#خنجر_الغضنفر
#بارت_٣٨
#حنين_حاتم
قيصر....
صمت ساد كلبي احسة دخل بنوبة
اذاني وشة بيها كلشي مضطرب
صوت القاضي يعلن عن وقوعي ضحية طيبة قلبي وصفاء نيتي
كان الحكم مخفف وإستثنائي لكن ضالم الي لكوني بريء
نحكم علية بدخول مصح نفسي لمدة يعينها الطبيب المختص بشرط بحسب التقرير الطبي الي عين حالتي كمريض إكتئاب في مراحل متقدمة من المرض
ودفع غرامة مالية لهيفاء كتعويض عن الضرر الي سببتة الها وكانت الغرامة مبلغ مالي ما املك ربعة وبعد ميكتبلي الدكتور الخروج بمدة ممعروفة شكد قد تكون شهر وقد تكون سنة
بعد خروجي يحق لهيفاء إما طلب التفريق عني أو الأستمرار في العلاقة ولكن يبقى علية علامة اكس بنضرهم
والي فهمتة انو التقرير الطبي كان معين حالتها
كدمات بأغلب اجزاء جسمها وفسخ ورضوض بلحوض وخياطين براسها وضربة بعينها مسببتلها اذى بشبكية العين
الألم الي حسيتة واني اسمع حكم القاضي
ماعشتة ولاراح اعيشة بعمري
الصدمة جانت سيدة الموقف
الصدمة بلناس الي امنت الهم
التفكير الي اكل قطعة من مخي
ياترى شنو علاقة اسعد بيها اذا ماجان ابن عمها
منو الي ضربها كل هذا الضرب
شوكت لحكو يألفون هذا الفلم وشوكت ضربها اذا هي مقدمة البلاغ ورة ماوكعت بلشقة بساعتين
بساعتين خططو وكتلوها وسببولها كل هلأذى
بساعتين حضرو واتفقو وية الجوارين واكيد نطوهم شي بلمقابل
بساعتين خفو كل دليل وكأن شيء لم يكن
بساعتين جهزو قضية رابحة من كل النواحي
معقولة ذولة ناس عاديين مثلنا
معقولة كمية الشر والمكر والدهاء الي عدهم اكو نضيرة
طلعوني من المحكمة مذهول من وضعي
هربت لآخر الدنيا من السجن وتالي لحكني لهنا
ضلم بضلم
لساهة غصة ضلم امي بصدري
لساهة غصة ضلمي لبلقيس
وإكتملت هسة
تم نقلي لمصح نفسي
بليلتها اجاني ياسر وصيتة يتصل بأهلي يبلغهم انو اني مسافر بشغل ويطلب منهم يدزولي فلوس الغرامة وباقي اتعاب المحامي
جان يهدء بية ويكلي الإستثناء الي حصلتة يستحق انو تفرح ليش ضايج كلها شهر او شهرين ويطلعوك.
انت كلشي مابيك
هزيت راسي اطمنة راح وهوة يودعني ويوعدني بزيارة بمجرد ماينقلوني
الي ادري بي ماجنت بخير
فور نقلي تمركزت بزاوية بنهاية الحديقة وكعدت لوحدي صوت اقدام الناس الي تتمشى جنت احسة ينرفزني ويدفعني للصراخ
شنو الي سويتة بنفسي
ويامن ورطت روحي
ليش مااجة ببالي ولو لحضة انو اشك بيهم
ليش من شكيت من تغيرها ماحاولت اراقبها
صفنت احاول الكى مبرر للي جنت اسوي
انتها بية المطاف واني ابرر لنفسي
وراجعت افعالي إكتشفت انو اني جنت اقحم نفسي بعلاقاتي وياهم أبحث عن لمة عائلة احاول اشغل نفسي بيهم احاول ارتب فوضى حياتهم بلكي هلشي يشغلني عن الفوضى الي تارسة صدري من يوم الي جبروني اعوفها وتركتها تواجه مصير مجهول بعد ماورطتها ونلعب بأحوالها ونحجة بشرفها من وراي
من يوم الي نحكم علية مااشوف بلدي الى اجل غير مسمى
من يوم الي نحكم علية مااشم ريحة شيلة جدتي ولااشوف شيبة جدي
من يوم الي نحرمت من عضيدي وشوفة ولد عمومتي ولمتنا شقانة وضحكنة
صحباني
صوتي رجلي ام مهودر حق امي
كلشي كلشي نتزع مني مثل ماتنتزع الرشاشة من الجندي الأسير
الي ادري بي جنت انسان طبيعي مااعاني من اي امراض نفسية
عدى اضطراب الهلع من الأماكن المغلقة وتعالجت منة
اما حاليا إستجدت عندي امور
يمكن حجم الصدمات الي تعرضت الة جان المسبب لهلشي
بعدني ممتقبل صدمتي بهيفاء واسعد واجاني الحكم
ضربتين بلراس توجع
عدة مدة على تواجدي
احس نفسي ضايع
صرت عنيف اطلع قهر كلبي بكل الي داير مادايري اضرب اتعارك على اسباب تافهة اخلق مشاكل
عقلي الراجح وين راح
اني الي صرت اتمالخ علمود جكارة
بديت احس المكان يزيد تعبي ويأذيني يخنكني هوة والبي
هلمكان يخليني اقارن وين جنت ووين صرت
اني قيصر المعلم الفاضل مدير المدرسة واصغر مدير بتاريخ المدرسة الي من امشي بلشارع اشوف احترام الأهالي قبل الطلاب
وين صفيت
ولياحال وصلت
كل نهاية اسبوع جانت عندي جلسة يم الطبيب المتخصص يجيني للمكان
بثالث جية الة توسلتلة ان يكتبلي الخروج
شرحتلة انو المقارنات تقتلني وتدفعني للجنون وتزيد حالتي سوء
شرحتلة انو النوبات بدت تزيد عندي
مااذكر شلون كان الكلام يطلع مني بس الي اذكرة مرتين وكفت على حيلي وصرخت بوجه الطبيب لدرجة انه خلا اصابعة بأذانة
نادى على احد الممرضين المسؤلين عن القاعة مالتنا
بقيت برة كاعد
جان يسولف ويا ويسألة عن مستجدات حالتي
والولد يشرحلة انو يوم عن يوم حالتي تسوء وازيد عنف وافتعال للمشاكل
وعدت مدة اني على هلحال صرت مدمن مهدئات
عصبي على طول
افتعل المشاكل من لاشيء
جنت احجي للطبيب عن الي سوو بية هيفاء واسعد وهادي من يوم جنة بلأردن الى ان اجينة لهنا وصار الي صار وشفت كلشي بعيني
جنت اطلب منة يطلعني منا حتة اكدر اثبت خيانتها
حتة اثأر النفسي
وارجع كرامتي واعتباري
حتة اكدر اوكف مرة ثانية كدام المراية
حتة اخلص من الملامة
جان يشرحلي ويفهمني انو الخروج ابدا مو من صالحي لكوني بعدني تحت تأثير الصدمة الي تعرضت الها
وكل الي يطلع مني من افعال هي رد فعل على الي تعرضت الة من مكيدة وملعوب اي انسان بمكاني ينهار ويتعب كدام هيج صدمات
جان ينصحني بلصبر ويشدد ويصر على انو الي سوو هي خطة محبوكة وليست مجرد مصادفات ادت الى هذه النتيجة ويكلي خلي البعد وسيلة للتفكير اتخذ من عزلتك وقت للتخطيط مثل ماهمة خططو وحاول تجد خطة للأطاحة بيهم
جنت اهدء بكلامة واكعد افكر انعزل ايام اكون هادء ماالي شغل بأحد لااتعارك لا اسوي مشاكل
الى ان يبطل سحر كلماتة علية بمرور لوقت
ويرجع يخدرني من جديد
يرجع يشحني ويحثني على ان احاول اكون اذكى منهم واحاربهم بنفس طرقهم
بلتخطيط والتكتيك ولأبتعاد عن التسرع والغضب وافتعال المشاكل الي ممكن تضرني ومضرهم
وارجع بشحنة امل جديدة منة ارجع افكر شلون اكشف حقيقتهم واكدر اثبت انو اني نحكن علية ضلنم اكدر ابتص لعقلي الي وهمو ووصلو للجنون الى ان اتعب وانام من تعب التفكير
وبمرة من المرات جانت وقت الجلسة الخاصة بية
كعدت على كراسي موجودات بباب الغرفة الي يجي بيها الطبيب جوة جان اكو يمة طبيب ثاني
بقيت كاعد واستمع الهم جانو يحجون عن مريض بنفس القاعة الي اني بيها
ووراها حسيت الكلام تحول الي
سمعت اسمي اكثر من مرة
وكفت بذهول استمع لأخر جملة كالها
حسيت اصابني شلل حسيت الغضب نار وتطلع من عيوني تلفتت ادور على شي اضرب بي
هاي صارت عادتي
على لميز يم الولد الي ينضم دخولنا جان اكو كابسة اوراق حجم جبير
سحبتها بكل قوتي ودخلت واني استمع الة وهوة يشرح للطبيب الثاني ويكلة ........
بلقيس ...
فتحت لباب واني استمع لصوتها بعصبية وإنفعال تطلب مني افتح لباب
دفعتني ودخلت كعدت على الجرباية
تضرب ايد بأيد وتكلي
ضامة علية طايحة الحض
_شضامة
_تغشمين نفسج عود متدرين
ولج هذا شي ينضم من غير كلشي المصايب تطلعلنة بلحض يانصيب
تردين تجيبين ويكولون نغللل
تردين تجيبين اجلج واجل لطفل
_لعد ترديني اكلة ويجي يرجعني وترجع امة تحطني وتكتلني وتوكع لطفل
_لا هاي ولا هاي نشوف حل وسط
تضمين عني موحل
عقلج وين بلقيس حاجيني يعني لوما اسمع رواء تحاجي نوفل وتسولف الة وتوصي ميجيبلي طاري بطلب منج
اني ابقة مثل اطرش بلزفة
عرفتها متعمدة تسمع امي
لو اعرف حامل ماجان رحت وياها
طلعت برة اريد اعاتبها لكيتها كاعدة يم التلفزيون تكرز حب بطنها كلش جبيرة ولا عبالك بلثامن
تقربت الها احجي وياها مقهورة من تصرفها
_عود اني وصيتج صدك جذب بيت زغير ولصوت بي مسموع ترحين كبل تحجين لنوفل وامي سمعت كلشي
_والله يابلقيس انتي فد وحدة بطرانة ورافسة نعمتج رجلج يكولون يحبج ورغم لعبتي جقة وشبر اخذج وهوة لممنون بيت وحدج وحامل ووضيفة وراتب شنو الي تردي بعد
هاي اني دكيت ونحت ردت اتوضف ماخلاني
ردت من الله حمل حالي حال لنسوان كوة صار سنتين اراجع ذيت لكدامي ولورلي وهوة يكوم ويكعد يهدد بية اتزوج واتزوج
اشو انتي من ليلتج حبلانة
ردت بيت وحدي محد قبل تالي عود تكرمو علينة كعدنا وياكم
ادري تطلبين الله بطلابة رجعي لرجلج تردين تتطلكين وتضلين هنا شنو معناتها
_حاسدتني على عيشتي
ادعيلج بكل صلاة تشوفين الي اني شفتة وتعيشين مثل عيشتي
انتي مامسؤلة عني اكعد هنا ارجع لرجلي اني حرة نفسي ومحد الة حكم علية غير امي الي ربتني
انتي هنا خطار فرجائا احترمي نفسج ولتتجاوزين حدودج ماطول النفس طيبة
_ياااا عشتو تعيريني بكعدتنا يمكم
تعال اسمع نوفل بت عمتك شتكول طلعنة خطار عيني
نودي ونجيب وننكل مسواك وكل هذا واحنة خطار
_صوتج لتعلي مالة داعي هلحركات تفهمين قصدي من الكلام الي كلتة فلتحورين لسالفة شغلة نسوان بيني وبينج تحطين نوفل بلنص شكووو
واني احجي اجة نوفل يسأل شكو
_ماكو شي خوية سالفة بيني وبينها
_لاعيني ليش ضميتي راسج احجي خلي يسمع
بت عمتك تكلي انتو خطار ولتعبرين حدودج ترديني ابقة محبوسة بلغرفة هاي حدودي
هذا العزال الي وعدتني بي يتيمة ومغلوب على امري صبرت وياك على لحلوة ولمرة تالي هيج انهان كدامك مذلولة حتة بللكمة الي اكلها وساكتة
حقهم عيني حقهم جبتني وكعدتني ببيتهن بدون رضاتهن اكيد شلون ميعتبرني خطار
مذهولة وصافنة عليها بساع نزلن دموعها وتتحايل
واني دموعي ماينزلن واني بأصعب ضروفي اكول ماارخص دموعي ولا اخلي بشر يشوفهن
طلعت الناس بلدموع والحيلة تاخذ حكها مربع
لحكها للغرفة اسمعة يراضي بيها ويكللها مالج شغل بيها هاي يومين ومولية لرجلها محد راضي على الي جاي تسوي وابوي ساكت الها كال خل ترتاح مدة وكت ونتصل برجلها يجي ياخذها ماعدها اي سبب قوي يستوجب الطلاك
والنوب حامل
رحت عليهم ضربت لباب حييل
طلعت امي من الحمام ثوبها بلمكلوب وشعرها بي شامبو
نترت بية ولج شدتسوين
شبيها رواء جوة واسمع بجيها
تجاهلت كلامها ورجعت دكيت لباب حيل
مخنوكة اخلص من ام زياد الكة نسختها كدامي
فتحها نوفل
_ها بلقيس هاي دكة بلله شنو موتة احنة وهيج تدكين لباب
_شوف نوفل كعدتكم يمنة لامضايقتنا ولا متعاجزين منكم بلعكس امان النة وعونة على هلدنية الصعبة
واحنة مرتاحين لوجودكم يمنة تردون لحس على امي
وكل الكالتة رواء هوة مجرد تخيلات من راسها
انت اخوي ولبيت بيتك احنة نطلع برة وانت وزوجتك تبقون
كلما بلموضوع اني سريتها سر وكلتلها لتحجين لأي احد
مجرد مارجعنة سولفت الك
ومتأكدة تعمدت تحجي بصوت عالي تسمع امي
لأن صوتكم بغرفتكم ابد منسمعة حتلو نكعد بلصالة وامي متتسنط وتتسمع عليكم
ندار عليها يسأل بيها يا سر هذا
سر حملي
اول مرجعنة حجت الك
يعاين الها مصدوم رجع ندار علية
بس ترة هي ماحجتلي اني شفت اوراق لسونار واحد بأسمج واحد بأسمها بلمجر
من رجعتو انتو اني نايم وهسة فزيت على صوتجن
نداريت على امي متفاجأة
_لعد ماما منين جبتي هذا الحجي
_وروح ابو بلقيس واكفة على الميز اكوي وسمعتها بصوت عالي كأنما تحاجي نوفل وتكلة بلقيس حامل بس لتكول لعمتك لأن هي طلبت مني محد يدري
ندار عليها نوفل ينتضر تبرير تحججت بلتلفون وكالت جنت احجي ويا اهلي وسالفة جرت سالفة
ندار علينا وكال لأمي
عمة من رخصتج ممكن تعوفونا لوحدنا
طلعنة اني وامي
شوية وسمعنة صوت صرختها
بقة يضرب بيها وهي تصرخ
امي واكفة يم لباب وتلوم بية تكلي كلة من ورة سوالفج
دكت لباب على شكم مرة مقفولة بقت تحاجي من ورة لباب عمة مرتك حامل اكسر لشر تعوذ لشيطان ماصار شي موقصدها
صوتها جوة يرد على امي
طلكيها لبتج طلكيها وخل تبقة هنا تدبكَ لنوفل بلكي ياخذها
وترجع على نوفل بصوت عالي تصرخ ولك اني موشكاكة بس انت سوالفك تثير لريبة
غافي وتسولف بأسمها
الله فضحك يا عيونجييييي
صوتة يصرخ بيها سكتي بت الكلب مريضة منين تجيبين هذا الحجي صووووووووووووووووووتج
امي ايدها لجانت تدك علباب وحلكها يرجف وتتوسل الة تكلة عوفها وكفن بصدمة وذهول
ندارت علية حيل صفكت على وجها
صخام الصخمج بلقيس راح يموتها للبنية
راح ينهجم بيتة من وراااااج
بس دموعي تنز وترد عليها
شنو لسويتة اني وشنو ذنبي اذا هوة عينة زايغة
طبيت للغرفة مصدومة
نوفل ماشفت منة كلشي من يوم الي اجو يمنة
لا تجاوز حدودة وياي بحجاية ولابنضرة لافد يوم لمح لهيجي شي ابد ماشكيت للحضة تعاملة وياي اخت واخوها ومن يوم الي حسيت عليها كامت تغار بتعدت هواي وحتة هوة من شافني بتعدت صار يتجبجب مني وقلل شقا جان يصيحني من يطلع فيلم يوم الخميس اتابع وياهم بلصالة وراها من شافني بتعدت بطل حتة يصيح اسمي
نزيت على صوت امي تصرخ بية
كومي وياي خل نكسر لباب راح تموت لبنية بين ادي هلنوب حامل
كومي وللللج
كمت وياها
من ورة لباب حاجيتة نوفل اذا ماعفتها اطلع من لبيت هسة واروح لبيت رجلي ماطول اني لسبب بكل هذا
صوتة تعالة يصرخ عليها شوفي لبنية شتحجي من وراج بت لكللللب
فتح لباب شعرة مخربط شاك قميصة عركان يلهث
هية مكرفصة ورة لجرباية ومحصورة هي وبطنها
امي دفعتة تلوم بي وركضت عليها
وخرت عن لباب
تقرب الي خجلان مدنك كال
والله ماكو اي شي من الي حجتة
هاي جذابة مريضة بلشك حجت هيج حتة تخليج تكرهيني وتخلي عمتي تكوم تخاف مني وتطردني من لبيت
واعزللها بيت وحدها
هي هذا الي تريدة وكلشي تسوي علمود اعزل الها
وروح ابوج مااكو اي شي من الي حجتة ومااشوفج غير اختي لزغيرة
اني مو بلا غيرة حتة اباوع على مرة متزوجة وحامل
ولا ابن حرام حتة اخون الزاد الي اكلتة ببيتكم
كافي خوية لاتحلف توضحت لصورة
اني عندي خبرة وية دهاء النسوان عمتي سوت بية لأتعس
عفتة ورحت لغرفتي
اسمع صوت امي تتوسل بيها خالة كسري لشر هذا بيتج واحنة الي نطلع منة
عصبي وساعة شيطان وهسة اخلي يعتذر منج بلقيس متبقة هيج اشوفلها صورة حل لورجلها يجي هنا يعيش ويانا لو يأجرلها قريب يمنا
مااعرف شنو ترد عليها تونون وتحجي بصوت ناصي
صوت لباب نفتحت ونسدت
مديت راسي محد منهم
طلعت بلصالة بلأستقبال غرفتها كلهن فارغات
طبيت بلغرفة نمت وعيت بليل على صوت امي تفتح وتسد بلكنتور
اني وياها ننام بنفس لغرفة لأن غرفتها نطتها الهم
وبيتنة زغير إستقبال وصالة غرفتين وصحيات ومطبخ طارمة زغيرة وحديقة خارجية ٢٠٠ متر مفتوحة مامسيجة لمفروض بستان وبوقت ماجان بابا عايش زرع بي وجان يعتني بي من مات وطشينة رجعنة لكينة شكم شجرة عايشة جوارينة جان يفتح الهن ماي
بس لزرع اغلبة ميت ولمثمر مبيوك مباقي شي منة
رفعت راسي سألتها
شدتسوين ماما
_ادور للبنية وصل منريدهن اسويهن حضاين
_حضاين الممن
_غير واحنة بلطريق نزفت وكامت تطلك بوجهنا اخذناها للمستشفى وهسة دخلوها صالة لولادة
سودة بوجهي بسلا يموت ثميني
شيخلصنا بعد
كبل يذبوها براسنا
_شعلينا احنة هي تخبلت كامت تنفخ بسمها خلت لولد تخبل عليها اجة يتعذر مني وجهة هلكدوتة بس عوزة يبجي من فشلتة من حجيها الي متأكدة جذب بجذب
اني اعوف ام زياد هناك اجي الكاها كدامي
_انتي يايمة شكو رحتي وحاجيتيها لو كاعدة ومنجبة ومجفيتنا لشر فتحتي علينا باب عايزين احنة
هسة لوماتت أو مات لطفل ندخل بخطيتة
كلها تصيح من ورة عمتة وبتها شحننة عليها وكتلها
تدرين مجلبين بنوفل بلمستشفى جابولة لشرطة اشتكت للدكتورة علي
_ياااا عزة شلون نطاها كلبها لولد يحبها ومدللها لحضة شيطان وهي ثارتة بحجيها ليش هيج كبرتها
_هي من اخذناها شكلها وظعها موطبيعي دشداشتها مشكوكة شعرها منكوش وجها احمر من الراشديات عيونها مورمة من البجي خشمها طاك دم شحالها كبل جلبت بيها لدكتورة شبيج ومنو وياج هي خرطت لأول ولتالي
وهوة سودة علية واكف برة ميت خوف عليها
مرتين ركع راسة بلحايط والزمة
كلي خابري على اهلها كتلة خاف يجون ويكبروها من يعرفون ضاربها
بقيت صافنة عليها متفاجأة رغم محتالة وجذابة وطعنت بزوجها وتهمتة تهمة باطلة مع هذا اخذت حقها وماسكتت
اخذت شكم ثوب شككتهن سوتهن حضاين وراحت
جلبت بيها كلتلها
_ خل اجي وياج
_كعدي وإسكتي شايفة لنسوان جوة صراخهن لراس لشارع وانتي حامل مخبلة ادري بيج اذا تشوفيهن تنرعصين علية
طلعت وعافتني بقلق
من خوفي وقلة حيلتي بقيت الوم بروحي ليش عاتبتها وفتحت الموظوع وياها
للفجر هي بلمستشفى
طلع لصبح وهمة ماكو بقيت بقلق عليهم
ساعة بل١٠ لصبح ندكت لباب
فتحتها دفعتها امي ودخلت مرعوبة كالتلي جيبيلي جنسية نوفل من كنتورة ماربية انزع حذائي
_اي دحاجيني جابت لاء للصلح كاعدة واندعيلها
_اي جابت عملية بس لطفل موزين شارب مي لراس ومختنك خلو بلخدج والله اعلم يعيش يموت
_نوفل وين
_اخذو للمركز ورة ماوقع على العملية ابوها واخوها احو حامين تخبلو عليها
خالج راحلة للمركز وهسة متانيني برة يسجلون البيان وحتة ياخذ هويتة للمركز يردوها
سحبتها من ايدي بساع وطلعت
لليل يلله طلعو نوفل رجعو هوة وامي
ورواء رايحة لبيت اهلها
دخل لغرفتة مهموم راحت امي يمة بقت تسولف ويا وتهون علي
يوم ثاني اخذ ملابسة ورجع لبيت اهلة
امي قفلت غرفتهم
نفس ليوم اتصل خالو محمد يرزل ويتعارك ويكل لأمي اني موكتلج هاي بتج متكعد راحة
جان ماتت مرت نوفل وابنها من وراها
هاي بتج مترهم بلا رجل تهجم بيوت عميي
بقة يحجي براس امي ويكللها تواصلي وية رجلها وكليلة خل يجي يرجعها
امي ماحجت شي نطتة على ماية
سدت لتلفون ماحجت شي
احسها قلقة على مرت نوفل وخجلانة منة
عدن شكم يوم دز امة وابو وامي راحت وياهم عليها
شافوها ونطوها مصرف
شالو خياطها و ورة لأربعين هم راح هوة وامة وابو واخذو امي علأساس يرجعوها ماقبلت ترجع
لطفل تحسن واكتمل وطلعو من المستشفى
كل هذا امي مخبوصة وياهم احسها ناسيتني
طبيت بشهر لسادس بدت بطني تكبر وتبين
هنا امي بدت تلح تكلي خل نتصل بيهم نكللهم مترهم
ميصير
خلت خالو احمد واسطة بيننا وبينهم
راح الهم للبيت وبلغهم وشرح الهم الكلام الي فهمتة الي لدكتور بعد.ماعدت وسقلت حتة يعرف يفهمهم
ثاني يوم اجانة
بقة يسولف وية امي كلما اسألة على السالفة يغير ميجاوبني ويفتح مواضيع وية امي
الى ان امي حست علية توترت ردت انفجر
كلتلة احمد احجي شصار ترة بلقيس كاعدة على نار من البارحة
عاين الها والي وكال............
انعام .......
لزمت لرسالة اقرة بيها ودموعي تتجارة عد ثاني سطر وكفت حسيت لكاع فترت بية
عد جملة تربعت بلكاع
حرفيا جان مكتوب انعام راح تخبليني بكل رسالة اكتبلج امي ماتت ودفنناها صار اكثر من ٣ اشهر
ترجعين تكتبيلي ليش امي متجاوب متتحصل
امي بلكبر انعام وين تتحصل بعد
وخالتي من وفاتها شالت وتركت لولاية كلها
اني فسخت وراح ننخطب اني ومنصور
تعبانة انعام
ندعيلي ترجعلي عافيتي واكدر اكمل دراستي وارفع راسها
محد بقالي كلكم عفتوني
بابا ماما انتي
لوحدي صفيت
منصور نقهر على حالي رغم جان كارهني وحلف يمين حتلو افسخ ميرجعلي ويريدني بعد
ندعيلها بلرحمة مارتاحت من يوم طلعتي
هي تهم بينا وتفكر
صح متبين النة غير الجحود والقساوة
بس جانت تحاول تبني من عدنا نساء قويات قادرات على مواجهة مصاعب الحياة
وان شاء الله نكون كد تعبها ونجازي بلدعاء والذكر
ندعيلها جانت امنيتها تلتقي بيج
تنام وتكعد تصيح انعام مامرتاحة
انعام بزر دلال وين بيها على عيشتهم
هذا الي قريتة قبل مااوكع بلكاع
فزيت على كشمش شايلة منة وتضرب على وجهي ذبت علية ماي من دولة لشرب
فزيت على حيلي مثل لمخبلة سحبت منة من عدها
حيل لصدري حضنتها وصرت اصرخ
صوتي مكتوم بنحرها الي دفنت بي وجهي
كشمش سحبتها مني حيل وخضتني
_خايبة شمالج راخ تخبلين لطفلة شني هلبجي نززتيها هي مخروعة لكيتها بلكاع طايحة من الجرباية
شمالج انتي ومن شوكت طايحة
بلقيس طبت وراها تسأل شبيج
تلفتت ادور على الورقة
لكيتها يم رجل لجرباية خليتها بيدها
مجرد ماقرتها فتحت لباب وطلعت صاحت عليهن وكالت الهن
وهنة برة بديت اسمع صوت صريخهن
كابلتني بيبي شكرية وام فدعم شكت ثوبها وحيل تصرخ
ولج حبيبا ام انعام شموتج خييية
خليتي نعيمة لوحدها
ونغيمة لزغيرونة عدمن امنتيها بديرة اليهود
حرفيا جنت متصنمة
غير لوعندي عقل يستوعب القريتة
اشهر الها ميتة واني ماادري
معناها جان يضم الرسائل عني
يدري وماكلي
يدري وضم علية
بقن يمي دكن ولطمن وبجن ونعاوي تبجي لصخر حتة سللامة وياهن
مانزلت من عيني دمعة
اخر ذكرى بقتلها مني واني اعصيها واسافر واتزوج بدون علمها
منو غسلج منو وكف على جنازتج لارجل لاولد لابتج لجبيرة
روحج من حامت حوالين القبر قبل ميدفنوج هم سألت علية هم دورتني بينهم
كاعدة بلنص متكرفصة فكري شارد بعيد
سافر عبر لسنين يحصد اكثر ذكرى مؤلمة ويحطها كدامي
سمعت صوتة رجع
طفرت على حيلي ركضت
لبنات وراي صاحن انعام على كيفج راح توكعين
ركضت اخر ليبرة بلحديقة جان اخر خطوتين بلعتبة مال المطبخ على وجهي وكعت
ادين فدعم تلاقفتني من لكاع كومني لازم وجهي من فكي ويتفقد بخشمي الي نزلت منة قطرات دم ويسأل شمالج خوية شجاج على كيفج موهيج
دفعت ايدة ورحت علي جان بلمطبخ شال دشداشتة وبشبخات جبيرة تقرب الي يلوم
يريد يلزمني حيل دفعتة من صدرة وصرخت بي
اشهر صارلها ميتة واني مااادرييييييي
شوكت جنت ناوي تكلي شوكتتت
من تدور سنتها
ليييش ليييش امي ميتة واني اخر من يعلم الله يرضالك
جان يحاول يسحبني لصدرة واني ادفع بي
فقدت اذكر كد مادفعت وصرخت وضربت
خلة ايدة على صدرة وبصوت ناصي همسلي
كافي انعام ضلعي بعد مااحس بي
بلكاع كعدت وصرت اصرخ والطم
ماعرف شوكت وكع حجابي مني ولا اذكر شوكت شكيت ثوبي وصرت اضرب على صدري بكل قوتي واصرخ
يمة من طبيتي لكبر اني شجنت اسوي
اضحك اسولف عايشة يومي عادي
وعيت علي من جر شماغة وعلى راسي خلا
وحيل بكل قوتة سحبني
قيد حركتي
للغرفة دخلني
سحبني لصدرة صوتي ختنك بي
يم راسي يهمس والله موش قصدي اضمن عليج
كلبي ماينطيني اشوف دموعج
انة ذني موعج اغلة من حياتي
انة ابعد الحزن عنج ايا كان وبأي وسيلة كانت
انتي فرحتي
انة ماعرفت لفرح غير من عرفتج
لو حزنتي انة منيلي فرحة بعد
لاتبجين انة امج واهلج كلهم
لاتكولين ماعندي ام انة اصيرلج اممم
بلكاع كعدت وصرت ابجي نتجيت وتمددت بلكاع
شال راسي خلا على رجلة
بقة يهمس يم راسي
وحك الله يومية اقرر احجيلج بس مااكدر
كلبي مايطيني
_بأي حق جنت تفتح رسائل اختي وتقراهن بأي حقققق
_مورسايل انة مافاتحهن
انة عرفت ميتة من لتلفون
من جنتي ببيت عمة مدينة اتصلت هي وحجيت وياها وكالتلي بس ماحجيت لأحد
ومن عدها وكمت اضم لرسايل عنج بس ماقاريهن وحك الله لضرف مافتحتة
مر علية ليوم ماادري بروحي لااكلت ولاشربت منة ماادري بيها وين
ايام عدت علية ذبلت بيهن
لقاهرني ماتت بلية مااشوف وجهها
ندفنت بديرة الغرب
حتة كبرها مويمي واروح احاجيها واشكي نار كلبي
حتة صوتها ماسامعتة من اشهر
ملتهية بمصايبي وكلما اتصل بيها متتحصل لاهية ولاخالتي
عدة اسبوع يلله بديت استوعب
طول هلمدة هوة يقلص اوقات شغلة
يهتم بمنة حتة من تفز بليل هوة يكعد الها
عدة شهر على هلشي لساني اذكرها كل يوم وابجي عليها
حتة صوتها نسيتة
نايمة بليل وحسيت علي يوعيني
فتحت عيوني
جانت بيدة صورة جبيرة لأمي مكبرها ومجومها
فوك لجرباية عكها
تقرب الي يتأسف لأن ضم علية الخبر
سحبني لصدرة حيل حضني وشمني ويهمس الي
انة اهلج يبعد اهلي
ماريد اشوف دموعج احلفج بروحها
انعام انة ماضايك لفرح
مافرحت غير بيوم تخرج قيصر وبيوم نجحت عمليتة من عفتي لدنيا واجيتيني ومن جبتي منة وبحبالتج هاي
شيبت وانة مااعرف لفرح
انتو فرحتي بهلدنية
هذا لشهر مر علية بسنييين
ليلية ابوس جفونج لوارمة واهمس يم اذانج
لاتسلبيني فرحة كلبي بحزنج هذا
غمضت فاضن عيوني
ادي مسحت دموعي وبوس اجفاني
ويم شفافي طبع بوسة وتقرب يم اذاني وهمس
انة شيبت نعيمة
خاف أمـوت
ولسه ما طايبلي خاطر
وخاف أمـوت
وجبت عمـري
شامر أحلامـي اعله باچـر
ضحكي خل تخضر بساتين روحي
ضحكي خل يطيب خاطري بشوفة سنونج
جريت نفس عميق صدري ارتفع وزفرتة
صوتة يهمس
ويلاااااااه ارحمي هلعبد الفقير
بتسمت وعيوني تلمع بسماع كلماتة
ايدة سحبتني وعلى صدرة خلاني
صوتة يهمس
كلشي منك مااريد
بس ردلي الهوة يلضامة بنحرك
ابعد
؛ازعل
جافيي
؛ تالي رد
ومن ترد ؛رد فاتحلي ذرعانك
لاتعاتب لاتلوم بس احضن
حييل احضن تلكاني افهمك
اي يلوني اي يملح حجايتي
يعكالي لراكز فوك هامتي
تعال حذاي لمني
كَطرة كَطرة إجمعني
فرهدنني ايام هجرك
ويلاااااه لمني ماي
ماي وبديني إعلى صدرك
لو أكلك تفصال فصلني
خاطر اضل ملبوس
ماارغم لغيرك
بديني وخلني اتيهن ولاتدورني
ووين ماتشتهي إشمرني
يم نحرك يم زندك عد خصرك ......حنين حاتم
لأول مرة مااحس بلي كالة
مقهورة منة
بأي حق يضم علية هيج شي
شحيت نضري عنة واخذتلي صفنة
دموعي تنزل لا إرادي
حزن تأنيب الضمير كره لنفسي لأن ماخليت الها مني ذكرى حلوة
اصبعة يداعب انفي وصوتة يهمس
هايجبلتي
ايام انة مامصلي الله يرضالج
غضنفر تعبانة ممكن تعوفني
ليش انتي ضنج انة رايد منج شي
وسفة عليج
انة اصوغ الحجي والغزل خاطر انسيج
يشيب صباي انتي
عسننا الي كون التعب
بهداي وي روحج
روحج عزيزتي ماارضا تنضر
تعبانة
يخسى التعب
افتحلج اضلوعي
طبي لكلبي ونكتي كل تعب بيج
سحبت ايدة الي تأشر على كلبي خليتها على كلبي
تسمع دكاتة
مادك طبيعي من يوم الي جابلي فدعم خبرها
ويلااااه
جا عليش ماتحجين
كومي خل اخذج للطبيب
شنهي حتة بهاي نتشابه
شنو نتشابه شنو قصدك
لاماكو شي
غضنفر احجيييي
كلبك بي شي
ماكو شي شمالج
احجييي لتخوفني
مابي يبوية مابي هوة من يشتاكلج يتعب
كلبك تعبان ياخذوك لولد للطبيب شنو متعاجز من روحك لطبيب شنو كلك
ليش متحجي تكول
عبن ادري اعرف علتة شنهي
وادري مامش دوة عد الطبيب
دواي بضحكتج
دموعي نزلت
انت منين تجيب هذا الكلام متكلي
كافي لتخليني انغر بهذا كلامك
ليش كل هذا وانتي مامغرورة
لاء طبعا
شنو مغرورة شمسوية مثلا ترة عادي عشت وياكم واخذت طبعكم لا تكبرت ولا بيوم عيبت أو انتقدت
ليش ضجتي نغري بوية يحكَلج مختلفة إعلى عباد الله مامش مثلج
وجهة صار بركبتي يشم بيها ويهمس
_حرامات كتلج على طلاكَ سللامة
جا هددتج بيها خاطر اخذ حكَي مربع
_وخر ابو الحقوق
_خاب شني حارماتنة خو صميدع مسحون كلبة لمسكين ينام بلأستقبال
راح نفتح انة ويا مؤسسة ونسميها
مؤسسة المحرومين والمسحونة كلوبهم
_وخلو سللامة المدير التنفيذي هي خبرة بلحرمان تحطلكم شعارات للمؤسسة
بقينة نضحك
صفن وتقرب الي
انة كاسر خاطري فدعم هلأيام يعرسون تهاني
جدي جاي يسعا عد معارفة يريد يحصللة نقل بغير مكان قبل عرسها
وكال بلكي احصللة نقل للبصرة خاطر هناك يم عمتة يضل
عمتي امريكا كيفت خابرها جدي يستأذن من رجلها على جية فدعم يمهم قبل مايمشي بسالفتة
كيفت تكل لجدي شفايتلي خل يجي يربيلي لفروخ موتوني
يافروخ همة غير صارو زلم
خاب لاتشوفيهم طوال ترة مابراسهم عقل كلهم زعط
جدتي هلأيام تريد تروح لبيت عمتي امريكا اذا هاي روحي وياها شوفيهم غيري جو
اي والله مشتاقين لتهاني وعمة وزوري كطعو فد كطعة
بعد لسوا فدعم شوية ابوهم يستصعب جيتهم
زوري وعمتي زعلانات على فدعم هنة مايرضن يجن
يوم ثاني رحنة لبيت عمة امريكا كل احنة
رحبت بينا هي ولبنات
جبناها سوالف محد جاب طاري سالفة فدعم
تهاني رايحة راجعة على المطبخ ماكعدت يمنا
خليت منة يم بسعاد ورحت لحكتها للمطبخ
ندارت شافتني
برطمت ونزلن دموعها
بصوت عالي صارت تشاهك
جريتها حضنتها
مثل لطفل على جتفي تشاهد ويختنك صوتها
كأنما منة على جتفي
نزلت دموعي وية دموعها
ليش هلبجي تهاني مو انتي الي طالبة منة يطلكج
ترة هوة ماجان ناوي يعوفج ومعاند
من ورة كلبي جا هوة لسوا شوية
وادري بي مسودن يسوي لأكبر منها ترد تنلم لسالفة موهينة علية لفضايح لصارت
يعني ماكرهتي مثل ماكلتيلة
غضنفر يكول هوة هاي الحجاية حازة بكلبة
ااااخ ينعيمة انة خسرتة
كشمش تقربت دموعها تجري ايدها على جتف تهاني وتحاجيها
_موبس انتي خسرتي فدعم احنة هم خسرنا
وما اضنة يرجع ذاك الأولي
بعد متفيد الملامة
عسا الله يوفقج بحياتج
ويوفقة بنسيانج
صوت بجيها تعالة
زوري طبت تهمس الها
اشششش لاتسمعين جدتي بس تدري بيج
تروح لأبوج وتتعارك ويا تدرين بيها مقهورة على فدعم والنوب تشوف حالج
مسحت دموعها ومن السنك غسلت وجهها
رجعنة بيومها كل احنة مخنوكين
من يومها بعد ماارحنة
محد الة كلب يروح
مانشتهي طبت بيتهم ونشوف دموعها والحلقة البيدها موحلقة فدعم
وهوة على سوالفة يومية يشرب
يرجع يطب للحمام يتقيء وبوجها لغرفتة
يكعد لصبح يسبح يروح لدوامة ومن لدوام يروح للبزل ومايرجع الة بليل وعلى هلمنوال هيج صارت حياتة
جدة وعمامة يحجون ويا يردون
ميفيد يهز براسة
يطلب لحجي من اذان يطلع من الثانية
غضنفر يومية اول مايرجع من شغلة يروح يمة للبزل
يبقة كاعد يمة وتالي يجيبة ويجي
يرجع مهموم اكثر من عندة
قيصر اتصل بيهم مرتين بين مدة ومدة يطلب فلوس وراها نقطع وكام صديقة يتواصل وياهم
يسالو على قيصر يكللهم عندة شغل ومسافر
غضنفر مااقتنع طول لمدة لفاتت من قبل مااكتشف حملي لحد هسة هوة بقلق علي ويكلي ماداخلة براسي سالفة مسافر بشغل
الى ان انتهى بي المطاف وهوة يطلب مني
اتواصل وية انغام واطلب منها تروح وتسأل عنة وتعرف وينة
واتصلت بيها طلبت منها
كالت راح اخلي منصور يروح يسأل عنة
ورة مدة طويلة لولد راح لمنطقتة وسال وتحرى هواي يلله حصل خبرة
اتصلت بينا وكالت قيصر محكوم بتهمة تعدي على زوجتة وحاكمين علي يدخل مصح نفسي وداخل مدة شهرين ووراها ماعرف شنو صاير ويا بلمصح ومخلي........يتبع
باجر لصبح رجعو تلكون تكملة ٥٠٠ كلمة نشرت قبل مااكمل خفت لا تطفة لكهرباء
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!