#خنجر_لغضنفر
#البارت_الثالث_عشر_١٣
#حنين_حاتم
ولج جايبة هذا لمخنث مالج وجاية بيا عيييين
قشمرتينا وطلعتي ويا
وانة على نيتي اكول زميل دوام وساعدها
طلعت انة كمش وانتي طابختها عدل
دموعي تتناثر عصرة ايدة وكلامة الي كأن لأرض خسفت بية من سمعتة
كوة طلع لكلام من شفافي من صدمتي
_اولا هد ايدي لأن اني مرة بذمة رجال
وثانيا اني ماجاية عليك ولا ضايفتك
اني جاية انقذ انسانة تورطت ومحد غيري يكدر يخلصها وضايفة مضيف جدو ابو خليل
ولتحجي عنة هذا زوجي ومااقبل علي مثل ماانت متقبل على زوجتك
صوتة يهمس
رديتها
ولج رديتها وناوي اتواصل وياج واردج بعرس
كَلت خليها تروح اخلص من طركَاعتي يلله اخطبها
رديتها وفتحت على روحي ابواب من جهنم
ووادم مالهم ذنب نضرو ونحطو بلوسطة ولوما لطف الله جان مات ابن شيخ تدخل بحل لسالفة
رديتها وكلت ادفع دم كلبي
لويطلبون ذهب والماس
بس لكسر ضهري كشمش حامل
ورجلها كلب لدنيا عليها يريدها
رديتها وانتي مامطيتني ولو امل واحد
يومين وانة المح جن كلبي عالم ناوية لرحيل
يومين وانة عجزت وياج
لو صخر هم جا حس
اسألج بلله لمرسال مادك باب من كلبج
ماهزج
ولج لو صخرة هم جان تحركت
انتي طلعتي وية لمخنث مالج منا
وانة اخذتها لأهلها منا
انتي رايحة تنخطبين وانة هنا بلتفكَ ادافع عن عشكَنة
حييل صرفن ردانة وطلع اثر طلقة بزندة
وحيل يضرب علأثر
انة هذا لجنيتة من عشكَج
مالومج
لا وحكَ عثرات دنياي
انة بنص اهلي وعايش غريب
عليش الوم لوادم لغربة
مثل روجة متعوبة ولكَيتج شط
ولج انة لماباجي كل عمري
بجيتيني
انة لمامتوجه لغير الله
توجهتلج وصرتي قبلتي
حيل يضغط على ايدي
اكَول الحكَ اخلص من سللامة كبل ماتطلع لأمريكا
اكَول ماتتحمل براسي مرة
تحبني
تحبني ماتحمل لغيرة ولهلسبب عجلت بطلعتها من عدنة
ولج مكسوووور واداري خاطرج
اتاريني قشمر
دفعت ايدة وعيني على لجامة وراها خيال احد
نترت بي تريد تطلع انت لصح واني لغلط
وحمل سللامة منك شلون تفسرة
تقرب الي حيل ويهمس بغضب
عابوني ولج
مسوني برجولتي ويكلون لجدي ابنكم مورجال ماماخذ بتنة لساعة
ويطلبون اطلكها وواحد من ويلاد عمامي ياخذها
تعرفين شني معناها من ينكال عن لزلمة هيج بديرتنا
تعرفين لو اكلللللج
انة هنا دك لموت بيباني وتورطو عالم ووجهي اسود وياهم
وانتي هناك محتارة بلمخنث مالج
انة احصد ثمن اعذار منج جنت اقدسهن
وانتي كلبج خوان
ولج يشح بصدري لهوة واتنفس لدخان
وعلى جروحي لجثيرة طشيتي ملح بطبتج جتف بجتف ويا
ولج انة وية لخيانة عشرة
كلهن خانني
يضرب برجلة بلكاع
حتة هاي لكاع خانتني
ايدة تأشر ويهمس
طبي طبي لابارك الله بكَلبي لمخزيني
يعلت كَلبي يرزقج الله بواحد مثل طينتج كون
غضنفر لكلام موبس الك خليني احجي
مامنة فايدة بعد لحجي
انة راح اصير ابو
وانتي على ذمة هذا لمخنث لمايعرف حتة يسلم مثل لزلم
هنا جان مختنك بصدري لحجي
تقرب ويتلفت
باجر اكعد مالكَاكم
وحك سواد وجهي لماجنيت غيرة من هلعشكَ لأكَشر لو كَعدت ولكَيتكم
املص راسج عن جسمج
وادفع فصلج علقندرة شكثر ميصير
جنت ناوية ابرر
جنت ناوية اسولفلة لبية
جنت ناوية اطلع ناري واحجيلة كلشي
روحي لضيعتها يمهم اشتياقي ولوعتي طول ذيج لأشهر
بس من كال اخر جملة نترت بي بكل حركَة وحيل عليت صوتي
انت ششايف نفسك
تملص راسي وتدفع فصلي علقندرة ؟؟
وحق الله مايصبح عليك صبح
خاف عبالك مثل قبل لوحدي ومستكثرين علية
عافني احجي ومشة يهرول لباب لشارع
ركب لسيارة وحيل شحط بيها
طبيت جوة الملم شتات روحي لبعثرها كلامة
وبداخلي صوت يصرخ الله لايوفقك محمد
على هلورطة
عاينت لسللامة جانت تلوب بلصالة وعيونها علية
بيبي شكرية تمسح بعيونها بشيلتها وخشمها احمر
زوري تهمس يم اذاني
خية افرشلج
همست بتعب وخنكَة
اي بس فرشيلي بغرفة بيبي شكرية وانتي هم تعالي يمنة
صوت بسعاد نطت من يمها
واني هم
دخلنة جوة
بيبي تمددت على قريولتها واحنة بلكَاع فرشنا تلاثتنا
طلعت لغراض الي شتريتهن الهم
ونطيت كل وحدة حاجتها
ام فدعم وبيبي شكرية طارن فرح بلعطر
جان عطر فاخر وراقي
ام فدعم طلعت برة وترش بلصالة عود تغورهن
وبيبي شكرية ضمتة تكلي مااستخدمة هذا ضكرى منج
نطيت صوغة كشمش
عيونهن دمعت وصارن يبجن عليها
ومتزجت دموعي بدموعهن على صوت بيبي شكرية لتنعة
ولج جدة كشمشة مجانج خالي ماتترسة عشر نسوان
ولج جدة شحالج هسة
يضربوج
ياذوج
هنا جنتي بيت سر لويلاد كلهم واخيتهم
ولج جدة حتة لويلاد مهمومين عليج
غضنفر لليوم مايخلي واكد يكوي هدمة ويطب ويطلع هدمة معقجة وكلما يصفن على عقجات دشداشتة يجر حسرات
وفدعم يومية ينسا ويصيح كشمش تعاي طلعيلي هدوم
صميدع مثل لمضيع جنتو مناكر مثل لهراتية انتي ويا
يلحنينة يلمامش مثل كلبج
لو ماخذين لعابية لغمة ولاماخذينج
وهاي فرخ لدوج شحالها بلياج ضالة للكفخات
صوت بسعاد لتمسح بدموعها وخشمها وتنتر بزعل
شنو فرخ لدوج بيبي حتة انتي
كفختها وعاطت
خاب دسكتي ضيعتي علي لنعاوي
وانة كوة اتضكر
زوري:-بسج جدة ليصعد ضغطج فدوة اغديلج ماعاولنة صحيتي
شكرية:- دكومي سويلي نومي ووياج دواي فوري
لمحبس بيدي
حييل ضغطتة بيدي وطعجتة الى ان تطبك على بعض بس لشذرة سليمة
وغصة ترست صدري
ماعرف الومة الوم نفسي الوم حضي لمدينصفني
جابت زوري لنومي
شربت وياها
ام فدعم راحت لغرفتها صاحها زوجها
بقينة بس احنة وبيبي كامت تشخر
كلما نحجي تفز وتعيط بينا
زوري:-كومن خايبات خل نرد لحجرتنا لعاف دارة قل مكَدارة شوفنها حتة لنفس تسمعها
كمنة كل وحدة حكَلت فراشها ومشينة
وية مافتحت لباب شفت احد خطف من يم لتلفون ودخل جوة لدرج
بقت عيني علمكان
تذكرت قيصر من جنت اراقب بي دمعت عيني
همست لزوري اكو احد جوة لدرج
امشي خية يتراوالج ترة ضالين وياج عبن مشتاقيلج هيج وكت شخيرنا واصل لذاك لصوب
دخلنة جوة
بسعاد وشكواها من حدهن وسللامة متنتهي
زوري عايشة على اطلال ابن عمتها امريكا الي دخل جامعة وراح لبغداد يم عمتة
وتسولف علي وتتحمد بشكلة وهندامة
زوري:-شوفي هذا لقلم جابة الي هدية وكالي اريدج تكتبيلي بي مرسال وتضمي كل فترة
وكل نوبة من اجي تنطيهن الي
هههههه مايدري انة اسمي ماعرف اكتبنة
وخلفلة على بسعاد
بسعاد:- اي واني احفض لكلام الي تردينا الي واروح اكولة لصميدع وهوة فد يفررح
_ياااااع فلك طرج وانة اكول لفرخ يضحك للهوة
اتاريج تبوكين مراسيلي
وحكَ الله بعد ولا احجيلج
_لعد شلون اكتبهن
_ماريد بعد ماكتبلة هوة مايجي بلسنة حسنة
ودولباني يريد مراسيل يتبغدد علي
صافنة عليهن ولمحبس فلت من ايدي
شالتة زوري وتعاين علي نطتة الي
_ماريدة ذبي بلزبالة
_جنة غالي خية خلي اعدلة واضمنة انطي لستار اسوي براسة فضل
وتضحك
شوية وندكت باب لغرفة
ودخلت بيبي شكرية
ياااع لساجن كاعدات
اي بيبي تعالي خل اشبع منج
يمة غضنفر لساعة مارد
هسة دكَيت لباب على هاي جغلودة اللحم لكيتها تشخر لمسعدة
ضحكت من كل كلبي
شنو هذا لقب الها
اي جدة ماتشوفين وجهها يترسلة معجانة لحم
شو اني بقيت يمكم كومة ماطلعتولي لقب
ياااع شلون ماطلعنالج غير نعناعة تسميج لنَمرة
وبعد واحد طلعلج لقب يو نسيتي
صفنت
شتقصدين
ياااع نسيتي صاحبنة جان يسميج ورد لباجلة
تجرعت لغصة بمرار وغيرت لموضوع
كامت على حيلها وتلوب علي
زوري:- وين يروح قابل تلكَي هنا برة وي لفلح كَاعد
اااااخ ياخليل شسويت بية انت وفروخك
ماضكَت راحة من يوم لغدروك ويلاد لحرام
انعام:- يعني عمو خليل مات مغدور
اي جدة جان راكب لنمشة ورايح يصيد
يحب لصيد
لنمشة شنو
هاي فرسة بيضة ومنكَشة مثل لنمش جان مت عيني يسميها لنمشة
يركبها ويرحون هوة واخوتة يصيدون شاهين وصكَور ونوارس ينزلن على رزقتهن من لهور
ومن يصيدهن يفرغ احشائهن ويحنطهن ويضمهن
هوة عمو خليل دارس
اي مت عيني جان مثقف دارس جمة (كمأ نوع من انواع لفطر)
_بيبي هذا ينكول مايندرس
زوري:- لاجدة جيميا موش جمة
قصدج كيمياء
اي اي هية هاي
وآمنة مت عيني عليها هم دارس جمة مثلة
زوري:- جدة تكول انعام كيميا موش جمة
مالج غرض انتي هوة اكو احلى من لجمة شفايتلهم علي
_ يعني همة ثنينهم نفس لقسم معناها متعرف عليها بلجامعة
اي جدة جا هية موش من عدنة بغداد وجاباها بلبنطرون
بس هي الله يرحمها بساع تعلمت على ملبوسنة
وذبت لبطرون ولبست شيلة ودشداشة
عبن جانت تحبة وتطيعة
انة ادري شلون خانتة وي صاحبة
بيبي انتو قابل لكَيتوها ويا بنفس لغرفة
هي جانت منهزمة واكيد نهزمت من لضلم
موتكَولين جليل حط دابة ودابها
ياااع جابت ركَة ولاجابتج شني دبة غاز هية
بيبي يعني كَورة وكَورها
اي صكَد بس هي هم مدري شمالها فجعة تسودنت
كامت تتخبل من ابيتنة ماتريدة
وتشرد من عدنا وتاخذ لفروخ وتروح لبيت عمتها
ويردها جدج ويركدها وترد تشرد
يو نسألها تصيح عوفوني بضيمي
خليل عافني وخلاني للذيابة تنهش بية
رادت تمش لأهلها جليل كاللها تعوفين بزرنا وترحين
وهي ماتكَدر بلياهم
تالي راحت لدار حقها وجليل مايرضة يدلي بزرتها بكَبرها
مت عيني قويصر شسوة بروحة كلة بس حتة يندل كبرها
لعد شكثر مشتاقلها يبعد جدتك
جريت حسرة وخايفة من لجاي لأن جذبت وماعرف اذا صحة قيصر راح يفضح لمستور واطلع اني مشاركة بلجذبة واخفاء غايتة من خطفة للمرية
ورغبتة بكشف لأسرار لمدفونة
بقت بيبي شكرية تسولف سوالف قديمة
عن طفولتهم وشلون ربو وشلون تعبت وياهم
ماعرف شوكت نمت
فزيت صبحية قبل ل٧ حسيت رجلي نمردت
عاينت بيبي شكرية تروح وترجع لازمة بطنها وتلوب
كمت على حيلي
شخيرج بيبي
جدة مارد لساعة غضنفر
تقربت الي
شجابج ييمة فتحتي جروحة
هاي انتي هيج تكولين
عود وانتي تدرين ليش اجيت
وتدرين طلبو احلف علقران يلله يبرون عائلة بلقيس
لا يجدة موهيج غصدي
بس هوة مدري شمالة من شافج
ياشمالة بيبي عايش حياتة وجاي يحملني منية
اني شنو لبيدي
دموعي صارت تنزل بس ماعاقتني اكمل واشرح لبية
اني طلعت منعكم عبالج نسيتكم لو نسيتة
اني هناك واحس روحي يمكم
غصبن عني رضيت بمحمد موبيدي ماتدرين لضرف لنحطيت بي شنو
اني ضعت يابيبي ضعت
اني من يوم طبيتكم ضعت
اني اطلبكم روحي
ردوها الي خل اعيش مثل لبشر
خل احس بطعم لأكل
خل اسمع اصوات لناس من يحجون
فرغتوني من كشي
طلعت منكم
بس روحي سجنتوها
ردوها الي
ماعرف شوكت صرت جوة رجليها ولازمتهن وانحب
ردولي روحي
تعبت وحق لخلائق تعببببت
اني يابيبي خسرت كلشي بلعراق
واخر لخسائر واعضمهن جانت روحي
عاينيلي حتة ملامحي صارت تشبهكم
شوفي وجهي متعوب مثل وجوهكم
اني انتمي الكم لو لأهلي
جاوبيني بيبي
كعدت كبالي بلكاع
وراسي على صدرها
صوت خرخشة صدرها لتعبان
وريحتها لمميزة
صوتها لهادء لحنون
يمة مت عيني ثنينكم ضعتو
اااااااخ من كويكة لفوصة كلة منها ومن خباثتها
هل صارت انكَريزية وانتم اكلتوها
خاب كون الله يحضيني بيها
دفن روحة إعلى مودها وسوة لماسوا أخو لخيتة
سمعت صوتة برة يصيح جدة
كامت على حيلها طفرت
هايجدة ناوين على موتي انت واخيك
من تطلع كول احجي
ماجنت ناوي اتأخر بس نسيت روحي يم لشط
يااع شوداك للشط
ودتني رجلية
كمت بساع لملمت غراضي بدلت ملابسي وطلعت اريد اكعد محمد
صار بوجهي
مشيت من يمة ورحت للأستقبال
ولدهم فدعم وجدهم ماكو بس محمد كأن طالع من معركة كل ايد ورجل شامرة على صفحة
فززتة كوة كام على حيلة
طلع برة يغسل
جبتلة خاولي من جوة
لكَيتة واكَف على راسة
تقربت نطيتة الة وكتلة بصوت مسموع
يلله محمد نروح لبغداد
اي تحضري
ماعندي شي جاهزة
دخل جوة
لحكَة عبود بصينية لريوكَ
بقة جوة اسمع صوت سوالفة وية ولد جليل وثنين من ولد إسماعيل هم اجو
وافور
دزيت علي واحد من لجهال راح وبعد مااجاني
صارت ل٨ وهوة ماطلع
شوية وسمعت صوتهم برة
رحت للمطبخ جانن يطبخن للغدة وسللامة تتلوة من بطنها مدري صدك مدري تتعاير
مديت راسي شفتهم يلبسون
_هاي وين محمد مونريد نروح
عبود:- منا ناخذة للشط نسبح ونصيد ونشوي نتغدة ونرد ورة لغدة عود امشو
ماشفنا محيميد خل إنتعرف على ضيفنا
ايد غضنفر تطبطب على جتف محمد
لا محيميدنا خوش محيميد عبن شني
لشط يربي شبوط ولبحر يربي حوت
محمد شاركَ لحلكَ ميعرف شيحجون بس متونس مدري على شنو
راحو همة ويا
دخلت جوة
جانن لعيبية ونعناعة يتبسبن سكتن من دخلت
كعدت علكرويتة لبلصالة وهي موكرويتة عبارة عن سكيبايات وعليهن بسط حياكة يدوية
صنع بيبي شكرية وبعضهن صنع كشمش
اسمع صوت حجيهن ونخبصن بلمطبخ
كمت اعاين شفتهن برة ديطلعن
شوية ودخلت وياهن عمتهم امريكا وتهاني
من لباب سألت عني
تقربت هي وتهاني وحيل تبوسني وتشمني
وترد تكَرص بخدودي
يمممة وشج ينور بنورمحمد
تسلمين خالة اشكرج
صوتها يهمس بحسرة
_لايكَلج فراكَنة
وترد عليها بيبي شكرية
يااع شلايكَلها دباعي خدودها شلون ذبلانات
وحتة لون عويناتها رايح
بقن يسولفن ويستفسرن عن اهلي وعن سكننة
ولبنات يسالن بية عن لعيشة هناك
ساعة بل١ وهمة ماكو
صلينة وحطن غدة اكلنا وشالو
دخلو الحجي وفدعم
لحجي سلم عليهن ودخل لغرفتة يرتاح
عيني على فدعم طلع برة
شوية ودخل بيدة علاكَة وبسدة يختل بيها
كَامت على حيلها تهاني وتقربت الة
هاي شني بيدك
مالج غرض
خل اشوف
شني هذا ببسي
بيبي شكرية عينها علي وتحجي بمكر
ومنيلة ببسي وين لكَا
ايدة على كَفة راسة ورد عليها
هااا ماكتلج موش.صاحبي مسافر و يدزة الي كل مدة
اييي الله يرحم ايامج.كشمش
جنتي ساترة علينا
تهاني:- لعد نطيني فدوة
والله حلو هيج يخلي لواحد يتريع ويرتاح
بس هوة شني يبزز مدري شمالة
بس والله طيب
وخري تهاني مانطي
حباب بداعة امك
خاب دوخري لا اكلي رزالة وخري من دربي
فدوة فدوة جقمة وحدة بس جقمة
بس ميلي من دربي وانة اجيبلج علاكَة
ما ما
خاب ميلي راح تشهرينة
ربي استرنا بستر لصخول وينج يكشمش ووين ايامج جنتي تضمي الي جوة لشيلة مثل لحرامي
سحب روحة منها كوة وركض فوك وشي بداخل لعلاكة يطلع صوت مثل بطالة كَزاز
بقت كاعدة علدرج وضايجة
شوية ونزل سألها شمالج
اي تسوي روحك ماتدري شمالي
خاب وحكَ الله لأترسلج بيتكم ببسي بس تانيني جم يوم
بتسمت
وهوة عين عليها وعين على امها
ساعة بل٢ يلله رجعو
صوت محمد من برة صاح انعام يلله خل نمشي
كمت بساع جريت جنطتي واريد اطلع
عاينت محمد شكلة مو مثل من راح
جان فرحان ومتحمس
هسة متنرفز ومخنزر
وكفت اسلم عليهم وعيني علي جان يم باب لأستقبال ومحمد واكف بعيد يم لفلح
عينة على محمد ويهمس لصميدع
موكتلك خوش محيميد
ثور الله بزرع الله
ويضحكون
ضحكتة احس نار وتغلي بية
سلمت علكل بقة ببالي سؤال
لبنية الي مستمسكاتي تحمل اسمها هي فعلا موجودة لومجرد اسم
ولو جانت موجودة ياترى شالت تهمتي واني نلت حريتها لو شنو
صوت جدهم يهمس الي بحدية
بوية مالج غرض بهيج سوالف
بس توكدي احنة مانضلم بنيادم
جدو ريحني فدوة
اذا متحجيلي معناها ابقة شايلة ذنبها بركَبتي وحريتي مااتهنة بيها
رتاحي بوية ونامي رغد
مشيت بس مامطمأنة
وطلعت بلية ماعاينلة ولا حتة سلمت علي من دونهم
تقربت لمحمد
سحب ايدي حيييل ومشة
هد ايدي شجاك هيج تسحل شنو بهيمة
لا والله لبهيمة احسن
شنو لبهيمة احسن هاي شدتحجي
امشي ولا نففففس لا ادفنج هنا بكَاعهم
هاي شبيك محمد
شو رحت ورجعت كَالب وجهك
تمشين لو شلون
اذا تبقة هيج تصيح ماامشي وياك
اي هاي ترديها من الله انتي
اي غير افتهم شكو
مشة وميرضة يحجي
صوت واحد ورانة يهرول
نداريت شفتة
تقرب النا وعينة على محمد
خل اطلعكم بلسيارة مسافة طويلة مومال مشي
رغم لمسافة موكلش طويلة بس ماعرف ليش اصر
ركبنة ومحمد مدري شبي
بلطريق عيني على ايدة من يسوق
شفت لمحبس
شوصلة الة
وصلنة كلش قريب لكراج ماقبل يذبنة علشارع
نزلنة محمد اشرلي ابقي هنا يم كشك وكفني ودخل جوة يشوف سيارة ويرجعلي
خو خلي اجي وياك وين تبقيني
ضلي هنا كللللت لتخليني اهينج
هاي شبيك
سألي نفسج
راح وبقيت اغلي شنو لصار
وليش روحتة وياهم احس بيها غاية من عدهم مو لله ومومثل ماكالو نتعرف علي
شفتة مشة ومن شافني واكفة رجع تقرب الي وهوة بلسيارة مد ايدة ياشر
شبي وياج هذا
شبي وياي اسال نفسك
جان مثل لورد شبي من راح وياكم ورجع كالب وجهة
شحجيتلة علية
ليش هيج ضايج مني ويسممني بكلامة
شمالة هذا
ليش تخليني انزل اطرة وصلتين
ياهو ليمة
حجيتلة علية اكيد
اكيد جبت سيرتي حتة تخرب صورتي يمة
نزل وتقرب الي
ويهمس بغضب
انة ماجيب سيرتج
انة إزلمة وهنا لحرمة لمتزوجة منجيبها بسيرة حتة لو بينة وبين روحنا
مومثلةكعد يحجيلنا شلون يبوسج وشيسوي لمن
استغفر الله
شهكت وايدي على حلكَي
هاي شدتحجي غضنفر
صوت محمد يصيح ويأشرلي جان راكب بلسيارة وجاية بتجاهي سيارة خصوصي بس هوة بيها
دحس ورقة بيدي
فتحتها متجاهلة محمد الي بودي اضرم نار بي وماتبرد ناري
عيوني تتلاقف لكلمات وتلتهمهن ودموعي تتسابق وتمنعني من لشوف
ضل حذاي
ضل ولا تشمت عداي
ضل كلك ضل نصك ضل شواي
ليلة اختنك وللموت امش بهداي
انة لمهوال وبشوفتك شحت مواويلي
انة لرسام ويم رسمك رجف حيلي
انة لضاعو هلي وباك لسهر ليلي
انة لخذاه لروج بلية مايردة
انة لحبك بكد لمامش بكدة
انة لتانيت
انة لضليت
عيني إعلى لدرب تهدة ....حنين حاتم
صدري يعتلي وينزل بشهكات مثل لأطفال تاريخ لرسالة بنفس اليلة الي طلعت بيها منهم قبل اربع اشهر وملمسها لورقة بيها طعجات وتعبانة
وصوتة يهمس روحي لا اطكة جدام لوادم اطرة وصلتين
بس
روحي روحي كَبل ما ادفنة هنا
مشيت وعيوني تندار الة
بقت حسرة احجيلة
بقت لوعتي بصدري
ولطريق كلة عيوني تدمع علي
واذكر حجية عن محمد ويزيد بجيي
هنا ادركت بعد فوات لأوان انو طلعتي من بيتهم جانت اكبر غلطة رتكبتها بكل حياتي
مدري شوكت وصلنة مااذكر غير دموعي ولكلام لكاتبة الي وإلي حفضتة بكد ماقريتة
نزلت ويا حتة ماكلف نفسة ياخذ لجنطة مني
دخلت جوة
ومن لباب يصرخ علية
تحبي طلعتي موووو
جبتي لدرب كلة تبجين علي واني .......
صار يتجاوز ويغلط على نفسة
تجاهلت كوني ببيتهم ولوحدي
ونسيت كوني على ذمتة
ونطلقت ادينة بكل لتركة بداخلي من اشمئزاز من افعالة الي بعمري ماتخيلت ممكن رجال يسويهن وية انسانة يحبها
اسمعني زين محمد
ترة كلللشي ادري
من لفلم الي الفتو علية وستغليتو خوفي وضعفي ووحدتي
وقشمرتوني انت واختك بحجة زوجها نسينواني حتة تجبرني اقبل وعقدت علية بلحيلة ولكذب ويمكن حتة عقدنا باطل
لكلامك وانت تسولف للزلم لغربة وتدعي انك بايسني ومسوي وياي اشياء ثانية
اني محمد هيج تحجي بسمعتييي
انيييي
ولك محسوبة عرضك
هي هاي رجولتك
رجال غريب هزتة غيرتة علية وانت ماهزتك غيرتك وكاعد تسرد بطولاتك الهم
اني نفسي تشمأز منك
انت سقطت من عيني من لسماء للأرض
لبيني وبينك خراب خراب وبس
ولوما ماما تجبرني على جيتك وياي وتشترط هلشي علية
مستحيل اقبل امشي بطولي وية واحد مثلك لأن ماافخر بيك
عيونة ينفتحن كل حيلهن وية كل جملة احجيها
صوت اختة تصرخ بية
ايييي طلعي على حققيقتج طلعي
شوفي دادة ماطول عرفتينا ومشمأزة من ابنة اسمعيني زين
محمد ميطلكج اذا متسحبينا لأمريكا
حريتج مشروطة بهلشي وانتي بكيفج بعد
صوتة يهمس الها بخجل من كلامها
ام بيداء احنة ماتفقنة هيج
اني طاوعتكم صح بس لان احبها مالي شغل بغاياتكم
دموعي تجري
بلكاع وكعت من صدمتي
جريت جنطتي ومشيت
بلحديقة لحكني
ايدة حيل سحبتني
نترت دفعت حاولت اخلص روحي منة
حييل خض جسمي
شبيج اصبري شبيييج
وين رايحة شتندلين هنا
لشارع ائمن الي من بيتككككم
انعام ولج والله احبج مالج شغل بكلامها
اني صح طاوعتها بخطتها
بس الله يعلم بغايتي اني حبيتج
واني اكرهك
اكررررررهك
اعتقني لومن صدك رجال
حييل على وجهي طبعن اصابعة راشدي
دفعتة بكل قوة وغضب
ولك اني بابا بعمرة مامد ايدة علية تجي انتة تضربني
ليش عدهم ماشبعتي كتل
بس مومثلك
ذولة لتكول عنهم وحوش احسن منك.
عشت قرابة لسنة يمهم محد دنت نفسة علية ولا احد استخدم اساليبك لقذرة وخدعني
شوفي انعام
طلاك مااطلللللك
خووووش
واعلى مابخيلج اركبي
دفعت ايدة عني ومشيت
طلعت برة
جنت اركض بكل قوتي
اشرد منهم مدري من نفسي
مادري شوكت انتبهت على تنورتي الي جانت صاعدة لنص ساقي بسبب كبر خطواتي
نزلتها
اتلفت خاف احد شافني
سألت على مكتب افيز منة
دلوني بلمعجزة يلله وصلت واهل لتكسيات نهبوني
ماحصلت غير ثاني يوم لصبح
طلعت من لمكتب دموعي تتجارة
كعدت علرصيف
وينك غضنفر
مو كلما اشرد ترجعني
تعال رجعني اني ضايعة
تايهة
كمت وسالت مرور كبالي بلترف كلايت
عن مكتب سفريات
دلاني وركبني بتكسي ووصفلة حتة يختصر علية عناء كبر حجم لعاصمة الي تهت بي مقارنتا بمحافضتي صغيرة لحجم معدودة لاحياء ولازقة واغلبها لايزال صحاري
وصلني لمكتب
ومناك اجرت سيارة خصوصي وية عائلة ثنين نسوان ورجال
بلطريق لنسوان اماتن محاولاتي بللجوء للنوم بأسألتهن لمستمرة
وكل وحدة تضهر براعتها بلسوالف وداخلي يصرخ كافي
جانن شرايج وحدة ماخذها للعلاج ولثانية حاشرة نفسها وياهم غيرة وتدعي انها ايضا مريضة
لثانية تكذبها
وهكذا مر علية لطريق
كأن قدري ينتقم مني بهيج رفقة سفر بكل مرة
وصلت عمان وجان لازم احجز فندق للمبيت
حجزت وطلعت احجز اقرب طيران متوفر
اتصلت بأمي فور وصولي وطمنتها
ومضيت برحلتي الي ستمرت ٣ محطات هلكت بيها بدنيا ومعنويا
نوم ماكو اكل ماكو
لعندي مابقة منهن إلا لقليل
وصلت منهكة
ستقبلوني ماما ومنصور
ونمت نومة طويلة
رجعت لدوامي وشغلي
ماتغير شي غير انو هلمرة الي بكلبي الة زاد هواي
بعد لسمعتة منة
حاجيت امي على محمد
ردها جان بارد وطبيعي
مابيها شي يسولف هيج من باب لتباهي كل لزلم هيج
واختة طلبت تسحبوها هذا يعكس اخلاقها وانانيتها
اما محمد اضهرلج معدنة واقسم انو ماسوة هلشي غير من حبة الج وخوفة من خسارتج لو سافرتي وحالت لمسافات بينكم
راد يضمنج الة بكل لوسائل
ووافق اختة على مقترحها كأسواء لاحتمالات
لان ماعندة حل
ماما تحجين صدك
اي انعام
بطلي تطلعين حجج وتحطين عيوب بلولد
نعرفة شنو ونعرف اخلاقة وابوج جان حيل يحبة
وانتي ياأمي موزغيرة
لعمر ديمشي واحنة هنا بغربة لازم اضمنلج سند
ايباااه عاد شلون سند ضمنتيلي
عفتها وطلعت اتمشة
ومضيت بحياة مابيها طعم لحياة
اضحك على نفسي واتعايش واتعود
ماعندي وقت للراحة شغل ودوام
مضيت
ومضيت
ومضيت
اتجاهل نفسي وذبولي
١٩٩٦
ولاية .....
الساعة ال٨ مساءً
رضاء:- يلله انعام لبسي لبدلة بساع ترة على جية
اي مووانتي خليتيلي مجال اعدل نفسي محتارة بيج عبالك انتي لعروس
ديلله ياعيني شعدنا غيرج
غير انتي مقدمتنا لجميلة مرت حمودي ابو سمرة
سدي حلكَج ام عين زايغة
صوت ام رضاء دخلت تصيح فضنها ولجن
لباب تندك اكيد وصلو
وانغام يمي تكربحت هية وكعبها ......يتبع
مساء لخير حبايب
بنات تفاعلو على كد حبكم للقصة صدكَوني دااتعب بيها ولقادم متعب اكثر
لبارت لجاي راح يدخلون ابطال جدد اربطو حزام لأمان
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!