الفصل الرابع

رواية خريف أغسطس الجزء الرابع 4 بقلم حميدة عبدالحميد خريف أغسطسرواية خريف أغسطس الحلقة الرابعة مسافة الطريق رهف قالت لي عصومي قلت ليها عيون عصومي قالت لي ح نعمل العرس ف ياتو صالة ؟ بنسبة لحفلة الزفاف رديت ليها وانا بعاين ف إشارة المرور ، = ما ح نعمل اي حفلة زفاف!! لفت وشها ع قزاز العربية وظاهر عليها زعلت ، قلت ليها رهف قالت لي م تتكلم معاي ، قلت ليها طيب انتي عايزاها تكون ف ياتو صالة؟

لفت وشها على وكل لوحات السعادة إترسمت ف وشها وقالت لي بشاور البيست تبعي وأخبرك ف ياتو صالة قلت ليها تمام، وصلنا المحل كرشت العربية ونزلنا ، اول م دخلنا رهف أشرت لي ع طقم كامل وبنظرة كلها براءة قالت لي عايزة دا ومن زمان نفسي فيوو ، ابتسمت وقلت ليها م غالي عليك. فداك روحي زاتها ، نزلتو ليها وتاني بقينا نكشف ف الدِبل لحدي م لقت الدبلة العجبتها ، حاسبت الصايغ بنكك لانو نادرا م بشيل معاي كاش ، طلعنا برا والجو كان مُغمم

وظاهر إنو المطرة ح تصب ، رهف قالت لي ارح نتغدا ، قلت ليها طيب كان ف مطعم قريب لمكان الصايغ دخلنا وقعدنا ، طلبت لينا أربعة شاورما وطلبت ل نفسي كولا ولي رهف عصير فراوله، كُنت سرحان ف تفاصيل وشها ، وما مصدق انو ح اتزوجها خلاص إتذكرت وقت عمي رفضني وقال لي م عندي بت للعرس وحاليا هو رضى بي والحمدلله، خلصنا اكل ورجعنا البيت وصلت رهف وانا خشيت ناس امي ، لقيتهم راقدين ف الحوش ،اخوي الكبير عصام ، اول ماشافني طوالي قام ع حيلوا

واتخطاني كأنو م بيعرفني ، إتلفتَ عليهو وناديتو بصوت عالي ٠٠٠٠

=يا عصام خير ف شنو ؟ إتلفت علي وهو رافع حاجبو وبنظرة مستفزة قال لي ٠٠٠ _هو فضل فيها خير ي استاذة معتصم؟؟ انت عارف الساعة كم حاليا ؟ ومُخلي مرتك وولدك براهم ،معقولة ي معتصم طلعت دنيئ للدرجة دي وخاين للعشرة ياخ مرتك دي صبرت معاك صبر لو كرثت حياتك كلها ف خدمتها م ح تجازيها تلتوا وبعدين نسيت لمن عمي دا هانك وزلاك زي الكلب ؟ ولا بتو الكانت م رافعاك من الأرض؟

، قلت ليو وانا ماشي عليهو لحدي م وقفت قصادو ونظراتنا اتلاقت مع بعض ، وقلت ليو بس الشرع حلل لي اربعة ي اخوي م تنسى ، ضحك وقال لي ح تندم ي معتصم ح تندم صدقني عشان انت م عدلت وناسي للمعروف والعشرة وفتح الباب وطلع ، امي قالت لي م تزعل وانت عارف انو بحترم عائشة قدر شنو عشان كدا هو زعلان شويه ، صراحة كلام اخوي دا عكر لي مزاجي شديد شربت مويه من الصبارة وطلعت طوالي صادف العشاء قعد يأذن مشيت المسجد اتوضيت وقعدت لين م قاموا الصلاة صلينا وبعدو غشيت اصحابي ف القهوة ، سلمت عليهم لقيت سموؤل وعزو ولطفي، عزو قال لي شنو ي صحبي الليله اتذكرتنا من وين قلت ليو معقوله ي عزو ؟

امس كُنت معاكم شكلك بقيت تنسى سريع ، قال لي لا قصدي من متين بقيت تجي تقعد معانا بعد العِشاء حدك معانا هنا العصر بس ، ومن إتزوجت خليت السهر معانا ،ضحكت وقلت ليو الليله اشتقت للسهره معاكم ، سموؤل قال لي حبابك الف ف اي وقت ، طلبت قهوة خالية من الجنزبيل وقعدنا نلعب كُشتينا للساعة ١م خلصنا لعب وعاينة للساعة لقيت الزمن اتأخر شديد ودعت الشباب و رجعت البيت لقيت عائشة صاحيه ، اول م شافتني ، قالت لي الحمدلله قلت ليها خير ف شنو

قالت لي حمدت الله ع سلامتك قلت ليها ايوا ، قالت لي مشيت وين قلت ليها كُنت مساهر مع اصحابي قالت لي تمام ، وقفت مسافة وانا مستغرب للمرة التانيه م قالت لي شي هي بطلت تعاتبني زي زمان ، مشت ع المطبخ وطفت الانوار فضلت اعاين فيها ، قالت لي خير ف شنو قلت ليها ما سألتيني اذا اتعشيت او لا ؟

ابتسمت وهي بترفع ف المراتب عشان تدخلهم جوا من المطر وقالت لي الساعة ١م علفكرة ووقت ساهرت مع اصحابك مستحيل تكون م اتعشيت ، عاينت ليها بس ودخلت جوا شغلت الشاشه وفتحت mbcاكشن كان في فلم بادي ، وفضلت احضر فيو لحدي م نمت ٠٠ ….. لقراءة الفصل التالي : لقراءة الرواية كاملة اضغط على : (رواية خريف أغسطس) CaMoمنذ يومين 0 3 دقائق