خذ بيدي ولا تسألني الفصل السادس عشر 16 - بقلم نهى

خُذ بيدي ولاتسألني
للكاتبة nuha-d-h

رضوان
موقف امي وياي بهذا اليوم راد يجلطني من الصدمة
اريد اعرف امي شتحس من تتدخل بحياتي
زين اكفر بيهم واحرك البيت على راسهم
يعني حجت حجي ما انزل الله به من سلطان
گعدت تجفص بالمصارين
زين ربي هاي امي شتصرف وياها يعني اصير عاق
واطلع عن طوري يعني صدگ حيرتني
والله هذا اختبار صعب

اني شراح اسوي وهي خلتني بموقف لايحسد عليه
وكلها بصفحة ورونق وانكسارها امام عيني بصفحة
اتمنيت افتح گلبي واضمها بين ظلوعي واحميها من السان امي الما يرحم

زين يا ربي امي مرة جبيرة ومريضة ومو زين عليها القهر لان گلبها موزين عليه
ااااخ يابة بالله هاي شحطلها وتطيب
ظليت كاعد منتظر بيت خالي يطلعون ظليت گاعد على اعصابي
ودزيت هاجر حتى تصيح لرونق حتى تنزل تكمل عيد الميلاد ظل
لكن هاجر نزلت بدون رونق وعرفت مراح تقبل تنزل وحقها الصار مو هين عليها امي مخلت شي محجتة وانة احس نار بكلبي يعني مظل واحد معرف بوضعي مع رونق
منا على ما طلعو مظل عقل براسي
بس انسد الباب
كبل انفجرت متحملت اسكت
-محد يطلع منا الا تگولون شنو هذا الفلم الي سوتة امي قبل شوية
التفتت على امة
اي يوم اگدر اعرف انتي ليش هيج سويتي
ومنو انطاج الحق تتدخلين بحياتي
ام رضوان بدموع
-هَـا يمة رضوان راح تتعارك وية امك الربتك علمود افكر بمصلحتك يا يمة العمر يمشي واشوفك گبال عيني تكبر وماعندك عائلة تلمك ولا شفت ابنك يايمة اني مبقالي شي واموت يعني عاجبتك حياتك وية هالبومة المحسوبة على راسي مرة يعني صارلك شكد متزوج منها
ومشفت منها غير التعلعل ولا يوم شفتك عريس متهني
رضوان باعصاب
-يمة رحمة على والديج اني شاكيلج حتى تحجين من يمج
زين انتي مو تعرفين كلش زين انة جنت مو بحال زواج ولا افكربي
وتعرفين شنو سبب رفضي للزواج
ام رضوان-اي يمة شنو قابل بس انت ضابط يعني الضباط ميصير عندهم عوائل والله علمود حياتهم مهددة بالخطر يمة هذا مو حجي
ابو رضوان- ترة تفكيرك هذا كلة غلط
واني ما انكر فرحت بيوم اتزوجت
بس اتفاجئت من حجت امك وكالت هو ميقترب لمرتة كلت خلاص مدينطيه گلبة يقترب لمرت صديقة
واتفقنا اني وامك نخطبلك بنت خالك ابو سرمد واظن ماكو احسن منها من ادب واخلاق وشهادة وتناسبك
حتى بعد لتكون عندك حجة
رضوان بصياح
-الله اكبر يعني الواحد مايعرف يعيش بهذا البيت بسلام بدون متحشرون روحكم بحياتي
والله العظيم انتو بسوالفكم هاي راح اهج من عندكم
واطلع اعزل اني ومرتي وابني لبيت لوحدنا وانتو اخذو راحتكم
ام رضوان
-اي يمة رضوان عفية بالسبع بالله علمود شنو تطلع وبمنو بهاي مرتك
تعزل عاد هي شلون مرة حوك وسباعية وراح تلزم ظهرك وتصون بيتك بغيابك
شنو رضوان نسيت يمة
هي شسوت وية اخوك لو تغشم روحك
ولتنسى دوامك لازم تلتحق وتتركها لوحدها بالبيت
بالله گلي شلون راح تأمن بيها
رضوان-حجية ترة لهنا وكافي
وصل حدكم ترة مو شفتيني
سكتت عن ذاك الموضوع وغلست عبالج مصدگ كلام ابنج ضياء
ترة اني وانتي نعرف كلش زين بضياء اخوي
هو المعتدي عليها
لتخليني
اكمل كلامي واتجاوز وانتي امي ومكانتج بگلبي محشومة فلتطلعيني عن طوري
خلي الي بالگلب مضموم احسن
واني رونق اعرفها

ام رضوان -شوف رضوان اذا متتزوج بنت تمارة خالك اغضب عليك ليوم الدين
ولزمت گلبها ووكعت عليهم وكلها انخبصت
بام اضوان
اخذنا امي للمستشفى
والكل ظل يلوم بية
ابو رضوان-هسة ارتاحيت راح تموت امك وانت السبب كلة من وراك
فاضل-يا اخي ريح امي والله شلعت گلبها ترة ميصير
انت جبير
رضوان-ترة والله ما كفرت
ابو رضوان-اكول اسكت احسنلك ترة والله فورت دمي
رضا بوية اخذ اخوك من گدامي لابالقران احرك المستشفى على راسه هذا اخوك كضة طول عمرة راسة يابس ومايحسب حساب غيره
رضا وهو يسحب رضوان ويطلعة من المستشفى
-دتعال ياخي والله انت كارثة
ترة ميصير هيج رضوان يعني انت دتشوف امي گدامك شلون مريضة وظالة بحصرة تشوف اطفالك
وانت گاضيها وياهة كلة عناد لا انت الي اتزوجت على وجه مثل الاوادم ومخليها تفرح بيك مثل الخلك والعالم

زين بس اريد اعرف انت مو اتزوجت ليش مبلشت حياتك وية رونق اشو اشوفها خوش بنية وحبابة وحلوة وما عليها نقص
رضوان-يا اخي انتو شنو مصيبتكم يعني كل متزوجين وبينهم اسرار ومنو گلك اني ما اريد رونق بالعكس اريدها واريد اكون عائلة وياهة لكن الظروف الي دتمر بيها رونق صعبة عليها
فحبيت انطيها مجال حتى تتعودعلية
لكن تعال تحجي وية منو اشو امك قافلة عالبنية ومسودة عيشتها ورغم هذا كلة البنية ساكتة ومتحملة
ومحجت شي وصبرت على سوالف امك
بس يا اخي انتو متخلون الواحد يتنفس
ولا ياخذ راحتة بحياتة
رضا-والله يا اخي ما احسدك على موقفك وخطية هاي رونق انظلمت وياك
رضوان-لعد انة شكول والله زهكتني الوالدة
ما اعرف شسوي حتى ترضى وتسكت عني
رضا-ما عندك اي خيار غير ان تجاريهة وتسلم امرك لله وتقبل بتمارة بنت خالك
رضوان -انت صدك تحجي يعني لو ابقى بدون زواج لو من اجي اتزوج اطيح واتزوج اثنين هاي وين صايرة
رضا انتو تعرفون كلش زين انة اتخبل من حمل المسؤلية وما اريد اورط
واحد وياي ولوما الظروف الله وكيلك ما اتزوج
رضا-لعد هذا هو روح ادخل على امك وكمل عليها حتى بلكي تنجلط وتموت وانت ترتاح
يا اخي والله حيرتني
عمي صدك الله يساعد امي عليك

رونق
ورة ساعتين كنت نايمة وسمعت صوت باب الغرفة يندگ
باوعت عالساعة الساعة بالعشرة بالليل
كمت فتحت الباب وشفت هاجر تبجي
رونق بخوف
-شنو هاجر شكو شبيج
-رونق امي اتخربط واخذوها الولد للمستشفى كلة من ورة رضوان
وكعدت هاجر تحجي شنو صار من بعد ما صعدت فوگ
رونق
يعني شنو رضوان ميدري بالي سوتة امة
هاي شنو معقولة والله ياربي عجيبة هاي المرة
هاجر-رونق والله اموت اذا صار على امي شي
يعني هو رضوان الوحيد باخواني متعب امي وممريحها
هسة هو شدعوة عليه يعني هي مطلبت شي من عندة
كل الي رادتة يتزوج ويكون عائلة
اوكي اني وياه هو صحيح اتزوجج لكن يا اختي حياتكم
وزواجكم مو طبيعي وامي تشوف بعيونها وتنقهر ميصير هيج هو ابنها ودائما كانت تفتخر بي گدام النسوان بالمناسبات والاعراس وكانت منتظرة
عرس رضوان بفارغ الصبر حتى تفرح بي گدام الناس
وشوفت عينج ومن تزوج حتى مفرحت بي مثل العالم
رونق
هاجر تحجي واني ما اعرف ليش گلبي عصرني من ورة كلامها والله حيرة هاي وين جانتلي
حسيت على باب الغرفة انفتح ودخل رضوان ووجه مدخن مبين عليه متعارك
هاجر-هَـا رضوان بشرني امي شلونها
رضوان وبصوت تعبان
-زينة الحمد لله طلع ضغطها مرتفع
هاجر -شنو شكوت يرجعوها للبيت
-رضا كال بعد يكملون الفحوصات البقية ويطلعونها
-يالله لعد اخذ راحتك اني طالعة راح انتظرهم جوة
تصبح على خير
طلعت وسدت الباب وراهة وظليت اني لوحدي مع رضوان الي راح عالكنتور وفتحة ومحط عينة بعيني ابد ومن خلال حركاتة حسيت ان هو بحالة عصبية ويحتاج واحد يصب غضبه فوك راسه
كمزت من سمعت صوت باب الحمام شلون انسد حيل
يمة هذا هسة يدور على حجة
حتى يسوي مشكلة ويتعارك
واصلاً هو ميحتاج المشكلة هياته اني موجودة وكاعدة على السرير منتظرة رحمة الله شوكت تنزل علية
صرت مثل بلاع الموس لا اكدر اطلعة يجرحني ولا اكدر ابلعة وهم يجرحني بكلا الحالتين ميتة
ما اعرف شديصير بية
لا اگدر اسلمة نفسي برضاتي
ولا اكدر اشوفة يتزوج گدام عيني
ما اعرف يعني من اول يوم اتعرفت على رضوان حسسني ان اني وكرار نجي بالمرتبة الاولى بحياتة واهتمامة كلة النا يعني مدا اتخيل تجي وحدة وتشاركني برضوان وتاخذة مني اني وكرار

يعني هو هم من حقة يريد يعيش مع وحدة تحبة وتعاملة كزوج وتشاركة كلشي وتنطيه حقوقة اهوووو شنو احس كل كلمة تنغز بگلي اني شديصير بية
ربي فرجها علية واهديني للطريق الصحيح
حسيت عليه طلع من الحمام
رضوان -حضريلي ملابسي اريد التحق
اني بسرعة التفتت عليه بخوف شنو ليش
-شنو الليش عندي دوام ولازم التحق بالدورة يالله بسرعة بدون اسئلة رحمة على والديج البية كافيني

رونق-شنو رضوان منسيت شي تگولة الي قبل لتلتحق
رضوان -ميحتاج اكلج شي وانتي تعرفين كلشي
لاتعبين نفسج بالتفكير انتي ظلي عايشة بعالمج الخاص متقوقعة على نفسج

وابقي عايشة وية الماضي ومعليج برضوان وبالمصايب الي جاي تطيح فوگ راسه
-شتقصد
-تعرفين شنو اقصد كل الي ديصير بية كلة من وراج
لان انتي حضرتج مكلفتي نفسج وتحاولين تتقبلين حياتج وياي وظالة ببرجج العالي متتنازلين وكأن الحياة
عندج بس قصي
رونق -رضوان مالك حق تحاسبني على گلبي ترة هذا شي مو بيدي حتى اتحكم بي قصي يبقى بگلبي
رضوان -زين واني مكلتي هذا شنو دورة راح يكون
محاولتي وكلفتي نفسج حتى تتقربين مني
رونق -رضوان انت الك مكان بگلبي الله الشاهد احترمك واثق بيك
-اي كملي احترام ثقة وامان بس هاي المشاعرالي تكدرين تنطينياها لكن اني اريد اكثر من هيج
رونق
دنگت ومعرفت شنو اجاوبة ياناس والله صعبة علية
گلبي يتقبل غير قصي
رضوان -اشو سكتي ماعندج جواب مو
هذا هو خلاص لعد انتي ابقي انتي وكرار هنا معززة ومكرمة ومعليج بية بعد واوعدج بعد منا ورايح ما ازعجج
وحتى ما اضايقج
هم الوالدة ورطتني بخطوبة بنت خالي اتوقع انتي اول الفرحانين شي اكيد راح تتخلصين من حجر العثرة رضوان الي مضايقج بوجوده بحياتج
رونق
ما عندي كلمة غير مصدمة من هذا كلة
احس اكو مشاعر دخيلة على گلبي جديدة مدا اكدر اتعرف عليها شفتة بدل ملابسه
وحضرت جنطتة ما اريدة يسافر اختنك احس بالامان
بوجوده
راح على كرار وهو بسريره ودنگ عليه وباسه من راسه
اتمنى اجره وما اخليه يروح التفت علية واقترب مني
-يالله اني رايح رونق ديري بالج على كرار وامي ترة امي مريضة اتحملي كلامها
-لتخاف على كرار والوالدة اخليهم بعيوني بس انت انتبه على حالك ودير بالك وطمني
رضوان بعد ما خف عنة الغضب
-ان شاء الله مع السلامة
رونق بهمس -في امان الله

يتبع