واعدل بلبارتات لفاتت فقط لسنين اعدلهن لتخافون مراح يتغير شي وتستمر لقصة ولاحداث مثل ماهية بس جان لازم انبهكم وتحطون بحسابكم انو احنة بهاي لأحداث ولاحداث لجاية راح ندخل بسنة ل٢٠٠٠ ولتخافون كلشي صار خلال لخمس سنوات الي لخصتهن اني ذكرتة ولهذا لسبب جانت لبارتات جدا غنية ودسمة ولأحداث ذات وتيرة سريعة ومابيها ذرة ملل
اتمنة تكون لفكرة وصلت وماارجع اقرة تعليقات تخض لسنين وشلون صار هيج وليش طفرتي ومن هلكلام
#نبلش_لبارت
انعام..
يعني افهم من كلامك هسة انت رافض لعرض الي قدمتة الك
عينة بعيني
شفت بيها تحدي وقوة وشفت بيها نار لثار تلهب
اسنانة عاضة شفافة لسفلى
وقبضة ايدي تعتصر نبضات كلبي تتعالة وانتضر اجابتة
من بين اسنانة همس الي
الي يعوف ثارة حرمة
وليتبرة من اصلة هذا نغل
انة لاناهب ولاسالب حتة اشرد
انة صاحب حك وموش اي حكَ
انة مانامن على لعيلة
و ارد واعرف شلون اخليهم يعترفون بلقضى ولمضى
وحكَ دم ابوي لمابرد بية
لأخليهم عبرة لديار بني سعد بزغارها وكبارها
بس صبرج علية
افهم من كلامك انت جاي ترفض
حسرة طويلة نجرت وراسة رجع ليورة وهمس
ااااااااخ
وكتج غلط ياانعام
اجذب اذا اكَولن رايدج هسة
انة مامتصالح وي دنياي
انة رايح لمو موت لو حبس
تمنيتج بذيج اليالي
تمنيتج بطيحة قيصر
تمنيتج من طاح حيلي بيوم طلعتة من لمستشفى بيدي مثل لطفل ولايحجي ولا يمشي
تمنيتج بوكت حاجتي الج من جنت انتجي وماالكة حايط ليتلكَاني
انة لخلصيت عمري من اوكع بشدة مااذكر غير الله ذكرتج من بعدة
غضنفر اني مااستحق تضحي علمودي
مااستحق تتغير علمودي
لبينة مايستحق تنسة ثارك وتبعد لموت عنك
وانة اسألج لبينة ماجان يستحق تتقبليني مثل ماانة
بزيني وشيني وثاراتي وديرتي وعربها وطباعهم
لبينة ماجان يستحق تصبرين وتضحين
اني عشت يمكم سنين خلال هاي لسنين ماشفت غير موت وقتل وناس تدك ناس وفصليات يومية وحدة تدخل علينا اني سامعة عن هاي لامور بس ليتعايش وياها مومثل ليسمع
واني مااكدر انزل على ضرة ولا اكدر اعيش وياك وهية على ذمتك اني مااتقبل اكون ثانية وبينك وبينها طفل كلما اعاينلة اتخيل .
دنكت راسي وسكتت
ستغفر وتنهد راسة ندار على جهة ليمين ويهمس الي
جنتج وناري لايمكن يلتقن خليني بلهيبي وخليج بمتاعج
لعمر كضة وولة ماستحسفيتة
هوة كضة بجم حسرة نجرت بفراكج
وجم موال غنيت كلما امر ببساتين لباجلة
جم ااخ طاحت وطيحت هيبتي
وجم نضرة شماتة لزغرتني
هذا لعمر ولخصيتة الج
ليش اني عايشة
تشوفني اطب واطلع والبس وركبت سيارة وتوضفت
بس والله ماحس عايشة
حتة اللكمة لآكلها مااستلذ بيها
لناس حاسدتني محد يدري لبية
لااني لعايشة ولاني لميتة
ابقة هنا وخلينة نبدي من لصفر احسب نفسك ليوم نولدت وانسة كلشي
سامح ووكل ربك هوة حسبك ونعم لوكيل
عن ياهي اسامح
ولج انة صرت مجرم من وراهم
انة مااطلبهم بس دم ابوي
انة اطلبهم روحي لضيعوها
انة سويت لمايتسوة من وراهم
تدرين جنت الزم لمتهم من كثر لضرب يقضي حاجتة جوا وهوة بين ادية
ولج هاي لركبة حملت دم هواي ناااااس
انة ناري اذا مابردت تحركني
تحركني وتحرك لحوالية
انة لبية براكين وثاري اذا مااخذتة منهم اخذة من وادم مالهم ذنب كافي لرواح لشايل ذنبها
خليني اكتلهم واطب سجن واخلص من روحي وخل لناس تخلص مني
غضنفر اسألك وجاوبني
انت شتشتغل
مالج غرض
عمرك ماحبيتني ولا عمرك فهمتني
اني جنتلك فسحة ومتنفس لا اكثر
صوتة يهمس
شلون حبيتج وانة روحي مااحبها
مادري اذا حبيتج لو مثل ماجاي تكولين
بس الي ادري بي
انة اخر مرة بجيت بيها من جان عمري ١٣ سنة بيوم مات ابوي ولمرة لثانية بيوم طلعتي من عدنة وخذاج لمخنث
انة من عرفتج كمت اندم على كلشي سويتة والتمس لتردد بنفسي تجاه اي غلط يبدر مني
ماادري اذا روحي عادتلي من شفتج لو ضميري صحا من شفت افعالج وطيبتج
بس لأدري بي انة عمري ماحطيت راسي علمخدة وحاسبت نفسي ولمتها غير من طبيتيلنا
لأدري بي اطلع لصبح لشغلي للشارع لعام بس مادري شوكت اوصل لكيعان لباجلة
انة مااعتني عنوة بس تاخذني رجلية وكبال ورد لباجلة اوكف واجرن لاااخ بعد لااخ
هذا انة وهذا لبية وشتسمي سمي
غضنفر اسألك للمرة لثانية شنو شغلك
يعني هسة هذا لهامج انتي
ماراح تجاوبني
ماوصلنة لحل
اجيتك وتعنيتك وطلبتك واني مرة ولمفروض عيب هلشي بس حتة ابريء ذمتي واطلع لبية وارتاح
تبرئين ذمتج يعني هذا لجابج
وصلت لفكرة
مو اكلك عمرك مافهمتني
صوت لجرس الي يعلن انتهاء الوقت ونفتح باب لقاعة وكلام لشرطة يوجهونة للخروج
وكفنة ثنينة
اني اتلفت ضاع لحجي مني وهوة عيونة علية
درت وجهي اريد امشي
صوتة يهمس الي
ديري بالج على نفسج وبعد لاتجين
ولو متت ووصلج خبري كلي لكويكة مسامحج
بس روحي مااكدر اسامحها
وقيصر انة جنت ناوي اطلعة اعالجة بس هوة رافض لو متت حاولي تقنعي بلكي يرضة
عيوني علي دموعي تجري
خايفة من ليكولة وبداخلي حجي واكف على طرف لساني اريد احجي
اريد اترجا يعوف كلشي وينسا خايفة يكون هذا اخر لقاء واندم لأن ماستنفذت كل طاقتي بأقناعة بلعزوف عن المكائد لضامها الهم
عيونة تتلفت على لحرس الي يستعجلونة
تقرب الي وهمس
لاتضلين وية لمخنث انة لو متت اخذيلج يهودي ولاتضلين ويا
لقاعة فرغت صوت لأمن علة ينادوني بللون لملابس اللابستهن يستعجلوني للخروج
تقربت وهمست بغصة
لاتموت محد يكدر يخلصني منة غيرك
عيونة توسعن وخشمة يتوسع يستوعب اكبر كمية هواء وصدرة يصعد وينزل
مشيت واحس بهذا لمكان نسلب مني كلشي حتة اثار اقدامي ماجنت اشوفة
جنت مخذولة وخجلانة من نفسي وكرامتي الي ذبحتها على قبلة حب مارتقى للمستوى لمطلوب
وتجازة كلبي بخذلان اكبر من استيعاب عقلي
احس حتة خطواتي وصوتهن يسخر مني
خجلانة من نفسي لعزيزة لرخصتها
جنت متصورة راح يفرح بعد لسمعة مني
جنت متخيلة راح يوافق ويعوف كلشي علمودي
صدني وصد كلبي لتعنا صد حبي وروحي الي لليوم ماتقبلت غيرة
ولليوم ضالة معلكة بينة وبين لمخنث
مشيت مسافة ركبت سيارة ورجعت للبيت
طبيت على صوت مصايح امي وانغام عفتهم ودخلت للغرفة شمرت روحي بلفراش مافزيت غير بليل ساعة بل٩
جانت انغام تبجي سألتها شبيج كالت عوفيني معليج بية
انغام ليش متعوفين لولد وتاخذين منصور وتفضوها انتي ويا شنو هللعب هذا
هوة اذا تزوجتو عود قشمري وكملي دراسة
يكلي مااكدر على دراستج
وترحين لولاية ثانية وسنين تدرسين اني على شنو متزوجج لعد
خلص لعد بطلي انانية وكافي تعلقين لولد بيج
خالتي من وراج وورة سوالفج تريد تشيل من لعمارة تخاف منصور يصير بي شي
دنكت تبجي وماجاوبتني
طلعت برة امي ماكو رجعت على انغام سألتها كالت اكيد راحت تعارك خالتي عبالها هية دتضغط علية
لبست ولحكتها
دكيت لباب هواي ماطلعتلي خالتي
رجعت للبيت شوية ورجعت لوحدها سألتها وين جنتي
لو فتحت على نفسي ابواب جهنم
_انت شلج علاقة جاية تحاسبيني
وانتي تتختلين وترحين للأفندي للسجن
عبالج من تطلعين من بيت خالتج ام رضاب مراح اعرف
اعرف كلشي بس ساكتة اريد اشوف اخرها وياج شنو
معلقة هذا ومعلقة ذاك
اني ممعلقة احد
محمد ماريدة وكتلج لو مويهددني لو اعرف عمري كلة يضيع وابقة هيج لا إلة ولا لغيرة بس مااسحبة ولا انفهلة واصير زوج
ها يعني كوثر من ستغلتج عادي ذيج اخت حبيب لكلب اشو كلها نامت براسج ماحجيتي من وصلت لمحمد صرتي نادرة
كوثر ما جذبت علية ونبهتني من لاول ابتعد عنها
كلما بلموضوع انو اني فهمت غلط من شفتة يدفنها واني الي اصريت اطلعها واساعدها
اما قيصر لولد صارحني بكلشي وترجاني ابقة
ثنينهم رغم غايتهم بس ماعدهم دغش جانو واضحين وياي واني خالية كلب حبيت اساعدهم
اما محمد الي سوا بية خلاني مااكدر اثق بي
يمكن لو ممقتنعة من اول ليلة بتت بيها يم بيت اختة ومخابرتة يجي يعقد جان تطورت خطتهم وجان خلة زوج اختة يتحرش بية فعلا حتة يقنعني ويجبرني
اكرهة لأن استغل غربتي ووحدتي
سنين عشت ببيتهم محد حاول يستغلني بهيج طريقة بشعة وحتة غضنفر جان يكدر ياخذني بمكان اختة فصلية ويسويها وحدة بوحدة
بس هوة عافني يمهم وماجبرني علي ولا سوة نفسة نبي حتة احبة اني حبيتة بشينة وكل طبايعة لصعبة
ضيعت اختة لجان يخاف عليها من لهوة
شرفهم وغيرتهم علعرض ماشفت مثلها
ولو يسوون لعمايل مايوصلون لسواية محمد بية
محمد اساسا بأخر اتصال نها لبينة وكلي ابوي ميريدج واخاف منج لأن ابوج نعدم
بس من سمع بيكم راح تطلعون ووصلتهم معلومات رجع تواصل وياي
ماشفت لحب بعيونة ولا شفت لخوف علية
كافي انعام
كافي تبالغين وشيلي هاي لغشاوة لعلة عيونج
والي تخليج تشوفين واحد مجرم انسان سوي وطبيعي مثلنة
هاي لغشاوة الي دتجمملج حياتهم
ابد ماشفت حياتهم حلوة ولليوم اخاف منها بس ماعرف شنو لديصير بية
اي انتي متدرين شديصير بيح وانغام متدري
ابقن خبلن بنفسجن ورفسن لنعمة
وحدة حابتلي واحد اهلة عدهم كتل لانسان مثل كتل لعصفور ولثانية تريد واحد يكضي لشهر ٣ اسابيع بلشغل واسبوع بلبيت ويادوب يلحك على اجار لشقة ولكمتهم ودوة خالتج
من عين باجر تشوفيج شغلة متضلين مكابلتني وتتصفنين وذيج لأفندية كليلها عدها شهر لو تكول مااريد خطيبي وتفسخ من هسة وتشوفلها وضيفة وتنسا لجامعة لأن اني مابية على مصاريفها
لو تكول اريدة وتبطل هاي حركاتها
عافتني ودخلت جوة وحتة ماعرفت وين جانت
عدت مدة لكيتلي وضيفة معاونة بمدرسة اهلية
شغلي متعب والتزامهم ولرقابة شي فضيع
بس لراتب جان زين وهذا الي مصبرني ولدوام لل٣
بموعد زيارتة لثاني ماكدرت اروح مانطوني اجازة ولورا صدفت امتحانات
تانيت موعد زيارتة لورا جان ماباقيلة غير ايام ويطلع
رحت بأجازة زمنية ومستعجلة حيل
دخلونة جانو كل لمساجين موجودين بقة كل واحد يدور عن سجينة
ادور ماهوة تقربت علامن اسأل عنة
تفاجأت من كلولي
خرج منا قبل اكثر من يومين
يمكن اي علاقة تحتاج وقت طويل يلله توصل لحجم لعلاقة لبيني وبينة
والي مااعرف افسرهة
احس نفسي اعرفة من سنيين طويلة
احس كل لناس وجودهم وعدمة مايشكل اي فرق إلة هوة بحضورة وغيابة اني ضايعة بي
بزاوية غرفتي لمضلمة كعدت واني احتضن جسمي لصدري وبدموع اسأل ربي
شنو فايدة ضهورة يحياتي هسة
جنت قانعة نفسي بنسيانة
ضعت اني وماادري بيا بخت شبابي لضاع
ببخت محمد الي لايرضة يرحكم ولايخلي رحمة الله تنزل
لو ببخت غضنفر لعلقني بي وضعت من يوم شفتة
اتصلت بيهم اكثر من مرة لخط ينرفع ومحد يحجي ووراها يبقة مشغول
عرفتها اما حدهن او سللامة
بقيت بقلق اريد اعرف اخبارة
بليل اتصلت بية بيبي شكرية
واول ماحجت سألتني عنة
هاجدة شكثر بعدلة غضنفر ويطلع
صوتي نكتم بوسط.دهشتي وخوفي
وين يكون راح اذا مايمهم
حيرتي وخوفي عليها خلني اجذب واكللها بعدلة اسبوع ويطلع
وبنفس لوقت خايفة من جذبتي خايفة يكون واكع بمشكلة وسكوتي يعضمها
طلبت احجي وية قيصر افهمة انو غضنفر طلع
_خاب جدة قويصر هم ماهو راح لواحد صاحبة معرس وكال يمكن اتاخر وصارلة جم يوم ماكو
عدت مدة احنة بصراع خالة وامي
خالة تريد تكسر عناد امي واصرارها على لاختيار نيابة عنة واجبارنا بأساليبها لخاصة بدون متفكر بينا
منصور ترك لولاية كلها وهلشي تسبب بمشكلة كبيرة بين امي وخالة وصلت بينهم لمشادة قوية مانحلت إلة بتدخل خوالي
الي ثنينهم مرضة وموحمل مشاكل وتعودنة كلشي يصير ويانة نضم عنهم خوفا على صحتهم
الى ان توصلو لقرار
انغام رضخت لماما وداومت بجامعتها ومنصور مانعرف اخبارة وخالة حتة بية كطعت وصارت مستقبلني ببيتهت رغم صرت وياها ضد ماما بس ماشفعلي هلشي من غضب ام مكسورة على وحيدها الي وعة على انغام وكبرو سوة
نتهى لبينهم ومات بدمعة وحسرة نكتمت وسفر جانو يهربون بي من اقدارهم وضروفهم لصعبة
سافرت انغام وبقيت لوحدي
اتلقى مزاجية امي واصرارها على محمد مقابليل اصراري على انو مااسحبة
رجعت بيبي شكرية اتصلت بية وتبجي
_ جدة نعيمة غضنفر مابين وقويصر هم ماكو
يمة ماخلو لويلاد لامركز لا مستشفى
يمة ضاعو ويلادك خليل ولفرخة شردت
ولج يمة نعيمة تعاي لية لورحت لدار حقي وتلكاني خليل يسأل على امانتة شكلة انة وشحجي
اسم الله بيبي عمرج طويل لاتفاولين ان شاء الله خير
خايبة ياخير يمة ماشفنة خير من سنين
الله يطيح حضج ياكويكة اكثر ماهوة طايح
ماكو اسوء من الي هية بي
سدتة بعد مافحطت من لبجي وختمت كلامها وهية تصيح على بسعاد وتطلب منها دواها
وعدت ايام غضنفر ماكو كلما اتصل يكلولي مابين
وقيصر محتارين بي ماخلو مكان مادورو بي
تعبت نفسيتي احس يمهم هناك عايشة كل فكري عدهم يكضي يومي اصيح علاطفال ولمعلمات واصب كل غضبي عليهم على اتفه لاسباب
وليلي مثل لمسموم اتكلب بفراشي بلمعجزة تغفة عيني
بعد مااهلك من لتفكير
واكفة علمراية الف حجابي ودك لتلفون
ركضت قبل ماتجاوب ماما
رديت وصوت بنية شابة تصرخ انعام فدوة راح اخذ لتلفون ليبرة وانطي الج حاجي غضنفر فدوة ترجي يعوفهم فدوووووة
صوت صياح يمها كلش قوي وصراخ نسوان وجهال
صوت طلقة نرمت ولتلفون نهمش من ايدها
وصياح حدهن زرف طبلة اذاني
_ تترجن هاي ل ..... حتة تخلصنة ولجن هاي هية شحنتة علينة وهية ندلت كويكة وخابرتة حتة يترسن راسة علينة
بقت تفشر وتطعني بشرفي
من بين صراخها علية وتجاوزها الي جنت اتجاهلة وانصت لكلام الي داير مدايرها واحاول افهم شجاي يصير
ختفة صوتها
واسمع هوسة شي افهمة وشي لاء صوت رجال جبير يصيح ياقانون عشاير ديار بني سعد فوق لقانون لحد يتصلللللل احنة لقانوووووون
تعالة صراخهن
صوت تكسير لتلفون كأن نشال ونشمر
صراخ علة ونسد لخط
صوت ماما وراي وعاني من حالتي وكان روحي نتقلت بفجوة زمنية وبنصهم جنت اشوف كلشي واحس بعضم كل جملة نكالت وهول كل صرخة طلعت واعرف حجم لمصاب الي دفعهم لهلشي
صوتها يهمس وكأن جنت محتاجة جملتها حتة يكمل لبية
_همة ذولة لتردين تعيشين بنصهم
وهيج تتصلين بية وترعبيني اموت بساعتي انغام
ولج عقلج وين فهميني وووووين
منو كلج اريد اعيش بينهم
شوكت حجيت وكلت اريد عيشتهم
مو راضية بضيمي وكاعدة اتفرج على سنيني تتطشر كدام عيوني بدون اي انجاز يذكر
موصابرة وساكتة ضعت يمة ضعت يمج ولة يمهم اني ضعت من زمان
رحميني ممشية عليج روح بابا لمات وهوة يلفض اسمي
دخلت جوة
لبجي ماعاد ينفع
جنت ابجي ارتاح هسة حتة لبجي ميريحني
لبست جينز وقميص وطلعت اركض بلا وجهة
تمنيت لفراغ يبتلعني واختفي واتلاشة
.
.
.
عمان لساعة الخامسة مساءً
بباب لصالون واكفة وطلعت كبالي تخبل بلبدلة لبيضة
وكفت وعينها علسيارة لبرازيلي غرغرن عيونها دموع وهمست الة
_احنة مو اتفقنة على مرسيدس ليش جبت برازيلي
تقرب الها وهمس والله ماحصلت مرسيدس وصاحبنة معتز بسيارتة يكول محد يركبها غيري تدرين بي
ركبت لسيارة مخنوكة دموعها نزلن وهوة بقة يراضي بيها ويسكت
تقرب صميدع للسيارة ويهمس الها من لجامة
_عاينليلي خاب هوة انتي بكد حبوبتي وينج ووين لزفة
نزلت لجامة تريد تعاركة
بساع حركت لسيارة
ومشن باقي لسيارات ناس تصفك وتغني ولولد من لجامات ذابين رواحهم وناس تكلب دقلات
وكشمش تمد راسها كلما تتقرب لسيارة من يم سيارتهم وتغنيلها
بعد شتريد زفوها ببرازيلي
بعد شتريد زفوها ببرازيلي
صوت ضحكنا تعالة
عيني علي كاعد بلصدر
عيوني على ادي الي يكلبن بلكاسيتات
شغتلت اغنية
صوت محمود انور يذكرني بلأيام لخوالي
مختلف إعلى عباد الله
لشمس تنور بضلة
مختلف إعلى عباد الله
لشمس تنور بضلة
بعينة عود لماصلة
من تمر هاي لناكَة
مابي نقص الله مكملة
مابي نقص الله مكملة
لوبس ادري منين اصلة
لأنصب خيمة كَبال اهلة
مانام احرس هلناكَة
مانام احرس هلناااكة
......
تهاني
نزلت من لسيارة بطرك دشداشتي
اركض واتلفت وامي وراي
بالي يمة
ذاك الي نهة علية ولليوم ماتحرك يخطبني
وكلما اسأل يكلي لأوضاع تخوف خل تهدأ لأمور
وضليت انة انتضر
مشكلة تجر مشكلة
تعلكت بي من زغري
اركض وامي وراي تصيح
ولج تهاني صبري لايتلكاج واحد من لويلاد لدالهم جاية بحدج ويطكونج
ماهتميت لكلامها
اركض اريد اوصل للمكبرة وهية وراي
ادري بي يتفدا بروحة وخوفي لايشترك ويا بثارة ويضيع مثل ماضاع غضنفر
من بعيد شفنة جوكتهم
تقربت وامي صارت تركض بكل حيلها هية وعباتها
من بعيد شافوها اجو علينا فدعم وعمي رحيل يصيحون شجابجن
دفعتهم امي وركضت علي
تقربت وحييل راشدي نطبع على خدي بلكاع طحت علكبور
دنك علية ويهمس
بطرك لثوب جاية ولج ادفنج هنا هسسسة
كمت على حيلي من شفتي قطرات دم نزلت محبسة شك شغتي
ايدة على حلكي ويمسح لدم بطرف ردانة ويهمس الي
حتركت ديار بني سعد وحتركو لخلفوج تعاي حذاي لا تخليني احفر كبرج بصفهم
كعدني بلكاع وراح جابلي عباية جدي لصوف ذبها على متوني وهمس
وحك ذولة لميتين اذا تحركتي وشافج واحد إلة اهطرج بلكرك مال لدفان
مشة وبقيت اتلصلص عليهم
عيوني على غضنفر جان واكف بين لقبور لحافرهن
وبس روس عمي جليل وولدة طالعة
اديهم تهامش بدشاديش جدي وعمامي ويتوسلولهم
وهوة سلاحة بيدة وواكف وثنين دفانة بيدهم كراك ويحفرون
صوت جدي يحاجي
بوية اكسر لشر وانة انطيك كلمة زلم ماتشوف وجوههم للموت يطلعون من ديار بني سعد
ويطلعون من لعراق كلة اذا بهلشي تطفة نارك
ناري ماتطفة اذا ميسيل دمهم مثل ماسال دم ابوي ضلللم
ناري ماتطفة اذا مايحجيلي جليل
بيوم خذاني بذيج الليلة وواراني امي ووياها ياس بلغرفة ببيت عمتها ام مهودر شني لصار شلون امي تدخل وي ياس بحجرة وحدة وقيصر وكويكة يكولون امي ماعدها شي
قيصر جان يصيح امي بريئة بس من يوم ختفت ام مهودر وبنفس ليوم تصوب قيصر من يومها نسا لسالفة ولحد كبل لاااسافر كضيتة وسألتة
خوية احجيلي ياهو لسوة بيك هيج
مايرضة يحجي
ابوي مات
امي شوفتوها الي تخون ابوي وي واحد وبغرفة وحدة شفتهم بعيني
ندار على جدي ويهمس
انة ماكتلتها لان شردت وي ياس
انة لشفتة علة نامت بية سنين
لا اكدر احجيها ولا اكدر اضمها
عمي واراني امي وي ياسين بغرفة نومة
عمي ورارها الي وكالي شوف امك شتسوي بلحرام وراح تنزل راسك
كويكة حلفتلي انو قيصر عدة مستمسك يثبت برائة امي
ليش من حجتلي هذا لشي
وانعام اتصلت وبلغتكم انة صار عدي علم ببرائة امي عد قيصر وراها قويصر ختفة
معناها قويصر عدهم همةضمو ماالها معنة ثاني
سحب اقسام
وعلى رجل عمي جليل رما
صوت صراخ امي تعالة وبلكاع كعدت وتشيل رمل وتذب على راسها وتصيح ولك غضنفر راح تضيع روحك
ولك عوفهم لاتنكس ايدك بيهم
ولك غضنفر امي تموت والله تموووت
كافي عليها هبطة قيصر
جدي ادي على راسة وتقرب لغضنفر وهمسلة
بوية احلفك بروح خليل نطيني لسلاح وانة اخليهم يحجون كلشي
جدي عوفوني وطلعو منا طلعووو لا وحك روح لميتين ولعدلين لطلقة لثانية براسي واريحكم مني
عوفونيييي
بتعد عنة وتقرب لعمي جليل
بلكاع كمبص وايدة لزمت لحيتة حييل من لحيتة سحلها وعاط بي
تحجي لو اكتلك بيدي
جليل غضنفر لو راح مني لا انت ولا ولدك تسلموووون
انت وإسماعيل ورحيل اذبحكم بدية لو عرفت الكم يد بموتة خليل وحرمتة
ماشفعلك كلشيييي
احجي واعترف بيد غضنفر طحتو هاي كبوركم واكفين بيها
شتنتضرون بعد
صوت عمي جليل بتأوه ونين من الم لطلقة يهمس الة
تطلع روحي وتدفنوني وماانولة مرادة ولا اريح بالة ولا انطي مستمسك يدل على برائة امة
خليها بعين كل لناس مومس وزانية
خلي يمشي مدنك لراس طول عمرة من عملتها وعملة كويكة
حييل رفسة على راسة جدي برجلة وصاح بي
ولك لييييش ولك لو نغل هم ماتسوي هيج بأخيك ووليدة
وبعلو لصوت صرخ
انت لخليتنة نكرهاااااا
انت لكرهتنا بي وبولدة
خليتة ملك واحنة لعبيد
وبأسمة سجلت نص لبساتين
زلمة شكدني شكبرني وعدي فروخ واحفاد ومااملك كلشي من كيعانة وغضنفر فرخ ١٢ سنة وسجلت بأسمة ٣ بساتين
ليش شيفرق هوة عننة شيفررررررق
طلقة ثانية اجت بزند عبود
بلكاع كعد جدي بلتراب تقربو الي فدعم وصميدع يسألو شمالك
اشر الهم علسيارة
سحبو عمي رحيل وثنين من ولد عمي إسماعيل ومشو عرفتة تخربط
عيوني على غضنفر جان لاف دشداشتة على خصرة ومحزم بشماغة ومصرفن رداناتة وواكف يم قبر ابو
وبصف لقبر حافر ٥ قبور خال بيها عمي جليل وولدة كل واحد بقبر وبس روسهم طالعة
عمي جليل وعبود بعد ماصوبهم صرت ماشوف روسهم وكعو بنص لقبرر
دنية ليل ولمكان مررعب
جنت اتراجف برد ورعب
مااعرف شلون واكفين بنص لقبور وجسمهم شبه مختفي
وليش لساهم مقاومين لألم وميرضون يعترفولة ويبردون كلبة
امي بلكاع كاعدة يم غضنفر وتتوسل بي
ماشفت غضنفر
شفت نار لثار تتجسد كدامي بهيئة انسان
كل صرخة يصرخها بيهم جانت كفيلة توعي لميتين
بقة يمهم واكف واسمع صياحة عليهم ولولد يهدون بي
فدعم: خوية اكسر لشر وخلينة نطمأن على جدي وتالي نكعد كعدة زلم ونحلها ويننفون من ديارنا ونجردهم من كل حقوقهم ومالهم اي شي من لورثة
هذا احسن عقاب الهم
همة يدورون دنية وهذا كل همهم
راسة يهتز بلرفض ويهمس الة
وقيصر وأمي وابوي
ولكم صفيت وحيييييد
ضيعوني وضيعو هلي
شلون اهدهم واخليهم يشمون لهوة شلون
قيصر مالهم غرض بطلعتة ماادافع الهم بس قيصر من طلع محد يندل وين رايح ولا نطانا نشد ومحد يدري بي من طلع غير حبوبتي شكرية
يعني شلون وصلولة وشلون ندلو مجانة
ان شاء الله نلكا ماتعصا على جدي واضن يندل مجانة بس ضام علينة
لا تبرر الهم
تقربت الة وهمست
خوية قيصر بلحفض ولصون ونندل مجانة انة وجدي بس مانعني احجي إلة اكلك هيج
ليش مانعك.
شمالة قيصر احجي فدعم انة وشلت روحي يومية مودع محد ضللي غيرة
اخوي عليل ومكسور خاطر وكلب
احجيلك بس ماتحجي لجدي ولا تكلة انة كتلك ولا تتصرف لوحدك ولاتحاول توصل الة
احجي عود والله كريم
غضنفر كلمة زلم ترة كلنة ننضر وحتة انت تخسر حياتك
خااب احجي
خوية قيصر سالفتة ........
قيصر
ماعرف شنو لصار حسيت حرارة نزلت من خشمي وعيوني لوحدهن نسدن
دوخة لزمتني ورجعت ليورة
حسيت احد لزمني من ضهري وصياح لرجال الي لاكاني ودكلي صدرة وكالي انة اخطبها الك
صار يعلة
فتحت عيوني بثقل
كوة ستعاديت توزاني
لرجال يصيح على لولد ولك غمي ابن لوادم جا موتتة غريب هنا
تقربت الة ردت اضربة بس مادري شلون لزمت نفسي
لخاطرها كلت مااتهور وتنحسب علية نقطة
عرفتة ابن عمها من سمعت صوتها من جوة صاحت
عززة بعينك زياد
دخل جوة يصيح ويكلها طبي
تقربت الة وبرهدنة حجيت ويا
خوية انة ماجاي عليك جاي على ابو بلقيس
وانة ضيف ومتعني وعابر ديرة
هيج تستقبلون ضيفكم
مافاد اللين ويا
بقة يصيح ويشمر بلحجي
مارفعت صوتي ولا تعاركت بس من وصلت بي تجاوز علية
تقربت وحييل سحبتة من ملابسة ولويت ايدة
شكد ضخم بس ماعندة لياقة بساع دنك وصار جوة ادية مثل لعجينة
بقة يصيج ويهدد
لرجال وأبنة هدوني ورجعوني لصوابي بكلامهم
_ بوية انت جاي بحاجة لاتخرب صورتك بهاي لأفعال تاني ابوها يجي واحجيلة واكيد هوة مايسكت على سواية ابن عمها
هديتة وجريت نفس اطرد لغضب
مشيت وية لرجال الي نصحني انو اروح وياهم لبيتهم ومن يرجع ابوها من دوامة اجي وهمة يجون وياي ويشهدون بلي سوا زياد وافتح لموضوع وية ابوهة
دخلت لبيتهم جنت تعبان كلش حتة اكل مااكلت بس طلبت يفرشولي
فرشولي وتمددت بلمضيف
حسبة ببالي وافكر بيها
لو نطاها ابوها الي هنا اتزوج واستقر
واجيب بيبيتي شكرية
ولو رد غضنفر وطلع من لحبس اقنعة يجي يمنا
نبتعد ونطلع من ذيج لديرة لماضللنة بيهة كلشي
غير ذكريات توجع وعارات لليوم غضنفر ضايع بسببها
علمخدة حطيت راسي وجواي لنار تغلي وانة اتذكر شلون ضاع تعبي وكل خططي
بيوم اخذت صحباني لمحكومين وتلثمنة ورحنا للبيت لبي ام مهودر
لمرة تطقست عنها بعد ماجنت ادور عليها من سنين وعرفت كاعدة وي وادم غربة يعودون لأهل مرت جليل من بعيد
اسابيع وانة اراقب بلبيت ردت بس المحها تطلع واحجي وياها وافهم منها
لاطلعت ولا شفتها
سألت لجوارين وبلفلوس حصلت كلشي وعرفت كلشي
عرفت لمرة مقعدة وهمة مايخلوها حتة تعاين من لشباك ولايخلوها تطلع بلحوش
وفهمت حرصهم لشديد على احفائها عن لانضار ورا غاية وتاكدت لو شكد مااحاول اجذب واتحايل حتة اكدر التقي بيها واعرف منها لأريدة ماراح تنطلي عليهم حيلي
لهذا لسبب قررت اخذها بلقوة
عيوني حييل عتصرن واني احلق بذاكرتي واستذكر دخولي لبيتهم
من تسللت من لحايط وعفت لولد برة يحمون ضهري
ودخلت لحجرتها من لشباك
جانت كاعدة
همست الها جدة انة قيصر ابن امنة راح اخذج ساعة زمان واردج عندي سالفة وياج
صوتها يهمس الي بفرحة
يعني راح تطلعني منا
راح اشتم لهوة لبرة واسمع صوت لوادم
اي جدة اي
شلتها وركضت بيها
وانة اعبرها لسياج تناوشوها لولد مني بعد احاول اعبر حسيت طلقة نرمت ووراها توالى لرمي عتلك
ولدنا يرمون وهمة يرمون
حييل سحبوني لولد
شلتها وركضت بيها وضلو لولد ورة لسياج مناوش بينهم وبين اهل لبيت
وانة اركض بين لزرع متوجه للسيارة شفت سيارات وكفن كبال بيتهم ونزلو منها زلم
ماشفت شكولهم ولافرزنتها جان كل همي اركض بيها واوصل لبيت ولد صاحبنة قريب عليهم
جنة متفقين ويا نجيبها يمة علما نشرد ويضيعونا ووراها نجي ناخذها من عندة
بس لغدرنا ذول لنزلو من لسيارات وصارو يرمون علولد
لولد صارو بنص جبهتين
ضل بالي يمهم وتندمت لان ورطتهم وياي وهمة شاردين من لموت والهم سنين متخفين
جازفو وساعدوني ردا لجميلي
باب لبيت جانت مفتوحة
دخلت ودخلتها جوة
صاحبي بقة برة يناطر
صوت لرمي علة وصار قريب
فوك صعدت وسلاحي بيدي وهاي جانت لغلطة الي خسرتني شبابي وصحتي وضيعت كل تعبي
جانو لولد شاردين منهم وجايين بتجاه لبيت سلاجهم مخلص
وهمة وراهم يرمون
سحبت سلاحي وصرت ارمي عليهم
نبهتهم بمكان تواجدي بدون ماانتبه علجاي اسوي
جان كل همي اطلع لولد من لورطة لدخلتهم بيها
رميت واحد منهم ولباقين بقو يركضون
من شفتهم صارو قريبين علبيت
نزلت ركض جريت لتلفون
بيمن اتصل محتار
غضنفر مااكدر اتصل بي انة سنين ضام سر عمة امي عنة والي بلبيت كلهم ماأمن الهم جدتي ولبنات مايكدرن ينفعني
مااجة ببالي احد غيرها بين شي بداخلي يكلي اختبر حبها بهاي لأمانة وبين لماعندي احد غيرها
لكيت نفسي اتصل بيها وانطيها عنوان خرايب واوصيها وصية انسان بينة وبين لموت شعرة
حضنت لحجية وطلعت بيها
وبلزرع اتخفا
وصلت للخرابة
حطيتها بيها وكلتلها بلقيس تجيج باجر وترحين وياها
وجريت سلاحي وركضت بساع
ابتعد عن لخرابة بتعدت حيل عنها ورميت ابعد لعين عن لحجية
صرت اشوفهم من غيرو وجهتهم من طريق لخرايب واجو على مصدر لرمي
كعدت بلكاع كبش فداء وسلاحي بيدي
رمو ورميت
ماذكر شصار بس اذكر حسيت طلقة دخلت بصدري ووحدة برجلي
وراها بلكاع وكعت صحيت انسان ثاني فاقد نفسي وكلشي بية
ضاع تعبي وصحتي وسنين جنت بيهن ادور علحجية واسأل واتقصى كلشي راح برمشة عين
وحتة مكانهم غيرو وضاعت ام مهودر مني للمرة لثانية
عفت كلشي وعفت تعبي لخاطر غضنفر
خفت ينكسر لو عرف لحقيقة
لجان مهون علية وجود انعام
بس من صحيت ولكيتها طالعة من عدنا وعرفت مخطوبة وكتها تأكدت انو ماكو شي ممكن يبرد غضنفر لو عرف بروحة كاتل امنة باطل
صوت لرجال يوعيتي ويهمس الي
بوية صارت بل٤ هسة ابوها موجود
كمت على حيلي
غسلت وجهي وشربتلي ستكان جاي ومشيت ويا ابو صالح وصالح
دكينا لباب
من فتحها النة كأن عندة علم بجيتنا
ستقبلنا تصافح وياهم وصل الي تصافح وياي وحيل يضغط على ايدي
بمدخل لبيت صديت علجام مال لمطبخ مالهم اعلين لخشمي جان مورم
ااااخ حكَة غضنفر من يكول ليحب تصيرلة ذراع ينلوي منها
هل لوو ذراعي بيج يبلقيس
دخلنا جوة
ابو صالح وصالح ماقبلو يشربون جايهم وكلولة الة تكللنا مكضية
بقة يماطل وماكال مكضية يعرف غايتي شنو
وجهة جان معبس
ستأذنت من ابو صالح احجي وكتلة
_ عمي بتكم وخالها ضافونا وسألهم شلون ستقبلناهم
انة ليوم ضيفكم وانة ابن شيوخ يستقبلني ابن اخوك هيج
اشرت على خشمي
_اني ماقابل على سوايتة وطيحت حضة
بس ياعمي انت ماتدري لسوتة بتنة شنو
بتنة ضحكت على ابن عمها واستغلفتة حتة تنفذ وصيتك
وببيتنا عاشت ام مهودر واحنة كلشي ماندري
تالي يجونة مسلحين يهدون علينة واحنة مثل لأطرش بلزفة
ابن عمها زياد خطيبها ويغار عليها
قدر موقفة وردت فعلة وامسحها بوجهي
لاعمي انة لخاطرك سكتت وانة دايس بيتكم
انة جايك بطلب واتمنة ماتردني
صوتة قاطعني
بس ياعمي راعي بطلبك انو بتنة مخطوبة
لاتحرجني وتحرج نفسك وتحرج لناس لجايبهم وياك
افهم من كلامك انت رافض
ياابني دااكلك لبنية مخطوبة
بس اني وياك نعرف لبنية المن تريد تختار
اني ماعندي بنية تختار
اكسر ضهرهااااااا
طلعت من لبيت ولناس وياي وقررت ابقة هنا
ولو اني لو زياد
ابو صالح اخذني لبيتة بتت يمهم ثاني يوم ساعة بل٧ كابلت بيتهم انتضرها اريد اسمع منها
اني سويت لعلية واجيت لازم هية ترفض وتساعدني
اني لوحدي مااكدر اسوي شي
واكف بلبستان بعيد عن بيتهم
شوية وطلعت وكفت برة
تقربت الها
بعدني ماواصل اشرت بيدها وتكلي
روح بساع بساع بابا وصا زياد يبقة على راسي بلطلعة ولطبة وهسة على جية
وكفت سيارة ابن عمها
بتعدت بركن لبيت صرت
ركبت ويا
احس روحي فارت
رديت للبيت
بلحديقة كاعد وصالح يمي
صوتة يهمس الي
خوية ابوي حلف ماترد لأهلك اذا مو لبنية على ذمتك
وكال راح يخابر عمامي ونروح علوادم اهلها بلكي الله يهديهم
بيدة جان اكو مسجل سحبتة منة بقيت استمع بي اغاني
طبيت للديوان عدهم كاسيتات
ضليت ادور على كاسيت لمهند محسن
طلعتة وعلأغنية لتشكي حالي بقيت استمع
خلو عليك يخافون
حارس يحرسك مني
اهلك ترة مايدرون حبك الي مجنني
بس انت تدري لبية
صبرك علية شوية
خليهم شمايحجون
شحدة ليبعدك عني
خلو عليك يخافون
حارس يحرسك مني
اهلك ترة مايدرون حبك الي مجنني
تانيتها تحل
بل١ واكف بركن لبيت
نزلت من لسيارة حرك زياد
سحبتها حييل من ايدها بركن لبيت
حييل على جسمي شمرتها بحيث سمعت سوت ارتطام جسدها بجسدي
وبحركة كلب وخنكة همست
هنا كاعد ومااطلع من دياركم اذا مو ايدج بيدي واريد اشوف يازياد لياخذج مني
عيونة نفتحن بدهشة وتوجهن بنضرهن وراي وبس شفافها تتحرك ودموعها تنزل
حسيت سلاح تخلة براسي .....يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!