#خنجر_لغضنفر
#البارت_الثالث_والعشرون_٢٣
#حنين_حاتم
وإنتهى بي المطاف
وحيد غريب منهك اجوب اليالي والمدن اتجول من إنتكاسة الى اخرى
شعر مبعثر وجه شاحب شفاه متشققة ملابس رثة وجسدٌ بالي بلكاد يحمل اجزاءه ويمضي
كمن عاد من الحرب توه حاملا على كاهله بلد مهزوم تفوح منه رائحة الشهداء
ابحث في وجوه المارة عن وجهٍكِ
منذ،ايام وانا اعيش في هذا اليوم
ويتكرر مشهد فراقنا كل يوم وكأنه قد حدث الساعة
ولازلت اسأل نفسي متى ستمضي الأيام
متى سيصبح هذا اليوم ماضٍ وتبتلعه الذكرى
متى سيتوقف رأسي عن جعل وجهكِ نصب اعيني دائما
وجهكِ الباكي متوسلا إياي بخوف ان لا اخذله
ادركت بعد خذلاني لكِ مجبرا
ان العائلة تدمرنا اكثر من الحروب بل اكثر من الزلازل حتى
لطالما حذروني من الناس بينما لم يؤذيني احد بقدر ما فعلوه بي
منذ اخر مرة رأيت وجهك فيها ولمن يحتويني منزلا
ترعبني فكرة ان يغلق باب واحد علي انا وعقلي
فإني على يقين انه سيقتلني
إني اخوض معه نفس الحرب منذ اشهر وفي كل مرةٍ يهزمني
فأستلقي في الشوارع لتحضنني ارضٌ لم اخلق فيها ولم انتمي اليها
ارتمي بشوارعها مشرداً عشوائيّ
لم تعد النوافذ والأبواب تكفيني
فصدري يحتاج ان يسبح بلهواء لا ان يستنشقه
مضيت متضجوراً ملولاً لايحتويني مكان ولاتعجبني رقعة ارض من هذا البلاد مهما كانت جميلة
مضيت حزينا اردد
ذات يوم كنت في عراقي الحبيب حيث لن اكون هناك مرة اخرى
اجبروني على تركه كما يؤسر الجندي
اجبروني على التخلي عن ارضي وعن حبيبتي ومااعضمه من تخلي.....حنين حاتم
قيصر....
بلكاع امام باب لعمارة جنت اتمدد على كراتين وكواني جنفاص واغفة
من ايام مادخلت للشقة ولا نسد علية باب
اختنك احس لبيت يريد ياكلني
احس تفكيري بيها يحفر بية واخاف بيوم يدفني
اشهر،عدت علية هنا
عشت بيهن مثل لمتشردين
ناس تفوت من يمي عبالهم مجدي يشمرون علية خردة
كاره نفسي الي تخلت عنج وكسرتج
كاره نفسي الي لاول مرة نقضت عهدها
اجوب لشوارع بلنهار امشي امشي
مااعرف وين رايح ولا الي وجهة
اهرب من نفسي كل يوم وارجعلها بخيبة اكبر من الي قبلها
اغمض عيوني واستذكر
من جنت يم عمتي لجبيرة اسمها( مدينة) متزوجة بلبصرة
وبام عيني جنت اشاهد
منضر لجنود الي جانو يمرون من يمنة عائدين سيرا على الأقدام من لكويت منهكين رجليهم تتجارة دم
مسلوبين الأسلحة والذخيرة
متخفين بين الزرع زحفا خوفا من قوات التحالف الي ابادت الجيش
يوصلون النة يطلبون مي أو اكل
وجوهم تبجي وتضحك
وعلى لسانهم سمعنة قصص عن طريق الموت
وهمة يرووها النة برعب، جثث اصدقائهم المتفحمة
واجزاء اجسامهم مبتورة
بعد مدة وبساحة سعد تحديدا اندلعت مضاهرة جبيرة
شاركت بيها
وعمتي تدك وتلطم
وهددتني تتصل بجدي وتخبرة
بعد ايام زوجها عرف
وحرفيا طردوني من لبيت زوجها وعيالها
رجعت لاهلي صدري محمل بلقصص
ماهي سوى ايام ومتدت لمضاهرات بمناطق لجنوب كلها
وستوعبت كل لمحافضات
نتميت لمجموعة شباب ثائرة وجنت اخذ اسلحة من بيتنا واطلع وية لشباب خفية
اسرق من جدي فلوس ونحاول نوفر بي اسلحة للشباب
ومن جدتي اخذت باونين وبتوت وحجول نطتهن الي من طيب خاطر بس ماتعرف غايتي اشتري بيهن سلاح
جنة نطلع بليل على شكو قسم شرطة بلمنطقة وحواليها
جانت ثورة جبيرة
سلاح متوفر لكن لقمع جان جدا قوي ووحشي
حاولت اساندهم بكل الي اكدر علي
متسلحا بأفكار لطالما كانت على نقيض مع اهلي
مااحس عمري انتميت الهم
احس انتمائي لأمي فقط
وبداخلي نار من يوم مقتلها واجت هاي الثورة ترضي لنار،لبية
بينما جانو جدي وفدعم بأنذار يأدون عملهم
جنت اني اضرم لنار بمعسكر بعيد عن ديارنا بعد مااخلينا من كل لأفراد لبي
ستسلمو وشمرو اسلحتهم وطلعو
بهلوقت جانت سيارات الأمن الي تم لأستنجاد بيهم من قبل افراد لمعسكر قبل مايستسلمون
تحوط بينا لسيارات خفية بلزرع
ومنتضرين لوقت لمناسب حتة ينقضون علينا
بعد ماوجينة لنار،بلمعسكر احاطو بينا
رمي عشوائي كدام عيني جانو يتساقطون لشباب بشكل مرعب واحد ورة لثاني
واني على اجسادهم اطفر
جان لازم اعيش او انهزم
لأن اذا متت أو نلزمت جدي وفدعم وعشيرتنا بأكملها ممكن يرحون بذنبي
ولأن عائلتنا عدها انتمائات للامن
لعقاب راح يكون عقاب خونة
وما ادراك ماعقاب لخونة
من لاول نبهتهم انو اذا متت يحرقون جثتي ولا يخلوها
جان دعمي الهم مادي بس من اخذنا مركز لقوة حسيت راح نسيطر راح كل خوف بداخلي وجازفت وكلي يفين انو هلثورة راح تغير نضام بأكملة
لشباب حاولو يطلعوني بأي ثمن
بكد ماساعدتهم شفتهم بكل رجولة يرجعولي الدين
وحموني وامنو خروجي الى ان كدرت اطلع وابتعد عن لمكان
وتركتهم يقاومون حتى الرمق لأخير
ومن بعيد وكفت اشاهد اعضم لوحات لبطولة تنرسم كدام عيوني
الي ميموت بلرمي جان يضرب نفسة بسلاحة ويقتل نفسة بأيدة
بوقتها تشاورنا بينا واتفقنا على خطة بينما لرمي جان يحوطنا
اتفقنا الي يموت نسحلة لداخل لمعسكر وبداخل لنار نشمر جثتة تتفحم وميبقة منها حتى لاتبقة جثثنا دليل تندان بي عوائلنا ويتأذون بعد موتنا
بدموع جنت ارفع ايدي يم راسي ورجلي تضرب لكاع بقوة وارسل الهم تحية شرف وفخر وإعتزاز
وبية لندم نار موجرة لانلت شرف لدفاع ولاشرف لشهادة
وعلى اوراق دفاتري جنت اكتب قصة كل شهيد سقط بهلحرب واخفيها تحت كاشية بغرفتي خوفا ان يلكاها جدي
شباب عُزل شالتهم غيرتهم على اخوانهم لجنود الي اغلبهم تفحم بطريق لموت ولقليل عاد للوطن بلقدرة
ثورة استمرت اسابيع قليلة
لكن الي ماتو والي ترحلو بيها الاف مؤلفة
الاف مجرد رقم محد يعرف معاناتهم ولا احد يتجرء يسال عن احوالهم
الي نعدمو بوحشية ماسبق الها مثيل بتاريخ لعراق باكملة
وعن لسان جدي جانت تنروي النا لقصص الي اسمعها بعيون تخفي لدمعة ولحسرة
والي عاشو بمخيم الذل ولهوان
يستجدون اللكمة والدوة واللبس
بعد ماتم قمع لثورة بطرق قمع جائرة
خيبة امل صابتني خلتني اتمنة لو ميت وياهم ولاباقي احمل هلأفكار الي تقودني لجنون لتناقض بكل مرة تحضرني ذكريات الثورة
بقيت منتفض على نفسي قبل لكل
وجنت اصب جم غضبي على غضنفر وافعالة
لدرجة صرنة اعداء
نايم بليل وعلى شباك غرفتي صوت تكرر هواي
كمت واني اشوف ولد ملثم ويشامر على شباك غرفتي حصو
بساع نزلت
سحبني للزرع
وورة لزرع جانو يتخفون مجموعة شباب
صوتهم يهمس الي
عوائلنا ترحلت واحنة مطلوبين بيوتنا حركوها هية ولبيها
صوتهم الي يترجاني ان اساعدهم
وكأن اشعل فتيل لثورة لبية من جديد
وروحي الي لطاما تمنت لو جنت ميت وياهم
جلت بتفكيري ومالكيت نفسي غير واني اخذ واحد منهم لبيت ورانا اهلة ترحلو مقفول
كسرت لقفل وواحد واحد خليتهم يتوجهون الة
لبيت جان جبير يستوعب
جنت اخذلهم اكل بليل خفية
ولصبح اسمع صوت تذمر حدهن عن نقص بلاكل وتتهم لبنات
ويوم بعد يوم يزيد لعدد
اي فرار اسمع بي من جوارينا جنت ائوي بهذا لبيت
خوفا من دوريات لتفتيش والأستخبارات الي تتخفة بزي مدني
جانو لشباب يفتعلون امور تخوف اي احد من لأقتراب للبيت
هواي امور سوو الى ان صار هذا لبيت اسطورة تخويف
ولناس هم متقصر اغلبهم جهلة
ثارو حولة قصص هواي
خوفي يكونون لشباب نعدمو
جدي الي اجبرني على لجية لهنا
وطاوعتة واجيت خوفا على عائلتنا يتضررون
ماجنت خايف على نفسي،
بس نلزمت من ايدي لتوجعني
وبلقيس الي عفتها معلكة
ضعف بية خلاني اكره نفسي
صرت ابات جوة لعمارة
اكره لشقة اكره سدة لباب استوحش اخاف من نفسي علية
فلوس عندي
كل مدة اغير مكاني ويندلني جدي يتقصا اخباري ويدزلي فلوس
لا اتصلت بيهم ولا اريد احد يسمع صوتي
سكنو عائلة عراقية
بنية واخوها بلشقة لمقابيلي
صرت استحي انام جوة لعمارة
خجلت منهم يمكن لأن عراقيين
صرت انام بعتبة باب لشقة بحجة حارة
احس حياتي توقفت لاحاولت الكالي شغل ولا كونت صداقات ولاحتكيت بأحد
جنت اعاقب نفسي على خذلاني الها
مكسور مهزوز خنت وعد نطيتا الها وحلفان
نايم لصبحية وصوت باب شقتهم نفتح
حسيت ايد على وجهي تمسد وصوت يهمس،
فتحت عيوني
وجه بنية صار بوجهي
شعرها بيرمن اصفر عطرها كفخ بخشمي
جانت كلادتها تتدلى على وجهي من رقبتها
صوتها يهمس الي
اخوية بيك شي تحتاج شي
كعدت على حيلي خجلان
لا سلامتج
شبيك لعد واكع
لا اني ماواكع نايم هنا
عاينت على روحي لامخدة لافراش بلكاع نايم
كلتلها دخت ووكعت
دخلت جوة وشوية وطلعت وياها اخوها
جنت ادخن
حيل سحب لجكارة من ايدي وهمس
ليش تدخن على ريكك موزين
ايدة سحبت ايدي كومني وياشر على شقتهم
_شلون ريوك مسوية اختك تعال وياي علواهس
رفضت بس هوة اصر
لبنية نزلت جانت مبدلة
طبينة اني ويا جوة
شقتهم مرتبة رغم كل لاثاث لبيها مستعمل
بس واضح اختة باذلة مجهود ومرتبتها
صبلي جاي وبدة يسألني عن احوالي
سولفت الة مقتطفات عن عائلتي وحياتنا
بعد ماسمع مني وكتفة بلي سمعة
صوته يهمسلي بحسرة ودمعة غارت بعينة ........
بلقيس...
بعد ماسديت لتلفون من انعام
رجعت للبيت طبيت لغرفتي
نهاريت بلبجي
نجبرت على زياد بطريقة نذلة
بعد ماجنت فرحانة بلخلاص منة
وفرحانة بجية قيصر الي،اثبتلي فعليا حبة الي
عدت مدة اني صحتي على كدي اتخربط كل فترة ادوخ مااكدر انجز شغل احس تعبانة
امي اخذتني لشكم واحد جانو ينطوني مي وشغلات تبطل علساس
رغم حلفان امة انو عافت لاعمال وعكستهن
بس بقة عندي اعراض بقيت اتعب من اقل جهد وكلبي يدك علسريع وجسمي يرجف
اجانة زياد يشوفني
جان جاي بسيارة ابو
تغدة وعصرية طلب نطلع
لبست وركبت ويا لسيارة جنت متصورة راح ياخذني مطعم او حديقة
وكفني يم واحد يبيع دوندرمة شترا الي
بصفة جانت كاعدة مرية تبيع حب بصينية
لحب عبارة عن ورق مال كتب ولافيها على شكل قمع
نطاهن الي،ونزلنا نتمشى
صعدنا على جسر حسيت نفسي تعبت
كمت الهث
بلكاع كعدت راح جابلي مي بكلاص من واحد يبيع لبن
بعربانة
غسلت وجهي وطلبت منة يجيب لسيارة لأن ماعندي طاقة امشي بعد
كمبص كبالي ايدة على صدري مدها ويهمس بانفعال
افففف هاي شنو كلبج
دكاتة موطبيعية
بحركة همست
اي لفضل يرجع لأمك
نكت روحة وكام
جابها ركبنا
صوتة يهمس،
بلقيس اذا من لمشي تتعبين شلون راح نتزوج
شنو قصدك
قصدي،لعلاقة
شلون افهمج
انتي دراسة وتعرفين لعلاقة تتطلب مجهود متبادل من لطرفين اذا كلبج تعبان اكيد ماراح اكدر
قاطعتة وصوتي يهمس بغصة
ترة كل لبية سببة امك
وازيدك من لشعر بيت بابا وافق من شافني شبه ميتة
هاي شجاي تحجين بلقيس
حدث لعاقل بما لايعق
ترديني اصدك لجاي تحجي
امي شنو مصلحتها بأذيتج
زياد ترة ماعندي طاقة اشرحلك وابرر افعال امك
وبلنسبة للي حجيتة فوك اذا تحس،نفسك تكربست بية وخايف على سعادتك لزوجية لباب يوسع جمل
احترمي نفسج
متنلام امي من تكول مامؤدبة
عفنالها لأدب
ولنعم منها ومن اصلها
بلقيس كلمة ثانية اسوي شي ميعجبج
شتسوي
بلقيييس
نزلني
زعططي بنفسج بعد
ترة اني مو عمو وتسوين هاي لسوالف خل اكلج من هسة
واني هذا لعندي وهذا طبعي وكتلك اذا ميعجبك الله وياك
حييل ضرب علستيرن
ولج هوة صوجي انيي
اني لوما كلب ابن كلب ماارجعلج
محد ضربك على ايدك
لامحد ضربني بس اني،غشيم
نزلني بلباب ومادخل
عدت مدة هوة مايجي ولا يسأل
بابا شدلنة تلفون بس بقة بغرفتهم
وماجان عندي اي رغبة ان اتصل بيهم او احاول اعرف اخبارة
فات لاوان وكلشي انتهى
بابا ستعجل بزواجنا والح على زياد
وحدد موعد زواجنا بنهاية لشهر
ماسويت حنة لأن اصلا ماعدنة هنا احد نعزمة حتة لجوارين ميربطنة بيهم غير سلام
اخذتني امي لصالون ماصبغت شعري ولاغيرت بشكلي شي حتة حفافة ماحفيت حواجبي مرتبات وخفاف اصلا
سوتلي مكياج وتسريحة بسيطة جان موديل تسريحا لشعر بيرمن ويكلبو كلة على صفحة وعلى لصفحة لثانية قراصة ببروش شذر يزين شعري
بدلتي منفوشة نفشة بسيطة وردن ضيق تور
وزفوني من بيتنا بزفة تجلى بيها لبخل بأقبح صورة
وزياد كايل لأقاربنة بلحرف لواحد
الي يريد يحضر لزفة يجيب سيارتة ويجي
اما الي مااعندة سيارة مااجة لأن هوة مموفر سيارات للزوافيف
٣ سيارات بس اجن عدا سيارة لعروس
وبسيارتة لعنجة زفني حتة ماكلف نفسة يزينها
شريطين لون احمر يم لجامات وواحد بلمقدمة يم لدعامية
بلصدر صاعد ومصر على ان يسوق لسيارة خوفا عليها من انو تتأذة اذا سلمها بيد اي واحد
غاط بلقاط اللابسة وركبتة مختفية ولقميص مغطي نص جف ايدة
حاولت اصعد بلصدر يمة لكشن ماكفة بدلتي
ليورة كعدت ومنا ومنا خالاتة ثنين بنصهن صرت
لطريق كلة جنت ابجي
لا هذا شريك احلامي ولا هاي الزفة الي تمنيتها
ولا هذا الي استحقة على لأقل
ولجاي مايندرة
من وصلوني للبيت الي يكون مقابيل بيت اهلة
رغم اصريت ان اسكن بعيد عنهم
بس هوة كال مااكدر اعوف امي وابوي صعبة ولناس تاكل وجهي هوة اني بس هلواحد
لبيت جان قدييم حيل وجزؤ من لحايط مالتة متهالك وآيل للسقوط
من نزلت من لسيارة
هوة نزل بساع وركض فتح سيارتة وبساع جاب ماي ودارة بيها نزع سترتا ومخبوص بيها
وهي دخنت مدري شبيها
بعد ماصاحو حتة يدخلني
مشيت ويا امة وعماتي وبناتهم جوة بداخل لبيت
من طببوني طشو جكليت علية
هد ايدي ووية لجهال دنك يلم بلجكليت وترس جيوبة
مشيت على كاشيات لبيت لكافعة وبين كاشية وكاشية يجلب كعبي وكوة اسحبة
دنكت نزعتة يلله كدرت اوصل لليجوة
وعلى كرسي نايلون مال مطبخ كعدت
وهوة برة حتة ماطب يمي
لسيارة لبيها امي وصلت ورانا بنص ساعة
دخلت سلمت علكل وتقربت الي
واكفة يمي تحاجيني
راسي صار،على بطنها ومن خصرها حضنتها وببجي اهمس
ماما اخذيني وياج فدوة
وصوت ام زياد ترس اذاتي تهمس،لاخواتها
شوف لعيارة لوما كتلت روحها وتمرضت علي
تمنيت اكوم وافرغ ناري بيها
صبو لعشة الي من همس ام زياد فهمت انو هوة رافض يسوي عشة وكايللهم شنو اني اذبح واطبخ
علمود لناس تمسح اديها بلحايط وتروح واني شحصل يعني اذا اكلو
بس عمو مستحي من لناس وهوة مسوي عشة من فلوسة لخاصة
كلشي بلحياة لازم يكونلة بي ربح
ميسوي شي اذا ميحصل من ورا ربح
ومااعرف شنو ربحة من زواجة بوحدة مريضة مثلي
ورة اكثر من ساعة
طشت لناس ومحد بقة بس امة وامي وعماتي ثنين واخواتة
زفونة لغرفتنا الي هي فوك
نسد علينا باب غرفة وحدة
جابولنا عشة
جان تمن ومرك من نفس لعشة الي صبو للناس هوة اكل بس اني ماكدرت اكل ولا لكمة
صوتة يهمس،الي كومي بدلي
طلعت ملابسي من جنطتي
ماما اصرت انو متدز ملابسي قبل لعرس رغم عمي اجة مخصوص حتة ياخذهن بيوم حنة زياد
بس،هي خافت من مرة عمو وسوالفها
دخلت للحمام من فتحت لماي لبواري بكد مامستهلكة جانت تطلع صوت غريب مثل لتصفير
لحيطان متآكلة ولكاعية مالتة منتهية
نزعت بدلتي ولبست لسيت لأبيض
وطلعت جان هوة لابس كلابيتة لكريمية ومقلمة بجوزري
تمدد يمي علجرباية
وخضنة علاقة اثبتتلي ان هوة بخيل موبس بلمادة
جان بخيل حتة بمشاعرة
مجرد ماجثى على صدري حسيت نفسي علة
دكات كلبي تتسارع حسيت روحي جاي تنسحب مني
جسمي رتخا وعيوني غمضن اسمع صوتة يهمس باسمي ويضرب على وجهي وراها
صوت قبيح يهمس باسمي بطريقة مرعبة
ادين حاوطن ركبتي وحييل يضغطن عليها
رجلية نسحبن بقوة ومن لجرباية بلكاع وكعت
حسيت راسي نصدم بشي
وزياد بكل صوتة يصررخ ..........
تهاني ...
بين لزرع جنت واكفة متانيتة
برة حوشنا واهلي نايمين
تاخر خفت لا احد من ويلاد عمامي يطلع ويشوفني
نويت اطب للحوش وحسيت ايدة على متوني وحيل بين لزرع سحبني
ايدة لتفت على خصري ويهمس
وين لخلاص يتهاني هلضفرت بيج
هااا يعني انت ماجاي حتة نحجي بسالفتنا
ماكو احلة من هاي لسالفة تعجبج صدكي بس تعاي
لا لا انة سوالفك لغبر ماتعجبني
ها اعنجرلج لصفحة لثانية
اسمع فدعم
ابن عمي ليوم اجة هوة وعمي وتفقو على باجر يجون ويقرون فاتحتي
اي بيها لخير
ياااع تحجي صكَد
اي جا ابن عمج اولة
شمالك فدعم وينة حجيك
كلام اليل يمحي لنهار
ها هيج صار لحجي يفدعم
روحي طبي جوة لصباح رباح
ولك ياصباح يارباح همداني على هلغسمة
طبيت جوة دمعني بعيني
انة واخوتي لزغار ننام بحجرة وحدة
حتة بجي مااكدر ابجي
ردت احجي لزوري بس استحي ادك باب لغرفة عليهم
ضليت للصبح اتكلب بفراشي
فجرية وية كعدة ابوي بساع كمت لميت فراشي وركضت خليت لقوري علنار
علما صلينة طلعت ريحة لجاي
رحت طفيتة وطلعت جبن من لثلاجة وطكيت بيض وجبتة الة
ابوي يشتغل نداف
يطلع من لفجر على رزقة علما تطلع لشمس هوة مخلص كل لبيدة وتجي لنسوان تاخذ شغلها
جان علي رجل كل لمعرسة نضدة فراشها تطلع من يمنا
كعدو هوة وامي على لصينية وانة بلمطبخ الكَط بلتمن وبعلو صوتة يصيح على ستار
شني بوية ماتكعدوون طلع لضوة
بوية كعدو صلو
امي تهمسلة
ابو ستار خليهم نايمين
زوري حامل وتعبانة وستار بليل اجة متأخر
عينة علية
اشرلي تعاي بوية
حطيت لصينية بلكاع ورحت يمة
ايدة حاوطت جتفي ويهمسلي
بوية انتي كبرتي وستحقيتي زواج واولة لناس بيج ابن عمج
شنهي كولج
دمعة من عيوني طاحت وصوتي بحسرة يهمس
لشور شورك بوية
مالي كول من بعد كولك
بعد ابوج ردي كملي شغلج
وصوتة يهمس لأمي
ليوم اخوي وكرابتنا جاين يقرون لفاتحة تزهبن وزهبن لضيافة
امي عيونها علية بصوت مكسورة جاوبتة
تامر ابو ستار،
نكعت لتمن وبساع دخلت للحجرة
جانو خواني بعدهم نايمين
دحست روحي بينهم بلمكان لمتعودة انام بي
عبن يتعاركون علية كل واحد يريدني يمة
انام بلنص واخلص من هوستهم
فزو لجهال واحدهم تكول مكتول يتباجون
بقيت ابجي وياهم على حالي
طبت امي تصيح علينا
ولكم شمالكم تبجون
ولج انتي لبعيرة شمالج تبجين
انة ماريد حكيم ماريدنة
اششش صوتج لايجي اخوج ولج
اي بس انة ماريدة وحك الله اكتل روحي يو اشرد مثل كويكة وافضحكم وحك الله
لباب ندفعت وستار دفع امي ودخل
حيل حصرني بلزوية وايدة يضرب بية بقوة
مااذكر واحد من اهلي كتلني
من وانة زغيرة ابوي مايرضة اي واحد يكطني عبن انة لبنية لوحيدة
حتة هوة ماجان يطكني
ولأن مامطكوكة جنت من لصياح ابجي واخر واطيحن
من صياح ستار علية
الي نفعل لان سمعني اكول اسوي مثل كويكة واهدد امي
حيل ضربني
من كد ماخفت تدررت على روحي
عين اخوي على ملابسي ولكاع الي تنكعت ويصرخ علية
ولج هاي شني
همستلة بخجل
هسة انت شلك غرض كمل طكَ كمل
ضحك بصوت عالي وتحول غضبة الى ضحك بهستيرية
واخواني لزغار يأشرون علية ويغنون
من فشلتي وخجلي منة ومن اخوتي لزغار مااعرف شحجي
كومتني امي
وزوري تحجي على ستار وتلوم بي وتكلة بس يجي عمي اكلة عليك طكيت تهاني
وهوة يضحك ويكللها
ميحتاج تكليلة هسة لفروخ يشهروها بلناحية كلها
بقيت بلحمام ساعة ابجي ساعة اضحك على روحي
وية طبت ابوي سمعت صوت لفروخ يحجولة
ضليت خاتلة بلحمام
ابوي من ورة لباب يهمسلي
طلعي بوية اريد اسبح
ما اطلع فروخك شهروني مااطلع
جا طلعي لحكي عليهم ترة راح يرحون لبيت جدج بعد مايكدرون ماتبات بحلكهم سالفة تدرين بيهم
طفرت على حيلي من لخوف طلعت الهم اركض
بباب لحمام زلكت وطحت
وستمر ضحكهم علية
كومتني زوري
طبيت لغرفتي ابجي واقشمر بلفروخ خاطر مايرحون لبيت جدي ويحجولهم
ياصخام وجهي لو سمع فدعم
اطم روحي
يااع واذا درة هسة هوة بايعني ويكلي اخذي ابن عمج
للعصر ندكت لباب وزلم طبو ونسدت باب لأستقبال ولمطبخ
امي محضرتلهم لضيافة
طبينا جوة بغرفة امي ولباب نسدت
بقو اكثر من ساعة يسولفون
شوية واجة ستار وابوي
اشرلي حطي عباتج على راسج وكومي
عيوني على امي
دنكت راسها كأن تكلي مابيدي شي
مشيت وياهم
وصوت ستار ليضحك ويهمس لأبوي
والله وكت كبرت ام شخة وراح تعرس
بلله لوادم لو درو بيها مساع سوتها على روحها شيكولون
ابوي كاتم لضحكة ويعضلة شفة يكلة اسكت
انة كوة مسكت لفروخ بلفلوس،هنوب انتة لاخر
ورة باب لديوانية كعدوني وصوت لزلمة من جوة يهمسلي
هل تقبلين لزواج من............
انعام...
صحت علي
وين تريد بية
ندار علية وهمس
موتردين تعرفين شغلي
نداريت علجامة وسكتت
بقت لسيارة تمشي الى ان عبرنا ديارهم
طلعت علتبليط
وكف وهمسلي نزلي
نزلت وكفنة كبال مجموعة محلات واحد يم لثاني
وبلكيعان زيت وريحة لبانزين ولدهن تارسة لمكان
ايدة سحبتني ومن جيبة طلع مفتاح دنك علقفل فتحة ورفع لكبنكَ ودخلني
ايدة علضوة شغلة
داير مدايري براميل زغار نايلون مقبغات
وعدة مال سيارات
يتجول بلمكان فاتح ايدة وينتر
هذا شغلي
هنا اشتغل انة
هاي ادية تشوهت من جويات لتيزاب الي نخبطة وي مواد ونديرة للباتري مال لسيارات من ينقص
هذا شغلي
عيوني تتجول بلمكان وتبتعد عن لقاء عيونة لثائرة بسبب شكي بي
عندج بعد سؤال
شفتي زين لوتردين اشوفج
لعد ليش جنت تتهرب من لأجابة على سؤالي وليش على مرتين من جوة دشداشتك اشوف لبنطرون لزيتوني لابسة
ايدة سحبتني لبرة لمحل سدة وقفلة وركبنة لسيارة
بغضب من الي يسوي همستلة
ها اشو تجاهلت سؤالي لو يمكن تحاول تفكر بجذبة تقشمر علية بيها
لسانج مثل تفكة ومحاجيج مثل رصاص يستقرن بصدري بوية اخبرج ناعمة وترفة شمالة لسانج رشني مثل رشة لتفكَة
بلله عليج انة يايوم مجذب
انة لغلط نفسة ومايوم بينت روحي زين
لعد بشنو تبرر
من زمان جدي بث بين لوادم اشاعة خلاصتها انة اشتغل بلمخابرات
انة ماجنت راضي علي بس جنت امتثل لأمرة
عبن خايف علي
جانت حجايتة دوم
طاوعني بوية انة اخاف عليك من روحك خل لوادم خايفة من رتبتك وتهابك لجذب موبفلوس
ولأن يدري بحدهن وولد عمي جليل مو على صلح وياي
ويخاف يبثون جذبة جدي بين لوادم
جان لازم يقنعهم
لهلسبب جنت انزل من لسيارة ببدلة لأمن والبس دشداشتي قبل مااطب اتعمد اخليهم يشوفوني حتة يصدكون انة نتميت لجدي
وحجيك من فلتتها من جنت بلسجن وكتلي جنت الزم لمساجين ماارحمهم
جنت كلما تاخذني ذاكرتي لذاك ليوم
ذاك غلطي
بلحضة شيطان دفعت ثمنها من دم كلبي
من اتذكر جنت اروح ويا للسجن واخلي يطلعلي شكو واحد ملزوم بتهمة زنا
والزمهم اطلع ناري بيهم
جان اعتقادي امي وياس زانين نار بية تلهب سنين
واحس لعار لحك حتة ابوي وهوة بكبرة
كرهت كل لنسوان وعملة كوثر بية زادت لطين بلة
رغم اجهد نفسة بلشرح بس مااعرف ليش ماقتنعت
ماعرف ليش حسيتة من صفن جان يفكر بجذبة
سكتت لحد ماوصلنة
وقبل ماننزل صوتة يهمس الي
انعام راح نطب للبيت قبل مانطب كليلي اكو بعد بداخلج شك بية
حتة نذبحها على قبلة
همست لاء ماكو
دخلت جوة
على كيف صعدنا لدرج
طبيت قبلة لغرفة ضلمة بلفراش ندحست
سحب مخدتة وبلكاع تمدد
عدت ايام هوة باعد روحة عني
مااعرف اذا اني غلطانة ولازم اعتذر لو لاء
بس،حز بنفسي تصرفة حييل بعدنا عرسان وعازل نفسة عني
مفتقدة دلالة وكلامة حيل
بوقتها كتشفت بي ميزة جديدة
انو هوة ماعندة حل وسط
لو رومانسي ويدلل لو عصبي وقاسي
كاعدين علأكل جوة كلنة كملنة وكل وحدة شالت شي من لسفرة
ايد بيبي شكرية سحبت لمواعين من ايدي وهمستلي غسلي ايديج ولحكيني
غسلت ورحت وراها لغرفتها
كعدت يمها
عيوني عليها بعد مانزعت لجسر مال لسنون وخلتة بكلاص ماي
نص لكلمات عدها تغير لفضهن
صوتها يهمسلي بحيرة
هاا شمالكم
شني متعاركين
لاء ماكو شي
جا شمالة غضنفر مغتاض ووجها معفوس كبل يومين يطب ويطلع يضحك للهوة جنة واحد غير غضنفر لأعرفنة
وانة لفرحة لبية على ضحكتة تسوة لدنية ولبيها
انة اول مرة اشوفة فرحان هيج
نعيمة غضنفر،متعوب بروح ابيج ييمة لاتعلعلينة
هوة حنيّن ويحبج توكم عرسان يمة مومال زعل
دموع من عيني نزلن
مهضومة منة حيل احس لصار،ميسوة زعلة مني وجفائة
سحبتني من ايدي وتمسح بدموعي
لاتبجين يمة وروحي صالحي
غضنفر،زعلة صعب ومكروه يو زعل
كلها حاسة علي حتة جدج
اني ماسويت الس يستوجب زعلة بس هوة مدري شبي قاسي وياي
مايقسة إلة من حبة
لحجاية لتطلع من حلكج مو مثل غيرج
لأن معزتج اكبر زعلة عليج يكون اكبر
راحت علكنتور فتحت لباب ومن لكنتور طلعت علاكة
بيدي حطتها وتهمسلي
فتحيها
فتحتها
جان ثوب نوم كلاسيك تصميمة يشبه لثياب لجنت اشوفهن يامريكا مومثل تصاميم ثياب لنوم لعراقية يصير بيها ريش وتفاصيل تضحكني
وعلبة زغيرة فتحتها بيها تراجي ذهب عى شكل دلة
صوتها يهمسلي
ضما يمي كبل شجم ليلة وكالي جدة لاتفتحينا
ديري بالج تفتحي
بس انة ضليت احوس ماكدرت إلة فتحتة
اثارية غضنفر هم بي بلة
تضحك وتغمز الية
لاتضحكين يلفاهية دخذي لبسي الة وتسطحي بفراشج وهوة بحدة يجي يصالحج
اخذيها مني
اخذتة منها واضحك على كلامها
صعدت فوك فتحت لعلاكة
ماعرف شنو لخلاني البسة واسوي مثل ماكالتلي
شوية وسمعت خطوات علدرج
بساع طفرت للجرباية وسويت روحي نايمة
نفتحت لباب ودخل
عيوني ترمش عاصرتهن حيل
صوت خطواتة تقترب الي
ايدة على خدي ويهمس .....يتبع
مسائكم فل وياسمين 🥰
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!