#خنجر_الغضنفر
#الجزء_الثاني_بارت٤٨
حنين_حاتم
.....قيصر.....
جان يوم ثلاثاء ركبت وتعنيت الها نزلت بعيد عن فرعهم سألت ماحصلتة
دخلت للفرع وبقيت ادك بيبان واسأل
الى ان وصلت لبيتهة لفيت وجهي بلجفية مالتي ودكيت لباب وتكترت
نفتحت لباب تقربت اعاين زياد هوة وكرشة وصلعتة كلشي مامتغير بي
هذا لجنت خايف منة
صعدت لجفية على وجهي وسلمت
رد لسلام وكال تفضل
سألت كأني مستطرق وختاريت اسم لا على التعيين
_بلازحمة هذا بيت ابو محمد
_ابو محمد لمختار قصدك لو اسطة لبواري
ها اخاف تقصد ابو الدكان الي بلفرع لورانة
_ حجيتها واني مرتبك احاول اتملص
لاء ولاواحد بيهم ابو محمد معلم
_لمعلم
اهاااا قصدك ابو جاسم اي عندة ابنة لوسطاني اسمة محمد
لزم ايدي يأشرلي
شوف صديقي هذا لفرع لكدامنا تخلي بضهرك وتحسب فرعين ورا تدخل بثالث واحد ثاني بيت على ايدك اليمنة لونة تركوازي
_ها فهمت عليك ممنون حبيبي
لوح بأيدة ودخل عبرت لصوب لثاني مهرول اريد اطلع بأسرع وقت
ماسمع غير صوتة وراي يصيح
مومنا تعال اركب اوصلك الهم
ويأشر علجهة لثانية
نداريت متفاجأ
جان راكب سيارتة
صفن بوجهي
تذكرت لجفية بجيبي
نزل ضرب لباب حييل
تقرب الي
ليش تجذب صير زلمة وكول رايد مرتك مو بيت ابو محمد
انة زلمة غصبا عنك وعبن زلمة ماردت اتسبب بمضرة الها
وانة فعلا ماجاي عليها ولاعندي غاية بجيتي
كل مابلأمر جاي اتقصا معلومات عن اهلي
منها من لوالدة
لأن ماضل احد ومانشدتة عنهم محد يعرفلهم خبر كلت بلكي لأهل يعرفون
اكيد بسعاد ماكطعت بيهم
لاابشرك كطعت بيهم
وكطعت كلللش
وجهك هنا مااريد اشوفة
وقسما بلله لو شفتك واصل لبابي لو سمعت داك باب بيتي يصير شي ميعجبك
قبل ميكمل كلامة مشيت
ماردت اكونلها سبب بمشكلة جديد
كافي لشافتة مني
كافي انو اني جنتلها شي تتعير بي من لقريب ولبعيد
ويكفي انو حملتها امانة ماكدرت زلم تحملها
مشيت مخنوك وخايف عليها
خايف لايرجع يأذيها بسبب جيتي
ماجنت متصور تكون لساها ويا
بقيت اسبوع اوصل قريب بيتها من بعيد اراقب بلكي احصلها واكدر احجي وياها
ورة فترة بدة لدوام
رحت للمدرسة كلت بلكي احصلها بعدني واكف احجي وية لحارس طلع لمدير
شافني لو تكهرب
بقة يصيح انت شتسوي هنا شجابك
صاح علشرطة يكللهم لزمو
ليش شكو شمسوي
بعد مشادات وعرك فهمت واصللة خبر من زوج بلقيس وامها انو اني اطلبهم ثار وكايلية لتخلي يوصل للمدرسة هذا يريد يأذيها
بيومها جان رايد يسلمني للشرطة
حاولت افهمة
طلبت منة يصيحلي بلقيس ونتواجه كدامة ويعرف لحقيقة
بقة يصيح ويكلي تريدني اطلعها الك حتة تكتلها وتبلينة
ماهدني غير واني اتعهد انو مااوصل للمدرسة ولايشوف وجهي هنا
رجعت مهموم
من عدها بطلت من لروحة وجزت من بلقيس
لتهيت بدوامي
لمدير يوم عن يوم تقوة علاقتي بي وبعائلتة
جان حاسبني مثل ابنة
اصلهم بغدادي قح يتونسون على حجاياتي
ابنهم لزغير اسمة بارق صديقي لمقرب يدرس ادارة مرحلة ثالثة
كام يحجي جنوبي احسن مني
مخبلهم بحجاياتي
صارولي مثل عائلتي الي يتيهني يلكاني يمهم
وعدت لأيام جنت ضايع رغم كل الناس لحوالية
بس لاهل عازتهم عازة
ولهفتي على بلقيس الي موكادر حتة اشوفها من بعيد
حركة كلبي على اهلي الي بكد ماتعبت وانة انشد عنهم ايست ونسيت سالفتهم
كل الي كدرت اعرفة انو همة برا العراق
بس وين بلظبط ماادري
جانت عدنة دورات تطوير بلمدرسة
ورشحونة انة وشكم معلم
وانة بطريق الرجعة من اول يوم الي بلدورة لاكاني بارق وانة اتمشة للشارع لعام اريد اركب نفرات
سلم علية وسأل وين جنت
لا ماجنت انة راجع اداوم هنا دورة تطوير عدنة
وانت شعندك هنا
والله جاي للتربية علمود اختي تريد تقدم خارجي وجاي استفسر الها
تعال وياي بساع نستفسر ونرد سوة ليوم لحجية طابخة مقلوبة حتة نرجع نتغدة سوا
_انة هذا التمن البي مسواكَ ياكلني مااكلة
_خاب انت شمالك اغم هي غير تدك بلراس ريحتها
اضحك علي يحجي لهجتي احسن مني
_ديلله امري لألله اكلها هوة انة ياهو لبحالي خلفلة على امك
ماتكللها تتبناني والله تكسب بية اجر
_ولك هوة احنة ولدها ويومية تسبنة وتلعن الساعة الخلفتنا بيها نوب تتبناك انت بكد ابوي
_ديلله امشي خل نلحك علمكَلوبة نكَلبها بكرك
_لاولدور ماعاجبة هاي اذا بقولنا
ولك احنة امي من تطبخها نكَلب الجدر ونلطعة من ورا
مشينة واني اعيب علي اكلة
_وين اكو زلمة ياكل مقلوبة
_شبي الذيب الياكل طليان علريوك
ضحكت على سوالفة ولا اكدرلة
طبينة للتربية بقة يستفسر عرف انو ماباقي شي على امتحانات القبول
وكفنة بلممر نسولف اني ويا
_يعني ابوك مدير ومتدرون شوكت لأمتحانات
_هوة ابوي امتحانات طلاب مدرستة ميدري بيهم
ملتهين هوة ولوالدة بلحرب العالمية لثالثة صارلهم اسبوعين عرك و الحجية دك ملاطم ويا
تغسل لشورت مالة ويكلها ماغاسلتة
ويحطون اختي الحكم خطية تالي تاخذة منهم ترجع تغسلة
_جاي اضحك على حجية وصوت انثوي وراي تهمس
بس من رخصتك اريد اعبر
همست واني ابتعد اي تفضلي
نداريت
عيوني سلهمت
كلشي راح وتغير
لوكت يمر لأيام تمشي الذكريات تموت لحزن يموت لفرح يموت كلشي يموت
بس ليش لهفة كلبي عليها ماترضة تموت
صوت كلبي يريد يصرخ مشتااااك
اي مشتاك بكد حسرة كلبي بيوم جبروني اعوفج
بكد الضعف الحسيتة بيوم تخليت عنج مجبر مسيّر
_هابلقييييييس
هايلوني شلونج
لكيتج
اااااخ
بكد ماسألت عنج
حتة السؤال ماتت لهفتة وفقد رونقة وصرت من احجي احجي وكأن جاي انطق اسمي
عيونها الي يصدن على بارق الي بتعد مسافة عنة متلن دمع وفاضن
دنكت وهمست
من رخصتك قيصر،نطيني درب مستعجلة
صرت كدامها حتة امنع اي فرصة هرب منها
خايف لأن هلفرصة ماتتصور تتكرر
جان لازم اغتنمها
صوتي يهمس بحسرة
بداعة لزاد ولملح بس احجي وياج
صوتة منتفض نست نفسها نترت بية
لازاد ولاملح ولاحب ولاعشرة كلشيييي جذب
جذذذذذب
كلشي بحياتي جذب
الحقيقة لوحيدة هي ابني وبسسسس
وخر من طريقي رجااااءً
بتعدت لأن حسيتها فقدت
تانيتها شوية بتعدت ولحكتها
مريت من يم بارق لزم ايدي يستفسر
اتانيك لو اروح كلبوها للمقلوبة بفاس هسة موبس بكرك
_إتوكل اني مطول
لحكتها اهرول قبل متركب تكسي
نطيت لنفسي لحق بأن الزم ايدها من باب انو الحك عليها
فاجأتني بدفعها الايدي بقوة ونترت
لتلزم ايدي
شتريد مني شترييييد
ماكافي الخراب الي حل بحياتي بسببك جاي تكمل على باقي سنيني وانت محتار تتمعشك وتتزوج ومن بلد لبلد بحثا عن راحتك وحياة البذخ
بلقيس اترجاج خل نحجي الموضوع جبير واني ضال بداخلي لحجي
هذا الحجي نكعة واشرب ماية لان بعد ليقدم ولا يأخر
ولشفتة منك كلللش هواي
اترجاج
والله سنين مختنك بصدري الحجي اطك واموت اذا مااحجيلج
بلقيس الي سنتين ادور عليج
ماخليت وسيلة تعتب
تدور علية ؟
ليش موجنت كدامك ومتورطة ورطة عمري من وراك
وانت بنفسك عفتني وإنهزمت
وجدك يدزلي خبر
بأنو انت تحب وحدة ولأن مقبلو يزوجوها الك إنهزمت انت وياها للخارج
جذذذب وداعة غربتي ومرضي وايام حبسي لمافاركني بيهن وجهج
انة اعوفج برضاتي ؟
مااحلف بعافيتي ولا احلف بداعتج
احلفلج بلثكَال لثكَلن روحي علية
انة ماعفتج بأرادتي
انة تخيرت بينج وبين حياة اهلي
ويامصعبة من إختبار
الله وحدة يعلم انة بنص نوبات الهلع واشوفن صورتج بلسكَف تتدنا لية واشوف سكَف غرفتي يطيح علية
بنص السجن وجنت اصرخ ذنبج يمتة يفاركني بلقيس
وكل لصارلي قدر مكتوب
بس جنت اصرخ هذا ذنب بلقيس
بركبتي للموت
محتاجلج بلقيس
انة ضايع وانتي كل الضلي بلعراق
احلفج بزادنا لضحكتي بيوم من لأيام لأن مابيننا شي احلفج بي
هنة جم يوم
بس يشهد الله كل يوم جنت اعيشهن
كل تفاصيلج طابعة براسي
وحكَ حيرتي بديرة الله لوسيعة وانة انشد عنهم
نسيت شكولهم بس مانسيت شكلج
دموعها تجري
شهكة طفل بصدرها وصلني منها حجم الضرر الخلفة خذلاني الها
معاتبها رغم طووول لسنين وبعد المسافات جن توها مخذولة مني
هذا العتب رغم يوجع بس فرحني
هذا لعتب حسسني بعد الي قيمة عدها ومكانتي بكلبها جبيرة
وإلا ماجان عاتبت
جان حسبتني حالي حال لمرو بحياتها مرور لكرام
صوتها يرد علية بكسرة ونفسها محبوس بصدرها
_ياريتك جاي اوكت من هيج
فااات لاوان هواي
وماعاد ممكن يجمعنا وكت أو حتة مكان
ان جنت بهذا كلامك رايدني اسامحك
ابشرك من زمااان سامحتك
وكلبي عمرة ماشال عليك ذرة
دعيت الله يوفقك لان ادري مابية حوبة
لوبية جان طلعت بزياد وامة
بلقيس تعاي خل نروح مكان عام ونحجي
اترجاج
والله مأيس من لقائنا
هاي موصدفة
هاي لفتة رب لعباد الي
مااكدر مستعجلة ومااشوف اكو داعي لكلامنا
اني مرة متزوجة
طلعتي وياك جواها الف خط وعلامات استفهام
زين نطيني رقم اتواصل وياج منة
قيصر تواصلت وياك مرة ودفعت لثمن غالي
ومامستعدة اعيدها
ولاعندي استعداد اغضب ربي
ماريد منج كلشي ولا اكرر اتصالي
بس رايد استفسر منج بشغلة
احجي هنا
بلعت ريكي مااريد تروح بدون مااخذ رقم تلفونها ماعرف بشنو جنت افكر
بس بداخلي رغبة جبيرة بأي حبل وصل ممكن يربطنا
رديت بتلعثم
موضوع يطول شرحة وتكثر تفاصيلة مومال وكفا وانتي مترضين نروح مكان عام
انطيج رقم تلفوني وانتي اتصلي اني مااحرجج ولا اتصل
ماجاوبت
بساع طلعت قلم من جيبي ومن لكاع شلت كارتونة جكاير شكيتها وكتبت عليها لرقم وقدمتة الها
صفنت بوجهي مترددة
حسيتها متريد تاخذة
مات كبريائها وإدعائها نسياني وهي تمد ايدها وتاخذة مني وبأسرع مايمكن تختفي من كدامي
مشيت فرحاااان
للحظة جنت رايد اسجد بلشارع شكر لرب لعالمين
للحظة جنت رايد احضن شكو شخص اجة كدامي
بلقيس....
مشيت باسرع مايكون هربا من نفسي
من مشاعري الي ماعرفت اسيطر عليها
جنت ابجي وبزاوية شفافي اكو ضحكة
هاي الصدفة الي ماخطرت على بالي بيوم
شكد زغيرة هالدنيا
كلت صفحة نطوت وإنتهت هي وذكرياتها
بشينها وزينها
كلت مات
بيوم نعابيت ولسبب هوة
بيوم نطعنت بشرفي والسبب امانتة
من تركني بنص الطريق اواجه مصير مجهول ماكلف نفسة حتة يفهمني
او يعتذر عن خذلانة ولورطة الي حطني بيها
ماكلف نفسة بوداع
وخلاني اسمع حجي من كل واحد شكل وافسرها على هواي
ايام كسرتني وقوتني بآن واحد
بين خذلانة وعشرة زياد المرة نخلقت مني انسانة ثانية ماتشبهني بس بلأسم
حتة حالي تغير هواي
اني لجنت انهضم من الصوت لعالي صار صوتي يفزز حتة واني بعز هدوئي
"وكلت انساك، بس المشكلة اليحب حيل كل شي يكول لمن يحترك دمه."
مارجعت للمدرسة جنت تعبانة
احس مابية بعد اكمل
شوفتة ذوبت كل صبر جنت ضامتة لباقي سنين
كلماتة وشلت مخزون لصبر بية
مديت ايدي للباب فتحتة من فوك
دخلت اتمشا بلحديقة خطواتي ثقيلة
عاينت على باب لأستقبال شفت شحاطتة
اي هاي شحاطتة المخيطة
الخياط فوك الخياط
والجزء لأسفل مالتهة صاير مسح وية لكاع
لجلد مالتها متملخ
بكد قباحة هاي الشحاطة نفسة قبيحة
مشيت للأستقبال روحي فايرة شجابة وشطببة واني محرصة على امي ماتفتحلة لباب ولايشوف نصير
دفعت لباب ودخلت
جان كاعد بلكاع ويمة صينية بيها إستكان جاي وطاوة بيها بيض
ونصير بحضنة
حسيت نفسي المغفلة الي متكأن عايشة بهذا لبيت
نترت بصوت عالي واول مرة اسويها واعلي ثوتي على امي هيج
هذاااااا شيسوي هناااااااا
شدخلة لبيتييييي
وبأي صفة داخل
بصوت عالي نتر وكام على حيلة
بصفتي رجلج وابو ابنج ومسؤل عنج
شنووو شنووو عيد عيد ماسمعت
رجلي
لاقصدك طليقي
لو اكولها شوية ادق
اني خلعتك زياد
نداريت على امي معصبة منها
شلون تطببي لهنا
اني شموصيتج
زياد الة ولد يمج وبعدة رجلج شرعا اللعب الي دتلعبي لااني راضية علي ولا رجلج
افهم من كلامج هاي مو اول مرة يجي بيها
دنكت على نصير بعتب
ليش ماتحجيلي
حجاياتة الغير مفهومة كطعت كلبي
بنتر اشرتلة اطلع برا بيتي زيااااد
واذا تريد تقدملي معروف طلكني ولتشوفني وجهك للموت
امي نترت
بلقيس عيب هلحجي يبقة ابو ابنج رضيتي أو لاء
_ لا مو ابو ابني
ماطولة يكول ممحسوب علية ولد
ماطولة مخليني معلكة لا اني بسمة ولا اني بكاع
لايرحم ولايخلي رحمة الله تنزل
_بلقيس كافي عاد لتدوسين زايد
زياد...عوفيها خالة اني اعرف وين تريد توصل
بس والله والدين واليمين ماانولها الي ببالها
وخل تركع راسها بأقرب حايط يمها
عادي لتطلكني
عدت سنة وبعد ٣ سنين واعتبر مطلقة شرعا منك
واخذ ابني واهج
متشوف وجهي للموت
عفتهم ودخلت لغرفتي تعبانة جنت
طلعتلي ملابس نزعت اريد ابدل
ماحس غير لباب نفتحت
نداريت واشوف زياد وراي
ومثل رجال غريب دنكت اشيل بملابسي واستر ىوحي منة
بكل صلافة تقدم خطوتين
تقربت الة بنتر وبيدي تنورتي على صدري خالتها استر بنفسي
انت شطببك هناااااا
اطلع برا لغرفة وبرا لبيت كلة واذا ش
بعدني احجي ايدة نمدت لحلكي وبكل قوتة عصرني وطبك لباب
اتلاوة ويا علباب قفلها
زيااااااد ولقران اذا ماطلعت اصرخ يبو والم عليك لعالم
تلمين علية لعالم شتكليلهم
رجلي طب علية لغرفة نومي
تردين اطلكج حتة ترجعيلة
على ذمتي وتخططين ومنتظرة المدة الي تصيرين بيها منفصلة شرعا مني
تردين ترجعيلة بعد كل لصار بسببببببة
حب العمر الي ماطلع من راسج طول ذيج السنيييين
هاي شدتحجي زياااااااد
متدرين شدااحجي
عبالج ماادري بي يدور عليج
وبكل صلافة يدك لبااااب
ويروح للمدرسة يسأل عنج لمدير والحارس
عبالج ماادري
ادري كلش زين وامج هم تدري
وساكت اريد اشوف وين توصل وياج
بس الله فضحج
وحجيتيها بلساانج
تسوين نفسج متدري
تردين اذكرج
اذكرج شكم مرة غلطتي بأسمي وصحتيلي قيصر
لو احجيلج عن لوعة كلبي واني اقرة الرسالة الي ناطيتها للستر وانتي داخلة للعملية وبين ادين ربج
تعاتبيني لأن عفتج ورا ماجبتي نصير ورحت اكمل لعمارة لخسران بيها
وليومج حاقدة علية
لعمارة جانت حجججججججة
حجة حتة اشرد منج ومن كلبي لمايكدر يحقد عليج
تردين احجيلج شكد ذكرتي اسمة من طلعتي من العملية وامج تسد بحلكج
شكد بجيتي وانتي تعاتبي لان عافج
عرفتي هسة ليش عفتج من جبتي نصير وماسألت عنج
عرفتييييييي يابت عمي
الي صرتلج ستر وغطا وكسرت امي علمودج
اكيد متعرفين
بس اني ليوم اعرفج
منتضرة لسنين تعدي حتة ترجعين لحضن قيصر لعافج ونهزم مثل حرمة جبانة
وابن عمج لصانج واخذج رغم كل الحجي لطلع عليج
ورغم يدري بيج تحبين ذاك العار
صار كخة هسة
تقرب الي
جنت مذهولة بحجية استمع الة ومصدومة
سحب التنورة حيل من ايدي
بقوة ايدة دفعني من صدري علجرباية وآعتلى جسمي بكل قوتي دفعتة وصرخت
ماماا الحكيني .......
كاعدين نتغدة وندكت باب لشارع
طلع قسورة يفتحها
من برة صاح عمو ماما خالة تعالوووو
كمنا ورا
درع لباب شوية
اعاين كبالي
هذا شجابة شوصلة
لزمت كلبي
معقولة جايني بخبر عنهم
اعاين منصور تسالم ويا وكلة تفضل
شو هذا كبل طب
بقينة اني وانغام بلمطبخ
انغام لزمت ايدي وهمست
_شجاج انعام شبيج ترجفين شنو ملك لموت طاب علينة
_اسم الله لتفاولين ااااخ تدرين لبية انغام ليش تغشمين نفسج
_ادري
بس موكافي
كافي انعام
كافي تالفين قصص وتحوكين احداث
عيشي لواقع اترجاج اطفالج تعبو وانتي هم تعبتي
قسوّرة ماراح يصير غضنفر حتلو سمع بيوم متعرضيلج
لأن بساعتها اكو اب وعمام وعمات وكوومة ناس راح تحجيلة الحقيقة وتحجيلة مظلوميتج
كافي تربطين شي بشي وتدمرين بنفسج اكثر ماهية متدمرة
كافي تنطين الموضوع اكبر من حجمة
ماضي مات وندفن وانتي بكل لحظة وبكل ثانية تذكرين نفسج بي
الله ماخلق النسيان عبث
لنسيان نعمة
نعمة ياانعام انتي غافلة عنها
لو كل لناس ترهق نفسها وتحملها عبئ الذكريات جان متنة كلنة
خلي لمياه ترجع لمجاريها
خليهم يتعرفون على قيصر
خليهم يندلون ابوهم
انتي متردي زوج
نفسج تقرف
الضرر الي بروحج ماطيبتة لأيام
حقج والله يلوم الي يلومج
بس مومن حقج تحرمين اطفالج من ابوهم وسندهم بعدج وبعد الله
ولامن حقج تحرميهم من الاهل والعزوة الي اني وياج بحاجتها ونبجي دموع دم عليهة
اني وياج ندري غضنفر اب صالح
متردي بكل بساطة يعوفج اكيد مراح يجلب بذيالج ويعيش على اطلالج
هاي اذا ماطلع متزوج ومستقر
بس اطفالج خطية
حرام يعيشون عمرهم كلة بلكقارنات مابينهم وبين الي بحلهم
اني وياج نعرف المقارنة والشعور بلنقص شكد يألم
جنت سرحانة بكلامها
جانب مني يكلها كملي
موتي التردد الي بداخلي خل اخلص من هلعبئ وارتاح
خل اخلص من شعور كوني ضالمة اطفالي
وخل اخلص من ملحتهم
وجانب يذكرني بمخاوفي
قاطعنة صوت منصور وهوة ينتر
صدك جذب ماي جاي شجاجن
صحت على قسورة الي صافن على التلفزيون نطيتة دولكة ماي وخليت القوري علنار
لتفتت على انعام جانت تحجي وية منة
منة الي وجهها يضحك ويبجي
كاعدة تخمن شنو لسبب لي جاب طالب
وكلنا نعرف ماكو سبب ممكن يجيبة غير انو حصل معلومة عنهم مثل ماوعدني بأنو يتواصل ويانة اذا حصل شي عنهم
نززني صوت القوري من فار
شلتة صبيت وصحت على قسوّرة ودت
شوية واجة منصور كال تعاي الولد يريدج
شيريد مني بأرتباك حجيتها
اني ادري تعاي وشوفي
مشيت ويا مثل لماخذي لأعدامة
دخلت سلمت علولد وكعدت
بقة مرتبك عين على منصور وعين علية
بحبح بصوتة وكال
ام إمتنان خوية انة جايكم بطلب
اي تفضل اذا نكدر تشلع عيونة
سالمة لعيون واصحابهة
انة اجيت لبغداد وسكنت هنا
علمود اختي عبن نقبلت هنا يمكم وانة تعبت عليها واريدلها مستقبل زين
ماهان علية تارك دراستها
انة اجرت ببيت ولبيت بعيد هواي على شغلي
وحتة اكفي مصاريفها ومصاريف لبيت اشتغلت شفتين من لصبح لليل
وانة بلشغل يضل بالي يمها
كلسا اتصل بيها
اخافن عليها ومااكدر اقفل لباب اخاف يصير وياها قدر لاسامح الله
ولاعندي احد هنا ببغداد
الى ان ارد من شغلي انة الف حسبة ببالي
مااجر لنفس غير لمن افتح لباب والكاها مثل طفل تنتضرني تخاف
انة ليوم جايكم بطلب
اريدكم تشوفولي بيت جريب عليكم
مشتمل زغير عبن انة مااكدر على اجار لبيوت هنا
وتديرون بالكم عليها
كلشي مااريد منكم بس تفكدوها
خاطر ائمن
وهي مابيها اذى وبساع تنحب
مو لأن اختي
بس هية هاي ملحة لبيت ولحبيبة
ماجريت النفس غير من كال غايتة
بتسمت بوجها بودي اكوم اشبكة من الفرح
_والله عيب عليك وجاي تستأذن
تامر امر
بعيوننا نحطها
امن ورتاح ومن باجر اسالك الجوارين واول مااحصللكم مشتمل بسعر زين انطيك خبر
ابتسم ويتشكر مني
شلونهم لفروخ
ماشاء الله كبرانين هواي
لايتراوالك ترة زغار بس بنيتهم هيج على عمامهم
ليش شكثر اعمارهم
منة عمرها ١٣ وقسورة ١٢
طالب:- فتحت عيوني متفاجأ ١٣ سنة معقولة
حجيت بتساؤل
انعام:- اي والله بس هي ماشاء الله ماخذها الطول كل الي يشوفها يقدرها اكبر من عمرها
_صحيح والله انة من لوادم تصورتها ١٦ سنة بلقليل
حسيتها مارتاحت لجملتي
ترخصت منهم وطلعت كاره نفسي
وكاره الشعور الي بداخلي تجاهها
وعلى خطواتي عديت الفرق بيني وبينها
١٥ سنة ضبط
مشيت واني اقنع نفسي بأنو ابعد هلمشاعر عني وماانضرلها غير بنضرة تناسب فرق العمر الي بيني وبينها
والي خلاني اخجل من نفسي
وصلت للبيت تلكتني بثينة تسأل وين جنت
شرحت الها غايتي ايدت لفكرة وهي تحجيلي عن جزعها ومللها وهي تقضي ليوم لوحدها
بقيت انتضر اتصال منهم
وكل يوم يمر تزيد حيرتي
بين رغبتي بأن انفذ وصية صاحبي ومامصدك لكيتها
كل فترة جنت اشوفة باحلامي احسة يسألني عنها
مدري عقلي لباطن يصورلي هلشي
وبين مشاعر غريبة بداخلي
مااعرف شوكت تسللت لكلبي وغمرتني بهذا الكم من الرغبة بلقرب منها
ولا اعرف شلون طويت لمسافات واجيت طالب لقرب منهم بأي وسيلة
طالب ان ادخل حياتها بأي شكل من لاشكال
اضحك على روحي اذا اكول غايتي دراسة اختي
هاي جانت وسيلة لااكثر
رغم احبنها واريدلها احسن حياة وسويتلها كل الي اكدر علي بس ماجان عندي لجرأة بأن اخطو هيج خطوة
إلة وكت ماشفت هلبنية
كاعد بليل ادخن واتفرج تلفزيون وبثينة يمي ثبرتني تدوري بهلكتب لبيدها
ودك التلفون
طفرت بثينة عبالها وحدة من لبنات
حجيت كلمتين وعاينتلي
كلبي رفرف
تقربت نطتة الي
الو ........
انعام
طلع لولد جنت مرتاحة
دخلت جوة
منة تلكتني تسأل شنو راد
حجيتلها
لوت بوزها ودخلت جوة
عصرية لبست ورحت لبيت لمختار بيتهم يصير ورانا كلش
سألتهم اذا يعرفون احد عندة مشتمل قريب علينا
لمرة صفنت بوجهي طبت صاحت لرجلها واجت
وهمة جاين للأستقبال اسمع حجيهم
الحجية... اي احسن ماضال خالي خلينة نستفاد منة
الحجي ...شنهي ديوان ابوي تردين ناجرة ونحط لغريب يمنا
_خاب شو دسكت ديوان
اليسمعك يكول لشيوخ ناطرة بباب ديوان ابوك سراوات
شو ضال كاتلة لتراب ولفروخ مسويتة طولة اسمنهم يلعبون بي طوبة ومصايحهم للضالين
اخر كلمات سمعتهن وهمة يدخلون علية
سلم الرجال وكعد مجرد صورة
وتولت الحجية مهمة الشرح مع انو اني فهمت كلشي من حجيهم
كملت وهي تشرحلي
يمة هذا ديوان ابو الحجي ضال خالي
طولة عشرة وعرضة ٤ نقسمة الهم نسوي غرفة ومطبخ والصحيات البرة بلبال هم الهم ونعزلهن بقاطع عن لبيت ونسويلهم باب للشارع
حجية فدوة لعينج منين تسويلهم باب علشارع وهوة لديوان بضهر المنور مالتنا
صفنت باوعت علحججي الي فرح
ردت عاينتلي وكالت
نسويلهم باب عليكم جا انتي موتكولين كرابتكم وبكفالتج
حجية همة صح كرابتي بس الولد احنة مو من محارمة ماترهم يصير بابهم علينة
ترهم يمة ترهم مالج غرض نرهمها
شلون
كومي وياي
جرت ايدي
اخذتني يم المضيف
اشرتلي على صفحة بيتنا
اكو منور صاير وية راك لغرف والصالة للأخير
ويبدي من الطارمة
ضربت على الطابوقات
هاي منا ونسويلهم باب وتصير طلعتهم من لممر وعلطارمة مالتكم ومن بابكم يطلعون للشارع
واذا متعاجزة منهم خلي يحطولهم حاجز كلش لحد لباب
حجية مو مسألة عجز
لا هوة انتي جنج متعاجزة منهم
شدعواج يمة شني تكاطعت الدية لو راح تاخذي للكبر هذا البيت
هوة باب زغير يفتحونة من يمج
واخلص من هلديوان الفكر الماجايبلي غير المشاكل
اااخ ياخالة اني وين مااروح يلحكني الديوان
اكلتني وشربتني ماطلعت من يمها غير واني مطيتها الموافقة
شلون ماادري
طبيت للبيت حجيت لمنصور وانغام
انغام كالت بكيفج
منصور حسيتة ماموافق
جانت غايتي اخلص من منة وملحتها
ومن تحجي اكلها ذولة كرايبنا
وبنفس الوقت نقهرت على لولد وماحبيت اردة
من شفت وجهة اجت كبالي صورة فدعم
تذكرت سوالفة بي
وتذكرت وكفتة النة من اخذنا لديالى رغم جانت رجلة متضررة وماعافنا غير لمن أمن على حياتنا
عدت ايام كلت ادور غير هلمكان لأن مادخلت عقلي فكرة باب مشترك
إستصعبتها
حصلت بيتين بس بعاد علينة شوية
وثنينهن كبار مومشتملات
بقيت افكر والحجية تاكل بكلبي يومية جايتني
قررت اعمل بكلامها واخلي طالب يسوي حاجز لحد لباب لخارجي على شكل ممر بحيث من يطلعون لانشوفهم ولايشوفونة
اتصلت بي ورة يومين بلغتة
فرح وبنفس ليوم اجة
إستقبلة منصور شاف لمكان
كال ينرادلة فلوس هذا وانة مامستلم شهريتي معناها اتاني راس لشهر
بلغنة الحجية
كالت عدي شكم فلس خل يشتغل بيهن ويردهن الي راس لشهر
باشر بي
بيدة جان يشتغل بس يجيب لمواد
قسورة ومنصور ساعدو
خلال اسبوع كمل كلشي وجاب اختة وانتقلو
سوينالهم غدة بيومها
عصرية مرينة عليهم اني وانغام اخذت ساعة جدارية ماحبيت اطب وايدي خالية
استقبلتنا لبنية
سمرة حمرة طويلة ضعيفة معانيها حلوة
من اول دقيقتين حبيتها
همة كلهم بصورة عامة صعب تلكة بيهم بشر ماينحب
من عشرتي الهم
ضيفتنا وانطلقت تسولف وتعيب على بنات بغداد وولدها
جن شايفة كدامي كشمش زوري تهاني
مااعرف احس بيها شي منهم
طول ماهي تحجي وانغام ومنة متونسات ويضحكن
اني جنت اغص بلذكريات وتخنكني العبرة
رجعنة للبيت انغام ومنة يسولفن بيها
من.... يا الله شكد تونس هاي لبنية
صوت انغام يرد عليها
اي والله ليكعد يمها ينراد يحطلة بطن ويضحك
عدت ايام صارت بثينة وحدة من لعائلة ياجاية علينة يارايحين عليها
وقت مااكون ضايجة ومخنوكة لو اودي عليها لو اروح يمها
علاقتها بأنغام كلش قوية
منة تحبها بس القربات الها بنات النزل الجدد الي كبالنا
منار وبدور
عصرية اجت تتوسلي تريد تروح يمهن
مترحين
لويييش
لأن عليهم رجل دتشوفين بيتهم ميخلة من الخطاطير واغلبهم ولد
اي شعلية بيهم اكعد يم منار بلغرفة فوك ونسولف
لو اقريها
تقريها ؟ بللة متستحي على روحها رابع اعدادي وتقرينها
اي ماما مادتهم سهلة اني بس اباوعها افتهمها هي متعرف تفهم بس تحفظ
مترحين منة
اهووو ماما كلة لاء كلة لاء
يعني حتة امهم ذيج المرة عاتبتني تكلي ليش كطعتي رجل موجنتي تجين علبنات
من وراج حتة بعد متخليهن يجن يمنا
ترحين نص ساعة وترجعين
اذا تاخرتي دقايق الحكج
لبست حجابها وطلعت
بقيت اعاين الها من زرف لباب بينة وبينهم اكو شارع بلنص فرعنة عريض ويطلع علشارع لعام تفوت منة سيارات ودائما مزدحم
قريب مداتوصل للباب شفت واحد تقرب الها ويحجي وياها
ممبين بس ضهرة
بقيت اعاين اريد اشوفة عدل
ماكدر سيارات تفوت
ماكدرت اتحمل لبست جبة وحجاب وطلعت
عاينت ماجان موجود ومنة هم ماكو
........
طالب انتقلنا للبيت مرتاحين بي والي مريحني اكثر قربي منهم
يومية لصبح مااطلع لشغلي غير لمن اسمع صوت فتحة بابهم
ابقة امشي بعيد عنها هي وصديقاتها
طولها وحسنها وكلشي بيها يوهمني من اشوف تفاصيلها انسة عمرها
ماكدرت انضر الها على انها طفلة ابد
سألت بثينة عن مواليدها كالتلي ٩٩
حسبت معناها طبت بل١٤
وكل مدة ااصفن احسب واكول زادت شهر
اقشمر بروحي اكول اهتمامي سببة رغبتي برد الجميل لكلشي سوا الي فدعم
من يوم عرفتة لحد مادفنتة بيدي
بس انة وكلبي ندري الموضوع اكبر من هيج بهواي
واكف بلباب يم ولد من لمنطقة نسولف وشفتها طلعت
تنوعت الها
لو احس حرارة صعدت من جدمي للراس
جانت طويلة
طولها يذكرني بأبوها وفدعم
لابسة بجامة وعليها شي طويل فوك الركبة وشال ونعال ابو لأصبع
من بعيد وعيونها الشهل يلصفن
شفتها تقربت لبيت الكبالهم
وانة توني شفت سيارة طبكت ونزلو منها اربعة لابسين عسكري وعلى متونهم رتب ودخلو للبيت
من دخلو شفت لولد واحد يغمز للثاني ويعاين الهم
سألتهم شكو
كالو
يمعود ذولة كعدو جدد
بس لمرة وبناتها
وخطارهم بس زلم
نادرا ما تجيهم مرة
كملو يتهامزون بينهم
نترت اوعضهم
لاتحجون بعرضهن زحمة يبقون جواريننا
الله اعلم ليش تشيلون غيبتهن
بقو يضحكون على حجيي
تمنيت واحدهم حاجيها بديرتنا إلة يردو بضهر ابو
من شفتها توها تعبر الهم مدري شصارلي
ماعرف شوكت وصلت يمها
ونترت بيها
شجابج لهنا
عاطت بدلع مدري نتر وانة اشوفنة هيج
كل الي ادري بي نبرة صوتها ذوبت شيب لخلفوني
اوووي وانت شعليك بية
لوالدم طالعين ترة
لاماطالعين مساع اتصلت بيهم ماما وكالو بلبيت
وبعدين انت ياهو مالتك
ردي للبيت زحمة عدهم خطار
دااكلك معليك
لا أشو تردين
سحبتها من ايدها
دفعتني
امشي
ترة اعيط والله
امشي كدامي كتلج عدهم خطار لتخليني احجي لأمج
دفعتني ومشت
بقيت وراها الى ان دخلت
ضربت لباب بوجعي وكالت ......يتبع
ترة تعبت 🥺
ضرووووري تشوفون لستوري مالتي باجر بليل
وجماعة لواتباد اتمنة كلكم تتواجدون بلكروب لأن هناك انزل استطلاع اراء وتوضيحات وابلغ بيوم الي ماانزل أو اتأخر فحتة تكونون على بينة
وباجر أو عكبة راح انزل توضيح كلش مهم بشأن لقصة راح يكون نقطة فاصلة
لبعص رح يكمل بعدة واحتمال لبعض يترك
(البعض) تذكرت لعبادي 😂
سمعوني هلهولة أ شوفوني تفاعل ☻
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!