#خنجر_الغضنفر
#بارت_٣٢
#حنين_حاتم
سبكتلها واحس عقل مابقة براسي صرخت بيها
شوفي هذا مامجربتة لليوم ابنج محرم اللحم علية اليوم اجربة بيييييج
الي وياها ركضت للباب فتحتها وطلعت بلشارع تصرخ يبووو لحكونة هاي لمسودنة راح تكتل اختي
اركض وراها بلطارمة وهية تتشرد بس عوزها تعبر من لحايط
ماشوف غير بيت ام حقي طبو علينة لرجال ومرتة وابنة وجنتهم
ركضت عليهم تتشكالهم وتبجي
ولج دادة ام حقي شفتيها للمسودنة تريد تموتنا موكنالكم موصاحية ماصدكتو
_ام حقي.. شجابكم يمها دادة اذا تدرون بيها مريضة ليش تستفزوها وتخلوها تسوي هيج لبنية اجت يمنا هادئة جانت لازم احد منكم اذاها بكلام
_ام زياد... ولج عيني اجينا ناخذها للسيد الي كال علي ابوحقي بلكي يشوفلها جارة تعبنة
ابني تعب ومل
زواجة لكشرة صارت علينا
_بلقيس... حرام علييييج طبيتن علية تردن تموتني ومن دافعت عن نفسي هيج تكَولين
هوة اني ليوم اريد اشوفج المسودنة من صدك
طلعي برة بيتي لااسويج لحم واشمرج للجلاب
طلعي برة بيتييييييي
_ام زياد...عيني ام حقي .. ابو حقي ايدكم وياي فدوة خل نجتفها وناخذها للبيت اخاف تهد على واحد من لجوارين وتورطنا
صايرة ام طبر بلقيس افندي
اريد اخذها للبيت احبسها اني صوجي عزلتلها عبالي ادمية وتستاهل
كلت اسوي براسها حض
تقربو علية كلهم يردون يلزموني وهي مستمرة تقنع بيهم وتكللهم احبسها واجيبلها لسيد للبيت يقرة عليها بعد ماتنعاف لوحدها
تهسترت نجنيت
صرت اصرخ واهادد بيهم بلساطور اريد يوخرون عني
وخري عني كلشي مابية والله هي طلعتني من طوري بأفعالها
ام حقي تكلي يمة تعوذي منة لاتخلي يركبج
ندارت على جنتها تكللها انتي امشي للبيت لايروح يجلب بيج هوة يجي على لبنات لحلوات
حتة من اكلج لاتسبحين المغرب تصدكيني
نداريت عليها بصراخ
_شيطان الي يركبج انتي وابنج اعقل منكم كلللكم
طلعو برة بيتي
وحق الله ليلمسني مايلوم إلة روحة
طلعي من بيتي واني عايفتلج الجمل بما حمل
طلعييييييي
شلعت الحبل مال لملابس واجت تريد تربطني بي
_بلساطور هديت عليها اريدها بس تطلع هي ولعالم
والم ملابسي وانهزم لأمي وماارجع بعد لولدنية تنكلب
_كامت تصرخ يبوووو
ابو حقي اتصل علشرطة راح تموتني المسودنة
لرجال سحب مرتة وجنتة وابنة وطلعو وكلولها طلعي من لبيت عوفيها لاتروح تسوي بيج شي
ركضت قفلت لباب وراهم وطبيت لغرفتي لميت لهوسة لباقية
لميتلي شكم خركَة بساع بساع وطلعت ملابسي لبست واريد اطلع
واني بلطرمة سمعت صوت حجي برة
ندكت لباب حييل
بابنة شوية ناصية من ورة لباب شفت كرعة وزياد وشيبات عمو
فتحت لباب وبيدي جنطتي ولابسة
وية مافتحتها زياد ضربني راشدي ومن ايدي حيل سحلني ليجوة
وبقة يغلط ويتجاوز
بت لكلب فضحتينا
لزلم من راس لدربونا تلكوتي يكلولي مرتك لازمة طبر وتريد تكتل امك وخالتك
ولج لجوارين تكلي لوتشيل منا لو تقفل لباب عليها من تطلع
دفعني بلغرفة وضرب لباب وطبكها علية
بقيت اضرب على لباب واصيح
وديني لبيت ابوي اني ماالي ضلة هنا
شوية وفتح لباب رجعت ليورة عبالي يريد يضربني
اشرلي وكال تعاي ابوي يريد يحجي وياج
كعدت كبالة جان متربع ورافع دشداشتة ويدخن
طفة لجكارة بلنفاضة وخنز وبيدة يأشر ونتر انتي شتردين بلضبببط
اريد ارجع لبيت ابوي
وخلي ابنك لشفية يطلكني لأن تعببببت طلعتوني من طوري
ماشوف غير لنفاضة خطفت من يمي وبلحايط تكسرت ووكعت يمي كزاز نصة صار بحضني
تقرب لعمي يهمسلة على كيفك يابا لاتكب سوادينها علينا مالنة خلك لفضايح
_تردين تتطلكي وترجعين لديالى مووو ولج
هوة انتي بنية وابوج عايش ولعبتينا مصلخ
وعشاير رايحة وعشاير رادة من وراج وسبوعين احنة ماكلين وحل عايفين أشغالنا وعوائلنا وحاطين كلوبنا بشيشة نخاف يجون يدكَونة
ندار على زياد وبأستهزاء يحجي ويا
_موهية هاي لردت تبيع بيت وسيارة علمود تدفع فصل وماياخذونها فصلية
كَرة عينك والله يازين ماختاريت
_انتو تعرفون كلش زين لشغلة لصارت جانت نتيجة سوء فهم وتعرفون غايتي ردت ائدي وصية انسان بين لحياة ولموت
ومحد غيري يكدر يساعدة لأن وراها سر جبير اذا نعرف يتضررون اهلة
ومن رحت مارحت لوحدي اخذت زياد
هاي لشغلة متنسوها رغم زياد وياي خطوة بخطوة بس تنسون عملة عمة ام زياد بية
تنسون من وصلت للموت من وراها
تنسون من جبرتني اتزوج زياد حتة تكسرني وكل هذا تسوي بية انتقام شلون طردتها بفاتحة بابا
_بلة بطلي تتمسكنين وتسوين افلام
مرض من الله شدخل ام زياد بي
شوفي خل اكلج طلاك ماكو موعبالج حبا بيج ذيج لمى كتلت روحها على زياد وبيوم عرسة هي بلمستشفى بس هوة ابني اثول
طلعة من بغداد ماالج ومنا ورايح متبقين هنا ترجعون ويانا بنفس لبيت واريد اشوفج تسوين هاي افلامج وتطلعين بلشارع تصيحين هلمرة لازياد ولاامة
اني اكسر رجليج واربيج لأن لضاهر صدك اخوي ماعرف يربي
_ماارجع عمو شنو هوة غصب
اني زياد مااريدة ومن مات بابا وعرفت ام زياد الها يد بموتتة لعبت روحي من هلزواج كلة وماجان الي نية ارجع بس نكسر ضهري بطفل ورجعت علمودة
والي جان سبب برجعتي وتحملي مات وراح
خلوني اروح بحال سبيلي وخلي ياخذ لمى لأن ماطولها عينها ورا ماتهنا بهلزواج
_موبكيفج
كومي يلله لمي ملابسكم وفرغو لأغراض خل نطلعهن بينما اخابر صاحبي عندة بيك اب يجي يشيلهن
ستمريت ابجي واتوسل اكللهم ودوني لبيت ابوي لايطلكني اني عيشة وية ام زياد ماالي تاليتي لو اكتلها لو تكتلني
توسلت وهددت كلشي مافاد
صياح عمو وتهديدة خرسني
وزياد مدنك راسة ويتافأف ماطلع منة حرف
لالميت ملابس ولاسويت كلشي
بقية يصيح علية
راح على لملابس لمهن وعمو فتح كنتور لغرفة وبدة يطلع بي شي ورة شي ليبرة
اعاين للبيت فرغ من لغراض
واني بلكاع ابجي
طبو ثنينهم يكلولي كومي يلله
_طبة لبيت ام امك مااطب لو تذبحني هسة
_بلقيس لتخليني امد ايدي عليج انتي موطفلة وتسوين هاي لحركات كومي عيب لرجال مشغل لسيارة ويتاني
_كتلك مااكوم
لغراض الك ولذهب هم الك وكلشي مااريد منك لامقدم ولامؤخر بس اعتقني
اني مااتحمل امك
تطلع ترجع تلكاني كاتلتها حلال
زياد لاتوصلني لهلمواصيل لأن عقل مابقة براسي
_كومي هسة وعود نشوف حل
_مااكوم كتلك
_بلقيس كومييييي
مكائدها وسوالفها بية كلهن اجن على بالي
تذكرت بابا الي مات من وراها تذكرت امراضي
من وصلت للموت من ورة اعمالها
كلشي كللشي
تهسترت
شلون يردوني ابات ببيت هي موجودة بي
ميطلع علينا صبح لو اكتلها لو تكتلني ادري بروحي
تقرب الي حاول يطلعني بلقوة
جان عندي استعداد اندفن بهذا لبيت ولا اروح لبيتها
دفعتة حاولت اتملص منة
حاول يسحبني ليبرة ماكدر لي
بقة يحاول مرة بللين ومرة بلغصب
اخر شي ضربني
دفعتة وكمت اصرخ
عوفني عوفنييييي ياخي مااكدر اطب لبيتها ارحموني شلون اطب لبيت الي كتلت بابا
وجانت ناوية على موتي شلوووون
بقوة ايدة حيل ضرب على ضهري وصرخ
اي دبطلي هاي لأفلام بطلي تعبتينييييي
بس اني هيج
هاي لعالم تعرس ترتاح بس اني هيج
مرمرتيني
بقة يضرب بية ويصيح سحبني من ايدي واني مكمبصة ويسحب بية
فلتت روحي منة وللسطح ركضت
لحكني
قريب علية خطوات وكفت يم لستارة وعلى بلوكات صعدت واشرتلة
_بس تتقرب اكتل روحي
لو تبقيني هنا لو توديني لبيت ابوي لوتاخذني لامي
بيت امك ماطبلة
تقرب الي ماهمة كلامي عبالة جاي اهدد بي ومجرد كلام ميدري جان عندي كامل لأستعداد انو اشمر روحي ومااطب لبيتها واصير تحت رحمتها واعمالها
_رفعت رجلي وعلى لحايط شبخت رجل ورجل بلكاع
زياد بس تتقرب اشمر روحي وابليك والله
_كافي بلقيس كافيييييي
ولج لرجال من جوة يشوفج بت لكللللب
شمتيهم بعد بية شمتيهم
_من ايدك كلة لديصير من ايدك انت الي خليتها تتحكم بينا وتتدخل بحياتنا طبة لبيتها مااطب
تقرب الي
اجزم بذيج اللحضة الغضب البية لغة شي اسمة عقل ماجان يتحكم بية غير حقدي واضغاني وذكرياتي منها الي دمرت عائلتنا بأكملها
صعدت كلي على على لستارة ومدنكة ملزمة بأدية
بس تتقرب اشمر روحي والله
تاخذ عمو وتاخذ هاي لسيارة لجايبها
واني ارجع لبيت ابوي وتدزلي ورقتي وينتهي كل لبيننا ومثل مادخلنا بلمعرف نطلع بلمعروف
ولو يامعروف هوة
بلحيلة والغصب
لمهم تكول لاء والله ميعجبني هلحجي اشمر روحي منا وابليك
عشت اكللهم زياد دفعني
متت يضل ذنبي بركبتك انت وامك ومااسامحكم للموووتت
ايدة على لحيتة وصدرة يصعد وينزل بنفس عالي حسيتة راح ينفجر
عيوني تصد على رجلي ووترجع على شفافة منتضرة اما كلمة او خطوة
صوتة همس و..........
...........قيصر.............
دكيت لجرص واحاول اتماسك اعصابي
نفتحت لباب وكبالي اسعد نفتحن عيونة بذهول
وراها بتسامة ساخرة تسللت لشفافة
ويحرك حواجبة بأستهزاء
نترت بي هيفاء ويييين
اسمع صوتها من جوة تصيح علي منو اسعد
فتح لباب على كيفة وبقة واكف بيها
ورا جانت مدنكة على لثلاجة بلصالة مدري شتطلع منها بثوب قصير كيمونة متلبسة كدام اخوها
طبيت ليجوة بس موبروح قيصر لطيب صاحب المبدء الي ميضلم والي يعامل لناس بأصلة
الي متهمة لديانة ولعقيدة
الي طول عمرة يباوع لكلوب لناس قبل ميباوع لأي تفصيلة بيهم
طبيت بروح الرجل الشرقي صاحب الروح العشائرية الثورية
الي العرض عندة خط احمر
والي يتغاضا عن كلشي إلة الخيانة والأستغفال
خطوات خطيتهن للشقة مابين غضب خلاني مااشوف وبين الم براسي ورجلية كوة جنت اتمشة ولخطوة اخطيها بسنة
سمعت صوت ضربة لباب وهرولتة على لدرج
جانت ترجع ليورة ودموع تنهمر من عيونها بذهول تعاينلي وتهز راسها وتهمس هوة هوة والله مو اني
صوت كلبي يصرخ لتخافين ثنينكم ماارحمكم ليوم بس انتي ابدة
ركضت للغرفة تحاول تحتحمي بيها
بشكم دفعة نكسرت لباب بيدي
بقت وراها تحاول تدفع بيها
حيل دفعتها عليها صارت وية لحايط
وعيوني تتجول بلمكان
وبلكاع جنت اشوف لملابس الداخلية مطشرة تدينهم
وعلى فراش لجرباية كأن معركة صايرة
تقربت الها
حاولت اتماسك اعصابي وقبل مااجرم بيها اعرف لسبب واعرف كلشي مضموم عني لأن لو ضربتها اموتها حلال
ردت ائمنها واعرف كلشي
ووراها اسمح لأدية ورجلية تاخذ حقي وتشفي غليلي منهاوتغسل عارها
سحبتها للجرباية شمرتها عليها
_احجيلي ليييش
موتبجين بجي على حضني وقربي ومداراتي
الي يشوف حبج واهتمامج ميشك للحضة تسوين هيييييج
تقربت الها وهمست
منو غير اسعععععد
يمكن لبيوت الجنتي تشتغلين عدهم شبعو بيج واجيتي هنا تدورين استقرار وزواج موووووووووو
تقربت الي تزحف تريد تبوس ايدي
اكتلني ابوس ايدك اكتلني
اني شكم مرة ردت اكتل روحي بس ماموووت
مااموت
موتني اني تعبت من هلدنيا موتنييي
كلشي عكس وياي
الموت راحة الج
ولج والله لأخليكم تتمنون لموت انتي وياااااا
والله جبرني جان يهددنييي
والله غصب عنييي
بشنو يهدددج بشنووووو
دنكت وصارت تبجي
يمي دولكة كزاز بيها ماي سحبتها حييل وبدون تفكير جبتها براسها
شعرها كام يخر دم وصرخت بهستيريا
_جبرني يحجيلك ماضيي
اني صح جنت اشتغل بلبيوت
بس
_بس شنو احجيييي
ايدها سحبت لجرجف خلتة على راسها وتضغط على لجرح وتبجي
_رجال جبير مخرف إغتصبني جانو عائلتة طالعين واني ماادري طببني وقفل لباب واغتصبني
رجعت للبيت ادك والطم لا اكدر احجي ولا بيدي شي سكتت وضميت لسالفة بكلبي
كمت مااروحلهم
وراها طلع حاجي لأغلب زلم بيوت لدربونة
بس ماكايللهم اغتصبني مفهمهم انو اني برضاتي صار
وكامو ياهو الي اروح اشتغل يمة يتحارش بية
وشوية شوية تطور لموظوع
لا اكدر احجي لعمي يذبحني
ولا اكدر ابطل نموت من الجوع
اكعد شكم يوم ابطل يجي عمي يسحلني يكلي امشي اشتغلي
والي اجيبة ربع النا ولباقي الهم
اكلة مااريد اروح يكتلني ويوديني غصب
كل يوم تتطور اساليبهم
بقيت مجبرة اتحمل قذارتهم حتة ادفع اجار لبيت واوفر لكَمة ناكلها
وراها عمامي درو من لدربونة طلع الحجي ورادو يكتلوني ونهزمنا اني وهادي
اسعد يهددني بهذا الشي ويستغلني
يعني جنتي تشتغلين ........
وهادي ال..... مالج موووووو
واني اكول ليش ميشتغل اثاري معلم علنوم وانتي تصرفين عليييي
هادي واسعد ال.....
واني الطلي الي تنامين براسسسسسسسة
رجعت على كلاص الماي براسي ركعتة
ولج اني ال ........ موهادي
اني ال...... الي امن بيكم وفتحلكم بيتة وكلبة
لاتكول ........ والله نجبرت هذا لصار وياي كلة غصب عنييي غصصب
_لااكول ........ لأن لوما ....... وعاجبج لوضع جان اجيتي على لأقل سولفتي الي على تهديدة الج
_مااكدر حبيتك خفت اخسرك
والله من حبي والله
هوة تهستر من شافني رفضت عرض الزواج مالتة من نرفضت معاملتي
وشافني كيفت بيك
هوة جان يحبني من جنة جهال
كالي تعالي لهنا اني اتزوجج واستر عليج
ماجان يدري غير بس بسالفة الشايب الي اغتصبني
ميعرف بللي صار بعدين
من جنة بلأردن سرقت منك فلوس التذاكر لأن عمامي ندلو مكاننة وخفت لايجونة ردت نطلع باسرع وقت
هوة جان متعاطف وياي وكلي تعاي واني اتزوجج واستر عليج وراها عمامي من درو بينا شاردين لهنا
اتصلو بي وحجولة وفضحو المستور
كمت اشوفة يشمأز مني كام يهددني بفلوس كل فترة يسحب مني
واني جنت البنك المركزي الي تسحبين منة لفلوس موووووو
والله جنت ناوية ارجعهن والله
كملي بت الكلب تعرفين الله انتي
لتحلفيييييين
وراها كام يهددني يريد مني علاقة
رفضت تخبلت كتلة اني مااخون قيصر
والصار قبل جان موبأرادتي لضروف جبرتني
كام يضغط علية ويهددني
ماجان كدامي غير حل
_والي ببطنج جان من عندة موووووو
ولج اني اعرف روحي ماتقربت الج
شككتيني بنفسي بت الكللللللللب
دنكت تبجي
موتني وارتاح وريحني قيصر
موتني واحرك لشقة واطلع محد شافك من اجيت يكولون تماس
موتني اني بعد مااكدر اعيش
رجعت ليورة حسيت لمكان يفتر بية
ولكاع تتحرك من جواي
على لحايط نتجيت وجسمي ينسحب للأسفل مني
دكات كلبي موشي عادي ابدا
نفسي كامت تلعب
جسمي عرك حرارة احس تطلع من يافوخي
عيني عليها وصورتها تغوش
تقربت الي
صوتها يهمس
قيصر شبيك قيصررر
الله لايوفقك اسعععد
غمضت وبعد ماسمعتها شنو كالت
فتحت عيوني جنت بلمستشفى
ضغطي مرتفع ومشكليلي مغذي
بقيت الى ان خلص المغذي سألتهم منو جابني كالو شخص اتصل بلإسعاف وبلغ عن حالة اغماء بأسفل لعمارة وترك لعنوان
بقيت اغلي بس اريد اطلع
ورة نص ساعة كملت لمغذي وإستقر ضغطي وطلعت
فتشت جيوبي محفضتي ماكو
ركبت تكسي ورجعت للشقة
لباب مقفولة ومالكيت احد
اخذت فلوس من الجوارين ونطيت لأبو التكسي
تمشيت لشقة لولد
كلهم طالعين بس ياسر
سولفتلة
كلي لازم تخبر الشرطة هنا غسل عار وهلأمور متمشي عدهم
تبلغ عن خيانة زوجتك بس دليل ماتملك
مع الأسف المفروض لما عرفت انهم بلشقة تتصل بلشرطة وتخليهم يمسكونهم بلجرم المشهود
ليش اني بقة براسي عقل حتة افكر هيج
هلأ مافات الاوان خلينا نروح نبلغ اذا مسكوها ومشة لبلاغ تبعك وتتحاسب خيرا على خير
واذا رفضو لكونك مابتملك دليل طلقها وتركها في الله بياخذ حقك
اي اتركها ليش لاء
مخبل انت ياسر تريدني اعوفهم بعد لسوو بية واستغفالهم الي،
لموضوع اكبر من الخيانة
اني امنت الهم
وادر عليهم فلووووس
كل هذا وافلامها وهمتني بلحبببب
وهمتني انو اني متقرب الها واني متأكد من نفسي ماسويتها
شككتني بروحيييييي
واني كلبي ماهاويها دست على كلبي ولخاطر لطفل الي ببطنها تعايشت وياها ونسيت حبي
طلع حتة الطفل مو مني
جانت تسحب مني حتة تسد حلكة
ابن عمها الشريف الي يهدد بيها حتة يسحب منها فلوس
لاتزعل مني بس لقانون لايحمي المغفلين قيصر انت ساويت كل هذا برضاتك
وياهو كالك انة انتضر لقانون ياخذلي حكي
هيفاء انة كتالها واسعد إلة اردة بضهر ابوووووو
بقة يهدأ بية ويقنعني يكلي خلي نشتكي عليهم بلكي لقانون ينصفك
لتكلي قانون راح اتخبل ياسر
لخلل بلناس لوبية
انت مالك ذنب لاتلوم حالك اي حدا بمكانك كان راح يتعاطف معها
انا كنت لما اشوفها تجي لهون كنت احسها تحبك من كل قلبها
الأنسان بلفطرة طيب وانت كنت تتعامل بفطرتك
هني كلهن شوائب انت مالك ذنب
خلينا نبلغ بلكي لقانون بينصفك
كمت ويا من حلاة روحي ماعندي حل وكلبي يغلي واخاف تنهزم برة لولاية وبعد مااكدر احصلها
كلت اذا ماشفت نتيجة اتهمها بسرقة بس حتة احصلها مااريدها تضيع مني
ركبنا اني ويا ورحنة لمركز شرطة
دخلنا
سولف الهم وبلغت واكدت انو لجوارين يشهدون على انو هي تجي يومية يمة
ووهموني انو هوة عندة زوجة واطفال وعلأساس تشتغل يمهم معينة وحاضنة للاطفال
سألني عن اسمي
مليتة الة
صوتة يهمس الي
بس انت عليك بلاغ ب........
............انعام..................
ايدة سحبت ايدها عيوني نفتحن واسمع صوتة يكللها
ام حمزة ماالج طلعة من لبيت
لمكان البي ابنج تكونين بي
لاح على محياها بشائر لفرح وعيونها نططن
اندار عليهم اريد احد يحجي يسأل يعقب على كلامة
مااكدر احجي ولا اكدر اذبح كرامتي ولو حتة بسؤال
جريت منة وكمت
قريب لباب صوتة صاح علية
جيبي منة
_اريد اغسللها
كلتها ومشيت بدون مااندار
عيني علي صدت من صاح على فدعم واشرله الحكها
لحكني سحب منة من ايدي وكال
_فدعم:- ي والله يلوكَ الجغلودة صارت ام حمزة
_اي يامن تعب يامن شكَة ويامن على الحاضر لكَة
يبوس بمنة ويحجي وياها يكَللها
اي يلكَرميدة تعلمي من ام حمزة تعلمي لاتضلين مثل امج بس حاضرة تلم جوالاتها وتشرد
تقدمتهم مخنوكَة
بين لناس حاولت اضيعة يم باب لخروج
وتمشيت ليبرة بلحديقة كعدت ودرت وجهي علشارع ماريدة يلكَاني
هنا سمحت لدموعي تنزل
بحيرة جنت
لاااكدر ابتعد ولا اكدر ابقة
كلبي موجر مخنوكَة اريد اشررد
بقيت برة شربتلي كلاص جاي من الكشك ورجعت
من برة سمعت صوتة يصيح على فدعم
امشي دورها بلله عليك طفلة وضيعتهاااااا
ويكَلك ارتاح ولتصيح
وهلمصايب هااااي
فدعم يأشرلة علية
ندار علية ورجع دار وجها
دخلت رحت على منة اريد.اخذها من فدعم
ندار على جدو كلة رجعهم للبيت كلهم بعد شنو ضلتهم
كمت على حيلي سحبت منة وجنطتي
وكتلة اي يلله عفية اني برة انتظركم
نداريت علي كتلة عندك لعافية ومشيت
برة واكفا واختلس لنضر عليهم اروح وارجع بلممر واشوفها تقربت الة ومدري شتحجي ويا
امثل الامبالاة وكلبي يتكطع برة واكفة اتحركن
واشوفها تحجي ويا وتتقرب يمة تلملم بلغراض وعزلت لمكان وقربت يمة الماي وخلت دوا يم راسة وتفحصت المغذي
من الحركة حسيت الم بمعدتي
مديت راسي صحت عليهم استعجلهم
يلله عفية تعبت من الوكفة
صوتة يهمس الي رافع تك حاجب
مستعجلة
_اي شعندي باقية
_لاصحيح ماعندج شي هنا
دار وجها على لجهة لثانية واشر لفدعم شيل هاي لفاكها ونزل لبردات اريد انام
طلع فدعم ومشينة ورا جنت اخر وحدة
اسمع صوتة يحاجي عمو رحيل بطئت خطواتي
جا وجروحي ماناوي تطيبهن
ماناوي تكلي شيوجعك خليني اشمنهن
وكفت لحضات وراها كملت بخطوات بطيئة
وصوتة يكمل
تدري بفركتك كل لحظة
اصيح الله يهلتابوت
وبريتي شح الهوة
وبصدري ريحة موت
موسالفة زاد وملح هي كلوب
من تبعد تحن بسكوت
خلصنة المحنة ووشل الموال
ضلينة بفركتك لاعافية ولاصوت
لاردة بيك
ولااجانة لموت
لابية واتعناك
ولا انساك انة بهاي مامبخوت
ابعد شمابيك تحن و ترد انة ادريك
ضلعين افتحلك واكلك فوت ....حنين حاتم
اخر كلمات سمعتهن واني بلعتبة
مشيت امسح بدموعي واكل لكلبي اركد
المن بقاها اذا رايدني
لو يريد يلعب على الحبلين
نزلنة جوة فدعم راح جاب لفات نطانا بقة جدو يوصي بي على غضنفر
نطوني لفة
كلتلهم مااشتهي
حطتها بحضني بيبي شكرية وهمست
دربنا طويل يمة تجوعين وانتي ماماكلة
درت وجهي علجامة ودموعي تنزل
هاي تاليها ادعيلة بكل صلا يكوم سالم ووكت مايكوم كل همة ام حمزة وضلتها
مو هاي الي راهن بحجية يريد يخلص منها
اشو من صارت صدك جلب بيها
منة كسرتني بقو بيبي وصميدع يتناوبون عليها كلسا واحد منهم ياخذها مني
وراها نمت من لتعب
فزيت اسمع صوتهم
جانو جدو وصميدع يتبادلون بلمكان صميدع يريد يسوق
عاينت شفت منة بيد سللامة
مااعرف شصار بية تذكرت حمزة من يكرص بيها بحجة يبوسها
سحبتها منها
حتة هي نزلت
_شمالج لفرخة نايمة على كيفج ماناكل اوادم
درت وجهي على لجامة
نهانة التعب يلله وصلنة
جانت الوقت قريب الفجر
دنية باردة بقيت الفلف بمنة بعباتي وملابسي
عيني على سللامة نزعت سترتها لصوف وشمرتها علية بدون متحجي
لفيت منة بيها وضميتها بصدري
دخلنة للبيت هلكانين
كلمن لغرفتة لكل نايم ولاضوية طافية
ختلت بلفراش ونمت مكسرة
فزيت ساعة قريب اذان الظهر على صوت عمة مدينة تسولف بصوت عالي وكلسا تصيح علجهال
نزلت جوة جانت كشمش كاعدة بلكاع وداير مدايرها جهالها واحد منهم يكتب ولباقين يعاينون علي وبديهم اوراق يشخبطون بيها
هي تخطط اله لدفاتر
عينها عليهم دامعة
نزلت تلكاني حمزة مجلب بملابسي يريد يشيل منة
حاولت افهمة كتلة
ميصير لأطفال هيج عمر احد يشيلهم غير لأشخاص لكبار الزغار ميصير يشيلوهم
بقة مصر
عمة مدينة صاحت علي من جيبها نطتة علج يلله فك عني ياخة
عيني على سللامة كدورتها علنار وواكفة تضوك بلمركة
اسأل بروحي هاي شوكت كعدت شوكت طبخت وهي حالها حالنا اليل كلة مانايمة
سألت بيبي شوكت كعدتي
يمة بل١٠ فزيت علجغلودة تطكطك ماخذتها لندارة فرحانة
مدينة: يمة انة باجر امشي ماطول طمأنيت على غضنفر
_شعدج رايحة ضلي وإسماعيل يروح يجيبلج لفروخ
_لايمة ارد وجم يوم من يشيل خياطاتة ويرد اجيب لفروخ وابوهم ونجي نشوفة
بقينة نسولف صبن كشمش وسللامة لغدة
واني وبسعاد غسلنة لمواعين
بليل خابرناهم فدعم حجة ويانا كال طلعو من لصبح وهسة بلفندق احنة
افييش شني هلنسوان عمي تسوى ابو لعرك
لتنانير للركبة والشعافي والزرور تكول كيمر لسدة
وتهاني لو رادت تكشخ تطبب لدشداشة بلجامة عود هية لابسة بنطرون بت الأكرع
لتلفون من ايد لأيد وصل لأيدها
لاتجيبني بلطاري احسنلك انة مايربطني بيك كلشي وناطرة هلسالفة تفض وكلمن يمشيلة
شمرت لسماعة علية وهوة بقة يتحركن
سديتة ورحت اسكت بيها
يتشاقة شبيج
خلي خلي هوة لمن يخسرني يلله يصير ادمي
راحت عمة مدينة يوم ثاني
وعدن الأيام ننتضر رجعتة
انتضر اعرف غايتة من ابقاء سللامة شنو
يوم ثنين فزينا لفجر
حطيت منة على بطنها يم بيبي شكرية وطلعنة برة
اني وزوري وكشمش على لطبخ
وعمة مدينة وسللامة علخبز
خبزن للريوك وراحن سون صينيتين لتمو ياكلون
اني مااشتهي بقيت برة كاعدة يم لكدورة
اكشر بصل وعيوني تجري
من بعيد شفت مرة عمو إسماعيل هية وقسمة
تقربن سلمن علية
قسمة تحزمت بعبايتها واجت تساعدني وامها دخلت جوة
بقينة نسولف اني وياها
قسمة جبيرة بلعمر بس ماتزوجت
تجيها قسم اشكال توصل للحلك وتخرب
اخر وحدة قبل مااطلع اقارب امها خطبها وبيوم لعقد بطلو على شي تافه
واحنة نسولف مدت راسها كشمش خلت بحضني لفة وندستني تريكي
ماطاير غضنفر شني زفوني مااريد لعشة
عضيتلي منها لكمتين وحطيتها على كتر
دنكت بيدي عودة مال عنب يابسة ارسم بلتراب
رفعت راسي واشوف نسوان ولد عم جدو وجناينهن وبناتهن متجهات علينة
ذولة بس بلفواتح والمناسبات نشوفهم
٣ هنة اخوات ماخذات اخوة سمان نفس الكصة وحدة ماخذة بنات لثانية بناتهن كلهن سمان مثلهن طيبين ونفسهم حلوة وصاحبين وكفة
فدعم يسميهم الدببة الطيبون
تقربن النة سلمن علينا كل وحدة تاخذلها ربع ساعة تبوس وتسأل وشلونكم وشعلوكم
احب طيبتهم وسوالفهم مينشبع منها
طلعن بيبي وعمة امريكا ونعناعة وام فدعم يهلن بيهم دخلنهم اليجوة
بقن لبنات يمنا
جهالهن كل لأعمار انتشرو بلكاع
جدو طلع يحذر بيهم يكللهم لاتأذون ترة لزرعات موالنة عيب من الضمانة
محد جاوبة التقو همة وجهالنا وركضو يلعبون
لبس نعالة خطية ولحكهم يهبد ويصيح عليهم
طبيت لمنة شفتها جانت نايمة على حضن وحدة منهن من سمنها خطية ماعدها حضن بطنها نازلة على رجليها بكعدتها
تقربت اضحك على منة بس راسها بحضنها وباقي جسمها بلكاع
سحبتها من عدها دخلت لغرفة بيبي شكرية خليتلها فراش وغطيتها وسديت لباب
طلعت يم لبنات ماعدنا شي لكدورة علنار نصنهن وطبينا للمطبخ ناس علمواعين ناس تسوي خضرة
شوية ودخلو لجهال كالو اجو ولد عم جدو واخوتة وولدهم ونسبانهم
الديوان نترس برة
وكت لصلا بدن ام فدعم وسللامة يخبزن وكشمش تدولج الهن بلكاع
جهالها فقرة حتة مايلعبون وية لجهال لوحدهم متكترين
جوة كاعدة بلمطبخ اشطف لمواعين واكلبهن بلصينية حتة نصب بيهن
واسمع خبصة الجهال وصياحهم اجو اجووو
وصوت عمو اسماعيل صاح من ورة لباب نطوني لسجينة لجديدة بوية
مديت راسي نطيتها الة
شفتة نزل من لسيارة هوة وفدعم وعمو رحيل
ماحس غير وحدة ضربتني بمتني
عاينت سللامة ركضت وبيدها جيس جكليت
وتبتعها بيبي شكرية وعمة امريكا ولجهال وراهن
بقيت واكفة بلباب اعاين الها حافية ركضت تطش علي جكليت وتهلهل
وجرتة باستة
سلمن علي وردن
دخل للديوان مااجة يمنة
رجعت وجهها يضحك
وبكل حيلها همت تشيل بلمواعين وتصب
وتوجه بينا جنها هي ام لبيت انتي شيلي هاي انتي صبي هذا
دفعتها عمة امريكا تضحك عليها تكللها
جتني الندارة يارجل سنسلني
انة هاي الطفكَة ماحبنها
دطبي كعدي جوة لاتخبصينا عباس المستعجل
خابصة روحج عليمن
بعدهم صلا مامصلين
ماعجبها كلامها طبت جوة
بقيت اتناوش من عدهن اني ولبنات واودي للسفرة وعمة امريكا وثنين من نسوان اخوة جدو يصبن
كملو سفرة الزلم لولد ينكلون بلأكل
طبينة جوة
كعدنا علسفرة
مااسمع غير صرخة منة بصوت مرعب
طفرت على حيلي ثوبي جوة رجلية صار وكعت على وجهي
كوموني كلها تصيح الله
زوري فتحت لباب واشوف حمزة بثنين ادي يخنك بمنة وهي تصرخ ويختفي صوتها
من فزعة المنضر صرت اصرخ بكل صوتي وبلكاع ماتحركت خطوة احس جسمي نشل
دفعتة كشمش وحيل ضربتة راشدي سمعت صدا
وسحبتها وجابتها الي
حطتها بحضني يلله كدرت اجر لنفس
ركضت بيها ليبرة احس بعدها مخنوكة
فتحت لملابس من يم صدرها
وبقيت اسويلها تنفس اسطناعي
جانت مسطكة وجهها مزرك واحس لبجية مخنوكة بصدرها
بقيت اسويلها تنفس اسطناعي واكرر لشي
ورة دقايق يلله صرخت
صرختها ماجانت شي عادي
حسيت كلبي تكطع بصرختها
شفتة من بعيد طلع من لديوان اجة وويا جدو ولولد وعمامة
تقربو النة يسألون شكو
تقربلي يريد ياخذها من ايدي
ضميتها لصدري وصرخت بي
المن بقيتها
حتة تترس راس لطفل احقاد وتدزة يموت اختتتتة
صوتها من جوة يصيح انة ياهو مالتي لاتصيرين رعنة طفل مايفتهم
غضنفر:- نطينياها خل اشوفنها ولج حيلي طاح
_ماانطيها الك متكيسها ولاتلمسها
ولا الي ضلة هنا ماطول هاي لمسمومة بلبيت
المن ابقة شتانييي تموت بتي بحجة طفل وميفهممممم
_انعام صوتج لوادم برة هودي بوية وانة ليوم اعرف شسوي
_شتسويييي
كلشي متسوي بس بيك حض تتراهن على هجمان بيتتتتتك
هسة قررر كدام جدك وعمامك وولدهم
حتة لحد يلومني بعدين
هسةتقررر
لو تطلكني لو تطلكها
_هيج هين عندج لطلاك يومية صايحة طلكنيي
ولج ارحمي عزيز كَوم نذل من يوم لعرفج
ايدة تفرك بصدرة ويحرك بأيدة ليسرة يشمر بيها
مريض ياخلك الله مريض خل اكوم على حيلي وتلكنني بمشاكلجن
بقة جدة وعمامة يحجون
ويكلولي عيب مو كدام لخطار لفضايح خل يطلعون لناس ومحلولة
طبيت ليجوة
كلها عايفة غداها وواكفة مخبوصين وياي
استسمحت من عدهم وترخصت وصعدت لغرفتي
مرتين دز لبنات على منة مانطيتها
تانيت لخطار راحو
وكلها طشت محد بقة
يلله نزلت
جان كاعد بلأستقبال هوة وجدة وعمامة
طبيت للأستقبال سلمت وكعدت
عاينت على جدة وكتلة جدو
اني لابت عمكم ولااقربلكم اني انسانة حرة بحياتي وفاهمة وواعية وداركة قراراتي
واني اريدكم ليوم تحضرونة
اني من جبت منة لليوم سللامة تشحن بحمزة عليها
يوم يكرصها بحجة يبوسها يوم يدفعها من حضن بيبي يوم يحوكل بيها وتريد توكع من ادي
وكل احنة نعرف بي طفل بريء وماعندة اذية بس امة تزرع هلحقد براسة
وهوة بنفسة يفضحها على شكم مرة
وليوم بنتي رادت تروح من ادية لوما الله لطف
اني ماطول سللامة هنا ماأمن على حياة بنتي
واليوم انطي ختيارين وهوة حر مثل مااني حرة
اما يطلكني او يطلكها
جدة كام على حيلة اخذ منة من عدي وكال
_بوية ليش هيج تسون يعني مريض تتلكنة بمشاكلجن
تدرين راد يطيح من طولة من طبو لفروخ يصيحون منة ختنكت
بوية احنة غضنفر مابايعي ترة
والنسوان الي تتسبب بأذيتة ترة اركع راس براس واركدهن
جوزن منة بوية خل يتحسن ونطمأن علي وبيجن خير وتدللن تمالخن شماتسون سون
_جدو كل لكلتة على عيني وراسي
مثل ماانتة خايف على حفيدك اني ام
ويم حياة بنتي تسقط لدنيا ومابيها وحتة نفسي تهون
وهسة اريد اسمع لجواب لأن اذا ماسمعتة اطلع من لبيت بعد مااكدر اضمن حياة بنتي
قاطعني جدة وصاح بوية ماتسكتين
عيونة علية كالة عوفها جدي عوفها
كام من مكانة كعد يمي
لسالفة ماتستوجب كل هذا نعيمة
بس جنج هاوية فراك ولكيتيها حجة
متستوجب ؟؟
حياة بنتك متستوجب هذا الي الله كدرك علي
سللامة وين سألتي كبل ماتحجين
مااريد اعرف
سللامة بغرفتها محبوسة وحمزة منعتها منة لاتحاجي ولا تلمسة ولا تتكرب الة
ومن لحجرة ماتطلع حتة للحمام تعبر من لشباك للمنور وتروح للحمام الي بلترك
ووصيت كل الي بلبيت عينهم على حمزة وحذرتة مايتقرب لمنة ابببد
بعد اكثر من هذا شسوي كليلييي
طلعها من لبيت
هي تريد تطلع المن مجلب بيها
مااكدر
ليييش
ابني ياهو الة
ماناقشت ولا ححيت اخذت منة وصعدت فوك
عدن يومين سللامة متطلع ولا نشوفها
من للشباك الي علمنور ينطوها اكل
وحمزة خانس وماالة صوت حتة ميتقرب الي ولا لمنة
هوة ينام بلأستقبال
وبيبي فهمتني لدكتور مانعة من اي مجهود ومن ضمن هلشي لعلاقة الزوجية
ورة يومين فتح الها لباب بس بقت ممنوعة تتقرب لحمزة وهوة هم يخاف مايتقرب الها
اباوعلها من بعيد تعاينلة
وراها بدة كلشي يتغيرر
غضنفر يكوم ويكعد ام حمزة وام حمزة
وهي تباوع لحلكة
حسيت وجودي صار نكرة
ومو اني الي تسمح ينلغي وجودها وتبقة على لهامش
تانيتة صار زين
كام يصعد للطابق لثاني
صعدلي دك باب لغرفة
فتحتها وكتلة شتريد
_اريد احجي وياج
_واني لا اريد اسمع صوتك ولا اريد اشوف وجهك
اصبرلي بس ايام اذا تشوف وجهي اني اتعتب
_انعام لاتتهورين
مرجوعي الج شماطير
لاتهدين عشنة بيدج سالفة لاتكبريها
صبري يبوية بس صبري
انة اعرف تعبتي بس اطلب منح هليومين تصبريهن ووراها شتسوين سوي
لوتكولين اروحن لأمريكا هم مااكلج لاء
ابقة بس بشرط
_كولي
_وجهك مااشوفة واصوتك مااسمعة ومنة ممنوع تتقرب منها
ليش كل هذا شسويت انة
ولج يبوية لضلم ضلمات يوم لقيامة
كافي موحطيتي بلكلبي علة مارايد منج بس لصبر
واني ماكلت شي
مخنوكة منك يااخي كارهتك روح لأم حمزة اشبع بيها اشببببع
مو اني الي اتهمش
ولا اني الي انركن على صفحة
اني انعاااام
لونسيت
طبكت لباب ورجعت لمكاني الوووج الوج.
لوماشايفتة شلون يداريها ويحجي وياها ويسولف اكول يجوز هي تتحايل تريد تغيضني
بس لكاتلني هوة اليركض وراها وانعم من النشا وياها
ام حمزة ماتطيح من حلكة
بقيت يومين ماانزل
لبنات يصعدن لصينية وينزلنها مثل ماهية
لاعندي احد وازعل يمة ولا اتحمل لجاي يصير
صبري صبرري شصبر مااكدر اتحمل
مااعرف اذا الخلل بية لو بيهم
نزلت عصرية منة تبجي تعبتني
اريد انطيها لبيبي شكرية واطب اسبح
عيني علي جان لازم لسماعة ويخابر
شوية ووكف على حيلة
صار يحجي بأنفعال
هيييج لحجي
عاشت ايدج هوة هذا الجنت منتضرة
صاح على فدعم حضرر سلاحك
صد على كشمش وعمة امريكا وصاح عليهن
جيبنلي سلاااااامة ....يتبع
تاخرت حتة اوصلكم للجلطة مااكدر مااجلطم كلبي مينطيني 😁
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!