الفصل التاسع

رواية خريف أغسطس الجزء التاسع 9 بقلم حميدة عبدالحميد خريف أغسطسرواية خريف أغسطس الحلقة التاسعة إتوترت شديد وقمت ع حيلي ومشيت ع الكنبه وقعدت فيها وف نفس اللحظة بعاين للتلفون وسرحت بالزمن وبدت الأفكار السلبية تسيطر علي خلاص معقولة رهف بتتكلم مع واحد غيري؟

لالا مستحيل تعمل كدا ضغط ع راسي شديد وحاولت افكر ب طريقه ايجابيه ، وختيت ليها الف عذر بس لسه م اقتنعت لحظات بس ورهف رجعت لي فضلت اعاين ف التلفون وابيت افتح لمن المكالمه خلصت تاني رجعت لي طوالي فتحت الخط، والصوت كان غريب شويه قالت لي ٠٠ = الو معتصم كيفك معاك ريان قلت ليها ي اهلين بخير الحمدلله كيف انتي قالت لي كويسه الحمدلله قلت ليها رهف وين؟

طبعا ريان اخت رهف الكبيرة ، قالت لي معليش قبيل مكالمتك نزلت ف الخط وانا اسفه شديد كُنت بتكلم مع الزبير وكان موضوع مهم جدا وتلفوني ليهو فترة خسران فعشان كدا شلت تلفون رهف ٠٠٠٠٠هنا داب اطمئنت شلت نفس عميق وقلت ليها اهاا يعني دي انتي كنتي بتتكلمي ب تلفون رهف قالت لي ايوا ، قلت ليها ورهف وين؟

قالت لي من قبيل نامت ياهو صلت العشاء وقرت سورة البقرة وأذكار النوم ، فرحت شديد وقلت ليها الحمدلله قفلت الخط وانا متكيف منها ، طفيت الشاشه ومشيت ع غرفتي ونمت ٠٠ ف جانب أخر٠٠٠ اووووووووف منك ي رهف تاني اقسم بالله تصحيني عشان عمايلك دي بكلم ليك ابوي وبعدين انتي عارفه انو ابوي قرر يعرس ليك معتصم عشان يسترك وشافك بديتي تنحرفي خلاص ولسة م عايزة تخلي عمايلك دي؟

ومُصرة فيها ومازن ولا زفت دا لو صحي هو راجل كان جا عرسك ، ألمهم اسي انا انقذتك وطلعتك من الورطه دي وم كُل مرة ح تلقيني واقفه معاك ف مصيبتك وبعدين معتصم م شافع هو زيو وزي اي راجل لمن يلقى تلفونك مشغول انصاص الليالي اكيد ح يفكر تفكير تاني ، ولمعلوماتك ابوي لو عرف ح يقتلك ، ومازن دا زاتو دايره بيهو شنو عليك الله دا لو فطر غداهو ف تلتلة ، وشماسي حايم ف القهاوي امسكي ف ود عمنا دا واتمعتي ف مالو وخليك زوله كويسه ف نظرو واثبتوا ليهو انو انتي احسن من عائشة ٠٠

ردت ليها ببرود وهي بتلعب بالتلفون وقالت ليها ٠٠ معتصم دا قشرة ساي ي ستي اصلا ح اتملي بيهو دهب وقروش وبعدين ح اعرس حبيب قساي مازن واصلا انا وافقته بيهو عشان قروشوا لو م كدا من الأرض م بعرفووا وبعدين العرس بقى موضه يختي وجديع وتحشيشات ساي هو زول بعرس عشان يستقر ماف وقفت علي انا ، شوف دي بلاي ٠٠٠ عاينت ليها بعدم مبالاة وطنطنت مع نفسها =غايتو الله يسترك ي اختي وطلعت وقفلت الباب وراها ٠٠٠ ف الصباح الباكر ٠٠٠

الجوو كان مغمم والسحابه شايلة ولونها داكن وفي شوية رزاز وصوت العصافير مالي البيت وقطرات المطر وهي بتدحرج من الزهور وصوت القران بصوت محمد الزين ، اتمغيت زين وقعدت ف نص السرير ، طلعت تلفوني من تحت المخدة ومررت نظري علي الساعة لقيتها عامله٥:٣٠ قمت مخلوع وانا ماشي برا معقولة عائشة نست تصحيني لصلاة الفجر ؟

ما من عوايدها، اتقدمت شويه لقيتها ف الهول قاعدة ومعاها يوسف ف حضنها ومتغيطه ب توبها ، جيت وصبحت عليها وقلت ليها امس مالك م صحيتيني، ابستمت من دون م تعاين لي وقالت لي صحيتك عشرة مرة واستخدمت كل الأساليب الممكنة بس انت م صحيت ولي اول مرة نومك يكون تقيل كدا ، مسحت شعري برفق وانا مستغرب شديد معقولة نومي بقى تقيل كدا ؟

قلت ليها ايوا حصل خير وطلعت غرفتي استحميت واتسوكت ولبست ، ونزلت تحت شلت يوسف من عائشة وبقيت العب معاهو ، طبعآ هو هادئ شديد عائشة كبت لي الشاي ، قلت ليها الريمود معاك؟

قالت لي ايوا قلت ليها ممكن تجيي قناة الحدث قالت لي طيب رفعت الريمود وجابتها ، وجهت نظري ع الشاشه وانا بشرب ف الشاي وفي نفس اللحظة شايل يوسف ، قعدت شويه لحدي الساعة بقت٧ شلت مفتاحي وطلعت ع الشغل ، عائشة كانت بتقدمني لي باب الشارع وتدعي لي وتحصني لحدي م اطلع بس لاحظت ليها بطلت تعمل كدا ، وصلت مكان الشغل لقيت عمي قاعد وحارسني سلمت عليه وقال لي لازم العرس يكون الاسبوع الجاي لانو هو ح يسافر قلت ليو خير م عندي مشكلة انا

قال لي طيب ح اكلم ابوك قلت ليو طيب ، عمي فات وانا ح اطير من الفرحه ولو قال لي بكرة زاتو م عندي مشكلة ، طلعت من مكتبي ومشيت لي مجاهد قلت ليهو الايام دي ح اتغيب عن الشغل شويه لانو عندي مواضيع كتيرة عايز اخلصها قال لي خير قلت ليو خير بس صحبك بعد اسبوع عريس كل تفاصيل وشوا اتغيرت ، قلت ليو مالك؟

قال لي معتصم بتهظر صح؟ قلت ليو شكلي دا شكل زول بيهظر؟ قال لي لالا تمام ي اخوي الف مبروك ، بس انت متأكد من قرارك دا؟

وانا م بقول ليك م تعرس هو الشرع حلل أربعة بس ي معتصم انت عارف انو عائشة غدوة لي اخواتي واختي الكبيرة التزمت بفضل الله ثم بفضلها، امي ماف سيرة ف خشمها غير اقوال عائشة وقصص عائشة وكلام عائشة الطيب ، قفلت منو شديد وطلعت من غير م اتكلم معاهو وبديت اكره عائشة معقولة ماف زول عايز يفرح لي الا يقول لي عائشة عائشة ٠٠طلعت لي ناس امي، ومسافة الطريق سرحت ف كلام مجاهد وعكر لي مزاجي شديد٠٠ ….. لقراءة الفصل التالي : لقراءة

الرواية كاملة اضغط على : (رواية خريف أغسطس) مدونة كامومنذ يومين 0 3 دقائق