#خنجر_الغضنفر
#الجزء_الثاني_بارت٥٨
#حنين_حاتم
بلقيس....
مدري شوكت زحفت وتخفيت جوا الجرباية من الخوف
من ضرب لباب وتكسيرة
صوت صياحة يزيد والضرب علباب يعلة
سادة اذاناتي بدية
صوت دبة وخطوات
حسيت رجلية تنسحب من جوا الجرباية
الى ان طلعني
وصار يضرب ويصيح
بعدتة عني وصرت انتر بي
انت شنو ومنو وعلى اي اساس تدخل بيتي
وبأي حق تمد ايدك علية
اني ابن عمج وابو ابنج
ومن هذا الحق امد ايدي واكسر راسج يا.......
صار يتجاوز علية ويغلط
صرت انتر بي بصياح اطلع برا مالك كل حق يمي واني مامسوية شي غلط حتة تمد ايدك علية
شوية ودخل حالي من لباب يصيح شنو هلصياح من راس لدربونة
زياااااد
تعال وينك
تقرب يمة خالو ونتر بي
شكو شعندك جاي ؟؟
جاي اربيها
تربيها شنو شو انت متستحي مرا تطلكت من عندك ومالك كلشي عليها وهي بوصايتي ووصاية امها
ومامسوية غلط
يعني صاحبها جايني للبيت وتكلي مامسوية غلط
اكيد دزتة يضربني مثل ذيج المرة
وشنو مصلحتة يضربك
ماادري اسألها
زياد شو كايم تخربط شنو صاحبها شنو دازتة يضربك
امشي اطلع ولهنا لتوصل وكلة لأبوك بلقيس يم خالها والي الة شي يمها يجي يدك بابي
مفهوووم
ضرب لباب وطاع زياد
اول ماطلع زياد توجه علية خالي بللوم
فهنيني بلقيس انتي شوكت تكبرين شنو هلتصرفات هاي
متردين ايوب تخابرين على لشفية يجي يخلصج
شنو موديج للمشنقة احنة
لج انتي لشوكت تبقين رعنة
عقل ماكو براسج متفكرين بسمعتج متفكرين بصورتج كدام ابنج يومية مكتولة ويومية شرفج مديوس بتهمة
مع لأسف عليج شكد نزلتي من عيني
وماينلام خالج محمد بيج من كال هاي تهجم بيوت لازم رجال على راسها
خالو
اششش لابارك الله بيج طبي جوا وماريد اسمعلج صوت
خل اروح اشوف صرفة لهاي لمصيبة
بلله هسة لو كبرت واخذ ابنج منج شتسوالج
بيش يفيدج لشفية مالتج يرضا بيج وانتي بلا خلفة
طلع برة وبقت امي تعيد الكالو
وتلوم
شوية وندكت لباب طلعت امي تشوفها
اسمع صوت ايوب يسألها
خالة خيركم خوما اكو شي شنو هذا لصياح
وعمو ابو نوفل تصل كال اجلوها جيتكم
شنو لصاير خوما بيكم شي
اسمعها تكلة
لايمة سلامتك ماكو شي
هذا ابو نصير جاي يتهدد عليكم مو ؟
شنو لسبب ليش
تقربت للباب ومختلة روحي بلبردة سلمت علي وهمست
اي ايوب هذا الي اجة ابو نصير
ومقابل على زواجي ويهدد ياخذ نصير مني
وامي وخالو مصرين إلة اوافق ابني رح يروح من ادية
اترجاك تسد لسالفة من يمك
انت اكيد ماتقبل بأذيتي
فدوا اذا الي ولنصير خاطر يمك تسدها
بقة يعاينلي مصدوم
وامي تنتر بلقيس شلج بهذ الحجي ولللللج
بقة يعاين الها والي
دنك وهمس
يصير خير ان شاء الله
من رخصتكم
راح وامي نهدت بية
ولج ليش هيج ولد شاريج وماينعاب
يمة دخلييييلج نفس الحجي كلتي على زياد
شاريج وماينعاب وعندج راتب وعيشي بي حتلو بخيل
تالي شصار بية وششفت وشعشت ؟
عوفيني هلمرة اختار واني مسؤلة عن اختياري
عوفيني اختار ولو مرة بحياتي
دخلت للغرفة نصير يمي حطيت سجادتي صليت واندعي
يارب انت خلصتني من زياد واني ماانسا فضلك
كملها علية يارب واجعلة من نصيبي
انت تعرف كلبي مادك لغيرة
وتعرف عمري لو اقدمة الة مااوفي عن الي سوا الي وجميلة بتخليصي من كابوس زياد
اني دعيتك هواااي وانت مترد اليتيم
اني صبرت وانت جازيت صبري
على كد مادعيتك احس موبس ادية تنرفع الك حتة جسمي جان ينرفع وياها وجنت اهيم واحلق ضايعة
وهسة اريد قيصر قسمتي
اني ماشفت راحة وانت تعلم يارب
نمت ليلتها مخنوكة واندعي يارب اذا مابي خير الي ومومن قسمتي شيلة من راسي
واريد شغلة ايوب تنسد واعيش لأبني وخلص
واني كلي ثقة بيك يارب
ماممكن تزرعلة حب بهلقدر بداخلي وانت ماقاسمة الي
هذا الحب الي تجاوز المسافات والسنين وبقة صامد يزيد ماينقص
فزيت على صوت امي توعي بية
صبحت علية ووجها مستبشر عكس لبارحة
ها يوم مو عوايدج
طلع لولد لامتهجم على زياد ولا ماد ايدة
بلعكس زياد مودي على ولد عمج وضاربين لولد مدمي واخو جاي هوة وولد عمة وحمايتة حارك بيت زياد برمي وناطيهم مهلة ليلة ويوم اذا ميجون كايللهم زياد دمة مهدور
حيل دلعت صدر دشداشتي وراسي للسمة وكتلة
اييييي ربي
هيج ويهدرون دم زياد لعار ويهج من العراق واخاص منة
هيج وياخذون منة فصل مربع وينجلط واتشكت بي
كافي لتدعين عيب يبقة ابن عمج وابو ابنج
لا والله لا ابن عمي ولا ابو ابني
لأن لا اني معترفة بي ولا حتة ابني
غيرت الموضوع قبل متبدي ملامتها واني اسألها
هسة شسوة زياد
رايح للشيخ ومتوسل بي علمود يروحون ويا ولشيخ ماقابل
ليش
من ذيج المرة موكايللة تدفع مليون يلله نجي بلكعدة وزياد ناطي كلمة وكايللة ميخالف ادفع مليون
وتالي مستلم لفصل من عدهم ومادافع فلس للشيخ
وذيج المرة من خابرتي انتي وكلتيلة زياد مساوم قيصر واخو عليج وماخذ منهم ١٦ مليون
هوة حالف بيومها الة يذب زياد من لعشيرة
بس عمامج مترجي وعمتج ام زياد بايعة من ذهبها ودافعة للشيخ حتة لايذبون زياد
هسة زياد ضال يتوسل بيهم محد يرضة يروح ويا
حتة ابو ماراضي
شعجب ؟
مورايد من عندة فلوس يريد يروح يعمر عشتو هوة ومرتة
وزياد كايللهم ماعندي فلوس بلعقار
وورة مدة سامع بي مرمم لبيت وباني فوك مشتمل ومأجرة
لحظة لحظة
يابيت
لبيت لكاعد بي هوة نفسة لجننا كاعدين بي مو مال ابو محمد وندفعلة اجارر
شنو اشترا
لا حبيبة لبيت طلع ملكة اصلا وجان متفق وية ابو محمد ولأجار الي ندفعة لابو محمد يروح لزياد
عيوني نفتحن بذهول وحسرة ترست صدري
الله لايوفقد يازياد
سنين ياخذ مني اجار فوك تقصيرة
هذا الحجي متأكدة من عندة
حتة اخابر للشيخ واكلة والله لأصير انذل من عندة واطلع كل فلس اخذة مني من عدخشمة
اي متأكدة عمج فاضحة قبل فترة مشتكي لخالج من عندة وخالج حجالي بس اني ماسولفتلج ماريد اقهرج
اني من يمي فرفحت
ومالنا خلك لمشاكل عوفي خل يولي وانسي لسالفة يم الله حقج تاخذي من عيونة
لا ماريد اخذة يم الله
اريد بيدي اخذة
اذا مافضحتك يازياد مااتسمة بلقيس
بلقيس لتخبليني ماعاولنة نسدت سالفة لبارحة
اني حالفا مااحجيلج
صووووجي
كمت من يمها للغرفة دخلت فرحاااانة
لهناك ودك تلفون امي اسمعها تسولف
رحت يمها كعدت هادئة وحبابة اريد استمع
كامت غيرت مكانها راحت للمطبخ
لحكتها وكفت ورا لباب
شوية وفتحت لباب فاجأتني
تقربت الي شمرت لمبايل علية وكالت احجي
وكع من ايدي
شلتة صوت رجال ماعرفة
وخرتة عن وجهي اباوع للرقم
مكتوب لشيخ
رديت الو هاعمو
هايابا ام نصير تسمعيني
اي عمو اسمعك
يابا ليوم نسابتكم طلبوج مني لأبنهم قيصر
واني بصراحة لوعندي بنية اكبعها وانطيها الهم
بس همة طالبينج انتي وكالو مانلكة مثل بسعاد واختها
اني نطيت موافقة مبدأية من بعد موافقة عمامج س يبقة لرأي الج
وهمة ماقبلو نطلع من لبيت إلة نتصل بيكم ونعرف رأيج
شوية وتغير لصوت
وصوت عمي ابو زياد يحاجيني
هابلقيس شلونج عمو
اني هذا الولد دخل كلبي الله شاهد
وهوة هسة شمر فلوس لفصل مالتة الي اخذة من زياد جوا رجلينا وكال هذا مهر،بلقيس
اني زياد لنذل بخل علية بشكم فلس علمود اروح بيت الله بس انتي ادري بيج ماتبخلين
واني رح انطيهم موافقة
صاحو علي
صوتة يرد عليهم جاي جاي
ها بلقيس هذهو
جان يساومني على مصلحتة حالة حال زياد
رديت رغم كارهتة
هذهو عمو
صوت لشيخ الي اخذ لتلفون من ايد عمي يهمس
يابا ترة همة
مستعجلين لأن كالو عدهم رجال مريض ويخافون يموت
انتي شنو رأيج
راح اسدة هسة ودانشي امرج ربع ساعة ورديلي جواب
صوت كلبي قبل لساني جاوبة
بدون متسدة عمو اني مواققة
صوتة بضحك رد موهيج يابنتي
سديتة من الخجل احس سخنت
دفنت وجهي بلمخدة
واسأل بروحي يربي هذا حلم علم .........
قيصر...
كام لشيخ على حيلة جاب لفلوس من السيارة وحطهن بلكاع يم رجلية
غضنفر دنك شالهن بيدة رفعهن وتقرب الة وكالة
هذني ال٥٠ مليون مهر كريمتكم ام نصير
وهذا اقل شي نسوي حتة نكفر عن ذنبنا بحق البنية وهاي المرة لثالثة تنجاب سيرتها بسببنا
عيوني مفتوحة بترقب واعاين الهم
واحد باوع علثاني
قطع الصمت صوت زياد ينتر
لا مالكم مرا عدنا
ابو عاط بي
زياد محد طالب شورك وانت آخر من يتكلم
ليش يابا
لأن اكو من مسؤل عن بلقيس وشورها بيدة
لشيخ بتسم بأحراج وكال
اني شيخ ملزم بزلم هلعشيرة
اما نسوانها فكل حرمة اكو من يقرر عنها
ابوها او عمها
وهذولة عماها كدامكم ولايهونون الحاظرين
وهمة القرار ولكلمة الهم ونسبكم شرف النا ابو قسورة
والله ولنعم منك ومن عمامها وكل لداسو بساطنا
بس احنة طمعانين بيكم وبكرمكم
وان شاء الله ماتردونة
بقو عمامها يتهامسون بينهم
وراها ابو زياد كال
ابشر والله ومايكون خاطرك الة طيب
وطلب من شيخهم يدك على ام بلقيس،
شوية واخذ لتلفون من ايدة وطلع برا يحجي
وراها رجع وكال موافقين
واكف على حيلي واني اسمع جوابهم بلقبول بعد مااتصلو بيها
ردت اوكع من طولي من الفرحة
دموع ترست عيوني
وصوت غضنفر يهمس كض روحك خزيتنا
هاي دموع الفرح شلون اكضها
ياجمال هلشعور الي غمرني
فرحة جان بودي اضمها بجيبي خايف تنسرق مني حالها حال كلشي ميدوملي
بهللحظات ادركت تماما انو ماكو شي مستحيل
بس لأشياء تحتاج من عندة جهد وطاقة
صبر وكفاح
طوال سنين جانتلي مثل بوصلة
جنت اتجه حيثما تتجه هي
ادركت انو مادام لأنسان يسعى ومادامة يحاول الوصول إلى شغفة وأحلامة راح يوصل بيوم من لأيام
شكد تعبت بحبها
وشكد عانيت
شكد ضاعت مني ايام حلوة وسنين جان لمفروض اعيشها بطول وعرض
بس بهللحظات احس كل هلتتعب تلاشا امام سماعي للموافقة منهم
ولاجمل من هلشي انو تعب السنين
السهر
المرض
الغربة
الصبر
الحرمان
ماراح هباء الريح
تعبي تحازة بيها
ويامحلا من جزاء
جنت استحقة
فعلا استحقة
الي صار بهللحظات جنت ماادركة
صوت كلبي ودكاتة والفرحة المالية صدري والدموع الي مغوشة عيوني جانت تعيق عني كلشي
بلباب وكفو غضنفر ولولد وعمي يرمون
هاي الطلقات جانت تأكدلي لخبر وتميت اخر ذرة خوف بية من انو يتراجعون
صرار غضنفر الي ماقبل يطلعون إلة نقرا لفاتحة
من وكف فوك البنيد مال سيارتة ويرمي برا
جنت ممتن الة ولربي الي سخرة وسيلة
ممتن للصدفة الي خلت ايوب يخطبها وحركتها واتصلت بية تبجي وحطت حد للسنينة الجاي تضيع ونذبل بيها ثنينا
ركبو سياراتهم وراحو
دخلنا جوا لولد يهلهلون ويباركولي
نززنا صوت انعام تنتر بغضنفر على قسورة الي متدرر علي نفسة من صوت الرمي
يمكن بالغو لولد وغضنفر من فرحتهم
محد متوقعها
اني نفسي مامتوقع هيج غضنفر رح يضرب عصفورين بحجر
وطول ليوم لفات اسأل نفسي شعجب غضنفر عاف زياد وولد عمة وماضربهم من طلعوني من لبيت مضروب ومكسر
وكلسا اريد اعاتبة واكول لاء
بعدين تأكدت اكو براسة موال
وجان يدكلهم ناعم
نتها نقاشهم وهوة يرمي يمين الطلاق عايها
بوسط ذهول من الكل
الي ماجنة متوقعي بيوم انو غضنفر يطلق انعام
وتنتهي قصة الحب العظيمة هيج نهاية
طلعت من لبيت وطلع وراها
ماكدرت امنعة
لا اني ولا لولد
من ذا سيرحلُ؟! قد حار الوداع بنا
ترى أُودّع روحي أم أودّعُهُ؟
تضيق من بعده الدنيا فوا أسفي
على الزمان الذي بالوصل يوسعُهُ
إن كنتُ أخفي بقلبي ما أكابده
من الحنين، فهل تخفى مدامعُهُ؟
جعلتُه في أمان الله يحفظه
لابد يجمعني شوقي ويجمعُهُ
انعام ....
اذاني صفرت جنت محتاجة اسمع هاي الكلمة اكثر من مرة يلله استوعب
شكد تمنيتها وشكد سعيت الها بس والله حسيت كَلبي تقطعت اوصالة
بهللحظات القليلة واني اوكف كبالة بصدمة وذهول
ادركت انو حجم الرغبة بلبقاء وحيدة اكبرر بهواي من رغبتي بأن يرمم دواخلي الخربة
حسيت بأسى كلش جبير
على نفسي علي وعلى علاقة جانت جميلة للحد الي يصعب وصفة
علاقة حاولت بيها جهد امكاني انو اصبر واتأقلم
بس ضياع شرفي جان القشة الي فصمت ضهري
موتتها ومرضي خلاني مااعرف شنو اريد
كل الي اعرفة شوفتة ترهقني تتعب قلبي وعقلي وحتة جسدي جنت اريد اهرب من هذا التعب بأي وسيلة
لأن صدقا ماعندي طاقة ابد
حد طاقتي نتها واني اهل لتراب على بنتي بيدي
وبلمقابل ارمي جزء من هلتراب على باقي حياتي واجعل مني تحفية اثرية قديمة مكانها الرف الي يملي التراب لاغير
جانت رغبتي بأن اعتزل لبشر وكل ملذات الحياة مااعرف اذا جان فعلا مرض وجنت محتاجة طبيب
لو هوة هذا الصح
ماجنت اميز شي
مثل لطفل من يلج على شي وميعرف اذا جان بي مصلحة الة أو لاء
هوة يريدة وخلص
ومادريت هاي ارادتي اني كدها لو راح تنضاف لخيباتي وكسراتي
خطوات بعثرتهن بحديقة بيتة واصوات اسمعها منفصلة عنها جنت
صوت قيصر يصيح علي ليييش
موكتلك مريضة
ليش هيج سويت غضنفر
وعمة امريكا الي حيل تخرط بخدودها وتصرخ الله لايوفقج سللامة من عسنج لاسلمتي دنيا وآخرة
نضرات قسورة الي حسيتة ماقابل بهلشي
تلاها صوتة يهمس بلقرب مني
كَتلج انة هاوية ضلمة وكل من غاص بية غركَ
كتلج انة مطلوب هواااي
وكتلج خايف عليج مني انة شاري لموت خليني بلهيبي وخليج بمتاعج
كلتي لااااااا
انة شارية التعب وياك
انة عايفة الراحة وشارية شكَاك
اي مو هذا شكَااااااااااااااااي
هذا شكَاي
ليش من اول مطب بعتي وتخليتي
كتلج وكتلج ونبهت عبن ادري حياتي صعبة
الحيتي واصريتي
تتذكرين بيوم اجيتيني للمستشفى
تتذكرين شكد كتلج انة حياتي صعبة انة خايف عليج من قربي
تتذكرين اصرارج وملحتج
انة مارايد زواج ولا رايد استقرار ورب محمد
انة مارايد اورط بشر وياي
وكلكم تشهدووووووووون
بس ماثناني غير ملحتج واصرارج
وكلت ايييييييي هاي تالي صبري هاي عوض ربي
هاي التصلح الحال
تالي شلت الحاااااال
وانة ادري الدنيا تستكثر علية لفرح
اسألج بلله انة جبرتج على عشرتي
لو جبتج على عمات عينج وزرعتج بينا
موسنين عشتي وشفتي حياتنا شنو وانتي الي ختاريتي عيشتنا واجيتي برجليج وتوسلتي
جا اذا مابيج عليها ليش ورطتينا بجهال
الوضع الي جنت بي ماخلاني انطق حرف
عيوني للكاع دموعي تجري سخنت معدتي تكَلب
صوتة يهمس سااكتة
راضية بهلوضع وعاجبج
شلون ماترضين جا مو انتي ختاريتي
شنو احجي شنو ارد
شلون اكدر اشرحلة انو لخوف صار ردة الفعل الوحيدة الي امتلكها بهلعالم
لخوف صار الشعور الوحيد الي ينتابني تجاه كلشي اعيشة
شلون اشرح خوفي من الطريق والناس والأحلام وحذري وترددي وقلة الحيلة شلون افهمة انو اني خايفة من باجر وهو مااجة بعد، ومن لبارحة رغم هوة منتهي، ومن الأيام والوعود والصبر وطولة البال ومن التعقل، والتأني والغضب من دون ميشعر انو اني أبالغ
احيانا يكون لسكوت علامة العجز عن الكلام
علامة وجودة تنهيدة بحجم هلكون تحول دون خروج الكلام
علامة التردد والخوف من الأفصاح عن دواخلنا
وهواي علامات بس عمرة ماكان علامة الرضا مني على ماآلت الة احوالنا
مشيت وصوت ادي وحدة ترتطم بلثانية
جوا دخلت وعلى لحايط نتجيت وللأرض نسحب جسمي
حرفيا الي حسيتة هنا وكأن نفسي تخلت عن نفسي
حسيت وكأن كل لفاتني وكل لسنين المضت جنت اسقط
وجنت بلفراغ وستوني بس ارتمطت بلأرض
هللحظات مرت بسررررعة
عكس كل لحظات الألم دائما تمر بطييئة الى ان توشل طاقتنا
هنا صوتة برا يصرخ
انتي ختاريتي ومسؤلة عن اختيارج
بس اذا اجتج جنازتي بيوم اتذكري انتي الي يتمتي قسورة بيدج
هنا صوت قسورة يرد علي
بابا اني مااكدر اعوف ماما صح احبك وجنت اتمنا التقي بيك بس اني مرتاح وياها ومتعود على بيتنا ومنطقتنا واصدقائي
وصوتة يرد علي
وانة ماريدك تعوفها
انة اريدك زلمة معدل تسوي الي انة ماكدرت اسوي
وثق شوكت ماتلتفت تلكَة ابوك بضهرك
ولدنيا لوعكست وياك تلكَة جتف ابوك كَبل ماتنطق وتكَول بابا
هنا ودعوني واني شبه مسلهمة ادية ماعندي طاقة ارفعها واحضن واحد بيهم
هنا ابتسامة شامتة
وهنا خدود مزلغة وصوت ينحب تعاي يمة شوفي الحب لي ياما سقيتي بيدج مات وانتها وانشلعت شتلتة ليوم
هنا صوت يهمس ليش ينعيمة ليش تصيرين وية الدنيا علي
وهنا صوتة يصيح كافي تأخروهم يلله خلنها تمش وراهم طريق
يم لباب واكف جان مصرفن رداناتة ولاف دشداشتة على خصرة
هاي الحركة الي يسويها من يريد يتعارك
حرفيا حسيتة جان يتعارك وية نفسة
مريت من يمة
لثواني حسيت لأكدر اتقدم ولا اكدر ارجع حسيت دربي ضاع مني
وصوت هامس
كلتها وارد اكولها
ضيعتونا عشرتنا .، يمن ردناااكم لكبرتنا
وكفت لثواني وجنت مثل الي يخفي بين اضلعة بركان خامد
لالخلاص منة شي ممكن
ولا انفجارة نجاة
ومشت لسيارة بية ومن جامة منصور شفتة ركب سيارتة يأسرع مايكون
وقيصر ولولد طلعو ورا يحجون ويا عافهم ومشة عكس اتجاهنا
مشت لسيارة وعلى شفافي ماتت كل كلمات الوداع واني استذكر ذيج المرة الي طلعت بيها من عدهم وية محمد
وبداخلي سؤال هم راح ارجع الهم برجلية
هم راح اشتاق
هم راح يسحبني الطوق الي على ركَبتي مثل ماينسحب الحيوان من طوقة
لو خلص هلمرة القرار ابدي ومن غير رجوع
قبل مانوصل للبيت طلبت من منصور ياخذنا للمقبرة
كال بعدين اجليها عسة تعبانين
ليل ماترهم طبة المقبرة
كتلة ابد
نزلت يم قبرها
جنت جاية اشتكي مدري اعاتبها
الي ادري بي جنت مجتاجة احجي وياها
كعدت يمها جانت لدنيا ليل ولمكان اضلم
بصوت باكي جنت اهمس الها
ها اجاج ابوج ؟
شفتي
شكيتيلة من عندي
كلتيلة حرمتكم منة
سمعج ؟
شنو كالج
تدرين قسورة راحلة ورجع وياي
تدرين خايف من حياتهم واختارني
ويمكن حتة انتي لو عايشة جان اختاريتي لعيشة وياي بدون تردد
لوشايفة الدهاء والمعركة الي مجبرين ندخل بيها طرف حتلو اعتكفنا واستسلمنا
والله يابعد امج ماحرمتج منة الة من خوفي عليج
جنت ضايعة تايهة اتخبط بمتاهات
يمكن ظلمتكم وظلمت نفسي وحتة ابوج ظلمتة
بس مابية على عشرتة
ولابية على روحي ومرضي
ولابية علهبطات وقسورة كل لبقالي
اني خلص اريد احافظ علي وابنيلة حياة آمنة وبس
اني بكل رمشة عين خوفي علي يزيد
من فقدتج واني اوكفلة على باب لحمام كل يوم ومااخلي يسدها
من فقدتج واني اودي للمدرسة وارجعة بيدي
من فقدتج واني افتش بدفاترة كل يوووووم
شسويتي بية يامنة شسويتيييييييي
كمت بعد ماكتلنة لبرد
للبيت رجعت
ما نمت ليلتها
يوم ثاني اكتشفنا منصور راجع لبيتة ومنطي لمفتاح للمرية
اتصلنا بي ميجاوب
اتصلت على بثينة كالت طالعة بس ارجع اخابرج
منصور وانغام وجههم ثكيل احس ماقابلين على الي سويتة
قسورة حزين وبطبعا من ينقهر يتمرض
لأن يكتم عكس منة ابد متضم شي طك بطك
قوية جانت من زغرها علمها فدعم وطلع عينها
عدن ايام رجعنة لحياتنا طبيعي
كاعدين بلغرفة نريد ننام وندكت لباب
طلع منصور شوية وصاح علية
لبست حجابي ورحت
اعاين قيصر
سلم علية وحضن قسورة
كلنالة تفضل
ماقبل يدخل
طلع من جيبة فلوس ومبايل نطاهن لقسورة
وكالة هذني ابوك دزهن ولجمعة نجي نشوفك اني ويا
ماحجيت شي كتلة هلا بيكم
دخلنة جوا
فتح التلفون قسورة موديلة حلو وجديد
حاطلة بي ارقامهم كلهم
بقة يلعب بي
ورا شوية دك علي
حجا ويا
مااعرف شنو كلة خلة وطلع برا بلحديقة يسولف ويا
لحكتة
اسمعة بس يكلة اي اي
وخرت من راد يطب
سألتة شنو كالك
ماكال شي
لعد ليش طلعت برا
هوسة لتلفزيون ماافهم منة
شيريد منك
ميريد
شنو ميريد صارلك ساعة تحجي وميريد شي
وصاني على روحي وعلى دراستي وعليج وسأل على وضعنة وكال اي شي تحتاج او شي يصير وياك ارقامنة يمك وتتصل
بقيت عيني علي يلعب بلتلفون ماهدة
تقربت يمة
هاي شدتسوي
بي نت كاعد اباوع يوتيوب مقاطع تضحك
تانيتة نام
ورحت علتلفون فتحتة
بقيت اكلب بي
بي فايبر دخلت المحادثة فارغة مابيها شي
شوية وندزت رسالة
ها قسورة شعندك كاعد
بساع طفيتة ورجعتة جوة لمخدة مالتة
عدن يومين هوة يتاني الجمعة ومتحمس
يكلي هسة بابا يجي بسيارتة الحلوة وويا حمايتة بعد اصدقائي يكومون يتلوكولي ويخافون مني
بعد محد يحجي على منة
ولا احد يندك بية
طول هلفترة لتلفون ميوكع من ايدة
كمت اخذة من عندة وانطيهيا ساعتين بليوم بس
يتذمر ويتعارك
هذا بابا جابة
انتي معليج
يخليني افووور
انتر بي
شنو لتلفون ابو جبيرر.مااكدر اشتريلك مثلا
ولك اني سنين كبرت لا شكيت ولا ذليت لبشر
تلفون يصعب علية
غير اخاف علييييك
مااريدك تدمن علي
يجي يعتذر ومن انطي الة يرجع يتمرد
تعبني
الى ان اجت لجمعة
ليلتها ماغفيت ابد
منصور جاب مسواك كال فشلة خاف يدخلون
ناس ماقصرو ويانا كامو بينا بلصلوات شكم يوم
ساعة ب١٢ وثلث لضهر ندكت لباب
طلع منصور فتحها وقسورة كدامة ركض
بقيت بلمطبخ من ورا لباب اعاين
قيصر سلم وبقة يسولف وية منصور
شوية واجاني قسورة
نطيني مبايلي ماما
وين تريد
اروح وياهم
بدون ماافهم منة سحب لتلفون من الميز من لشاحنة وركض
نفتحت لباب وطلعو وطلع منصور وراهم
قيصر بعدها ايدة مجبسة
بلسيارة بلصدر كاعد غضنفر مانزل
فتح لباب قسورة وراحلة من لجهة لثانية
نزل حيل شبكة ومثل طفل يشيلة
راح وياهم واني الوب
لليل وهوة ماكو
اتصل علي ميجاوب
منصور يكلي شبيج خايفة شنو رح يخطفو
كالو نفتر ونونسة ونشتريلة شغلات ونرجعة
كلبي مامطمأن لعد ليش ميرد قسورة
تلكي صامت وماحاس علي
رجعت دكيت اكثر من مرة
رد علية صوتة
الو
عجيب شلون صوت يبعثر كيان انسان ويعيد تجميعة
سلام عليكم
عليكم لسلام هلا ام قسورة
وينة قسورة ليش،ميرد من لصبح ادك
مايدري بتلفونة بلسيارة ناسي
هاجيا
نطا الي
نترت بي بأغصاب
ويننننك حيوان كلبي راح
ليش هيج
دأرجع للبيت وشوف شلون اكسر لتلفون براسك
صوتة يهمس
افا افا شدعوا بوية تكسرين لتلفون براسة شمسوي لولد
سديتة مارديت
ورة نص ساعة اجو
من لباب دخلو وراحو
بس قيصر،دخل ويا للحديقة بيدة غراض وعلاليك
رحت برا بعد ماسد لباب منصور
اعاين مجموعة علاليك هواي وكارتونة جبيررة
تقربت اسأل بي شنو هاي
مالاتي
ادري قابل كايلتلك بايكهن
شنو بيهن
ملابس واحذية وشحاطات والعاب وكرزات وحلويات
لييييش ميت من لحوع لو عريان لو ماشايف
هوة جابهن اني شعلية
وهاي شنو اشرت علكارتونة
هاي جرباية
كالتا بتردد
ليش شبيها جربايتك
مو حلوة
ليش ماكتلييييي
لو كايللي ماجيبلك وللللللك
ماصارلها سنة عندددك
ليش مصر تاذي امك وتطلعها بنضرة مقصرة وحارمتك ولك ليييييش
ماما شنو لسالفة رح تطلعيهن من خشمي
نتجيت علحايط بدون شعور ابجي
منصور تقرب الي يلوم
يمعودة كولي يا الله على شنو هلبجي طفل هوة شيفهم لاتدخلو بنزاعاتكم
ومشاكلكم
دخل جوا فرحان بلغراض
يفتح بلعلاليك ويشوف الهم
وراها جاب علاكة وخلاها بغرفتي
رحت فتحتها
بيها ثنين تراكات مال بيت ربع ردان برمودة وعطر شاليز ولمعطر مالتة
عطري لمفضل مااستخدم غيرة
طلعت اصيح علي
ان شاء الله كتلة امي ماعدها هدوم
لا والله اصلاا ماادري بي من شتراهن من نزلت نطاهن الي وهسة من فتحت لغراض شفتهن
شمرتهن بلكنتور ولفيت راسي ونمت
اسمعة يسولف الهم برا
رحنة مطعم يخبببل
ورحنة للزوراء وللجادرية ورحنة فترينا سواكة كومة
عدت مدة هوة كل شهر يجي هوة وقيصر يلخذو يوم كامل يطلعو ويرجعو بليل
وراها بدت المدارس وداومنة
كلما نطلع مكان كلما نروح للدوام انتبه اكو ولد يوكف قريب على بيتنا
لوبرلس لفرع لو بنهايتة
لو علشارع لعالم
لغريبة ان لولد ماشايفي ولا احد يعرفة
وراها قسورة سائل ابو اتضح هوة دازة
عدت لأيام ومشت طبيعية مرتاحة على راحة قسورة اشوفة فرحان ومطمأن ومتونس
مستوا بلمدرسة تحسن هواي
اما اني جنت اعيش بصراعات
جنت كلما يتصل ادخل اسبح
لايمي لاسامعة صوتة لاماجيتة
وبيوم الي يجي ياخذة يمر علية لنهار اني بلحمام
بعد اصرار انغام وملحتها بديت اروح لدكتوة
اشهر عدت اني اراجع عدها كلشي ماتغير ولا تحسنت حالتي
بلعكس جنت اتعب اكثر
كل مراجعة جانت تذكرني بذاك ليوم الخالد بذاكرتي
ادوية تنومني تهدا اعصابي بس لوهواس ماعافني ابد
مصر يكون رفيقي بهلحياة
علاجاتي اختلفت مابين دكاترة جلدية من الأكزما والفطريات الي تاكل رجلية من كثر لرطوبة
ومابين ادوية راس على كد لألم الي اعيشة كل يوم بدوم اي مسبب صداع يلزمني من التفكير
واجة يوم دورة سنتها
سوينالها دورة سنة قراية نسوان
بيومها اجة واحد من حماية غضنفر على قسورة اخذة ومن رجع جان يسولفلي على الي مسوي غضنفر بلبيت ولذبايح الي ذابحها ولناس الي جاية تعزي مذهول يسولف
واكثر شي المني
من كال اي واحد يجي يريد يرمي ويكول ويسوي عراضة
بابا ميقبل وياخذ السلاح من عندة
يوصللي سلام لبنات وعمة امريكا دويسولفلي على جهال عمة مدينة الي جاينهم متفاجأ منهم ومن اطباعهم
من اسمع كلامة يستيقض كل حنين بية
عشرة متهون بس مصابي هونها وهون حتة روحي
كل مدة جنت اروحلها للقبر
اشيكيلها اسولف وياها
وبآخير لسنة رحت استلم نتيجتها
مدرساتها كابلني ويبجن على حالي
ايام عدت عااادية تافهة مابيها شي جديد
غير رغبتي بلوحدة الي تزيد كل يوم
٢٠١٣/ ١١/ ١٢ يوم ميلادها
اخذت كيكة ورحنا للقبر
حتفلت بدموعي ونوحي
بللت قبرها بدموعي واجيت
شالوني من قبرها جنازة
واحنة نمشي لاحظت جانن اكو شموع وبخور بلكاع منبتات يم قبرها
ويم راسها مرسوم قلب الحب وبداخلة مكتوب
فراكَك علة العلة
عقل بلراس ماخلة
رجعنة للبيت تمددت بفراشي هلكانة مابية اقتح عيوني وصداع راسي ودي افلشة بلخيطان
صوت قسورة وانغام برا يحجون
صوت صياح قسورة ومنصور يصيح علي وين تروح وييييين
شوية ودخلو علية
صوت انغام بيأس وحزن كالت
انعام .......يتبع
عذروني علتأخير قبل ٨ كامل والله بس لنت دمرني
تفاعلكم يفرحني اتمنة اشوف انصاف بحق تعبي 💔
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!