رواية خطأ طبي «عقاب الاماني» الفصل السابع والعشرون 27 - بقلم نورمـين

#خطأ_طبي «عقاب الاماني»

بقلــم : نورمين 🦋🖤

...

عقاب: هذا الموجود

اماني: عقاب دتشوف الي دا اشوفه بيك لو لا؟

باوعلي بملل ورجع حجة بحدة.

عقاب: مليت من هالاسطوانة، كافي عاد!

اماني: اذا انت تمل، اني ما امل

عقاب: شي راجعلج بس عن نفسي ماريد اسمع حجاية زايدة عن هالموضوع بعد!

اماني: مو بكيفك، ما دام انت مدا تنطي فرصة لنفسك والي حتى اساعدك، فما اسكت وحظل احجي بهالموضوع لحدما تستوعبه!!

عقاب: لعد خلي انطيج الاذن الطرشة احسن حل واريح شي لبالي

جان اكو بصفي دولكة و كلاص بيهن مي، اخذت الكلاص شمرت المي البي على وجهه وحجيت بعصبية.

اماني: اصحى عاد!! الراح راح لشوكت حتظل عايش بالليل ومتقبل يطلع عليك الصبح؟؟؟ الحياة ابيض واسود ويوم الك ويوم عليك وهذا حالها ويه الكل، ليش محسسني بس انت المغبـون ومأكول حقك بهالدنياااا؟؟؟

من حركتي الغبية، مسح وجهه وتقدم بأتجاهي وهو يفور من الغضب.

لزم فكي بقبضة ايده بقوة وهسهس بحدة.

عقاب: ما اسمحلج تستهزأين بحزني او اطباعي ولا تستصغريهن، لان هذني اجن نتيجة جروح سنيييييين!! سنيييييين مو هاليومين العشتيهن وياي!!  الانسان الكدامج ما صار هيج اعتباطًا، اكو وراه قصة مأساوية، قصة انكتبت بـدموع من دم، جروح ما تشفى، گلب مكسور ووجع شاب اتيتم وانترك وحده بهالدنيا يصارع حزنه ووجعه، انباكت احلامه من كدامه بدون ميلحك يرسمها عدل حتى دكتورةةةة ..!

جان يحجي ودموعه متشكلة بمحجر عيونه مترضى تنزل، كيانه انكلب ونبرة صوته وكلماته شكت كلبي شك..

بچيت عليه ومنه ..

اذاني بلزمته لفكي بكل هالقوة، بس كلامه اذاني اكثر بمليون مرة..

حس ع نفسه لما شاف دموعي، هدني ومشى كم خطوة لكدام..

مسح وجهه وخلخل ايديه بشعره بعشوائية وهو يتنفس بوتيرة متسارعة..

كعدت عالجرباية حطيت ايدية ع مكان الالم بفكي ودموعي مستمرة تنزل..

اني استفزيته استاهل اصلا..!

اماني: ما جان قصدي استصغر وجعك ولا بأي مرة صدكني.. كل الي اريده تبدي من جديد وترجع انسان طبيعي حالك حالنا!

حجيت بضعف ..

اباوعله شلون دموعه خانته ونزلت.. هالمنظر وجع كلبي اضعاف مضاعفة عن قبل!

اماني: عقاب اني ماريد شي غير راحتك وسعادتك ولله ..

زفر بضيق.. واجة كعد بصفي فتحلي ايديه بمعنى تعاي لحضني.

ظليت اباوعله لثواني ممستوعبة ومصدومة من هالتصرف!

شمرت نفسي بحضنه وحضنته بقوة، هو بادلني ولأول مرة بنفس لهفتي!!

حسيته يريد يطببني جوة ضلوعه..

عقاب: كافي تبچين، ولج ولله ليوجعن گلبج يوجعني الي هم ..

شلت راسي وباوعتله بعيون دامعة حزينة وايديه كامشة ايدية بقوة..

اماني: انت وجع كلبي ..

عقاب: طز بيه...

هزيت راسي بلا وهو مسح دموعي بأيديه، ملت براسي باتجاه لمساته وغمضت عيوني ..

مرر ايده على خدي برقة وهو يكول..

عقاب: لتوجعين كلبج عليه، اني ما استاهل كل هالشي ..

اماني: انت اكثر واحد يستاهل اشعله روحي وكلبي وكل عمري الرايح و الجاي بس انطيني فرصة، صدكني مراح تتندم..

عقاب: دكتورة اني بارود، تحتركين بس تدنيلي لذلك نصيحة مني الج، شما بيج تبعدين عني ابعدي..!

اماني: ولله لو جنت النار بذاتها هم ما ابتعد عنك!

عقاب: هذا يسمونه غباء مو حب، الحب الي يعذبج ويذبج بجحيم نيرانه هذا مو حب اصلا!!

اماني: جحيمي وياك ولا نعيم الدنيا بدونك..

عقاب: بعد كلشي عشتي وياي بالفترة الراحت، انتِ مستعدة تحطين كلبج بأيدج وتظلين كل عمرج عايشة بخوف وياي بس لان تحبيني؟

اماني: يعني انت متحبني؟

عقاب: لا تجاوبين سؤالي بسؤال!

سكتت شوية واني اباوع لملامحه الي منتظرة اجابتي..

اماني: اي مستعدة، كتلكياها من قبل واعيدها هم الك هسة، ناري وياك جنة عقابي..

باوعلي بنظرة ممصدك هالرد ومستغرب من اصراري!

عقاب: بس اني ما اقبل تعيشين هيج، تستحقين حياة احسن وية رجال يحبج ويدور راحتج

اماني: ماريد رجال غيرك.. تأكد بأن اني حتلو شفت الضوة بغيرك مستحيل يحلالي اختار غير ظلامك!!

عقاب: هذا مجرد وهم وية الوقت تنسين ورح تشكريني هواي بينج وبين نفسج، وعليه.. اتفاقنا قائم وانفصالنا كذلك، الموضوع مجرد مسئلة وقت لا اكثر..

ظليت اباوعله بنظرات باهتة، شحجي وشسويله اكثر بعد ويحس بحبي ويصدك انو اني اريده بعيوبه قبل كلشي بي!!!

اماني: انت ليش هيج مصر تكسر گلبي؟

عقاب: ما عاش ليكسر كلبج دكتورة، بس هذا هو الصح

رديت بصياح

اماني: فهمننننييي احسسسسننن لمننننوووو!!!؟؟؟؟

عقاب: الي والج ولكل الاطراف، الصار بيننا غلطة.. وغلطة كلش جبيرة واتمنى نسامح بعض عليها ونكمل حياتنا بعيدا عن بعض..

هزيت راسي بعدم تصديق، اريد احجي بس شفايفي ترجف والحجاية ما تطلع مني..

دفعت ايديه عني وحجيت بحدة.

اماني: شتريد تسوي سوي وشتريد تكول كول، بس ما اسمحلك تكول عن علاقتنا غلطة!

جنت احجي وموسعة عيوني، رمش بتأثر وراد يحجي بس سبقته وكملت بنفس النبرة.

اماني: اششش لتحجي شي اكثر بعد! خلي رصيدك بگلبي محفوظ لتخربه رجاءًا..

سكت .. اكتفى يباوعلي وهز راسه ببطء، اخذت نفس ورفرته بقوة..

اماني: شكد بعدلنا وقت سوا؟

عقاب: اسبوع و5 ايام بالزايد

اماني: ميصير اقل؟

عقاب: لا

اماني: ليش؟

عقاب: الموضوع مرتبط بوالدج بصراحة..

اماني: مفهمت، شلون مرتبط ببابا؟ شعليه؟

عقاب: نهاية هالشهر تتثبت قوائم المرشحين عن الاحزاب، تمهيدًا لارسالها للمفوضية حتى تتجهز للانتخابات بعد

بهتت بوجهه ..

ممصدكة ان علاقتي بي لهالدرجة رخيصة واستغلالية لمصالحه!!

اماني: شكد حقير!!!

عقاب: كتلج من الاول ما افيدج، ما صدكتي

اماني: اكو فرق، انت استغليتني واستخدمتني مثل اللعبة بأيدك، وهسة من خلصت مصلحتك وياي رح تشمرني بكل برود!!!

دنك راسه بأسف..

اماني: حبيتك وتقبلت منك كلشي الحزن العصبية الخوف القلق وحتى لحظات مشاكلنا قدستها بس لان تشهد ع علاقتنا.. من كل كلبي بجيت وتألمت بسببك، ومع ذلك كلت ميخالف هو اتعذب هواي بحياته، لازم تصيريله الجتف الي يذب حمله عليه ويرتاح يمه.. والعكاز الي يسنده كلما مالت بي الدنيا.. مستعدة انطيك مي عيوني لو طلبته بس شنو؟؟ حبي ومشاعري هاي كلها انت شلون جازيتهاا؟!!

عقاب: كافي الله يخليج ..

اماني: ليش كافي؟ بسلا ضميرك أنبك سيادة الدكتاتور لو خاف هستوك حسيت ع نفسك؟  ترا هذا كله نقطة ببحر الي ضامته بداخلي!!!

عقاب: حتى تعرفين ليش اريدج تبتعدين عني..

اماني: هم عاد هالحجاية
رفعت راسي لفوك وكلت بقهر..

رجعت اخذت نفس وكتله بعتب..

اماني: لك اني وصلت وياك لمرحله، حتى المُر حِله!

عقاب: اسف ع كلشي سويته الج دكتورة ..

اماني: الاسف ميفيد بعد، والمشكلة شكد دا احجي مدا ارتاح.. الحجي خلص وكلبي بعده مليان، والي يزيد ألمي انو مدا اكدر ادعي عليك ولا احجي شي بحقك لان وللاسف الشديد... كلبي واكف وياك ضدي!! فهمني انت شمسوي لكلبي بحيث هيج يتمناك؟؟

دموعي فقدت سيطرتي عليهن والحجي كام يطلع مباشرة من كلبي بدون ما يفلتره عقلي..

عافني وطلع، ظليت ابجي بحرگة واحس اكو غصة بكلبي، لا راحت بالحجي ولا اختفت بالبجي..

جنها مترضى الا بي..

...

عقاب

طلعت من البيت لان بعد ما اتحمل...

لو ظال شوية بعد جان تخليت عن الاتفاق واخذتها لحضني ونهيت هالعذاب هذا...!

دموعها تكسرني وتوجع كلبي بطريقة تخنكني وتخليني اشوف الاتفاق سخيف لدرجة جبيرة!

بحيث اخذها لحضني وتطلع مشاعري عن سيطرتي..

اعترف اني عايش صراع كلش جبير بين عقلي الرافض وكلبي القابل بيها ورايدها..

بس الشي الي مصبرني، ان اني دا اسوي هيج لمصلحتها، حتى باجر عكبة تعيش مرتاحة ..

صح رح اتأذى واتألم من يجي الوقت الي تروح بي..

بس ميخالف دامها بخير وبأمان بعيدًا عني، كلش كافي بالنسبة الي هيج.

ماعرف وين انطي وجهي وقسورة خطية متصوب، مو مال اكعده.

رحت لحديقة هادئة بيها اضوية قليلة ونسمات الهوى بيها حلوة..

كعدت ورثتلي جكارة واني اتذكر دموعها وحجيها الي زرف گلبي ..

"انت وجع كلبي" ..

" يعني انت متحبني؟" ..

"ماريد رجال غيرك" ..

"وصلت وياك لمرحله، حتى المُر حِله" ..

"الاسف ميفيد بعد" ..

"شمسوي لكلبي بحيث هيج يتمناك؟" ..

عقاب: اوووف يا ربي دخيلك دليني الطريق الصح وين، تعبت ..

حجيت بقهر ورجعت ورثتلي جكارة وكملت ..

عقاب: تعبت اشرد منها واني كلشي بيه يركضلها .. تعبت اريدها واكابر ع گلبي وأبعدها عني.. تعبت من روحي المتعرف شتريد .. تعبت اتعب وما الكة الراحة بمكان .. لشوكت حـ ظل هيج معلعل يـربي؟.. ما كافي يـدنيا ليش متبطلين عني ..؟؟!

وظليت هيج للصبح، ادخن واسولف وية روحي ..

نار وشاعلة بگلبي لا تهيد ولا تطفى..

..

اماني

ما اعرف شلون نمت، كعدت الصبح راسي دايخ وعيوني احسها تطلع نار من كد الحرارة..

كمت غسلت، ادور عليه ماهوة..

ما اجة يعني..

بدلت وجنت كاعدة اشرب جاي، اجة.

شافني ظل واكف يباوعلي، ما انطيته اهتمام ولا باوعت عليه، ظليت مغلسة لحد ما راح ..

بلكي تحس ويوصلك ربع الالم الي دا اعانيه وياك!

اجة مبدل ملابسه وريحة العطر تسطر، غمضت عيوني واستنشقتها ..

حسيتها دخلت لرئاتي وتغلغلت بحويصلاتي التنفسية..

الله يلعن مشاعري الي تخوني وتضعفني كدامه..

فتحت عيوني لكيته يباوعلي بتمعن، تحمحمت بتوتر ورحت جبت جنطتي وطلعنا للدوام.

طول الطريق هدوء، محد بينه حجة او طلعله صوت..

وصلني وراح، وبديت شغلي، خلصت العمليات لعندي كلهن.

نزلت للطوارئ اشتغل لان ما احب اظل كاعدة وهم ردت شي الهي نفسي بي عن التفكير.

الطوارئ من افوتله، احس بالنعمة الجبيرة الي اني بيها..
واظل احمد الله الف مرة ع حياتي.

صدك لو كالوا ليشوف مصايب الناس تهون عليه مصيبته.

اجت حالة شاب واكع من السطح.

ضمدته ودزيته ع اشعة مفراس لراسه.

طلعت فحوصاته سليمة، كلتلهم ورا ساعتين نرجع ندخله مفراس مرة لخ حتى نتاكد خاف اكو نزيف بسيط نتلاحكه.

و خليته تحت المراقبة لمدة 48 ساعة تحسبًا لأي شي طارئ.

..

عقاب

وصلتها وطلعت لدوامي، روحي خلصانة ومالي خلك روحي..

بس ما اكدر اعوف الشغل لان الحجي مأمن المكتب يمي.

كملت شغل ونزلت جوة يم الولد .

ضرغام: وشوكت كلك الحجي يجي؟

عقاب: خلال هالاسبوع ان شاء الله

شاهين: لك هلااااا عينييييي مظلل شييييي!!!

قسورة: انت بس بهاي تفكر؟ متكول فشلة مرته مصار هواي من ماتت؟

شاهين: قسورة بربك لتخرب فرحتي، بعدين المرة ماتت وراحت شنو نموت وراها؟

ضرغام: مو هيج يالاثول

باوعلي وكمل.

ضرغام: عقاب شتكول لو نخطب عالساكت مدام فشلة من الحجي؟

عقاب: براحتكم يابه، بس اني ادري بالحجي مراح يرضى تسوون هيج

شاهين: لك فدييييييت

ضرغام: ميخالف نلح عليه ونكله احنه هيج نريد؟

عقاب: هاهيه لعد

شاهين باوع لقسورة وكال بضوجة

شاهين: ارتاحيت هسة؟

قسورة: ايي ومي بارد نزل ع گلبي اصلا

شاهين: تغار

قسورة: هه

عقاب: كافي انت وياه، بعدين استاذ شاهين شدعوة هلكد واثق من نفسك؟ منو كللكم البنات يقبلن بيكم انت والعينتين ضرغام؟

ضرغام: اني شعليييه

شاهين: يقبلن، بعدين انت موجود تقنعهن وتضربنه فد قاطين صبغ تطلعنه الطف خلق الله من الزلم فمستحيل يرفضن

عقاب: كل عقلك اني اسويها وادخل بخطيتهن؟!

شاهين: اهووو ظلمها

ضرغام: ليش محسسني احنه ناهبين الكاظم وطافرين؟

ضحك ليث ورد.

ليث: وشمدرينه ممسويها صدك؟

دفره ضرغام.

ضرغام: حير بلفتك وحلكك لتفكه

ليث اخذ عضة من لفته وسوة حركة اوكي لضرغام وهو مبتسم، ادور حلكه متروس اكل كوة يحجي.

عقاب: يولد عدا الشقة، خلي نحجي جديات ..

قسورة: لا بيبيات

شاف محد ضحك ع سوالفه كام هو يضحك

قسورة: ههههههههههههههههههههههههه

ع ضحكته العايقة ضحكنا ..

ضرغام: كمل حبيب

عقاب: انتوا شايفين حياتنا الخطرة تناسبهن؟ كلوبكم تنطيكم يترملن وينكسرن بعدكم اذا لا سامح الله صارلك شي انت او هو؟!

سكتوا كلهم حتى ليث الي جان ياكل عاف الاكل وكال بحزن.

ليث: ترا ميصير هيج، ضوجتني واني من اضوج تنسد نفسيتي عالاكل..

قسورة: عقاب ليش هيج تفكر بسلبية؟

عقاب: لا هاي مو سلبية، هذا واقع!

ضرغام: بس احنه ما نعرف الله شضاملنا، بعدين الحياة مستمرة والموت كذلك، محد يعرف شوكت تجي ساعته !

ليث: بالضبط، و على هالاساس لازم نستغل كل لحظة بحياتنا ونعيشها للاخير ونستمتع بيها، مثلما دا اسوي اني حاليا وية لفة الكص هاي

ابتسمت ع سوالفه وباوعت لشاهين.

عقاب: وانت شرايك؟

شاهين: ماعرف .. من جهة كلامك صحيح ومن جهة ثانية كلام الولد هم صحيح .. احتاريت!

عقاب: السؤال هو تكدر تحبها من بعيد وتبتعد عنها لو لا؟ كلبك يتحمل لو لا؟

شاهين: ما اكدر.. تدري اني وضرغام من نشتاقلهن، نخلص دوام و نروح نوكف براس الشارع ننتظرهن يطلعن حتى نشوفهن ونكحل عيونا بشوفتهن!؟؟

عقاب:  الله يطيح حظكم، كمل بلا

شاهين: اي بس اذا كتلك ما اتحمل بعدي عن ميقات، و عادي اتزوجها وما ادير بال لشي، هذا ميعتبر انانية؟

سكتت.. تفكيره ضرب الوتر الحساس يمي!

عقاب: رب الانانية صاحبي..

قسورة: هوووب حدكم انت وياه، شاهين ترا حجيك هذا مال واحد جبان!

شاهين: غلطان مو هيج

قسورة: لا هيج ونص!! لا تتحجج بالظروف والدنيا وتحط احتمالات دنيوية فارغة حتلو جانت واقعية، صير زلمة وتحدى كلشي واخذها وربك كريم ترا محد ضامن روحه لباجر، شمدريك ما ساعتها تجي قبل ساعتك وتظل انت بحسرتك؟

حسيت كلام قسورة منطقي مليون بالمية، اخذتلي صفنة افكر ..

شاهين: شوف انت بالاول خوش سولفت، بس اخير شي بعرتها، يول كون يومي قبل يومها الف اسم الله عليها

قسورة: داحجي فرضًا لتخبصنا

باوعلي وكال.

قسورة: الحجي نفسه هم الك عيني باتمان

ضيقت عيوني

عقاب: باتمان شنو؟

قسورة: الگلب مالتي تصيحلك باتمان

ليث: لا بربك؟ ههههههههههه

قسورة: وربببك

شاهين: زين ليش باتمان بالتحديد؟

ضرغام: سهلة ميرادلها روحة للقاضي، لان دومه يلبس اسود وجاكيته شعرضه من يمشي جنه صدك باتمان هههههه

عقاب: مغسل لهالوجوه، انجبوا يلا!

للظهر طلعت للدكتورة، ادك عليها حتى تطلعلي ماكو، نزلتلها للمستشفى وتفاجئت بالشفته!!
..

اماني

كعدت بالحديقة ع وحدة من المصطبات، اريد اغير جو واشتم هوا نظيف لان ريحة الديتول والدم خنكتني.

تذكرت كلشي صار البارحة ..

سلمت الموضوع بيد الله، لان خلص تعبت بعد ما بيه افكر اكثر.

رجعت طبيت لجوة، شفت ام الولد دتتصايح وية الممرضة شهد، رحت عليهن.

-وينه مدير مستشفاكم اليوم اهجم المستشفى ع روسكم واحد واحدددد!!!!

وكفت بصف شهد وحجيت.

اماني: اذا عندج حق تاخذيه، بس لو سمحتي نصي صوتج احنه بمستشفى والمرضى بحاجة لراحة

-هي هاي الدكتورة نفسها موو!!!!

ما احس الا هجمت عليه وملخت شعري ووجهي بأيديها، شنو منو وليش مادري!!

شهد تريد تفكني منها ماكو، المرة سمينة وقوية متنكدر.

اجو الحرس سحلوها عني بالكوة وهي مستمرة تغلط وتهدد واني مثل الاطرش بالزفة كلشي ما مفتهمة!

-كتلتي ابنيييييي يا ظالمةةةة الله ينتقمممم منكككمممم ولكممم الله اكبرررررر ما عرفتوووا تعالجووه، ولله اجججةةة ما بي شييي يا عالممم هي كتلته هي!!!

جروها طلعوها برا، وكلامها صدمني..

مات!!

رحمتك ربي.. عفته قبل نص ساعة وضعه مستقر!

الظاهر صايرله نزيف بس جان بسيط فما مبين بالمفراس و هو الي كتله..

انقهرت كلش بس شبيدي عليه، سويت كلشي اكدرله..

دا اريد اكوم دخت ووكعت..

ما حسيت الا واني ممدة ع السرير شاديلي مغذي و عقاب كاعد يمي ولازم ايدي..

وية ما شافني حجة بقلق.

عقاب: ها دكتورة شلون صرتي؟

حطيت ايدي الثانية ع راسي وغمضت عيوني متألمة..

عقاب: متوجعة؟ اخليهم يضربوج مسكن بعد؟

جريت ايدي الكامشها منه وكلت ببرود.

اماني: ماكو داعي

عقاب: شصار وليش تهجمت عليج وحدة؟

تنهدت بضيق لما تذكرت ..

اماني: ابنها مات بنزيف داخلي واجت اتهمتني انو اني سبب موته وضربتني، ادور دخت وهياتني هسة كعدت

عقاب: وانتِ مكسرة معندج ايدين ترديلها الضربة؟ او عالاقل تلزميها.. تدافعين عن نفسج؟!

اماني: حقك تحجي هيج ما شفتها شكبرها جنها بقرة حشا خلقة الله

ضحك وكال..

عقاب: استغفر الله .. وهسة شلون صرتي؟

اماني: راسي يوجعني حيل

عقاب: كسر بأيدها!!

اماني: لا تدعي عليها

عقاب: ليش يمه؟

اماني: لان دعواتك تنكلب عليك

عقاب: عادي

باوعتله صفح، شلعت الكانونة وهو صاح.

عقاب: وين وين باباتي ارتاحي!!

اماني: ارتاح بالبيت عود

عقاب: اذا هيج تمام

ساعدني وكمش ايدي كومني، اول موكفت افترت بيه الدنيا.

هو رئسن سندني واني ذبيت نفسي عليه.

عقاب: هالله هالله باباتي..

باوعتله بتعجب، نبرته الحنينة هاي تاخذ كلبي وتاخذني كلي.

رجعت درت وجهي عنه، اخذ جنطتي كمشها بايده وبالايد الثانية كامشني.

اماني: جيب الجنطة اني اشيلها

عقاب: معليج بيها، حيري بروحج

اماني: بكيفك اني لمصلحتك كلت خاف تستنكف منها

وكف، وكفت وياه وباوعتله باستغراب.

عقاب: ما استنكف من هالامور اني، المرة واحتياجاتها كلها مقدسة بالنسبة الي واداءها واجب يزيدني رجولة..

اماني: وتجي بكل بطر تكلي شحبيتي بيه؟ انت شنو الي مينحب بيك يابة؟

قلدت كلمته، ابتسم بتوتر وكال.

عقاب: امشي امشي ام لسان، متصيرلج جارة ابد

ضحكت ومشيت وياه، صدك متصيرلي جارة، بارحة طيح حظي وبعدني اتغزل واعبرله عن حبي بكل فرصة تسمح!

فتحلي باب السيارة حط جنطتي و صعدت وسدها.

رجع صعد بصفي، فتحت الجنطة تلفوني ماهوة!!

اماني: عقاب وين تلفوني؟

عقاب: شمدريني بي

اماني: خاف وكع مني جوة بالطوارئ؟ تنتظرني دقايق اجيبه واجي؟

عقاب: دكعدي وسكتي الله يخليج، اني نازل اجيبه.

اماني: براحتك بس اسئل عالممرضة شهد اكيد تلفوني وياها لان اخير شي من دخت جانت هي وياي

عقاب: صار يابة، دقايق وارجع.

هزيت راسي بابتسامة خفيفة.

نزل واني اباوع عليه شون يمشي برشاقة، طول بعرض هيبته ساحرتني..

ظليت اباوع عالمدخل منتظرته يطلع، تأخر مرت 10 دقايق يمكن وهو لسة جوة.

جام السيارة مسدود، نزلت جامتي شوية حتى تتهوى السيارة لان خنكة.

وفجأة اجة شاب يركض بأتجاه السيارة وعيونه عليه وواضح معصب كلش.

من خوفي سديت الجامة وغطيت وجهي بايدية.

هو جان يدك عالجام ويشخط بالسيارة ويصيح.

-اليوم الا اكتلج مثلما كتلتي اخويةةةة، لو اطيرين هم الزمج ويييين تروحيييين الزمج الزمججججج!! افتحييييي

الجام قوي ميتكسر بسهولة، فجابله طابوكة شمرها بالجامة الامامية تفلشت..

صرخت بفزع وغطيت وجهي بايدية..

وخرتهن ببطء واشوفه مستمر يشمر طابوك حتى يوكعها عليه.

بهاللحظة تمنيت لو اعرف اسوق حتى اشغل السيارة وافلت بروحي بس ماعرف اسوق!

عيوني توسعت ع الاخير من الخوف  ..

كلبي يرجف من الهلع وما اصدك شوكت يجي عقاب ينقذني من هالورطة...

يا ربي دخيلك شنو ذنب الاطباء العراقيين عايشين بهيج رعب!

طلع عقاب كبالي واجة يركض، ابتسمت بعز خوفي..

اجة البَـطل مالتي!

جر الولد من ياخته حطه بالكاع وشبعه بوكسات لحد ما فقد الوعي وايديه انترست ترس دم..

فتحت الباب ونزلت ركضتله بيه ما بيه، طول اليوم مماكلة شي وادور الضرب الي اكلته خلاني اتكسر..

رحت يمه وكلت بخوف..

اماني: عقاب فدوة كافي عوفه  ..

ضربه بقوة اكبر، كمشت ايده، باوعلي بصدمة..

اماني: كافي حيموت بأيدك

عافه وكام جرني لحضنه وكال..

عقاب: نص حيلي راح من شفت هالكلب متعرضلج وانتِ خايفة وتبجين ..

اماني: انت المأمن الوحيد الي عقاب، يمك بس اكون بخير وبأمان وماخاف من احد..

حضنني بقوة ومكال شي رغم حسيت عنده حجي هواي.

اجت الدورية والامن تجمعوا، صعدنا بالسيارة ولحكناهم اشتكينا عليه.

عقاب تخبل عليهم وتوسلوه كومة حتى ميشتكي لان طلعوا ناس فقرة وكلوله ساعة عصبية واعذره اخوه ميت مو شوية بس ما دار بال وجان يكوللهم

عقاب : لو متاذية مرتي منو يفيدني بيكم؟

-الحزن ع اخوه عماه، ما قصده ياذيها ولله

عقاب: حزين ع روحه العالم مالها شغل، اخوه هذا حد يومه، شنو واذا دكتورة؟ يبتلي الواحد يصير دكتور ببلدكم الهمجي..!

دفاعه عني والحركة الجان يحجي بيها..

هالموقف حاله حال هواي مواقف..
تاكدت من خلاله ان عقاب يحبني..

بس خوفه هذا مشكلة ..
شلون اكدر اتخطاها واعيش وياه بسعادة مادري..!

رجعت للبيت ميتة تعب، ذبيت نفسي عالقنفة لان اقرب شي الي.

غمضت عيوني ومحسيت ع روحي شون نمت، يمكن تاثير المخدر لسة يشتغل.

حسيت ع صوت عقاب يكلي ..

عقاب: كومي نامي بفراشج مو زينة هيج هالنومة..

درت وجهي عنه وغلست، حتى عيوني ما اكدر افتحهن عبالك ملزكات بصمغ ..

اماني: ما بيه حيل

عقاب: لعد اني بيه، تعالي باباتي ..

شالني، شبكته وحاوطت ركبته بايدية وخليت راسي ع صدره..

بين الواعية وبين النايمة، شايفين من تصيرون بهيج نومة لا كاعدين ولا نايمين؟

بس تحسون ع نفسكم وع الي حواليكم، هذا الصار وياي هههه.

..

عقاب

خليتها عالجرباية، ظليت واكف اباوعلها وهي نايمة واخدتلي صفنة وافكاري رجعت احتلت مخي..

شيصير لو اكدر انام يمها؟

شيصير لو عارفها بطريقة عادية وما عشنا كل العشنا؟

ليش هيج حتى الحُب مكتوب عليه اتعذب بي؟!

مديت ايدي سحبت الغطا من جواها وغطيتها، لزمت ايدي وفتحت عيونها ..

اماني: لتروح .. نام بصفي.. رجاءًا عقاب؟

...

انتهى

لا تنسوا التصويت 🖤🦋

#الكاتبة نورمين