#خنجر_الغضنفر
#البارت_الثامن_والعشرون٢٨
#حنين_حاتم
قيصر...
صوتة يهمس الي بجدية
انت تعاني من( رهاب الأماكن المغلقة )
ليس مرض نفسي فعلي ولكن هوة اضطراب نفسي
قليل جدا وغير شائع
نسبة ٢،٥ % من البشر يصابون به
وبحالتك كان اكو محفز محايد وهوة خسارتك للانسانة الي تحبها
فيما بعد اصبح هذا المحفز هوة منتج للخوف أو الرهاب الي عندك
جنت افهم بعض الي يكولة وياسر يشرحلي ويسهل علية لفهم اكثر
خفت من لكلام الي كالة
ومن بدة يشرح لتأزمات الي ممكن تصير لحالتي اذا ماحاولت امتثل للعلاج بديت اخاف واقلق
تذكرت من اجينة جنت طول لوقت واكف يم مخارج لطائرة بحجة لتواليت
احس بلأمان من اكون يمهن
وكلما تلكاني لمضيفة توجهني وتنبهني انو ابتعد وارجع لمقعدي
وكلما ارجع لمكاني احس نفسي جاي اختنك وتبدي اعراضي تتفاقم
غثيان جسمي يعرك دكات كلبي تتعالة اختنك دوخة رجفة احس جسمي يخرج عن سيطرتي
تبدر مني افعال موبأرادتي
ادرك وافهم انو خوفي مبالغ بي بس مااعرف اسيطر علي ولا اكدر اتفادا
لمصعد صعدتة مرة وحدة ثواني وصلت بيهن لموت
ومن عدها كمت انرعب من اسمة
بتساؤل وخوف جنت احجي وية لطبيت
_شلون راح يكون علاجي وهل راح اتشافا تماما لو تبقة هذه لأعراض وياي
_انت بيدك تعالج نفسك واني راح اساعدك بطريقتين
علاج سريري نفسي سلوكي على شكل جلسات تهدئة اعصاب وسيطرة
وعلاج دوائي
واهم شي لأرادة
ارادتك نصف علاجك
اذا ماعندك ارادة ورغبة بلشفاء لا اني ولا احسن طبيب راح يكدر يساعدك
تصالح مع نفسك افهم مرضك وحاول تخرج من هلحالة
صوت ياسر يهمس الي
وداويه بما كانت هي الداء
_شتقصد
_يعني لازم تواجه مخاوفك
طلعنة من لدكتور من حاسبتة حسبت فلوسي مااذكر شكد صارف منهن بس بيهن نقص اجاري شي قليل والي نطيتة للولد كمشاركة هم موذاك لمبلغ
جنت متوتر ومهموم تناسيت سالفة لفلوس وكلت بعدين اكعد احسب صرفياتي واشوف
بليل متمدد اكمل قراءة لكتاب احاول اضيع نفسي بي وابتعد عن لتفكير بوضعي
لولد جانو يدرسون اسمع بس دويهم
لباقين كلهم طلاب بس تخصصاتهم سهلة اغلب لوقت يسختون يغنون لو يجتمعون يسولفون يلعبون ورق
ندكت باب لغرفة وصوت عبدو يهمس
_في وحدة حلوة عاوزاك
_منو هاي اختك غير
_لاياسيدي انا خواتي شبهي دول كانو لما بينزلو بلحارة لناس مبيفرقوش بيني وبينهم
_طلعت فتحت لباب
جانت هيفاء بيدها ماعون تمن تاجينة
بتسمت وهمست الي تنغصتلك ماكدرت اكل غصيت
عبدو تناوش لماعون منها
_ايوووة كدة يستي هاتي بقا هاتي واقعدو انتو بحلقو ببعض كدا وسبلو
طلعت ليبرة سديت لباب وعفتهم يتمالخون على ماعون لتاجينة
عينها بعيني وهمست
_جنك كيفت على فراكنة لاتسأل لاتكول
عود وصيتك
بساع بدلتنا
وين رحت وين طلعت
_انة تعبان هيفاء لاطلعت ولامشيت كضيتها نايم
_ شوف منا لهنا كمت تضم علية لعصر اجيت عليك كلولي طالع
_رحت للطبيب
_خير شبيك
_سلامتج
_مرتاح هنا
_لحمد لله لشباب زينين
_كم يوم ونروح نقدم اقامة محتاجين نكعد ونسولف بهذا لموضوع لأن بلمقابلة اكو امور لازم نكون على بينة بيها حتة متتعرقل امورنا
_الله يسهل
_يلله كوم البس وتعال خل نطلع نتمشة
_تعبان خليها على غير يوم
_منبتعد نكعد بلحديقة محتاجة احجي وياك
دخلت جبت قمصلتي وطلعنة
كبال لعمارة اكو مساحة خضراء كعدنا بيها
جانت لدنية تندي ولجو بارد
كعدنة على مسطبات صوتها يهمس الي
_ليش متتواصل وية اهلك انت تريد تتعالج
انت محتاجهم
شغل متكدر الى ان تحصل لأقامة وعلاجك محتاج فلوس
حتلو تشتغل اكيد مراح تكدر تكفي مصاريف علاجك
_احاول اتصرف بلي عندي منا لمن احصل لموافقة واشوفلي شغل واشيل نفسي اني موطفل حتة يصرفون علية
ولا طالب
ولا عاجز
_براحتك اني دااحجي من مصلحتك
لأن اذا قطعت بيهم هسة راح يضل بالهم يمك وبلوقت الي تحتاجهم بي وترجع تتواصل وياهم
اكيد راح يكونون ماخذين موقف من عندك وراح يكلولك مثل ماعشت ذيج لفترة عيش نفسك
_وانتي تحسبين للبعيدة من يكول راح نحصل لموافقة اصلا
_اذا ماحصلناها ترجع
_لا ماارجع اذا مااتعالج
_بهاي لحالة لازم تتواصل وية اهلك لأن انت جاي بعلاج ميحقلك تشتغل
شلون راح تتعالج بهلحالة
_الله كريم لكل حادث حديث
_قيصر اريد احجيلك على شي واتمنة متفهمني غلط
_سولفي
_اني اشوف لو ترجع للأردن افضل الك
_ليش
حسيتها رتبكت وماعدها جواب بلعت ريكها ووكفت على حيلها ايديها بجيوبها وكالت
_اشوف رحلة علاجك طويلة وهنا كلشي غالي وانت اهلك متريد تتواصل وياهم
عاد بعمان شوية لمسشفيات ولدكاترة موذيج لتكاليف
_لضاهر تندمتي لأن جنتي صاحبة لفكرة واقنعتيني بلجية
_لا ابد وحتة اثبتلك حسن نيتي اني عندي استعداد
ارجع وياك اذا ستلمنة لموافقة منا
ارجع وياك مدة وقت علما تكمل علاجك واكيد هناك اهلك راح يدزولك ويتواصلون وياك حتة لو جان علاجك مكلف ماراح تحتار
صفنت على كلامها الي كل جملة تحجيها لازم تحط اهلي بلنص وتحاول تقنعني اتواصل وماابعد نفسي عنهم ماعرف شنو لسبب
داخلي ينطيها مبرر انو لكونها خاسرة اهلها تنطي للعائلة قيمة اكثر من اللازم
نهيت لموظوع واني اتحجج بلبرد وكلتلها خل نرجع
تمشينة اوصلها لشقتهم
واحنة بلطريق جانت ترجف رغم قمصلتها ثخينة وفرو نزعت قمصلتي ونطيتها الها وكملت لطريق بطرك لقميص احضن جسمي من لبرد
وصلنة للشقة جوة نزعت لقمصلة ونطتها الي جنت ناوي اصعد وياها اسلم على هادي بس من سوت هيج حسيتها ممرحبة بهلشي
اخذتها من عدها وتمشيت
رجعت للبيت تلكاني عبدو مزاجة عالي يريد يتشاقة وينصب عفتة ودخلت جانو ياسر ويامن نايمين
بدون ماافتح لضوة نزعت لقمصلة ودخلت بفراشي
جنت متمدد واجة على بالي احسب مصاريفي
بديت من لأجار،لأزغر تفصيلة حتة لجكاير
المبلغ النقص بفلوسي اكثر من لمبلغ الي صارفة اني
بقيت احاول اتذكر اخاف ناسي شي
اجت على بالي افكار
وصفنت واني الوم بنفسي واذكرها بلمثل لقائل
احفظ حلالك ولاتخون جارك
نمت بعد مااتعبني سيل من لأفكار
كعدت لصبح جانو لولد بلدوام
اول مافتحت عيني ولكيت نفسي لوحدي
نزيت وطفرت من لجرباية ركض للباب
اجة على بالي كلام لدكتور
غمضت عيوني وجريت نفس وزفرتة اكثر من مرة
فتحت لباب واني مغمض اجة بيدي
تمشيت بلصالة مغمض بديت اعثر بلأغراض فتحت
جانت لباب كبالي تتحرك من مكانها وتبتعد كلما اتقرب الها
ماعرف حركة لباب وهم لو رجلية مجانت تتحرك اصلا الي ادري بي الجان يصير وياي ابدا موشي عادي
ولايمكن للعقل يستوعبة
صوت من وراية
نداريت
واحد من لشباب لسوريين تقرب الي يسأل شبيك ومستغرب حالتي ووضعي
طلعت من لشقة مخنوك رحت اشتري جكاير
من دخلت ايدي بجيبي لفلوس جانن قسمين
قسم فلوسي لأصليات وقسم مبلغ قليل
حسبتة جان نفسة لنقص الي من اليل اسأل بروحي وين راح واني ماصارف شي بقيت اتمشة وافكر
رحت على شقة هادي وهيفاء
دكيت لباب فتحتها الي هيفاء جانت ستوها كاعدة صبحت عليها
دخلتني وطبت تفزز هادي
تأخرت جوة حسيت لصالة تريد تاكلني بدت اعراضي غثيان ودكات كلبي تتسارع بشكل مخيف
طلعت برة نزلت جوة مجرد ماشفت نفسي بفضاء بدون جدران تحيط بية وشفت لمارة حسيت براحة
بقيت جوة شوية وراها صعدت
واني علدرج قريب لشقة جنت اسمع صوتهم هادي يحجي وية هيفاء بإنفعال وهي تبجي
_بطلي سذاجة ورعونية كتلج قطعي علاقتج بي
ماكافي لأحراج الي ديتسبب بي النة
لطلاب شاكين لأبو لملك من عندة
واحد من لطلاب نايم بأمان الله وسامع صوت صريخ باقي لولد يراقبة من لشباك شايفة يسوي حركات غريبة وتبدر منة افعال تخوف
ساعة يصرخ ساعة يركض ويراوح بمكانة
ساعة يفتح بملابسة
شاكين من عندة ولرجال اجة يعاتب بأسعد كايلة انت جايبلي واحد مجنون تريد تهجج لطلاب وتخسرني لمؤجرين
هوة طلب مني احجي ويا واني خجلان ماعرف حتة شلون افتح ويا لموضوع
كتلج قنعي خل يرجع لعمان ونخلص من مسؤليتة
_ليش تحجي هيج
يجوز جان محنوك وصرخ
يجوز مشتاق لأهلة
قيصر كلشي مابي اني ابصملك بلعشرة بس هوة تعبان لضاهر
لصارلة موشوية حط نفسك بمكانة
_هيفاء لعندي كلتة لولد موطبيعي تتذكرين من جان يصرخ ونسمع صوتة
وكضاهة بعمان كلة بعتبة لباب ينام يوم شارد يوم متيه متكليلي شجلبتي بي وجبتي
منا رجلة وصوتة منا يسوي سوالف تشيب لراس
_هذا امر الله ومحد بينة كامل لو نسيت احنة شنو
_احنة ماكاملين بس مومثلة اقلها مابينة عيب بخلقتنة ولا بسلوكنا
واحنة هنا بقارة ثانية يعني محد يعرف كلشي عننة
هذا اخر انذار الج اذا اجة لهنا لو سمعت رايحتلة يكونلي غير تصرف وياج
جفينة لشر وعوفي يلكالة وحدة سكاطات مثلة تتحملة وتتعايش ويا
دفعت لباب حيل برجلي
فتحتها الي جانت عيونها مدمعة
تقربت الة جان يعاينلي ويعاين الها
صوتة همس بتلعثم
انت ووي وين جنت شنو شنو سمعت
سمعت كلشي ياجاري
اولا لمرض موعيب ولا عار
وثانيا اني رجال ومااتعيب والف من تتمناني ولو اريد اعرس جان اخذت احسن لبنات
اني ابن شيوخ بس عمت عين لدنية شعملت بأحوالي وخلت ارذل لخلائق تحجي بية
اني اجيت لهنا لوحدي لا انت جبتني ولادفعت تكاليفي ولا توسطتلي بشي
اجيت بفلوسي وجابتني رجلية
وإن كان اختك اقترحت علية لفكرة مومعناها ملكتوني
متريدها تحاجيني هذا موضوع يخصها
واني من ليوم ميشرفني اعرف هيج نماذج
حسافة جمعنة بيوم خبز وملح وحسافة بيوم امنتلكم
ضربت لباب وطلعت
على اخر بايات سمعت صوت رجلين تهرول
وقبل مااكمل لدرج صوتها إستوقفني
_قيصر اوكف بروح امك
وكفت ثواني وراها كملت طريقي
ايدها سحبت ايدي قبل مااعبر لشارع
وصوتها يهمس بحركة
_معليك بي هذا ارعن ميعرف شيحجي
_هيفاء صعدي وممشي عليج لميتينلج بعد لتوصلين ولا تدكين بابي واني راح اغير مكاني من هذا لحي حتة بعد متتلاكة لوجوه ولو صدفة
_ليش تكول هيج
وين تروح انت متندل
اكعد واسكت ومالك علاقة بي انت ماكاعد ببيتة
قيصر اني اعرف انت متأثر بسببها واعرف نفسيتك جاي تتعب بسبب خذلانك الها
اني ادري لمريت بي موهين ومقدرة ضرفك يشهد الله لفوك راسي
ولهلسبب ردتك تجي ويانا كلت يغير جو يشوف لناس شلون عايشة بلكي ينسا ويرتاح
ومعليك بلكلام لكالة هادي انت ميعيبك شي
لمرض اختبار وانت كدة
عفتها ومشيت
فعليا جنت اختض مادري برد أو اعصاب
صارت كدامي وإستوقفتني
اني الي كدامك شاردة من مجتمع ما انصفني
اقرب لناس الي دمروني
اني شاردة من ماضي دمرني
الله عليك لاتبتعد اني اقوي روحي بيك
اني اشوفك قدوة
الله عليك لتاخذ بكلامة ولتخلي يأثر عليك
هيفاء وخري عن طريقي وامشي صعدي باردة لتتعبين نفسج اني راح اطلع من لمقاطعة كلها
لزمت ايدي عصرتها بقوة وهمست حتلو كتلك اني احبك
صفنت بوجهها
دنكت وهمست
حبيتك من اول لحضة شفتك بيها
شلون ماادري
بس الي اعرفة اني ماجنت اشوف رجال طول وعرض جنت اشوق طفل كلبي وكلشي بية يرق الة ويضعف يمة
من ختفيت اول مااجينة وصلت مرحلة لخبال
من عدها وهادي حس علية
من عدها وصار يلومني ويحاول يحجي بمساوئك حتة يخليني اغض لنضر عنك
بس موبيدي والله موبيدي
لمثلي لمفروض ماتجرؤ تحب
اجيت لبلد ثاني وتغربت لأن ببلدي لمثلي ماالهن حياة ولا الهن حق يحلمن ويحبن ويكونلهن اسرة واستقرار
_صافن عليها مانطقت حرف جنت بحالة ذهول من الي تكولة
الى ان كالت اخر جملتين عقلي كام يجيب ويودي
ماريد اسألها وانصدم اكثر اكتفيت بلي سمعتة ونطيت لفسحة لعقلي يحيك تخيلاتة
عفتها ومشيت
صوتها وراي يصيح
جنت متأكدة راح تعوفني حالك من حال لكل
مجرد تلميحات خلتك تدور وجهك وتبتعد
رجعت صارت كدامي
جانت منهارة كلبي رق لدموعها ومنضرها وهي تأشر وتصرخ بأنفعال رغم لبرد لايطاق
اديها الي تأشر وصرختها الي تستفز كلشي بية
انت تستعر من شكلك وصوتك
واني استعر،من خسارتي لاعز شي املكة
جنت متصورة راح نكدر نكمل بعض
عيوبي تغطي عيوبك
وتلتئم جروحنا وتداوي بعض
ايدي تسللت لوجناتها لمحمرة كأن لجلد مصلوخ ومسحت دموعها لمغركة وجها وهمست الها
انتي ببلد لفرص ببلد ميأبه لكونج بنية اولاء
بلد ميقيس لشرف بوصلة بيضة وبقعة دم
هنا فرصتج لضائعة
هنا احلامج الي ممسموحلج بيها بلعراق
طيري بعيد عن منفاي
اني ميت جثتي متقدملج بس لتعاسة
حذاري مني
كل لعيوب التشوفيهن بعينج
نقطة ببحر من لمخفي
ماناقصج شي هنا ممكن احسن شاب يرتبط بيج
صوتها يهمسلي بغصة ويتقطع
بس اني ماردت احسن شاب
اني كلبي لأول مرة دك الك
انت فرصتي وحلمي لضايع
ماكدرت اكسر بخاطرها ايدي على متونها طبطبت وهمست الها اجاريها
صعدي باردة باع وجهج
ولصباح رباح نسولف ان شاء الله
انتضرك
همست وهي تلوح الي
مشيت واني علامات لصدمة بعدها بية
دخلت للشقة عدن ايام لارحت الها ولا تواصلت وياها
بهلأيام جنت اوصي لولد يكعدوني وياهم واطلع من لشقة اكعد بكهوة من ل٨ وابقة اغفي الى ان يحلون وارجع وياهم
رحت للطبيب جلسة ستمرت نصف ساعة
حسيت براحة عجيبة من طلعت من يمة
اسألتة جانت تعزف علوتر لحساس
احسة يتعمق بكل جانب مضلم بية
طول هلمدة مااعرف اخبارهم
قررت بعد اكثر من اسبوع اقدم معاملتي
اتصلت بلتلفون ردت علية سلمت سلامها جان ثكيل عكس لعادة
سولفت وياها على لمعاملة كالت بليل اجيك ونسولف
تانيتها بليل اجت طلعنة تمشينة وسولفنا
ابد ماجابت طاري لموضوع حجت وياي على لمعاملة بس،
واتفقنا يوم ثاني نروح كل احنة
ماجنت رايد اشوف هادي بس كلت استحمل لأن محتاج افهم من اسعد حتة يكون تقديمي بلشكل لمطلوب
طلعنة لصبح اجو علية نزلت الهم ورحنة
دخلنة للمقر قدمنا معاملاتنا ونطونا موعد مقابلة
بيومها هادي ماتقرب الي ولاحط عينة بعيني
اني قدمت معاملتي على اني مريض وبسبب مرضي اتعرض للتنمر ونفسيتي تعبت وجبت تقارير من طبيبي تثبت هذا لشي وتأيد كلامي ومضطهد ومنبوذ عشائريا وعلية ثار وسبق وان تعرضت للأصابة بطلق ناري
اما همة قدمو معاملاتهم على انو همة جاين سياحة وشافو امريكا بلد رائع وعجبهم يستقرون بي
بعد ايام رحنة للمقابلة
وكفت يم لشباك وبدة يسألني
لتمست لتعاطف وية وضعي
بعد سماعة لصوتي وادرجت لتقارير الي تؤكد انو متضرر بسبب شضايا رمي عشائري وثار
وراويتة رجلي ولطلقة الي بصدري
كملت لمقابلة ولنتائج جانت لصدمة الي خلت هيفاء توكع بلكاع ......
انعام ...
عيني عليها من رفعت ايدها بعد ماتلمست رجلية وصرخت من الدم لبيها
ولك غضنفر الحكككك
صوت لجهال يكمل لكالتة واخذوها ركضة ليجو
عمو غضنفر الحك
عمو غضنفر الحك خالة انعام بالت دم
دقايق واجة يركض جان بلفالينة ولصروال
شافني بلكاع تقرب يسأل شكو شصاير
صوت زوري ترد علي وتاشر بيدها لكلها دم على احد وراي
_ايات لغبرة شالت طابوكة من لكاع وشمرتها على انعام اجت بنهاية ضهرها
صرخ بيها
ولج ايااااات ليوم اعدمممج
والله موعليها والله على لبزونة شمرتها وهي صارت كدامي
طلعت عمة امريكا وعمة مدينة وبيبي ونعناعة
تهاني لزمت ايات من شعرها جنها ماصدكت
_ايييي حللت كتلتج ولج زغيرونة شني
عمة ام فدعم صاحت علي دخلها جوة خل اشوفها تجاهل كلامها وشالني
بيبي شمرت عباية علية ولحكتنا هي ومدينة
ركبنة لسيارة وفدعم طلع بوجهنا رابط واحد من ولد مدينة وجايبة من برة
بقت تلطم لطريق كلة وتحجي عليهم
_الله ياخذهم واخلص
بس لأذية على ساعة وجابولي مصيبة
على ساعة ومتت من وراهم وابوهم مالة غرض عبالك جايبتهم من لشارع
جنت بللصدر كاعدة وهنة ورة
طول لطريق تتشكة من عدهم
غضنفر عينة على رجلية ومفزوع
كلسا يسألني هاي شني لدم
نزل غترتة نطاهة الي خليتها بين رجلية اريد لدم يوكف ماكو
قريب ماجاي نوصل كمت احس بدوخة بس واعية واشوف
وراها غمضت اجفاني ثكلن
نزيت على صوتة يصيح سدية
وراها تحسست لمساتة من شالني وخلانة على سدية متنقلة
صوت قوي
صراخ نسوان
عمة مدينة اسمع صوتها تحجي وية بيبي شكرية
_صخام لصخمني راح تموت لفرخة
وجها غدة كركم
الله لايوفقج يا أويتة على هلعملة
ياسواد وجهي وي غضنفر لو صار بيها شي
شكرية :- كتلج عينج على بناتج ضهريتهن كلها يكضنها يم سللامة
هاي تكره نعيمة وتحش بيهن
مت عيني لاعبات فلك بيها لاخلنلها غريضة لا خلن على حالها هدمة
نص هدومها بكنتور سللامة بناتج يتملعبن بي
_انة ادري بيهن يايمة
_اي تدرين وتغشمين بروحج مدري شبيج وي لفرخة جي وحيدة وغريبة شمالج حطيتي دابج وياها
انة اشوف بعيني وساكتة اكول ماريدن اغثنج
بس بعد لصار ماينسكت على سوالف بناتج
مت عيني غضنفر تسودن عليها نركع بلباب من دشينة مايشوف دربة
_انة مااكرهها بس انقهر على سللامة خطية هم محرومة من اهلها وهم محرومة من لرجل ونعيمة ماخذتة حاصل فاصل
ماتكول اكو الله مايرضة بلباطل
ماتكلة هاي هم مريتك وام ابنك
اعدل بيننا حتة الله يرضة عنك
_مدينة لاتسوين روحج كلش خيرة لحجي ماكو اسهل منة وحدتنة يو شاركتها وحدة برجلها تتسودن انة جربت واعرف
اتمنا بس الي ولو بيدي اذبحها لنعناعة بس اخاف ربي وماريد انكس روحي بدمها
وهي من خذتة هوة مايريدها يعني مالها غرض اللوم على ابننة مو عليها
جنت واعية واسمع كلامهن
بس مغمضة ومستمرة استمع الهن
بعض الي كالنة من زمان بتفكيري بس اخاف من هلخطوة ومترددة
على لأقل موهسة لأن بعدني عروس
بقيت طول مااني بلصالة افكر بحجيهن
علكولي مغذي وخلولي كانولا
وراها سوولي تحليل دم كالو حامل وسبب لنزيف احتمال اسقاط
فرحتي تنغصت بيبي طلعت برة بعد مادز عليها غضنفر
فحصتني دكتورة كالت
ماما طفلج بعدة بأول ايامة وبعد لضربة الي تعرضتيلها ماعتقد يكمل وحتلو كمل راح يكون ضعيف ومهدد بلأسقاط فلأفضل نسويلج كورداش والله يعوضج
همست بحركة
فدوة دكتورة لاتنزلي كتبيلي شي يوقف لنزيف وخلي بلكي يعيش
اني جبيرة وفرصي بلخلفة دتقل خلي واني احاول احافض علي قدر لأمكان
بقت تتناقش هي ودكتورة ثانية وثنينهن رفضن يبقنة وكالن لنزيف قوي حتلو نضربج ابرة احتمال ميوكف
عيوني على مدينة من تقربت للدكتورة ودحست بجيبها فلوس وماعرف شنو همست الها
اعاين للدكتورة نخبصت بية
طلعت ورجعت
تقربت لمدينة كالت الها
هاي ابرة جبت الها وان شاء الله يثبت
ضربتني ابرتين
بقينة بلمستشفى اكثر من ساعتين الى ان توقف لنزيف وبقة شي كلش قليل
طلعنة
مدينة حاضنتني من خواصري واتتجيلي شبه شايلتني تقربنة الة جان كاعد بلكاع ويسبح
طفرر من شافنة
اخذني من ايدها
باس جتفي ويم اذاني يهمس
بوية نعيماتي ثنينهن بخير ان شاء الله
مدينة:- اي ماخليناهن ينزلنة وان شاء الله يثبت لفرخ
ويكر عينك بي
لا بوية موفرخ فرخة
_ياااع وانت شني سونار
_انة كلبي هيج يكول
_اااااخ ياهو ليحضيني بإويتة
_عمة مالج غرض بيها انة اريد افهم منها لسبب ولو طلع الي ببالي صح انة اتصرف
وان شاء الله مايطلع صح
_وشنهي لبالك
_الج لصافي
صعدنة بلسيارة جنت دايخة غمضت على سوالفهم
ولفرحة لبية ماواسعتها لدنية
فزيت على ادي من شالني
ولدرب كلة يضحك ويهمسلي
بوية نعامتي ببطنج كليلها خل ترفس
بعد وكت علرفس يمعود لاحكين
بوية نعيمة ماريدنج جثلة
كون مايعة وترفة مثل امج
صوت نعناعة تلكتة من لباب تسأل شبيها
وبفرحة رد عليها
حامل
ياااع شبساع حبلت
يم راسي دنك وهمس
انة مو كتلج كول وفعل بوية مانغلط بلكصة نحطها
بوجها صعدني للغرفة وعلدرج وكف وصاح
ممنوع اي احد من لفروخ يطب لأنعام
انة كبل جنت من اطلع اوصي بس على مرتي
هسة اوصي على مرة وفرخ
ولفرخ ضعيف ومهدد بلأسقاط
مدينة:-ياااع شحدهم يوصلون هوة انة متحلفة بيهم جا صار شي بلبت من وراهم
شوية وصعدن يمي زوري وتهاني وبسعاد
يضحكن ويصنفن علية
زوري:- ها خية شني هذا لفرخ جايبتة وياج من امريكا
بسعاد:- اي اضن من جان غضنفر بلسجن سوو هناك
تهاني:-وحك الله انتن ثولات
خاب شبيجن هي موضلت هنا كبل لعرس شكثر يمنة تلكن غضنفر مافوت لفرصة
_ياااا تهاني صدك تحجين ولج لوما جنت على ذمة محمد
ياااع شوف لفطيرة صدكت
خاب شمالج شني مانعرفج احنة عشتي بيننا سنين
احجيها كدامج ووراج شريفة وبت اصول
رحمة لذاك لأب على هلتربية
واحنة نحجي سمعنة صوت بجي ايات
خفت لايكون غضنفر ضاربها
ضليت الوب
_فدوة نزلن شوفنها لتخلنة يضربها
نزلن هنة جوة وبقت يمي بسعاد
تروح تعاين من لصالة وتجيني
_خية كاعد يحجي وياها بس هي مدري شمالها كبل عاصت
جنها تريد تاخذة بصوتها خاطر يعوفها
_يجوز موقصدها تضربني
_ انتي جنتي مدنكة ماشفتيها غير نيشنت عليج شلون اخوها إحسيون من ينيشن بلكزوة مالتة
ولااكو يمج بزونة ولا شفنة كلشي
اروح اشوف واجيج
راحت تعاين من لدرج ورجعتلي
_لحكي غضنفر صاح على سللامة للغرفة هي وايات وسد لبلب
بقينة ننتضر يطلع حتة نفهم
ورة تقريب نص ساعة يلله نفتحت لباب
صوتة فوك وسمعنا صاح على عمة مدينة وكال الها
ممنوع منعا باتا بناتج يطب بغرفة سللامة لو يحجن وياها حرف
وصاح علجهال ووصاهم بس يشوفون نرجس وايات رايحات يم سلامة لو كاعدات سوة
يجون يكلولة
لدكتورة وصتني ممنوع يتقرب الي لمدة شهرين
لليل يلله صعد يمي
سألتة شصاير وية سلامة ليش،منعت لبنات عنها
_،مالج غرض سالفة بيني وبينها
_ها هيج صارت
_لسالفة الي تخصج انة بس الي احاسبج عليها ومااصيحج ولا احجيها كدام احد
عقابي كافي
صح لو لاء
صح
ونفس الشي وية سللامة
من تنسد باب لغرفة ويدور بينا كلام مايطلع براها
ولو اريد اطلعة من لأول ماسديت لباب وجان حجيت كدام لكل
_اني تعبانة راح انام
_افااا تنامين وانة حتة ماشفتج ليوم
_شهرين ممنوع
_شهرين انة اموتن غير
شني بوية شكالولكم علي بشر لو نبي
على هلحجي انة اروحن يم سللامة
_هاااا تروح يم سللامة علمود رغبة
هيج ماتكدر تصبر وتتحملني
براحتك روح الها هي فاتحة ذرعانها بس انسة بعد تطب لهاي لغرفة
مو امنعك عنها اني اخاف ربي بس لأنك ردتها بس وقت رغبتك
روح الها يلله
بصوت عالي كام يضحك ويقهقه
تقرب الي حيل سحبني وهمس
تخسة سللامة اذا تاخذني منج ليلة
شني ليلة لحضة ماهون بيها
شهرين اصبر ؟
اويلااااه ،
اصبرلج عمر بوياا
انة انتظر نعيمة زغيرونة
ويامحلا من انتظار
وحتة تصدكين
انة ماامنع روحي منج شهرين
لحد ماتقبط نعامتي ٥ اشهر واشوفنها بلسونار يلله استبيحج لنفسي
وعد
ووعد لزلمة شرف
عيوني علي لمكان اضلم
ايدي على صدرة وهمست
هذا لكلب مابي مجال لسللامة
مقبببط
وفايض
ماليتة ومالية لروح
انة حرمتها إعلى روحي وكلتلها لباب يوسع جمل
عوفي ابني وروحي لأهلج عرسي وعيشي حياتج
بس هي ظلت
شلون متبقة وانت كلتلها ابنج متاخذي
ثقي برب لعزة ماضلت علمود حمزة
رب الي سبوع ماخلتة على صدرها وتشرط على حبوبتي تكللها لويجي غضنفر يبات يمي بلغرفة ويبقة يبات دوم لو ماارضعة
هاي تحب ابنها بنضرج ؟
هاي هم عدها كلب ام
لتلومها بعدة زغير جان واكيد مامتعلقة بي بس هسة كبر
انة موهسة خيرتها
من جان عمرة يوم كلتلها يابت لحلال انة جزت نفسي منج
من خيرتيني بين اصيرلج متاع ليل وبين اعوفج لواحد من ولد عمي روحي جزت منج وماتجمعنة غرفة لو تتثالث لدنية ابني بعدة لحمة عوفي حبوبتي تربي ولباب يوسع جمل
هي اصرت تبقة وحاولت تلوي ذراعي وماترظة ترظع حمزاوي عبالها بهلسوالف تجيب راسي
انة عاد جبتلة حليب وممية وخليتة يم حبوبتي
لوحدها راحت تتوسل تريدة
وهوة يحجي ندكت لباب ودخل حمزة
يبجي يريد ينام يمة
دحس روحة بيناتنة ونام
خفت منة لايرفسني نزلت بلكاع نمت
شوية وحسيت علي من حضني وصار يشم بشعري
فزيت على صوت لباب حيل يندك
طفر حمزة فتحها
مانسمع بس صرختة وصوت راشدي
طفر غضنفر
لباب مردودة
اسمع صوتة ينتر بيها
مرة لثانية ايدج لتضربينة بيها تلكيها بصوب اهلج
شمسوي وتطكينا
شيسوي يمك انة كايلتلة من يوم عرسك تنسة ابوك بعد مالنة حصة بي كلة لأنعام صار
لشوكت يبقة لوكي
صوت حمزة بدموع ماينفهم
انتي موكلتيلي اصعد فو
قبل ميكمل صوتة ختفة وشالتة ونزلت
دخل غضنغر يظحك عليها
لبس دشداشتة ونزل جوة
بقيت لوحدي ضايجة عبالي طلع
شوية وصعد بيدة لريوك وويا حمزة
تريكت كدامة وجبرني اكل الي بلمواعين كلة الى ان حسيت نفسي راح اتقيء
شال لصينية ودنك يم بطني باسها وطلع
شوية وصعدتلي عمة مدينة بيدها دولكتين وتلهث
خلتهن على لميز وصبحت علية
تقربت الي تسألني
_هاشلونج ليوم
_لحمد لله اخذت دواي ولدم ليوم قليل حيل
_اي ان شاء الله يكطع وتتم فرحتكم
انة كل عمري ماشفتة هيج فرحان
ولمعجبني يريد بنية
اول مرة واحد من زلامنة يريد بت
صوت بيبي شكرية وهية بلصالة تتمشة
هوة مايريدها بنية لسواد عيونها
هوة يريدها نسخة من نعيمة
تسودن غضنفر من يوم شافاها وهوة مو هوة
جا احنة ليش جلبنة ردنا ياخذها بكل طريقة
يضع سره في اضعف خلقه
هاي لمايعة لماتعجبج خمدت نارة ومن خذاها رد جنة طفل
جان كبل مايعرف شيريد يومية جاينة ويومية سالفة
تقربت الي كعدت يمي علجرباية
وايدها على بطني وتقرة عليها
انة فرحتي موبس بحبالتج
فرحتي بكسرة عين نعناعة عبن كالت عليج جبيرة ماتخلف
بقن يمي يسولفن
عدة مدة عمة مدينة مداريتني
حسيتها كأن دتكفر عن ذنب بتها
ومن خلال كلامها وحجيها على سللامة وانتقادها لمستمر الها عكس ماجانن قبل مثل لدهن ودبس
حسيت انو سللامة الها يد بلصارلي
طول هلفترة حاولت اثبت الها انو اني مو مثل ماسللامة صورتني الها
سولفت الها عن تفاصيل دخلتي الهم والصارلنة وعن عيشتي بأمريكا وهواي امور جانت تتفاجئ من تسمعهن مني وفهمت انو الي واصللها غير شي
حسيتها صارت تحبني
رغم متبين للمقابل وكل كلامها صياح وعلى طول معصبة واصبعها رايح من لعظ
بس كلبها نظيف وتحب لخير
الى ان تمن لشهرين هي تداريني تصعد صينية وتنزل صينية وحتة ملابسي تغسلهن
وتأخرت علمودي رغم رجلها كللها تجي
ولحمد لله حملي ثبت وراجعت دكتورة كالتلي صحة لطفل زينة ونبضة زين
يوم سبت لفجرية طلعو وكل احنة برة واكفين نودعهم
جهالها ميرضون يرحون سحل اخذهم فدعم للسيارة
وقبل ميركبون كل واحد جلاق وكفخة
واخذهم صميدع بلسيارة
لبيت وحشة عليهم كلش
تعودنا عليهم
بيبي شكرية تبجي
لبنات عيونهن دامعة
شكد تعبونا بس شتاقينة الهم من اول يوم وفكدناهم
يوم ثاني وصلتني رسالة من انغام اختي
تبشرني بيها بنجاحها لنصفي وترسلي تحياتها واشتياقها الي وبعض لصور لجامعية
وتشكيلي من امي الي تتأخر ببعث لمصرف الها
كعدت كتبت الها رسالة واني ابشرها بحملي وارسل الها تحياتي واشتياقي لكبير وبعض لصور الي صورناهن بعقد تهاني
ومبلغ مالي يساعدها بمصاريف لجامعة
وعدت فترة حملي وقبط لشهر لخامس وغضنفر ماتقرب الي
اخذني سويت سونار وفعلا جانت بنية
فرحتة بيها بينت بعيونة الي دمعن
بهلفترة حمزة تناحس وميريد غضنفر ويتزعل من عندة
شوكت ماننجمع يبقة يتسأل كدام لكل
_بوية انت ليش متجي يم امي تبات
وليش تبات بس يم خالة انعام
موهذا ظاهر عمي صميدج ينام يمة يومية ليش انت ماتنام يمي
غضنفر يخجل من لكاعدين
ويبقة يقنع بي بحجج بس هوة يصر
فتحت هذا لموضوع ويا وحاولت رغم كلبي مينطيني ولا اتخيل بيوم تشاركني بي انسانة
بس انقهر علي وهي هم تكسر خاطري
واجهت رفض قطعي واسلوب حدي وكالها الي بصريح لعبارة
مااقبل اي احد يتدخل بيني وبين سللامة
عقابي الها يخص عملتين موعملة وحدة لأولى جان ممكن اغفرها بس لثانية ماتنغفر
رغم هذا سترت عليها وكلت ان الله ستار يحب الساترين
طلب مني ماافتح هذا لموضوع ويا وماتدخل
دخلت بشهري وثكلت حيل بطني جانت كلش جبيرة وجسمي ننفخ وسمنت هواي
وغضنفر فرحان يكلي كون بتي تطلع دبدوبة
طلكت بليلة ماطرة
واخذني بيبي وام فدعم
واجتي بنوتي للدنيا
فرحتة بيها ماتنوصف جنة اول مرة يخلف
ومن اول ماشافها جان يتفحص بملامحها الى ان تأكد كلشي بيها يشبهني
بفرح همس
ربي ستجابلي ماطلعت كوعة مثلنة
نويعمة وترفة ووجهة هاكدوتة وجسمهة تكول بزيزينة
همزين مو مثل فروخنة يطلعون واحدهم تكول تمساح
حاولت قدر لأمكان اثني عن قرارة ودزيت بيبي شكرية الة حتة تأثر علي ويغير لأسم
لأن ماترهم ثنيناتنة انعام
وضلت خطية رايحة راجعة
بين اصرارة واصراري نكسر ثباتة من كلتلة بيبي
انعام ماتريد هذا لأسم كامت تبجي
اجتني فرحانة وكالتلي
يكول امري لألله خل تسميها إمتنان
_شمعنة هذا لأسم
_مادري انة راح اسوي لبيان ومن نطلع عود نشدي
من طلعنة سألتة منين جبت هلأسم
_هذا لشعور الي غمرني من كالولي انتي ولطفلة سالمات
ممنون لربي
وختاريت هذا لأسم حتة ابقة طول عمري اتذكر هاي لفرحة وهاي اللحضة واشكرة عليها
طلعوني للبيت
بغرفة بيبي نفست
ودارتني هي وام فدعم وبسعاد ماقصرن
غضنفر فرحتة جانت مبالغ بيها لدرجة اني نفسي ستغربت
وكلهم مستغربين فرحتة لأن بلعادة لبنية متنال نصيب من لفرحة بهلقدر
ذبح على سلامتنا راسين غنم
وهوة برة اسمع حمزة يسأل بي
_بوية جا شو انة ذبحتلي بس طلي واحد
_بوية انة ذبحت واحد على سلامتك انت
وهسة ذبحت ثنين على سلامة خالتك انعام واختك
_اي جا ليش ماذبحت على سللامة امي من جابتني
_عبن ادري مايصير بيها شي
يوم عاشر الي بنفاسي وبدت منة تبين ملامحها
صبحية بلحديقة طالعين اكعدها بلشمس يومية عشر دقايق علمود ابو صفار
وسمعنة صرخة سللامة من جوة بطريقة مفزعة
دخلنة جوة نتراكض
وصلنة الها جانت بلصالة وتلطم حيل على وجهها......يتبع
مساء لخير
من ١٢ اكتب🥺 وحيل ضغطت على نفسي لخاطركم رغم لدكتور منعني من اي مجهود
لبارت الي بعدة مااضمنة يكمل عكب باجر لأن هذا لبارت تعبني حييل بس احاول انزلة الكم
ها وترة لبارت ٤٥٠٠ كلمة تعويض الكم
يلله شوفوني تفاعل لأن تفاعلكم حييييل هابط
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!