رواية خطأ طبي «عقاب الاماني» الفصل التاسع عشر 19 - بقلم نورمـين

#خطأ_طبي «عقاب الاماني»

بقلــم : نورمين 🦋🖤

...

عقاب: طبي وسدي الباب، ماكو شي.

اماني: شلون ماكو شي؟ المن رايح بكل هالعتاد وليش خابرت الولد يجون وياك؟؟؟؟ شديصير عقاب فهمنيي!!

عقاب: شغل باباتي شغل!!

اماني: شغل ايش بالسلاح؟

عقاب: ميخصج
كالها وراح صعد سيارته، سديت الباب وبالي مشغول، شغل ايش هذا بالاسلحة ووياه الولد كلهم؟ ولو ملازم استغرب، هو هاي شغلته ..!

...

عقاب

بعدما خابرني الحجي وانطاني الاوك، انطلقت لعيادة امير ابن توفيق، مريت ع ليث اخذته وياي، وصلت للعيادة وكفت السيارة ع صفحة وكعدت انتظر قسورة.

عقاب: وين صار ترا مو بعيد

ليث: خابره وشوف

عقاب: اظل اخابر اني!!
حجيت بعصبية بحيث ليث انصدم، تنهدت وضربت الستيرن.

ليث: صاير وياك شي؟ دا احسك مو طبيعي

عقاب: لا مبيه بس تعب

ليث: ع راحتك، ميحتاج اكلك انو تكدر تحجيلي اذا تحب

عقاب: حبيبي ليوثي متقصر

ابتسمتله مجاملة ودرت وجهي افكر، الحجته الدكتورة ابد ما جنت متوقعه، بحيث للان مصدوم وماعرف شسوي...

عقاب: بيري صاير عدها تسمم قبل لتموت
حجيت واني داير وجهي عالشارع، عيوني احمرت وكلبي خفق بألم، للان طاريها وطاري يوم عمليتها يهد حيلي من اذكره.

ليث: اي؟

عقاب: الدكتورة كاطعة شريانها وهي ممتحملة فكلبها واكف

ليث: عقاب مدا افتهم وضحلي

عقاب: باختصار، لو الدكتورة مغلطت وكتلت بيري، هم مجانت حتعيش، لان صاير عدها تسمم بالدم بسبب انفجار التهاب مرارتها

ليث: يعني بكل الاحوال جانت حتموت؟

هزيت راسي واني اباوع لكدام، مسحت دمعتي بقوة واخذت نفس، حتى اتفادى نوبة الحزن الي داهمتني، ليث جان مصدوم وضايج علمودي، ساكت ويباوعلي بقلة حيلة.

ليث: شلون عرفت هالشي؟

عقاب: الدكتورة كلتلي اليوم

ليث: وانت مصدكها؟ اقصد تثق بيها ؟! لدرجة تصدك حجيها بلا متدور وتتأكد منه؟!

عقاب: اي اثق بيها، بس هم راح اتاكد بطريقتي

ليث: زين تسوي، بس ليش اليوم يلا كالت هالحجي؟ هستوها تذكرت يعني!

عقاب: لان اني اليوم يلا سألتها، مجنت انطيها فرصة تحجيلي، وجانت كل متفتح هالموضوع اصرخ بيها واسكتها، لان كلبي مينطيني اسمعها تحجي بكل بساطة عن قتلها لاختي!

ليث: ماعرف شكولك .. الله يساعدك انت بوضع متنحسد عليه ابد

عقاب: والنعم بالله
زفرت بضيق، شوية واجة قسورة ووياه شاهين وضرغام، خلى سيارته ورا سيارتي ونزلنا.

عقاب: منريد هوسة زيادة، خلونا نشتغل بهدوء

شاهين: لك لااا، لعد المن خليتني اجيب 13 شاجور!

عقاب: مـ يخرب، مجرد اجراءات احترازية وهم علمود نخوفه

قسورة: بربك عقاب!!

عقاب: تعليمات الحجي هاي

ضرغام: تعرف شلون تسكتنا

ابتسمت وصرت بالمقدمة، طلعت سلاحي سحبت اقسام والولد وياي، الحباب موكف حماية كدام عيادته، علساس شخصية مستهدفة.

ليث وضرغام ضربوا زلم الحماية تلاثتهم وطببوهم لجوة، ع هالصوت اجة الولد الي يثبت حجوزات يشوف شكو، انطاه قسورة المقسوم وكومه فوك ذولاك، طبيت لجوه ماكو ولا مراجع لسة، والدكتور المحترم هم بعده ما وصل.

ليث وكف بباب العيادة، كل ميجي مراجع يصرفه، قسورة وشاهين وضرغام جانوا كاعدين جوة ع كراسي الانتظار، واني كاعدله منتظره بغرفته.

شوية واجة، ليث فوته وقسورة جابه سحل، شمره كبالي.

استغربت لما حجة بغل.
امير: انصحك نصيحة

عقاب: تفضل يابة

امير: احسلك خلص شغلتك للاخير، ترا متخلص مني بعد واندمك عقاب

واو ويعرف اسمي! معقولة علمود سالفة الدكتورة هيج ميت مني؟!!

كمتله، دنكت يمه وكلت بخوف مصطنع.
عقاب: تصدك خوفتني، هاك حتى شوف ايدي دا ارجف!

احتدت نظراته اكثر وكال.
امير: اذا انت رجال، واجهني بشرف مو جايب جلابك ومستقوين عليه علساس خوش زلم

ما حسينا الا بوكس طشر دمه من حلكه، مصدره قسورة!

قسورة بغضب: لك انت اخر قندرة تحجي بالرجوليات، تريد تغدر الحجي؟!!
رجع ضربه بوكس ودفره.
قسورة: لك اليوم الا اندمممممكككك!!! الحجي خط احمر متعبررره، لا انت ولا عشرة غيرك يمسوه بشعرررررةةةة!!!

وخرته عنه، كمشت وجهه خليت نظراته باتجاهي.
عقاب: الا اخليك تمشي وتكول اني شسويت بروحي، ليش هيج جنيت عليها!!؟

ركعته بوكس بعينه ورمتها، ووين يوجعه لحد ما كسرناه تكسر، والعيادة هم كلبناها اله و خلينا بيها لمستنا الخاصة، حتى مينسى زيارتنا الميمونة.

اخير شي شاهين تفل عليه وكله باشمئزاز.
شاهين:  زبالةةةة

قسورة ما برد گلبه منه، يدك بي ويرجع لورا.

عقاب: قسورة بس عاد مو هيج!!

قسورة: ولك كلبي لسة ما فاخ منهههه!!!!

عقاب: رح تموته ع هالحطة دوخر، ليث اخذه

اجة ليث جره هو وشاهين، اشرت لضرغام يروح وراهم، وبقيت بس اني وامير، ادنيت عليه كعدت ع ركبي بالكاع.

عقاب: عبالك كملت؟ لا لسة باقي التحلية

جان منتهي بس نظراته الكارهة لسة مثلما هي!

امير: حقيييييرررر

ضربته ع حلكه، رد صاح بصوت اعلى، كمشت ايده وكسرت اصابعه واني اباوع بعيونه، جان يصرخ بألم ووجع، لحظتها بس حسيت ناري منه انخمدت.

عقاب: حتى مرة ثانية، تحرم تكمش سلاح وترمي بي.. هه يا رجااال!
اخير شي كلتها باستهزاء، دفرته لان صاير بالدرب ومشيت.

امير: اندمك اندمك!!!

التفتتله وضحكت بسخرية.
عقاب: ولله خبصتني، ميخالف انتظرك
درت وجهي وطلعت، ضميت سلاحي بخصري.

عقاب: عاشووا

قسورة: ما خليتني اخذ حيفي منه

ضحكت وكتله.
عقاب: ولك شباقي بي هو، جنه طير مهلس وانت نفشته نفش، كلنة ننطي مميته مو نوديه ورة الشمس، اكو فرق يابه

شاهين: لا وين، هو عده هاي مقبلات

ضرغام: الله يساعد الي ياكل الاطباق الرئيسية

ليث: هههه دلشس -لذيذ بالانكليزي-

باوعتله وكلت بشك.
عقاب: شمدريك؟ بسلا ضايكها

ليث: اخخخ ايي لتذكرني، مرة بالشقة تكامشنا شو هذا سببلي اعاقة برجلي، ظليت اسبوعين اعرج

قسورة: شسويلك محد كلك شاقيني

عقاب: ديلاا يابة خلصت كروتكم، كلمن لاهله

شاهين: اودعناكم

حط ايده ع جتف ضرغام ومشوا سوة لسيارة قسورة، ليث صعد بسيارتي، كمشت راس قسورة وقربته ع راسي وكتله.

عقاب: باوعلي شو، دا اكلك باوع!
جان ينقل نظراته بعشوائية بس حتى متجي عيني بعينه، من نترت بي وكتله باوع، يلا حط عينه بعيني، بس شنو جان كلش معصب.

عقاب:منريد نصير مثله، احنه مو هيج قسور!

اردف بغضب مستنكر.
قسورة: لك راد يكتل الحجيييي!!! تفتهمم شنو يعنيي؟!

عقاب: افتهم واقدر بشنو دتحس، بس الحجي ما علمنا نرد غير بأخلاقنا، القتل والدم مو ثوبنا لو نسيت؟!

نزلت دمعة من عينه وحجة بأنكسار.
قسورة: الحجي هو كل اهلي... عقاب حسيت روحي رح اتيتم مرة ثانية!

بلعت ريكي بقهر وعيوني احمرت، قسورة اكثر واحد بينه متعلق بالحجي روحيًا، لان دوم وياه ومعتبره ابوه، فكلش تأثر بمحاولة الاغتيال.

عقاب: اششش الله ليكولها، يلا وصلهم وروح ارتاح

هز راسه ومسح دموعه وراح، رفعت راسي للسما اخذت نفس وصعدت سيارتي، سقت وبالي مضطرب والدكتورة كلشوية تتصل، سويت الجهاز صامت لان مابيه احاجيها.

ليث: ليش متجاوبها؟

عقاب: مالي خلكها، واصلة حدها كلش

ليث: تهون صاحبي

عقاب: اييي، هو شمصبرني غير التهون ومكضية

ليث: اي يـ اغاتي

ابتسمت وكتله.
عقاب: شلونها امك؟

ليث: بخير بس هالايام دتركب فچوچ وحالتها حالة، ههههه كل منكعد ناكل وطلعته، تلعب نفسي ف اكوم واعوفها

عقاب: شعجب؟

ليث: شنو شعجب؟

عقاب: تلعب نفسك!! ما توقعت اكو شي بالدنيا يمنعك عن الاكل

ليث: انتو ظلوا عينكم ع حلكي وصنفوا
حجاها بضوجة، ضحكت وكملت الطريق، وصلته لبيته وانطلقت لبيتي.

بالطريق جان اكو ازدحام، دخنتلي جكارة ع ما تفض هالهوسة، صادفني ولد صغير يبيع كلينس وعلج، جان ديفتر عالسيارات ويبيع، وصل للسيارة الكدامي، ديكله عمي تشتري علج، شو هذا كام يصيح عالولد ويغلط.

-يعني شلووون!!!! لعبت نفسنا احنه ما نخلص من هالشكولات، حسرة توكفلك بشارع الا واجوك المگادية ركض

رد عليه الولد بنبرة معاتبة ومقهورة.
- بس اني ابيع ما امد ايدي واكدي، رحم الله والديك

عافه وراح، عرفته ضاج وبطل ميريد يفتر ع باقي السيارات ويبيع، نزلت الجامة وصحتله.

عقاب: يولددددددد، ابو الكلينسسسس تععاااللل

التفتلي، اشرتله بتعال، اجة باتجاهي وملامحه مليانة تعب، هذا عقاب صغير!

-تفضل عمي.. علج كلينس؟

طلعت من محفظتي ورقة ونطيتهيا.

-شنو هاي، اني ما اكدي عمي
رد بقهر، كسر گلبي وتمنيت اروح لابو السيارة ذاك واكصله لسانه المسموم.

عقاب: ادري بيك حبيبي بس هاي اعتبرها هدية مني

-لا عمي تسلم ما محتاج، مستورة والحمدلله

عقاب: دا اكلك هدية مني، يصير ترجع الهدية؟

سكت شوية، ورجع كال.
-اخذها بس بشرط

عقاب: شنو؟

-تشتري مني

صفنت عليه، شكد عنده عزة نفس بحيث ميقبل اتصدق عليه.

عقاب: مثل متريد

ابتسم وانطاني الغراض الشايلهن.

-اوكف عمي لتروح

عقاب: شكو؟

-اجيبلك جكاير
ركض يجيب من صاحبه، واكف ع السايد الثاني يبيع جكاير.
اجة هو وياه باتجاهي، انطاني تكة جكاير.

عقاب: ماريد

-بس عمي انت هواي دفعت واحنه اتفقنا تشتري مني واخذهن

عقاب: اتفاقنا اشتري بس لعندك

-لعد شلون!

عقاب: عندي الكم حل

-شنو؟

عقاب: اشتري الجكاير مال صاحبك كلها وادفعله

-لا عمي منقبل
اندار ع صاحبه هم اشرلي مراضي

عقاب: مشايف واحد يكطع رزقه بايده، عمي اني شراي ليش متبيعولي؟

-عمي انت ع العين و ع الراس بس احنه منقبل ناخذ فلوس بدون حق منك

عقاب: انت شسمك؟

-علي

عقاب: وانت عمو؟
انداريت ع ابو الجكاير وسئلته.

- اسمي عمر 

ابتسمت، شكد حلوين ذكروني بيه اني وقسورة.

عقاب: عاشت الاسامي واني عقاب

عمر & علي: اهلا وسهلا بيك عمي

عقاب: بالمهلي، هسة تبيعولي لو لا؟

باوعلي عمر ورجع باوع لصاحبه علي، الي هزله راسه بـأي.

انطاني 3 تكات جكاير جان شايلهن وانطيته ورقة.

عمر: هواي هاي عمي، ما عندك خردة؟

عقاب: الباقي الك حبيبي

عمر: شكرا عمي

علي باوعلي ورد كال:  شكرا هواي عمي الله يسهلك

ابتسمتلهم وسألت.
عقاب: يا صف انتوا؟

علي: عمي اني مبطل من السادس ابتدائي.

باوعت لعمر، جاوب.
عمر: اني من الثالث متوسط

انطيتهم بطاقة بيها رقم تلفوني ومكان شغلي.
عقاب: تكدرون تجوني ع هذا العنوان باجر؟

هزوا راسهم بأي.
عقاب: خوش لعد، انتظركم باجر

عمر: عادي ورا ال 12 عمي؟

عقاب: اي عادي شوكت متريدون هلا بيكم، بس كون قبل ال2 الظهر

علي: خوش

عقاب: عموري شوفلي شنو سبب الازدحام؟ ما طلعت هاي

عمر: تدلل

راح يشوف وعلي يباوعلي ويضحك، ضحكتله.
عقاب: خير اكو شي يضحك بيه؟

علي: الله يوفقك عمي

عقاب: ويوفقك علاوي
ابتسمت من كل گلبي، احلى وانقى دعوة ممكن الواحد يحصلها، رجع عمر.

عمر: هاي اكو حادث ومسدود الشارع

عقاب: خير ان شاء الله

شوية وتحرك السير، لوحتلهم بأيدي بالوداع، بادلوني مبتسمين.

مشيت ورا الرجال الي حجة على علي، كسرت علي نزل يغلط ويعد ويصف.
-سواق تالي وكت، ابن الكلببب ولك انت متشوووف جنت حـ تروحنيييي!!!

نزلت مفول، هم ع علي وهم لان كال ابن الكلب!
بدون حجي رفسته وكعدت فوكه ملخته تملخ.

كمت عنه بعد شوط دك طويل.
عقاب: محد ابن كلب غيرك، لان مستحيل تكون انت بشررر!! ولو انت حتى حرامات تتشبه بالكلب يا ساقط!!

-اني اللللك بسيطةةة ولك تدري اني منوو!!

عقاب: ابن كلب ادري

-الا اندمكككك

ضحكت بسخرية.
عقاب: هاي شكو اليوم كلها تريد تندمني!!  اعلى ما بخيلك اركبه ومنو متكون كون، جوة قندرتي

درت وجهي ورجعت لسيارتي، شغلتها ورحت للبيت.
وصلت، فتحت الفون واشوف 20 مكالمة من الدكتورة من غير الرسايل الكاتبة بيهن.
-الله يخليك لتسوي شي تندم عليه
-عقاب ليش مدا تجاوب!

وغيرها وغيرها، سديته ونزلت.

...

اماني

متت من القلق والتفكير، مية سالفة وسالفة اجت ببالي، لخد ما اخر شي عبالي عقاب راح لحازم يحاسبه.

هنا اني عقلي وكف، وكمت اخابر وادز رسايل، وهو ولا يكلف نفسه يرد ويطمني، وهالشي خبلني وزيد توتري وقلقي اكثر.

مريم نايمة، لوين يلا كعدت، وجهها اصفر وعيونها ذبلانات شحالها.

اماني: ها مريومة ما جعتي؟

هزت راسها بـ اي.

اماني: لعد خ اسويلج شي تاكلي

مريم: تمام

اماني: تكومين يمي تساعديني؟ احسلج مما كاعدة بالفراش اليوم كله

باوعتلي بتردد وادور كامت، اخذتها ورحنا للمطبخ، حميت الاكل وصبيتلها، كوة اكلت .

اماني: ميصير تظلين هيج، اكلي زين وتغذي ترا تتخربطين

ساكتة متحجي شي، تنهدت وحجيت بصوت هادئ.

اماني:  اعرف الموضوع صعب ودتشتاقين لامج بس لازم تتعايشين ويه الواقع، لان متكدرين تغيري

مريم: ما اكدر .. اشوفها بكل مكان وحتى بالحلم اشوف لما كتلتها بالمسدس مال بابا .. شلون اكدر اعيش بدونها واني بهاي ايدي كتلتها؟

حجت ببكاء، كمت رحت يمها وحضنتها.

اماني: كافي لتبجين .. كله يهون وينحل ..

مريم: امي مـ تهون ..

اماني: خليها يم الله ومعليج ..

مريم: اريد امي ..

اماني: الله يرحمها..

مريم: الله ينتقم مني وياخذني..

اماني: اششش لتدعين ع روحج مو زين

مريم: بس اني استاهل!

اماني: ماكو احد يستاهل الموت..

مريم: امي هم جانت متستاهل..
كالتها بانكسار.

اماني: الله ينور قبرها ويرحمها ..

سكتت وظلت تبجي بصمت، عفتها تريح نفسها وكعدت بالصالة وبالي كله ع عقاب وشديسوي، يربي تحمي وين مجان.

ورة شوية، دا اغسل المواعين وطب عقاب، ركضتله واحس كلبي يركض كبل رجلية، طفرت حضنته بلهفة وخليت ايدي ع راسه وخلخلتها  بخصلات شعره، حضنته بقوة حسيت نفسي محتاجة احضنه واتاكد هو بخير.

ورة ثواني، حسيت ع نفسي شدا اسوي، وخرت عنه بتوتر وجان مصدوم من تصرفي.

اماني: وين جنت ليش مترد عليه من اخابرك؟

عقاب: مو كتلج بالشغل!

اماني: عبالك صدكتك؟

عقاب: عفية صدكيني ترا اموت هسة

اماني: لتقلد، عليك الله كلي خو ما رحت لحازم؟

باستغراب رد.
عقاب: يا حازم هذا؟

اماني: مدير المستشفى غير؟

عقاب: هااا لا، وشصخم رايحله!

اماني: عبالي تكتله تعذبه شو شتسويله
طلعت مني حجاية القتل بدون ما احس، خزرني بلعت ريكي، ولا اتوبين من جفصاتج اماني.

اماني: ااا اقصد تحاسبه يعني

عافني وراح، نزع جاكيته وكال.
عقاب: جايه السرة لتخافين

اماني: شنو معناه هالحجي؟

عقاب: الي فهمتي

اماني: عقاب الله يخليك لتدناله، هذا واحد شراني ومعنده حدود بالقذارة

عقاب: النوع الاحبه

اماني: مو وكت تقليدك، تعرف هذا ليا حزب يشتغل؟ ولله برمشة عين يطيروك

عقاب: ميخالف بس خ اشفي كلبي منه وساعتها شيسوي خ يسوي

اماني: واانيييي؟؟

عقاب: انتِ شنو؟

سكتت .. شكوله هسة؟
اكوله واني شيصير بيه اذا سوولك شي!! اموت وراك!

اماني: اني ما اقبل تتأذى من ورايه

عقاب: وانتِ شدخلج؟

اماني: عقاب فدوة لتسوي هيج

عقاب: دكتورة وخري عني مالي خلكج تعبان

اماني: بس اوعدني متدناله واوخر

عقاب: تؤ..

دفرت الكاع بانزعاج، باوعلي بتك عين مستغرب ع معاجبه تصرفي.

اماني: فدوة بس اسمعني خلي افهمك..

قاطعني وكال بحدة.
عقاب: كلت وخري!

اماني: بس..

رد قاطعني بس هالمرة جانت نبرة صوته تخوف اكثر.
عقاب: بدون بس دكتورة!!

راح للغرفة اخذ ملابسه ورجع طب للحمام، ظليت كاعدة بالصالة واهز برجلية متوترة.

يمكن مجان لازم اكوله كل هالتفاصيل، عالاقل جان ركز غضبه بس عليه، هسة حط عينه ع حازم، وهذا واحد حقير وشغله قذر، ميرفله جفن ويكتل عقاب بسرعة بس يهدد مملكته الفاسدة.

اجة من وراي عقاب وكعد، جان ينشف بشعره بالخاولي.

اماني: ليش متشسوره؟

عقاب: مو ميري نايمة

اماني: هاااا
رفعت حاجبي بتعجب، لهالدرجة تهتم الها، حتى شسوار متشسور يمها تخاف تكعدها!!

كمت اهز برجلي بسرعة اكبر، وعقلي ياخذ ويجيب بحجايته، اي ليش لا خلي ميري نايمة.

فزيت ع صوته.

عقاب: كافي تهزين برجلج!

اماني: اكطعها اذا مضايقتك لهالدرجة!

عقاب: صاحية انتِ بوية؟

اماني: لا تخبلت

عقاب: اي مو اكول

اماني: عقااااب!!
كلتها بنحيب، مادري ليش هيج كلتها اصلا!! خزرني وكال.

عقاب: كم مرة كايلج لتكولين اسمي هيج؟؟

اماني: شلون يعني ما اكوله؟ لعد شصيحلك!!

عقاب: لتصيحيلي، اعتقيني!

اماني: لا خلص لكيتها، اصيحلك دكتاتور خو متضوج؟ لابسك لبس اللقب

هز ايده.
عقاب: صدك مو صاحية

اماني: منك نتعلم دكتاتورنا العزيز

عقاب: دكتورة جنج اشتهيتي فركة اذن

اماني: كل قوتك هاي؟

عقاب: املص اذاناتج لعد؟

اماني: بعد؟

عقاب: اشيلج فلقة ؟

اماني: اي هسة هذا الدكتاتور الاعرفه

صفن بيه وحاول يكتم ضحكته.
اماني: دضحك يمعود قابل اكص ركبتك اذا ضحكت، هي خربانه خربانه

ضحك وهز راسه.
عقاب: يا جماعة الخير مدا اطخ ابالي شون صرتي دكتورة!

اماني: شنو مو بعينك؟

عقاب: لا استغفر الله والعياذ بالله

اماني: عبالي

عقاب: انتِ اصلا هواي عليج سستر، مو انوب دكتورة!!

كمت جريت الخاولي من ايده، وحجيت بعصبية وهو مستمر يضحك.

اماني: انت ششايف نفسك وتستهزئ بيه!! عالاقل اني شهادتي ارقى شهادة بالعراق، انت شنو شهادتك؟!!

سكت وكام وكف، خلى عيونه بعيوني وكال.
عقاب: ما مكمل دراسة

شفت بعيونه حزن، رمشت بتأثر واختفت عصبيتي منه.
اماني: ليش؟

عقاب: سالفة طويلة

اماني: حابة اسمعها

عقاب: ما احب احجيها

اماني: بس اني احب اعرف

عقاب: فضولية

اماني: كُلش وخاصة بيك

عقاب: شمعنى؟

سكتت..

اماني: مو لسبب.. هيج

عقاب: هااا هيج يعني يا سبحان الله

اماني: شو جنك ممصدك؟

عقاب: لا يابه

اماني: لعد احجيلي

عقاب: وشتسوين اذا عرفتي؟ شراح يتغير بالكوكب من تعرفين ماضييّ؟

اماني: مراح يتغير بالكوكب، التغيير يصير بيه

عقاب: شمعنى؟

سكتت مرة لخ ..
اكوله لان احبك؟!!

...

انتهى!

لا تنسوا التصويت 🦋🖤

#الكاتبة نورمين