رواية خيِّال ومُهرة الفصل العشرون 20 - بقلم amna

«بسم الله الرحمن الرحيم»
«خـيَّـال و مُـهـره»
«آمـنـه عـادل»
========
«لا تنسون التصويت آغاتاتي»

«اللهم صلِّ على محمد وآلِ محمد»

ــــــــــــــــــــــ
چا هيچ ما تلتفت !
لو ماشي بالمگبره هم خوفك يديرك ..

♡ـــــــــــــــــــــــ ♡

«روسلينا»

مر اسبوع اني اداوم والشغل كلش هوواي طلعنه اني وعلي مرتين و باقي الايام ارجع كلش تعبانه واعتذر منه..

گعدت من النوم لبست قميص ابيض وبنطرون جينز وكوت وحجاب ابيض وحذاء كعب و حطيت شويه مكياج ادري اليوم الجلسه مالت التصوير ويه علي اخذت جنطتي وطلعت اشتريت گهوة والـ علي چاي وتمشيت للشركه..

دخلت الموقع التصوير علي بغرفة التبديل رحت دگيت الباب..

ــ تفضل..

دخلت چان يدگم بالقميص اول ما شافني فتح اديه وگال..

ــ هلا بالغرام..
رحت يمه ايد بيها قهوة والثانيه شاي..

ــ دير بالك لا تحترگ..

فتحت اديه ورحت يمه وهو لزمني من خصري وضمني اله..

ــ جايبتلي گهوة؟

ــ لا چاي ادري بيك متحب القهوة..

ابتسم وحاوط وجهي بـ أديه وباسني من خدي واخذ الچاي مني حطيت الگهوة على الميز وكملت دگم القميص وهو يشرب بالچاي ومبتسم...

ــ شوكت نتزوج علمود يوميا دگمين القميص..

ــ هههههه... شنو متزوجني علمود القميص؟؟

ــ لا متزوجچ علمود شغلات ثانيه اساسيه القميص شي ثانوي...

ــ شنوه الاساسي؟؟

ــ من نرجع للشقه اگلچ..

ــ علييي... بطل هاي سوالفك..

ــ غير انتِ سئلتيني وجاوبتچ..

ــ يلا.... كمل لبس وامشي نصور..

ــ خلي اكمل الشاي.. جيبي هاي الستره الوراچ لبسينياها حتى اروح يسوون شعري..

رحت جبتها اله لزمتها وهو دخل اديه بيها وسد الدگمه..

باوعت عليه مبتسمه..

ــ هاا؟؟ لا تباوعين هيچ.

ــ شبيك علي؟؟
شلون باوعت اريد اشوفها طالعه حلوه لو لا..

شرب من الشاي وحطه على الميز واجه تقرب يمي حاوطني بـ أديه ورفعني من الگاع باسني وگال..

ــ وشنو طلعت حلو لا؟

ــ يعني...

ــ خلي انزعها لعد..

ــ لا حلووات اتشاقه..

ــ اممم..

رجع باسني ونسينه نفسنا احنه بغرفة تغيير الملابس اندگ الباب نزلني بسرعه بقيت ارتب بنفسي وهو راح فتح الباب وحچه گاله الولد تعال انسوي شعرك..

ــ هسه اجيت...

سد الباب ورجع يمي..

ــ بردت گهوتي من وراك..

ــ لازم من تاخذين شي تستغنين عن الثاني..

ــ عليي ترى والله اكره هذا الحچي..

ــ ليش اني شنو حچيت؟؟

ــ ما حچيت شي ابد...
مشي خلي نروح...

ضحك و اخذت كوب الگهوة وطلعنه رحت للكاميرا نظفت العدسه وثبتت الكاميرا..

واجه علي وگف وانصدمت من اجت بنيه وراه لابسه نفس سترة علي والبنطرون والستره بس بدون اي شي جواها وفاتحه شعرها وتسولف ويه علي وتضحك بصوت عالي بقيت صافنه بعدين انتبهت على نفسي من شفت علي يباوع عليه..

وگفو بالمكان المحدد اخذت صور وهي لازگه بـ علي و حركاتها ابد مو حلووه نرفزتني كلش..

راح علي بدل وهي همين اجت من غرفة التبديل گالت..

ــ علي وين؟

رد عليها واحد من الموجودين..

ــ بغرفة تبديل الملابس...

شو هاي راحت للغرفه وسدت الباب وراها واني گام
دمي يغلي من الحرگه گمت اروح منا واجي منا ما اگدر
اروح للغرفه لان كلها واگفه وكل شويه واحد يسئلنه على شي..

طلع علي قبلها واني حتى ما اباوع عليه كلش ضجت كملت جلسة التصوير قبل ميخلص الشغل طلعت من الشركه و حركاتي ممسيطره عليها من العصبيه ساعه اصفن و اتذكر شسوت يمه بالغرفه واضرب رجلي بالگاع ساعه اكل بـ اضافري..

تمشيت للشقه مالتي وانتهبت موبايلي يدگ طلعته من الجنطه لگيته علي يتصل سويته صامت ورجعته بالجنطه..

دخلت للشقه رحت گبل للحمام سبحت لفيت شعري بالمنشفه ولبست البرنص و طلعت للمطبخ اريد اسوي شي اكله طلعت قطع دجاج و سويت وياهم خضار وحطيتهن بالفرن..

وخرت المنشفه من شعري جاي انشف بيه واندگ الباب رحت باوعت بالعين السحريه شفته علي..

اخذت موبايلي واتصلت عليه جاوبني بسرعه..

ــ شتريد ليش اجيت؟

ــ شبيچ روسلينا ردت اشوفچ ليش طلعتي بسرعه هيچ حتى ما شفتچ؟

ــ ملتهي بـ ريتا وما شفتني..

ــ يااا ريتا هاي شبيچ؟ فتحي الباب..

ــ راح افتحه واروح للغرفه انتظر شويه يلا تدخل..

ــ ليش؟

ــ اريد ابدل لابسه برنص هسه طلعت من الحمام..

ــ يلا خوش..

رحت فتحت وجاي اركض للغرفه دخل لزم ايدي وسحبني باوعت عليه مصدومه..

ــ مو گتلك لا تدخل؟؟

ــ اي گلتيلي بس اني ما اريد..

ــ هو اني ثوله المن فتحتلك الباب لو عايفتك بره احسن..

ضحك بصوت عالي واني اباوع عليه بطرف عيني..

ــ بلا عوف ايدي..

مشه وهو لازم ايدي گعد على القنفه وگعدني على رجله..

ــ خلي ابدل واجي..

حچه بجديه..
ــ شبيچ ليش ضجتي؟

استحيت اكله ليش ضجت
ــ ما ضجت تعبت ورجعت للبيت..

ــ منو اسئله عليچ يگول طلعت ضايجه..
ومن اجيت تأكدت صدگ ضايجه چنتي..

دنگت راسي العب بـ اصابعي وحجيت..

ــ ما ضايجه...

ــ ضجتي من العارضه؟؟

رفعت راسي باوعت عليه وگلت لازم اكون صريحه وياه من البدايه حتى يفهمني و يعرف اني من شنو اضوج...

ــ اي كلش ضجت..
وحركاتها وياك مو حلوه..
ودخلت للغرفه يمك وانت تبدل..
كلش ضجت..

ــ تغارين؟؟ حچه وهو حابس ضحكته.

ــ اي... عيب اغار؟

ــ لا مو عيب بس صدمتيني..

ــ لا تنصدم ترى اني بشر عادي..

ــ هههههه.. شتدرين بيه اشوف غيرچ؟
اني چنت بوسط هذن العارضات وكلهن زباله اخلاقهن چنت اگدر اسوي علاقه وياهن بدون زواج واتونس واعوفهن..
بس اني مو هيچ ابد..
من اول ما شفتچ لفتي نظري..
ما ختلطتي وياهم مثل البقيه..
ما يوم شفتچ تضحكين ويه ولد..
حبيت كل تصرفاتچ وتعاملچ ويه الناس
حبيت هدوئچ و ردات فعلچ واسلوبچ..
كلشي بيچ..
اختاريتچ ومستحيل تجي وحده بعدچ..

ــ اني اثق بيك..
بس هي مو حلوات حركاتها..

ــ اني اگول نگللهم احنه مرتبطين احسن..

ــ اي..

ــ يلا لعد اتفقنا وبعد لا تضوجين من موضوع قبل ما تسولفين وياي وتفتهمين..

هزيت راسي موافقه و گمت اريد اروح للغرف حاوط
خصري بـ اديه..

ــ علي خلي ابدل واشوف الفرن الاكل راح يحترگ..

ــ بس شويه... لزم الحزام مالت البرنص اجه يجرها واني لا أرادياً ضربت ايده حيل...

ــ اخخخخخ... شمالچ؟

ركضت للغرفه مستحيه وهو يضحك بصوت عالي..

بدلت وطلعت صبيتلنه غدا اكلنه بقى شويه وطلع ...

ـــــــــــــــــــــــ

«ديار»

تعشيت وصعدت للغرفه مالتي احضر ملابسي باچر دوام..
سمعت موبايلي يدگ رحت فتحت خط وحطيته على اذاني وثبته بكتفي...

ــ الووو...

ــ .....

ــ الوووو..
بس اريد افتهم شنو معنى هاي الحركه يوميا عايدها ثول...
واني شبيه الحد هسه ما مسويتلك بلوك..

سديت الخط وسويتله بلوك واتمنا الزمه واضربه بالنعال لان يوميا يسوي مدري تسوي كرهت روحي...

نمت ثاني يوم رحت للجامعه مهُره محاضره وحده دخلت والمحاضره الثانيه گالت..

ــ راح اطلع ياسر منتظرني بره نروح نجيب غراض للبيت..

ــ تمام قلبي اني راشد يرجعني للبيت..

راحت مُهره وخلصت المحاضرات اتصلت على راشد..

ــ ساعه يلا اوصلچ كلش ازدحام..

ــ راشد اني بالباب مالت الجامعه..

ــ رجعي دخلي من اتصل عليچ اطلعي..

سديت الخط وحطيت موبايلي بالجنطه والتفتت لگيت هذا الاجه خطبني واگف يمي..

ــ السلام عليكم..
ــ وعليكم السلام..

ــ عادي نحچي شويه..

ــ لا ما اگدر منتظره اخوي يجي ياخذني للبيت..

ــ بس 5 دقايق..

ــ لا... گتلك ما اگدر..

ــ زين بس سؤال..
شوكت تردين جواب الاهلي؟؟

ــ بابا يتصل بيكم بعدين..
ممكن هسه تروح..

شفت مالك نزل من السياره ويمشي بتجاهي لابس تيشرت اسود نص ردان وبنطرون اسود و مناظر شمسيه و ساد قبضة ايده بارزه الشرايين البيده كلها..
اتقرب عليه نزع المناظر ولزم ايدي وجرني..

ــ مااالك عوف ايدي شبيك...

سحبت ايدي منه وهذا الولد اجه يگله...

ــ انت منو ليش هيچ تجر ديار بنص الشارع؟؟

ــ انتَ منو؟

ــ اني خطيبها... ضحك مالك بصوت عالي..

ــ هذا خطيبچ؟؟

ديار: مالك روح و انته همين روح..

مالك: راشد گالي اخذها وياك البيتكم ميگدر يجي..

ــ منو هذا ديار؟

مالك: اذا متروح مناا والله العظيم اضربك ضربه تبقى اسبوع غيبوبه..

جرني من ايدي وصلنه للسياره فتح الباب وگال وهو ساد اسنانه..

ــ صعدي...

ــ احچي عدل..

ــ خليني محترمچ ديار و صعدي..

صعدت و ركع باب السياره بقوه مدري ليش خفت منه وبنفس الوقت مقهوره شلون هيچ يعاملني بنص الشارع
اول مره اشوف مالك يتصرف بتهور..

صعد بالسياره ومشه بسرعه..

ــ و زينب؟؟

ــ ممداومه..

سكت شويه وگف السياره وگال..

ــ يلا...

ــ شنوو؟؟

ــ يلا...

كلش انقهرت من افتهمت قصده انزل فتحت الباب مالت السياره وعاط...

ــ سدي البااااب...

ــ شتريد مااالك؟
ما جاي افتهمك والله...

مسح وجها وهمس استغفر الله..

ــ منو هذا؟

ــ ما اعرفه..

اتمنا اگله انته شكو بس المشكله كلش استحي منه.

ــ ليش يگول خطيبچ؟

ــ اجتي امه خطبتني بس اني ما اعرفه ولا حاچيه وياه.

ــ وافقتي؟

ــ لا..

ــ ليش؟

ــ ماالك ترى مو من حقك تسئلني..

ــ والله العظيم اذا شفته يمچ بعد الا يصير اخر يوم بحياته..

ــ انته شع...

ــ كملي... كملي ليش وگفتي؟؟
گولي انته شعليك علمود اموتچ هناا..

ــ هااااي شبيك ليش تصيح عليه وبعدين اي صحيح انته معليك بيه... شنووو تموتني ما خايفه منك ترى؟

صاح بصوت عالي گلبي صار بيدي من الخوف

ــ اني اريدچ..
احبچ صار سنين...
يجي واااااحد نعاااال ما يسوه
يريد يخطبچ؟

ــ انته راح تزوج شنو معنى هذا الكلام اريد افتهم؟

ــ ما اتزوج فصخت الخطوبه...

ــ واذا فصختها عبالك راح شنو اني افرح واجيك اضمك لو شنوو؟

ــ اني ردت انساچ بيها...

ــ ليش؟؟ حالك حال العالم تحب ابنيه اخطبها.
مو تروح الغيرها..

شغل السيار ومشى سريع وصلني البيتنه اول ما وگف السياره فتحت الباب ونزلت ورگعته وراي ورحت ركض الغرفتي..

جسمي كله يرجف من وره العصبيه گلبي يدگ على السريع...

بقيت افتر بالغرفه و تذكرة من گال

ــ اني احبچ صار سنين..

گعدت بالگاع ودموعي تنزل اني چنت اتعذب علمود اعرف مشاعره يحبني لو لا هسه گالي احبچ بس ليش گلبي محترگ وما اگدر اتنفس؟

تعبت من التفكير بـ مالك
كلش تعبني حبه...

گمت بدلت و حسيت ماكو مفر من تفكيري غير النوم غطيت راسي حتى ميجيني ضوه واغفى بسرعه بقيت ساعه اتگلب بالفراش واتذكر كلمه كلمه من حچيه....

ـــــــــــــــــــــــ

«مُهره»

رحت للجامعه ويه ديار و من خلصنه المحاضره
الاولى اتصل عليه ياسر..

ــ راح اجيب كم شغله للبيت بالمزرعه..
تجين وياي؟؟

ــ اي..

ــ يلا اني قريب طلعي..

گلت الـ ديار وطلعت شفت سيارته رحت صعدت بيها حسيت فرحانه اريد البيت يكمل ونروح نعيش بيه...

رحنه المكان بيه كاونترات اختار ياسر الون ابيض سئلني..

ــ ابيض احلى شي موو؟

ــ ايي..

اختارينه الشكل ورجعنه للسياره رحنه المكان يبيع قنفات اختاريت لو بيجي كلش حلوات ومريحات بقى ياسر يتفق وياهم اني طلعت انتظره يم السياره..

شويه وطلع رحنه المطعم تغدينه..
من اخير موقف صار بالسطح ما حچيت وياه هواي وهو همين حسيته ابتعد عني..

مرات ما اعرف ياسر شنو يريد يريد يقترب مني او يبتعد...
بس اكتشفت اني راحتي يمه وضحكتي بس وياه انسه كل المر عليه وهو يمي..

رجعنه للبيت اول ما دخلت لگيت ام راشد واگفه بالمطبخ..

ــ السلام عليكم..
ــ وعليكم السلام..

اجتي يمي وهي لازمه ماعون بـ أيدها و مشت من يمي ضربتني بكتفي و وگع الماعون منها وهي صاحت...

ــ شبيچ متشوفين...

بقيت صافنه عليها مصدومه اجه ياسر و راشد..

راشد: شكو يمه؟

ــ هاي الثوله دفعتني وگعت الماعون..

مُهره: اني؟؟

ام راشد: لا اني...

ياسر: يلا ما صار شي تعالي نصعد..

ام راشد: خلي تلم الگزاز وتصعد..

مُهره: يااسر اني واگفه وهي اجتي عليه تمشي سريع وضربت كتفي و وگع منها الماعون..

ياسر: ادري حبيبتي چنت اباوع عليكم..

اجه لزم ايدي وصعدني فوگ وام راشد صافنه علينه.
وصلنه للباب مالتنه عاف ايدي وطلع المفتاح وفتح الباب دخلت گبل للغرفه بدلت وگعدت اقره ما طلعت ابد..

صارت صلاة المغرب گمت صليت وقريت قرآن و اندگ الباب

ــ تفضل..

دخلت ديار وياسر وراها بس ديار مبينه مو طبيعيه اول ما شفتها سديت القران وگلت..

ــ شبيچ ديار؟

ــ شبيج انتِ ورجلچ مابيه شي..
بس والله طالع شكلچ يخبل بـ مالت الصلاة والقرآن بيدچ اووي فدوه...

ياسر: مبين واحد مضوج ديارنه...
احچي منو وياچ؟

ــ والله ما بيه شي بس چنت نايمه..

ياسر: تمام بكيفچ ما اضغط عليچ..

طلع ياسر وسد الباب و راه وهي اجتي گعدت يمي وحطت راسها على رجلي وگالت...

ــ اقري قرآن...

ــ ضحكتي على ياسر بس اني متضحكين عليه خلي اقرالچ قرآن شويه وتحچيلي كلشي...

قريتلها قرآن شويه وسديت القرآن باوعت على ديار تمسح دموعها گامت من حضني نزعت الأزار مالت الصلاة وشلت السجاده والقران و گعدت يمها..

ــ يلا احچي شبيچ؟
ادري بيچ تضمين عليه كومه سوالف بس اني مغلسه بس باعي شصار بيچ لان تضمين بگلبچ..

ــ اليوم من رحتو تشترون غراض وگفت بره منتظره راشد واجه هذا احمد الخطبني وگف يمي يگلي اريد احچي وياچ واجه مالك شافه يحچي وياي و لزمني من ايدي وجرني للسياره وبقى يصيح...

ــ شنو يصيح هو شعليه..

ــ يگلي هو يحبني..

ــ هو مو خاطب؟

ــ فاصخها...

ــ وانتِ؟

ــ شنو اني؟

ــ تحبينه؟ ابتسمت بحزن و نزلت راسها..

ــ صارلي سنين احبه ومنتظرته و هو راح خطب بنيه بالجامعه وياه امده گلبي الحبه..

ــ اي وشگلتيله..

ــ گالي ردت انساج بيها..

ــ زين انتِ ليش ضايجه؟

ــ مُهره صار سنين يوميا اتخيله يجي يگلي هو يحبني واليوم من اجه گلي تخيلي حسيت مقهورة اكثر من ما فرحانه..

ــ تعالي... ضميتها واني امسح على ظهرها وابوس بيها..

ــ لا تضوجين يا عمري..
كلشي مكتوب لا تعبين نفسچ..
اذا الله بعدچ عنه فـ المصلحتچ..

ــ ادري..

ــ يلا تعالي نقره شويه نوب نگوم نسوي عشا...

رحنه بالصاله يم ياسر قرينه شويه وگمنه اني وياها نسوي عشا هي تحضر العشا واني سويت زلاطه و مشغلين التلفزيون وشويه حاولت اضحكها واني وضعي انگس منها..

حضرنا العشا ورحت للغرفه اصيح الـ ياسر يجي يتعشى ويانه لگيته نايم على السرير و ضام المخده الصدره..

ــ ياسر... ياسر..

ــ هممم..

ــ تتعشى ويانه؟

فتح عيونه باوع عليه مسح وجها بـ أيده ولزم ايدي وسحبني عليه نمت بصفه اديه حاوطتني وچهي
قريب على وجها...

گلبي وگف من الصدمه..

ــ شبيك ياسر؟؟

ــ واحد من يجرب مره يصير مدمن..
ميگدر بعد يسيطر على نفسه..

حطيت اديه على صدره ادفع بيه

ــ وخر ياسر شبيك؟

تقرب على رگبتي يشم بيها ويطبع بوسات متفرقه
واني نسحلت سحل خجلانه ولمساته خلت جسمي
كله يرجف...

سمعت صوت ديار قريب..

ــ هاا مُهره وين رحتي... ادفع بيه وهو ولا يمه الحد ما ديار فتحت الباب ودخلت بسرعه گعدت وهو همين باوعت علينه و من الصدمه احتارت شتسويه رجعت تريد تطلع الباب مسدود انضرب راسها بالباب و ياسر يضحك بصوت عاالي واني گمت بسرعه طلعت وراها..
لگيت ديار واگفه بالصاله وتدگ على خدودها..

ــ عزا العزاني شگد ثوله شلون طبيت بدون ما ادگ الباب...

ــ تعالي يلا... خلي نتعشى..

ــ و ياسر؟

ــ ميريد..

ــ هذا كله وبالأخير ميريد؟
اگلچ... تقربت يمي تهمس..

ــ تممتو زواجكم؟

حطيت ايدي عل گصتها ودفعتها..

ــ احترمي نفسچ...

ــ ومرض.. هو غير انتِ الگلتيلي اني شمدريني..

ــ لا..

ــ لعد الچنتو تسوونه شنوو؟

ــ اسكتي ديار...

طلع ياسر غيرنه الموضوع سوينه روحنه نسولف بالعشا..

ياسر: مُهره لبسي حجاب اجه راشد يريد يتعشى ويانه..

رحت للغرفه بدلت ولبست حجاب وطلعت لگيتهم گاعدين منتظريني..

گعدت وياهم..

راشد: تأخر عليچ مالك لو اجاچ بسرعه؟

ــ لا ما تأخر..

ياسر: شنو مالك شجابه اني مو گتلك انته روحلها؟

راشد: اي مالك چان قريب على الجامعه واني بعيد وهي گالت واگفتلك بالباب گلت المالك جيبها وياك..

ياسر: بعد لا تعيدها راشد حتى لو بعيد ما اريد مالك يتقرب الـ ديار...

راشد: شنو ليش ترى هو خاطب و راح يتزوج...

ياسر : فصخ خطبته...

ديار: شلون عرفت؟

ــ هو گالي...

مُهره: ليش؟

ــ ميحبها.. ويگول عاداتها مو نفسنه..
عدهم عادي تطلع ويه الولد اصدقاء وكذا ومتلبس حجاب...

راشد: ليش خطبها من البدايه..

ياسر: شمدريني؟

خلصنه عشا گعدو راشد وياسر بالصاله واني وديار نغسل اماعين.. من كملنه گالت ديار..

ــ اگلچ مُهره..

ــ هاا.

ــ وجعااا شبيچ....

ــ شبيه؟؟

ــ امشي خلي نحضر ملابسنه اريد البس منچ باچر ..

ــ يلا امشي..

اول ما دخلنه للغرفه نزعت الحجاب و ديار تقربت مني تباوع برگبتي...

ــ شبيچ هييي؟

ــ ولچ رگبتچ زرگه...

ــ لا تچذبين...

رحت للمرايه اباوع على رگبتي ما بيها شي..

ــ ليش تچذبين؟؟

ــ اريد اخوفچ.. هههههه..

ــ تصرفات مال الزعاطيط..

ــ هو اني زعطوطه...

طلعنه ملابس ونسولق ونضحك شويه ونزلت ديار وراشد همين...

رحت للغرفه اجه ياسر وراي..

ــ ترى من اجيتي الهسه اني ما نايم مرتاح..

ــ ليش؟

ــ القنفه متكفيلي وتكسر ظهري..
قبل شويه نمت هنا وحسيت بالفرق...

ــ تعال نام هنا واني انام بره..

ــ لا... نامي هنا واني يمچ..

ــ لااا...

ــ ليش؟

ــ شنو ليش؟؟ احنه من البدايه متفقين كل واحد ينام الوحده..

ــ واني گايلچ تعاي نامي بحضني؟؟
ثنينه انام هنا بس بعيدين..

ــ لا شكراً... نام هنا واني انام بره...

اخذت مخدتي وطلعت حطيتها على القنفه واخذت الغطه رحت فرشت اسناني وحطيت مرطب ونمت على القنفه..

صدگ مو مريحه و ما متعوده على المكان بقيت ساعه كامله اتگلب منا ومنا والنوم طار من عيني و باچر دوام لازم اگعد من وقت..

طلع ياسر باوع عليه وراح للمطبخ رجع..

ــ هاا مو گتلچ مو مريحه..

ماحچيت وياه طب للغرفه درت وجهي على الجهى الثانيه سمعت باب الغرفه رجع انفتح وگمزت من حسيت ايدين حاوطتني ونرفعت...

ــ شتسوووي؟؟

ــ اششششش..

حاوطت رگبته بـ أديه واباوع عليه.
دخل للغرفه و حطني على السرير..

ــ نامي هنا اني راح اطلع..

من ابتعد شويه عني حسيت بتأنيب الضمير گبل مديت ايدي لزمت ايده و حچيت...

ــ ابقى....

يتبع🦋

ـــــــــــــــــــــــ

حبايب لا تنسون التصويت 🫶🏻