رواية خنجر الغضنفر الفصل السابع والثلاثون 37 - بقلم Hunen23Hatum

#خنجر_الغضنفر

#بارت_٣٧

#حنين_حاتم

انعام.....

عاينلي وصفك على كصتة
ينراد اكتب على غرفتنا بيت الخلاء خاطر محد يدك علينا الباب
كام على حيلة يتلفت يدور على دشداشتة
ويحاجيها من ورة لباب
هوة انة اتصيد الفرص يكشمش وانتي جنج الشمر بهذا ثوبج لأحمر كطعتي رزقي

مافتهمت علي تحاجي من ورة لباب
خوية الحك هذا فدعم المسودن هاد على بيت عمتي امريكا بلسلاح وهسة عمتي خابرتنا تدك وتلطم تكول خزانة وشهرنة كدام اخوة رجلي
جدي طلع كبلك هوة وصميدع

سحبت دشداشة من الكنتور ونطيتة
لبسها بساع وسحب سويجة وطلع
بس التفتت لكيت دشداشتة ورة لجرباية صايرة
سحبتها شميتها وضميتها لصدري
تقربت للمراية اعاين منضر شعري يفشل صار
خصلة جبيرة مبتورة لحد اذاني وباقي شعري شوية فوك من خصري
سحبت المكص وكلبت شعري وبديت ادرجة حتة تضيع الخصلة المبتورة
على طولة درجتة
رفعت راسي عاينت بلمراية
شوية اشوة
لفيت شعري كترت ملابسة
بدلة لعمل مالتة ورة لباب معلكة
علكت لدشداشة وياها
رجعت ادور بملابسة على لبنطرون الزيتوني
بين الدشاديش مختلة
طلعتة سحبتة من التعلاكة
بضهرة القميص معلك نفس اللون
مابي رتبة ولا اي شي
دورت جيوبة مالكيت شي
بقيت اكلب بباقي الملابس
وحدة من الدشاديش حسيتها مومثل لباقيات ثخينة كأنما ببطنها شي
سحبتها الي
طلعتها من التعلاكة
ببطنها بدلة مال اطفال مال طلايع مرقطة
دورت بجيوبها كلبتها كلشي مابيها
رجعتهن مثل ماجانن
وسديت خانتة الي اغلب لأوقات تكون مقفولة ومفتاحها وية لسويج خالة
ومن اسألة ليش تقفلها يكلي بيها اوراقنة ومستمسكاتنة واخلي بيها فلوس صرماية المحل غالبا يكون مبلغ جبير
ماعدنة احد يمد ايدة بس لأحتياط واجب

نتجيت على الكنتور وكعدت بلكاع
افكر بأنغام ليش ماردت على المكتوب الي دزيتة الها من جنت يم بيت عمة امريكا زعلانة
ليش لاخالتي ولا امي يتحصلن
ليش خالو ميرد على اتصالاتي
على كعدتي كتبت الها مرسال اكرر بي نفس هلأسألة بكل رسالة ومتجاوبني عليهن
سفطتها وضميتها بلكنتور
اريد انزل ومنة نايمة بس اشيلها تكعد بالي يمهم اريد افهم شصاير
مديت راسي من المحجر صحت على كشمش
سألتها

_خية علمي علمج طلعو كلهم ولحكنهم جدتي وامي ومحد منهم بين

_اتصلي على بيت عمهم واسأليهم

_خية بيا وجه احاجيهم وشكللهم بشروني ابننة صوب واحد منكم لو لساعة
سود الله وجهك يفدعم
عمتي وزوري بلوجه لأسود هسة

عفت لباب مفتوحة ونزلت يمها
سللامة جانت كاعدة بباب غرفتها وايدها على خدها
بسعاد بلمطبخ كاعدة
مانحس غير نعناعة دفعت لباب ودخلت

بسعاد وكفت متفاجأة بيها بتوتر سألتها
_هاجدة شجابج

_يااع شني تحاسبيني على طبة بيتي يفرخ الدوج
انة جنت مسيرة ورديت
ميلي من دربي

دفعتها بمتنها ودخلت جوة سلمت بدون متعاين النة كأنما دتسلم على اثاث لبيت وفتحت لباب ودخلت علاكتها على راسها
عيني على سللامة اخذت ابنها ودخلت لغرفتها وسدت لباب
بقيت كاعدة علدرج اهدء بكشمش لمتربعة وتلطم وجهالها يلزمون بأديها ويسكتون بيها شحلاتهم دموعهم وية دموعها

شوية ودك لتلفون ركضت كشمش ردت
كالت الو واني عيوني عليها
ملامج وجها نفرجت

تهاني :- سلاح فدعم لجان متوجه عليهم ويهدد الي يتقرب ارمي
ندار من عليهم ووجهة على روحة
عيني علي من خلة لسلاح براسة وبكل قوتي صرخت
فدعم لااااااء
لولد لويا جيت علي من ورا
صوت طلقة وصراخ زوري
غمضت عيوني وكعدت بلكاع
اخاف افتحهن
تقربت للشباك اعاين
صاحبة جاثل على صدرة ويضرب بي ويصيح
ولك تريد تنتحر يلعااااار
بيا وجه تقابل ربك هم سكران وهم منتحر
دفعة فدعم وصار فوكة ويضرب بي
مالك غرض بية
انة اريد اموت روحييييي
بلكاع يتماطلون واحد فوك لثاني
صاحبة يضرب بي على بطنة يريد يطلع لشرب من راسة حتة يصحى
وهوة مثل المخبل يرد علي وهم يضربة
ستار جاب زوري واجة يحجي عليها ويصيح
عمامي وولدهم من بعيد يعاينون
جنت اشوف الشماتة والتشفي بعيونهم
وعيني على ابوي المدنك راسة خجلان من سوايات نسيبة
بهاي اللحضة احس مات كلشي لفدعم بكلبي
مولحب لمات
وانما لأحترام والرغبة
شنهي ذنب ابوي يوكف مدنك الراس
واخوي الطلع يدك على راسة ويتوسللة يكلة لاتشمتهم بينا ياابن خالي
وزوري المسكينة لطلعت شاكة الثوب بلكي تهتز غيرتة من يشوفها ويبطل لجاي يسوي
امي الي تهبد مثل المخبلة وخايفة من شماتتة نسوان عمامي لجانت تروح يمهن تتفاخر بوضيفة فدعم ونجمتة وسيارتة
بهاي اللحضة انة لصرخت مااريدة

سيارة جدي طبكت ونزل منها جدي وصميدع وعمي رحيل جدي عكالة بيدة ويشبخ بكل حيلة
وصل يمهم شمر عكالة بلكاع وتربع يعاين عليهم
فدعم شافة دفع طالب وكام على حيلة
ضايع يتلفت جننة صحة على روحة من شاف جدي
جنت اشوف بعيونة نضرات
كأن يسأل روحة اني شجابني هنا وشجاي اسوي
جدي كام على حيلة
راح للسيارة ورجع بيدة مسدسة
عيني علي من وجهة على فدعم
بلكاع كعدت وغضت عيوني وسديت اذاناتي لأن ادري بي يسويها
زوري وراي تعاين وتطلم ماتكدر تطلع
ورة لشباك تصرخ لا جدي فدوة اغديلك

فدعم:- ماوعيت على روحي ولا جنت ادري بكل لسويتة غير من شفت زوري شكت ثوبها وسترها نهتك
حسيت لدنيا طاحت على راسي
وادري لوشما اسوي ماينغفر ذنبي
حسيت نفسي حيوان جاي اهجم بيت اختي وعمتي بيدي علمود نفسي وغاياتي
هنا وبكل ارادة بية حطيت لسلاح براسي وشفت موتي هوة الشي لوحيد الممكن يغفر ذنبي
حسيت لموت راحة الي والهم
ثواني هنة وطفر طالب فوكي ولاواني وشمر لسلاح
شبه صاحي بس طاقة مابية جسمي تعبان واعصابي مرتخية حيل
حاولت الاوي صار يضرب بية بكل قوتة ماكدرتلة بقيت اتماطل ويا

نزيت على سيارة جدي
من نزل عكالة بيدة بلكاع شمرة كأن يكلي طيحت هيبتي وعكالي مكانة جوة الرجلين من ورة سوايتك
تلفتت ادور على لمسدس
هنا صدك شتهيت لموت من قباحة فعلي وكبر ذنبي بحقهم واني اسأل بروحي شجابني هنا وشلون سولت الي نفسي اسوي بأهلي هيج

عاينت لجدي ركض علسيارة ورجع بيدة مسدس
فرضت صدري ووكفت اتلقا الطلقة منة
غمضت عيوني وصوت الطلقة خترق طبلة اذاني
بس ماحسيت شي
فتحت عيوني على وكفتي وطالب جوة رجلية يتمرغل بلكاع وايدة على بطنة
كلبتة على وجها ونترت بي
ولك تختبلللللللت
جدي وعمامي ركضو علي غضنفر شالة للسيارة ومشة وجدي ولباقين لحكو
صفيت لوحدي وي خيبتي
ونضرات زوري وتهاني
تقربت علشباك ومابين نفسي ورغباتها عشت معركة خاسرة وليوم جان اعضم خسائري
صوتها بحسرة يصرخ بية
طلكني مااريييييدك
بكد ماحبيتك كرهتك بكد ماجنت اريدك هسة اريد الخلاص منك
سمعت بصوتها نبرة قوة وكره بآن واحد ودموعها لؤلؤ نزل على وجناتها المحمرة

وقفت امام شرفة غرفتها غارقا بذنوبي
وقد خرجت الحياة من نطاق جسدي وغادرتني
وقفت معلنا أن من حاربت لأجلها سنينا عجاف
.. قتلتني في المطاف،
وقفت ووقف معي قلبي الحزين البائس منطويا على اضلعه
ضاماً ضمئه اليه محتضنا اجزائه
بصرخةً كان صداها قد وصل عنان السماء،
وفحواها ؛  لن يحبنا الآخرون بليلنا بمساوئنا بذنوبنا لن يحبونا بسواد ايامنا
فضلامنا لنا ولهم مايحبون رؤياه فينا
وقفت طويلا
وأخيرا جثيت امامها غارقا في التفكير
منشطرا 
فجزء يريدها وجزئي الآخر يريد نزعها مني
واخيرا انتصر احدهما
لم يكن الأمر سهلا
كان كمن يتأرجح بين الموت والحياة
كمن يتنزع قلبه من بين جنبيه
ليركله بعيدا ويصيب الهدف الذي يصبون اليه
ليفرحون هم و يموت هو ......حنين حاتم

تقربت الها عين عليها وعين على زوري
_انتي طالق

كلتها ودرت وجهي متوجه للمستشفى
ركبت سيارة طالب ورحت للمستشفى
شفتهم متجمهرين يم صالة لعمليات جوة
تواريت عن الأنضار وبقيت انتضر
طلعو محد من اهلة موجود بقيت انتضر جدي يطلع
موخوف بس خجل من سوايتي
مالي عين احطها بعينة
طلع برة انتهزت لفرصة ودخلت جانو غضنفر وصميدع يمة
دخلت ركضت علي حضنتة
لزمتة من ملابسة واعاتب بي
ولك شسويييت ليش هيج شسويت ليش ماخليتة يضربني
اني استحق
ليش هيج سويت علمودي مخبل انتتتت

ايدة سحبت ايدي
ابتسم ويعاين لغضنفر
صد علية وكوة يحجي
ولك انت اخوي وصاحبي روحي رخيصة جوة جدامك
وكفاتك ماتنسي
جاهية الخوة المن تنراد

غضنفر يعاين الي ويهز براسة
_مع لأسف عليك فدعم لعبت بروحك وبأحوالنة
شتسوالك بعد لسويتة
تتصور بعد تهاني ترجعلك بسوايتك هاي

_طلكتها

نفتحن عيونة مصدوم
بقة يعاين لصميدع ويصد على طالب ميعرف شيحجي
طب ابوي
اشرلي جدك وراي اطلع بساعك

لفيت وجهي بشماغي ومشيت
رحت على لبزل كعدت ولعناد لبية صار اضعاف
ثورة بداخلي مااذيت بشر جنت اأذي نفسي وبس
ليش أذوني وسلبوها مني
ليش وصلوني لمرحلة لخبال
ليش وصلوني لمرحلة اشتهي لموت مشتها
همي بكبر هلكون صفنة طويلة كضيت الليل كاعد علبزل طلع لفجر علية بفكرة
وقررت انتقم من نفسي ومنهم

انعام :- سدت كشمش لتلفون واني عيوني عليها
ايدها على صدرها وكالت
لامين لسالفة بس صاحب فدعم متصوب
جدري رايد يصوب فدعم وهوة صاير كدامة
وهسة بلمستشفى ماخذينا

_لا إلله إلا الله وتهاني وزوري وعمة شلونهن

_ماادري بيهن خية هاي مرة عمهم حاجتني

واحنة نحجي دخلن بيبي شكرية وام فدعم وجوهن كأيبة ومهمومات
ام فدعم كعدت بلصالة وشيلتها على وجهها وصارت تنحب
انة ماعرفت اربيييي
تالي تعبي وكسران ضهري هيج يسوي فدعم ويخزي عمتة كدام عيالها
بيبي نزعت جواريبها وتلوم بيها تكلها بسج شيفيد لبجي بعد صارت

اني وبسعاد وكشمش وحدة تعاين علثانية ووحدة تكل للثانية انتي كليلها

نختم نقاش العيون بصوت كشمش بأرتباك تهمس لبيبي
_جدة نعناعة اجت مساع

بيبي صفكة وجهها
_ياااااع شجايها عكرب الرمل هم الها عين
اي بلله خل نشوف الحجي شيسوي لو اجة

شوية وطلعت نعناعة بيدها دشاديش جدو مسفطتهن على ايدها واخذتهن وراحت للحمام
فاتت من يم بيبي وام فدعم ماسلمت عليهن
صاحت عليها بيبي

_وين تردين بدشاديش الحجي مغسولات وكشمش مكسور ضهرها عليهن الليل كلة تكوي

_اي واضح مغسولات
كلهن طكع اديجن عضب ماتعرفن تفركن عدل

_هاي ادينا موعضب ادينة متعوبة من الشغل موش مثل بعض  الناس على اديهن نقش الحنة

_هي هاي الدنية مقامات وكلمن الة مقامة وانتن هذا مقامجن وماراح يتغير

حجتها وطبكت باب لحمام حيل
بطبيعة لبيت تصميمة على الطراز الأسلامي القديم اطار البيبان يصير دائري مو مربع ولباب يصير ناصي
ومن جوة تفصلة مسافة عالية عن الأرض تكفي لدخول حيوان زغير بس الحمام داكيلة بليتة من جوة
كد ماضربت لباب قوي البليتة فلت واحد من البسامير مالتها من الصفح
بيبي فارت

_مقامااااات اي والله
هي بمقام الملكة واحنة الخدم
ماكول غير حسبي الله على الوكت
بس مادايمة وان شاء الله تدور واشوفنج بأخس حال

بقت بيبي تتولول وتلعن بلحض
لهناك اجو جدو وعمو اسماعيل ورحيل وصميدع
كالو غضنفر يبات يم الولد

جدو دخل لغرفتة
وعمو رحيل طب لغرفتة وعمو إسماعيل راح لبيتهم
محد جاب طاري نعناعة بيبي سكتت شافتهم مغثوثين حيل
شوية وطلعت نعناعة من الحمام صعدت شرت الملابس ونزلت جوة لغرفتها
كل احنة نترقب وعيوننا علباب
شوية وكبت لعيطة وبدينة نسمع صياحها وصوت ضرب جدو الها بلعكال
الي حسب كلام كشمش تكول ضربتة مميتة
وتسولف على حماها كاتلها مرة بلعكال مالة ضالة ٣ ايام متكدر تنام من الم جسمها

اكثر من نص ساعة عدت صراخها مستمر وجدو يدك عليها ويعاتب بيها على الي سوتة
يعاتب بيها لأن وكفت وية ولدها على  لباطل ومن ورا تروح الهم وتنطيهم فلوس من خيرة وهوة محرم عليهم اي شي من لكيعان

بيبي تروح وترجع بمكانها مثل التطلك
صعدت نزلت منة جانت نايمة من شلتها فزت
تقربت الها كلت انطيها الها حتة تهدأ
ماعرف ليش تنخبص هيج من تشوفة يضربها

_اخذتها من ايدي كعدت بلكاع كد مامرتبكة وتهز برجليها منة رجعت نامت على هزتها رغم شبعانة نوم

كعدت بصفها اخذتها منها خليتها بلكاع وخطيتها بلروب مالتي
حاولت امازحها
بيبي ماشاء الله هذا جدو شكد قوي ادري ماتعب

فرت ايدها وعوجت حلكها

_ششايفة انتي ابو خليل جان اذا يلزم وحدة بينا عندة استعداد يبقة للصبح يطك 
بس ها مالت الله مايطك إلة بسالفة جاينة وجبيرة

سكتت من سكت صراخ نعناعة
عيوننا على لباب نترقب طلعتها بس ماطلعت
بقت تون اكثر من ساعة وتنحب وراها اختفى صوتها
بيبي شكرية ايست من طلعتها
همست الي بضحكة
راح صاحبنة اقري علي لفاتحة
تلكيها لبستلة لباسها لمكركش على كولة فدعم جان يلكا على لحبل ينزلة يهوس بي ويغنيلها مكركش وشحلاتنا لباس حبوبة وهي تصفك ويا وتهوس عود تغيض بية بكل صلافة
تاخذة من ايدة وتكلة هذا الماعاجبك  بي كل الخير والبركة

بقينة نضحك وكشمش رفعت دشداشتها لابسة شورت كودري لركبها
_خاب طلعت جدتي نعناعة احسن مني عدها لباس ابولكركش وانة لباساتي دشاديش كودري واحورهن
همدا حضي الماساوة ربعة
بقينة نضحك
ونسمع صوتها جوة تكلة
اسمع اسمع شلون شمتانات بية عبن طكيتني وهوة يعيط بيها
_انخمدي كلمن يشوف لناس بعين طبعة

كشمش كالتلي لاتباتين فوك نامي يمنا
بسعاد عرست وية عرسي صعدت نزلت فراشها واجت بحجة ماتخلي صميدع يتقرب الها تخاف على الطفل ماكالت لأحد بس الي ولكشمش توصيات بيبي شكرية خاف يوكع لطفل حسب إعتقادها بس هي ماكدرت تضم علينا
ولتمينا بغرفة بيبي
تانيناها نامت ونطلقنا نسولف
اول شي لسوالف بصوت ناصي
وراها بدة صوتنا يعلة وكشمش كلسا وذكرت فدعم

_مت عيني وين راح تأخر جدتي تكول طلكها تهاني اخاف يروح يسوي بروحة شي

_لادادة تلكينة صحة وراح لصاحبة اكيد هسة يمة بلمستشفى خوما يعوفة وهوة من ورا تصوب
بقيت ابرد بيها وبسعاد تحجي للجهال قصة السعلوة وحورتها وسوتها فيلم هندي واحنة متونسين اكثر من الجهال
الى ان عاطت بينا بيبي بجملتها الشهيرة
خاب شلوووون وين انطي وجهيي وحك الله اهج هجة الرضا ابو محمد من هج وماتعرفولي ديرة

غطينا روسنا كل احنة ونرفع بلبطانية ليفوك برجلينة حتة نحتمي من ضربات العوجية
رجعت غفت
ضلينة جوة لبطانية نتهامس
كشمش تضحك وتكلي خاب  شنهي هللذة من هلفكَر
حلتلنة السوالف بهللحضة تكول صارلنة دهر مامتشاوفين
نختمت سوالفنة بضحكة وغفينة كل احنة
يوم ثاني اجة غضنفر لصبح كال ودينا لولد لبيت اهلة جدي وانة ولولد وعمامي خلينة جوة راسة فلوس ماقبل ياخذهن كلنالة مال كومتك بلسلامة لاتعتبرة فصل لو فدية
وفدعم بقة يمة عبن الولد ماعندة احد يعينة اخوتة لولد زغار جهال واخواتة وامة مايكدرن علي ينرادلة زلمة
غضنفر لبس ملابسة وراح للشغل حمزة لحكة يبجي كال مااكدر اخذة ليوم عدنا تجهيز وخاف يتأذة ينراد اكابلة واكعد
عدة ليوم جدو مهموم مادخل لغرفتة بلأستقبال كاعد
لضهر مارجع غضنفر صميدع اخذلة اكل للمحل
لليل يلله حل جان تعبان كلش ملابسة منتهيات ومحركات من رداناتهن ادي مجوايات
وهوة بلأصل ادي ماالهن اي ملامح عبارة عن نتوئات وبروزات اثار الحرك والشغل ولأدوات الحادة والمواد الي يستخدموها ماعندة بصمات كد مامتأذايات
صعد فوك طب للحمام خليت منة بكاروكها بحلكها ملهية ورحت يمة بلحمام
اخذت الليفة من ادي ليفت الة ميكدر يلزمها
جان رافع راسة للسقف ومنتجي على الحايط
جسمة يفك ويرتاح من ادير علي المي الدافي
دنكت على رجلي اليف بيهن وية مادنكت زلت رجلي وزلكت نسحل جسمي وية زلكة رجلي وعلى وجهي وكعت
احس نار وتطلع من رجلي صرخت
اجة علية من ادية شالني كوة بقة محتار بية
يريد يطلعني مالابس ملابس لف لخاولي على جسمة وشالني دخلني للغرفة خلاني علجرباية
يباوعلي ويفرك  بإدي ولحروق ويضحك
_خاب لفاهية انة ادية مااحس بيهن
اريدنج عون صرتيلي فرعون

بقيت اتلوة من رجلي
راح شطف جسمة ولبس ملابسة ورجع
شافني اتلوة
دنك عليها بقة يضغط عليها كلسا من مكان واني الوج من الألم
مد راسة من المحجر صاح على كشمش
صعدت من الدرج تسأل شكو
حجالها وكاللها لبسيها حجابها وستريها
لبستني ربطتي وعباية ردت اكوم ابد ماكدرت المها لايطاق
شالني وكشمش شالت منة بسعاد طلعت من غرفتها تسأل شكو
نزلنة جوة منة بقت يم بسعاد ورحنة لعيادة طبيب
شافها لدكتور كال اشعة
دخلنة لغرفة لأشعة ابو لأشعة سألني خوما حامل
جاوبتة بلاء
كشمش كرصتني
خاب انتي شني ترضعين شمدريج موحامل
بقيت اسكت بيها
سكتي فال الله ولا فالج بيش طالبتني لشهرية مخربطة عندي من يوم جبت منة
هوة يعاين على كشمش فتهم منها انو احتمال اكون حامل لو نرعص
شالني من السدية وطلعني كالة خوية خل نتأكد خاف صدك حامل وموزين علفرخ

بقيت اقنع بي
_ يمعود وين تريد بية هسة حتلو حامل ترة ماراح يموت الطفل هوة اشعاع بسيط وبسرعة مراح اتعرضلة فترة طويلة

_وانة اضل ورة حجيج بلله صار شي بلفرخ موهاي كلها لأمراض من ورة هلأشعاعات

_يعني هسة انت عفت رجلي واحتاريت بلفرخ لطفل اهم مني

_ااشش لاتكولين هيج انتي بلدنية ولبيها بس يابوية انة شيبت وانتي هم جبيرة انة لويطيح بيدي انة احبل بيهم خاطر ائمن اكثر ماعندي مانع
بقيت اضحك على كلامة
وهوة يخازرني بلشقة ويكلي عيارة تضحكين كلشي مابيها رجلج

غندبت
يعني شلون مااضحك وانت تضحك بية اخيط حلكي

_لايبوية ضحكي انة فرحتي بهلدنية ضحكتج
ضحكتج هاي وملكاج الي  يزيل تعب سنين

وصلنة للتحليل برة المستشفى سوو الي اقل الثلث ساعة طلع
صاحت اسمي لبنية كام هوة تقرب الها ماعرف شحجتلة
اجة علية شالني
سألتة شكالت
همس الي ماكو شي
رجعنة للمستشفى كعدني على كرسي برة و دخل هوة بقة يحجي وية الطبيب اسمعة يكلة لجرعة بسيطة متضر ليش رافض ومادامها  بلأشهر لأولى حسب كلامك اني مقدر حرصك  وترة ابو لأشعة من سألكم سؤالة حرصا وخوفا من انو تكون حامل بلأسابيع لأولى بهلحالة فقط نخترز ومنسوي اشعة
وبكيفك بعد اذا تريد على مسؤليتك تجبسها بدون اشعة يعني  نعاملها معاملة المفسوخة نجبسها وورة ١٥ يوم تجينة تكون لأشعة امنة متضر نسويها الها ونشوف
ندار علينة همست الة
لتكبر لموضوع ترة مالةداعي هذا القلق هي جرعة بسيطة
كوة قتنع ودخلنا سوولي اشعة
اتضح انو  التواء برجلي
كتبلنا علاج من برة اخذنا ولفوها الي
بقيت لطريق كلة بين فرحانة وبين مهمومة
بطبيعتي اخاف من المسؤلية لكوني اهتم بلطفل زايد عن اللزوم يعني منة ماانطيها لأحد إلة وقت الضرورة المللحة ومااقبل اي احد يتدخل بتربيتها او اي شي يخصها ومهما اكون تعبانة من عدها مااتخلى عن مسؤليتها أو اطلب من احد يساعدني بيها حتة وقت نفاسي جنت اسهر وياها
همة يسموها نحاسة اني اسميها حرص وتأدية واجبي كأم ومابين كلامهم وكلامي احاول قدر لأمكان اتجنب الحزازيات
ورغم هذا بكل لحضة وبكل ثانية احس نفسي ام فاشلة ومقصرة وياها
رعب نتابني وملامة لروحي ليش مااخذت احتياطاتي
ماجنت متخيلة انو احبل على لأربعين
رجعت للبيت دخلت لغرفتي دفنت راسي بمخدتي وبقيت ابجي غضنفر دخل يلوم بية
ويكلي لاتخربين فرحتي،
حرام عليج هذا رزق غيرج يبجي علي
خليني افرح بخلفتي انة ماعندي اهل همة اهلي
احجيلج سر بس توعديني تسكتين ومااشوف دموعج

بتسمت
تقرب الي وهمس
انة سللامة طلكتها بس ها ترة ماكو مخلوق بهلبيت يدري غيرج وغير سللامة
وحمزة هلأيام اطلعلة جنسية ورا مدرسة لسنة لجاية  لازم اسجلة بأسمج عبن سللامة ماعاقد عليها انة
وينرادلها ركضة عبن سالفتها شوية متعبة
بس احنة عدنا ربع بلجنسية

كمل عادي واني بعدني صافنة بأول جملة كالها

قاطعتة واني اخلي ايدي على حلكها
هوب هوب  ترة بعدني بصدمة اول جملة على كيفك وياي
ليش طلكتها موجنت ناوي تخليها وتبنيلها

وهوة هذا لراح ليصير جاانة ليش مااكلت لأي بشر وهذا اختبار الها اذا مخلوق درة هي تعرف شسوي انة كلتلها
وانتي مالج غاية تحجين لاحد بس هم احذرج
اذا بيوم هلخبر طلع وحمزة درة امة مو على ذمتي مايصير خير يبوية

بس ممكن اعرف شنو لسبب ليش طلكتها وشنو لغاية من بقائها اذا تطلكت بعد

طلكتها لجل مايجي يوم ولا يجي ضرف ولو حتة بلحلم وانجبر عليها
وبقيتها خايف على حمزاوي
حمزة لصارلة موشوية نخطف اسبوعين ونشمر بصحراء ٣ ايام
ليلتين هوة باتهن لوحدة بصحراء وبعز الضلام
من لكينا ٣ ايام هوة بحضني ماينزل من حضني من الخوف ولليوم احسة مارجع مثل كبل
بقة حساس ومنزوي
صار عندة خوف شديد من اليل
هوة يجي الليل وهوة يحتسر مايعرف وين يروح
ومايخفا عليج حمزة طفل ذكي فطن ولامور لصارت 
ا خلتة يفكر اكبر من عمرة
مااكدر احرمة منها امة شكد فكرت شكد حاولت كلت اطلكها وماالي غرض بيها وين ماتمشي خل تمشي اطلع من خطيتها واخلص
بس مااكدرت اشوفن بي وجه قيصر
اذكر شلون حرمتة من امنا ولليوم بقة يحاسبني على هلشي
صح لطريقة تختلف بس يبقة لمضمون واحد
بدون لام ماكو حياة
مابيها خير النا بس يجوز الة بيها خير
احنة نشوفها موخوش ادمية بس هوة يشوفها اعضم لناس بحياتة
قدوتة وعينة الشاف بيها الدنية
صعب احرمة منها وهوة بهلعمر
ماعندي كلب اشوفن قيصر ثاني واعيش بعذاب ثاني

ايدة على صدرة وجر حسرة طويلة تذكر قيصر صارلة هواي مامتصل ومن يتصلون بي مايتحصل
بقة يسولف بي مهموم
من ينجاب طاري قيصر احس لدمعة تريد تطفر من عينة وكوة يداريها

عدت ايام صاحب فدعم صار زين
راحولة للبيت جدو اخذلة طلي فشلان شما يسوي يحس روحة مقصر
ويطب ويطلع يلوم بفدعم ويكول من ورا  صوبت معيلهم لوحيد يافشلتي  من امه واخياتة .

طاب لولد وتحسن بس فدعم مارجع للبيت بقة يبات بلمركز
ذبو مواد لبناء برة وتعاونون لولد بنو طالب يعرف وهمة ساعدو ٣ ايام كومو المشتمل للسقف وراها بقت النواعم سبوع تقريبا كملو كلشي خلولها بي اغراضها وشغلات اخذت من لمطبخ
عدت ايام سللامة تجي وكت الغدا تطبخ وتكمل بيبي كامت تكللنا خل نتغدة بلمطبخ علمود حمزة لأن يبقة يسأل بأمة ليش مناكل وياهم بلصالة وكت لغدة محد اكو بس جدو وعمو رحيل لولد كلهم بلشغل
نتغدا احنة بلمطبخ وهمة بلأستقبال نصبلهم
جدو علاقتة بنعناعة تغيرت مومثل قبل يباوع لحلكها كأنما ديعاقبها جان
وهية هم شوكتها نكسرت مو مثل قبل خصوصا
خسرت لجندي مالها الجانت تجندة ضد لبيت وتستخدمها لغاياتها
سللامة مالها شغل بشي صوتها لجان صداح نصة
تحاول تخدم الزغير والجبير
كشمش تكلي هاي لوكية تريد بهلسوالف تبين لغضنفر انو هي المطيعة وانتي الي تنترين وتوكفين بوجها
خاطر يرجع ويدها
ابقة اضحك وانطيها على مايها
فدعم كام يجي للبيت بس تغير هواااي
جان بلأسبوع مرتين او ٣ كلش كلش يجي شارب
صار يومية يجي شارب منتهي ميشوف دربة
صارو الولد همة يريوحون يجيبو تعبر ال١٢روهوة ماكو
جانو قبل يهددو بتهاني هاي نقطة ضعفة الوحيدة
هسة راحت تهاني صار قوي ماالة شي يهددو بي
لا يفيد حجي ولايفيد صياح لايفيد تهديد ولايفيد ضرب جدو وصل مرحلة الجزع
ورة فترة وصلنة خبر تهاني منطيها لأبن عمها لجان رايدها بس ماعاقدين بس خطبة
من يومها ماكعد ويانة على سفرة وحدة
من يومها ماكعد بلمة اهل
من يومها مارجع فدعم القديم
لكل متأذي علي ماتت ضحكتة فدعم لجان يتلاوة وية الزعاطيط ويتماطل وية زوري ويومية يشوف لباس حبوبتة يالون يلله يروح للشغل ويسويلها زفة لباب لحوش يغني بلون لباسها وهية ورا بلنعال
صار جدي كللللش
شقا سوالفة روحة المرحة كلشي حلو بي ماات
محد جان متخيل انو حجم لأذى لنفسي راح يكون بهلقدر
جدو كد مامقهور علي كام هوة يروحلة للبزل يومية ويجيبة بليل يدخلة لغرفتة ويغطي
الشرب لجان شغلهم الشاغل صار شي عادي عدهم
ليقهر ويأذي انو ماجان يحجي ولا يشكي
بس حالة جان يرسل الهم رسائل تبين حجم الأذى والخراب الي لحق بروحة
راح هوة وجدو وعمامهم ولولد طاح على رجل عمتة وستار  اعتذر من عدهم واجة
ورة مدة تهاني عقدت
ضمو عنة لخبر وكلهم يحرصون ويوصون بلجهال والجوارين
ليلتها رجع شارب وتخربط وكام يزوع دم
اخذة غضنفر للمستشفى رجع بات يمة بلغرفة
صبحية جان مهموم حييل
سألتة علي
كلي طلع واكف بركن بيتهم من طبت مشية عمامها وشايف كلشي
ورة مدة رحت سويت سونار اني وبسعاد اخذنا صميدع وطلع الجنس ذكر وهي بنية رجعنة ثنينا فرحانات وراضيات على عطاء رب العالمين
بيومها شفت بعيون غضنفر فرحة كأنما اول مرة يخلف
من بديت اثكل نزلت اغراضي وملابسي بغرفة سللامة
سللامة طول هلفترة عاقلة ومحترمة نفسها
احسها فرحانة ببيتها تحتار شلون ترتب بي وكلما نطلغ للسوك توصي على غراض
سوتلها حديقة برة وتزرع بيها اشكال لورد
تجي يمها قسمة بت عمو اسماعيل يومية لعصر لو هي تروح يمها صارن صديقات
وهي تجي تخوط لبيت خوط يومية لاتخليني ولاتخلي بسعاد نكيس شي
بديت احس لبيت كلة صار يطمإن الها

متمددة بغرفتي بطني جبيرة مومثل منة هلمرة من الشهر السادس بينت 
لجو حار فاتحة مبردة ومكيف واحس مختنكة
بيدي كتاب اقرا بي ودك لباب علية فدعم
لبست حجابي وفتحتها بيدة رسالة نطاها الي
وكال من اهلج
رجعت لمكاني ادية ترجف شككت لضرف الي عاند مينفتح
لزمت لرسالة اقرة بيها ودموعي تتجارة عد ثاني سطر وكفت حسيت لكاع فترت بية ........

بلقيس واكفة بلحمام وحسيت دم نزل علية
رغم مصارلي اسببوعين من نضفت من الشهرية
وبقيت ١٥ يوم يلله نضفت
ورة فترة اجوي نوفل وزوجتة
وفهمنة سبب تأخرهم
لبنية جانت حامل وحملها مهدد بلأسقاط ولشيلة متعبة ماجليها بينما شوية يستقر حملها
طول هلفترة جنت اسعا بنقلي الى ان كمل هلكت
زوجة نوفل بنية حبابة ماالها شغل باحد
بس عيبها متشتغل اي شي بلبيت
امي تعذرها تكلي تخاف على نفسها وحملها
حصلت نقلي بس بمنطقة بعيدة حيل
نوفل سيارتة خلا لسويج يمي من هوة ملتحق اروح وارجع بيها ومن هوة موجود يوصلني هوة
زوجتة رجلها على رجلة من يوصلني
بديت احسها تغار علي مني
مااخذت لموضوع بجدية بس حاولت ابتعد عنة قدر لأمكان حتة لتصير مشاكل لأن ماعاولت اخلص
طول ماهوة برة غرفتة اختل بغرفتي
لنوفل بطبيعتة اريحي ويتشاقة فكاهي وعشري
بس هية عدها نوع من النحاسة وشوفة النفس
رغم هذا مااعندي وياها شي ولا صاير بينا اي حزازية لكوني اتجنب كلشي يخلق مشاكل
عدت مدة اني كل فترة تنزل علية لشهرية ابقة اكثر من ١٥ يوم يلله انضف تعبت من هاي الحالة
يوم خميس رحت لدكتورة وية رواء زوجة نوفل عدها مراجعة ورحت وياها
دخلنة سوة
سوولها سونار وجيكو وضعها كلتلها ماعندج شي
حجيتلها على وضعي
كلتلي صعدي على لسدية
خلت السونار على بطني وبدت تحرك
بي
عاينت الي وضحكت وكالت
ماما انتي حامل وطفلج جبير معقولة ماتحرك لحد هسة

فتحت عيوني بذهول
دكتورة شدتحجين صارلي اكثر من ٣ اشهر زعلانة عد اهلي ولا شايفة زوجي ولا شايفني

ماما شنو تجذبين عيوني هذا طفل كامل وجبير
رجعتني علسدية وخلت لسونار
شفتة
رجلي وراسة وجسمة
بقيت مصدومة ودموعي تجري
منين اجاني هذا ياربي
دكتورة فدوة لعينج عدلي بدلي
شرحت الها حالتي وبينت الها ان اني جنت طارحة ووة ماطرحت زوجي ماتقرب الي لان قبل ماانضف اجيت لبييت اهلي وصارلي اكثر من ٣ اشهر مبتعدة عنة

اخذتلها صفنة بوجهي وكالت
اهاااا معناها جنتي حامل بتوم وسقط واحد ولثاني بقة متشبث بلحياة وهذا يفسر لصار وياج
لأن مالها تفسير ثاني

شحجي وشكول منو يصدك

ماما عمر طفلج يثبت انو حملج صار من جنتي عد زوجج وهذا لسونار يثبت انو تاريخ لحمل هذا هوة نفسة تاريخ حملج بلطفل الي سقطتي ليش خايفة

اخذت ورقة لسونار،من ايدها وطلعت
جنس الطفل ولد
لطريق كلة دموعي تجري
وصيت رواء متحجي لأمي
اخاف تلح علية وتخليني ارجعلة

دخلت للغرفة من القهر نمت على وجهي
وعيت على دكة لباب وصوت امي.......يتبع
مساء الخير حبايبي