رواية خذ بيدي الفصل السادس عشر 16 - بقلم زهراء العراقيه

زهراء العراقية

الصبح بس اضرب بسامير  من راح حسن للشغل وانه متحمله وساكته انوب اشعدكم اسبحون الفجر ماتستحون !!! من اني يمكم استحوا على دمكم  ..ضليت صافنه حتى على هاي تحاسب هسة الا عرفت ليش تهاني ما عمرت يمهم ثالث شهر من زواجها طلعت بحسن بالايجارات

  البنات كلهن بالدوام .. بس انه وعمتي وشموسه تلعب بالمكعبات حسن گال لا اتعبين نفسچ بعد اني اشتري خبز ...وعمتي ماتدري كلساع
- يلا اشوكت اتخبزين
وانه مغلسه ..  انفتحت الباب ودخلت تهاني.ومحملة علاليگ ..
اتبسمرت المرة بمكانها من شافت عمتي
وجها انگلب  .. سملت بثگل وشمرت عليه علاگه
- هاي لشمس مو الچ

فتحتها طلع نفنوف .. اضاهر مخيطه الها ويه بناتها يم خياطتها
تلگتها شمس
- يمةةة هاي بيبي الوحش يمنا
هي گالت هيچ لو تهاني ضحكت بصوت رغم ثگلها ووقارها وباوعت لعمتي الي تطحل تطحل

باوعت الي
-ونعم التربيه اهديوة
ضحكت قابل انه شعلية
صحيح شمس اصيح لتهاني يمه اتغار من خواتها والي ماما
شمس
-شنو جبتي الي ....
- ثوب ذاك روحي گدريه خاف جبير
لبتسه الها چان لونه احمر ومنفش من جوة ..
عمتي
-يا مال معدان احمر
انه ضجت خاف صدگ مال معدان
تهاني
- ليش الاحمر يعني لان  لون ضاحك عاد هي طفلة ومن حقها شتگولين على العجايز اليلبسن ازرك مطبش
نترت عمتي
- شتقصدين ولچ
- ما اقصد شي عيني قابل انتي لابسة ازرگ
عمتي چانت لابسه تكروازي مطبش !!
تهاني
-شنو حضرتي غده 
- گال حسن هو يجيب سمچ شوي
- ها خوش همزين لعد اجيت اليوم
عمتي
-  ھھ شنو ما تاكليه عند اهلچ ...لو هم مثل هدى كاتلكم الجوع
انه خرب حزت بنفسي ياربي انه اتنسى واشم بريحه التفاحه مو ماشايفه حسن ملى الي عيني بكلشي

تهاني ابتسمت
- ليش عيني  ما ناكل سمچ شنو ما شايفين الحمد لله  ابوي چان صياد وصاحب كار
اروح اغير ملابسي

راحت تهاني وعمتي ضلت اتگص بيها ....

رجعت بعد ما غيرت
- هدى شو ما عاجنه

عمتي مطت بشفته
-فاهية
- حسن گال يجيب النا خبز وياه
عمتي
-ياااا هذا مابي بركه صدگ تحچين
تهاني
-  ليش عووود

- مو انه يمكن حامل  . وماقبل اخبز

تهاني انشدهت .. و عمتي
-يبووووووووو الرجال كبر لا اجيبن بنات واشمرن عليه

سكتت انه
من گمت للمطبخ ابچي ..اجتني تهاني
- الا تحجين گدامها ....لا تبچين يلا اذا تاخذين على كلامها اتخسرين
كالتها من ورة خشمها وراحت ..اجه حسن ...وحاط السمك بكراتين .. اخذته منة تهاني وراحت للمطبخ هو گعد بالهول يم امه
- اشمالك البارحه ما اجيت نمت يمي
لو  المسعده ما خلتک
- يا يمة اشبيچ وياها والله هدى من اهل الله وتحبچ
فرحت من دافعلي .. عوجت حلگها ما عاجبها الكلام
ركضت شمس لابوها بثوبها الاحمر
-هاي شنو شموووسة اشعين
-ههههه امي جابته الي ....
عقچت حواجبها وكملت شموسة
- بث بيبي اتگول مال معدان
برطمت شموسه وهي تلعب بأزرار قميص ابوها وهو يباوع الها بكل اصغاء
- بس تهاني گالت الي بيبيتچ معيدية هههههه يعني شنو معدان
عمتي صارت حمرة واتباوع حسن الي شبه ابتسامه بانت على وجهة من برائة بته
-شفت مرتك شتعلم الطفلة .... تهاااني ام السحورة تعاااااي
اجت تهاني وبيدها راس بصل
- شكو عمه منو ام السحورة لو صدگ اني ادور سحورة ما ضليتي عايشه لهسة  !!!
حسن خزر تهاني ...عدلت من وگفتها
- رايده شي عمه
گوة گالتها

عمتي
- ليش اتگولين للطفله اني من المعدان
- ياااا هههههههه طفلة تاخذين بكلامها
گالتها ببرود ريحت گلبي وراحت اااخ تهاني ولا تخاف

..
واني نايمه احس باحد يخنگ بيه ...اريد ابعده ما اگدر .....
احس بحسن يصيحني  .اشوية خفت الخنگه
گعدت مفزوعه وحسن حاط ايده تحت راسي ويصحي بيه
- اشبيچ هداوي
-اااخ احس احد يخنك بيه ....حسن
تعاي يروح حسن هم رجعنا للمعانا والله يعز عليه تعبج هذا ... 
عدى ثاني  شهر الي واني بس اكوبس ..  لبسوني كومه احروزة حتى اگدر انام من غير ما اشوف قطط تخنك بيه لو خفافيش تخرمش ضهري .. وحسن دوم يقرة عليية اشويه ارتاح واگدر انام  ...بس يعوفني ما ارتاح بنومي ..لهذا دومي نايمه بحظنه وانه متوضيه ......

گاعده على السرير اريد اگوم بس حسن گاعد خلفي ولازمني حيل بأديه محاوطني
-حباب بروح جدك خليني اگوم ...
باسني من خدي
- ماكو گومه حاولي اسيطرين على نفسچ . كافي هاي المرة السادسة اتغسلين وجهچ ..
ماتعبتي
- انه ما غسلت عدل حباب
- ماكو ..
وشوش بأذني سالفة ضحكتني
- ههههههه كافي حسن
ضل يوشوش بيه بسوالفه ...وانه نسيت شريد اسوي . سحبني وطرحني وغطاني ...
كوع ايده على الفراش ثانيها وساند عليه خده اليمين 
ويسولف الي سوالف اهل قبل .  منا من نعست على حسة الدافي ونمت ...
.......
بيوم خفت حيل من بلغني حسن بروحته لكربلاء  چانت الزيارة الاربعينية وهو ما مصدگ رجعت الناس تمشي من غير ما تتختل خوفا من النظام السابق. من سقط لحد اليوم حسن ما يضيع زيارة .   يروح لهناك قبل الزيارة ب15 يوم عدهم موكب اهناك على طريق كرربلاء يخدمون الزوار ....  
امن النا كلشي وراد يروح بناته يمشن خلفة كأنه رايح
لمكان وما راجع ...بوسهن وحده وحده ... وصل لشمس ماتقبل اتهده لازگه بيه واتبوس بخده
- لا تلوح بابا
باس ايده البيضه ونزلها
- دربالكم عليها .   لا ازعلوها
وصه خواتها عليها .. وصل لعندي ...كنا مسطرات بالهول ..وتهاني واگفه يم الباب الهول خلفنا و عاقده اديها ببعض ....
بطرف اصابيعه لاشاني بحنكي وضحك
-اشبيچ انتي راح تبچين ....راجع كلها كم يوم .. اذا تخافين نامي يم البنات او جيبيهن يمچ . ولا تنسين صلاتچ بوقتها ........ و لا اگعدين وحدچ.... لا ادخلين للحمام بالليل .  بالتواليت انزعي الحروزة حرام تدخل وياچ ...  شمس دربالچ عليها وعلى نفسچ
اكثر وحده وصاني اني .... راد يروح ولمح تهاني ...توقف ورجع الها ......
كأن يحادثها بعيونه .....حسيت اكو عتاب بينهم
هو على خداعها اله وقتلها لبتهم وهي على سنين الهجران ...
انتهى حوار عيونهم ببوسة على جبين تهاني ..
تهاني
-مودع ومحروس من كل شر ..انه وشمس ضلينا نبچي عليه من راح
خزرتني تهاني
- لا اضلين تتبچبچين بچيتي الطفله وياچ
عافتني وراحت تشتغل الا انه ....مااگدر اتخيل اليوم انام وحدي ...
احظن شمووسة حيل وانام وفطومه هم اجت يمي اتنام احسهن لأن  علويات يحمني من كل شر ..انه اعرف الجنون هسة اتحوم حولي اشوفهم  بأحلامي يباوعون الي من بعيد لبعيد .... بس اكو شي بيني وبينهم مايگدرون يتقربون  ما اعرف ليش انه بذاك الوقت ابد ما اعترف انه صلاتي  وطهارتي هي الي تحميني منهم بسبب الوسواس القهري الي يلازمني طوال فترة حملي من اقطع علاجي النفسي ادمر ولا اگدر اخذه يشوه ويقتل الطفل بيه مواد مخدرة تريح الاعصاب .... اظل احس اكو خطأ بالايات واعيد وازيد بالصلاة والوضوء يمكن ساعه اعيد ومن اصلي ما اعترف بداخلي ان صلاتي وصلت ! وكنت اظن ان حسن فقط هو من حاميني منهم .. هسة راح الي يحميني .. اريد انام ما اگدر گاعده بوسط البنات الي نايمات وبس ادمع ... 
ياريت ما حبلت ولا ارجع للمعاناة .. گمت من افراشي ...گلت خل اتوضه انه ما توضيت عدل ...
وگفت يم السنگ وايديه راحن من الغسل .. كرهت نفسي ..تلفت اعصابي نص الليل انه احتاج للنوم ومدا اگدر انام ... اكثر من مرة اطلع واطب واعيد الوضوء وبداخلي مو صحيح ...اخر شي وگفت يم باب غرفتي كارهه نفسي وكارهه عيشتي وكارهه حسن هم ... ليش يعوفني ويدري ما اگدر اعيش بلياه ..
صحت
- انعل حسن وانعل ابو حسن والله ياخذني ويريحني ينعل ................ كفرت !! وسبيت
بصوت عالي بنص الليل
طلعت تهاني تفرك بعيونها
والبنات الكبار هم مخترعين
باوعت الهم بحقد لأن نايمين رغد وانه بس اعاني
تهاني
- اشبيج هدى تخبلتي ...استغفر الله ليش اكفرين .!

- ما عليچ انتي شهامچ نايمه وانه راح اموت ... يومين ما ضگت طعم النوم ولكم ارحموني ...
عذراء
- هداوي   ليش ما اتنامين
صحت وانه حاطه اديه على راسي
- ما اگدر راسي راح ينفجر .. حسن ما يرد وانه راح اموت بدونه
نفخت بحگلها هوى تهاني
- روحي نامي وبلا مبالغه. ولا تبغجين نص الليل اتخرعين الجهال ....

عذراء لزمتني من ضهري
- تعاي نامي يمي بالفراش .... انت اول اشهر حملچ حيل تتخربطين اني اقرالچ ...
واخيرا غفيت من اخذتني عذراء .... بس شنو لازكه نفسي بيها ... 

شفت بالحلم .. حمار من فوك  ومن جوة رجلين بشر يمشي وشايل بيده شموسه اصارخ بيده وهو يباوع الي وفاتح حلگه ....وابو گرون يحزف خلفه الي ويطلع صوت مربك وعالي مثل نعيق الغراب على اعلى ...
گعدت من النوم اصيح
- شمممممس
گعدت عذراء مخترعه وكل الي بالغرفه گعدن على صوتي
انه رحت لغرفتي شفت شموسه نايمة بعدها يم اختها .. غطيتها وانه ابچي ....سمعت صوت الأذان ..رحت للمغسلة خاوية توضيت مرة وحده ..واجت تهاني توخصرت الي اتريد تتوضة
فرحت ماعدت وانه شاكه بوضوئي ما گدرت اصلي لأن احسب نفسي ما متوضية ... .....ضليت ايام انه على هاي المعاناة منا من مليت وتعبت ....گمت ما اروح اصلي يأذن اسد اذني حتى ما اسمع ... 

وكل ما انام اشوف شمس تموت بطريقة شكل ...نبت بعقلي انها راح تتأذى ...صرت للحديقه اوهوس ما اخليها تطلع حتى لو تبچي اضربها ولا اطلعها  !!!

كلساع ويجي ببالي منظر رقيه بدمها .. هي چانت من عمرها من ماتت ...تعبت تهاني صارت تكره تصرفاتي ....

نتصل على حسن چان ما يجاوب اخر شي جهازه صار مغلق ....هو بأخر خمس ايام يعوف الموكب ويسكن يم جده ابا عبدالله ...يمكن من حقه يمارس عاداته لكن انه هم من حقي يضل يمي بهاي
الضروف .......

كالعاده احاول انام وما اگدر ....اكو قلق براسي اذا انام تموت بتي حاطته يمي وهي مبرطمه وتشاهك هي ونايمه لان ضربتها قبل لا تنام ..  اباوع للسگف لا يوگع عليها   فكرت احطها جوة الجرباية .احميها من السگف ...لو بنص الكنتور !! اااه تعبت .... حسيت بالحايط ينفتح نصين   !!! وطلعت منه گرون  جوزية ....اريد اسمي حسي راح ...گمت ارجف و دمي نشف ..   بس اعيوني تتحرك ...اباوع لبتي  نايمه  ...
اديه كل اصبع اشطوله من غير جلد عظام يخوفن محدب ويتقرب مني ...... بس ما اجه عليه اعيونه زاغت على بتي .....والتاف عليها ..... حسيت السرير يهتز ....اثاري القزم هم طلع من جوة الگاع .... ملطخ بالدم ...... ضليت اباوع اله واعيوني مذهولة برجعتهم ....التفت على ابو گرون ....ماهو گدامي ..  جسمي كزبر من شفته مقرفص يم بتي هي بصفي بس اريد احرك ايدي احميها ما ااااااگدر ..... عاجزة عنها يريد يحط ايده عليه ويتراجع كان اكو شي يمنعه تاليها مل ... ابسرعه الريح صار گدامي انه وصفقك بأديه كدام اعيوني انطبگن اجفوني غصبا عني وچان اشوف طيف سريع بتي مدماية جوة الجربايه مالتي ..... اغمى عليه  ...
گعدت الصبح مفزوعه ....شمس مو يمي ..صحت بعلو حسي
- شممممممس
شمممس يمه وينچ ...
اجتني تركض ثوبها كله جاي
- هااا
ركضت عليها احظن وابوس بيها ..عبالي خذاها ابو گرون وياه ...  رجعت شمس تتريك يم خواتها ...وانه روحي شاحبة گعدت ابچي على چربايتي ... اجتني عذراء ....اتريد اتروح للدوام .. 
- گالت راح تسأل عن طبيب زين ليش ما ناخذج جلسات علاج نفسي هزيت براسي موافقه ...
...
عدم النوم  وكثرة التفكير والتصويرات الي تجيني بمخيلتي خلت نفسيتي تتأزم اكثر بس اصيح وانتر ...حتى على تهاني بس تحچي وياي كلمه اعيط عليها  صارت تكرهني مدري تجنبني  ...
رجع ذاك الصوت يوسوس وينخر بعقلي بأفكارة الشيطانية ......... بليلة اربعين امام الحسين .  شفت تهاني اسوي أعمال  وتقرة ...والبنات هم ..شموسه واگفه وياهن اتقلدهن بالصلاة .. انه ما طايقه الماي اصلا گعدت بغرفتي انتظرهن يخلصن حتى اخذ شمس انيمها باوعت للساعه تقريبا 9 ...يا ترى حسن شنو يسوي هسة ؟ چنت حيل حاقده عليه ... عافني ولا سأل عن حالي حتى لو بتلفون صغير ويه هذا تفكيري دگ تلفوني .....

رقم غريب كأنه گلبي علمني رديت ابسرعه
اجاني حسة
- السلام عليكم ..
- وعليكم  السلام وينك حسن !
- يا مهجة حسن ام شمس اشخبارچ
چانت هوسة يمه بالگوة يوصلني كلامه
يحجي وماوافهم اخر شي گال.
- انطيني تهاني
طلعت من الغرفه شمرت التلفون عليها
- هذا حسن ..
ضليت واكفه انتظر تنطيتي  تلفوني
تهاني
-  هااااا ابو شروق تسمعني ....الوووو اشلونك تقبل الله
چانت اصيح علمود يسمعها
- عظم الله لك الاجر سيد ... 
والله البنات مشتاقات الك
هو هذا تعبيرها عن شوقها هي بس ابد ماتجي بوضوح للشخص
-ليش ما نحصلك
هااااااا
اي والله هدى زينه ..

سحبت التلفون منها طالعه روحي
- لا چذابه انه مو زينه شايفه المر
صحت بعلو صوتي اظنه سمعني ..غلقت الخط ورحت لغرفتي ابچي
تهاني اجت خلفي هي وچادرها
- ولج اشبيچ عطتي هسة شيگول علينا كاتليچ..؟
حتى مافهمت اشلون تلفونه مبيوگ مدري ضايع ضال من غير اتصال ويانه سوده عليه
نترت بيها
- ما يجي لعد ... !!!
پ
هزت بأيدها وراحت
ورة شويه گمت اجيب شمس لگيتها نايمه بالهول والبنات يقرن الزيارة ... اخذتها ونيمتها على چربايتي

بستها ياربي لا تشوفني مكروه بيها ...
ردت اغفى وحسيت بصوت يدوي ..فزيت مخترعه وچان اشوف القزم نايم على شمس تخبلت يباوع الي ويضحك ... گدرت اگوم هالمرة ما جمدت مدري هو متعمد ما خشب اعضاي بس الساني انعگد ....اريد ابعده ما اگدر الزمه وگام لطع بلسانه بيها ....يا ويلاه گدر يتقرب منها ..... ركضت للمطبخ

جبت سكينه وانه بقمه انهياري ناسيه تماما هو قتله مو بالسكين بشي ثاني .. لكن بعد الانسان من يفقد عقله مايعرف الصواب ...  جبت اكبر سكين حاد .... ودخلت لغرفتي ... ردت اذبحه من نحره واخلص منه من شفته يلطع بنحر بتي گلت هو هذا راح يكتلها ويذبها جوة الچرباية مثل راواني ابو گرون

رفعت السكين ووجهته على بتي ونزلته عليها !!!!!!!!!!!!!!!!!

يتبع الى الغد