رواية خريف أغسطس الفصل الثالث 3 - بقلم حميدة عبدالحميد

صحيت نص الليل حوالي الساعة 2كدا وسبحان الله القمره كانت مكتملة وبيضاء ساطه وانا اصلا بنوم برا ف الحوش عاينت يمين وشمال شفت عائشة فارشه مُصلايتها ف نص الحوش ،كانت ف عالم تاني خالص قيام الليل بنسبة ليها اهم من اي شي كانت دايما بتقول لي رب السموات والأرض بذات نفسو بينزل ف الثلث الأخير من الليل ي معتصم ، كانت بتحب الخلوة بينها وبين الله كل حاجة في قلبها كانت بتحكيها ل ربها م حصل شفتها يوم وهي عابسه او شايله هم حاجة قيام

الليل بنسبة ليها كان مصدر طاقه وقوة كبيرة ليها ، صلحت مخدتي وجريت البطانية على وواصلت نومي ، صحيت ع صوت عائشة وهي بتصحيني لصلاة الفجر قلت ليها حاضر قايم ، زحيت البطانيه مني وانا بمسح ف وشي برفق مشيت إتوضيت وطلعت المسجد طوالي ، وعشان متعود إنو كل بعد م اصلي صلاة الفجر لازم اقرأ كم صفحة من سورة البقرة لانو عائشة معوداني كدا فتحت المصحف وقريت صفحة وحدة وكانت رهف شاغله كل بالي قفلت المصحف وطلعت البيت لقيت عائشة نظفت

وجهزت الشاي وكان عبارة عن شاي لبن وشاي احمر وزلابيه طبعا هي م شاءالله كم صلت الفجر تاني م بتنوم ، ختت صينية الكبابي ف الطربيزة الكانت داخل الهول وسيرمسات الشاي وصحن الزلابيه وفتحت الشاشه ع محاضرات بدر المشاري ٠٠٠٠ قعدنا نشرب ف الشاي وانا كُنت مشغول مع تلفوني ، شربت سريع ومشيت استحميت وبخيت من عطري المفضل وطلعت الشغل من دون م اقول ليها مع سلامه او كدا ، استلمني عثمان جمب باب المكتب وهو بيقلب ف الأوراق قلت ليو صباح

النور قال لي صباح الخير قلت ليو الليله بدرت ،ردا ليو وهو بيضحك وف نفس اللحظه بعاين ف الملفات بنظرو وقال لي ٠٠٠

=والله ي معتصم انت عارف انو انا ناوي علي العرس من زمان وحاليا كثفت ساعات العمل عشان اقدر أنجز

قلت ليو حلو بالتوفيق وانا معاك خطوة بخطوة ولو محتاج اي شي كلمني قال لي م بتقصر والله بس خايف إنو اعرس لي وحدة تعدمني الراحة ووالله ي معتصم زي مرتك دي فصيلة نادرة عديل ياخ بجد انت محظوظ ف حياتك ومعليش لو ادخلت ف شوؤن حياتك بس حبيت إنو اعبر ليك عن رائ قلت ليو م مشكلة ي حبوب وربنا يرزقك الزوجة الصالحه قال لي امين يارب ودخلنا جواا بعد ٣ساعة خلصت شُغلي واتصلت ل رهف ، لأنو متفق معاها عشان نمشي وتختار الدبله ، ركبت عربيتي

ومشيت ليهم ف البيت لقيت عمي قاعد ف الكرسي جمب الباب سلم علي سلام حار وقعدت معاو شوية وقال لي انو ح يصين بيتو عشان دا اول عرس ليهو قلت ليو لو محتاج اي شي انا ف الخدمة قال لي ابشر والله ولو نقصت لي اي حاجة م ح اتردد لحظة انو اجيك ، وفضلنا نتونس وتاني دخلت جوا سلمت مرت عمي وسألتها من رهف قالت لي شويه كدا وبتطلع قعد تلبس قلت ليها طيب وفضلت اتونس مع مرت عمي زمان مرت عمي دي ،وشي م بتدور تشوفوا اسي فجأة بقيت ليها زي الدهب ،

لحظات بس وجات رهف طالعه لابسه ليها عباية شويه طويلة ،بس من قدام فاتحه واظن دي موضه جديده كمان ظهرت عباية مفتوحه من تحت ويكون البنطلون ظاهر ومتريحه ب عطر الفاقد حاسة الشم اليوم داك ح يشم وعامله ليها روج شاذ قلت ليها شوفي هنا ي رهف اول العباية دي اقفليها والروج دا أمسحي والعطر الباخه فيك دا اتصرفي فيو وطلعي او غيري العبايه دي لانو الحاجات دي كلها حرام ، كل لو حات الزعل اترسمت ف وشها وقالت لي خلاص مرتك طمستك ب دا حرام

ودا حلال وبعدين المشكله وين انا ماشه معاك وماشين بعربية خاصه يعني عادي ي قلبي بليز م تشدد ، قلت ليها طيب تمام ارح نطلع ، ودعت مرت عمي وطلعنا وصادف عمي فات برضو، قبل نركب رهف قالت لي ارح نتصور قلت ليها لا قالت لي بس لي شنو، قلت ليها ح ترفعيها استوري ف الواتس وعائشة حتشوفها ، مدت بوزها مترين وقالت لي بس دي أسعد لحظات ف حياتي وبنسبة ل عائشة اصلا هي م صديقه معاي وح اعمل استثناء ل اي زول بيعرفها قلت ليها طيب اي شي ولا

زعلك،و اتصورنا كم صورة وبعدو طلعنا ع الصايغ٠٠