#خنجر_لغضنفر
#البارت_الثامن_عشر_١٨
#حنين_حاتم
بلبيت كاعدين زياد من لبارحة يمنة يكول جاي بشغل ومر بينا بس اني ممقتنعة بحجتة
خلال هليومين ماشفت زياد لقديم ليتشاقة ويضحك ويسولف حتلو مهموم
جان مختنك وجهة متنكَ ضنيت صاير شي ويا امي وابوي الحو علي يردون يعرفون شبي اصر انو مابي شي
من عدها وتأكدت زياد تغير هواي
سلوكة طباعة كلشي بي تغير من يوم لمشكلة
من اتصل بية قيصر بقيت بخوف
توقعت راح يجيب اهلة وعمامة مثل اي شخص ويجي يخطب
أو على لأقل يجيب نسوان
عصرية ندكت لباب طلع زياد
سمعت صوتة
متأكدة
طفرت للمطبخ
بيتنة بي طارمة كلش زغيرة وبرة بستان جنت اعاين من لشباك مال لمطبخ وكبالي لباب مفتوحة
اشوف ضهر زياد وكدامة واحد يحجي ويا
كلبي فنجان وبيد كهوجي
يهتز وويا يهتز كلشي بية
ماشوف غير زياد يضربة بكل قوتة على وجهة
من دون وعي طلعت مني لصرخة
عزززة بعينك زياد
دخل جوة يصيح علية
_طبي جوة لا اسوي لعزة على روحج بت ل
ماكمل لكلمة ورجع طلع حجي برة ومصايح توقعت قيصر ماراح يعوفة وراح تكبر
بس تفاجأت من دخل جوة يصيح علية
_خابرتيييي
ولج اني ليش اجيت لعد
نداريت على امي بصياح
_انتي كلتيلة خابرتة ليش ليييش هيج تسوين بية اني بنتج لو عدوتج
_احترمي نفسج طايحة لحض لا خابرتة ولا ادري بيج تلعبين من ورانة ومخابرة علي
موصوجج صوج ليوثق بيج ويخلي تلفون بلبيت
شالتة وركعتة حيل بلكاع وبرجليها داستة وصعدت فوكة صبت كل غضبها مني بي
بحيث صار قطع جوة رجليها
جانت تدوس علي وتصرخ
للمرة لثانية خنتي ثقتي وثقة ابوج
للمرة لثانية بأتصال تهجمين بيتنة بدوم متفكرين
ولج ٩ شهور شلتج ببطني وكبرت ووصلت وربيت ماغزر بعينج تعبنا
ماكلتي ثقة امي وابوي شلون اخونها
شحجي هسة وشكول لأبوج لو رجع
اكلة بتك مااتعضت من لصارلنة ولا صارلها درس
بتك مقرية فاتحتها لأبن عمها ولساهة تخابر بقيصر وتحجي ويا
ولج شنو من بنية انتي من لابارك الله بيج ولا بلساعة لجبتج بيها
كعدت بلكاع تلهث
زياد علقنفة كاعد ادي على راسة نفسة عالي ويهز رجلة ولقنفة كلها تهتز وياها
صوتة يرد عليها بصياح يسمعني
_كافي عمة لتحركين دمج هية موصوجها
صوجنة احنة منطيها ثقة متستحقها
تلفون بعد ماكو طلعة لوحدها منا لهنا ممنوع
واريد اشوف ياقيصر يوصل لبابنا ويدكها
ام بلقيس..
دخيلك يمة مالك شغل بي عوفة لاتضربة ولا تحجي ويا خلي عمك هوة يتفاهم ويا بهداوة ويحلها لاتنسة بتنة عدهم اخاف يضرها
اخاف ينتقم من عدنا بيها لو يحاول يهددنا بيها
صوتي بحركة يهمس
قيصر مايسويها لايضر بسعاد ولا يضرنا
شالت جزء من حطام لتلفون وشمرتة علية وصارت تصيح
_تدافعلة تدافعلة
ولج سدي حلكج وكومي من وجهي كوووومي
بعدهي كاعدة كبالي ولج شنو هلصلافةةةةةةة
مشيت للغرفة ابجي وخايفة من رجعة بابا
خايفة يشحنو علية ولمخوفني جية قيصر لوحدة غلط وراح تضرني وتضرة
وببالي افكر زياد شلون عرف بية متصلة بي وشلون عرف راح يجي واجة حتة يحول دون اي وسيلة ممكن يقنع بيها قيصر بابا
دخل ضهرية بابا جان تعبان
من لباب تلكتة امي تشكي
زياد مافتح حلكة ترك لمهمة لأمي وهي مقصرت
كاعدة بغرفتي وصاح علية
خوفي على صحتة
رحت مدنكة راسي دخلت
الله يساعدك بابا
الله لايساعدني
الله ياخذ عمري واخلص من همجن
ولج بابا ليش هيج تسوين بينة
ليش تعشمين لولد وتخلي يصر عليج وبتنة عدهم
خليتينة مثل بلاع لموس
_بابا والله ماسويت شي اني اتصلت اسأل عن صحتة الله يشهد ماكتلة كلشي
واني زواج مااريد اتزوج لازياد ولاغيرة
بابا اني جبيرتك ليش تكسرني ماكافي لدنية كسرتني وسمعتي بين اهلنا راحت
_لدنيا كسرتج لو انتي لكسرتي نفسج وكسرتينا
بلقيس كاااااافي
ترة تعبتني انتي واختج كبرتنييييي
ابن عمج تاخذي وانتي لممنونة كافي سوايتج لسودة
لتمست بكلام بابا تردد وجنت متأكدة يتمنة قربي يم بسعاد حتة تقوة لعلاقة ولنسب لبينة ينسيهم لصار يصير اطفال وتنسي لمشكلة
بس ميكدر يكسر بزياد بعد وكفتة ويانة
وبنفس لوقت بعد مازياد نهى علية بابا ميكدر يسوي شي
دخلت للغرفة
عصرية طلع زياد
ندكت لباب فتحها بابا اني وامي بلمطبخ شفتة من دخل وويا ناس جوارينا كدامنة بس ماعدنا علاقة بيهم بقيت بلمطبخ اندعي ولو ادري صعبة وشبه مستحيلة بس بصيص امل بداخلي دفعني للتمسك بأي قشة ممكن تنقذني من ضياعي لمحتوم بزواجي من زياد
بقة جوة يم بابا
اقل لنص ساعة وطلعو
حاولت افتهم من امي شنو لصار اكلتني وشربتني
ماعندي حل غير احاول وياها عسا كلب لأم يرق الي حاولت اعزف علوتر لحساس
طبيت يمها للغرفة جانت تصلي
يمة انتي زياد تعرفينة ماينعاش ويا اني اموت روحي ولا اعيش ويا لرجال ينجرع بكل عيوبة إلة لبخل
شفتي دشداشتة شفتي لونها شلون رايح شفتي كفتها شلون مذاولة علي
شفتي محفضتة مشككة وجلدها واكع تكولين ماكلتها فارة شفتي سيارتة لعنجة شحالها شفتي موديلها
يمة فدوة اروحلج مااريد زياد خلوني بلازواج
اني ماالي دخل لتحطيني بلنص هاي قناعة ابوج كافي علية عارات عماتج ونسوان عمامج تزوجي خل نخلص ترة شردنة من لناس وعارات لقريب ولبعيد من ورا سوايتج
زين قيصر شبي انتي متتمنين اكون قريبة يم بسعاد
متتمنين يصير بينا نسب واحفاد ويننسي لحقد ونكوم نشوف بسعاد وتشوفنا
ليش مااتمنة بس هوة يكول اهلة مايرضون
و كايل لأبوج اهلي ماراضين ويريد يتزوجج ويستقر هنا يمنة لو ببغداد ويعوف ديرتنا يعني لمصلحة لوحيدة الي ممكن تخلي ابوج يوافق طارت
فائدتنا لوحيدة من هذا لزواج انو تكونين قريبة من بسعاد وعينج عليها ونكدر بحجة نزورج نشوفها وتقوة لروابط بينا ويروح لحقد
يعني يعوف ديرتا وناسة علمودي شفتي يمة شكد يحبني بهاي مكانتي الي بكلبة اكدر حتة ائثر علي واخلي يقنع صميدع يجي هنا
غلطانة بلقيس لولد كايل لأبوج يعصا اهلة ويتزوجج يتبرون منة ومحد الة شغل بي بعد
يعني ممنوع حتة يلتقي بيهم
جانت اخر محاولاتي بأيجاد سبب اقنع بابا بي
ثاني يوم طلعت اروح للدوام وزياد وداني بتوصيات من بابا الي شدد لرقابة من عرف قيصر بعدة موجود مارايح
بلرجعة نزلني وراح بشغل للسوك
بعدني ادك بلباب ومنتضرة امي تفتحها الي
نسحبت من ايدي وحيل نضربت بي
وجهة بوجهي ويهمس
هنا كاعد ومااطلع من دياركم اذا مو ايدج بيدي واريد اشوف يازياد لياخذج مني
عيوني نفتحن كل حيلهن
شخص من بين لزرع طلع وبيدة سلاح
حسيت رماد نيران لخوف ليحرق اعضائي يتطاير من عيوني ويتجلى بهيئة دموع وصرخة نخرست من شفتة خلة سلاحة براس قيصر
هنا حسيت جسدي ذاب وتجانس وية لحايط الي يسند جسدي لمعتصر بجسدة
عيونة نفتحن وندار علي ولسلاح براسة
عاين الة وركز بوجها وهمس طاهر شجابك هنا
رافع سلاحك علية
نزلة قسما بلقران اندمك
ماانزلة قيصر ولتججي ولا كلمة كدامي للسيارة
اشر الة علزرع ويهمس
ترة مليان زلامنة متخفين ورة لأشجار اي مقاومة تبدر منك تنضر انت ولبنية
ندار علية واشرلي طببي جوة
_منو هذا قيصر حاجيني
_مالج غرض طبي جوة
_قيصر راح تعوفني
_ورب محمد ماطلع من ديالى اذا مو ايدج بأيدي لو موينحط سلاح براسي
_خل اتصل بلشرطة
تعالت ضحكة الي اسمة طاهر ويأشر لقيصر يكلة تريد تتصل بلشرطة لحلوة ليش انت ماحاجيلها
_ شكو قيصر احجيلي منو هذا وشيريد منك
_طبي ووصليها لأبن عمج كليلة
احنة نرد لشينة بأضعاف والي يضرنة يعد ايامة على اصابع ايدة
دخلت جوة لجنت اعيشة بهاي لثواني لشفت قيصر بيهن ينسحب للسيارة ومن بين لأشجار بدو يطلعون مثل زنابير
لبسهم مدني شي دشداشة شي بنطرون
ركب لسيارة وياهم
فتحت لباب وطلعت بررة تقربت علسيارة لجانت امشي علكيف عيني على جامتة وهمست
متانيتك قيصر وانت تعرف لبية
مشكلتي
ماعرف اشم غيرك
مشكلتي
عيوني تعوف كل الليل
وتنام بتصاويرك
عدت ايام وليالي علتي بكلبي لا اكدر احجي لأهلي لأن ادري يفرحون بلخلاص منة ومحد راح يساعدني اعرف خبر عنة
ولا اكدر اسكت
كل يوم اكول اتصل بأهلة وابلغهم واتردد لأن ادري بي جاي بدون شورهم واعرف ماراضين علية وميردوني
بقت عللتي بصدري
واتاني
اكول بلكي يرجع
طول هلفترة زياد يمنة
من تأكد وطمأن انو قيصر ماكو ختفة من لمنطقة يلله راح لأهلة
من راح يلله كدرت اروح للجوارين واتصل منهم بأهلة
طلبت احجي وية غضنفر كلولي ماموجود
ماعندي احد اثق بي غير جدهم
طلبت احجي ويا
سلمت ورد علية بأسلوب مجحف دونا عن عادتة
همست بتردد وخوف جدو اريد احجيلك شي يخص قيصر وخايفة
كولي
جدو قيصر اجانة لهنا بغرض ومن كدام بيتنا اخذو اشخاص مدنين ماعرف اذا جانو بلأمن لو لاء.
بس همة جانو مسلحين خفية
خير ان شاء الله بوية
مع لسلامة
سدة بوجهي
لا ازال مصدومة من ردة لبارد
عدت ايام جنت بيهن فريسة للقلق ولضياع
لبداخلي لاينحجي ولاينجبر بشي
بقت صورتة وهوة ينسحب ولسلاح براسة واخر كلمات كالهن الي يدفعن روحي للاحتضار يوميا
من عدها وتأكدت انو اعضم بلاء لبشر هوة بشر ثاني
قد يكون بشر يحبة وبهلحب تكمن اعضم مصائبة
اوقد يكون يكرها وبهلكره ولحقد تنسلب اسعد لحضاتة
اعضم مصائب لبشر هوة انو ينصاب ببشر ويكون علتة
انو تكون سعادتة مقترنة بهذا لانسان ومتعلقة بي هذا اعضم جرم ممكن يمارسة انسان بحق نفسة
يمكن لتفكير عندي مختلف عن كل لناس
اني الي انطي لاتفه لأمور اكبر من استحقاقها بتفكيري وسلبان راحتي
فمابالك بأعز انسان على قلبي
وينتهي صراعي لأزلي وية لنوم بوشم تحت عيوني يتوجني بي الليل كأحد فرسانه لشجعان
ايام عدت علية اصابتني لعنة لاسراف بلتفكير وإهدار معضم وقتي بل كلة بإدراك لأمور اكثر من اللازم
اصبحت مااملك لقدرة على لوقوف وممارسة حياتي بشكل طبيعي
نتهى صراعي بدخول بابا علية وويا زياد وعمو ومرتة وثنين من عماتة
وصوت بابا يصيح سوو طريق ويانا لشيخ
بلغرفة طبيت وسديت لباب علية
واكتم صراخي بيدي وروحي لمفرفحة
وصوتي يهمس
وينك قيصر وينة حجيك
دك لباب بابا وهمس
بلقيس طلعي يلله لناس برة ولشيخ عندة عقد غيرنا ناس ينتضرو ملتزم بوقت
نتهت محاولاتي واني الوذ بلكذب مفر من وضعي
سويت نفسي تخربطت روروحي خربت كلش
شالوني بابا وزياد للمستشفى
مااعرف اذا جنت اتقن لتمثيل لو فاضحة نفسي
بس لهفتهم علية خلتني اعرف انو اني اقنعتهم
خلولي مغذي وطلعوني
لشيخ جان رايح
دخلت جوة جابتلي ماما عصير
صوت مرت عمو واني بلغرفة اسمعة
_عبالها تقنعنا بهذا لفيلم اذا يعبرن عليكم سوالف بنات إخلاص علية ميعبرن ترة
صوت زياد يرد عليها
عيب هذا لحجي يمة لبنية شلناها خربانة شحالها غادية نكت
تقنعمن بهذا لحجي زياد هي متريدك وتسوي افلام
طلعت برة مخنومة حييل ولكيتها حجة حتة اصب غضبي بيها بلكي تبطل وتصف ضد هلقسة واخلص
_كاعدة بنص بيتنا وتهينينا اذا انتي تفكيرج هيج بية لعد ماعتب علغربة ولو كلمن يرى لناس بعين طبعة
_ربيها يبن بطني موتكول اريد اخذها اكسر خشمها واربيها
_افهم من كلامج بابا ماعرف يربيني حتة ابنج يربيني
_لومتربية ماجان سويتي هلعملة وهذا لمعيدي لو مامضوكتا ماجان اجة يلهث
_ نداريت على زياد بصراخ
وداعة بابا ومعزتة بعد لسمعتة يازياد لو تصبني ذهب مااعيش وية امك ببيت واحد
_ديلله عيني علساس اني لكاتلة روحي عليج وعلى طبتج لبيتي
مشيت دموعي بعيني امي ماحجت كلمة
صوت زياد وراي لحكني
نداريت بنضري اتفحص لبسة لجاي يخطب بي
جان لابس بنطرون من ايام خدمتة بلعسكرية من جان تارك لدراسة ويلبسة بوقت الي يريد يكشخ كل قوتة
وقميص كريمي مال عمو مطبك رداناتة ولياخة نازلة على متونة
وشحاطة من سنين اشوفة يلبسها لاتنكطع ولا يصير بيها شي
ايدة لزمت عكسي
دفعتة وردت امشي
ستوقفني بكلامة ونضرات لاعتذار
بلقيس امي موجديدة عليج تعرفيها هذا طبعها واني وياج ندري هي متحب امج وامج متحبها ولهلسبب ماراغبة الج من زمان
لاموجديدة علية امك
بس الي ستجد اهاناتها الي وهذا لشي مااقبل بي واذا حاولتو تجبروني انت أو بابا ثق اسوي بنفسي شي لاتحمد عقباه
تهددين بلقيس
شتسمي سمي
اني ماجاي اخذ رأيج وهلمرة احترمتج وجبت امي وابوي مرة الاخ بطرك روحي اجي واعقد عليج
ترفضين او ترضين ميهمني
صوت امة يرد علي من جوة
اي مو انت........ قيصر يشبع بيها وانت تستلم
دخل جوة وحييل ضرب لباب
مااسمع غير صياحة وياها
هاي بت عمي يعني عرضي واني مو ناقص غيرة حتة اسمح تحجين عليها هيج كدامي واسكت
_لضاهر نسيت لرسائل لجانت تدزهن الك بيد بسعاد بلقيس ماتصلح الك ابني واعرفك موكفو تكسر عينها ولا كفو تربيها شفتني حجيتلي كلمتين كمت تتراجف عليها رحت تبرر وتعتذر
شي نشال ونركع
وصياحة يتعالة
انتي مو اممممم لا والله عدوة
طلعت اريد اصب جم غضبي بيها
وتفاجئت بماما الي جانت تلتزم لسكوت وماخذة وضع لمتفرج وهمة يهينوني وبنص بيتنا
تصرخ بكل صوتها
طلعو بررررررررررررة
ماما بطبيعتها هادئة وتتحمل وتسكت دائما لخاطر بابا بس لضاهر لصار اذاب كل طاقة صبر بيها وجان اكبر من انو تتحملة
زياد ضرب لباب وطلع
عمو ومرتة بقو يدردمون وطلعو همة وعمات زياد
ورة طلعتهم بدقايق طلب بابا جان جايب الي معلاك علمود دمي ولدوخة
رحت على ماما جانت بلكاع وترجف وتبجي
حضنتها حيل
وبكل قوتها دفعتني ونترت بية
ولج ليييييش
اني ام زياد تعيب تربيتي وتتهمج بشرفج كدامي عينك عينك
انييييي
ليش ماسريتيني
ليش ماحجيتي من لاول وكلتي يمة هاي وهاي لسالفة
ليش شمتي ليسوة ولميسوة بينا
بعد مااكدر احميج
خليتيني عاجزة واني اشوفج ترحين بكسرة لزياد وامة لسالة سيفها ومااكدر كلشي احجي ولا اكدر اوكف بوجه ابوج
ماعندي جواب غير دموعي لصارت ماتهزهم ولا تأثر بيهم عكس قبل جنت من ابجي ينخبصون بية
هانت دمعتي ورخصت بعد لصار
دخل بابا بيدة لعلاليك ذبهن علقنفات ويسأل شكو
تقربت الة بلوعة مثل لوعة لجندي لدافن كل ربعة
مثل فجر طر بلا عصافير تزقزق وورود تتفتح
تقربت ولبية ضيم خرب ملامح وجهي وتلف كلبي
يريت لنسيان بدينا يريت ننخلق بقدرة على مقاومة لحب ولمشاعر الي نجهل حتة شوكت تمكنت من عدنة وجعلتنا بهذا لضعف ولتهاون
بدموع وكسرة وخوف همست ابوح بلي بداخلي
بابا اني غلطت ومنو بينا معصوم من لغلط
بس عقابك الية بزواجي من زياد اكبر من ذنبي والله بابا
ترضاها مرة عمو تكول عني مو شريفة وتكول قيصر شبع بية وزياد يستلم
ترضاها تكل لزياد ربيها لأن محد عرف يربيها
بابا هاي لقسمة اكبر من ذنبي
اني غلطت بس والله مااجرمت
اني انضف من كطنة
اني تربيتك بابا لافرطت بشرفي ولا ضيعت تعبك
كل لسويتا حبيت اساعد انسان رعبني صوت لرمي ليمة
كل لسويتة نفذت وصية انسان جان اشبه بلميت
هذا ذنبي مايستحق اتعاقب بهيج قسمة
اني وياك نعرف زياد شنو ونعرف مرت عمي شنو
احنة يبقة ايام يمنة من بخلة نفسيتنا تتعب شلون تريدني اعيش كل عمري يمة
للكاع راسة مدنكة وعيونة تحدق بلأرض وتتوسع
صوت ماما يرد علي
ابو بلقيس بعد لكالتة ام زياد لو اموت مااقبل تكون بلقيس تحت رحمتها إلا اذا ناوي تنطيها بدون رضاي
عيوني علي
رفع راسة عاين لأمي وجر نفس
ندار علية وكال .............
انعام...
لمكان اضلم وبارد
ولصوت يرن بأذاني
ثارك يلصدر ثارك
دين بركبة احرارك
ثارك مانبيع لثار
لا ولواحد لقهار
ابد ماتنطفي نارك
ثارك يلصدر ثارك
وصورة لتشيع كبالي
لجنازة على متون لمحبين ولموالين تتنقل مثل بلم وتنقلة لروجات من مكان لمكان
صوت بابا يهمس الي بلقيس اني مشتاقلج
ضوا عالي شق لضلام الي يحيط بية ويقترب الي
وراها تجسد لضوة بهيئة بابا وكعد كبالي يبتسم بدون مينطق
عجزت واني احجي ويا واهمس الة
بابا مدرسك وقدوتك إستشهد من ٣ سنوات وإلتحق بركب لحسين
إلتقيت بي لو بعدك
شفتة ورتاحيت لو بعدك
هناك تونسون بعض وتهيئون لمكان لكل شهيد يلتحق بيكم ويسير على منهجكم
يبتسم وميرد علية بس هيئتة جان جمييلة وشكلة شاب مو وهوة جبير
تقرب الة واهمس
بابا اني تعبانة
بابا شبابي ضاع مافهمت كلشي منة
اخذني يمك
ذوبوك بلتيزاب بابا حاجيني
اقصى امنياتي قبر الك وابجي يمة لحد مااخوة
تعال شوف ماما شلون ضيعتنا
تتذكر من جانت تجفص يم اقاربنا وانت تكللها لحيطان الها اذان حاذري على كلامج جنت تكللها الج يوم تضيعينا بسبب تصرفاتج لطايشة
ابشرك ماما ضيعتنا ثنيننا
تقربت الة راسي على رجلة وبنوح اهمس
بابا ندعيلي اريد ارتاح من سنين ماشفت لراحة
نززني صوت انغام تهمس الي
انعام كعدي وحدة علتلفون من لعراق تريدج
كمت مخروعة لزمت لسماعة ايدي ترجف مرتين وكعت مني
صوت بيبي شكرية يهمس الي
يمة نعيمة المن اشكي والمن احجي
يمة ضاع لغضنفر ضاع
بيبي اترجاج اني تعبت وحق الله تعبت ليش يابيبي بس وكت لمصايب اسمع صوتج
اني لبية قليل
اترجاج بطلي تنعين مثل كل اتصال وفهميني
اني بكل اتصال منج اضل يومين مانايمة
فهميني ولتنعين فدوة
اي يمة اي هوة انة انقلج علوم كشرة
بس شني لعمل ماعدي بنيادم اشكيلة
ومحد يحس بلوعتي على غضنفر كدج
احجي بس احجي شنو لصار اتصلت بية وحدة من لبنات يمكن تهاني وكالت راح انطيج لتلفون حاجي غضنفر وهدي ووراها صراخ وصياح ولتلفون نشال ونركع شنو لصار
جدة انة ماادري بلصار تخربطيت وطلعت من لبيت وهسة انة بلمستشفى هاي لبت لسستر خلفلة عليها اتصلتلي بيج لااعرف اخباركم ولا ادري شصار بس كل لأذكرة غضنفر إلة مدة مختفي
طب علينة بلليل وطب لحجرة عمة جليل وولدهم وطلعهم
فدعم وصميدج كلشي مامفتهمين بس شبكَوهم اله وطلعوهم حطهم بسيارتة
جدج يحاجي انة نعناعة عمامة
مايرضة يحجي ويكللهم ليريد يفهم يجي وراي
خذاهم وراح ولحكو عمامة وجدة ولويلاد
شوية ورد فدعم جايب عمتة امريكا وتهاني ذبهن وراح
سعلناهن شكو
كالن غضنفر حافر كبور لجليل وولدة ومصوب ثنين منهم
انة طحت وطلعوني للمستشفى
وهسة ماادري كلشي عنهم
واني شنو لبيدي يابيبي اضل بس اكل بروحي هنا عاجزة عن اي شي ممكن اساعدكم بي
يايمة انة هم غلطانة اتصلت بيج شلشتج بس انة مااحافضة غيرر رقمج من جان غضنفر مسجون يمكم وانة اتصل بيج كل فترة حفضت لرقم
كلت بلكت تعرفيلي شبيهم
ماكو اعتقد لتلفون كسرو من جنت احجي ويا لبنات قبل شوية نشال ونركع ونسد لخط
جا دكيلي على بيت إسماعيل
مااعرف رقمهم
وهية تحجي وياي صوت شخص يحاجيها بقة يحجي وياها ويسألها وراها نسد لخط
بقيت الوب اريد اعرف شصار، وياهم
هنة ساعتين غفيت بيهن من فرط لتفكير بأتصال تهاني وكلامها وياي
بقيت افكر اخر شي توصلت الة اتصل بكوثر اكيد حافضة رقم بيت عمها
جان لوقت مومال اتصال
تانيت شكم ساعة وراها اتصلت
ردت خالتها سلمت وبدون مااشرح تفاصيل طلبت احجي وياها
نطتها الي مجرد ماكلتلها اريد لرقم صرخت
غضنفر بي شي
الي شهر مايمر علية اسبوع اذا مااحلم بي
كلشي مابي بس منقطعة اخبارهم صار فترة و ميتحصلون كلت اخذ رقم بيت عمج إسماعيل اسألهم عنهم
انعام اهلي بيهم شي لاتضمين علية بروح ابوج
كلشي مابيهم صدكيني
ماشي سجلي لرقم بس امانة اي شي يصير حطيني بلصورة
اخذت لرقم منها وكوة طمنتها وتهربت من اسألتها الي شكد مااحجي احسها ممقتنعة
دكيت وادعي يارب مامغيرين لرقم
دكيت هواي محد رد
ورة اكثر من ساعة واني اتصل
رد علية صوت رجولي
سلمت وبدون مااعرف عن نفسي عرفني
سألتة شصار غضنفر شسوة وفهمتة انو غايتي من لأتصال اطمن بيبي شكرية الي اتصلت بية تسأل عنة لأن ماحافضة غير رقمي
همس الي طمنيها عمي جليل وولدة بلمستشفى عالجوهم وهسة عدو مرحلة لخطر ومابيهم شي
صوتي بخنكة يهمس،
وغضنفر؟
جر حسرة طويلة وراها كال بخير بخير
اكييد
اي خوية
شنو لصار لعد موجان حافر قبورهم
انتي منيلج هذا لحجي
بيبي شكرية كالتلي
بسيطة اني اعرف شلون اخلي جدي يتوبها تطلع اسرارنة عبر لقارات
سدة بوجهي
كلعادة مثل كل اتصال الهم ابقة بلا نوم
صبحية واني بلدوام اتصلت بية امي
بصياح صوتها رعبني
كرت عينننننج
تزوج محمد تزووووووج
وحالف يكول مااطلكها وإلة اخليها معلكة
بين فرحة وبين كسرة سألتها
شمدريج
هسة اتصلت اختة عيني اكلتني وشربتني تكلي
خليها بتج على كلبج خطبنالة وتزوج لخميس لفات
سنين صارلة ينتضر حتة شيب طلع براسة ويكول انعام جاي تسعة بمعاملتي ماينطي بيج رغم يدري معاندة
ضيعتي للولد
ولج سنين صارلنة هنا لا احد دك بابنة ولا احد خطبج
وكل لعراقيين لنعرفهم عرسو
هسة راح ترجعين علية
لا ارجع على روحي والومها على هلتربية لمابيها حض
عفية بنات ميعرفن مصلحة نفسهن
يركضن ورة مشاعر لاتقدم ولاتأخر
سدي ماما عندي شغل
اي ليش لا راح اسدة عيني
ضلي ضلي لاحضت برجيلها ولا اخذت سيد علي
دموع تجمعن بعيني ماعرفت افسرهن دموع لفرح لو لحزن
ياترى عناد محمد واصرارة على انو يبقيني معلكة شوكت ممكن يذوب
صوت لعاملة ام ادم اللبنانية تهمس الي
اكيد مرتو مابتعرف
ماالك غير انو تفضحي إدام مرتو وهي اكيد ماراح تسكت وراح ينجبر يطلقك
فكرتج حلوة بس شلون اوصل لمرتة
انتي مخمخي واكيد بتوصلي لحل
رجعت للبيت في جعبتي بصيص امل بلخلاص
وبلمقابل خوف تعدا لوصف على غضنفر
لليل اتصلت على بيت عمة اسماعيل
ردت علية زوجة عمهم سلمت عليها وسألتها عن غضنفر
صوتها بشماتة تهمس الي ............
فدعم..
قيصر بخير وبأمان ونندل مكانة بس جدي مايرضة ابلغلك إلة اكلك هيج
ليش يضم عني هيج شي احجي
احجيلك بس ماتحجي لجدي ولا تكلة انة كتلك ولا تتصرف لوحدك ولاتحاول توصل الة
احجي عود والله كريم
غضنفر كلمة زلم ترة كلنة ننضر وحتة انت تخسر حياتك
خااب احجي
خوية قيصر سالفتة سالفة
لبيت لمسكون لورانة طلع مامسكون
وطلعت هاي كلها حيلة مسويها قيصر وضام بي فرارية ومحكومين
شلووون وشوكت منيلك هذا لحجي
جايك خوية اصبر على رزقك
طلعت كبل جم يوم بليل بيدي بطلي اتختل بين لزرعات روحي طالعة على تهاني من ورة سوالف ابن عمها
ولك انت ماتتوب من لبطل
هسة هاي مو سالفتنة
وانة كاعد اسمع صوت مهامس ورجلين
كمت بين لزرعات اتختل واصيدلي ثنين
اوخر اللثام عن وجوههم والكاهم ولد دلال لعورة لعساس تهجرو كبل شكم سنة
شجابكم هنا بقو واحد يذبها علثاني
بجم راشدي وجم تهديد كالو نحجيلك بس فدوة لاتضرنا
نطيتهم لأمان وكلمة شرف ماضرهم
كالو قيصر ضامنة بهذا لبيت جنة شكم واحد وراها كلما تجي سيارات لأمن وتطب لديار بني سعد غفلة يجيبلنا ثنين لو تلاثة الى ان نترس لبيت بينا
طلع صاحبنة يراقب جدي من يصير ابلاغ عن جية لأمن يروح يبلغ شكو بيت من لجوارين عدهم هارب ويشردهم ويضمهم بلبيت لمسكون
من ختفا بحجة رايح لعرس صاحبة دكهم لجوع كامو يسطون على بساتينة يبوكون وانة ضفرت بيهم بلجرم لمشهود
هديتهم وراحو
ورحت حجيت لجدي كلشي وفهمتة
_غضنفر لايانذل ولك شلون توشي بقيصر
_فدعم :خوية غضنفر انة وياك ندري ليشتغل شغلتنا لازم عشيرتة كلها نضيفة فردا فردا
لو نلزمو وعترفو على مساعدة قيصر الهم وتسترة عليهم كل هلمدة لاوضيفة ولاخدمة تشفع النة وانة وجدي اول لمتضررين وكلكم يلوحكم طشارنة
كمل يلنذل كمل
خلفلة عليك هاي جزاتها لأن خايف على مصلحتنا
خوية لا اكلك ولا تكلي
جدي من درة وكع بلكاع و٣ ايام كلبة يأذي ليلية ناخذة للمستسفى ونردة
وراها صاحني لغرفتة وصارحني وكالي
بوية انة وصلت لحل وماكو غيرة
لولد راح نطلعهم منا
_شلون خاف ينلزمون جدي تحجي صدك من لتعذيب موبس على قيصر يعترفون حتة علينة
قيصر دبارة يمي
شلون
نطلعة برة لعراق ونتلاعب بأوراقة نغير تاريخ خروجة بحيث تكون اوراقة تثبت خروجة من لعراق قبل احداث لغوغائيين
صفنت شفت ماالها حل ثاني
ايدتة وسوينا هلشي
يعني بلغتو عليهممممم وقيصر سنين الة ضامهم ومامن حياتهم
شبيك تصيح مابلغنا بس خليناهم يغيرون مكانهم وحرمنا عليهم دخول ديارنا
وهسة همة وين وقيصر ويييييييين
هاي شكم شهر غبت بيهن كلهلامور صايرة
قيصر بعمان جدي طلعة وفهمة انو لولد نلزمو واذا يرجع راح يروح بلرجلين
ويبقة قيصر مهجوووول ؟
لا ان شاء الله مدة وكت
همة لحد لآن مانلزمو بلكي يكدرون يطلعون تهريب شي برة وتنفض لسالفة
تعرفون اخبارهم
تقربت الة وبهمس رديت
انة اعرف مكانهم بعدهم ماطلعو برة ديرتنا وهنا ائمن مكان الهم وعرفتهم على قجقجي بلكي يكدر يطلعهم
ونفتك
صار يصفك ايد بأيد
ضاع قيصر ضااع
خوية احسن مانضيع كلنا
اسألك بلله انة شوكت التم وي هلي
ضاعو وصفيت ايدي للحايط
تهون يخوي تهوون
عافني ومشة
مشينة راجعين لمكان لكبور لحافرهن بعد مااخذتة على صفحة خاطر لا اسمعهم
واندار كلسا صفحة تهاني اشوفها تتلصلص علينا
ولد عمي إسماعيل ثنين واكفين وبيدهم لسلاح
غضنفر حط سلاحة براس عمي جليل وكالة
امي عدها شي وي ياس لو لشوفتة الي خطة منكمممممم
ساكت مايجاوبة
عمتي امريكا جلبت بملابس غضنفر وتبجي وتتوسلة
عاين الي واشر عليها
خوية اخذهن للبيت
منو هن هي بس عمتي
هي عمتي وذيج لبزيزينة لخاتلة بوسط لكبور
بلعت ريكي فشلان وشلتها شيول تدفع بية
عمتي ضخمة ومفجوعة ترافس وتدفع بية ماكدرت اسيطر عليها صاح غضنفر على صميدع كالة روح ويا
كوة صعدناها بلسيارة وصدعت تهاني لروحي فارت من شفتها جاية بطرك لدشداشة لكصيفة وتحديدا وي ابن عمها لرايدها
من حركة كلبي نهيت عليها واني ادري مالي عليها نهوة
عبن موش ابن عمها
بس شسوي عللتي بصدري ضالة
بقت عمتي لدرب كلة تبجي وتلوم بينا شلون عفنا
_ولكم يمة هسة يكتلهم ويروح مثل ماراح ابو
يركض على منيتة من زغرة ليش تنفهولة لييش
بمكان ماتمنعو
صميدع:- عمة نارة ماتبرد إلة ياخذ حكة ويفهم منهم امة فعلا زانية مثل ماصوروها الة لو تهموها باطل
لبي موشوية خليج بمكانة سنين مخدوع
ياكلون بي ويمصون بدمة وهوة جانلهم حايط من كونكريت ياهو ليطيح يستند علي
كافي خلو يرتاح
فدعم:- وصلنة للبيت نزلت عمتي وتهاني وصميدع ضل بلسيارة
بساع دخلتهن جوة وركضت
مشينة بلسيارة لمسافة موقريبة تقريب تلث ارباع لساعة وصلنة
من بعيد نعاين كلشي ماكو لاغضنفر ولا همة
تقربنا لكبور خالية وغضنفر ماكو
بعلو لصوت كمنة نصرخ نصيح بأساميهم ونفتر ندور
عيوني علكاع وبيدي فانوس جنة جايبي ويانة
لكاع لتراب مال لحفر مخربط ومتطشر بعد ماجان على شكل كوم عالي
وعلجها لثانية ملابس بلكاع
مشيت خطوتين سلاح مال ضاري ابن عمي إسماعيل بلكاع
صديت واحد من لكبور مطموم
شلت لكرك وصرت احفر بكل قوتي
بهستيريا احفر اريد اوصل لجثة ماكو ميرضة لتراب يخلص
فزيت على صوت صميدع لجان يتمشة ليكدام يدور اثار الهم بلكي يلكاهم
رفعت راسي واشوفا يصرخ علية بكل صوتة وياشر
كمت على حيلي رفعت دشداشتي وبين لقبور اطفر اريد اوصل الة
وصلت قريب الة وعيني على ايدة الي تأشر،على شجرة جانت مزروعة يم قبر
رفعت راسي وركزت اكو جثة معلكة بلشجرة
تقربت الها وكلبي كبل رجلية يمشي
عاينت الها واشوف .....يتبع
مساء لخير تفاعلكم مثل ناكوط لحب شنو سالفتكم متكلولي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!