#خنجر_لغضنفر
#البارت_السادس_عشر
#حنين_حاتم
بلقيس..
من سدت لتلفون انعام وكالتلي ماراح اكدر اجي واساعدج واشهد نهاريت بجي ولطم
يوم ثاني بابا تخربط طلعو من غرفتة جنازة
بقيت اكوم واوكع قهر وقلة اكل ونوم
وكلها ستغلت لفرصة ملامة وحجي
كل واحد عندة كره وحقد لكاها حجة
مالكيت اي بشر سندني وهون علية
ورة يومين كاعدة لوحدي بلصالة بابا بلمستشفى وامي وزياد وعمو ويا
بيدي قران اقرة بي
لكتلني طالبيني بلأسم كايليهم لبنية الي اجت ويا نريدها فصلية منريد غيرها
عمامي كيفو حتة محد توكع بيها بنتة
وبدو يقنعون بابا
نطيها وفض لسالفة وبيع بيتك وسيارتك ولباقي زياد يدفعة من لعندة وخلصونا لتروح تكبر وننضر احنة
كلمن خاف على نفسة وحالة
وكلها تبرت
رغم ابن عمو من اخذ كوثر وشرد بيها
بسعاد شالت ذنبهم وتعاقبت بسبب عملتهم
جنت اندعي ربي وابجي واطلب لخلاص
ضاكت بية ومن خوفي على بابا قررت اخضع
ونتهى تفكيري ومات لرفض لبداخلي
دعواتي جانت انو اموت واخلص لان ماكو غير خلاص
ولا الي عين واتواكح وارفض وبابا بين لحياة ولموت
واني الي مسوية لعملة واني الي متعنية وجايبة لمرة
يمكن لو وضعي مثل بسعاد جان كدرت ارفض
بس بهذا وضعي مالي عين
اسمع باب لشارع نفتحت
اذكر حجايتة من كل لماما مااريد اشوف وجهها
بقيت بمكاني ماريد اغثة بشوفتي
اسمع صوت زياد يصيح وينج بلقيس
اني بحجاب لصلا
همست
اني هنا
تقرب سلم وكعد علقنفة
جنت مدنكة وامسح بدموعي
صوتة يهمس الي
بلقيس لتخافين اني وياج
مااسمح ترحين فصلية لو اعرف تعبي كلة يروح
وعشيرتنا الي طلعت منهم بسعاد ويردون يجملوها بطلعتج فصلية
همة فاشلين وجبناء
جان منفعل ويحجي بصوت عالي
مدنكة وابجي مارفعت راسي
صوت لتلفون دك
ردت اكوم
اشرلي كعدي
ضتيتها امة
بس من علة صوتة وصاح
اي اي اجيت
صوت عمو يرد علي بصياح
اجيت تأثر عليها وتقنعها متوافق موو
اني من طلعت حسيت عليك رايح الها
صار زياد يصيح ويكلة
انتو جبنااااء
ولكم عشيرة مليانة زلم نتحامة بمرة
مرة تحقن دمنة وتحمينا
عيب على شواربنا والله عيب
اني بطلعة بسعاد جنت بلبصرة اجيب بطاريات سيارات ورجعت جانت فاضة لسالفة
بس والله لو موجود ماخلي هاي لطفلة لمسكينة تضيع
معليكم املاكي واني حر بيها
ابيعها اوزعها للناس محد الة شغل هذا تعبي
صوت عمي علسماعة يصيح علي وتجاوز وغلط ونوب ستلمت لسماعة امة وكملتها عد وصف وغلطت علية وعزفت سمفونيتها لمعتادة
سدة بوجهها
وتقرب الي
وهوة واكف همس
بلقيس يدوسون على جثتي قبل ميطلعوج فصلية
حطيها ترجية بأذانج هاي
طلع بعجل
صوتي بهمس وخنكة يرد علي
اني قابلة بس خل بابا يكوم سالم
اسمع صوت لباب من سدها وطلع
شوية ودخلت خالتي يمي
بقت يمي هي وبناتها باتن
يوم ثاني عمامي نخبصو زياد ماشفتة ولا اتصل
لليل كالو نحلت
نسأل شلون نحلت شصار محد يفهمنا
ورة يومين طلع بابا من لمستشفى
جان مرتاح ونفسيتة زينة بس بعدة ضايج مني
اتصلت بزياد اسألة عن لسالفة شلون نحلت
محد يجاوبني
اتصلت اكثر من مرة ردت امة
سلمت وسالتها علي
بدون مترد لسلام بنتر عاطت
شتردين منة
ماكافي طلايبكم
اني هلواحد وتردين تروحي من ادية انتي وامج
امج كاتلها زياد تغار مني لأن خلفتها بنات حاسدتني على هلولد
تلفن وتحومن علي انتي وياها
بس والله تطلع جنازتي من هلبيت قبل ماتطبيلة جنة
سمعتيييي
اكلتني وشربتني
بعدني اريد ابرر احجي
سدتة بوجهي
وعدن ايام بابا صار زين تحسن بس بعدة ميحاجيني
اشهر عدت اتصل على اهل قيصر ميردون لو يرفعون لسماعة ويعوفو
عرفت قيصر بعدة ماصاحي
زياد ولا اشوفة ولايرد على اتصالاتي
ترد امة ترزلني وتتعارك
خفت لايكون عارف شي ولهلسبب ميحاجيني
بدت لسنة لثانية
زياد دوام
كلت جائز ملتهي بدوامة وجنت انطي اعذار ومبررات
بس خوفي بداخلي
فاجأنة بابا من قرر نشيل يم اهل امي
وبضرف شهر حصل بيت وباع بيتنا ونتقلنة
ولقهرني وخوفني اكثر زياد ولا بين
اسأل بابا يكلي
_ كلشي مابي ولا صاير شي بيني وبينة بس لضاهر امة وابو منبهي بسبب لمشكلة
ماقتنعت لان اعرف زياد محد يكدر يمنعة عن شي
من زغرة لبراسة براسة
وخصوصا احنة ابد مامنعتة امة رغم كلشي سوت حتة اعمال شيطانية بس ماكدرت
جانو كلهم يكولولة شنو ذابين سرك ببيت عمك ابو بلقيس وماندري
هوة يضحك ويكلهم يمكن
ستقرينا ببيتنة وورة اكثر من سنة يلله سوينا تلفون جديد بابا جانت حجتة انو اريد ابتعد عن لعالم ولناس ماريد بشر
تعقد ونفسيتة تعبت من يوم لمشكلة
اني قدرت حالتة وابد ماطلبت لاتلفون ولا اي شي
دوامي نتقلت وبصعوبة يلله كدرت انقل واسطات ومعارف
بيوم الي ربطلنة تلفون تانيتهم نامو وبليل دكيت هواي
رد علية صوت وحدة
نفسها الي كالتلي اني سلامة بس ماعرفت قرابتها شنو
سألتني انتي منو
كلتلها اقاربهم من بعيد واريد احجي وية قيصر
_صوتها بضحكة يهمس متأكدة تردين تحجين ويا
_اي متاكدة ليش اكو شي
رجعت تضحك وتخلي ايدها على حلكها واني الوب
كالت راح اكعدة واجي
شأكلة
حتاريت شكللها خفت اكللها اسمي وتعرفني اخت بسعاد وتخبث وياي
تذكرت لنخلة من صعدت عليها ونزلني
اذكر من نزلني همس يم اذاني
اول مرة ادري لرطب هيج طيب
كلتلها كليلة
لرطب لطيب
ضحكت وكالت
ياااع يارطب هذا
بس يلله موغريبة هلاسماء عدنة واحد هم مسمي ورد لباجلة
عمت عينا كون هوة وورد لباجلة مالة
_اكلج سللامة انتي شتصيرين منهم
جرت حسرة طويلة وكالت
_خية انة مرت لسبعبع
لسبعبع هذا اللقب جان مطلعة قيصر على غضنفر كلة يسمي لسبعبع
ضحكت وبداخلي حسرة على انعام
اذكر سوالفة ونضراتة الها من تكون ممنتبها او صافنة
نضرات موعادية ابد
ماشفت ابتسامتة طول فترة تواجدي يمهم غير من يسمع طاريها أو يسمع صوتها
جنت اشوف بتسامة خفية تنرسم على ملامح وجهة
ويسرح
بقيت انتضرها راحت ودقايق ورجعت
بضحكة كالت خية نايم ناااايم
ماعرف ليش جنت احس نبرتها بيها استهزاء
سألتها ليش ماكعدتي
خية وعيتة وكتلة لرطب لطيب تريدك
إلة اكلج مايرضة يحاجيج
معقولة؟
اي معقولة جا اتي ياهي غير اعرف
اني اقاربهم من بعيد سلميلي علي وكليلة مشكور
سديتة ودموعي نزلت
واني الي تحملت كلشي حتة مااخيب املة
تالي ماكلف نفسة بسؤال
تركتة مدة طويلة شي بداخلي مكسور
تمنيت يرجع يحاول يتصل بية
ورة اكثر من سبع اشهر اتصلت
كلما اتصل ينطوني حجة ومن اسأل علي ناس تتحسر ويكولي موزين وناس تضحك وتتشمت وماينطوني رد يبرد كلبي
مامليت ولاكليت
تمنيت بس اطمأن علي واعرف ليش ميرضة يحاجيني
بقة بالي يمة و يم زياد
قيصر جنت خايفة علي
بس زياد جنت خايفة منة
اذا كتشف لحقيقة ليش مااجة وعاتبني وهوة بطبيعتة يعاتب وعتابة مثل عتب لنسوان
واذا ميعرف ليش هيج جافانة وكطع وهوة من زغرة محد كدر يمنعة عنة رغم كومة مشاكل صارت
اذكر حجاياتة من كلي اني وياج ولو اعرف اخسر كل لعندي ماخليج ترحين فصلية
هذا كلامة لجنت متخوفة منة
اثبتلي مخاوفي
اثبتلي انو زياد فعلا يحبني بس اني جنت غافلة
هنا عشنة غربة
لمنطقة لجنة بيها زراعية لانعرف احد ولا نحتك باحد
ولناس كلها عمك خالك
بابا جان بيدة يوديني بلسيارة ويرجعني
كاعدة بلحديقة عصرية وبيدي سنارة جنت احوك ملابس مال اطفال واضم بيهن
اتمنة بسعاد تحبل واخذهن الها
بحيث سويت جهاز كامل مال طفل
نفتحت لباب بابا متعود يفتحها من فوك دخل هوة وزياد
جنت بلا حجاب ركضت للمطبخ
طبيت للغرفة لبست حجابي وبقيت ماطلعت
شوية وصاح علية بابا
ونهال علية بلصياح ولاهانات
اخر جملة كالها
بعد حتة دوام ماكو
صرت ابجي واسال بي ليش شمسوية اني
_ادب سز طايحة لحض مستغفلة ابن عمج ومستغفلتني
رايحة ويا ولامانة ليمج من ابن عم صميدع وتجذبين علي
اني جنت بلمستشفى ونحلت لسالفة ومحد درة بلفلم مالتج غير هلمسكين لمورطتة وياج
والي جان ناوي يتفداج بأغلى مايملك
نهال علية بلضرب ولصياج
شعندج وية لولد احجي
وشنو لبينج وبينة
ادين زياد تهامش بية من بابا وهوة يدفع بي
بلكوة خلصني من بين ادي وكالة
عمو عوفنة اني وياها من رخصتك
طلع بابا بلصالة كعد كبالنةولباب مفتوحة جنت ابجي
صوتة يهمس
هية هاي لأصول يابت عمي
انتي ولغريب على ابن عمج ومستغفليني
ليييش ولج ليش ماصارحتيني
سنين ضام اللوعة بصدري واستحي حتة احجيها
شكول شحجيي
بت عمي اخذتني حتة تنقذ امانة انسان ....
تنهد وماكمل لجملة
ستغفر وبصوت عالي كال
عمو اني كدامك وعمتي بلمطبخ تسمعني
ليوم انهى على بلقيس
ندار علية وبنضرات عتب كال
لضاهر منعجب إلة نسوي سوايات اهل لجنوب وعاداتهم
وبابا وهوة كاعد كالة
_بدون متنهى عليها هية الك
وبعد لفضيحة لسوتها منو يدك بابي بعد
لليوم لعالم تعايرني بيها ووين ماروح يكلولي شلون هيج زعطوطة تضحك على عقلك
صوتي لباكي يترجاهم
بابا فدوة اني ماريد لا زياد ولا غيرة ماطول هاي نضرتك علية وماطول شاك بية
خليني خدامة هنا الم كبرتكم انت وماما
واني اعيش روحي براتبي حتة مصرف مااريد
صياحهم تعالة
ونبقة حاطينج حرشة
ونثبت للناس بضلتج يمنة انو فعلا اكو بينج وبين قيصر شي ومحد ياخذج
بعدها ماجان الي عين احجي واعترض
بقيت متاملة انو مرت عمو تخربها وترفض
اتصلت بيها ابجي واتوسل واكللهة
عمة فدوة الله يخليج اني مكسورة عين بسبب لصار مااكدر اوكف بوجه بابا وارفض وحتلو سويتها مراح يستمع الي
علاقتة وياي مو مثل قبل
قسا حيل علية
اترجاج خربيها من يمج
تفاجأت بردها لمستفز
اني ماريدج وجنت واكفة بطريقكم لأن ادري بي يريدج واعرف ابني اغم يدلل دلال
بس هسة لاااء
هسة زياد كارهج كره لعمة
وحلف يمين كالي اخليها خدامة الج
واكسر خشمها
اني اريدج يمي حتة اطلع لقضا ولمضا بيج واروايجن منو هية ام زياد
ومنو هوة زياد الي تضحكين على عقلة ومثل لطلي تاخذي وياج علمود هذا لعاشكتة ومدري شعدج ويا
عيب عليييج
خافي رببج
سدتة بوجهي
بقيت برعب
من عرفت نواياها ونوايا زياد
.......بس الي محد جان يدري بي
انو زياد جان مكسور واحساسة بكونة مغفل ومضحوك علي خلا يريد ياخذ،ثار كلبة
من انسانة حبها للحد الي جان مستعد يضحي بشكَة عمرة وتعبة في سبيل هي متروح من ادي
وميعرف اذا صارت حلالة فعلا راح يعاقبها مثل ماكال لأمة حتة يقنعها
لو راح يتغلب حبة على حقدة
وبضرف اسبوع اتفقو على كلشي وتحدد يوم لمشية
مشو علية وتفقو وية بابا على كل لتفاصيل
وراحو
لزمت سماعة لتلفون
شي بداخلي يحتضر
اريد اشكي
اريد احجي
اريد اسولفلة على لبية والي هوة سببة
من يوم لخابرني اني نتهت حياتي وسقطت بعين اهلي وعمامي وبابا من فشلتة شرد بينة
اتصلت رد علية شخص اول مرة يرد
محاجي وياي قبل
من كثر اتصالاتي حفضت اصواتهم
كلتلة اريد قيصر
نطا الي
نصدمت بصوتة
دموعي تنزل بعد لسمعتة عن حالة ولصاير ويا
لعتب اخذ منة ماخذ،
وشكواي ودموعي
وصوتة ليهمس الي
بلقيس اذا اجي اخطب توافقين
بدموع وأسى رديت
اوافق او لاء
موافقتي لاتقدم ولا تاخر
ابن عمي نها علية قيصر،
بعديش تسالني هذا لسؤال
سنين اتصل واتمنة بس اعرف شحالك ماجرالك
اسالج سؤال وجاوبيني لو اي لو لاء
ولو كلتي اي؛ قسما برب محمد لو لريس يوكف بوجهي مااهتم
انتي تحبيني ؟
وبتعب وتردد وخوف رديت بهمس
لو مااحبك ماتكبدت لمشقات علمود احافض على امانتك
ولا بقيت كل هلمدة اتصل على امل كلمة
خلص بلقيس سدي وباجر انة يمكم
قيصر مترهم فدوة مال تجي وحدك وهلامور مترهم ترة بابا وابن عمي عرفو كلشي
ابن عمي عرف اني جذبت علي ولهلسبب يريد ينتقم مني بهلخطبة وكايل لامة بعضمة لسانة
اخليها خدامة وذليلة واكسر خشمها
اكسر ضلعة وروح امي لماتت ضلم
اكسر ضلعة الي يفكر يكسرج
اهلي ماقابلين بيج ومعاندين
ومو انة ليكعد مثل حرمة ويعوف بنية حاربت علمودة وصانت امانتة الي نكروها زلم وماكدرو يتحملون مسؤليتها
انة مااخسرج بلقيس
انتي لسند لمحتاجة بحياتي لصعبة
بس قبل كلشي اكلج
انة صكطت
رجلي صكطت وصوتي مثل ماجاي تسمعين
وصحتي على كدي وشكلي وكلشي بية خرب
واني ماحبيت شكل
اني حبيت كلب
حبيت رجال
طفل ماواعي علدنية بس مانسة ضليمة امة
طفل يخطط لوحدة من سنين ويستقبل لموت بصدرة ومايسكت عن ثار امة
اني حبيت هاي لشجاعة
حبيت هذا لطفل لجانت تسولف علي بيبي شكرية
الي ماكسرة ليتم ولا كسرتة صورة امة وهي تموت على ادين اخو
اني اريدك سند قيصر
اني هنا ضايعة وكلها تشيرلي بأصابع لأتهام
وكلها تحوك لقصص حول مساعدتي الك
اجهشت ببكاء مدوي بحيث جنت كوة انطق واكلة
اني حجو بشرفي بسبب مساعدتي الك
ترضاها قيصر
ترضاها بابا يكلي بعد محد يدك بابي من ورة لسواية لسويتيها
وكأن ناهبة ومنهزمة منهم
يخسوون
يخسة كلمن يجيب شرفج
ايام عشتي عدنا ماشفنا كلشي منج
رحم الله لبطن لنكلتج ورحم الله لشوارب لربت لبوة مثلج
بلقيس جايج باجر
جايج لوحدي وبوضعي وبعاهاتي
جاي ولو اقنعهم واخذج لو ...
لو شنو
كمل قيصر شنو ببالك
ببالي انتي وبس
اخذج لو يكلفني هلشي موتي
قيصر..
قبل متحجي وتحاول تقنعني أو ترجعني عن قراري سديتة بوجهها
وصعدت لغرفتي
مر ليوم مانمت اليل كلة
ثاني يوم
_طلعت من لبيت ركبت لسيارة ورحت الهم
اعرف اسم لمنطقة بس مااندل وين بلضبط
بعد ساعات وصلت نزلت وبديت اسأل عنهم ومن واحد لواحد
لمنطقة زراعية وكلها ناس تعرف ناس بساع عرفوهم
رجال هوة وابنة من عرفو بية من لجنوب
بيدهم اصرو يوصلوني للبيت
وصلوني واحنة نمشي حجيت الهم غايتي
دك صدرة لرجال وكال
عمي اني اجي وياك واني اخطبها الك
_ممنونك عمي بس انة اريد اطبلهم لوحدي
وبوضعي هذا
بقة لرجال واكف بلباب وكالي ننتضرك هنا اذا رجعوك وخجلوك ومانطوها الك احنة نتدخل
وبقو واكفين برة بلبستان رغم توسلت الهم يرحون
دكيت لباب
فتحها الي واحد صاحب بطن عالية واصلع وكالي
تفضل امر خدمة
مايامر عليك ضالم بس انة رايد ابو بلقيس
شرايد منة
موضوع بيني وبينة
كلة قيصر برة يريدك
ماعرف شنو لصار حسيت حرارة نزلت من خشمي وعيوني لوحدهن نسدن
دوخة لزمتني ورجعت ليورة........
انعام..
صوت وراي ينادري
ها مليتي
نداريت وتقربت
دموعي ترست عيوني من شفت حالة
وصوتة يكمل
مليتي مو
خي عون كلبي شكد تانة وصبر
تقربت
كعد علكرسي واني واكفة
اشرلي ستريحي
كعدت
وبعدني بذهول من شكلة
غضنفر صاحب وجه دائري وملامح جبيرة عيون جبيرة كحيلة وحواجب ثخينة
جسمة بنيتة جثلة جف ايدة ماشايفة مثلة ابد
وهمة كلهم طول وضخامة نسوان وزلم
بحيث نسوانهم نعولتهن كلة قياس ٤٢ و٤١ ولاكل لياكلو عدال اربع نفرات
اما الي كدامي جان كأن شخص ثاني
ماعبالك ٣ اشهر كأنما صارلة سنين هنا
عيونة غايرات بنكرة ملامح وجهة مختفية بلحيتة وشواربة
لوحيد من لمساجين هيج حالة
سألتة ودموعي كوة مسيطرة عليهن
ليش هيج حالك غضنفر
شبية ششايفتني مخبل واشكك بهدومي
لا حشاك بس ليش هيج لحيتك
عيونة نفتحن ودنك بصفنة للكاع نضرة وهمس
مالج غرض
غضنفر اسمعني فدوة
انت عاقل ودارس وماشاء الله عليك عقلك يوزن بلد
عوف هلأمور ونساها
كالو عندك ولد
لخاطر ابنك انسة متخاف على ابنك
لحجي سهل
ولنار ماتلوح بس صاحبها
انة عمري ماعشتة الي عشتة الهم
انة بعت روحي بسعر عاكَول
وكويكة تعايرني تضن ادافع عنهم
انة جنت اتحارش بلموت حرشة
بس حتة لكَاع ستنكفت مني موبس احبابي
لاتكول هيج غضنفر
لدنية حلوة بس انتو دافنين نفسكم بعادات بالية وماجنيتو منها غير لموت وخسارة لأحباب
هاي حياتنة وهاي بيئتنا احنة ماختارينة نكون هيج
احنة نولدنا وفتحنا عينة علتفكَ ولدواوين وبنص لفشكَ ربينا
انة عمري ٦ سنين انضف لسلاح وافصخة
لجاي تحجي وزني براسج وبعدين احجي
غضنفر ابنك شنو ذنبة اذا صارلك شي
يعيش مثل مااني واخوتي غشتة
وليش،لحياة لعشتوها هم تعبروها عيشة طبيعية
هذا قدرنا
لا موقدركم هذا اختيار
اابوج ختار لطريق الي سلكة وختار ييتمكم ويموت بدون قبر ومالة جثة ودخلتو حبس وتبهذلتو من بعدة
تقبلين اجي احاسبة على هذا لشي
وانة لو بوعيي مااسوي لسويتة
انة لليوم اشوفها بكوابيسي،
انة روحي حملت هواي
واجة ليوم الي احملهم بي اضعاف لحملتة
شتسوي بس كلي على شنو ناوي
مالج غرض الج لصافي
غضنفر واذا رحت من عدنا وخسرناك
خسارتي ربح الكم
محد ينضر انة ادري
ليش تكول هيج
غضنفر انت مو اي انسان
انت عندي شي جبير
_اي جبير
جبير بكَد هجرج
عمرك مافهمتني
لا انة فاهمج
وفاهم لدنية
انة عشت عالة كلها تتمنة موتي
انة جنتلهم عضم بزردومهم
الي يحب وليكره
كلها متنغصة حياتها من وراي
وانة على نار كاعد سنييين
محد حس بناري
انة كاتل امي
بهاي ايدي كتلتها
شلون مانشلت ايدي شلووون
شلون بعدني امشي بطولي شلوون
شلون حوبتها ماعثرتني
بلكوة جنت انطق من لبجي
لأن انت جنت طفل ماواعي ولا تفقه وندفعت بكلام حقد حتة لقانون ميحاسبك انت حدث
_والله وين راح
_الله غفور رحيم
_بس انة ذنبي جبيييير
انة ذنبي تعدة كتل امي
انة روحي لمفرفحة ماتعرف شلون تطفي نارها
وحترك لاخضر وليابس
انة ماينغفرلي
عن ياذنب الله يغفرلي
الله يغفر كل لذنوب
وانة ماريدة يغفرلي
انة اريد اروح بذنوبي
اريدها تاخذ بحكَها مني
توكفلي وكَفة وتاخذ،حكها من هاي ايدي
حييل يضرب على ايدة
غضنفر اهدة واسمعني
الي راح احجي يمكن راح يصدمك بس ثق وداعة لزاد ولملح اني من جنت ببيتكم هذا لشي مضموم بداخلي وهواي حاولت ابوح بي بس جانتلي اسبابي لخاصة
اخرها جان جملتك الي كتلي بيها
اذبحج وادفع فصلج علقندرة
اني هاويتك
وروح بابا لماحالفة بيها من مات لليوم اني ياغضنفر روحي ماتت يمكم
اني طلعت منكم جسد
هناك غركت روحي بهوركم
وغصب عني صارت هلقسمة لكشرة
وكل لحجا الك محمد جذب والله ملامس مني شعرة
وداعة شرفي لماعندي اغلى منة
اني ليوم جايتك اطلب منك طلب ونتفق والله لشاهد بينا
بوسط هلناس محد يفهم لنحجي بس الله ليعلم بلكلوب
صوتة يهمس الي
ماريد حلفان ليش انة يايوم شاك بحجيج حتة تحلفين
احجي وكولي لعندج وانة لو اشتري منج لو اكلج مايفيدني
تبقة هنا وافسخ خطوبتي من محمد ونتزوج
وتعيش هنا يمي
تنسة لثار وتنسة ذيج لحياة
احنة رواحنة مقسومة لبعض
غضنفر لا انت رتاحيت ولا اني
سنين عدت لعالم تغيرت ولعمر يركض واحنة واكفين بنفس لنقطة ونراوح بمكاننة
جاي تقشمريني حتة اعوف ثاري مو
ليش هيج تكول
لو تحبيني صدك جان ضليتي يمنة
ولج من رحتي روحي شلعتيها وياج
شمتتيهم بية
وكلها تدري غضنفر لماهزة لموت هزتة مرة
وشني من مرة
عافتني بنص جراحي اصارع لموت وماكلفت روحها باتصال
عفتيني اواجه نضرات لشماتة بية
فرحتيهم بطلعتج
يركصون بجفية بيوم طلعتي
لتلومني وانت جبت لفصلية كدام عيني
ابقة شأنتضر،
شأنتضر كليي
لفصلية نفرضت علية وانة لليوم مامتقبلها
هاي اسرار مرة ورجال مايدري بيهن غير ربي وهوة ليشهد ماواصلها غير مرة ومن عدها صار ابني
جنت تكدر تعوفها
شمعنة انت اخذتها ولبيت بي ٤ شباب مامتزوجين
وولد اسماعيل ثنين هم مامتزوجين
انة جنت كدام سالفتين
اولهن كشمش
انة لوادم اعرفهم واعرف ولدهم حق لمعرفة
وحتة اضمن للمسكينة لضحت علمودنا تعيش عيشة زينة ختاريت واحد من ولدهم بلأسم
اعرفة خوش زلمة معدل
وهمة بلمقابل مثل مااني ختاريت لكشمش
همة ختاروني لبتهم بلأسم
رفضت انة
لولد لختاريتة لكشمش هم رفض ويردون ينطوها لواحد معوق واهلة ياخذو يومية يذبو بلتقاطعات يجدي
وحطو زماطهم لو انة اخذ بتهم لو ينطون كشمش لهذا لولد
انة شلون اكسر بيها
وهية علمودنا ضحت بشبابها
وفضحت سر سنين ضامتة ومتحملة لملامة
شلون اخليها تنضلم بهيج قسمة
انة لعمري محد لاوي ذراعي لووها بكشمش
كشمش لجنت اقارن بين وكفتها النة
وكفة زلام
وبين عملة كويكة بية
شلون اكسرها بهيج قسمة
احنة مامتواجهين ولا حاجيهن الج
يعني افهم من كلامك هسة انت رافض لعرض الي قدمتة الك
عينة بعيني
شفت بيها تحدي وقوة وشفت بيها نار لثار تلهب
اسنانة عاضة شفافة لسفلى
وقبضة ليدي تعتصر نبضات كلبي تتعالة وانتضر اجابتة
من بين اسنانة همس الي .....يتبع
مساء لخير حبايب
مقصرة وياكم هلفترة عذروني والله خطار واهلي ديشيلون طايح حضي حشاكم من لتعب
اما الي ميعذرون ويتجاوزون كلمن يعكس اخلاقة وشكرا الكم دتشيلون من ذنوبي 🥰
تفاعلو حبايبي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!