خذ بيدي ولا تسألني الفصل الخامس عشر 15 - بقلم نهى

خُذ بيدي ولاتسألني
للكاتبة nuha-d-h

رونق
بدت الحفلة واشتغل الديجي وشفت بنات خالة شلون گامن يركصن اشو هذولي كلشي عادي عندهم

بس انتبهت لرضوان واخوانه وخواته متشددين على عوائلهم يعني الحرية بس من جهة خوالهم
لا والي قهرني وحدة من عندهم جنها ماصولة گصبة
سافرة وفاتحة الشعر وماخذة راحتها عالاخر
راحت لعند رضوان وظلت تركص قريب عليه وبالاخير
شفتها لزمت ايدة وگومتة من الكرسي وجرتة
وظلت تركص قريب عليه ......
وتحرك بيدة وهو بس يضحك ......
اشو هذا مكيف عالوضع وظل يصفكلها ويحرك بدية ويضحك وياهة وشاگ الحلگ

اهووو هسة اني شحارگ گلبي شلي غرض بيهم نارهم تاكل حطبهم
شفتها اقتربت منة
لااااااا هاي كلش مصختها يعني اولاد خالة كلهم موجودين وديركصون الارضوان صارت بي حلاوة ومايحلة الركص الا وياه لا عاد لهنا وكافي من حرگت گلبي رحت شلت صينية الماي وقربت منهم وسويت نفسي ممنتبهة عليهم
وضربت بكتف رضوان حتى يلتفت علية
لان صلوات الاخت حايزة على تفكيره وماخذة كل اهتمامه
التفت علية ورفع حاجبة بسؤال
وهي وقطعت رگصتها تباوع علية واني لازمة صينية الماي
-احم اشوفك تعبت من كد ما صفكت كلت خطية خل اجيبلك مي خاف نشف ريكك و عطشت
ضحك
دنگ راسه وهمس بأذني
-شنو خايفة علية مثلاً لو هاي حشرية منج
-لا والله كسرت خاطري گلت اكسب بيك ثواب
تركتة ودرت وجهي وردت اطلع
انتبهت على واحد من اولاد خال رضوان اسمة لؤي
قطع علية الطريق
اخذ مني كلاص الماي وكعد يغني
((كلتلها ياحلوة ارويني عطشان مية اسقيني
كلتلي روح يامسكين مينا مايروي العطشان
طالعة من بيت ابوها ورايحة لبيت الجيران ))

عزة هذا مخبل يابيت ابوها يا بيت الجيران
خايب رحمة لوالديك اسكت لا نوب انطرد من بيت رضوان واروح لبيت الجيران يلفوني من وراك
خزرتة وابتعدت عنة
هذولي بيت خوالهم عادي عندهم يتشاقون بينهم
و بجرءة زايدة بس اني ما اكدر اتقبل هيج شي

وكانت نظرات رضوان تراقبني من بعيد وكأنما اول مرة يشوفني
اي حقة مستغرب على تصرفاتي وكلامي وياه
لان احنا ابد مصاير بينا . موقف ومتبادلين بيها الكلام اقصى حد هو موقف اليوم .....
اما الايام الفاتت .......
كلة صامت هو ملتهي بالدوام واني ماخذة منة موقف

جمعت الكلاصات الفارغة وديتهم للمطبخ
ورجعت شفتة
ملتهي وية اولاد خالاته وبناتهم واخوانة يصفكون ويركصون بس هو ماجان يركص بس يصفكلهم
عاد اني طبگن فيوزاتي
رحت على هاجر وانطيتها كرار
-شوفي هسة تگومين تخلين كرار بيد رضوان حتى يلتهي بيه شنو قابل هو عيد ميلاد كرار لو عيد ميلاد ام كفشة
اخذت كرار مني وراحت بي بتجاهم وانطتة لرضوان
لعد اشو بس كادر علية لتلبسين هذا ميصر ذاك
وهو يم بنات خاله افري وسبورت

شفتة شلون شال كرار وكعد يركص بي على الاغاني وكعدو يكصون صور

بعد ماخلصت التقديم رحت سلمت على خواله الظاهر
همة علاقتهم بخوالهم اقوى من علاقتهم ببيت عمامهم

وانتبهت لهذا اللزكة الي اسمة لؤي اجة كعد يمنة لان همة صايرين كروبات كروب كبار السن كاعدين على صفحة
وكروب الشباب ماخذين صفحة لوحدهم
اني رحت كعدت يم عمي وعمتي والبقية
وعمو ابو رضوان گعد يعرفني على اقاربهم واحد واحد وعرفني على هذا لؤي
الي نظراتة معجبتني سلمت بعد ماعرفني عمي عليهم

والمفروض الاستاذ رضوان هو يعرفني عليهم بس معذور حقة ملتهي يتونس وية الحلوات
بس اخ هاي الكصبة جنها قصبة هوايئة لاطشة بي

شفتة ترك المجموعة واجة لعدنا
گعد بصفي وخلة ايدة ورة ظهري
وقرب راسة على رگبتي وهمس باذاني
-شنو ياحلوة اشو اشوف النار تطلع من عيونج شكو ياستار
-لا يتخيلك بس ظل بالي على كرار هسة شي اكيد تعب من الركص والعيد الميلاد اريد اخذة حتى ابدلة وينام
سمعت خال رضوان يحجي وياه
-اي رضوان وين جنت ظام هاي الغزالة عن عيونة شنو تخاف نحسدها بس غير الصدك عمي حقك
من تكول امك كتلت روحك عليها
حسيت برضوان ظل يحرك برجليه
ابو رضوان -ابو سرمد اشو كمت تغازل بچنتي

ابو سرمد رجال جبير وهمة متعودين على خفة دمه وشقاه ويصير ابو هاي الگصبة تمارة
- ياخي ان الله جميل ويحب الجمال

والكل ظل يضحك على كلام ابو سرمد الا رضوان حسيت على ايدة كرصت خصري وهمس گومي شعندج مگابلة الرجال وگاعدة اشو جنك عجبج الحجي ومتونسة عليه
-التفتت عليه بستغراب

ام رضوان -خالة رونق كومي جيبي الكيك ووزعيلهم
رونق
اي مو الخدامة مالتكم رونق يالله هي بقت عليج اشو واحد يرفع وواحد يكبس
كمت وغزرت رضوان وطلعت
ورحت خليت صحون الكيك بالصينية وشلتها حتى اروح للصالة اوزعهم بس سمعت صوت الديجي نصة
وسمعت صوت عمتي وهي تحجي
ام رضوان -خوية ابو سرمد بما ان احنا كلنا موجودين ومتجمعين
حبيت اكلك بهاي المناسبة اريد اطلب ايد بنتك تمارة لابني رضوان
طبعا صار الجو هاديء وعم السكون بالمكان
وصارت ايدي ترجف حسيت على واحد سحب الصينية من ايدي انتبهت شفتها هاجر الي تباوع علية
صار جسمي يرجف من الكلام الي سمعتة
هاي ليش وشوكت صار ......
زين واني وكرار ومصيرنا .....
شراح يصير بينا ........
باوعت على رضوان الي كانت ملامحة جامدة وكان عاظ شفتة السفلية بصرامة وانتبهت على ايديه لفهة بقبضة عبالك يريد يضربلة واحد
ابو سرمد وهو يلتفت على اختة متفاجيء
-اكدر اعرف ليش تخطبين لرضوان وهو عندة مرة
وماشاء الله عليها معايزها شي
ام رضوان -خوية انت مثل متعرف
هو تزوج ارملت صديقه لان صديقة قبل ليتوفى
امنهم عند رضوان وانت تعرف برضوان شكد گلبة طيب وحنين
بس لتخاف هو اتزوجها حتى يضمن ان ابن صديقه يتربى تحت ظله
وهو طلب مني بنفسه ان ازوجة بنتك تمارة لان جان حاط عينة عليها وانت تعرف بيهم من همة وصغار واحد يحب الثاني
جمدت بمكاني من ورة كلام ام رضوان
اني اعرف شنو كان سبب زواجة مني
بس كلش صعبة من واحد يذكرك بالسبب امام الكل بوقتها حسيت بالذل والنقص
التفتت على رضوان الي عيونة صارت نار
ردت اعرف شنو ردت فعله وليش الاستاذ ضايج اذا كان هو بنفسة طالب منها. تزوجة بنت خاله
ابو سرمد-صحيح هذا الكلام بوية رضوان

رضوان التفت على امه وخزرها بنظرة مليانة نار
-احم احم اي خالي اتشرف بيك وبنسبك

اني هنااا
وبهاي اللحظة بالذات حسيت بموت مشاعر كانت وليدة. اللحظة بعدها ملحگت تطلع
عالدنيا وتشوف النور
التفتت على كرار ابني رحت عليه وشلتة من الگاع وكأني استمد منة الامان .....
حسيت برضوان يباوع علية .....
ويراقب حركاتي وردت فعلي ......
وكانت كل العيون علية تراقبني ......
انتبهت على تمارة وعيونها فاضحتها والفرحة مسايعتها
وانتبهت على البنات شلون يهنؤها
اجيت اطلع من الصالة واحس بنار بگلبي ماناوية تتطفى الا تقضي علية
بس اريد اعرف هو ليش علقني بأمل واهي

گام راسي من گد الالم احس بي يريد يطك
والله بوكتها لو واحد يطخني ابجي اذب روحي بالگاع مثل الطفلة
ااااي ليش اتزوجني وورطني وياه اذا كانت نيتة يتزوج ويكون عائلة خاصة بي
المن رابطني بيك شنو مدالية مثلا لو تحفية زايدة عندة

اجيت اطلع منهم واحفظ مي وجهي قبل لا انهار گدامهم واسوي مشهد يكسر الخاطر ويطيح حظي من بعدة
ابو سرمد-بنتي رونق تعاي كعدي اريد اسألج امام الكل
ترة ما اريد اظلم بختج واكسرج ببنتي واخليها تدخل عليج ضرة وانتي بعدج شابة وحلوة وانتي الف واحد يتمناج وما عليج عازة بس اريد تجاوبيني
انتي قابلة على رضوان ان يخطب ويتزوج وحدة غيرج
رونق وجنها تنازع الروح التفتت على رضوان
-اي عمي قابلة والله يهني بيها و يسعدهم
و مثل مكالت عمتي عطف علية وعلى ابني اليتيم وستر علينا لا اكثر
لان مالنا احد يعيشنا ويكد علينا
وهو انعم الله عليه. عمل باصله و اتزوجني حتى يكف السان العالم عني
عمو الف مبروك على بنتك .......
رضوان خوش رجال ويستاهل كل الخير .......
وكثر الله خيره بيوم لفاني لبيتهم .......
وصرف علية وعلى ابني ........
ولتخاف على بنتك من ناحيتي ترة ما راح ااثر على علاقتها برضوان ......
لان اصلا اني ورضوان كلمن عايش لوحدة يعني هيج والا هيج لازم يتزوج خو ميبقى بدون زواج وعائلة

التفتت على رضوان وحسيت يريد يكوم يخنكني على كلامي
-الف مبروك رضوان تستاهل كل الخير
ودرت وجهي وطلعت من عندهم
قبل لاتخوني دموعي

دخلت لغرفتي
وسديت الباب وقفلتها بالمفتاح وكعدت انزع ملابس كرار الي ميقبل يصعد بالگوة يالله صعد وياي
وكام بس يبجي ويصيح
بابا بابا
رونق بقهر
- بس كااااافي هذا مو ابوك هذا مو ابوك لك هذا فاعل خير كافي كافي ......
وصار يبجي بالزايد ......
وكعدت بالكاع الطم على خدودي والطم على حلگي
كافي بعد ما اكول اريد واتمنى كافي كافي ......
المثلي تاكل تبن وتسكت ........
وصرت اشهك من البجي ........
بس اريد اعرف اذا كان هو يحب بنت خالة
ليش ورطني اني وابني وياه احنا شنو ذنبنا

احس بنار بگلبي بس مو غيرة على رضوان لا
لان اني اصلاً ما احبة بعدني حتى ملحگت اتعرف عليه
بس يمكن هذا القهر شعور الانانية والتملك
لان رضوان عودني اني وكرار ان نحتل المرتبة الاولى بحياته وماخذين كل اهتمامه
بس اخاف يتزوج علية ويكون عائلة خاصة بيه
ويلتهي باولاده ومرتة وينساني. اني وكرار ......
نزلت دموعي
شفت كرار ابني يباوع علية ابجي .......
نزل كوة من السرير وكعد بحضني .........
وكعد يمسح بدموعي ......
بيدة الصغيرة يشوفني ابجي وهو هم يبجي وياي
كسر خاطري ادري بي حبيبي حساس
وبسرعة يتأثر بية
اذا اضحك يضحك وياي واذا ابجي يبجي وياي
سودة علية كروري مبقالي من الدنيا بس انتة
حضنتة ونمت اني وياه على السرير

ورة فترة
سمعت الباب يندك
سمعت صوت هاجر
-رونق حٍٍِْــًبٌٍـــِٓېٍٓ فتحي الباب عفية ليش حابسة روحج
-هاجر حبيبتي اريد انام تعبانة
-بس خل احجي وياج عفية حبابة لتفهمين السالفة ترة امي هي الي
قاطعتها رونق
-حبيبتي ترة عادي شنو يعني الفهمت والمافهمت
قابل اني شنو اقدم ااخر اني هنا ان حضرة لايعد وان غاب لايفتقد
اني مجرد عالة كضيت عمري عالة على الناس هسة بقت على امج ورضوان حقهم عمي الله يساعدهم
الله بلاهم بحمل ثقيل عليهم كوة متحملينا على اعصابهم

اني راح ابقى طول عمري حجر عثرة بطريق الناس
حسيت بهاجر راحت وتركتني
اني جنت اعرف عمتي ما راح اتخليني اتهنا بحياتي
خصوصاً اني اخذت. ابنها واتزوجتة غصب عنها

وبعد كملت بسالفة ضياء الي سافر يدرس بالخارج
لان رضوان بوقتها خيرها ان ينتقل من البيت لو العار ضياء يطلع من هذا البيت
عرفت ان هذا كلة مراح تعدي بسهولة
وراح تطلعة من عيوني وتمسح بية الكاع فوك ما اني حظي طايح
الي قهرني ان هي حجت گدام الكل ونزلت من قيمتي امام الجميع

ربي اليك المشتكى ارحم بحالي هاي هواي علية
ربي اختبارك صعب صعبة علية اتحملة ما اگدر

بعد شتحمل اشو من فتحت عيوني عالدنيا واني كل شي حلو بالدنيا ينوخذ مني غصب عني ولازم اسكت واجب واتقبل الامر
اي مو جنت كافية خيري شري ومالي دخل باحد وسادة بابي يادنيا شتردين مني بعد

يتبع