رواية خنجر الغضنفر الفصل الثالث والأربعون 43 - بقلم Hunen23Hatum

#خنجر_الغضنفر
#الجزء_الثاني_بارت٤٣
#حنين_حاتم

بغداد الجديدة ......  ٢٠١٢
طلعت من المدرسة ركبت وية ست شمم لتلفون بيدي اتصل بأنغام ماترد
كلبي قطعة ثلج وتتلاشا وية كل دقيقة تمر
علما وصلت لمدرسة لجهال اني ذايبة ومتجانسة وية كشنات السيارة
نزلت مرتبكة ادية ترجف وصوت شمم من ورة لجامة سمعتة
..اركن والحكج لتطبين تانيني
دخلت ليجوة همي اشوف لجهال واطمأن عليهم
من لباب شفتهم جانو ملثمين وتارسين لممر كلهم لبسهم مدني وكل واحد شايلة رشاشة اكبر منة
وصلت للأدارة جانت خالية
مدرسة لجهال مختلطة لحد رابع ابتدائي بلخامس يبدون يفصلون لولد بصف ولبنات بصف
قسوَّرة صف  خامس وإمتنان سادس
خوفي جان على إمتنان لأن شكلها وجسمها ابد ميوحي انها طفلة
كلشي بيها يشبههم
كل عمرها ١٢وقياس رجلها ٣٨  تتلابس وياي بلأحذية والملابس
طويلة كل الي يشوفها عبالة راسبة
دخلت من لباب واحد سألني
تفضلي اختي
برجفة وخوف جاوبتة
اطفالي هنا يداومون

رد علية بلطف رغم شكلة ميوحي هيج
بس يمكن تعاطف وية حالتي
حرفيا جان كلشي بية يختض

دخل جوة
باب لأدارة الي يودي علصفوف جان جام ٣ طلاقات
يجي ورا ممر عريض،وورا هم باب جام يدخل على الصفوف
ورا لباب جنت اشوف لأطفال حابسيهم
لزغار يتصارخون ولكبار يسكتون بيهم

دخل جوة من ورة لبيبان جنت اسمع صوتة وهوة يسكت بيهم
وهمة يزيد صراخهم خوف من عندة ومن لسلاح الي بيدة
فتح لباب وهوة يطلعلي منة وقسورة
ويحاول يدفع لباقين الي من خوفهم يردون ينهزمون
سد لباب عليهم
وكدامة جانو منة وقسورة يركضون تقربو الي
حضنو جسمي كل واحد من صفحة
بساع سحبتهم من اديهم ومشيت
ركبنا لسيارة ما صعدت بلصدر ليورة صعدت يمهم واني احاول اهدئهم وافهم شصارر

منة تشرحلي وقسورة يقاطع بيها

منة .. ماما من صار لأنفجار وراها سمعنة رمي اكو ناس ورة مدرستنة كامو يرمون على ناس من لصفحة لثانية
بلبداية طلق وبعدين كمنا نسمع اصوات قوية صديقتي كالت يمكن هذني  صواريخ
شوية وطبو علينا ذولة جيش المهدي
حصرو  المعلمات والمعلمين بغرفة
واحنة حصرونا جوة
بقو الي واكفين برا يرمون مدري على منو
والي كاعدين جوة يمنة واكفين على لبيبان وأسلحتهم بديهم ويكلولنا لتخافون

جريت نفس عميق واني اتفحص اشكالهم
خوما احد اذاكم خوما بيكم شي
منة عيونها غوركَن عين علية وعين على ست شمم
دنكت وكالت
لاء كلشي مابينا
كلبي نعصر من كلامها وتوترها ولدموع لترسن عيونها 
اريد بس اوصل للبيت صار لطريق شطولة

رجعت اتصل على انغام رأسا يطوط ماعرف هي ترفض أو هوة ينقطع 
ارجع اتصل على منصور خارج التغطية
طمنتني شمم وكالتلي هاي بسبب  لأنفجار مديتحصلون لتخافين

جانت لطرق ازدحام
وصلنة للبيت لمنطقة هوسة لأنفجار بنفس منطقتنا بس  لكَدام بداية المنطقة

تشكرت من ست شمم
بعدني احجي وياها بلباب
نفتحت وطلعت انغام حضنت لجهال وتقربت الية بوستني تهمس الي لحمد لله على سلامتكم ولج كلبي راح واتصل بيج ماكو
لو متأخرة شوية جان لبست عباتي وطلعت اهبد

دخلنة جوة جان الجو بي برودة والسما مغيمة  حمرة بداية عجة
بلمطبخ كعدنة داير مداير لصوبة نتدفة
شوية ودخل منصور بيدة خبز حار نطا لأنغام
وتحمدلنة لسلامة وتقرب يسأل ويستفسر
عيوني على منة الي مركزة نظرها للأرض
انغام علطباخ تحرك بلأكل وتسأل بية شصار
كالو لأنفجار قريب على مدرسة لجهال
احجي وياها بس فكري مو يمها
ماتحملت انتظر نطب لغرفتنة  سحبت ايدها واخذتها للغرفة
سديت لباب
ايدي على متونها وهمست صوتي ختنك ودموعي نزلت
ماما شبيج احد اذاج

عيونها لوساع تحولن الي بركى محتاجة ازغر حصا حتة تفيض
وصوتها يهمس
ماما هذا الي فتحلنا لباب وطلعنا
خلة ايدة ب
ماكملت نفجرت بلبجي
ماما اخذني بلممر ومدري شنو سوا بركبتي
نزعت حجابها وتأشرلي على ركبتها
جان اكو اثر بقعة زغيرة لون احمر
دموعي تجري
حيل لصدري حضنتها اصعب شعور انو قطعة منك يتعرضون لأذى
صوتها على متني يصرخ
بس اني بس اني
ماسوا هيج وية صديقاتي
بس اني لحقير سوة بية هيج
ليييش ليييش

ايدي على متونها وجسمها الي ينتر بأنفعال
اني بعد مااروح للمدرسة مااروح
عبد الله ابن لفراشة شافة من جان يعضعض ركَبتي بلممر وهسة يكل لصديقاتي كلهن وبعد ميحجن وياية

دفعت لباب انغام
...يلله صبيت تعالو

تقربت تسأل شبيكم
منة تهز براسها وتهمس الي
لاتكولين لخالة لتكَليلها

نداريت على انغام الي لازالت تستفسر شبيكم شصاير
..روحي هسة احنة لاحكيج
غمزتلها
طلعت
تقربت لمنة
لفيت ايدي على متنها وحاولت قدر لأمكان ان احتويها
شكد حجيت فهمت
الي صار  محد يلومج علي
جانت مصرة انو انقلها بمدرسة ثانية
ماكان مني غير انو استجيب الها بعد ماوصلني حجم الأذى النفسي الي بداخلها

تغدينا ونامو لجهال
منصور هم نام
بقينة اني وانغام بلصالة نسولف
رأيها جان من رأي منة
انو انقلها
وقررت انقلهم ثنينهم
نفس لمدرسة بس واحد دوامة عكس لثاني
لمدرسة شوية بعيدة بس منصور كال اني اخذهم وارجعهم بطريقي

عصرية حلت من لمدرسة جانت مغندبة
نزلها منصور وراح يفتر بلسيارة على باب الله
اصحح دفاتر لطالبات وانغام ترش بلباب واكفة
طبتلي كالبة وجههة

...شبيج
نترت
مابية شي
وطبت ليجوة
انقهر عليها طفلة بجسد انثى بالغة
لحكتها اريد اعرف شبيها
واني بلممر اسمع صوتها
جانت على ركبها بلكاع كاعدة تناشغ ولازمة لصورة بيدها وتحاجي بي

ايدي على حلكي اكتم شهكاتي
ونتجيت على لحايط اعاين الها تحاجي لصورة ودموعها يجرن

عمو انت مو كتلي اني ارجع واي واحد يأذيج اموتة
موكتلي من اجي سولفيلي عليهم
شوكت تجي عمو شووووكت
اني تعبت واني احسب الأذية واضمهن الك واتانيك حتة اسولفهن
وانت تأخرت هواي
من كد ماتاخرت اني كمت انسا
شلون راح احجيهن الك
اني صرت جبيرة بعد ماتكدر تشيلني نفس قبل
وماما لبستني حجاب من لثالث وصديقاتي كلهن مالابسات
بس اني
شوكت راح تجي
انت عفتنا وبابا هم
كلكم عفتونا كلكم
خليتونا بلا كَرايب
هاي صديقاتي كلهن عدهن بيت جد ويروحن الهم
بس احنة ماعدنا

ندارت علية من سمعت حركة رجلية
حيل كامت على حيلها تريد تطبك لباب
حاولت افتحة
صوتها من ورة لباب يصرخ وتدفع بي
روحي عني ليش تراقبين بية وتتسنطين  اني اكرهج

دكيت لباب اكثر من مرة مافتحتها
صوت بجيها اسمعة من ورا لباب
يعني ليش اني ماعندي ابو ليييش
بابا ويين لتكليلي مسافر
اشو لااشوفج تخابري ولا فد يوم دزلنا رسالة ولادزلنا مصرف
اني كبرت كافي تجذبين علية
اني اريد اهلي
اريد بابا وعمو فدعم وعمو صميدع 
اريد خالة زوري وخالة كشمش وتهاني وعمة امريكا وعمة مدينة
احنة ليش من دون لناس ماعدنا كرايب
صوتها يرن بأذاني
وانغام تعيد علية الكلام الكالتة الي قبل تسع سنين

"ماترهم تبعديهم عن اهلهم مصيرهم يكبرون ويسألون عنهم اطفالج موزغار منة خمس سنوات لايمكن تنساهم وحتلو نستهم ونست تفاصيلهم راح تكبر راح تحتاجهم قسوّرة ولد ميرهم بدون اهلة وعمامة لدنية تخوف لابد لو كبر يسألج عليهم ذيج لساعة شراح تجاوبيهم وياعذر ممكن يقنعهم "

..ها انعام مو كتلج هذا اليوم راح يجي
مو كتلج لوكبرو صعب تقنعيهم وتضحكين عليهم وبعد وبعد ياانعام الحبل علجرار منة لو نخطبت ماراح يسألون عن اصلها وفصلها ماراح يكلولج وين ابوها
وقسورة نفس الشي لو ردتي تزوجي شنكول وين اهلة طالع من فطر لحايط

كافي انغام  لبية مكفيني
اني اهلهم واني عشيرتهم واني كلشي
لااريدهم يندولهم ولا اريد اسمع اخبار عنهم
يكفيني لعشتة ولشفتة عدهم
يكفيني انو الله بمعجزة نجاني ونجا اطفالي
الي منهزم من الموت يخاف من الراشدي
واني مابايعة اطفالي
يكبرون ويوعون ويعرفون كل لسويتة من صالحهم

اطفالج بمرحلة مراهقة وديقارنون نفسهم بباقي لجهال ماراح تقنعيهم
وخصوصا منة

كمت واني اتجاهل اخر كلمات كالتهن
منة ااااخ يامنة الي عدها طفلة تتمتع بلهبات الألهية  الي تتمتع بيها بنتي المفروض تحمد الله كل يوم
إلة اني دوم اكول ياربي ليش مانطيتني طفلة تفكيرها على كد عمرعا وذاكرتها مثلها مثل اي طفل من عمرها
منة اكتشفت انها عدها قدرات ذهنية من اول يوم داومت بي
من اول ابتدائي مااذكر بيوم درستها
ترجع من المدرسة حافظة كل الدروس الماخذيهن
لكتب نستلمهن ونسلمهن جدد لأوراق متلازكات ببعض
وبعض السنين ماستلمت كتب كاملة
جانو يسلمون كل طالبتين عايشات بنفس المنطقة كتاب واحد ويكلولهن اقرن سوة
هي جانت تستغني عن لكتاب
تأخرت سنة بتسجيلها جانت تخاف وتبجي من المدرسة
بلشكل والطباع تشبهني هواي لون العيون الناعسة والبشرة نعومة الملامح الشعر السرح
اما لطباع فجنت اشوف نفسي بيها وخصوصا عنادي وكبريائي وعزة نفسي الي ببعض الأحيان ابالغ بيهم هواي لدرجة انو مااحس على نفسي
واكثر صفة ماخذتها مني
هي القفلة
اذا قفلت على شي يعني خلاص لو يجتمع الإنس والجان على انو يقنعني ميصير إلة الي ببالي
اما صفة الغرور الي لطالما جانو يتهموني بيها وجنت انكر
شفتها متجلية بمنة بشكل كبير
بس ماجان غرورها بشكلها بلعكس ابد مااشوف عدها اهتمام بشكلها
جانت تنغر بدراستها تفوقها وذكائها
ذاكرتها الجبارة الي دائما تقحمنا بمشاكل لاحصر لها
بلجسم تشبههم هواي
الطول الفارع الي يتميزون بي
ضخامة جف الرجل
قسوَّرة مايشبهني لاشكلا ولاطباعا
هادء ومنزوي طيوب زيادة عن اللزوم كضة عمرة مكتول ومبيوكات اقلامة ولفتة
وكلما يكبر يبين الشبه الي بينا وبين قيصر بلملامح

عدن شكم يوم وتمرد منة يزيد
الى ان وصلت بيها انو قبل اجتماع اولياء الأمور بيومين بلغتني انو ابوها اذا ماحضر هذا الإجتماع بعد متداوم
فهمت حجيت قنعت اكلها مسافر تكلي اي يكدر يجي يوم علمودي
ماقتنعت ولا اثنيتها عن اصرارها وعنادها الي جنت اشوف نفسي بي
الى ان اجة يوم الأجتماع كلت ورة لأجتماع اقشمرها واخذها اشتريلها ملابس واكعدها بمطعم وافرها وتنسا
بس بيومها ماقتنعت بكل العروض الي قدمتهن
ولفت نفسها بلحافها وماتعشت
دزيتلها انغام دزيتلها منصور حاجوها
قفلت تمام
وفاجأتني يوم ثاني من وعيتها لصبح حتة تبدل وتروح للمدرسة بلرفض القاطع
حجيت بلين مرة وصياح مرة
وصلت بية ضربتها
وعنادها يزيد
تأخرت على دوامي ومنصور هم تأخر على شغلة
عفتها واني اهدد انو من ارجع عقابها عسير
مر علية ليوم لتفكير دمرني
ماخلص لدوام إلة واني متهالكة
رجعت تغديت ونمت
عصرية كعدت ادور عليها
جانت كاعدة هي وانغام بلحديقة
اسمعها تحجي وياها
تحاول تقنعها

...انغام ليش خالة هيج تسوين بأمج
وين تردين توصلين بهذا عنادج

...منة اريد اعرف بابا وين
وبيت جدو ليش ميجونا ولا نروحلهم
هذا لبلد شكدة شكبرة ليش من دون الناس احنة ماعدنا اقارب لاببغداد ولابغير محافظة

...ولو عرفتي شنو لراح تحصلي

..هواي اشياء

..وشنو هلأشياء

..اتساوا وية صديقاتي
بيوم الخميس كلهن يكولن باجر نروح لبيت جدو
وبلعطلة يسافرون لخوالهم ولعمامهم
وتصير عدهم اعراس ويرحن يتونسن
ويسوون سفرات سوية ويطلعون لجزيرة بغداد وللزوراء

..ليش احنة مو جاي نروح
امج بشنو مقصرة وياكم كل فترة تاخذكم للزوراء

..اي بس لأختلاف انو نروح وحدنا
ماكو وجوه جديدة
ماكو اقارب
نبقة اني وقسوَّرة حاطين ايدنا على خدنا ومكابليكم ومتخلينا نلعب بلألعاب
ونشوف لناس جاية كل عائلة شكبرها لعمات ولخالات
الي جايببن بايسكلات ويسوون سباق والي جايبين طوبة ويلعبون
خالة احنة نختلف عن لناس بكلشي
وهذا ابسط مثال

..هذا لشي لابيدها ولابيدنا
الله قسم النا نكون هيج

..الله ماقسم النا
هي الي ختارت هذا الشي
اني موزغيرة خالة
وترة اسمعكم من تسولفون انتي وياها على بيت جدو
واعرف كلش زين هي متريدهم ولاتريدنا نحتك بيهم
بس احنة نحبهم ونريدهم

..وشنو الي عرفتي عنهم حتة تحبيهم وترديهم

..كلشي اعرف وكلشي اتذكر
تردين اسولفلج
وهمات حتة تسمع ماما الي واكفة ورانا تتسنط

انعام.. ندارت علية تباوعلي بخزر ماعاجبها
نكتت ملابسها وكامت

لزمتها من معصمها بغضب خضيتها
.. بكد القندرة وحجيج اكبر من راسج  شلون تتسنطين علينا اني وخالتج من نسولف
رمقتني بنضرات فورت دمي
بعدت ايدي عنها وهمست الي

... تعلمت منج

ادبسسسسز احترميي لا اجي اكسر راسسج

بقيت اصيح فايرة
تقربت الي انغام

..انغام شوفي هاي طريقتج هي الي تخليها تتمرد وتريد ابوها وتريد تتواصل ويا
تحسج متفهميها
تحس لو هوة جان موجود جان احتواها اكثر منج

انعام.. تردين لصراحة هلشي صحيح 
رغم عدت سنين بس احسها لسة تذكر دلالة وتفتقدة
اني مااعرف افرط بلدلال مثل ماهوة جان يسوي
ولا الي خلك عنادها
عناد على عناد يولدن بركان

..انغام خليها هلأسبوع تكعد بلبيت راح اطلبلها اجازة

...انعام لامترهم هي بكلوريا يمعودة مبقالهم شي ويعطلون خل تكمل مادتهم وتكعد بلبيت عود منا للامتحانات يحلها الف حلال

وشلون تاخذيها سحل مثلا وهي هيج معاندة

صفنت بوجهها لأول مرة احس بهلعجز

وعدن يومين هي معاندة مترضة تداوم قنعت حجيت قشمرت اغريتها بفلوس بطلعات
كلشي مافاد
انتهى بية المطاف واني الزمها اكطعها واتربع بلصالة وادك والطم
ماوعيت غير على صياح منصور وهوة يخلصها من ادية

طبيت للغرفة وسديت لباب وصوت بجيها وصياح انغام علية وهي تلوم بية
صفنت على نفسي بحياتي ماضاربتها هيج ضرب
لليل اني ماطلعت من لغرفة
باتو بلصالة ثنينهم
ساعة ب١٢ بليل طلعت من لغرفة جنت جوعانة حيل
عاينت الها نايمة
تقربت يمها وجها وارم من البجي
على ساقها جان اكو اثر ٣ عضات واسناني طابعة
دموعي تنزل
مااعرف شلون هيج سويت
بقيت ابوس بأيدها
حست علية تحركت فتحت عيونها شافتني
جرت لغطة على وجهها حيل ودارت علصفحة لثانية

عدن ٣ ايام هي متحجي وياي
ولاتكعد ويانا على صينية
الها اكثر من ١٥ يوم ممداومة ولأدارة رفضو ينطون بعد اجازة إلة ورقة من الصحة وهي معاندة

دخلت عليها للغرفة جانت متمددة على لجرباية
كعدت على طرف لجربابة عيوني ماليها الدمع حاولت ان اكون مثلة
حاولت ان احتويها

لزمت جف ايدها سحبتها مني

..منة وين تردين توصلين حاجيني

..تعرفين الي اريدة بس تغشمين نفسج

..اكو وحدة تحجي وية امها هيج

..ليش اكو ام تسوي ببتها هيج

..علمود الضرب؟!ياما وياما اني وخالتج اكلنة ضرب من بيبيتج كلشي جننا نريدة جان ممنوع وكبرنا وعرفنا شكد جانت رايدة مصلحتنا بكل قرار اخذتة
كبرنا وعرفنا انو غريزة الام عمرها متخيب
والي تكولة الأم دائما يصير
عرفنا انو الأم عدها نضرة مستقبلية ثاقبة
نجهل اسباب قرارتها بس بعدين نفهم ونعرف ان هلقرار اسلم قرار ممكن يتخذة انسان

عينها علشباك تتضاهر بعدم الأصغاء الي

سحبت ايدها بقوة
إمتنان شنو المطلوب مني فهميني شنو الي اسوي وتبطلين عناد وهلحركات
ساوميني
ساومي امج يابت بطني وفهميني شتردين

اريد بابا اريد اهلي

وين الكاهم من سنين نقطعت عنهم وماعرف كلشي عنهم

سهلة نروح لبيت بيبي ومناك نسأل لجوارين عنهم

واذا سويت هلشي وماحصلنة اي معلومة ورجعنة خايبين تبطلين هلعناد وترجعين لدراستج وتجرين عدل لو نفس الطاس والحمام

لاء ارجع اداوم

هاذهو لعد صايرين باجر اخذكم ونركب ونروح
ولو متأكدة محد يعرف اخبارهم بس اخذج حتة تصدكين

طلعت برة دكيت بلمطبخ حجيت وية انغام
رحبت بلفكرة وكالت يرجع منصور ونشوفة

بقيت كاعدة بلكاع
خوفي انو نروح ونحصل عنوان أو اي شي عنهم
خوفي يضيع تعب السنيين واني ابعدهم واكونلهم عالم آمن مثل ماامي جانت تحاول تحمينة
جنة نفسر تصرفاتها بأنانية
بس مادرينا انو هلأنانية جانت سور الامان النة
كبرت وعرفت شكد جانت رايدة مصلحتنا
من شفت انغام تترك كلية الصيدلة بمرحلة لابأس بيها بس لأن منصور مايكدر على مصاريفها
بينما زوجة الولد الي بيوم من لايام جان خاطب انغام اخذت الماجستير
من شفت نفسي اهرب بعز اليل حاضنة اطفالي لصدري  لمدة ٣ ايام متواصلة نمشي بين الزرع ونتختل مثل لبايك
وبلموت يلله طلعنة
وكتها عرفت انو كل لكالتة صح
يمكن لو ماسامعة كلامها جان بقيت عمري كلة بحسرة على حب عمري
بس جان استمرت لحياة
وماجان نحطيت بنفس الموقف الي جاي انحط بي ليوم
ولا جان وكفت اني وبنتي بهيج مواجهة صعبة من سنين ائجلها

اجة منصور فتحت الموضوع ويا
فرح حيل ورجع لملامتة وهوة ينهبني انو ماراضي على الي سويتة بمنة
وانو هذا اقل شي ممكن اسوي كعربون اعتذار
منصور حيل يحب الجهال هوة وانغام
مانرزقو بأطفال
وهوة رافض فكرة الأنابيب
وبقت انغام محرومة من هلنعمة كل هلسنين
اشوف لحسرة بعيونها كلما اضرب لجهال لو اعصب عليهم
احس نضراتها تكلي
هاي نعمة حمدي ربج عليها
لوبمكانج مالمسهم

مانمت ليلتها للصبح
فجرية لبسنة وطلعنة
جنت اشوف الفرحة بعيونهم
والطريق كلة جنت ادعي انو ميتحقق مرادهم ولايضيع تعبي
نفرجت وجوههم من دخلنا للديار
ومن بدة المي والخضار يلوح النا
بديت اشوفهم شلون يتعاركون علجامة وودهم ياكلون الشارع

نزلنا من السيارة لان بعد متكدر تفوت زرع كثيف
بدينا نتمشة
من بعيد شفت البيت
جان عبارة عن خرابة
منضر هزني من راسي لرجلية
عيوني تجري
حضرني كل موقف وكل ذكرى
بهذا البيت عشت ايام ماتنسي
ولاتجي مثلها ايام
بهذا لبيت عاشرت اطيب واحسن ناس قابلتهم بحياتي
بهذا لبيت حفرت شبابي وذكريات قصة حب اقل مايقال عنها انها اسطورة
بيبي شكرية عمة امريكا عمة مدينة زوري كشمش بسعاد كل ذكرياتهم حضرتني
وحضرني كل موقف ربطني بيهم
بلكاع جثيت على ركبي وصرت اصرخ
وينكم يهلنا وناسنة
شحالكم وشصار الكم
معقولة مافكرتو تسألون عنة
معقولة ماكلتو نشوفهم شحالهم ماجرالهم

صوت وراي اسمع يحجي وية منصور

على كعدتي عيوني تتفحص الخراب الكدامي ودموعي تجري اسمعة يسألة

منصور..ماتعرف وينهم ماتعرف اخبار عنهم

ويجاوبة

لا والله كلشي مااعرف عنهم من يوم صارت لأحداث
مااندل مكان الهم ولا اعرف شي

شعجب ماحاولت تسأل عنهم

لجان يربطني بيهم مات

كمت على حيلي مصدومة
نداريت اريد احجي
صوتة متفاجأ بية
ام إمتنان هاي انتي معقولة

قبل مااحجي شي صراخ منة صار يتعالة
منو الي مات احجييييي
تجذبين علية جنتيييييييييي ......يتبع
مساء الورد والياسمين
شلونكم شعلومكم مشتاقون 😁
لغلاف لفوك بي غشوشات خلي نشوف توقعاتكم