#خنجر_الغضنفر
#البارت_التاسع_والعشرون
#حنين_حاتم
بلقيس...
صوتها يهمس الي ماما انتي حامل
عيوني نفتحن بذهول وعلى ارض لمستوصف بعثرت خطوات اشبه بخطوات لمخمور وصوت امي وراي
ماعرف شلون وصلت للتكسي واجرت وامي وراي تهرول
صعدت وتحجي علية
اني ماجنت اسمع كل الي تكولة
اسمع صوت روحي لباكية وبس
لأول مرة احس بليأس لهلدرجة
لأول مرة احس انو خلص هذا لمطاف
مااكدر بعد اقاوم ولاعندي طاقة
لأول مرة اكون مستسلمة لهلدرجة
وبداخلي سؤال ينهش بية معقولة ممكن حياة تقتل حياة
حياة نولدت بجنين راح تقضي على حياتي
مشاعر تموت بينما مشاعر دتنولد
روح تحتضر بينما اكو روح تنبث
نزلت للبيت
وبعتبة بابنة بكل ماباقي بية من حيل صرخت
ولك باباااااااا
تعال اخذني يمك خل ارتاح
صوت امي بصرخة نترت بية
عليمن تصرخين طفل الله وهبة الج غيرج يتمنا
يجوز ينصلح حال رجلج بهلطفل
يجوز عمتج كلبها يرف لحفيدها وتصير ادمية
ماسامعة يكلج ماعز من لولد إلة ولد إلولد
كلشي الله يسوي هوة من صالحنة حمدي ربج وطبي اكليلج لكمة
دخلت للغرفة دايخة تمددت ستوني غفيت اسمع صوت امي تخابر
وبطبيعتها من تخابر كأنما تصيح
بقيت كلسا اتفزز من صوتها وارجع انام
الى ان وعتني جملة
(اي دادة فدوة لعينج اتصلي بي وكليلة مرتك حامل بلكي يجي يرجعها هذا لطفل بلكي يصلح لحال اني كلبي حاس هذا لطفل الله دزة حتة يصلح زياد بي )
كمت من فراشي الوم بيها واطلب منها ترجع تتصل بعمتي وتكللها متخابر زياد ولا تجيبلة طاري
_بلقيس تردين تخبليني امة صيحتج تكول موبنية ولعالم تكيف تلكالها حجاية وتحوك منها قصص وقصص
نوب نضم عليهم حملج ماترهم يمة ستري علية طاقة للمصايب ماعندي بعد ترديني اموت مثل مامات ابوج
_دمعت عيني ولفكرة ببالي نمت ومخيلتي تراوبني حالي لوماتت امي وضليت لوحدي
بدمعة همست خلص سوي الي يريحج اني متت من يوم نحكم علية بهذا لزواج لأكشر
دخلت للغرفة وسحبت لتلفون وياي
اتصلت بلمعاونة اطلب منها تمديد لأجازة
ايدي دكت رقمهم
ردت علية بسعاد بقيت اسولف وياها وهي تحجي بصوت ناصي كوة اسمعها
سألتها عنة
_والله صار مدة محد يعرف اخبارة غضنفر مشغول علي وجدو هم
مغير عنوانة وابد مدايحصلو
همست بحسرة
_اكيد تزوج
_تريدين لصراحة طاهر ابن صاحب جدو كايلة هوة ضيع نفسة ديعاقبهم لأن جبرو على لطلعة ولأن ضعتي من ايدة
اني هذا لولد من يجي دائما ادز واحد من لجهال يتسنط على حجيهم اعرف اخبار قيصر
وهوة حاجي لجدو كايلة قيصر من شايف صورتج بلبدلة كايلة هلمرة بعد ماتلكوني لاتتعبون نفسكم
_اوكفي اوكفي صورتي بلبدلة شوصلها الة
معناها انتي من لحيتي تردين صوري حتة تدزوها الة مووووو
_انة مالي غرض هوة جدو لح علية وكالي اكلج علصورة ودزلي نعناعة قشمرتني تكلي نريد نشوف بلقيس وهي بلبدلة لبيضة
_عابت هلحكك بساع نسيتي اصلج باع شلون تحجي
ومثل ماجنتي تدزي لرسائل لزياد بدون متفكرين بأختج هم نطيتيهم لصور تبقين ثولة ولج
_مواحسن مايضلون يقلدون علية احجي مثلهم
وبعدين يارسائل هاي
_لتغشمين نفسج زياد شوفهن الي من دفتري مال لمذكرات الي ورقتة تصير وردية
وكاتبتلة بيها انو اني اكرها واحب واحد جواريننا وكومة كلام يخزي مااتذكرة
_بلقيس وروح بابا مااعرف عن شنو تحجين
بس اتذكر مرة عمو جانت تنطيني اوراق وتكلي هذني اشياء محتاجتهن للبيت وزياد ميقبل يجيبهن كليلة ذني من بلقيس حتة يجيبهن لأن هوة يحب بلقيس اني جنت طفلة تنطيني مسقول تقشمرني اخذهن من عدها وانطيهن لزياد اكولة ذني من بلقيس
بس لا اعرف لبيهن ولا الي دخل بي وداعة عافيتي
_معناها من زمان جانت تدري بي يريدني ومن زمان تحاول تخرب صورتي واحنة على نياتنا
هاي جان يحبني وهيج يسوي بية عابة وعاب حبة لعد لو يكرهني شجان سوة
_هسة شراح تسوين
_اني اريد ارجع موحبا بي بس اريد اكسر عينها مرة عمو واريد اعرف هاي لجايبها ويا شنو
ياويلة لو طلع عندة شي وياها
والله لأطلع نار كلبي على بابا بيهم ثنينهم
صوتها نصة وماعرف شهمست الي ووراها سدتة
يوم ثاني دك لتلفون وجان لمتصل زياد
ردت علي امي حجت ويا من ورة خشمها طلب يحاجيني
اخذت لتلفون
الو
صوتة بللين يرد علية
_ها بلقيس شلونج صدك حامل
_اي حامل مع لأسف
_اوففف شو مع لأسف
_لأن ماردت يجيني منك طفل ويعيش حرمان
_ليش يعيش بحرمان اني داائمنلة احسن مستقبل ورة مااموت اني راح يرتاح هوة وولدة واحفادة هم
مومثلي ومثلج اجينة للدنية حسرة علينة اللبسة وصرنا زلم ونسوان واهاليتنا بعدهم يكونون بنفسهم
وبعدين انتي موجودة وعندج راتب ومتقصرين ويا اكيد
_لمصخمة الي اجت وياك بليل باتت بفراشي بلرجعة قشمرتك امك و تزوجتها علية مو؟
_لا تكولين هيج اني مااسوي هيج شي
بس لمخبل يحمل روحة مسؤلية عائلتين
_لعد منو هاي
_بت خالتي لمى
_وشتسوي ببيتي وعلى اي اساس تجاوب لتلفون وشعدها جاية وياك شنو هلصلافة ولجرئة
_جانت تنضفة امي دازتها
ومن ردت اجي امي وابوي جانو رايحين لبيت عمتي بس هية باقية نايمة جانت
امي كالت اخذها وياك خاف نتأخر تبقة وحدها
_امك وابوك بلبيت ماطالعين وانت جبتها حتة تحرك كلبي حسب تعليمات امك غير هلحجي لتكووول
_وانتي ليش تصيحين هسة شنو تردين تتعاركين ترة ماناسي حجايتج من تشبهيني بلنسوان
_لا ماريد اتعارك ماعندي طاقة خلصت من عرفت بنفسي حامل منك
لمهم اني اريد ارجع لبيتي دوامي مناك صار كومة مجازة
تجي ترجعني لو شلون
_يي يابا من عين باجر جاي بدون ماتكولين انتي تعبانة من فاتحة ابوج اني كلت خليها على راحتها ماردت اضغط عليج
_اني ماارجع لهذا لبيت شوفلي صرفة حتلو تأجرة وتأجرلي غرفة ومطبخ راضية
_غرفة ومطبخ وبيتنا جبير ممممم يعني يفرق بلأجار
هذهو راح أجرلج مشتمل جوارينا بلفرع لوارنا وبيتنا اعمرة واعدل علي وأجرة ادفع اجار لمشتمل ولفرق يفيدني من اداور سيارات
_شيصير لو غيرتلي كاشي لبيت من لأول مونطاك بابا لفلوس جان لكينة لعمل وخلصنة منة
جان بنفسة يشوفني مستقرة ومرتاحة تالي مات من قهرة ومن ورة سوالف امك
_رغم ماداخلة عقلي سالفة عمو مات من ورة اتصال امي
وادري امي ماتكعد هيج وكت كضت عمرها توصينا كعدوني للصلا ومن نكعدها متكعد
وبعدين اني كدام عينج خابرتها ساعة بل٢ من جنة بلفندق وبشرتها كلتلها اخذت بلقيس وتمت شغلتنا وكلتلها احنة بفندق اخاف يضل بالهم
شلون تكولون متصلة بعمو وكايلتلة مماخذج
_اي هية من عرفت بيك ماخذني رادت تضرنا لأن ماخطر على بالها نطلع من لبيت وتتم شغلتنة جانت متصورة نبقة لعمر كلة تحت تأثير اعمالها
_اهوووووو بلقيس رجعنة لهذا لحجي
يعني ولتالي وياج عود هاي انتي لمثقفة لتخلين لحقد يعمي كلبج
امي انسانة صايمة ومصلية
_كافي كافي زياد لهنا ولتكمل امك بنت لهدى واني بت زكية لداكوكة
لمهم كمل وانقل اغراضنا للمشتمل يلله تجي علية لأن اني تعبانة مابية علشيل ولحط
سديتة بعد مااخذت لقبول من عندة
ورة يومين اتصل بية كلي تحضري ليوم راح اجيج
للعصر اجة مقبل يطب زعلان على امي عود
سلمت عليها وهي تهمسلي
_زعلان لأفندي اووي عشتو زعلة مردي ولهوة شرجي
ديري بالج على نفسج عمتج لو تفلش لباب لتفتحيها الها وبيتج على ايدج قفلي
دحست بجنطتي علبة وهمست الي
_ نطيها الة عربون صلح بلكي تنكسر عينة ابن لماشايفة والله يهدي
بلقيس هلمرة اذا حطت سحر بهلبيت نرجع نفس لطاس ونفس لحمام
حافضي على بيتج منها وحتة بناتها لتلفيهن يمج
_ان شاء الله
ركبت لسيارة سلمت علي نطاني خدة يريد يبوسني درت وجهي وتجاهلتة
ايدة سحبت ايدي ودخل اصابعة بين اصابيعي وهمس
_سمنانة ولج شتاكلين
_حو
ليش لمثل حالي هم الها نفس تاكل
_كولي يا الله لموت حق ندعيلة بلرحمة
_لا هوة ميحتاج لرحمة اندعي بلرحمة للي كان لسبب بموتتة لأن ينتضرها عذاب رب مايرضة بلظلم
_ ها بلقيس رجعنة
درت وجهي علجامة وبقيت لطريق كلة ساكتة واتضاهر لنوم لأن بس افتح حلكي اتعارك ويا
وصلنة للبيت جان حرفيا مثل ماكلت مطبخ وغرفة وحمام وتواليت مشترك
رغم حجيتها حجاية لتنكال بس ردتة يغير لبيت
بس هوة ماقصر غرفة بكد لكَن ومطبخ مترين في مترين
لثلاجة ماصايرة بلمطبخ خالها بغرفة لنوم نص لغراض بايعهن يكلي مالهن مكان
ذبيت غراضي وتمددت بفراشي تعبانة وكلبي إعتصر من شفت لمشتمل لغرفة مابيها مكان للكعدة يادوب شايلة لأخشاب
بس خليت راسي غفيت
تقرب الي همس
_بلقيس عشة فدوة جوعان
_تعبانة روح جيب لفات شي اني مااشتهي جيب لروحك
،_لايابة مالازم
راح للمطبخ عيني علي سوة لفة خيار وطماطة وكلاص جاي اكلها وغسل وبدل واجة تمدد يمي
لغصة حاشرة بزردومي ولدمعة بطرف عيني درت علي بنتر فايرة رغم مااشتهي
_اني جوعانة ودمي نازل ولطفل هم يحتاج تغذية اريد معلاك
_يواش يوااش معلاك شلج بي ادري جايبة خما جايبة
حديقة اهلي مليانة إكرفس هسة اجيبلج غسلي وويا طماطة هم يرفع لدم وهم طيب
بلله اني منين اجيبلج معلاك بهليل
_اني حاااامل يعني اتنسا يعني لشي الي اشتهي يطلع بأبنك ومن اشتهي يبقة بنفسي مااكدر انام
_باردة شيطلعني
_اني اطلع نطيني لسويج
_امرنا لألله
اخذ سويجة وطلع
تأخر اكثر من ساعة يلله اجة
بيدة علاكة نطاها الي فتحتها بيها شيش واحد معلاك وطماطية مجعوصة
_هاي شنو كَديته كَداوة ادري اتمضمض بي هذا
_احترمي نفسج شنو كديتهن صار ساعة افتر ادور على واحد مفتح
_قصدك تدور على واحد يقبل يبيعلك شيش واحد
_والله موصوجج
تزقنبي يلله ونطمررررري
لفيت لعلاكَة وخليتها على لكومدي ونمت
بقة اليل كلة يحوص ماكدر ينام
صبحية فزيت مالكيتة
جانت لساعة بل٩ كلت اروح للدوام اشوف لوظع حتة ثاني يوم اباشر
طلعت وقفلت لباب بعدني اتمشة صارت مرة عمو بوجهي سويت نفسي ماشفتها ودرت على لجهة لثانية وعبرت لشارع بلفروع اتختل منها
عيني عليها عبرت صوب بيتنا
وصلت للدوام لمدرسات اخذن من خاطري وخلن فلوس بيدي ومقبلن اكمل لدوام كالن رجعي احنة دنسد عنج شواغر
بلأساس اني مدرسة رياضة بس ينطوني دروس إسلامة اول متوسط وثاني
رجعت للبيت قبل ل١٢
فتحت لباب ودخلت صليت وبدلت وطبيت للمطبخ سويت لغدة ونصيت لنار وعفتة ورجعت للغرفة اتمدد
تذكرت ملابسي ماعزلتهن بديت اسفط بيهن وارتبهن
ماكملت إلة وية طبة زياد
ملابسة متربات وكلهن جص دخل تمدد علجرباية الي ستوني فارشة عليها فرشة جديدة
غمضت عيوني واتنفس بمعق اطرد لغضب الي مجرد ما زياد يدخل للبيت احس بعد مااكدر اسيطر على نفسي
_احطلك غدة
_شطابخة
_دجاج
طفر من مكانة للمطبخ وهوة هناك صاح
_شدعوة طابخة دجاحة كاااملة شكد احنة عشيرة
_موتدري بية عندي دوام طبختها كلها واضمها بلفريز كل فترة اطلع منها شوية
_يلله لعد حطيلنا لجناحات ولركبة خل نتغدة بيهن
_لركبة ذبيتها ولجناحات اني مااكلهن
_صدك جذب لعالم نست لدجاج من سنين كلة تاكل روس ورجلين وانتي تذبين لركبة بطرانة على نعمة ربج
بلأصل ماذبيتها بس ردت احرك كلبة
صبيتلة جناح وخليت الي فخذ وكعدنة ناكل
كلسا اغص بلأكل عفت لصينية وكمت
تمددت علجرباية لأن لكاع مابيها مكان حتة اكلنة علجرباية
عاينت علميز جانت اكو علاكة ستغربتها لأن من دخل ماشفت بيدة علاكة
فتحتها بيها علبة بيها مدالية وقلم ومعايدة زغيرة مكتوب بيها كل عام وانت بألف خير
رحت على لكنتور طلعت لمستمسكات ركزت بتاريخ ميلادة
لبارحة
غسل واجة
سحب لتلفون وراح للمطبخ يخابر
بصوت ناصي يسولف
كعدت ورة لباب اتسنط الة اسمعة يهمس لأمة
_اي طردتج ابوها ميت وكلبها محروك ومتدري بنفسها يعني شسويلها اذبحها مثلا غير حامل يايمة
وبعدين اني اذيتها هواي ذيج لفترة وانتي هم ماقصرتي رايحة راجعة تسمعيها حجي
لا ليش تاخذ اجازة بلا راتب خليها راتبها مخلصني من مصاريفها هاي لباسة كَشرة عمو معلمهن كلشي مجاب
اي اي
_اي لمى تتذكر عيد ميلادي ومرتي ناسية حامل وتعبانة ونست جل من لاينسى
من كال اخر جملة تأكدت لمى مرسولة من مرة عمو حتة تكيدني بيها واحتمال وارد تقشمرة وتريد تزوجهيا حتة تكسرني
ركضت على اغراضي طلعت لعلبة الي نطتها الي امي بطلعتنة فتحتها جانت ساعة مال بابا جابلهيا صديقة من لدنمارك تحفة فنية بلجمال شي كلش راقي ومميز ونادر
كلبي لجمني ماردت انطيها الة من ريحة بابا ولأن زياد ميستاهل
بس كلت اكسر عين امة واحسسة انو اني متذكرة عيد ميلادة ولمى مو احسن مني
تانيتة تمدد علجرباية نداريت علي وطلعتها من كتري تقربت الة قدمتها وهمستلة
كل عام وانت بخير
لفرحة الي بعيونة كأن فرحة طفل
جرني الة حيل باس خدي وحضني ويهمس
اني جنت متأكد ماتنسين عيد ميلادي وكلت اكيد تحججت بلدوام حتة تشتريلي هدية
_صح افتحها يلله شوفها
_لاميهمني لبيها اهم شي انتي ماناسية
حضني حييل وسحبني على صدرة
على وجهي طبع بوسات برقة وإرتباك ورة كل بوسة يبتعد مسافة تحسبا لدفعتي وصراخي
بس لمن شافني جنت ابتسم بوجهة فرحانة جنت اشوفة مثل ماهوة لاكرون ولاسنون ولاكلشي
تقرب الي وثنينا فرحانين
هوة فرحان لأن ماصرخت ولا دفعتة واخذ حقة كامل لأول مرة من زواجنا لحد هسة
واني فرحانة لأن بعد ماكو سحر ينغص حياتنا
عدة اسبوع احنة طبيعين مرتاجين نوعا ما اني اداوم وهوة يلزم مقاولات ويطلع وية لعمال بنفس لوقت عمّالة
ماشفت فلوس لليوم
لابملابسة ولا بلكنتور
يطب علية كل الي بجيبة لو يكفن مصرف يوم واحد لو لاء
يوم خميس بليل خابرو علينة ولد عمة الي سبق وأن تعشو يمنة بداية زواجنة
عزمونة على غدة ثاني يوم
بدلنة ورحنة صبحية
بقيت اسولف وية لبنات حبابات وإجتماعيات
صبو لغدة مدو سفرة مالذ وطاب
عيني دمعت من شفت الي خلو وتذكرت لبيتنجان ولطماطة طول لغدة اني لغصة خانكتني كوة اكلت
وهوة منطلق فرحان ياكل بشراهة ومرتاح
لأكل الي خلو مبالغ بي ماعرف اذا همة أكرام وهذا طبعهم لو رادو بهلشي يهينون زياد ويحسسو بقباحة ضيافتة
بلحالتين هوة مالة علاقة مرتاح وفارض صدرة
كامن لبنات للمطبخ يعزلن بلمواعين ردت اساعدهن مطبخهم ضيكَ وهنة ماقبلن كالن موزين اول حملج تشتغلين غسلت ادية ورجعت لمكاني
جانو زياد وواحد من لولد ديغسلون بس لجهال وابن عمة لجبير كاعد
بتسم بوجهي يسألني على لمنهاج ولدوام بحكم كونة يدوام بلتربية
واني احجي ويا صدت عيني على ايدة
هاي ساعة بابا
حشرت لجملة بزردومي ونزيت على لولد وهوة يهمس الي
_شبيج خوية
لاسلامتك
درت وجهي امسح بدموع بللن رومشي
نداريت اتأكد من احساسي
_حلوة هاي ساعتك منين ماخذها
_هاي رجلج باعها الي من زمان ادور على هيج شي كشخة للدوام وهوة خطية وصالي عليها جماعتة من لخارج وماقصر داراني بلسعر
كوة يطلع لكلام وكوة يتجاوز غصة زردومي
_بيش باعها الك
نزلت دمعتي من سمعت لمبلغ جان شي مالة قيمة كدام سعرها لحقيقي
وقيمتها عندي لكونها من ريحة بابا تسوة لدنيا ومابيها
هنا ادركت حجم غلطي من نطيتة شي ميستاهلة
حسيت سجينة ونخلت بنص كلبي
بوقتها لوبيدي اذبحة هم ماتبرد ناري
مجرد ماشرب جاية كتلة يلله اني تعبانة
جلبو بينة رادو
اصريت نرجع لأن حسيت راح انفجر
ركبنا لسيارة مد ايدة يريد يشغل اغاني دفعتها وبتساؤل عاينتلة
_وين لساعة الي جبتها الك هدية
_ذكرتيني هوة اني اريد اسألج عليها صار كم يوم ادور عليها ماهية
_ليش حبيبي لو مركز شوية جان شفتها هي نفسها لجان لابسها ابن عمممممممك
_هاي شدتحجين
_هسة ترجع تجيب ساعة بابا لا اكلب لدنية
_شبيج بابا تخبلتي ليش تخليني امد ايدي عليج
_مدها وشوف شلون الم عليك لعالم بهليل
_دخل نوصل للبيت واني اعلمج من دنعل ابوج لابو لساعة لجايبتها
_تسب بابا زياد
تسبة وبعد ترابة اخضررررررر
نزلني
_تخبلي بعد تخبلييي
_لا بعدك مشايف خبالي نزلنييييييي
صعد لجامات وكام يسوق علسريع
لغضب الي حسيتة من سب بابا يمكن لو مجرد مفاتحلي لباب جان صرخت بلشارع خاطفني وماترددت لحضة
وصلنة للبيت
نزلت ركعت لباب وطبيت هوة وراي دخل مستعجل تصورتة يريد يضربني
تقرب الي يصيح
_ اني تسوين بية هيج انتي ششايفة نفسج كلج اغلاط من ساسج لراسج و متحملج اكول بت عمي اذا مو اني استرها منو بسترها
_تسترني ؟؟؟ ليكون صدكت نفسك انت وامك تجذبون لجذبة وتعيشون اللحضة
اني اشرف من امك ومن خواتك ومن عشيرتك نفر نفرررررر
جان واكف بباب لمطبخ ويمة حذاءة دنك علي شالة وشمرة علية غطيت وجهي اجة بصدري
وياها صرختة
بنت لكلب ترحين فدوة لأمي وخواتي
تلفتت روحي ثايرة مثل لمخبلة مادري على شنو ادور
جانن اكو قواطي مال حليب نطتهن الي زوجة ابن عمة فاطمة ابنها وباقي عدها كلتلي يفيدج انتي حامل ليش يبقة
جريت لقوطية حيل بكل قوتي شمرتها علي بتعد عنها اجت بلحايط سوت خسفة بلبوركَ
تقرب علية بساع ركضت للغرفة وقفلت لباب
بقة ورا لباب يتعمد يسب بابا يدري بية افور يستفزني حتة اطلع
كلسا اريد افتح لباب والعن لشيطان
بقينة للصبح هوة يستفز بية واني ارد لكلمة بعشرة حسيت روحي نفجرت للدرجة الي مكمت اسيطر على نفسي وبسبب جشعة ولئامة نفسة وقباحتها سويت الي مجنت متصورة نفسي بيوم اسوي
والي لاتربيتي ولا اخلاقي تسمحلي بي
مانمت ليلتها للصبح ابجي وبودي اطلع اكلة الي بسببة ماوصلت لبابا غير بس لمسبة
صبحية فزيت على اتصال امي تبلغني انو خوالي جاين عليها وماخذيها وياهم كايليها مترهم تبقين وحدج
جانت مخنوكة وتبجي وتنعة
نسد بيتك يا ابو بلقيس وصفة خالي
لاشكيتلها ولاحجيت لبيها مكفيها بقيت اهدي بيها واهون عليها
تانيتة راح لشغلة وتأكدت طبك لباب وكمت بساع بساع بدلت ركض ركض ورحت للمدرسة
خلص لدوام بين حصص وسوالف
من رجعت قريب فرعنة طلعت بوجهي عمتي تجاهلتها ومشيت
دخلت للبيت عندي مركة بلفريز حميتها وسويت تمن تغديت وصليت بساع بساع وطبيت لغرفتي وقفلت لباب
اجة ورة ل٣ اسمع صوتة تغدة وشخر
فتحت لباب جان نايم بلمطبخ
جريت غطة ومخدة خليتها جوة راسة غسلت ملابس واخذت لسلة وصعدت للسطح اشرهن
وية ماكملت لدرج عثرت بباب لسطح
كملت على حيلي وشلت لملابس تطشرن وتتربن نكتتهن
وبديت اشرشر بيهن
حسيت لوية قوية ببطني مثل لمغص كملت لملابس واتلوة
وراها صار لألم يقوة
بلكاع كعدت على طابوكات مسفطات برتداك لحايط
وية ماجريت نفس كأن حيلي نزل وطاح مني
عاينت علكاع وافتح واسد بعيوني غوشن
مسار دم نرسم كدام رجلية
كمت على حيلي اتوجة على لحايط
واصيح علي
زياد
زياااااد
نزلت علدرج اصيح علي ميرد
على اخر بايات حسيت لدنية فترت بية ولدم علدرج يرسم مسار خلفي
بآخر درجة كعدت بلكاع وغمضت وروحي تعتصر من لألم
فتحت عيني على ضربة لأبرة بأيدي
فزيت على حيلي مخروعة
جنت بغرفة كلها نسوان حوامل
مجرد ماصحيت صوتهن وحدة تصيح علثانية
صحت صحت بساع دخلوها صالة راح يخلص دمها فيضتناااااا
كمت على حيلي بحياتي ماشايفة هيج شي
بحيث لعاملات تلاثة وراي يمسحن بلدم
وبين رجلية خاولي بأكملة مدحوس ماكدرت امشي خطوتين جابولي سدية نقلوني بيها للصالة
وصراخ لسسترات وصلني ليجوة
جايتنا لوحدج لا ام لا عمة وين اهلللج
وصلت ليجوة علكن رجلية على سدية نص
اني بين اوعة وارجع اغيب
حيل صفكت على وجهي توعي بية
ولج انتي شمسوية بروحج متكليليييي
زوجج متقرب الج ليوم
لا ليوم ولا لبارحة
شايلة ثكل
لاء هية سلة ملابس خفيفة مابيها هواي ملابس
مجرد ماضغطت على نهاية بطني لدم كام يزركَ كأن بطل ونعصر
بتعدت عني مذهولة وملابسها نترسن دم
عزززة بعين امج متكليلي شمصخمة بروحج ولج شنو هااااي
حسيت نفسي كامت تلعب بساع سحبت سطل يمها وتقيئت بي
خلتلي جهاز لضغط
صاحت على وحدة وياها
هاي ضغطها صفرر
جنت شلون لمخدر اغفة واوعة على صرختهن
شوية وسترني دخل علية دكتور
بلحضتها جنت ماواعية وضغطي وصل لأرقام لايمكن لأنسان يعيش لو وصلها
بقيت اتحسس ضربهم على وجهي ولأبر الي تنزرق بجسمي ساعة بلكانولا ساعة بلعضل
افتح عيوني واشوفهم على راسي ٣ دكاترة وسسترات
فزيت جانت دنية ليل صدري عاري بلا ملاس ووايرات على صدري وبطني وغرفة بيها اجهزة
جنت مخروعة بقيت اصيح وادورلي على شي استر نفسي بي
دخلت علية وحدة
تتراكض
_لتتحركين لتتحركين لجهاز يمعووودة
راح يطب لدكتور يشوفج
_ستريني فدوة
تجاهلتني وطلعت
شوية وطب علية دكتور
بساع نداريت على لصفحة لثانية استر بصدري وجسمي
بيدها شمرت علية جرجف
شاف لجهاز ودز على دكتور ثاني
وراها بساعة طلعوني على ردها برة
شوية واجا دكتور بقة يسأل بية شنو لصاير وياي
_كلشي ماصاير
_بابا لنزيف الي نزفتي مؤشر على انو متعرظة لضرب او واكعة من مكان عالي دكتورتج تعرف شغلها
٣ دكاترة لتمو على راسج
قلب ونسائية وجنة ناوين نستأصل رحمج يلله نكدر نسيطر علنزيف بس ربج لطف بيج ودكتورتج تخبلت اصرت متدخلج عمليات كالت هذا اول طفل الها تنعدم حياتها
الله بعثلج دكتورة بطلة حافضت على امومتج بكل ماأوتيت من قوة وخبرة
احجيلنا بابا اذا زوجج ضاربج أو احد دافعج من درج شي لتخافين
_كلشي مابية دكتور لو احد مأذيني اكيد مااسكت
_منو وياج
_بس زوجي
_تبقين ليوم تباتين يمنة وباجر لصبح دكتورتج تشوف حالتج وتقرر
كام وهوة يوصي لسسترات علية
ملابس ماعندي دزيت وحدة من لنسوان على زياد توصي يجيبلي ملابس
اجت كالت مالكيت احد برة اسمة زياد
شطت شوطة وتمنيت الله يذب بية لحيل واطلع منا اكلة
شوية واجتي سستر صاحت منو بلقيس
لوحت الها بيدي
تقربت الي
زوجج برة يسأل عن وضعج
_كليلة مات ابنك ويبيتوني مااطلع ليوم وخل يجيبلي ملابس ماعندي ووصي لباب يقفلها فدوة
راحت وورة ساعة رجعتلي جايبة علاكة سودة
فتحتها بيها دشداشة كمت للحمام غسلت وبدلت ورجعت
شوية ودزلي اكل
فتحت لعلاكة شيش لمعلاك الي صارلة كومة بلثلاجة
غصيت ونزلت دموعي اجت صورة بابا كبال عيني
وبحسرة عاتبتة واحجي ويا
شوف حالي بابا
شوف اهلك شعملو بينا وشسوو
شوف وديعتك شسوة بيها زياد
لفيت لعلاكة ونمت بدون اكل دمعتي بعيني اتحسب علي وادعي كون الله يفجعة بشكَا عمرة ويحركَ كلبة
صبحية فزيت منتهية من لجوع صوت بطني ينسمع عن بعد متر
محد كاعد ادزة لنسوان نايمات ولصالة فارغة جريت اللفة بيها ريحة ماكدرت اكلها
بقيت اتلوة من لجوع
الى ان دخلت حجية بيدها علاكة كباب من باب لصالة شميتها كعدت مريضتها وكلتها
من كملت عينها علية تقربت الي بيدها لفة
حطتها بيدي وهمستلي
يمة وجهج اصصفر يخوف اكليها
اخذتها من ايدها وابجي على حالي
اكل بللفة ودموعي على وجهي
للعشرة اجت لدكتورة شافتني وكلتلي طلعي ماعندج شي
طلعت برة ادور علي ماهوة
بقيت واكفة واتلفت
شوية واجة من برة مصرفن قميصة وادي كلهن دهن مال سيارة وبيدة دبة يريد يترسها ماي
شافني تقرب الي
يريد يلزمني ميكدر ادي بيهن دهن ولدبة
دفعته بيدي شايطة ومشيت للسيارة
ركض ترس لدبة ولحكني
ركب ندار علية
_حتة بعز مرضج وشايفة روحج
نداريت علجامعة ماحجيت حرف
بس دموعي تجري وادري لحجي ميجيب اي نتيجة
_لحمد لله على سلامتج يلله لتضوجين اهم شي انتي مابيج شي
مارديت علي
بقة طول لطريق يحاجيني واني عيني تذرف دموع ودايرة وجهي علجامة
الى ان وصلنة
نزلني جنت دايخة مااكدر اوكف على طولي من لدوخة على لدم الي نزفتة
طبك لباب ولزمني عيني علباب وهوة يدور بجيبة علمفتاح وية ماطلعة وتقرب يريد يفتح قفل لباب
نفتحت لباب لوحدها وندرعت
جفلت وعيوني نفتحن كل حيلهن من شفت..........
انعام...
جفلنة كل احنة من صرخة سلامة
وركضنة عليها
عفت إمتنان بلكريكوت وركضت مفزوعة
وصلنة الها جانت بلكاع ونازعة شيلتها وحيل تملخ بوجهها
صاحو عليها شبييييج
حيل على وجهها تضرب وفارشة ثوبها بلكاع وتصرخ
_ياخوية يا مزهر عمت عيني عليك ياخووويا
حمل لحنين وعافني إبحدي
وحمل لحنين وعافني ابحدي
حا حا حا
بيبي شكرية مفزوعة صرخت بيها
_ولج ياهو لمات جغلودة اللحم ماتحجين مزهر شمالة كشمش شمالها
_طايح عليهم لسكف عمت عيني ومكتلهم كلهم بلمستشفى
صوت صراخهن تعالة بيبي شكت دشداشتها وام فدعم ملخت روحها وحيل تلطم على وجهها
زوري ذبت لشيلة وحيل تملخ بشعرها وابنها يصرخ جوة رجليها ستوة يخطي
بلكاع وكعت ودموعي تتجارة وكبال عيني صورتها
ركضت على سلامة احجي وياها اريد افهم منها منو كاللها منين عرفت لخبر
_لزمتها احجي وياها
سلامة كتلهم يعني ميتين لو بيهم اصابات فهميني
تصرخ يبووو بكل صوتها وتلطم دفعتني
ركضت لإمتنان لكيتها تصرخ ومجفولة
شلتها على صدري طلعت صدري اخلي بحلكها بعدها تصرخ
وية طبتي للمطبخ طبو جدو وفدعم من برة يتراكضون
دخلو جوة يسألون بيها يردون بفهمون منها بس تصرخ وتلطم
راح فدعم علتلفون طلع لرقم ودك علي
سكتن كلهن يعاينن علي
اي
اي
لا حول ولا قوة إلا بلله
رجع صراخهن علة
حيل صاح بيهن فدعم
مزهر نطاكم عمرة كشمش وجهالها مكسرين بس مابيهم شي عابرين مرحلة لخطر
نصة صوتهن وكلهن يتحمدن الله وفرحانات
صرخت سللامة بكل حيلها
فرحاناااااات
فرحانات يلماتخافن الله ابن عمي مات فرحانات بموتتة
يبوووووووووو ولك بوية تعال لييييية
وية صرختها دخل غضنفر
من لباب نتر بيها
_شلون عرفتي بيهم حاجينييييي
لليوم تتصلين بيهم من ورة علمنة وتودين كَالات هسة انتي بمصاب خل تخلص سالفتج والله كريم
تقربت الة همستلة
_حرام عليك اهلها خل تتصل بيهم قابل شمسوية هسة وكتك تحاسب بيها بمكان متاخذ من خاطرها
_خليني ساكت انعام تتصل بيهم وتتشكة ميتقرب الي ميطب لغرفتي ورجل كشمش يعاتبني جان ومن اسألة يكلي جوارين وصلولنا اخبارهة
هسة انة مجلب بذيالها قابل من زمان كلتلها لباب يوسع جمل روحي لاهلج وورقتج توصلج وشوفي حياتج ابني يربة عد زلمة غريب وانة عايش ماترهم
كتلها خلي وكل شهر ادزة الج اسبوع
بوية انة ماعايل وياها وحك الله بس هي ماتدري بروحها شتريد دودنهتني بزماني
ختم كلامة وهوة يصيح عليها ويكللها كومي لبسي وشوفي منو تروح وياج انة برة بلسيارة انتضرجن
كامت على حيلها دخلت لغرفتها بيبي شكرية ونعناعة لبسن عبيهن وام فدعم وراحن وياها اخذهن غضنفر
فدعم وجدو وصميدع راحو للمستشفى
شوية ورجعو طمنونا على كشمش وجهالها مجبسين ومابيهم شي مطلعيهم من لمستشفى
لليل رجعن وسللامة ضلت
دخلن يسولفن عليهم
غضنفر من ناطيهم فلوس يسوون لسقف
اخو كايلة عليمن تجيب واحد ويسوي نطيني لفلوس واني اسويهن
مسويلهميا شلون ماجان وهمة بنائهم من طين صدفة مطرت لدنية يومين متواصلات
واكع عليهم لسقف وهمة نايمين
عدن ايام لفاتحة وخلصن وخلص لسابع وسلامة مارجعت
ورة لسابع راحو جدو وغضنفر وعمو رحيل وإسماعيل يجيبون كشمش
ماكو غرفة تنام بيها لفوك ٤ وحدة الي وحدة لفدعم وحدة لصميدع ووحدة لأم فدعم
ولجوة وحدة لبيبي وحدة لسلامة ووحدة لنعناعة وثنين جانن مالات لعيبية وحدهن فتحوهن وحدة علثانية وسووهن مخزن مليان كدورة كبار وفراشات خطاطير وبوفيات قديمة وغراض ميحتاجوهة
بيبي شكرية كالت تنام يمي هي وجهالها غرفتي واسعة
كاعدين كل احنة نترقب دخلتها علينة
من لباب اجو لجهال يصيحون اجت كشمش اجت كشمش
ركضن لبنات ليبرة
شلت إمتنان وطلعت
جانت بيدة حاضنها على صدرة ورجلها مجبسة وجهالها واحد شايلة جدو ولثاني بيد صميدع يمشي بس ايدة مجبسة
ركضن لبنات عليهم
بيبي شكرية تركض وتعثرر
بلكاع بلزرع نزلها غضنفر ولتمن عليها
هي تبجي وتنعة مفجوعة على رجلها وهنة كابلنها ناس تبوس بيها وناس تلطم وياها
بقيت من بعيد اعاين وبيدي إمتنان تبجي الها سبوعين صدري حليبي كلش قليل وكلما جالة يقل
كومنها شالها غضنفر وجابها ليجوة
بلصالة دخلها وجهالها يمها ٣ ولد نفس لكصة
تقربت الها مالي عين احطها بعينها
حالها يفطر لكلب
وجهها وايديها مزلغات ميندرى لبيها كدمات من لأنقاض الي ندفنو جواها لو من اللطم
فواتحهم ثكيلة ولطمهن شي ابد موعقلاني
بتسمت بيأس ودمعتها بعينها وأشرتلي
تقربت الها دموعي تجري ماعرف شحجي ولا ادري شنو ممكن يخفف عليها لبيها
حضنتها
تطبطب على جتفي وتهمس الي
الله لايشوفها لمسلم ينعيمة
شخر بين ادية
انة اعرفنة رجلي بزر اخرة هاي دنياتنا ماتلوكلة
بس ماضنيت يموت هيج موتة
كلشي مابينا احنة وهوة طلعو لعضم وحد وللحم وحدة جن شال لسكف عنة وتلكا خاطر احنة نعيش
سودة بوجهي عليك ششفت من حياتك تركض ولعشة خباز
امها كومتها للغرفة وكلولها رتاحي كافي لطم وبجي انتي مريضة
إمتنان بحضني صرخت
طلعت صدري ارضعها ماكو ولا قطرة حليب
بقت تبجي اخذتها للغرفة عصرتة حاولت كلشي ماكو
بقيت افتر بيها الى ان صعد غضنفر
من لباب طب يسأل شبيها ليش تبجي
_صدري مابي حليب كلش
_شني لسالفة مولصبح ترضع جانت
_صار فترة من يوم صرخة سللامة وحليبي يخف يوم عن يوم
قاطعني وهوة يطلع مستعجل يجيب حليب
وية صرخة إمتنان
شوية ورجع من جوة خبط الها لممة وجابلهيا
بساع تناوشها من ايدي خلاها بحلكها ويفتر وهي ترضع
عيني علي راسة يم وجها لزغير ويهمس الها
هايبعد لعافية جويعانة
عوينت ابو اصلي
جوعااانة مات ابوج كون
بقت على ايدة ويفتر بيها بلغرفة الى ان غفت
خلاها بفراشها وتقرب الها
اصابعة تتلمس اديها لناعمة لزغيرة
عيني علي
دمعة لمعت بعينة ويهمس الها
ها يامنة لو كبرتي هم تفزين من لمسات ادية لخشنة
سحبت ايدة وضميتها لصدري
وحيل شميتها وبستها
سحب راسي على صدرة خلا ويهمس
_ماتدرين شصارلي من شفتها تصرخ من لجوع
انة كلبي يم حمزة هاي مدري شمتانية ماترضة ترد
_خليها تشوف اهلها
_انة شريد منها خليها بس خوفي على حمزاوي بيوتهم تعبانة كلها
واخاف الها نية فراك وتريد تجلب بي
الله كريم هسة ليش تسبق لأمور
ايدني وهوة يجر حسرة ويدخن ويستذكر قيصر
_انة قويصر راح مني كلبي ملجوم وخايف لاتحاول تاخذة مني لو تنهزم بي
_وين تنهزم يمعودة ستهدى برحمانك وعوف عنك هلأفكار ونام ماطول إمتنان نامت لأن لو كعدت بعد متخليك تنام
تمدد بلفراش وعينة للسقف جر حسرات متتالية ندار علية وهمس
انة كلبي ناغزني من طلعتها شتكولين لو اروح باجر واردها
_بكيفك عيني
_اي اردها لايروح يصير شي بحمزة
بقة اليل كلة يتكلب مخنوك
درت وجهي بس مانايمة للفجر اغفة وافز على صوت حسراتة وحركتة بلفراش
الى ان اذن فزت منة سويتلها ممة على صوتها كعد
ندار عليها ويضحك
_هايبوية جوعانة
عوينة ابو لجوع اذا يمرج وانة اشم لهوة
سحبها من ايدي بعد مارضعت
فتح كماطلها ويبوس بأديها
نضرة عينة الها مو نضرة عادية
جنت اشوف بيها نضرة اخو مغدور
ومراهق مخدوع على عيونة غشاوة ضيعت اهلة منة
ادي لتتلمس اديها كأن ياخذ منها لوعد ماتعيد جرحة
ونضرة عينة الي تتأملها كأن بيها يحصد تعبة
ويعوض لراح
حيل يشمها من نحرها ومدري شيتمتم يم اذانها
صد علية جانت عيوني دامعة
ها شمالج انتي لأخرة
_اغار
_اكو وحدة تغار من ضناها
_اغار حتة من لهوة
ويلااااااااه
يريحة ليل عشاكَ شنهي سرك
تعب سنين يتلاشة من اسيرلك
اريد احضن وابوسن وارد أسرك
سنين اركض يخايب عمر ضيعتة اسير وعبد ممنونك واغاتي وكلهن انت ....حنين حاتم
بعد لكلام لحلو الي يكولة احس كل لكلام يصير ماصخ سكتت دنكت جريت ايدة بستها
سحبها مني وعلى جتفي خلاها وسحبني لصدرة
صرخت منة
اخذتها من عندة وراح برة يصلي
من جبت لحد لآن بيبي تسويلة ريوك ميكعدني
نزلت ويا سويتلة ريوك ومنة بيد بيبي تكمط بيها ماعجبها كماطي
شوية ونزلت بسعاد ووراها صميدع وظاهر صبحو
وتقربت يمي تسوي ريوك لصميدع
تريكو سوة وطلعو
وراهم طلعو جدو وفدعم لدوامهم
طلعت نعناعة هي سوت كهوة لجدو يحب كهوتها ويحب لجاي من ايدها
جانت تسوي اللذ جاي ضايكتة بكل حياتي
من تسوي اتانيها تطلع واصب من عندة الى ان اخلص لقوري
بسكوت لأن بس تدري بية تكوم تذبة لو تسوي قليل
طلعت من لمطبخ بيبي شكرية تضحك وتعاينلي
تقربت يمها همست
_ها شبعتي
_اي خلصتة للقوري
_غير لو تدري بيج تكوم ماتسوي اصلا
(مثل لبزونة كالولها بولتج شفا كامت تطمها)
ضحكت واني اخذ امتنان منها كعدت بصفها
_شلونها كشمش
_إخرب بيتي عليها مانامت الليل كلة تون
_مسكينة ماتستاهل ومبينة تحب زوجها
_يجدة كشمش وزوري وامهن وخالاتهن عدهن لرب واحد ولرجل واحد حتلو بي كل لعبر ماينطن بي ويحبنة ويصبرن ومايشكن ولا يكولن
يصبرن على لعيال ولرجل ولعيشة لصعبة
واحنة نحجي صاحت من جوة
خليت منة بحضن بيبي ورحت الها
صبحت عليها جانت تلف بشيلتها
_نعيمة اريد ادخل للحمام شلون بية لويلاد كلهم بلشغل
_اني اشيلج
_خاب هوة انتي بتج سارحة منج تردين تشيليني يلمايعة
شمالة وجهج سايح
_من ورة لسهر وية بت ابن عمج
_قصدج وي ابن عمي
تضحك وتغمزلي
ختمت ضحكتي واني اطلب منها اصيح لأبوها يشيلها
عمو رحيل عندة ضعف كلش حاد بنضرة ميميز شكولنا ابد يشوف بس لهيئة ميشوف لمعاني
يسولة نضارة كل فترة يلبسها شكم يوم ويشمرها يضوج منها
جان فدعم من تصير دكَة لو سالفة
يكَلة انت ماخذينك عون تنكلب علينا فرعون
لاتصوب تروح تصوبنا
يروح وياهم ويرجع سلاحة بارد
طيب حييل ومن اهل الله
فدعم شوكت ميكون ضايج يحطة وينصب علي
بسرعة يصدك ويتأثر وبساع يندفع
سبحان الي جعلة هوة وجليل من اب واحد
ضربت صدرها وصاحت
يااااع تسودنتي تردين ابوي يشيلني
من وراي اجاها صوت نعناعة يعني غضنفر من شالج عادي وصلت يم ابوج عفت نصرة
_جاهذا كضة عمرة يشلني لحد ماعرست انة وهوة يشيلني على متونة حمبال باجي ولو تعب يشمرني بلزرع
شني هذا لحجي غضنفر اخوي واكَرب الي حتة من ابوي
انة ماعندي دغش يجدة وانعام تعرفني شني
تقربت الها دمعن عيونها
_مالج شغل بكلامها قابل مااعرفج لو مااعرف غضنفر
من شافتها كامت تبجي غيرت لموضوع
_انة غصدي انت معتدة مايصير رجال يكضج لو يحاجيج
_بس غضنفر اخوي جدة انة بيوم خذوني هوة مشطالي شعري ويشم بي ويحضني ودمعتة ترس عينة
وكلسا يضرب على رجلي ويكلي انة لسبب
لحد مااجو برة واكفين متانيني وزلام لعشيريتين برة
وهوة كض جنطتي وكلي ردي ماتطلعين خل يهدرون دمي وشيصير خل يصير
صح مو نفس لبطن حملتنا ولا رضعنة من نفس لحليبة
بس هوة اخوي والله لعالم ويشهد
مسحت دموعها وحضنتها
_كافي شكو دتبررين مالج علاقة بيها وبعدين هوة من شالج انتي مضطرة لأن متكدرين تمشين
والله يعلم نيتج ونيتة شنو
_خية انة جيتي راح تفتح بيبان وهاي اولها
،_لاتكولين هيج انتي هنا معززة مكرمة انتي وجهالج محد الة شغل وغضنفر كال الي يمسها يمسني والي يمسني يعرف عقابي شنو
واحنة نحجي دخلت امها تقربت يم جهالها تبوس بيهم
رادت تشيلها ماكدرت الها سمنانة ومتغيرة موذيج كشمش
اخذت جهالها غسلستلهم واخذتهم تريكهم
على كعدتنا وسمعنا صوت عمة امريكا من لباب دخلت تسأل عليها
زوري شمرت ابنها بلكاع وركضت على كشمش
حضنتها وتبوس بيها ويتباجن ثنينهن
وتهاني هم اخذت حصتها
اما عمة امريكا فجانت حصتها جبيرة
حضن وبواجي وعتب وملامة للي كان لسبب
تكابلن عليها تهاني وعمة امريكا شالنها
رجليهة وحدة كسر ولثانية رضوض بللحم وكدمات
ذبح بيومها جدو على سلامتها هي وجهالها ووزعو كلة ولقليل منة سوينا غدة
عدن شكم يوم غضنفر يلوب على حمزة ويتذكر قيصر
كلسا يتصل ببيت اهل سللامة محد يرد علينا
الى ان كال
_راح ادزلهم طارش انة ابني مااكدر بليا واخاف علي هي تريد طلاك اطلكها تريد ترد خل ترد
دز عمة إسماعيل وزوجتة
بقة بلغرفة ينتضر ويدخن الى ان اجو من شافهم من لشباك بساع نزل لدرج ركض
تقرب الهم يسأل
_إسماعيل :- بوية حرمتك تكول انة ماارد اذا مايعدل بيني وبين انعام
بس انة عادل والله يعلم مصرفها هي ضعف مصرف انعام كل اسبوعين تروح للولاية وي جدتي وانعام من طبتنا لليوم ماطلعت برة لبيت
لبسها زايدتها ناقصتها مامقصر بكلشي
حمزة بعدها انعام عروس وينام بنصنا لا قصرت وياها ولا وية حمزة
_بس هي ماجابت طاري لماديات هي تريدك تعدل وياها بلفراش ليلة الها وليلة ولأنعام
طلاك ماجابو سيرتة ابد كالو تضل هنا عسما مية سنة شوكت مايقرر يعدل بينها وبين شريجتها تردلة
_وحمزة
_يضل يمها جا هية مامطلكه حتة تاخذة منها
_انة كلبي ناغزني من طلعتها وكل صراخها وبجيها مادخل عقلي عبن رجل كشمش الله يرحمة سولفلي مرة على اهلها ماعدهم رحمة ولابينهم محنة
وهي سللامة خصوصا جانت تشوف دم سنونها ولا تشوفة خاطبيها الة مرة
طايحة بلزلمة وكاتلتة
هوة الله يرحمة درياهى يحجي لألة ولعلي
يكلي انة كلت تتغشمر وياي ورديت دزيت اخوتي مرة ثانية
شو هاي لاكتني بلبستان شالتلها طابوكة من لكاع وفشختني بيها
انة استحي احجي يسووني مزق شديت راسي وعفت لسالفة
_لا إلله إلا الله شكد فقير حقها كشمش من تكول بزر اخرة
_خل يجي جدي ويشوفلي صرفة انة ابني مااكدر بليا وهي ماريدنها لو تصير من ذهب على هاي عمايلها
تانيت صعدنا لغرفتنا وحاولت احجي ويا
_غضنفر ترة لجاي تسوي حرام يعني لا اغنيك ولا اخلي رحمة الله تجيك ترة هي هم بشر وحقها متريدها محد لايمك واني صح احجي واكول بس لو صارت صدك اكيد انقهر واغار
لحل يمك خلي حمزة يمها وكل شهر جيبة يبقة يمنة اسبوع وهوة لو كبر ترة من ذاتة راح يجيلك ويطلب يعيش يمك خصوصا اذا تزوجت امة
_مااكدر انعام
ترديني اعيد امجادي وي حمزة
اب ماكو طفل ضايع مراهق مشتت كل واحد يمشي على هوا ويربي على غايات بنفسة
ويضيع ابني بين لاحقاد ولثارات
انة الله شكَف لموت عني لخاطر جديتي ودموعها ودعاويها
حمزة لو نعاد علي لصار وياي لياخاطر الله يسترة
انة كلي ذنوب حتة استحي من ربي اطلب يحمي الي وانة فاجع ابهات هواي
وسللامة ماعدها كلب صافي حيالة مكارة تحتال حتة بعلاقتها وي ربها
لياخاطر الله يسترة الي كليلي
بقة يجر حسرات ومخنوك بلصالة كعد علمود منة ختنكت من لدخان
جدو ماقبل علي وكلة شيل لطلاك من راسك حرام عليك حرمتك ماتنعاب ليش تتطلكها
من لجمال احلى بناتنا وبت اصول وصبرت وياك كل هلسنين وتحملت
_شتحملت جدي لخاطر الله شني مجوعها انة لو معريها اذا علنومة هاي جدتي من انة طفل ماشفتك طبيت حجرتها لاحجت ولاشكت
وتعلمنا من لزغر اسرار غرفة لنوم مايعلم بيها غير الله ليش من دون لزلم انة اسراري عى لسان لفروخ
_جدتك مرة مريضة وعدها عذر
_جدي انة ماجاي احاسبك حشا
بس اضربلك مثل وانة ماهاجرها بدون سبب اسباب وانة اتغاضا وبصدري اضمنهن
اولهن من راحت لأهلها وتكلهم خل ياخذني فدعم لو مشعول لصفحة حسن
يازلمة يرضاها مرتة تتخير بولد عمة وهي على ذمتها انة نفسي جزت منها
ولثانية بيوم مطية فلوس لأيات ودافعتها على انعام ولومالطف الله جا ماتت منة
وبيوم كتلة عبود ابن جليل جدتي لاكيتها تخابر على اهلها وتسولف الهم تفاصيل وحتة لمكان واصفتة الهم
بلله لو مخبرين علينا وجايتنا لشرطة ماجان كبرت ووصلت للسجن
وغيرها وغيرها اعمال تلكاهن جدتي بغرفتي وتحركهن من جوة راسي انة شكم مرة مطلع اشياء مدري شني ماشني وانطيهن لجدتي
ومااحجي
مولخاطر سواد عيونها لخاطر حمزة
ماريدة يشوف امة منبوذة ويتطلع على سوالفها ويتعاير بيهن انة ضايك اللوعة ماريدة يضوكها
انة ماريدنها
ياخلك الله انة روحي تجز منها
ابني مايضل عدها لو اعرف تصير دماية حمزة ماخلي يمها
سبوع مر غضنفر مانايم اليل مخنوك على حمزة
حتة منة هاملها قليل يشيلها ويلاعبها
حتة من ياخذها يضل يتحسر بوجهها بيبي تسحبها منة تكلة موزين عليها
كشمش فدعم وصميدع ساكنين غرفتها
شوكت ماتختلي بروحها تريد تبجي تلكاهم فوك راسها يحششون وواحد يفضح بلثاني بس حتة ينسوها
وفدعم اجل عرسة كال زحمة منها رجلها ستوة ميت وانة اعرس
كاعدين عصرية ثنينهم بلغرفة يمها وامها ودخلت عمة امريكا ولبنات
دخلت يمهم بيدي منة تبجي
اخذها مني فدعم كشفها ويبوس بيها ويكلي
_انة لو ادري راح تخلفين وحدة حلوة هيج جا تانيتها بويا شني هاي شكر سياح كيمر
_تهاني:- يااااع جا انة شني هنا ططوة
تلفت يضحك لفلف منة بساع نطاها الي ويكللها
_ها انتي هنا نسيت نسيت
هاج انتي اخذي لفرخة ذابتها علي فتنة
_منو تلكاني من لباب واخذها
_خايبة سكتي راح تكلب لجهرة بت لأكرع
كامت زعلانة طلعت من لغرفة
بقة خانس وعينة علباب شوية ولحكها
فدهم:- لحكتها للبستان زعلانة تمشي جنها بطة
خايبة اوكفي وين تردين
بتعدت عن لبيت واخاف لاتلكة لشرب ضامة بين لزرعات
ركضت عليها وجلبت بهدومها
دفعتني ودمعتها بعينهة
_خاب انتي صكَد تحجين تتغشمرين تغارين من منة بكد جف ايدج
_ميل عني مالك غرض بية
_دتعاي غاد وخري عن هلزرعات شفت عتوي ختل بيهن
_انة اريدن لعتوي خل اشبكنة وابوس بي مثل ماانت تبوس بمنة
مدت ايدها بلزرع تدور علي وجان تصرخ
وحاولت اخوفها بلكي تشرد
طلعت لعلاكة رفعتها ليفوك
_هذا شنيييي
_هاي كرعة ابوج تلمسي نفس لملمس
_انة مااضحك وياك هذا لشرب شنييي
_جا انة محروم وين انطي وجهي اخر اليل من تجين ببالي اشرب خاطر انسا
_مرة تكلي اشرب خاطر اشوفن وجهج مرة تكلي اشرب خاطر انسة شنهي سالفتك ماتكلي انة مليت منك وتعبت
ابوي لو درة بيك لساعك تشرب يطلكني منك ويزوجني لأبن عمي ليش تشرب حاجيني ليييش
صوت جدي من بداية لحديقة اسمعة يصيح
ولك فدعم ليوم اشعل مااخلي بأهلك رديت للشرب يلنكَس
_اشرب حتة اتونس
رتاحيتيييييييي هلسمع جدي
هلمرة راح يكَطعلي لخلفة من وراج انة شبلاني جايب لروحي علة ربيييي
تهاني:- عض دشداشتة وشال نعالة بيدة وطكها ركضة وجدي اجة يهادد بلعوجية شافة ماهوة
رد علية تولاني بلعوجية يدك علية ويكلي
_ولج انتي تضلين ثولة هذا كلاوجي مايتامنلة يروح يصخم وجوهنا وي ابوج تتختلين ويا
الله يطيح حضج فوك ماهوة طايح
طبيت ليجوة ابجي تلكتني امي طكتني
وكرصتني يمها بعد ماخلتني اتحرك
فدعم:- طلعت من لبيت اهبد وخايف من جدي عبن نطيتة وعد لو خطبلي تهاني اعوف لشرب للدوم
من كهوة بلشارع خابرت على طالب ماعدي غيرة كلهم ربعي مايلفوني يخافون من جدي ويعرف ارقامهم
شوية واجاني بسيارتة لبالوني
اخذني للبيت بلأستقبال فرشلي شمر علية بطانية لتفيت بيها
اغطي راسي يطلعن رجلية
اغطي رجلية يطلع راسي
_خاب شني طفل نفاس منطيني هاي
_هذا لموجود ترة سحلتها من اخوي لزغير لو فز هسة يديحنا
_بعد اخوك معزب من يومك
بقينة للصبح نسولف وندخن بيتهم بارد حيل اليل كلة اذاناتي يصلن علية من لبرد علحبل جانن ملابس معلكات جبتلي غترة شديت راسي بيها ودفيت اذاناتي يلله كدرت انام
فجرية نايم وماحس غير طالب يصيح
عاينت واشوف مرة عجوز مجلبة بخوانيكَ طالب وجاثلة على صدرة وتصيخ
يلفيسد يلنغل ياإبن لحرام جايلبك وحدة وخذيت لغطيات وخليتنا انة ولفروخ اليل كلة نتكارب على لغطة
كمت على حيلي وملفلف روحي بلغطوة مطلع تك عين واصيح
ستري علية حجية الله يستر عليج
انة بت اوادم بس ابنكم قمشرني ولشيطان شاطر
نهدت بطالب تطك بي وتصيح علي
كوة فلت روحة منها واجة علية سحب لغطة مني وكام يضرب بية ويصيح
شوفيها هاي لوحدة لجايبها
ادري بس انة اجيب وحدة وانيمها بطرف لأستقبال وانة انام بلنهاية
سحبني حيل الها وسحب ايدها على راسي خلاها ونزلها على شواربي ويهمس الها
شوفيها هاي لوحدة
همست بصوت ناصي
جاانة شمدريني تلمست راسة لابس حجاب
وانتي شجابج
زحفت واجيت اوعيك للصلا ونتريك سوة
ساعة لسودة قزرقرط صار موريوك
حضنها من بطنها وشالها على صدرة واخذها ليجوة
ورة شوية رجعلي بيدة صينية سياح وبيضات سلك
_هاي لوالدة الله يحفضها
_خاب ياوالدة هاي لبلوة اللكيناها ذيج لمرة بلسيارة نايمة
خذيتها ليلتها اهبد بيها كلسا تكلي على مجان فرتني عكة ومكة سودتني
صار لصبح وانة افتر بيها لاتشوف وانزلها واخلص ولا تمشي
من ركبت اذكر ركبها زلمة شايلها
اثارية عافها بلسيارة ونزل بلدرب
لاااذكر وين نزل ولا هي تعرفة منو
اسألها تكلي ماعرفنة
رديت بيها للبيت امي كالت نسأل لابد نلكا اهلها
لمرة طلعت ماعدها ذاكرة وحتة اسمها ماتعرفة كلسا تكلي اسم
ساعة تكلي انة نجلاء فتحي
ساعة تكلي سعاد حسني سودنتني
تتذكر تفاصيل قديمة حرب لثمانين واحداثها جوارينها من جانت تشوف وفروخها من جانو زغار
بس يومها ماتتذكرة
يعني تنام وتكعد ناسية هي منو وشجابها هنا
وعلى هلمنوال تاخذلها ٣ ايام ٤ تفز علينا لصبح تصيح انة وين وشجابني هنا وانتم منو
ماكدر اذبها تكسر خاطري
ضلت حالها من حالنة ناكل تاكل نجوع تجوع
مونسة لفروخ بسوالفها وامي تكول على عينها الله يرزقنا
صافن على سوالفة نغثيت حييل من حجالي قصتها
طلعت كل لبجيبي نطيتهن الة وكتلة
_هذن اعتبرهن هدية الها
شتحتاج شتشتهي اكل جيبة الها
_شو انت ماتستحي ولك شني انة شاكيلك لو متعاجز من لكمتها هاي ضيفتي ترة عيب عليك
_لايخوي لتاخذها بهلقصد انة كتلك هدية ولهدية ماتنرد
_انة مااخذهن تريد تنطيهن انطيهن الها
دحست لفلوس جوة لفراش وترخصت ياخذلي درب حتة اطلع
طلعت من بيتهم جدي بلدوام ادري بي
طبيت للبيت لبست بساع ورحت على دوامي
........
انعام
عدة يومين غضنفر يم جدة بلديوان
ولد عمام جدو رايحين راجعين عليهم
عصرية كلسا يطبون علينا لفروخ يصيحون اجة فلان
سياراتهم ترسن لبراني
طلعو كلهم واحنة جوة منعرف شصاير وياهم
شوية ودخلو لجهال من كل واحد حجاية فتهمنة رايحين لبيت اهل سللامة لأن مودين عليهم يردون يحلوها
بقو لليل يلله اجو
راحو خطارهم ودخلو كلهم بس غضنفر ماوياهم
عبالي راح يزت ولد اخوة جدو
بقيت اتاني بلمطبخ ومنة يمي
دخلت نعناعة تاخذ ماي
ندارت علية بضحكة وكالت
_ها شمتانية يمسعدة
_متانية غضنفر
ضحكت بصوت عالي وتقربت الي تتلفت وهمست
_غضنفر بحضن سللامة وحاجزين بلشيراتون ٥ ليالي عيني
نامي المن تناطرين لفجر فجر سللامة هلمرة
وسواد اليل الج ..............
قيصر ..
كملت لمقابلة ولنتائج جانت لصدمة الي خلت هيفاء توكع بلكاع من اجت لموافقة على معاملتي ولرفض لمعاملتهم
كوة وعيناها
ولزمتها بجي من لمقر لحد ماوصلنا
من نزلنة اسعد اصر علية ادخل وياهم
رفضت رفض قطعي
هادي سحب ايدي وهمس
انة نذل وعار ادري بروحي بس انت ابن ديوان لاتردنا احنة جم يوم وراجعين للعمان خل نشوفك
تريدنا نرجع وانت ماخذ على خاطرك مني
حيل سحب ايدي وصعدت وياهم
ماانكر نقهرت عليها حيل وتعاطفت وياها
لبجي الي بجتة كأن هاي نهاية العالم
اسعد جان مقهور حيل وحاول يهديها
بعد حديث ومناقشات صرح اسعد بدمعة متزجت وية دموعها
لتبجين اني اعقد عليج ولا اخليج ترجعين لعمان
بس لتبجين كافي
جنت متوقع تفرح بعد هلخبر بس الي صدمني ردة فعلها من نترت بي
_لا لا مستحيل هاي شدتحجي اسعد مستحيل اقبل هيج شي يصير
_مااجبرج لقرار راجعلج وكلامي مجرد اقتراح
ترخصت من عدهم من شفت كلامهم خاص وقرارتهم مصيرية حسيت وجودي ممكن يضايقهم
الحو علية بلبقاء
تحججت بلتعب ورغبتي بلنوم رغم بوجهي رحت للكهوة وماصعدت للشقة اصلا
الى ان حلو لولد صعدنة سوة
بشرتهم بقبول معاملتي
شالني ياسر على متونة ويهوس فرحان
وعبدو يكيت علية بلورق مال لمسودة الي يحفضون بيها ويغني
عصرية جان عندي مراجعة عند لطبيب
سولف وياي هواي وحجالي عن اشخاص عدهم رهاب من هواي امور
وشوفني صورهم بعد ماتعالجو الي عندة رهاب من لمرتفعات صاعد على برج والي عندة رهاب من النار حاضن لمدفأة وهواي اشخاص
حسيت بدفعة امل وطاقة ايجابية
طلعت منة وانة مصر اواجه مخاوفي
بليل ملتمين كل احنة بلصالة حول لمدفأة نسولف ودك لتلفون
رد ياسر وأشرلي
الك
مجرد ماكلت الو اجاني صوت صراخ هادي
قيصر الحكلي فدوة اخيك
_خيرك شكو
_ماادري هيفاء طبت للحمام قبل اكثر من ساعة وهسة ادك عليها لباب لاحس ولانفس
حاولت اكسر لباب ماجاي تنكسر راح تموت اختي جوة الحكلي فدوة
لبست قمصلتي وطلعت مستعجل
واني علدرج صاح علية عبدو
_استنة يعم انة كَاي معاك
ركضت وهوة وراي
وصلت للشقة الهث
دخلنة هادي وتعاوننا تلاثتنا علباب يلله نكسرت
بلكاع جانت مشككة اديها ثنينهن ملابسها كلها دم ولكاع شبه فايضة
شالها هادي وطلعنة كدامة اوكفنا تكسي وركبنا
ليورة اني ويا وعبدو بلصدر كعد
عيني عليها وجهها اصفر
اديها مجرحات هواي
تخيلتها كوثر دمعة عيني
نزلناها دكتور شافها تخبل نخبصو بيها خبص
خيطو اديها ورادو دم
هادي وعبدو ثنينهم ميتطابق
انة فصيلتي o سحبو مني دم وخلولها
صحت ودخلنة يمها
لنيرس بضحكة همست منو بيكم قيصر
طول مااحنة نخيط بيها وهي تنادي بأسمة
بلعت ريكي خجلان من هادي الي تجاهل كلامها وركض على هيفاء يلوم ويرزل بيها
_على كيفك وياها محد بينة معصوم لاتلومها
_شلون ماالومها قيصر اذا علمود هيج شي تنتحر لاهايهة ربحنة
بقينة يمها جانت تعبانة حيل مانطقت حرف بس تهز راسها من نحاجيها
اصرت نطلع
طلعنة وطلبو منها بلمستشفى يوم ثاني تجي حتة تنعرض على دكتور نفساني
صعدناها للشقة عبدو بقة جوة علدرج
هادي طلب مني احجي وياها واعقلها
كعدت على طرف لجرباية بنهايتها
عينها للسكف جانت وتبجي
_ليش تسوين بنفسج هيج ليش محسستني انو اقامة امريكا كارت دخول لجنة
_لأن فعلا بلنسبة الي هية كارت دخول لجنة
انت حقك متهتم تاخذها اولاء اول وتالي انت رجال وكلشي ميعيبك
بس لمثل حالي متعيش وتتزوج وتستقر غير هنا
لمثلي خسرت شرفها بواحد من لبيوت لجنت اخدم بي حتة اكبر اخوي واوصلة وحتة احصل لكمة ناكلها
على ايد رجال بكد ابوي نذبحت برائتي ومحد اخذلي حقي
بلعكس سلو سيوفهم عمامي وقررو قتلي
بينما همة جانو لسبب بلي صارلي
ماسألو نفسهم ليش صارلي هيج
من اهمالهم من تخليهم عن مسؤليتنا
لا ولأكبر منها جانو يشاطروني الي احصلة
وإلا ميسمحولي اشتغل
الي مثلي بمجتمعاتنا لشرقية مصيرها تموت وحيدة منبوذة
ارجع للمجتمع الي يطمع بجسدي وشكلي
اني بلا شرف قيصر اني مومس
انة هم بلا شرف
شرف لزلمة وعد
وليخلف وعدة ماعندة شرف
وانة اخلفت وعدي لأنسانة وثقت بية وسوت الي ماسوو لزلم علمودي
لأسباب تختلف بس لمضمون واحد
كافي تبجين خل يطلع لفجر ولصباح رباح انة ليوم مبيت هنا يمكم
ولصبح اعقد عليج وأسأل الله ان ييسرلي علاجي مثل مايسرت امرج
بذهول وفرح عيونها كل حيلهن نفتحن
_قيصر تحجي صدك
الله عليك
_اي صكَد انتم ماقصرتو وياي بعيدا عن كلام هادي الي مااكدر انسا
بس انتي بلذات رايتج بيضة
ماانسة مواقفج وياي من جنة بعمان
ولا انسة نضرة لخوف بعيونج الي ماشفتها غير بعيون جدتي
دنكت ودموعها تطشرن وبنوح همست الي
ماينلام كلبي من حبك
وهنيالها بلقيس على لشايلة الها بكلبك
يمكن حبيتك لأن شفت اخلاصك للأنسانة الي تحبها
وتمنيت اكون بمكانها
هنيالها
ماعندي رد
طلعت للصالة ودخل هادي يمها
طلع ورة شوية بفرح يتشكر مني ويتعذر
فرشلي ونمنا
بقة اليل كلة يتعذر
وصلت بي سحب ايدي يريد يبوسها
ويلوم بروحة لأن اذاني واني بلمقابل ساعدتهم
يوم ثاني بعد مااتصل هادي بأسعد ودلا على مكتب نعقد بي
راح هادي للبيت جابة وعقدنا
طلعت من شقتهم صح مافرحان بس ماندمان على قراري لأن مااذكر منها غير كل طيب
ولأن ماعرفت لأهتمام من طلعت من لعراق لليوم غير من عدها
بقة هادي يتصل واصر علية اجي اعيش يمهم
اختصارا للمصاريف ولبعد ماانكر فرحت بهلشي
لأن يومية اكضيها من ٨ لل١ بلكهوة لو بلشارع افتر
ختصرت على نفسي هلشي وشتريت راحتي
نقلت غراضي ورجعت يمهم
بلصالة ننام اني وهادي
هي جروحها بدت تتحسن بعد ماجانت متكدر تحرك ايديها وحتة اكل هادي يوكلها
عدت مدة طويلة اني مرتاح ومستقر حصلتلي شغل عن طريق معارف ياسر ويامن محل مال ملابس ومساعدات تجيني تشيل جزء من لمصرف
بديت اشتغل على معاملة هيفاء وهي لفرحة ماشايلتها شكرها ووعودها بانو بس تتم معاملتها تشتغل وتشيل عني
طول هلمدة كلبي لاجمني على بلقيس
احس روحي خاين جبان
ماعرف شلون اتصلت على طاهر وطلبت منة يحصصلي رقمها ويتحفض على رقمي وميوصلة لجدي
ادري بي نذل ومايتأمن بس مجبور ماعندي غيرة
بنفس ليوم دك لتلفون اتصال من اهلي
رديت واجاني صوت جدتي تنحب وتعاتب بية لأن كاطع بيهم
وغضنفر بصياح وصللي اشتياقة وخوفة ولهفتة الي ماعرف يعبر عنة غير بهاي لطريقة
ونتقل لتلفون من واحد لواحد الى ان وكع بيد انعام
باركت الها وبخنكة همست
_شلونها بلقيس
_موزينة صحتها تعبانة
_الية لتعب كون كليلي شمالها
بصوت اشبه بلهمس
_مااكدر احجي جدي عينة علية وياهو لياخذ لتلفون يوصي مايجيب طاريها الك
انت شلونك صحتك شتاكل شتشرب ليش هيج سويت موجنت قريب علينا ويطمأنون عليك كل فترة
_انة هنا مرتاح واجيت علمود علاجي موبطر
نداريت صارت هيفاء بوجهي دموعها على خدودها
عرفتها جانت تتسمع الي من سألت عن بلقيس
دخلت جوة واني بلصالة سمعت صوت بجيها
تقربت يم باب لغرفة وبصوت عالي احجي وية انعام
انة عقدت على وحدة عراقية من بغداد خوش بنية بت حلال ولحمد لله مستقر وياها وجاي اشتغل
فتحت لباب
تقربت الي وهمست
اني ماريد تعترف بية لأهلك اني الي يهمني هذا يعترف بية
ايدها على صدري تأشر ودموعها نزلن
دارت وجهها ودخلت للغرفة
عدن شكم يوم هية منزوية ماالها صوت افتقد سوالفها واقلق واخاف من تسد باب لغرفة على روحها
احس بلذنب
ماانكر شايلتني على كفوف لراحة ملابسي ينغسلن وينكون وبتسفطن بكنتوري
لأكل قبل مااكول جوعان تنحط لصينية كدامي
وتحتار شنو تسوي حلويات نتعلل بيها بليل
شغلي من ٨ لصبح لل٤ لعصر
نايم بليل وصوت هادي يهمس الي
كوم هاي وحدة تريدك من لعراق
كلت الو واجاني صوتها لباكي بعتب
اسمع ونينها وشهكاتها ووية كل شهكة ادنك راسي
صوتها لهامس بانين كان لقشة الي فصمت ضهر لبعير
هااا تزوجت
ليش هيج سويت بية
ليش نطيت وعد انت موكدة
بغصة والم وصوت كلبي يريد يضرخ
ايييي والله مشتااااكَ
همست بخجل مستحة
سامحيني بلقيس
_عن شنو اسامحك
سمعتي الي لليوم ملوثة بأسمك
وبابا الي مات بسبب هلشي
لوكلبي الي لاكادر يعيش ولاكادر ينسا
ضيعتني وضاع شبابي بقسمة مومن ثوبي متت بهلقسمة وندفنت وانت سافرت وتزوجت
شكد قاااسي وبلا كلب
قاسيييي؟؟
ولج خي عيون كلبي شكد محمل بحبج
انة روحي نزعتها بيوم خطت اصابعي مرسال الج
هوة حضي اعوج
جا هي لضروف ماحطت روحها إلة بيني وبينج ولالكت غيري خاطر تكسرة بلفراك
نطبكت لسماعة بوجهي
طلعت من لشقة تارك وراي تساؤلات وملامة
ومشييييت شارد من صوتها الي احتل عقلي وإستحوذ على ذاكرتي شارد من نفسي الي لليوم تضعف وتضيع كدام طاريها
مشيت هواي
لحد ماوكفت كدام........يتبع
مساء لخير
اول شي شكرا على دعواتكم ايدي لحمد لله دتتحسن
وثاني شي اعتذر عن ابتعادي تدرون ماابتعد عنكم إلا لضروف خارج ارادتي
وثالث شي عندي عتب عليكم لأن ابد مدتنصفون لقصة
لبارت ٨ الاف كلمة من ل٦ لمغرب اكتب بي الله يشهد
اريد اشوف تفاعل يسوة لتعب
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!