رواية خطأ طبي «عقاب الاماني» الفصل السابع عشر 17 - بقلم نورمـين

#خطأ_طبي «عقاب الاماني»

بقلــم : نورمين 🦋🖤

...

اماني: واني كلش مليت من تدخلك بيه وبحياتي!! شنو معناها هالحركاتتتت هاي هااااا؟!!!!

ببساطة رد.
عقاب: معناها مرة لخ من اكلج لسوين فلان شي، تسمعين الكلام ومتسويه

اماني: ها ولله!!!
رديت باستهزاء، ادور رجعت حجيت بجدية.

اماني: مثلما انت الك حياتك وحُـر بيها، ومتقبل اتدخل بيك، فأنت هم متدخل بيه وتبطل تعاملني بأوامر وكأني اشتغل عندك!

عاف الي بأيده واجة يمي، حط ايده بجيوبه ودنك راسه يباوعلي، رافع تك خد بأبتسامة ساخرة.

عقاب: يعني هي هاي المضوجتج؟

اماني: عفوًا؟

دنك راسه ضحك ورجع كال.
عقاب: لان البارحة كتلج لتدخلين بحياتي، رجعتيها الي بهالسالفة مو؟

انخمط لوني، هذا شكد ذكي لخاطر الله.

اماني: اكيد لا، منو كلك انت مهم عندي حتى اسوي هيج علمودك؟ غلطان اني هذا ستايل لبسي وممجبورة اغيره لحتى ترضى، خاصة احنه ما بيننا شي وكلمن عايش حياته ع كيف كيفه، مو؟

عقاب: سولفي لوين تريدين توصلين، لتظلين تبسمرين

ابتسمت، حلو يعني يعرف دا اقصده، حطيت ايديه ع ياخة قميصه وثبتتهم بحيث خليت نظراته بأتجاهي، وحجيت بحدة.

اماني: وين تطلع وتغط لتالي وكت؟!

عقاب: شغل

اماني: شغل ايش هذا، شو هالايام طلع؟

عقاب: شيخصج؟

اماني: اهاا هاي نقطة الخلاف العدنا

گلب عيونه بملل ودفع ايديه عنه، كتفتهم لصدري وباوعتله.

عقاب: تعالي تريكي وبسچ لغوة

اماني: صبت الهدف يعني

عقاب: كلت بسچ!
بتحذير نتر فـ رديت بأنفعال.

اماني: ماكو بس، بعدني اريد اكمل حجي!! واريد هسة تفهمني كلشي ببالي، ماكو بعدين! لان اني تعبت انتظر البعدين هاي مالتك شوكت يجي وكتها!!

تنهد ودفع الكرسي الي يم الطاولة عالحايط بقوة، فزيت من حركته، التفتتله لكيته معصب وينفخ ونظراته تغيرت.

بلعت ريكي وقويت نفسي، مو عباله يخوفني بهيج حركات ويسكتني.

اماني: عوف العنتـريات هاي واحجي!

هسهس بنفاذ صبر وعيونه خازرتني.
عقاب: دكتوررررةةةةة!!!

باوعتله بعدم رضا ورجعت للغرفة، حتى سد نفسيتي من الصبح، طلعنا للدوام وكلمة ماكو بيناتنا طول الطريق، اول موصل يم المستشفى نزلت بساع وطبكت باب السيارة حيل، كلش ضجت وع اعصابي كاعدة يمه هالكم دقيقة.

طبيت للمستشفى، اخذت نفس احاول اغير مزاجي واريح تعابير وجهي المحتدة، لاكتني شهد هم هستوها وصلت، سلمنا ع بعض وبعدين رحت بدلت ولبست صدريتي وبلشت افتر عالردهات. 

...

عقاب

وصلتها ورحت للمكتب، اني من غير شي شياطين الدنيا كلها متربعة براسي ضد دكتور توفيق الكلب ودكته الحقيرة!
وهاي جاية تنكد براسي من الصباحيات.

جنة كاعدين برة والحجي مسافر هالاسبوع لأربيل.

ضرغام بعدم تصديق صاح.
ضرغام: عليك اللله!!!!!! صدكككك كوللللل ولله؟؟؟؟!!!!

شاهين: عقاب كول وروح ابوية!!!

ضحكت ع رد فعلهم ورديت.
عقاب: وروح ابوية، بعد؟

قسورة بحسد: الله ربـكم

كفخه ضرغام.
ضرغام: لتحط عينك رحمة للكعبةةةة

شاهين: خمسة وخميسة بعينك قسورة، قل اعوذ برب الفلق، تفتفتف

قسورة: عليمن تتفل ولك كلب!

ليث: هههه مو يتفل، هذا ديطفي عينك خاف تحسده

قسورة: هاي انتو كل عقلكم احسدكم؟ طاحظ الخوة
حجاها مستحسف ورد باوعلي وكال.

قسورة: عقاب اذا تحبني ولو شوية، لا تحاجيلهم الحجي من يرجع من اربيل وخليهم هيج يتحسرون

اني جنت اضحك عليهم، فمن كال هيج قسورة عرفت ضاج لان يريد ريما، واذا ضرغام وشاهين صدك خطبوا فهو رح يفلفل اكثر مما هسة، طبطبت ع جتفه وكتله بضحك.

عقاب: لتصير لئيم، يجيك السرة

قسورة: منين يحظي منييييين

ليث اشرلي بعيونه شكو، رفعت حواجبي بمادري وابتسمت.

شاهين: بدال هاللطم جنك عجوز، كومة بنات روح اختارلك وحدة، وطاحظ شاربه لميجي وياك وياخذلكياها

ضرغام: اي ولله، الا اهوسلك هوسات تزلزل الكاع

ليث: ع كيفك عيني ضرغام دبچة

ضرغام: انت انجب ليث لفة

ليث: الله!! جعت كوموا نتريك

متنا ضحك عليه، ليشوفه يكول ياكل بالدين، ميدري يلف الاخضر واليابس و24 ساعة جوعان وياكل.

قسورة: ولك منو الاكل هسة لعد!

ليث: اهوو ع كولة شاهين خمسة وخميسة بعينك، هي لفة جبن شبيك حاط عينك و تحسب اللكمة عليه

قسورة: هاي عليمن ولك جـوعي!!

ليث: ترا متضحك، بعدين اكل الزلم ع كد افعالها

شاهين: علساس مشرمها

ضرغام: هن وينهن افعالك يالزلمةة؟

قسورة: اووووباااا، ردها ان استطعت

ليث: جوعان هسة ماكدر احجي، اتريك واجيكم انتظروني
ركض يوصي ع ريوك ويرجع، واحنه نباوعله ونضحك.

شاهين:  عقاب هسة ع اتفاقنا، اول ميرجع الحجي نروح نخطب!!

ابتسمت وهزيت راسي بهدوء
عقاب: بعــيني

شاهين: سالمة عينك يبعد الما يرمشنن من يشوفنك

قسورة: لا تتلوك وهذا الحجي ضمه للمسعدة مالتك لتصرفه هنا

شاهين: وانت شبيك ضايج متكلي

ضرغام: مضغووووووط
حجاها بنبرة ناعمة يقلد ويسوي حميصة، ضحكت وقسورة ابتسم بقهر، سكتت وباوعتله بدقة، رح يحجيلهم اعرفه من يريد يسولف شي بباله، يبتسم وينزل راسه، ادور يتنهد ويعكد ايديه سوة.

وفعلا سوة هيج وبلش يحجي.
قسورة: عليمن انضغط هيّ زمال، لمضوجني انو الاحبها متدري بيه احبها ومستحيل تحبني بيوم من الايام، ويجوز تكرهني اصلا!

شاهين وضرغام تأثرت ملامحهم بحزن، خاصة انو نبرة قسورة جانت حزينة.

ضرغام: ليش تكرهك شمسويلها انت؟

قسورة: مو اني، الحجي مسوي وعقاب هم

باوعولي بغرابة.

ضرغام: احجوا بوضوح مدا افتهم

شاهين: شنو هاي حزورة؟ منية هاي بلا؟

قسورة يفرك اديه ببعض وداير وجهه للجانب، فحجيت بداله.

عقاب: اخت الدكتورة اماني

شاهين بصدمة: بت رياض!!

قسورة هز راسه ببطء وشاهين سكت هو وضرغام ميعرفون شيكولون.

قسورة: انصدمتوا مو..!  بس هسة اكيد عرفتوا ليش ما ممكن تحبني، ماكو داعي اعيد وازيد ع كره عائلتهم للحجي والنا طبعا

شاهين: شعليك انت!! بعدين الحجي مو يشتغل وية ابوها؟ بس تكله اكيد حيلكالك حل

قسورة: حل؟ قصدك مثل السواه ويه عقاب؟
باوعلي وكال وهو يسترخص مني.
قسورة: من رخصتك عقاب، بس لا شكرًا ماريد هيج شي ولا اريد اجبرها عليه، الحب ميجي بالغصب

ضرغام: لعد شلون؟ احسن تظل هيج تحبها من بعيد لبعيد؟

رفع اكتافه بحركة عنوانها مادري.

شاهين: جربت تعترفلها يعني؟ او تلمحلها؟ يجوز تطلع تحبك يا اخي ليش مظلمها لهالدرجة !

عقاب: يا يلمح، لو تشوفوه مخلصها مناكر ويه البنية، اخر مرة ع شوية جان صارت بيناتهم من الشعر

ابتسم قسورة وكال.
قسورة: يمكن تعتبروني غبي وما اعرف اعبر عن مشاعري صح، او ما افتهم بسوالف الحُب، بس صدكوني احب اغيضها لان من تعصب تصير احلى بقاطات، ونظرة عيونها الحادة تصوب گلبي، لدرجة اصير بس اعاركها، حتى تظل هالتعابير الماخذة عقلي كبالي.

ضرغام وشاهين صفنوا .. واني ظليت اباوعله واتذكر المناكر البيني وبين الدكتورة ومشاكلنا الي متقبل تنتهي!

قسورة: اي اني ما اغازلها ولا اكللها كلام حلو، بس گلبي يهواها بكل تفاصيلها،  اتذكر اول مرة شفتها جانت تبجي وعيونها حمر، بس جانت قوية وعدائية بالنسبة لأنثى مجروحة، ومن شفت عصبيتها عليه وحدتها بالكلام كلبي دك وكلي اريد هاي البنية

عقاب: صاير خوش تسولف..

ابتسم وشاهين حجة يلطف الجو
شاهين: ايي عيني خريج مدرسة الحُب، شوفوا الحب شيسوي بالواحد

قسورة: يكلبه كاظم الساهر

ضرغام: أحبيني بلا عُقدِ وضيعي في خطوط يدي.. أحبيني..

شمرته بحجارة لان صوته نشاز واني كلش احب هالاغنية، لوثها بصوته الحمار.
عقاب: اشششش نعلعلا حسك

ضرغام: حتى بالغنا هم واكفلي سجينة خاصرة، انت شبيك وياي متكلي

عقاب: كيفي، عندك اعتراض؟

راد يحجي بس شاهين لكز ايده، غير رأيه وكال بودية مصطنعة.
ضرغام: لا استغفر الله، شتفصل انت احنه نلبس

عقاب: عفيه هيج اريدك
حجيت بغرور وكوة لازم ضحكتي، هههههه ولله شعور حلو من تخلي ركبة واحد بايدك، شوكت ميعجبك تهدد وتدوس بمصارينه، وميكدر يفك حلكه وياك.  

...

اماني

كاعدة بغرفة الدكتورات اشرب جاي لان دخت كلشي مماكلة وافتريت هواي، طبت دكتورة زينب ضايجة وتستغفر بضجر.

اماني: شبيج؟

زينب: مليت ولج دكتورة مليت من الجهل الي بمجتمعنا!

اماني: شصاير؟

كعدت وحجت بقهر.
زينب: وصلت حالة اغتصاب هسة لطفلة عمرها 12 سنة، والاضرب من هيج منو المغتصبها؟ ابن عمها وابوها يتهدد يريد يكتلها الها، واخوها يتهدد ويتوعد بيها تخيلي!!

اماني: حسبي الله بيهم واحد واحد، دمروا طفولة البنات وحطموا نفسيتهن ومستقبلهن، يعني فوك ضيمها يجي يكمل عليها هو؟ هاي بدالما يصير سندها وهو ليدافعلها !

زينب: ماعرف شنو طينتهم هالآباء والاخوة، بس اريد افتهم بيا شرع وبيا دين سماوي كايلين المظلومة تنكتل!

اماني: كل عقلج مجتمعنا يحكمه دين؟ مجتمعنا تحكمه العادات البعيدة عن الدين، مو مهم انو الي دسوي حرام، اهم شي انو ديطلعك كدام العالم بوجه نظيف، مجتمعنا يحكمه العيب والفشلة ولخاطر عمك ولخاطر خالك، الدين مجرد غطاء، ميرجعوله بس وكت اليحتاجون عذر شرعي لافعالهم القذرة

زينب: اي ولله كلامج صحيح، بس المشكلة انو حتى الدين ما بي اعذار لتصرفاتهم!! ماعرف شلون يفسرون الكلام ويديروا لصالحهم

اماني: عادي هو هذا ميدانهم، يلتفون عالدين ويخلقولج الف حديث بس في سبيل يقنعوج بأن هم صح

زينب: تعرفين ان هالوضع صعب هواي يتغير؟

اماني: لا مو صعب، اذا كل واحد عدل من طريقة تفكيره وكام يتعامل ويه اخته ع اساس الود ويبنون صداقة بعيدا عن القرابة، ساعتها يكون اكو مسافة امان، متخطئ البنية ولا الاهل يخافون بعد

زينب: هذا كلامج كله صحيح بس منو يطبقه؟ قلة قليلة والي هم الفئة الواعية بس، زين والفئة الجاهلة المستهدفة شلون بيها؟ شنو ذنب النساء الي ينتمون لهيج عائلات متخلفة!!

اماني: مشكلتنا بالفكرة المغروسة بعقولهم مو بيهم هم،  والفكرة متموت

زينب: صحيح ولله

تنهدت وكمت طلعت برا اتمشى، صادفتني شهد.
شهد: ها دكتورة شبيج مغيمة

اماني: دخت وممتريكة يمكن ضغطي هبط

شهد: اجيبلج شي تاكليه؟

اماني: لا حبيبتي ميحتاج اكلت من شوية وصرت احسن

شهد: ع راحتج، اني رايحة اكمل فرتي ع المرضى

هزيت راسي وابتسمتلها، راحت واني طلعت للحديقة، اكو عدنه مثل كوخ صغير خشب وبي مساطب للكعدة، كعدت هناك وعيني ع باب الطوارئ وشلون العالم تروش ونصها تتباچى، والنص الثاني حيله مهدود وكاعد ينتظر شوكت يبشروه بصحة مريضه.

سمعت صريخ قوي، التفتت لورا ع جهة الصريخ وصار كدام عيني قسم الحروق، غمضت عيوني وصكيت ع اسناني واني اتخيل كمية الالم الي ديعانوها المرضى بداخل هالقسم..

كل انسان همه شكل، وكل واحد وجعه يختلف ومينحمل، يمكن طرق ألمنا تتباين بس النتيجة وحدة، وبالنهاية ما النا غير رب العالمين، يعينّـا ويساعدنا نجتاز هالمحن بقوة.

طلعت من افكاري ع صوت دكتور ساري الي واكف يم مدخل الكوخ.
ساري: تسمحيلي اكعد يمج؟

اماني: عادي تفضل

اجة كعد ع جهتي بس ترك بيناتنا مسافة، مجنت مهتمتله وعيوني ع مرة دتبجي وشابكة ابنها، الظاهر مات احد يخصها، عبست بملامحي وضيقت عيوني بتأثر.

ساري: فقدتي شخص عزيز عليج؟

التفتت عليه بوهن، هزيت راسي بلا.

ساري: حسيتج هيج لان واضح شكد متاثرة بوضعية المرة، عبالي مارة بهالموقف

فرقت شفايفي وحجيت.
اماني: مو شرط امر بي شخصيًا يلا اعرف لوعته، كل روح انسان تدخل لهنا تصير تخصني وغالية ع گلبي.

ارتبك وتلعثم بالرد.
ساري: م--مو هيج قصـ---دي بس..

قاطعته وكلت.
اماني: فهمتك ميحتاج توضح

ساري: ليش ضايجة اليوم؟

درت وجهي عليه مستغربة جرأته وياي بالكلام ومصارلنا غير يومين نعرف بعض!

ساري: اعتذر اذا تخطيت حدودي وياج، لتجاوبين اذا متريدين

المشكلة هو لبق بالتعامل والكلام، ماكدر اضوج منه اصلا!

اماني: لا عادي لتعتذر بس ما احب احجي عن نفسي او عن حياتي فياريت لتسال بهالخصوص

ساري: تمام فهمت قصدج، متتكرر ان شاء الله

ابتسمت بودية وترخصت منه وكمت، اففف يعني حتى من تريد تريح راسك من هوسة المرضى، يسلطلك رب العالمين دكتور، ومن ترجع للبيت تبلش بشوط ثاني مختلف تماما، وهو شوط الدكتاتور عقاب.

للظهر، كملت دوام ودك تلفوني، عقاب ديخابر رديت.
اماني: الو

عقاب: نزليلي اني جوة

اماني: جاية

جاوبته ببرود لان حجايته جانت واكفة، واني اكثر شي اتخبل منه بالدنيا هالاسلوب البارد، يعني لو من شخص عادي جان ما اهتميت، بس لان من عقاب توجعني برودته ..!

لميت غراضي ودعت البنات ونزلت، لكيته موكف السيارة بعيد مو مثل البارحة، صعدت وسلمت بنبرة جافة.

اماني: سلام

عقاب: يا هلا
رد ببساطة وحرك السيارة، طول الطريق جان الصمت مسيطر عالجو.

نزل يم مطعم جاب اكل ورد صعد، وصلنا للبيت بوجهي للحمام غسلت وطلعت تمددت بمكاني، غمضت عيوني من سمعت صوته.

عقاب: دكتورة بعدين نامي، اتغدي هسة

غلست ومحجيت علساس نمت.

عقاب: ادري بيج منايمة عوفي التمثيل وكومي

فتحت عيوني ورديت بملل بدون ما التفت واباوعله.
اماني: اذا جعت اندل مكان الاكل وين، فلا تتعب نفسك وياي وروح لشغلك احسن

عقاب: هيج صار الحجي يعني!؟

اماني: مو انت هيج تريد؟ خلص دا انفذه

راح بلا ميحجي شي، سمعت صوت الباب مال البيت انسدت، دمعت عيني بس مسحت دمعتي بقوة، لا اماني كافي تبجين، ما تعودتي تكونين ضعيفة ابد، خلي يروح هو بكل الاحوال جان حيطلع، صارلي مهتم بأكلي فجأة هه.

ورة شوية وقت، غفيت من التعب وما حسيت الا ع الباب تندك، كمت اجر بروحي جر لان مصدعة وراسي احسه حينفجر، فتحت الباب، طلعن كبالي جنات وميقات وبيدهن ماعون كليجة.

جنات: هلااو مون شلونج

ميقات: يااا هاي نايمة جنتِ؟

اماني: هلاو بنات تفضلوا

طببتهن وجبت عصاير حطيتها كدامهن وحطيت من الكليجة الجابنها.

ميقات:  جنتِ نايمة مو؟

اماني: اي رجعت من الدوام نمت

جنات: نوم الهنا حبيبتي، بس شو وجهج اصفر؟

اماني: من التعب

جنات & ميقات: الله يساعدج

اماني: شكرًا ويساعد الكل

ميقات: امي تسلم عليج قبل لا انسى

ابتسمت.
اماني: الله يسلمها

سولفن عن الدوام والامتحانات وراحن.
رجعت حطيت راسي ع القنفة الي بالصالة لان استصعبت اوصل للغرفة، راسي طبل هاي اكيد ضغطي هبط، ادور ما بيه اتحرك اجيب شي لنفسي بس اكوم ادوخ.

ظليت متمددة ومغمضة عيوني وما حسيت شون غفيت من قوة الصداع.

..

عقاب

صار وقت مناوبتي، ودعت ليث وطبيت بمكانه، سديت الباب وكعدت بالصالة.

صفنت بالوقت وتذكرت الدكتورة، بس لو تبطل عناد وتطيني صبر افهمها ع كلشي بالتفصيل، بس لا وين تكدر! لازم تنكد وتفتح تحقيق وبالاخير تكب بيننا يلا ترتاح.

تهادى لسمعي صوت البنية تبجي، ركضت لغرفتها جانت ملتفة ع نفسها وداخلة نوبة بُكاء قوية.

رحت يمها وحجيت حتى اهدأها.
عقاب: مريومة ميري الحلوة، حبيبتي كافي تبجين، مو زين عليج هيج!

عاطت وبجت بطريقة هستيرية.
مريم: اريييييد امييييييي لااااااااااا!!!!!!!!!!!

تقربت عليها احاول اجر ايديها لان كامت تملخ بنفسها، جريتها عليه وكمشت ايديها بقوة وهي مستمرة ترافس بين ايديه وتبجي.

عقاب: وج يابه كافي شحالج صرتي!

مريم: عقاب اريد اميييي جيبلياها فدوةةة!! اريد اكولها اني اسفة مو بقصدي اذيتها، ولله مجنت متقصدة...!!!

ضميتها بقوة اكبر وهي ولا ترضى تهدأ، مثل بركان هائج تدفع وتقاوم وتبجي بحرگة، كطعت كلبي.

ورة فترة، هدأت من التعب و وكعت، واني وياها بعدني شابكها بحيث صارت بحضني، يربي انت اعرف بــ نيتي شنو.

مريم: اشتاقيت لأمي ...

عقاب: الله يرحمها يا عيني بسچ مو كسرتي گلبي..

ظلت تنحب بصوت ناصي وتشهك بصعوبة، شلتها حطيتها بفراشها ووخرت عنها.

ظليت كاعد بباب غرفتها اخاف ترجعلها الحالة مرة لخ، صار الغروب اجاني شاهين، شرحتله الوضع واستلم بمكاني واني رجعت للبيت.

سقت السيارة ومنظر ميري مدا يروح من بالي، بجيها حرك روحي حرك، ذكرني بـ بيري شون فقدت من ماتت امي، اووف وتالي لحكتها وظليت بس اني اتحسر عليهن.

وصلت للبيت، طبيت وشفت الدكتورة نايمة عالقنفة بطريقة مو مريحة، غلست عليها ورحت اسبح، لبست ملابسي وطلعت، نشفت شعري ورجعت شربت مي من المطبخ وهاي ع نفس الحطة، شبيها هاي نايمة بهالوكت؟ وشعجب ما حست عليه وهي نومها خفيف؟
رحت يمها وحجيت بصوت حاد.

عقاب: دكتورة؟

هزيتها شو هاي كام تون وتجعد بملامحها بألم، قلبي رجف عليها فسألت بنبرة كلها اهتمام وقلق.
عقاب: دكتورة شو اكعدي، شبيج شنو يوجعج؟ اماني يمعودة شو، تسمعيني؟

فتحت عيونها وكالت بوهن.
اماني: ما بيه شي

عقاب: هاي ظليتي بدون اكل مو؟

محجت شي رجعت حجيت ممصدك عنادها!
عقاب: ترا انتِ مو صغيرة، هالعناد هذا عليمن متفهميني؟! شو محد انضر غيرج!

محجت شي، كعدت وكمشت راسها، ادور رفعت نفسها وكفت، مشت كم خطوة، بعدها ما عبرتني وحسيتها رح يغمى عليها، وصدك وكعت واخذتها بحضني وشلتها للغرفة.

حطيتها عالجربايه وغطيتها.

عقاب: اني الله كاتب عليه شلاع الگلب وين ما اروح 
كلت بانزعاج وهي ردت بصوت خافت.

اماني: اسفة..

رديت بملل.
عقاب: ما عندج غير هالحجاية، عابت لهالوجه

اماني: لتتجاوز

عقاب: صمي حلكج، خ اجيبلج شي مالح تاكلينه اكيد ضغطج هابط

رحت جبت خيار سويته اصابع وترسته ملح، وديتلهيا صفنت مستغربة.

عقاب: اكليهن ذني يفيدنج هسة

اماني: ما احب الخيار

عقاب: لتحبيه ما كتلج حبي، اكلي برضاتج احسن مما اعبي الخيارات ذني بحلكج وحدة ورة اللخ، يلا حبابه

كوة اكلت تلث قطع.

عقاب: كمليهن

اماني: كافي هلكد

عقاب: دهاج مي لعد
نطيتها كلاص مي، شربته ورجعته بالصينية، شلتها حطيتها بالمطبخ ورجعت يمها.

عقاب: شلون صرتي؟

اماني: احسن شويه

عقاب: ميخالف شوية وتصيرين احسن

اماني: اكول شي بس متعصب

تنهدت وكلت.
عقاب: كولي

اماني: انت ليش تكرهني؟

سكتت، سؤالها صدمني، ليش عبالها انو اني اكرهها؟!

عقاب: ما اكرهج بس هم ما احبج

اماني: شنو هاي؟

عقاب: يعني عادي ما عندي مشاعر الج

باوعتلي بنظرة حزينة وردت.
اماني: لهالدرجة وجودي بحياتك ماله اهمية؟

عقاب: شتكولين انتِ؟

نزلت راسها وجرت الغطا عليها، سحبته عنها لان حسيت بيها ضاجت.

عقاب: انتِ من سألتيني غير تريدين اجاوبج بصراحة؟
هزت راسها

عقاب: واني جاوبتج، بعد عليمن ضجتي؟

ارتبكت ونظراتها تشرح مدى لخبطة مشاعرها، حاس بيها عدها شي تجاهي، بس ما اكدر ابادلها، بيري واكفة بيني وبينها سد منيع، مستحيل اوهمها واورطها ويايه بعلاقة مزيفة، كلما اشوفها اتذكر بيري بيها، لذلك اريد ارجعها لاهلها مثلما جبتها.

اماني: لا مضجت، هو حقك حتلو تكرهني، بس اسلوبك بالكلام مو حلو ..

ابتسمت.
عقاب: اني هذا اسلوبي وهذا طبعي، المفروض تعلمتي عليه؟

   رفعت حاجبي بشك وهي صفنت تباوعلي، امعنت بالصفنة بيها لحد ما كالت بنبرة داعبت حويصلات گلبي من كد جمالها.

اماني: شكد يلوكلك تضحك، ضحكتك حلوة عقاب!

رمشت كم مرة بتأثر، ودكات كلبي زادت عن الحد المعقول.
شتسوي لأسمي من تلفظه؟!
ليش يطلع هلكد حلو منها؟!

تواصلنا البصري استمر لثواني، ونهيته لما درت وجهي وكلت.

عقاب: شكرًا

كمت وهي لزمت ايدي، درت وجهي عليها مصدوم من تصرفها، هاي اول مرة تتجرء تكمشني!
رفعت حاجبي بتعجب، شفت بوجهها تعابير مرتبكة بس بنفس الوقت، اكو ثقة وثبات ع الموقف.

اماني: ظل هنا لتروح

عقاب: ليش منو كلج اني رايح لمكان؟

اماني: مو هيج قصدي

عقاب: لعد؟

دنكت راسها، وحجت بارتباك ممزوج بالخجل وهي تأشر عالمكان الخالي اليمها بالجرباية.
اماني: نام يمي هنا

...

انتهى

لا تنسوا التصويت 🦋🖤

#الكاتبة نورمين