رواية خنجر الغضنفر الفصل السابع والأربعون 47 - بقلم Hunen23Hatum

#خنجر_الغضنفر
#الجزء_الثاني_بارت٤٧
#حنين_حاتم

ركبت طيارتي ساعة بل٩ بليل
ونزلت منها بعد رحلة طويلة متعبة بأكثر من محطة
حطت اقدامي بمطار بغداد وبديت الاحظ الفرق بكلشي العمارات الي متضررة من اثار القصف والأبنية الي كلها اثار وزروف طلق
وصلت لمدينتي ودخلت لناحيتنا
نزلت من التكسي علشارع وتمشيت ليجوة
اعاين من بعيد على بيتنا
على ركبي كعدت بلكاع
تلفتت اصرخ وين بيتنا وين اهلي وينهههههم
تقربت للبيت مذهول خطواتي ثقيلة لازال تأثير الصدمة على جسمي وعقلي وكل شي بية
لبيت جان عبارة عن خرابة
اجزاء منة مهدومة ولباقي كلة طلق وكتابات بخط جبير بصبغ لون احمر
باطل باطل
مطلوبين دم

وصلنا كلام وجنة متابعين لأخبار بس ماتصورت حجم الضرر هيج
ماتصورت لمصاب بهلحجم
ولاتصورت لنوائب تدور عليهم
احجي ويامن واسأل منو
ركضت على لبيوت الي كبالنا ادية ترجف
ادكدك بلبيبان محد يفتحها الي جانت دنية ضهر وشمس قوية
نفتحت بيت واحد منهم
رجال جبير بلعمر يداوم بدائرة لكهرباء انسان خير مسالم
عاين الي متفاجئ
تقربلي وهمس شجااابك

جابتني رجلية عمي
اهلي وين شصار بيهم بيتنا ليش هيج

لزمني من عكس ايدي وهمس ويتلفت
بوية اخذ جنطتك وتوكل منا سالفة اهلك بعدها حارة لاتنضر
هنا صار انفلات وكلمن الة
لحاقد ولحاسد ولحرامي ولمايخاف الله كلها مدت ايدها على اهلك وحلالهم
الي إلة حكَ ندفع من الي مالة حكَ وعندة غاية
ناس تهيج بناس
فلان تتذكر من عدمو ولدك
علان تتذكر من حبسو نسوانك ولشرطة لعبو بيهن
خلو حتة الي إلة حكَ ويخاف الله ياخذ حكَة بطريقة غلط
موبس انتو صفحة شط لسعداويين كلها لعبو بيهم فلك
واحد من بيوت لرفيقات حركَو وهي وبناتها ببطن لبيت لحكو عليهن على اخر لحظة ومايندرى عاشن لوماتن
هاي لشباب ناس تدفع ناس
لاشرطة ولاأمن ليردعهم
والمايخاف الله يدفع بهلشباب حتة تصير فوضى ويبوك وينهب ويعتدي براحتة
اهلك نضرو وشردو بريشاتهم محد يندل الهم ديرة
بساع إتوكل ولاتوصل لهنا

مصدوم مذهول مااعرف شحجي
شنو لسوو اهلي وليش هيج يصيرلهم

بس كلي عمي خوما احد منهم تأذى

إستغفر وجر حسرة وايدة على وجهة مسح لعركَ
مدها يريد يلزم جتفي

احجي عميي اهلي احد بيهم إنضر

باوعلي بشفقة
جدك نطاك عمرة وااحد من ويلادكم الي بلأمن هم نطاك عمرة

شلووووون وليش
صرت اصرخ بهستيريا
ياهو لكتلهم شمسوووووين
احجي كلي

ايدة تسد بحلكي ويهمس بوية اتجفة الشر واسكت راحو لربهم ويم الله لحكَ ميضيع
اكسر لشر ورد منين مااجيت

شلون عمي شجاي تحجي
اهلي ذولة اهلييييي

على صوت صياحي وحجينا
نفتحت باب الي بصفهم
بصوت عالي من مكانة يصيح
هذا ابن لبعثية شجااااااابة
طب جوة ورجع طلع بيدة توثية تقرب الي يصيح ويهادد لرجال صار بيننا وجاول يهدي لأمور
جنت ثاير من شفتة طلعلي بتوثية كلت اكيد إلة يد بموتتهم
تضاربت ويا
جنت فاقد
مامستوعب الجاي اشوفة واسمعة
كلامهم جن شرارة وشبت لنار بية
من راسي لرجلية احسها
بغضون دقايق طلعو ورا زلم كبار وزغار كل واحد بيدة توثية
هنا وعيت على نفسي
اني شجاي اسوي
منين اخذ حق اهلي من واحد ثنين
لرجال من شافهم همو علية كام يصيح هذا خطاري
هذا ضايفني ولي يطكَة معناها طاكَني ومعتدي علية
الي يمسة انة ويا كَوامة
محد عارة إهتمام دفعو لرجال لجبير وهدو علية
جريت من على باب بيتهم راية عودتها ثخينة وطويلة
وصرت اتضارب وياهم
جانت صورة جدي تجي كبالي
اكيد مامات موتة رحيمة إذا هنة لرفيقات نسوان ومارحموهن
يرحمون جدي معقولة
جانت كدام عيني تتصور مناضر اهلي واحد واحد
ضربت وإنضربت
تكاثرو علية الى ان واحد صار بلنص بيدة سلاح رما بي وكام يصيح
سلموني حفيد لشيخ عكَاب
هذا لولد جان ضام ولد سميرة لأرملة وهواي من ولد ناحيتنا بلخرابة
ومآويهم سنين
هذا مالة غرض
ولاتز وازرة وزرة اخرى

بلكوة كدرت اتملص من بينهم واطلع
وصلني لرجال للشارع بسيارتة ولطريق كلة يلوم بية يكلي شجابك

فهمتة انو ماجنت ادري بلصاير لأهلي واجيت انشد عنهم
نزلني علشارع برة لديرة
نزلت من لسيارة ضايع مشتت مااعرف وين اروح
ولا انشدمن عليهم

ولضلة هنا مو آمنة علية
ركبت لبغداد كلت اضيع نفسي مدة وكت وتالي ادز طارش للناحية ينشد عنهم

اجرت بفندق
ليش اجيت لبغداد مااعرف
كل الي اعرفة حنين بداخبي وجر من اول ماحطت رجلية بمطار بغداد

اجرت فندق وكعدت بي
ماكدرت ابقة بلفندق دقايق
ركبت ورحت لبيت اهلها لقديم كلت بلكي اعرف عنوان بيت رجلها من لجوارين
واذا ماحصلتة اركب لديالى واسأل هناك
ماانكر جنت رايد اعرف اخبارها
ولاانكر ملهوف على شوفتها بكد لمرار لضكتة ببعادها
ولكد عذاب لضمير الي لليوم اعيشة مجرد ماينجاب طاريها
بس بنفس لوقت كلت بلكي احصل عنوان اهلي منها
بلكي عدها تواصل وية اختها ومن عدها اكدر اوصل الهم
تعنيت لبيتهم اتذكر لمنطقة واسمها بس مااذكر شكل لبيت ولالفرع
بقيت اسأل عنهم
ماحصلت نشد
ولناس اغلبها ماتعرفهم
خليت ورجعت
ضليت اهبد ببغداد كلشي مااندل اكلتلي لكمة ونمت تعبان
صحيت فجرية نزلت جوة اتصلت بخالي ماسولفتلة على لصار وياي ماردت اقلقهم
بس فهمتة على حال اهلي ولصايرلهم
بقة يلوم ويكلي ارجع بأقرب وقت لاتبقة

شلون ارجع صدك تحجي خالي انة ماعاولت اطب للعراق
واشمن ريحتة المحروم منها سنين
اسمع حجاية لهلا ولجلمة لمالحة هاي جانت اقصا امنياتي
هاي جانت علتي وسبب امراضي
حجيت وية غضنفر لزغير
بقة يتوسل ارجع خالو
اسمع صوت خالي يمة يلقنة الكلام

سديتة مخنوك حاير ولحيرة بوسع بغداد الي مااندل كلشي بيها

عدت ايام انة بلفندق
خالي تواصل وياي من عجز انو يقنعني بلرجوع
قنعني انو احاول ارجع للدوام حتة بتهيئلي سبب رزق قبل مايخلص لعندي
ركبت وتعنيت
وروحة وردة اكثر من اسبوع انة اراجع تالي حصلت لموافقة
ورديت لشغلي
بقت لنقل جان اصعب شي
طبيت لديرتنا متنكر وسلاح بخصري
بينما كملت اوراقي انة صايح لغوث يابوية
إنتقلت لبغداد اجرت بخان غرفة
اول ايام عانيت هواي
لحد ماتأقلمت وية الوضع
إستلمت اول راتب الي اجرت مشتمل قريب على المدرسة غرفة ومطبخ وصحيات
جنت مشتاق لهاي لاجواء طلاب وتدريس ومدرسة
اول ايام جنت اتعب لأن ناسي لبديهيات واساسيات مادتي
من اول شهرين صارتلي قاعدة جماهيرية بين لطلاب
جنت مقرب الهم كلش
عكس قبل جنت صارم ومكروه وقاسي وي الطلاب
بس لدنية ولغربة كسرن كلشي بية وتغيررررررت
عدت مدة انة اداوم ومستقر
انشد عن اهلي كل مدة مااحصل كل نشد
جانت غايتي احصل بلقيس هي لسبيل لوحيد حتة الكاهم
مدري هاي جانت حجة حتة اشوفها

لمدير رجال جبير ينقهر علية يومية جانت زوجتة تدز بيدة صفرطاس بي غدة
جان يعزمني بين فترة وفترة يمهم
ولدة شباب كبار صارت علاقة طيبة بيني وبينهم بيهم المدرس وبيهم المعلم
لعائلة كلها بلسلك التربوي

وبيوم جنت يم ولدهم بلباب واكفين نسولف واجة ولد اقاربهم عرفوني علي
بقينة نسولف
عرفت لولد يداوم بلوزارة
جان احلى صدفة صارت بحياتي
ومن خلالة كدرت احصل اسم المدرسة الي تداوم بيها
تنخيتة وطحت بركبتة
كتلة شتريد انة حاضر بس حصللي اي نقطة اوصل بيها لهلأنسانة
انة ضايع وبس هي الي تردني لأهلي
مثل طفل وحجيتها

راح وبعد ماردلي نشد
وعدة شهر علسالفة ونسيتها وبدت لعطلة
وتفاجأت بي يدك باب بيتي هوة ولمدير وبيدة ورقة بيها اسم المدرسة الي تداوم بيها

ماعرف لصارلي
جانت دعواي الكاها والكة اهلي بآن واحد
بس مادري لولكيتها شلون راح اقابلها وياترى راح تستقبلني لو تصد
ولو إستقبلتني شراح اححي وشراح ابرر

تعنيت للمدرسة
جانت ايام عطلة بس امتحانات إكمالية
دخلت للمدير ونطيتة اسمها وطلبت عنوانها من عندة
سألني شنو قرابتي منها كتلة نسابة
حسيتة ماثاق بية
بعد حديث دار بينا وتساؤلاتة رفض ينطيني لعنوان
بس وعدني انو يتواصل وياها ويستأذن من عدها وطلب مني اترك رقم تلفون حتة يتواصل وياي منة
عذرتة لأن جانت لأوضاع صعبة ولناس تخاف

عدت مدة انتضر منة اتصال بس كلشي ماكو
الى ان ايست
لبست ورحت للمدرسة
من لباب طردني و كال خابرت على بيتهم حجيت وية والدتها كالت منعرف احد بهلأسم وممنوع تنطي عنوانة لاي احد
حاولت افهمة سبب نفور والدتها مني حاولت اشرحلة مانطاني مجال طردني وراد يصيح لشرطي

خليت ورجعت
وانقطع اخر حبل وصل جان ممكن احصلهم منة
ومات اخر سبب جان ممكن اشوف بلقيس بي

عدت ايام وايام لاني لحصلت نشد من اهلي ولا اني لكدرت احصلها
تانيت لأمتحانات خلصن
وقررت اروح للحارس واوكع علي بلكي يساعدني
رحت وحجيتلة قصتي
توسلت بي يحصللي عنوانها من اي احد
كال راح اسألك زوجتي لأن تشتغل عاملة تروح لبيوت لمدرسات تنضف وتعرف عناوينهن
وصدك ورة يومين اتصل بية نطاني عنوانها
من فرحة كلبي حلفت بس احصلها واتلاكة وياها اخذلة حلاوة لبشارة

جان يوم ثلاثاء ركبت وتعنيت الها نزلت بعيد عن فرعهم سألت ماحصلتة
دخلت للفرع وبقيت ادك بيبان واسأل
الى ان وصلت لبيتهة لفيت وجهي بلجفية مالتي ودكيت لباب وتكترت

نفتحت لباب تقربت اعاين ........

انعام.....

صوت منة تنتر بية يلله ماما طبي
وقسورة يجرني من ايدي
عاينولي كلهم
وهوة طبك الابتوب وباوعلي
دكات كلبي تعالت فرح
جريت نفس همست بسري اشكر ربي
صوتهم صحاني

تفضلي

منة تعاين الي مبرطمة باوعت لقسورة
بدموع همست إلة مو هوة مو هوووووة

_يلله نرجع

_لاء ماما خلي نسألهم عنة اكيد يعرفو

حاولت اتملص واقنعها
ماما هسة تأخر لوقت راح يخلص لدوام خلي نرجع وغير مرة نجي

بدون مترد علية تقدمت وحطتني موقف جدا محرج
تقربت على اول مكتب وتسأل بي

_ تعرف واحد اسمة عمو قيصر خليل عكَاب

ضحك على كلامها ونضراتة توجهت الي
تقربت اتدارك لموقف
وبأبسط كلمات فهمتة عن غايتنا

إرتفعن حواجبة ويهز براسة الى ان قاطعني وكال

_صحيح جان يداوم هنا بس انتقل

_يلله امشو
كلتها بفرح
بينما هية تتجاهلني وتستفر وين انتقل وعن لعنوان

جاوبها وهوة يميل كتافة
مااعرف والله معندي خبر

ندارت علية دمعتها بعينها
تعالي خل نسأل غيرهم

ماكسرت بخاطرها رغم دعواتي بسري انو ماالكا ولا اشوفة

طلعنة برة سألنة وإستفسرنا واحد يودينا علثاني
جنت اعاين لفرحتهم افرح
واتذكر لبية ارجع اتكدر واشيل هم جبال

بعد لفرة إتضح انو هوة منتقل لمحافظتهم لأصلية
رجعنا للبيت ولطريق كلة جانت تقنع بية وتتوسل الي انو ارجع اخذها
جانت ايام امتحاناتها ماباقيلها شي
قررت اساومها حتة لترجع تعاند
وإتفقت وياها انو تمتحن واخذها
وافقت بعد مااخذت مني عهد وخلتني احلف كدام منصور وانغام

عدت هلايام علية مخنوكة
كلما تمشي لأيام يزيد همي وتكبر لحيرة
اشوف لفرحة بعيونها وهي وقسورة ياكلون لكتب اكل
اسمع حجاياتها تكل لقسورة اقرة زين حتة ننجح ونشوف شهايدنا لعمو قيصر وبابا

عدت ايام امتحاناتهم وبعد اكثر من شهر إستلمو نتائجهم
منة معدلها ٩٨ وأعشار
وقسورة ناجح ودرجاتة حلوة
بدت الملحة ورجعو يذكروني بوعدي وحلفاني

وقررنا نروح
بليل حضرت ملابسهم وشغلاتنا
طر لفجر واني كاعدة
على سجادتي كعدت وتنخيت الله كون مااحصل اي معلومة عنة
وتقتنع وتنسا لسالفة

طلعنة فجرية
وصلنة قبل لأذان
رحنة للتربية الي نطونا عنوانها
منصور دخل كدامي ويسأل
طلع على اخذني على صفحة واحنة ننزل من لسيارة كال حصلت معلومات عنة هنا اكو يعرفو اكثر من واحد
ضل وجهي ينطي الوان
اشرلي منصور تعالي ماالج شغل

جريتة من قميصة

منصور اوكف فدوة لعينك مااريد

قاطعني وغمزالي
وهمس مالج شغل امشي خل نفضها للسالفة خومايومية جايين ومتعنين
ماكدرت ادخل
حسيت نفسي دخت
رجعت للسيارة وكلتلهم انتو دخلو

نص ساعة واجو
من وجهة وخطواتها لبطيئة عرفت لجواب

صعدو
عاينت لمنصور ابتسم الي

صوتها يهمس اني بعد مااريدهم
لأن همة هم ميردونة
لان بس احنة ندور عليهم همة ميدورون علينة

تغدينا وغسلنا ورتاحينة ورجعنة للبيت
جانو هادئين ثنينهم
ايام عدت منة لعبثة للمتطلبة صاحبة لصوت لعالي مالها صوت
عصرية ندكت لباب
جانو جوارين جدد كبالنا كعدو طلبو صوندة ماي
لليل اجت بتهم ترخصت تبقة يمنا عدها امتحان وجاي يشتغلون بكربائهم وبيتهم اضلم

بقت تقرة يمنا كملت ضلت تسولف وية منة وانغام
جانت ثالث متوسط
ومكملة
شوية واجت عليها اختها وراحت
من يومها ماكطعو رجل من عدنا
كل يوم يطلبون شي حتة لجداحة يطلبوها
منة تحب بناتهم واحسها تغير جو وياهن ونفسيتها احسن
مامنعتها من عدهن
وهنة اجتماعيات وينحبن حتة انغام تحبهم
يوم عن يوم تقوة علاقة منة وانغام بيهن
وحدة ثالث متوسط وحدة خامس
كامت منة تروح يمهن
بدة لدوام انتقلت وياهن لنفس لمدرسة
يرحن ويرجعن سوا
هواي اشوف جوانب ايجابية بيهن تتعلمها من عدهن
حسيتهن لتسلاية الي نستها سالفة اهلها وبيت جدها
امهن زغيرة ومهتمة بنفسها كلش
ابوهن ميت او منفصلين عنة ميجيبون طارية ابد
اقاربهم دائما يفقدونهم
يجونهم خطاطير ولد خوالهن وخوالهن واقارب امهن
اشوف عليهم رجل دائما
صرت امنعها من لروحة يمهن بس هنة يترددن عليها للبيت
قسورة ميحبهن وميرتاح الهن
يسميهن امهات علج
شوكت مااشوفهن ميوكع لعلح من حلكهن

كاعدين نتغدة وندكت باب لشارع
طلع قسورة يفتحها
من برة صاح عمو ماما خالة تعالوووو
كمنا ورا
درع لباب شوية
اعاين كبالي .........

طالب
مات صاحب عمري وخلالي هم وحزن جبير
ورة موتتة بأشهر توفت والدتي
سنة مرت علينا مرررة كلش
تعبت بيها حيل
تعبني فراكهم
اخر ذكرى لفدعم وهوة يوصيني بمنة الي ماشايفها غير مرة او إثنين يمكن لو اشوفها بلشارع حتة مااعرغها
وامي ماتت وهي توصبني بأخواتي
يومية جنت اروح يم الشطيط اكابلة واحجي ويا
اكلة ردي فدعم
جيبلي رجلي خطف بس اشوفة
بس ادوعة
ضلت بخاطري ايامنة وليالية
سهرنا ومسامرنا على لشطيط
عركاتنا ومعاركنة
سوالفة لما ينمل منها
كل ذكرياتة تدك براسي

اتذكر من فزعت لأبن عمة
بيوم وديت عيالهم لديالى ورديت
من رديت جانو لولد مجتفينهم وبلصطح شامريهم جانو متانين ولد عم جدهم هم يشتغلون بلامن
عبالهم يرجعون علمود غضنفر وصميدع وعمامهم ويلزمونهم
بس وسفا طلعو مخانثة ومابيهم نخوة
نهزمو وعافوهم
تخلو عنهم وخلوهم يواجهون مصيرهم لوحدهم
رغم اذكر جانو بيت لحجي يفزعولهم
ومامقصرين وياهم
اول ماوصلت جتفوني ورادو يذبوني وياهم
واحد من لموجودين يعرفني ويعرف اهلي
كاللهم هذا يتيم وبركبتة كومة لحم ومالة غرض بيهم مجرد صديق ابنهم مايربطة بيهم شي

بقيت جوة يمهم ماهدوني بس ماضروني ولا جتفوني بقو يحجون كل واحد الة راي واثناء الحجي فهمت انو احد وازهم على زوجة غضنفر ومفهمهم انو لبنية تشتغل رفيقة بلحزب وعدها نشاطات وماضي اسود

نصدمت من الي سمعتة
حاولت اشرح الهم
والي اعرفة عن لبنية ابوها جان من قادات لمعارضة
والة وزن ومكانة عد اغلب لناس
شرحتلهم وفهمتهم سبب جيتها لهنا ولصدفة الي جابتها هي سجبن ابوها وسجنها هي وعائلتها
فهمتهم انو الحجي عكاب ساعدهم وخلصهم من لموت لكون ابوها قيادي بلمعارضة
سألوني على اسمة
مااجنت اعرفة للاسف
قنعتهم انو اسال غضنفر على اسمة

ماقبلو
بقيت اتوسل الهم واحاول انتخيهم
بلأخير واحد منهم صعد واخذني ويا
جانو بلكاع كلهم على وجوههم مجفين ومضربين
غضنفر راسة مزين ومزلغ من كل صوب يجري دم

الي وياي دفرة حيل

همستلة برجا على كيفك ويا خوية

ندار علية يسب بي
ياعلى كيفي غير غدر لولد ودجج ثنين منهم ابن ال......

وعا بدولكة ماي بارد على وجهة
فز يصيح ويتوعد الهم فاير يشيل روحة ويركعها بلكاع ويكلهم اذا زلم فكوني

سالةعن اسم ابو زوجتة
نطا الهم كامل

نزلو جوة بقو يحجون بينهم
واحد منهم جان معصب ويصيح
ضربو وصيحو علي
فهمت هوة مأذي وحدة من نسوانهم
بقو يحجون علي ويكلولة انت كلت رفيقة وعدها نشاطات وماضي اكشر
بقة يصيح عليهم
سمعت اسم جليل نجاب اكثر من مرة بلسيرة
فهمت من حجيهم انو والدة جليل الحجية باثة هلاشاعة على زوجة غضنفر بين لنسوان
وولد جليل هم حاجينها الهم ووازينهم عليها وعلى غضنفر

تعاركو بينهم وخلو وعافو لبيت وطلعو
صعدت ليفوك حاولت باسرع وقت اطلعهم من لمكان
هلكت واني اتجي الهم وانزلهم
الي واعي بس مكسر من لضرب والي مغما علي
نزلتهم مااكدر اخذهم للبيت
خليتهم بلسيارة وللخرابة لقديمة اخذتهم عفناهم و
رحنا اني وغضنفر وجثة الحجي الي ممرعدة تمرعد جانت قريب لشارع لعام مشمورة على حايط بيت بطانية مشرورة جريتها واني احجي بسري
واكلة ربي سامحني مجبور
لفينا بيها واخذنا
طلعنة وويانا كراك وبوجهنا للمكان الي دفننا بي فدعم حفرنا لجثة
جانت اصعب لحظات حياتي
غمضت عيوني ماكدرت اباوع رغم جانت لجثة بعدها سالمة
غطيت وجهة بشماغي
وناوشتة لغضنفر
اخذناهم
غسلناهم وصلينا عليهم ودفنناهم
غيرنا مكانة وعلى حسب لاصول دفننا
رجعنة جننة هلكانيين
جبتلهم دويات واكل وماي
باتو ليلتهة بلخرابة جبتلهم هلموجود فراشات
قبل ميطر لفجؤ بسكوت اخذتهم للمستشفى غضنفر ايدة بيها كسر لفوها الة
ولباقين رضوض وزلوغ وضربات مورمة
تحسنت حالتهم
ودعوني وهمة يتشكرون ويشيدون بأفعالي
مااعرف شنو لصار بعدها
انقطع تواصلي وياهم
عدت لأيام مخنوك على صاحبي وخايف من امانتة ووصيتة
ركبت وتعنيت للفلوجة للبيت لوديت نسوانهم الة
فاجئوني من كالو سافرو الهم شكم يوم
بقت صورة صاحبي كبال عيني
وبقت اخر جمل نطقهن يرنن براسي
كللها للحبيبة متت ونفسي بيج
ولأمي لاتكللها متت كللها سافر
ومنة امانة بركبتك ليوم لدين
عدت سنة قررت اتزوج
لجوارين ولمعارف لمولي وانة عندي شكم فلس عرست
ولمرة طلعت علية طنطل
تاذي اخواتي وتضربهن
ماجانن يشكن من عدها ولايحبن يضوجني لو يتسببن بمشاكل بيني وبينها
يتحملن اذاها ومشاكلها ومايحجن الي شي
بس صدفة وحدة من لجوارين سولفتلي صدمتني
جنت راجع من لشغل
لزمتني بلبال سلمت علية وكالتلي
يمة شني ذني اخياتك تكرههن انت
جايبلهن وحدة ماتخاف الله نهارها كلة عرك ومصايح وبس تطك بيهن
ومموتتهن من لجوع لاتطبخ ولا تخليهن يطبخن
تكللهن سلكن بيض واكلن

خالة منيلج هذا الحجي

يمة بهاي اذاني اسمع كلشي
غير انة غرفتي على مطبخكم

رجعت للبيت حطيت اخواتي سالتهن
كامن يبجن
لجبيرة تكلي ماكو شي
ولزغار وحدة تعاين للثانية
جزت روحي منها
اجت كبال عيني صورة امي ووصيتها
صرت يومية اسألهن من ارجع من لدوام من بشطن الي روحي تفور احطها واكتلها
من يشوفني اضربها كامن مايحجن ويجذبن علية بس لزغيرة تحجي كلشي
تعبت منها
صار زواج اكشر علية
واخياتي يتيمات وفقيرات لنملة ينسمعلها صوت وهنة ماالهن
نخطبت لجبيرة وقسمة زينة مشيتها حتة ترتاح
ضلن لزغار نهارها كلة تاذي بيهن تريدني اعرسهن ويصفا لبيت الها
انتهى صبري وانة اوديها لاهلها واطلكها
ماجننا عاقدين محكمة خذت ذهباتها وغرفت لنوم وولت
ماشفت راحة وياها
عدت لأيام نخطبت اختي لثانية وضلت بس لزغيرة
وصلتها بلدراسة مارضت تبطل
ونقبلت جامعة ببغداد ماقبلت اخليها تداوم وكتلها كعدي نتضري قسمتج
جنت خايف عليها
فدعم مانسيتة ولا نسيت جدة
كل فترة اروح ازورهم واذب على قبورهم مي
مانسيت سوالفة ولانسيت صحبتنا
شكد عرفت ناس قبلة وبعدة
بس مامر علية بشر مثلة
ماجنة صاحب لا والله جن واحد من اهلي وميتلي
قبل مااروح ازور امي ازورة
واذكر سوالفة
شبابة لمات بين ادية
حبة لضاع من عندة
كلشي مانسيت منة
ولا اكدر انسا رغم عدت سنيين
لساني وكت لحاجة اذكرة
واضرب جف بجف واصيحننن اخخخخ يافدعم عازتك عازة
عدت مدة
صدفة جنت راجع من لشغل واشوف كبال لبيت رجال ونسوان
تقربت سألت لولد
عرفت انو همة يكربون لاهل فدهم
من حجي لجهال بينهم عرفتهم فروخ غضنفر
شفت منة لو مااعرف لصارلي
الي وصاني بيها بيوم من لايام فدعم وامنني عليها شفتها كبالي مرة
لجمال شي ولون لعيون شي ثاني

متفاجأ بيها مااعرف عمرها بس علشكل قدرتها ١٧ او ١٦ سنة

واخذت عنوانهم ورقمهم
راحو واحس وصلة مني راحت وياهم
اقشمر بروحي اكول لأن وصاني فدعم بيها احس روحي مديونة الة
وهلبنية احس من مسؤليتي
بس لصارلي جان اكبر من هلحجي
صورتها ماراحت من بالي
نترها وحجيها وياي
كلة ماجنت اسمعة جنت مفهي على حسنها
ماشفت بلديرة بت مثل لونها

مالكيت روحي غير وانة اكل لبثينة اختي حضري نفسج
نمش لبغداد تكملين دراستج
شلون ليش مااعرف
كل الي اعرفة جنت رايد اكمل وصية فدعم
لفرحة الي غمرتها ماتنوصف
وقررت اروح لبغداد ائجر هناك
وصلنة ولد ربعي حصلولي مشتمل وكعدنة بي
جابت اوراقها وشغلاتها وماباقي هلدوام غير شكم يوم
ركبت ورحت للعنوان الي نطو الي
دكيت لباب وكلبي يدك شحجي وشكول شنهي حجتي وياترة يتقبلوني بلغاية لجايهم بيها ....يتبع
عذروني دمرني لواتباد والله ٤ مرات انشر وينزل ويطلعلي اشعار لنشر وارجع الكا ما منشور
لبارت ٣ الاف كلمة اذا يناسبكم هيج وكت بعد انزل بين يوم ويوم ب١٢ ونص ٣ الاف كلمة ويجوز اجرها للوحدة لو وحدة ونص واسوي ٤ الاف
اذا يعجبكم كلولي
وشوفوني تفاعل يستاهل تعبي