رواية خطأ طبي «عقاب الاماني» الفصل الثامن عشر 18 - بقلم نورمـين

#خطأ_طبي «عقاب الاماني»

بقلــم : نورمين 🦋🖤

...

دنكت راسها، وحجت بارتباك ممزوج بالخجل وهي تأشر عالمكان الخالي اليمها بالجرباية.
اماني: نام يمي هنا

صدمتني مرة لخ!
حجت بتوتر تحاول تغطي ع حجايتها

اماني: ااا.. اقصد لتتقيد بوجودي هنا المكان جبير يكفي

عقاب: اكيد، انام هنا ليش منو كلج حنام بغير مكان؟

سكتت وفشلت مني، ابتسمت ع تعابيرها ومديت روحي بصفها، دكات كلبي تسارعت وانفاسي كذلك، درت وجهي للجانب حتى ما اباوعلها واحاول اوهم نفسي بأنو عادي وما اتأثر بوجودها ويايه ع نفس الفراش، غمضت عيوني كمحاولة يائسة للنوم ونسيان التفكير والهرب من هالحالة، بس عبث!

الدكتورة جانت تتحرك وتحوص بالفراش، الظاهر هي هم عندها نفس مشكلتي، بس اني لكيت الحل!

انداريت عليها وحضنتها، بحيث ظهرها يقابل صدري، حسيتها جفلت ونصدمت، ابتسمت وحضنتها اقوة وكلت بصوت ناعس.

عقاب: شكد تتحركين، اثبتي خلي انام!

اماني: بس..

عقاب: اشششش، خليج مثلما انتِ..

محجت شي، غمضت عيوني واني اشتم عطرها الي يتخلل انفاسي بتمـرد، دكات كلبي زادت للضعف بس احس هيج اريحلي، جنت اريد احضنها ومادري شسوي ومنين اجيب عذر!
بس اجت عدلة همزين ربك، ادور اني صفنت ع روحي شدا اسوي؟ مو كلت ما ادنالها ما اريد أأملها بشي ميصير!!

بعد وقت، نمت وغطيت بالنوم وما حسيت الا الصبح، فتحت عيوني ببطئ وشفت وجه الدكتورة مقابل وجهي وايدها ملفوفة ع خصري، لحظتها حسيت العالم وكف يمي، صفنت بيها وبجمالها وهي نايمة، رموشها طوال وثخان يجذبني كلش خاصة من ترمش!! لدرجة جنت من كل عقلي اكولها لترمشين هيج ههه!!

مديت اصابعي ببطء وحاولت المس رموشها ع كيف بلا متحس، ابتسمت بعرض ع الموقف والاحساس اللطيف الي داعب گليبي.

جعدت ملامحها وحسيتها حتكعد، سحبت ايدي بساع وسويت روحي نايم.

اماني

كعدت لكيت نفسي بوضع صدمني اكثر من صدمتي بعقاب البارحة!
حاطة ايدي ع خصره وحاضنته، رفعت نظراتي اله جان نايم، شكد منظره حلو ومريح من هو نايم، ماكو عكدة حاجب ولا نظرات شرارية!

بهذا القُرب، حسيت كلبي عطل، وكام ميعرف شلون يدك عدل، انتبهت لعقاب عنده عورة بخده، اثر جرح صغير باقي بشكل مستقيم، من بعيد ممبين الا تقترب يلا تكدر تميزه، تنهدت واني افكر بي وبكلامه، كلش عاجبني يسولفلي عن نفسه، بس شلون وهو شخص كتوم؟

وخرت ايدي عنه وكمت، بعد اكو دوخة بس ارحم من البارحة بهواي، رحت للكنتور اخذت ملابسي وطلعت اغسل وبدربي اروح للحمام ابدل، حتى اكعد عقاب ويبدل بينما اسوي ريوك.

وصدك، بدلت واجيت اكعده، شو لكيته كاعد وديخابر ودمه محروك ويتصايح!

عقاب: لك طفلة متعرفون تديرون بالكممممم عليهااااا!!!!؟؟؟؟ وهسة شلونها؟!! اففففف يا ربي، زين زين، ماشي شوية واجي يلا الله وياك

سده واندار عليه وهو يغلي، من سمعت كلمة طفلة ضجت، عقاب عنده بنية واني مادري؟!

حجيت بصعوبة.
اماني: تعال تريك

تقدم باتجاهي ومسح وجهه وكال.
عقاب: دكتورة اكدر اطلب منج طلب؟

باوعتله بصدمة، اول تالي عقاب يحتاجني!

اماني: اكيد، تفضل؟

عقاب: اخذلج اجازة اليوم وتبقين بالبيت

اماني: ليش؟ مفهمت يعني ليش ما اروح للمستشفى؟

عقاب: تصونين السر؟

هزيت راسب وكتله بكل صدق احساس
اماني: تكدر توثق بيه صدكني

عقاب: تمام رح احجيلج، تريدين تعرفين طلعاتي المفاجئة و المتاخرة وين؟

بترقب رديت.
اماني: اي؟

عقاب: لبيت الحجي، اهتم بـ بنته الصغيرة مريم عمرها 13 سنة

ظليت مصفصفة من الصدمة، ليش هو يهتم بيها؟ ابوها امها اخوتها وين عنها؟

حجة يجاوب عن تساؤلاتي الواضحة بمعالم وجهي.
عقاب: اعرف بشنو دتفكرين بس خليني اوضحلج، البنية كتلت امها بالسلاح مال الحجي بالغلط، من جانت تلعب بي، وصايرة عدها صدمة نفسية وكل الوقت تبجي وتريد امها

شهكت وحجيت بصدمة
اماني: يا ربي دخيلك!!

عقاب: حالتها تكسر الكلب ولله

اماني: ليش ميوديها لدكتور نفسي! ترا ممكن تتخبل وهي عايشة هيج تجربة بهالعمر!!

عقاب: هو ديحضرلها اوراق السفر حتى يطلعها لتركيا يعالجها، لان هنا تعرفين وضعه شلون، اقل حركة تطلع تنعدم مسيرته السياسية

بعدم تصديق رديت.
اماني: وانتوا هذا الكاتلكم؟ اهم شي عدكم المناصب وصراعاتكم السياسية!! والطفلة هاي دا تتعذب، شنو ذنبها هاااا؟

عقاب: دكتورة ترا حالي من حالج، ابد ما قابل ع الي سواه الحجي، وهواي حجيت وياه بس هو يكول برا احسن من هنا

اماني: زين اخوتها وين؟ كرايبها اي احد! ليش انت تهتم بيها وتروحلها للبيت؟

عقاب: مو بس اني، قسورة ليث شاهين ضرغام كلنا مقسمين مراقبتها ع شفتات، بالنسبة لاهلها، اخوتها مسافرين برا من زمان ما عدهم اتصال وياها وويه ابوهم وامهم، والكرايب فالحجي ميكدر يخاطر يوديها يمهم لان احتمال تحجي شي وتروح بالرجلين

اماني: وانتوا احرص عليها من اهلها؟

عقاب: عندج شك يعني؟

اماني: لا لا، بس مدري مستغربةة .. شلون يأمنها هيج يمكم.. گلبه شلون ينطي وهي بهيج حالة، تحتاجه اكثر من اي شخص ثاني يكون يمها!

عقاب: تمام خلي افهمج اكثر، احنه كلنا نعتبر الحجي ابونا مو مجرد رب عملنا، علاقتنا بي اقوى مما متخيلة ويثق بينا ثقة عميا، اما بالنسبة الي فـ بيري الله يرحمها ومريم جانوا صديقات، بيري تروحلها وهي تجي يمنا فـ باختصار علاقتي بيها شوية اقوى من بقية الولد والحجي يثق بيه ويأمنها يمي بكل گلب مطمئن

بلعت ريكي بصعوبة، احس اكو غصة تشكلت ببلعومي من القهر، مادري ع حال البنية المسكينة مادري من غيرتي ع عقاب!

اماني: شكبرها كلت؟

عقاب: 13 سنة

عكدت حواجبي مستغربة، فرق 4 سنوات بينها وبين بيري!

اماني: اصغر من بيري بهواي

ابتسم بحسرة وصوب نظراته للكاع وكال بصوت حزين
عقاب: اي صح، بيري عمرها 17 بس عقلها عقل جاهلة ام 10 سنين، تحب تلعب وتضحك لان بطفولتها ما لحكت تشبع من هالسوالف، فجانت كلش تندمج ويه ميري

رمشت بتأثر واني اتابع حالته ونظراته الحزينة، بعدين استغربت من كال ميري، مو اسمها مريم؟

اماني: ميري؟!

عقاب: جانت تحب اسم بيري، فلكينالها دلع قريب ع اسمها و ع نفس وزن اسم بيري

ظليت اسمع وساكتة، ماعرف شحجي ولا شسوي، حرفيا حسيت نفسي عاجزة، ليش دا اغار عليه من طفلة! زين ضميري الانساني وين راح؟ مو يفترض احزن عليها واغض النظر عن كلشي ثاني!!

عقاب: دكتورة هسة فهمتي الوضع لو لا؟

هزيت راسي كم مرة واني اباوعله بتوتر.

عقاب: زين، رايح اجيبها لهنا حتى تديرين بالج عليها بينما اكمل شغلي وارجعلكم، لان كايمة تحاول تنتحر، تكدرين مو؟

اماني: اي اكدر، لتشيل هم..
حجيت واني اباوع بعيونه، ادزله نظرات مطمئنة.

عقاب: شكرًا ما رح انسالج هالمعروف ابد

حطيت ايدي ع ذراعه وكلت واني مبتسمة.
اماني: هذا واجبي كأنسانة قبلما اكون دكتورة

ابتسملي بأريحية، دا احس بي شايل جبال حزن وهموم لدرجة حتى الابتسامة يستصعب يرسمها ع وجهه، شغله ومسؤوليات حياته هي اكثر شي مستنزفة طاقته!

بدل وطلع، ظليت كاعدة وافكر بكلامه وملامحه المليانة قهر مدا تفارك بالي..

قررت ادفع شعور الغيرة الي دا احس بي ع جهة، لان الوضع ميسمح بهيج تفاهات والبنية محاولة تنتحر!
زائدًا الواضح عقاب ينظرلها بنظرة اخوية ويعتبرها حالها حال بيري، اي اماني هو هيج لتظلين تفكرين بغباء.

كعدت افكر بيها، دمعت عيوني واني افكر انو اني وياها بيناتنا قاسم مشترك، وهو عذاب الضمير بعد قتل روح بريئة..
بعدين كلت يمكن عذابها يكون اكبر مني، لان امها الي راحت مو مجرد شخص عادي، وهم عمرها صغير فاكيد عقلها ميتحمل هالصدمة واعتيادي تنتكس حالتها للاسوء..

تنهدت ومسحت دموعي بقوة، مو وقت تضعفين عقاب حط ثقته بيج كوني كدها اماني!

شوية واجة عقاب ووياه البنية كوة تمشي ع رجليها وحالتها بالويل، جنت واكفة بالصالة واباوع من الشباك، ركضت فتحتله الباب طببها للغرفة وهي مثل اللعبة متتحرك ولا تحجي شي الا هو ينطيها ايعاز.

عقاب: اكمل شغل واجي، مو تسوين شي يخليني ازعل منج، متفقين؟
جان واكف بصفها ويحجي، غطت راسها وما ردت عليه، باوعلي ورفع ايديه بقلة حيلة، عبست بملامحي لان الوضع مبين اسوء مما جنت اتخيل!

طلع من يمها واشرلي الحكه، رحنه بالصالة.
عقاب: حاولت تبلع حبوب المهدئ كلها فد مرة، وضرغام لاكفها قبل لتسويها وهم كايمة تبجي وتصرخ لحدما فقدت طاقتها مثل مدتشوفين ..

درت وجهي للجانب وتنفست بقهر، شكد مسكينة!

عقاب: خلي عيونج عليها لتعوفيها وحدها ابد، احاول اكمل بساع وارجع

اماني: اطمن، حتكون بخير واني يمها

عقاب: اني اثق بيج دكتورة

رمشت بصدمة، بعدين رديت.
اماني: اوعدك مراح اخيب ثقتك بيه

عقاب: اتمنى ..
كالها برجاء وهو يباوع بعيوني، حسيت بمسؤولية اكبر من قبل، اعرف هو قصده مو بس اهتم بيها، وانما اصون سرها كذلك، وما دامه حط ثقته بيه وحجالي سره، مستحيل انكث بي واخيب ظنه بيه لو ع كص ركبتي.

طلع واني جبتلي كرسي وحطيته كبال باب الغرفة وفتحتها، حتى اشوفها من تكوم، وجبت تلفوني اكلب بي.

...

عقاب

صعدت سيارتي وجان وياي ضرغام وشاهين ينتظروني برا.

ضرغام: يمكن السويته غلط عقاب، مجان لازم تحجي للدكتورة

عقاب: احد عنده حل احسن؟

محجوا شي، فحجيت بأنفعال.

عقاب: لعد كرموني بسكوتكم بلا، معايز اني

شاهين: زين شتكله للحجي اذا عرف؟

عقاب: خلوه عليه ومعليكم

وصلنا للمكتب، قسورة جان كاعد هو وليث يم المدخل، من بعد السلام، حجيتله شسويت.

قسورة: زين سويت

ليث: اتفق وياك

ضرغام وشاهين انصدموا برد فعل ذولة الثنين.

شاهين: تشاقون غير؟ ولكم الحجي ميقبل، اذا درة يشيلنا فلقة ولله

ليث: اووي شكد تخاف

عقاب: كتلك خليها يمي سالفة الحجي، ولتخافون اكله فكرتي واخلي كل عصبيته بس عليه، ميلوحكم طشارها عود

قسورة: عليمن يابه، هو غير الدكتورة ماكو أأمن منها

ابتسمت وطبطبت ع جتفه.

ليث: هم اتفق وياك
جان كامش لفة، ياكل ومخلصها اتفق وية قسورة.

شاهين:  ظل انت بس اتفق وحلكك يجتر النهار كله جنك هايشة

ليث: كبر لهالحلك، عقاب كفخه من يمك

كفخته بسرعة لان صاير بصفي، باوعت لليث وكتله مبتسم.
عقاب: تم

ليث: عاشت ايدك حبيب

كمز ضرغام.
ضرغام: يابه احنه وين وانتوا وين، شوكت نفض طلابة توفيق؟

عقاب: بالوقت القريب

التفتت ع قسورة وكتله.

عقاب: قسورة اخذ وحدة من السيارات الي بالكراج خليها وياك

قسورة: بالاول فهمني شنو الوشة؟

تقدمت عليه وكلت بمرح ممزوج بالحدة.
عقاب:  نروح نسلم ع دلوع البابا اموري ونطيه الممية مالته، حتى مرة ثانية ميتجرء يرمي ع الحجي.

~عودة بالزمن ~

قبل اسبوع، من جان قسورة ديوصل الحجي لموقع اجتماع الحزب، وبعدما سلم ع الدكتور رياض، وجان ناوي يطب،  اجيت اني وطبكت سيارتي بصفه، وكف يباوعلي مبتسم، فتحت الباب بس بعدني منزلت، وصار اكو اطلاق نار بأتجاه الحجي بس ما انصاب، قسورة جره لجوة والحماية انقسموا قسمين، قسم راح يدور ع الي رمى وقسم جان ديتصدى ويطلق نار.

نزلت من السيارة مدنك ورحت للحجي، سئلته بقلق.
عقاب: خو ما صارلك شي يابه؟

الحجي: لا الحمدلله ما صابتني

قسورة: منو هذا الكلب!!!!

عقاب: ماعرف بس اعدائنا كثرانين هالفترة

قسورة: دخل اعرفه منو، الا انسيه حليب امه

الحجي: هذا اكيد توفيق
حجة باستنتاج.

رديت بذهول.
عقاب: وليش يسوي هيج؟ شنو مصلحته وياك؟

الحجي: البارحة دزلي تهديد مبطن بأن اتخلى عن عضوية دكتور رياض قبل ليتم التثبيت والا يصفيني

قسورة: وليش ما كلتلنا يابه مو جان رديت تهديده بي!!!

عقاب: ليش تكتمت عالموضوع لعد مدام بي تهديدات؟؟؟؟
جنت احاول احجي بهدوء، لان الوضع اصلا متوتر وصوت الرصاص يعلى بالجو، اما قسورة جان كلش معصب.

الحجي: مو تكتم، انما ردت اشتغلهم واحد واحد، وتدرون بسالفة ميري شلون شادهة بالي ..

هزيت راسي بتفهم.
عقاب: حقك يابه

قسورة: خليها علينا يابه واحنه نربيه لهالكلب توفيق

الحجي: خ نطلع منا والله كريم، ضامله ضمة هالحقير الا اخلي يتندم ع اليوم الحط بي راسه براسي

وكف اطلاق النار والاجتماع صار بشكل مستعجل لان الوضع الامني ارتبك، ثاني يوم الحجي سافر لأربيل وأمرنا منتحرك الا بأوامره، خلال هالكم يوم كدرنا نعرف انو سبب الاشتباك هو ابن الدكتور، والي اسمه امير!!
كلت للحجي وانصدم، لان مشكلتنا ويه الاب، الابن شكو؟ بس يلا هي خربت وثنينهن رح ياكلوها.

~عودة للحاضر~

قسورة: يعني هسة نروح؟؟

عقاب: لا، تنتظرون مني خبر، حتى تاخذ ضرغام وشاهين لان قريبين عليك واني اخذ ليث وياي

شاهين: الله اشتاقيت للاكشن

قسورة: ولك واني هممم

جانو يحجون بحماس، كملنا اتفاق وكلمن راح لشغله، شغلي تضاعف لان الحجي ماكو وبما انو اني مدير مكتبه فالمسؤولية كلها صارت عليه.

..

اماني

جنت دا اشرب مي وسمعت صوت شي انكسر، ركضت للغرفة، شفت البنية كاسرة المراية وكاعدة بالكاع، ضامة رجليها لصدرها وتبجي بصوت ناصي مثل النحيب.

تقربت عليها وكلت بصوت هادئ.
اماني: مريومة حبيبتي

شالت راسها تباوعلي وعيونها حمر دم من الدموع، كسرت كلبي بمنظرها.

اماني: ليش هيج تسوين بنفسج؟! ترا ماما متقبل تأذين نفسج هشكل

حجت بقهر.
مريم: بس اني اذيتهااا وكتلتهاا، ماما راحت من هالدنيا بسببي ماما ماتت بسببي بسببي بسببي
وكامت تكرر بالكلمة وتشلع بشعرها وتبجي، ادنيت عليها كمشت ايديها وكمت اهدي بيها وهي كلما جالها تزيد متنقص، مادري شلون صرت ابجي وياها واخذتها لحضني.

بعدتها عني شوية وكلت واني امسد ع شعرها.
اماني: كافي يروحي انتِ.. حاسة بيج ولله واعرف احساسج كلش زين لان مريت بي، بس الضعف والبجي مو حل، صدكيني وسأليني الي

مريم: يعني انتِ هم كتلتي امج؟

نبرة صوتها الباچية دمرتني، دمعتي نزلت، اخذت نفس وكلت.

اماني: لا مو امي، كتلت اخت عقاب بدون قصد ..

مريم: يعني انتِ الكتلتي بيري!!!!
كالت بصدمة وحسيت بيها كارهتني.

نزلت راسي وحجيت بصوت مليان تأنيب ضمير وندم.
اماني: اي اني، بس ولله العظيم مجان بقصدي، نيتي جانت اساعدها، بس صار الي صار، ومن يومها للان اني عايشة عذاب الضمير وكل يوم داموت الف مرة، لان تسببت بقتل روح بريئة، بجيت وتدمرت ومريت بفترة سودة، بس كله هان تدرين ليش؟

مريم: ليش؟

اماني: لان هذا امر الله، منكدر نغيره ولا نكدر نرجع الراح بدموعنا، وهذا امتحان لصبرنا من رب العالمين، حتى يشوفنا شكد نحبه ومتمسكين بي وبتعاليمه..

مريم: يعني هسة اني رسبت بامتحانه؟

اماني: انتِ محاولة تنتحرين، وهذا الشي يغضب الله كلش، لان هالروح هاي مو ملكج، ملك الله وهو وحده الي ياخذها

مريم: بس اني اخذت روح امي .. امي ماتت بسببي.
كالتها بقهر وبجت.

اماني: انتِ مجرد سبب، بس هو الله رادها ودز عليها، لخاطر امج اذا صدك تحبيها لتظلين تعذبين نفسج هيج

مريم: ليش صار هيج وياي، ليش امي ماتت ما شبعت منها، كلش اشتاقيتلها ..

اماني: مو كتلج هذا امتحان الج من الله!

مريم: ليش امتحاني هيج صعب؟

اماني: لان الله يختار المعركة الصعبة لعبده الاقوى، شوفي شكد الله يحبج واختارلج هالمعركة؟ لان يدري بيج كدها وتكدرين تفوزين بيها!

حضنتني ورجعت تبجي.. مسدت ع ظهرها وشاركتها البجي، حجيتلها الكلام الي جنت متمنية احد يكولياه..!

...

عقاب

رجعت للبيت، لكيت الدكتورة متمددة عالجرباية وميري نايمة وشابكتها، استغربت منظرهن!
بعدين من امعنت النظر، ابتسمت.
الدكتورة فعلا تستاهل الثقة، ما خيبت ظني عكس هواي قبلها..!

رحت للمطبخ، لكيتها مسوية الغدة، حميته وحطيت المواعين بصفي حتى اصب واكل، لان ما هان عليه اكعدهن.

اجت الدكتورة تمشي ببطء وملامحها باهتة.

اماني: من شوكت جاي؟

عقاب: مصارلي هواي

اماني: عوف اني اصب
اجت بصفي تريد تاخذ الماعون، جريته منها.

عقاب: اني اصب قابل شيرادلها، كعدي انتِ.

اماني: بس..

قاطعتها: ياريت لو تلغين كلمة بس من قاموسج

ابتسمت ابتسامة خفيفة وراحت كعدت، حطيت الاكل وكابلتها.

جانت تلعب بالاكل وبالها شارد.
عقاب: صار شي بغيابي؟

ذبت الخاشوكة من ايدها، باوعتلي ورجعت باوعت بالكاع وحجت.
اماني: كامت تصيح وتبجي، بس هدأتها

عقاب: لعد ليش هيج مبينة تعبانة؟

اماني: لان شفت بيها نفسي

رمشت بعدم فهم.
عقاب: ما فهمت، شلون شفتي نفسج بيها؟

ابتسمت بقهر وردت وهي تباوعلي.
اماني: اني وياها بيناتنا قاسم مشترك، وهو عذاب الضمير، بس الفرق وين؟ هي لان طفلة متكدر تكتم مشاعرها فتطلعها ع شكل نوبات بُكاء وصراخ، اما اني فأكتفي بأن احرك بروحي من الداخل، حتى لحد يشفق عليه.

ماعرفت شنو ارد عليها .. صفنت بضياع ورجعت افكر.

عقاب: شلون ماتت بيري؟
سألتها السؤال الي جان بخاطري اعرف اجابته من اول مرة شفتها.. بس جنت اتغاضى عنه لان گلبي مينطيني اسمعها وهي تحجي عن لحظة قتلها لبيري!

عيونها احمرت وسألت بنبرة باكية.
اماني: ليش تجيب وجع الگلب لروحك عمدن!!؟

شديت ع لزمتي للكلاص ورديت بحدة.
عقاب: المبلل ميخاف من المطر دكتورة.

ذبت حسرة وحجت وهي تبجي.
اماني: المستشفى جانت تعاني من نقص حاد بالكادر الطبي والمستلزمات الطبية، مدير المستشفى غركان بالفساد ومسوي صفقات هو ودكاترته، ينطونه فلوس في سبيل ميجون وميحاسبهم، اوقات جانت تجي ايام المستشفى مبيها بس ممرضين، وخاصة بالليل

عقاب: مو هذا موضوعي

اماني: اعرف، بس هو شي مرتبط بشي فخليني اكمل حتى تتوضحلك الصورة

هزيت راسي بالموافقة، وهي كملت.
اماني: جان بابا دائما يدز فرق تفتيش ع المستشفى، وتصدر مذكرات عقوبة بحقهم، بس متتنفذ، لان يرشون الجهة العليا بحكم كون حازم مدير المستشفى مدعوم من حزب قوي ومتنفذ بالدولة.

عقاب: اصلا المستشفى كلها سمعتها تبن، واهل بغداد كلها تدري

اماني: صحيح كلامك، بس المواطن الفقير معنده حل ثاني غير المستشفى الحكومي، راحت ايام واجت ايام والوضع مثلما هو، النقص بالكادر يزيد وبالمقابل الاهمال صار بفلس، يعني جانت اكو دكتورة وياي، ورة كل حالة وفاة تتسجل بالطوارئ بسبب الاهمال او الاخطاء اليرتكبوها الممرضين، تكلي وعليمن كاتلة روحج ع المرضى والنهار كله تتعاركين ويه المدير، هم هذا حد يومهم، ومحد كايللهم يجون لهنا، شنو ميدرون المستشفى تعبانه

عقاب: شكد حقيييييرة!!!! شسمها هالحيوانة؟!

اماني: تيا

عقاب: كملي

اماني: اي فجنت اضطر اسوي عمليات خارج تخصصي، لان اكو نقص اولا، وثانيا لان كلبي مينطيني اشوف العالم تتلوى من الالم واظل اتفرج

باستنكار اردفت.
عقاب: يعني بيري مو اول ضحية الج؟!!

هزت راسها بلا.
اماني:  لا ولله، جنت ادعي الله تعدي العملية ع خير، خاصة نيتي خير ومالي مصلحة، فجنت انجح بكل عملية، واول اخفاق جان وية بيري..

كلبي وجعني، لو اختي ما عدها حظ، لو الدكتورة جان ناقصها توفيق رباني بذاك اليوم.

اماني: بيومها جنت لازمة خفر، والطوارئ مخبوصة وجنت افتر منا ومنا، لان كتلك نقص وماكو غيري بيومها، بيري اجت تصرخ وتبجي وكلبت الطوارئ كلاب بصياحها، بعد المعاينة عرفت انو تحتاج عملية زائدة، دزيت ع دكتورة تيا لان اختصاصها الباطنية، بس جان عدها عملية فما اجت، رجعت الممرضة راحت لحازم حتى يشوفلنا حل، لان تيا بالعملية واحمد ميجي اصلا، فكللها خلي اماني تسوي العملية، تعرف لان سوت وحدة ذاك الاسبوع

عقاب: وانتِ كيفتي؟

اماني: شتريد اسوي يعني واني اشوف اختك تنازع ومحد بحالها؟

ضرب الطاولة بقوة وعيونه انكلبت نار.
عقاب: الله ينتقم منكم واحد واحد

اماني: ممقصر وياي لتخاف..

خزرني وكال.
عقاب: كملي

اماني: دخلت بيري للعملية، واول ما بلشت لكيت مرارتها منفجرة وملوثة بطنها بالكامل

عقاب: شلون يعني؟

اماني: الالتهاب العدها كلش قوي جان، واني جنت دايخة ومسطورة ما اعرف شلون كصيت شريان بالغلط، فكامت تنزف ودكات گلبها بدت تقل، حاولت اسيطر عالنزيف.. بس ماكو مكدرت.. كلبها ما تحمل، رئسن وكف وماتت...
جانت تحجي وتبجي، صافنة كانو دتباوع للمشهد كبالها، احتاريت اكرهها لو انقهر عليها، ماعرف شسوي وشعور الضياع هذا دياخذ من حيلي حيل!

اماني: بعدين عرفن بأن بيري جانت متسمم دمها بسبب انفجار الالتهاب، وهالشي وحده كفيل بقتلها ..

انتفضت بقوة.
عقاب: المعنى شنو دكتوووورة؟؟؟!!!!!

اماني: النزيف الي سببته لبيري، سرع من موتها بكم دقيقة بس، لان هي بكل الاحوال جانت حتموت بسبب التسمم

وكفت اباوع بالفراغ، كمشت راسي وكمت افرك بي بقوة... هذا قصد بيري من كالتلي بالحلم، انو هي راحت وية امي وابويه قبل ليسوولها العملية اصلا!!

عيوني دمعت بألم، كلبي انتفض بعنف، وحسيت النار رجعت شبت بداخلي..

اماني: بس هالشي ميمنع انو اني الكتلتها، اني بيدي هاي كطعت شريانها وخليتها تنزف!!
مادة ايديها كدامها، وتباوعلهن وتحجي وتبجي، دموعي طلعت عن سيطرتي وكلبي كام يدك مثل الدمام من كد عنف نبضاته..!

رحت يمها، كعدت ع ركبي وكلت بصوت تعبان.
عقاب: ولج ليش مكلتي هيج من الاول!! ليش ضميتي عني هالسالفة ليييش لييييش!!!!

اماني: لان اني كتلتها عقاب، انييي... انييييي مو التسمم!!

رفعت راسي بمحاولة يائسة لايقاف دموعي، احس الدمعة دتنزل من گلبي مو من عيني، لهدرجة توجعني!

عقاب: بس اختي مجانت عدها فرصة تطلع مناك سالمة، حتلو ما كطعتي شريانها!!!

اماني: اعرف ولله اعرف، بس من كطعت شريانها هنا اني موتتها، فالخطأ خطأي اني والذنب ذنبي!

هزيت راسي بلا وحضنتها لصدري واني اجاهد بكتم شهكاتي.
اماني: عقاب ولله ما راح عن بالي الصارلها بيوم، كل يوم اموت واني اتذكر هاللحظة، لما وكفت عاجزة اسوي شي حتى انقذها، انت حقك تكرهني وتكتلني، اني ما استاهل اكون دكتورة!!

ربتت ع ظهرها وكلت.
عقاب: اششششششش... تمام تمام... سكتي بسچ دموع ..

وخرت عني، باوعت بعيوني وكالت وهي لسة تبجي.
اماني: الدكتور وظيفته يرجع الحياة للمرضى مو يسلبها، اني ما استاهل اكون دكتورة، كلش اسفة عقاب، كلش ولله....
حجت ودخلت بنوبة بُكاء ثانية، تنفست بعمق واني افكر بكلشي صار، دخيلك يا الله اني شسويت بهالمسكينة وهي مناقصة ...

مديت ايدي مسحت دموعها واباوعلها بكلب محروك.
عقاب: اعترف اني اذيتج هواي، بس الله شاهد عليه انو مجنت راضي ع نفسي ابد، وجنت عايش بصراع وية نفسي، بين اكول تستاهل وبين لا خطيه، دكتورة انتِ لو كايلتلي هالحجي هذا من قبل مجان وصلنا لهنا!!!

اماني: احسن استاهل كل الصارلي، لان اني ولا مرة اعتبرت نفسي بريئة، دائما جنت اشوف نفسي القاتلة ورح اظل هيج، ولحد ما اموت حظل شايلة ذنب موتها بركبتي، وعذاب الضمير مراح يفاركني طول العمر..

عقاب: عوفي هالحجي هسة، بعدين نحجي بي وهمين عندي وياج موضوع مهم لازم نحسمه

اماني: بعدك تكرهني؟

عقاب: ما كرهتج قبل من جنت اشوفج قاتلة، حتى اكرهج هسة من عرفتج بريئة

اماني: بس اني مو هيج ...

قاطعتها وكلت.
عقاب: كتلج كافي

طبطبت ع جتفها وكمت اشوف مريم،  نايمة وعيونها تدمع.. الله يساعد گلبها ع هالضيم الشايلته.

...

اماني

انهاريت بالبجي واني احجي لعقاب، بس الصدمني رد فعله الي جان غير متوقع ابد!

يعني هو هم مديشوفني قاتلة!!
رغم تعاستي واني اسردله الصار، بس حسيت بقلبي يرفرف من كلي ما كرهتج قبل حتى اكرهج هسة، اي يرب فدوة حنن گلبه عليه وخلي يحبني مثلما احبه ..!

راح لمريم واني جنت كاعدة بالصالة اتصفن، وكلسا الموقف ينعاد ببالي.

شوية وشفته طلع يخابر.
عقاب: هلا يابه.. اي صار صار .. هذا هو رايحين هسة .. لتخاف عليها كلش زينه هسة .. في امان الله.

سده وخابر لقسورة.
عقاب: قسورة جيب الولد والحكني للعنوان الي رح ادزه الك هسة برسالة.

دزله العنوان ورجع خابر ليث.
عقاب: ليث حضر روحك جايك

سده، راح جاب مخازن لسلاحه و لبس جاكيته واني لحكته بقلق.
اماني: شكو عقاب!!!!

عقاب: طبي وسدي الباب، ماكو شي.

اماني: شلون ماكو شي؟ المن رايح بكل هالعتاد وليش خابرت الولد يجون وياك؟؟؟؟ شديصير عقاب فهمنيي!!

...

انتهى

لا تنسوا التصويت 🦋🖤

#الكاتبة نورمين