رواية خريف أغسطس الفصل الثاني 2 - بقلم حميدة عبدالحميد

امي قالت لي افضل توريها من هسي ي معتصم قلت ليها م مهم ي امي وهي ح تتفهم الوضع وبعدين هي عارفه انو الراجل مُحللات ليو أربعة، ابوي قال لي صح الراجل مُحللات ليو اربعة ومرتك فاهمة وع قولك م ظنيت ح يكون عندها اعتراض او مانع، وبعدين بت عمك اولي بيك انت منها ضحكت وقلت ليو اصلا دا الكلام الكُنت عايز اوصلوا ليكم من زمان ي ابوي وعاينت ل رهف ولي عيونها العسلية الكانت مُجنناني ، حرفيا م صدقت انو ح اتزوجها ويمكن انا كُنت بحب شكلها ومظهرها شديد ، اتفقنا ع العرس واتفقت مع عمي ع المهر وانو ح اديهم ٢٠مليار متكفي ب الدهب ورهف قالت عايزة عربيه قلت ليها من عيوني انتي بس اتمني وانا بنفز ليك ، وخططنا ل حاجات كتيرة وكُنت ناسي تمامآ انو انا متزوج وعندي ولد ، امي قالت لي طبعا نحنا م ح نعمل ليك عرس كرامة بس والعرس الكبير حيكون ف بيت عمك قلت ليها م عندي مشكله، اليوم داك كلو قضينا ونسة وتخطيط ل عرسي التاني ورهف طلبت انو أرحل مرتي ف بيت تاني واخليها تقعد فيو.لانو عاجبها شديد قلت ليها بفكر قالت لي طيب شربنا شاي المساء ووصلت عماتي بيوتهم وعمي اصلا عندو عربية ،فات بيها هو ومرتو ورهف ، وهم م بُعاد مننا مسافة ساعة بس ، وصلت عماتي البيت وانا رجعت بيتي لقيتو كالعادة نظيف ومرتب كان هادئ وكلوا سكينة وطمأنينة ، عائشة ابتسمت وقالت لي رجعت قلت ليها اي ، وتاني م اشتغلت بيها دخلت جوا استحميت وهي ختت لي الاكل والموية قلت ليها اكلت ابتسمت وقالت لي الحمدلله شالت الصينيه ورجعت بيها المطبخ ، شلت تلفوني ودخلت الواتس لقيت رسالة من رهف محتواها كان
_ راجلي اشتقنا
ابتسمت ابتسامة عريضه وكتبت ليها
= بالكتير ي مرتي الحلوة
جات عائشة قاطعة ب قدامي نزلت التلفون عشان م تحس بي حاجة وانا نسيت اصلا انو هي مستحيل تعاين ف تلفوني من دون اذني لانو ماشه ب مبدأ الاسلام وإنو م تتجسس ف حاجات م بتخصها ونهائي م بتمد نظرها ل حاجة م حقتها ، قالت لي محتاج شي قلت ليها لالا شكرا ، اول كان لمن ارجع من الشغل بقعد معاها هي ويوسف ولدي واحكي ليها عن يومي وهي كذلك ،كانت م بتمل نهائي من ونستي وبتحب تسمع كلامي ع طول ٠٠ كان ف كُبايه ف الطربيزة رفعتها ومشت وانا فضلت اتراسل مع رهف ، لحدي م حسيت نفسي نعست وصلت التلفون ف الشحن وقفلت اللمبات والأبواب وقبل انوم قلت لي عائشة انو م تصحيني لقيام الليل لانو فتران ابتسمت وهي بترفع ف يوسف عشان تدخلوا جوا وقالت لي حاضر ، استغربت شديد من ردة فعلها لانو زمان لو قلت ليها كدا كان بتديني محاضرة طويلة عريضه ، سرحت مسافة ورجعت نمت