خذ بيدي ولا تسألني الفصل الثالث 3 - بقلم نهى

خذ بيدي ولا تسألني
للكاتبة nuha-d-h

رونق
مرت ايام العزاء كانت اصعب ايام بحياتي
سوف اختصر لكم الموقف الحزين لكي لا اجلب لكم الاوجاع والاحزان لكن شما راح اوصف او احجي عن الي صار ما راح اوفي حقها
من كل الجوانب لان الموقف لم يخلو
من ام فاقدة ابنها وحيدها
وزوجة مفجوعة
واخت مكسورة الجناح
وطفل بعدة ملحگ على حنان ابوه
هذا كل ما استطيع ان ارويه لكم من الاحداث
رونق
لزمت العدة وماطلعت من البيت ابد رغم اني كنت حامل واحتاج اروح دكتورة تشرف على حالتي لكن
عمتي مرة مريضة لان من بعد وفاة قصي انتكست صحتها ومر على استشهاد قصي اربع اشهر
واني هسة حالياً حامل بشهري والعدة متخلص الا من اولد الطفل
واني هاي الايام الي مرت على البشر مرت علية مثل الجحيم صرت اكره ادخل لغرفتي
بعدني متهنيت بي ياربي فدوتك والله حتى بعدني عروسة احس روحي ذاك اليوم اتزوجت مصارلنا سنة ونص من اتزوجنا يارب رحمتك

وصارو البنات كل يوم هنة ورجالهم وجهالهم يجون بالبيت على ابو ان امهم خطية مريضة وياخذن بالهن منها واصلا هنة بوجودهن هنة وجهالهن وازواجهم مضرة مو نفع
وهنااااا تبداء معاناتي
يعني اكرب واطبخ وانظف وهنة المسعدات كاعدات مثل الصنم لايصيحن بجاهل ولا يساعدن
وتعاي يا رونق طبخيلهم الهن ولرجالهن وهمة ولا عندهم احساس يفترون بالبيت
سودة علية قصي اتذكرتة جانو ازواج خواتة ابد مايتجرئون ويعتبون باب الاستقبال يدخلون للبيت خطار ويطلعون منة خطار وجنت من يجن البنات يحترمني ويسولي حساب لان يخافن من اخوهن هسة لا
كل وحدة ظهرت على حقيقتها
وصارن يمدن اللسان وياي هالطولة
وعمتي ام قصي خطية ماعندها لاحول ولا قوة
واجيت اتخبل من سمعت سهير تريد تبني بالقاط الثاني
مشتمل وتجي تسكن عدنا هي ورجلها وجهالها
تگول ميصير البيت يبقى بلا رجال ورجلي اولى من الغريب يدير بالة علينا

يمة والله اتخبل
وظليت ابجي مقهورة وينك قصي تعال شوفً منو راح يصير بعدك ابو البيت استغفر الله
والله هضيمة بمكان السبع يتمرغل الواوي

اخ الله اريد اطك من القهر ادري ربي هاي وين جانتلي
والله اتخربطت بوقتها وهبط ضغطي
ورحت لعمتي وكتلها عمة بعد ما اكدر صحتي كلش مو زينة اخاف عالطفل خاف صار بي شي
ام قصي-صاحت على سهير حتى تاخذني للدكتورة
واشوفلك سهير كامت علية غلط وفشاير
هاي شبيهة اتسودنت
سهير -خل تولي يمة هاي عيارة تريد بس تتطلع
ودارت وجهة عليه
-شوفي ولج تگعدين بالبيت وتنجبين لانظلين كل ساعة تتدعلين وتتعايرين لاتنسين نفسج ترة انتي لازمة عدة
ادري بيج متعودة عالدياحة واخوي طلع عينج
رونق
بالله هاي شحجي وياهة جنها زلمة هو حتى رجلها يخاف منها
ادري بالله من تگول متعودة عالدياحة على شنو همزين حتى قصي خطية ابد مكان يطلعني لان عملة ماخذ كل وقته وبايام الاجازة من يجي خطية يكون تعبان واقوى طلعة يروح يزورني كربلة ونجف بس اني كانت هاي كلها مو بعيني ولايوم طالبت يطلعني او يونسني
اني اهم شي كان عندي قصي هو ونستي وهو فرحتي وهو عالمي كلة
والله ياعالم معذورة لان
من وعيت على الدنيا وبس هو بعيني وابد ما مشفت غيره هو شمعة صباي وشبابي الي انطفت من بعد موته اخ ياربي والله راح اموت من القهر والذل الي راوتني اياه سهير
لكن خلال هاي الايام الي فاتت
كان اكو واحد صديق قصي دائما اسمع قصي يسولف بي ويحجي عنة ودائما كان يعزمة عدنا بالبيت
اسمة رضوان
مرات من يحجي عنة قصي يگول الله ما انطاني اخو من امي وابوي لكن انطاني اخو دنيا وهذا رضوان ظلعي واخوي اني ابد ممنتبهة على رضوان غير ممرات المحة من شباك المطبخ من يدخل على بيتنا وكان ضخم وطويل كنت المح بالصدفة ظهرة وهو طالع
وفعلا كان هذا الشخص فعلاً اخو دنيا
كان اصغر من قصي بثلاث سنوات
وكان يسولفلي قصي شلون التقى وياه بالمدرسة وكان قصي مو شاطر وكان يرسب بكل صف سنتين يعيد ويتذكر شلون جانو يتعاركون وشلون واحد يفزع للثاني
وكان يحجيلي عن مواقفهم المضحكة ومغامراتهم سوية
وانتبهت ولا مرة قصي حجالي عن موقف بحياتة اذا ماكان رضوان حاضر وياه بنفس الموقف
يعني ابد متخلى ذكرياتة من وجود رضوان
وفعلاً كان رضوان نعم الاخ والصديق ابد ما تركنا. وكان متكفل بكلشي بالبيت وبالمصرف والله خطية حتى المسواك هو يجيبة النا
بس بهاي السالفة ست سهير ابد متفتح حلكها
ما دام بيهة فلوس هذا هو تسكت وتصير انعم من السمسم
اوف يابة
لكن سهير صارت يوم عن يوم تخنكني بضغطها علية والله اريد اموت
اتذكر مرة من المرات گعدت مصخنة وفلاونزة وتعبانة
وسهير جانت گاعدة هي وعمتي ام قصي يتريگون

اشو هاي هدت علية بالغلط جنها جلب مسعور
شنو ولج كمتي تحطين مكياج يافالحة

والله فاجئتني بكلامها
رونق-منو اني دتحجين وياي
-اي وياج انتي اكو وحدة غيرج تارسة وجهج مكياج وردي خدود وحاطة حمرة

بالله هاي شحجي وياهة هاي صدگ مريضة
رونق-شبيج سهير گاعدة من الصبح هاجمة علية
شكو ياستار سامعة شي اني بيا حال واگعد احط مكياج ولج خافي ربج بية
يعني اني فوك مصيبتي وكسرتي انتي فوك راسي ومطلعة عيوني بمشاكلج
يمة اني حجيت هيج لو وكلتني تبن اكلتني بكشوري باللسان والعد والصف
رونق-يابة دروحي والله خبلتيني
يمة وهي اتخبلت ركضت علية وخرمشتني
اني لزمت خدي وصكيت بمكاني
اني مو جبانة ولا اخاف بس اني خفت ابني وهاي رعنة متخاف علية وتگول هاي حامل وهذا الي بطنها ابن اخوي ابد
بس مستغربة سهير ابد مجانت هيج وياي
جانت خوش بنية وحتى مرات جنا نطلع سوية للسوك وتاخذني تشتريلي ملابس وغراض بعد ما قصي يطلب منها تطلع وياي للسوك
يعني جانت طبيعية شبيها انگلبت علية فد گلبة يعني معقولة جان اخوها هو الي شاكمها وبينت على حقيقتها

وليش ما يجي اليوم واكتشف سبب انقلاب سهير علية
بمرة من المرات اني جنت انظف
الطارمة وكان شباك الهول مفتوح واسمع سهير تحجي وية رشا وتكللها
سهير-لا خية بدلت رائي ما راح اگعد وية بيت اهلي
حتى لو عيالي مسودين عيشتي ميخالف اتحمل والله واذا كلش اضطر الامر وما اتحملت اخذ حصتي من بيت ابوية وابيعها واطلع اعزل من بيت عيالي

رشا-يا ليش متگعدين عند اهلي حرامات يصفة البيت لهاي
سهير-لا خية هذا رجلي سمعتة يحجي وية العگربة امة بيوم الي اتعاركت اني وياه
سمعتة يكللهة خطبيلي رونق مرت المرحوم قصي اريد اتزوجها بعد ما اتحمل هاي يقصد علية
يمة اثاري النذل حاط عينة على هاي المايعة
رشا تضرب على وجها -يا عزة بعينة هذا شنو رجلج شكد سگط اشوفة كل يوم هنا متلحلح عند بيت اهلي
اثاري علمود الخاتون حاط عينة عليها ولج خايبة مو بعيد متفق هو وياهة حتى يتزوجها من تخلص العدة
سهير-يمة عزة بعينها والله افكس عيونها اذا دريت بيها هيج مسوية اسود عيشتها والله اموتها بثنين ادية ولا يرفلي جفن

وبوكتها عرفت سبب خبال سهير
والله لو رجلها يبقى اخر شخص ما اتزوجه شجاب هذا التافه على قصي يمة من يروح الف فدوة لتراب رجلين قصي
هذا لو ابيعة بسوگ الزلم ما يجيب فردة نعال
لان ناقص وماعندة شرف وغيرة الي يباوع لعرض اهله ومايسوى فلس وكفر ينحسب على الرياجيل
اخ الله
رحت لغرفتي وطلعت القميص الوحيد الباقي من اثر المرحوم لان سهير ورشا اخذو ملابس قصي كلهم وگالو مايصلح يبقن مو زين على المرحوم خلي ننطيهن صدقة بثواب روحة

لزمت القميص وگعدت اشم بي واجر النفس واشهگ من البجي
وينك ياقصي تعالي شوف وردتك شلون ذبلت ومحد سگاهة وعطف عليه ورحم بحالها
صرت بخلافك احس باليتم عمري كلة ما حسيت بروحي يتيمة وما عندي اهل لكن فراگك علمني اليتم وحسيت بطعم اليتم من انهان وانت مو يمي وتدافع عني
من الي بخلاف عينك عفو عليك قصي شلون انطاك گلبك تتركني لوحدي جا مكلت هاي وين تروح وتنطي وجها عگبي
صرت ابجي والعبرة خانگتني
واخذتلها ست سهير كلما تشوفي ورجلها عدنا بالبيت تصيحلي الفگر
سهير-هَـا يالفگر طيرتي اخوي وموتي
رونق وبحيل مهدود من الحزن
-ليش تحجين هيج ترة قصي راح شهيد وربي كاتبلة يستشهد وهو شاب اني شنو دخلي بموتة
-لا حبية انتي جرفتج فگر على اخوي
افتهمت بعدين ان رجلها بالبيت وتريد تسمعة حتى يبطل من عندي
سمعت عمتي ام قصي وصارت حالتها كلش تعبانة ومبيهة حيل حتى تحجي
ام قصي وبصوت ضعيف
-ولج سهير عوفي البنية بحالها ترة هي البيهة كافيهة
ترة ماناقصتج هالمگرودة
ورة كم يوم جنت بالمطبخ اطبخ وشف سهير دخلت لغرفتي
ما اهتميت لان متعودة عليهن من بعد وفاة قصي صارن ميحترمن خصوصيتي ابد ولايگولن هاي غرفت اخونا
والله ورة شوية شفتها طلعت من عندها محملة جنطة
رحت ركضت عليها
-شنو سهير هاي شنو الجنطة شتسوين ماخذتها
-حبيبتي هاي وحدة فقيرة جارتنا راح تتزوج وماعندها
فلوس حتى تجهز نفسها فاني گلتلها جهازج علية
فهسة اني اخذت هدومج وملابسج الملونة وسيتات النوم والمكياج راح اخذهم الهة گلت ليش حرامات هيج يظلن محد مستخدمهن وانتي متحتاجيهن فگلت خلي غيرج يستفاد وكسبي ثواب بها
والله بيومها احس گلبي اندليت مكانه وصار بيدي من القهر
ظليت اصيح واصرخ واعيط وابجي وانهاريت
وهي السانها يكنس ويرش بالغلط عبالك رشاشة

رونق-والله متاخذيهم الا على جثتي
سهير-هَـا ولج شنو ناية تنزعين الاسود وتتمكيجين حبوبة
المن
رونق-مو بكيفج تاخذيهم مو شرط استخدمهم
هذني مالاتي والله حتى بعدني نصهم ممستخدمتهم
والله واشوفهة ولا دارتلي بال
اخذت والجنطة وراحت واني ركضت وراهة نسيت روحي حامل من القهر
وكعدت اجر الجنطة منها
-والله متاخذيهم والقران احرك البيت على راسج ولج شنو انتي متخافين الله
-عفوي ولج تركي الجنطة لا اهطرج بيها واخليج تولدين بساعتج

من شفت سهير رادت تاخذ ملابس واشيائي العزيزة على گلبي اتخبلت وظليت ابجي من القهر هاي ليش دتسوي هيج بية

رونق-ليش ولج سهير تدرين كلش زين مابگلبي شي غير احتفظ بيهن همة الذكرى الي بقتلي من المرحوم ليش ولج مو الله على الظالم لتصيرين ظالمة خافي ربج
وهم ما اقتنعت تترك الجنطة اخر شي شفت بالطرمة
الماسحة والله من حلات البروحي واحس بيهة راح تاخذ شي عزيز علية والله لزمت العودة وهي جانت دايرة تريد تتطلع بالجنطة رحت ركض عليها وعلى راسهة بالعصة
مالت الماسحة
يمة وهي دارت علية شلون الوحش والله وهدت علية
وزلمتني من شعري واني صرخت بعالي صوتي بحيت اجت عمتي كوة تمشي واجت رشا اتفكني
رشا-شبيج سهير اتخبلتي ولج البنية حامل تركيهة عنج لاتروح تطلك ويموت الطفل
بعدها رشا بيها مابيهة دفعت سهير حيل عني ووكعت بالگاع
ام قصي -شوفي ولج سهير هسة تلمين هدومج وتطلعين
من البيت سامعة ساعة وحدة متظلين بعد
سهير-والله ما اطلع من هذا البيت ومحد يكدر يطلعني هذا بيت ابوي والي حق بي
التفتت علية
بسيطة ولج اني الج ولج اني امي تطردني من البيت علمودج انتي جا لعد دصبريلي

يتبع